काठमाडौं । कोरोना भाइरसको तेस्रो लहर आउन सक्ने चेतावनी सरकारले दिएको छ । स्वास्थ्य तथा जनसङ्ख्या मन्त्रालयले कोरोना भाइरस सङ्क्रमणको तेस्रो लहर आउन सक्ने भन्दै सचेत रहन भनेको छ । मन्त्रालयका सहप्रवक्ता डा समिरकुमार अधिकारीले बिहीबार विज्ञप्ति जारी गर्दै निषेधाज्ञा खुकुलो भएसँगै सङ्क्रमण दर बढेको बताएका छन् । यसले तेस्रो लहरको जोखिम बढेको उनको भनाइ छ । तेस्रो लहर आउनसक्ने भएकाले सबै स्वास्थ्य सङ्घसंस्थालाई अक्सिजन, शैया लगायत पूर्वाधार तयारी अवस्थामा राख्न सेमेत अनुरोध गरिएको छ ।
मन्त्रालयबाट तेस्रो लहर आएर भयाभह स्थिति नआओस् भन्नका लागि सबै स्वास्थ्य संस्थालाई तयारी अवस्थामा राख्न अनुरोध गरिएको अधिकारीले उल्लेख गरेका छन् । सबै अस्पताललाई अक्सिजन भर्न र शय्या तयारी अवस्थामा राख्न सरकारले निर्देशन दिएको छ । तेस्रो लहरले बालबालिकालाई बढी प्रभाव पार्ने संभावना रहेको विज्ञहरुले बताएका छन् । नेपालमा अहिलेसम्म सात लाख २४ हजार ४५५ व्यक्तिमा सङ्क्रमण पुष्टि भइसकेको छ । ६ लाख ३६ हजार ४०२ व्यक्तिले कोरोना जितेका छन् । ९ हजार ६३७ जनाको मृत्यु भएको छ ।