काठमाडौं । जारी कोपा अमेरिकामा अर्जेण्टिना उपाधी नजिक पुगेको छ । बुधबार बिहान सम्पन्न खेलमा कोलम्बियालाई पेनाल्टी सुटआउटमा ३-२ गोलले हराउँदै अर्जेण्टिना फाइनल पुगेको हो । निर्धारित ९० मिनेटको समय १-१ गोलको बराबरीमा सकिएपछि खेल पेनाल्टीमा पुगेको हो । खेलमा अग्रता भने अर्जेण्टिनाले मार्टिनेजको गोलमार्फत ६ औं मिनेटमै लिएको थियो । कप्तान लियोनल मेसीको सटिक पासमा उनले गोल गरेका हुन ।
खेलको ६० औं मिनेटमा कोलम्बियाका कार्डोनाले दर्शनीय गोल गर्दै खेल बराबरीमा ल्याए । त्यसपछि भने कुनै पनि टीमबाट थप गोल हुन् सकेन । पेनाल्टीमा भने अर्जेण्टिनाका गोलकिपर मार्टिनेज हिरो बने । उनले कोलम्बियाका तीन खेलाडीको प्रहार रोके । अर्जेण्टिनाका डी पोलको प्रहार समेत बाहिरिएको थियो । अर्जेण्टिनाका लागि पहिलो पेनाल्टी गोल भने कप्तान मेसीले गरेका हुन् ।