काठमाडौं । सोमबार बिहान १०) बजेको समयमा काठमाडौंको आकासमा एक जहाजले करीव १० फन्का लगायो । अन्य उडान अवतरण बन्द भएको समयमा एउटै जहाजले १० फन्को मार्दा काठमाडौंबासीलाई अचम्म लाग्नु स्भाविक थियो । त्यतिन्जेल संचारमाध्यमहरुमा खबर फैलियो, काठमाडौबाट विराटनगर उडेको जहाज त्यहाँ ल्याण्ड हुन नसकी काठमाडौं फर्किएको छ । समस्या थियो ल्याण्डिंग गिर नखुल्नु अर्थातः पांग्रा नखुल्नु ।
यो खबर काठमाडौं विमानस्थलले पाएसँगै विमानस्थलमा आकस्मिक अवतरणको सबै तयारी गरिएको थियो । आवश्यक परे फम विच्याएर आपतकालिन अवतरणको समेत तयारी थियो । तर, ल्याण्डिङ गियरले काम गरेको पुष्टी भएसँगै जहाजको सुरक्षित अवतरण भएको छ । जहाजमा रहेका यात्रुले पशुपतिनाथको कृपाले बाँचेको प्रतिक्रिया दिएका छन् ।
आजै बुद्धको जहाज पोखराका लागि उडेसँगै ककपिटमा धुँवा देखिएपछि काठमाडौं फिर्ता गरिएको विमानस्थल कार्यालयले जनाएको छ । दुबै घटनामा कुनै पनि मानवीय क्षति भने हुन पाएन । यी दुबै घटनामा कम्पनीले ‘सुरक्षामा शून्य सहनशीलता’को सिद्धान्त अपनाएको दावि गरेको छ । सोमबार बुद्ध एयरले विज्ञप्ति जारी गर्दै सुरक्षामा शून्य सहनशीलता अनुसार क्याप्टेनले जहाज तुरुन्तै काठमाडौं फर्काउने निर्णय लिएको बताएको छ ।
बुद्ध एयरका अनुसार जहाजमा ल्याण्डिङ गियरका लागि दुई वटा इन्डिकेटर हुन्छन् । सोमबार विराटनगरका लागि उडेको जहाज अवतरण गर्न खोज्दा प्राइमरी इण्डिकेटर देखिएन । विराटनगर विमानस्थलको एयर ट्राफिक कन्ट्रोलर (एटीसी) ले समेत जहाजको पाङ्ग्रा खुलेको देखेनन् ।
विमान काठमाडौं फर्कियो । किनकी फायर फाइटिङदेखि एम्बुलेन्ससम्म सुविधाका लागि काठमाडौं विमानस्थल सबैभन्दा सुरक्षित विमानस्थल हो । बुद्ध एयरका अनुसार प्राइमरी इन्डिकेटरमा नदेखिए पनि सेकेन्डरी इण्डिकेटरमा सबै ठीकठाक थियो । काठमाडौं आइसकेपछि क्याप्टेनलाई बुद्ध एयरको टेक्निकल टिमको रेडियो सम्पर्कमा ल्याण्डिङ गियर चेकजाँच गर्दा सही र झरेको जानकारी गराइएको थियो ।