काठमाडौं । अमेरिकाबाट अनुदानमा आएको जोनसन एण्ड जोनसन कम्पनीको कोरोनाविरुद्धको खोप आजबाट देशभर लक्षित वर्गमा लगार्इंदैछ । खोप पुग्न बाँकी रहेका दुर्गम जिल्ला बाहेकका सबै जिल्लाहरुमा आजबाट खोप अभियान सुरु हुने स्वास्थ्य मन्त्रालयले जनाएको छ । अमेरिकाबाट कोभ्याक्स कार्यक्रममार्फत १५ लाख ३४ हजार ८५० डोज खोप नेपाल आएको छ ।
यो खोप २८ असारमा काठमाडौं आएको हो । यो खोप एक डोज मात्र लगाए पुग्छ । सोहीकारण १५ लाख ३४ हजार मानिसका लागि यो नै पूर्ण खोप हो । यो खोप ५० देखि ५४ वर्ष उमेर समूहका व्यक्ति, अपांगताको क र ख वर्गको परिचयपत्र पाएका व्यक्ति, नेपालमा बसोबास गरिरहेका शरणार्थी, सफाइकर्मी सहित पहिलो प्राथमिकतामा रहेका व्यक्तिलाई लगाइंदैछ । काठमाडौंमा ४४ वटा खोप केन्द्रबाट खोप वितरण हुने छ ।
