काठमाडौं । अफगानिस्तानबाट अमेरिकी सैनिक पूर्ण रुपमा फिर्ता हुनु अघिसम्म ८२८ जना नेपाली घर फर्किएका छन् । सो मुलुकमा कति नेपाली रहेको थिए यकिन तथ्यांक सरकारसँग थिएन । सोहीकारण सरकारले सम्पर्कमा आउन भनेको थियो । परराष्ट्र मन्त्रालय स्रोतका अनुसार अझै ३४ जना नेपाली अफगानिस्तानमै छन् । उनीहरु नेपालमा उद्धार होस भन्ने पखाईमा छन् । बीबीसीका अनुसार अमेरिकी सेना पूर्ण रूपमा फिर्ता भए पनि त्यहाँ रहेका नेपालीको उद्धारको काम भने निरन्तर भइरहने छ ।
अमेरिकासहित विभिन्न देशले अघि बढाएको उद्धार कार्य बन्द भपछि भने उनीहरु कुन माध्यमबाट घर फर्कन सक्छन् भन्ने अन्यौल कायम छ । अहिले काबुल विमानस्थललाई तालिबानले नियन्त्रणमा लिइसकेको छ । बीबीसीका अनुसार अफगानिस्तानमा रहेका नेपालीहरूको उद्धारमा द्रुत प्रतिकार्य टोली गठन गरी दिल्लीबाट नेपाली दूतावासले सघाइरहेको छ ।
सम्पर्कमा आएका व्यक्तिहरूमध्ये अधिकांशको भने उद्धार भएको बताइएको छ । हालसम्म विभिन्न देश, कम्पनी र संयुक्त राष्ट्रसङ्घीय निकायहरूको सहयोग लिएर उद्धार कार्य अघि बढाइएको थियो । भारतका लागि नेपाली राजदूत निलाम्बर आचार्यलाई उदृत गर्दै बीबीसीले जनाए अनुसार झन्डै एक हजार नेपाली अफगानिस्तानबाट बाहरिएका छन् ।