काठमाडौं । नेपालमा अमेरिकी सहयोग निकाय मिलेनियम च्यालेञ्ज कर्पोरेसन (एमसीसी) सँगको सम्झौता कार्यान्वयनमा तिब्र विवाद र बहस जारी रहेको समयमा एक उच्चस्तरीय एमसीसीको टोलीले नेपाल भ्रमण गर्ने भएको छ । एमसीसीकी उपाध्यक्ष फातेमा जे सुमर नेपाल आउन लागेकी हुन् । उनको साथमा एमसीसी सहायक उपाध्यक्ष जोनाथन ब्रुक्स समेत रहने बताइएको छ । यो भ्रमण आगामी साता हुने सम्भावना छ । पाँच दिनसम्म नेपाल रहने टोलीले एमसीसी बारेमा प्रधानमन्त्री शेरबहादुर देउवा, सत्ता गठबन्धनका नेताहरू र प्रमुख विपक्षी दलका नेता केपी शर्मा ओलीसँग भेट्ने भएको छ ।
नेपालले २०७४ भदौ २९ मा ऊर्जा र सडक पूर्वाधार निर्माण गर्न ५ सय मिलियन अमेरिकी डलर अनुदान पाउने गरी एमसीसीसँग सम्झौता गरेको गरेको हो । यो सम्झौता संसदबाट अनुमोदन भएमात्र कार्यान्वयनमा आउँछ । तर, सम्झौताको चार वर्ष पुग्नै लाग्दा पनि सम्झौता कार्यान्वयनमा आउन सकेको छैन । नेपालमा एमसीसी पास नहुँदा अमेरिका भने असन्तुष्ट रहेको छ । नेपालमा एमाले भित्र एमसीसीका पक्षमा दुई धार छन् । माओवादी विपक्षमा र कांग्रेस पक्षमा रहेको छ ।