वासिंटन डिसी । नेपालका तीन छिमेकी मुलुक भारत, पाकिस्तान र अफगानिस्तान जलवायु परिवर्तनका कारण सबैभन्दा जोखिममा रहेका ११ वटा मुलुकको सूचिमा परेका छन् । समाचार एजेन्सी रोयटर्सले जनाए अनुसार अमेरिकी गुप्तचर एजेन्सीको एक प्रतिवेदनले यस्तो देखाएको हो । प्रतिवेदनमा यी ११ मुलुक जलवायु परिवर्तनबाट सबैभन्दा जोखिममा पर्नेछन् । साथमा उनीहरुसँग सो समस्यासँग जुध्ने क्षमता समेत हुने छैन ।
रिपोर्ट अनुसार भारत, अफगानिस्तान, पाकिस्तान सार्क क्षेत्रबाट संवेदनशील देशको सूचिमा परेका हुन् । खासगरी जलवायु परिवर्तनको असरसँग लड्ने पूर्वतयारी नै नगरेका कारण यी मुलुक बढी जोखिममा पर्ने कारण औल्याइएको छ । अमेरिकाको सो एजेन्सीले बताए अनुसार बढ्दो तापमानका कारण यी भेगमा भुराजनीतिक तनाव समेत बढ्ने छ । यस रिर्पोटमा भारत, पाकिस्तान, अफगानिस्तान, म्यान्मार, इराक, उत्तर कोरिया, ग्वाटेमाला, हाइटी, होन्डुरस, निकारागुआ र कोलम्बिया रहेका छन् ।