कराँची । पाकिस्तानको पेशावर शहरमा भएको एक शक्तिशाली बम विष्फोटमा कम्तिमा ५६ जना मारिएका छन् । पेशावरको क़िस्सा ख़्वानी बजार इलाकामा शुक्रवार नमाज पढ्ने समयमा एक शिया मस्जिदमा यस्तो बम हमला भएको हो । अन्तर्राष्ट्रिय संचारमाध्यमले जनाए अनुसार घटनामा १९४ जना घाइते छन् । जसमा ९ जनाको अवस्था गम्भीर रहेको छ ।
लेडी रीडिङ्ग अस्पतालका प्रवक्ता मोहम्मद आसिमले बताए अनुसार मृत्यु हुनेको संख्या बढ्न सक्ने सम्भावना रहेको छ । निजी टिभि च्यानल जियो न्यूजका अनुसार हमला आत्मघाती थियो । हमलाकारीले पहिला गेटमा रहेका प्रहरीमाथि आक्रमण गरेको थियो । त्यसक्रममा एक पुलिस अधिकृतको समेत ज्यान गएको छ । शुरुमा धन्धाधुन्ध गोली चलाएको हमलाकारीपछि आफैलाई बमले उडाएको थियो ।