वासिंटन डिसी । अफगानिस्तानबाट अहिलेसम्म १३ हजार मानिसको हवाई उद्धार भएको छ । अमेरिकी राष्ट्रपति जो बाइडेनले यस्तो आंकडा सार्वजनिक गरेका हुन् । ह्वाइटहाउसमा पत्रकारसँग कुरा गर्दै उनले यो अहिलेसम्मकै सबैभन्दा ठूलो उद्धार मिसन भएको समेत बताएका छन् । यसलाई उनले सबैभन्दा जोखिमपूर्ण उद्धार समेत भनेका छन् । बाइडनका अनुसार अमेरिकी फौजलाई सहयोग गरेका ६० हजार भन्दा बढी अफगानी नागरिकलाई समेत उद्धार गरिने छ ।
उनीहरु अफगानिस्तान छाड्न चाहिरहेका छन् । तालिबानले अफगानिस्तानमा कब्जा गरेपछि अमेरिकी फौजलाई सहयोग गरेका त्यहाँका नागरिकले असुरक्षित महसुस गरेका छन् । उता, तालिबानले समेत यनीहरुको घर घरमा पसेर तलासी लिएको खबर सार्वजनिक भइरहेका छन् । यो घटनामा अमेरिकाले ठूलो आलोचना बेहोर्नु परेको छ । बाइडेनले त्यहाँ रहेका सबै अमेरिकीले घर फर्कन चाहेमा उनीहरुलाई फर्काइने बताएका छन् ।
पहिलो प्राथमिकतामा अमेरिकी नागरिक हुने र त्यसपछि अफगानिस्तान छाड्न चाहने अन्य मुलुकका नागरिकको समेत उद्धार हुने उनले बताएकाछन् । अफगानिस्तानमा फैजले निकै कठिन परिस्थतिको सामना गर्नुपरेको भन्दै यो मिसन सहज नभएको उल्लेख गरे ।