काठमाडौं । भारतको १५औँ राष्ट्रपतिमा चुनिएकी द्रौपदी मुर्मुले आज शपथ लिएकी छिन् । मुर्मु आदिवासी समुदायबाट राष्ट्रपति बन्ने पहिलो भारतीय महिला हुन् ।
शपथपछि मुर्मुलाई २१ तोपको सलामी दिइएको छ । उनले राष्ट्रका नाममा सम्बोधन गरेपछि र पदभार ग्रहण गर्ने छिन् ।
सत्तारुढ भारतीय जनता पार्टीको तर्फबाट मुर्मु राष्ट्रपति पदमा निर्वाचित भएकी हुन् । मुर्मु विपक्षी दलका यसवन्त सिन्हालाई पराजित गर्दै भारतको १५औं राष्ट्रपतिमा निर्वाचित भएकी हुन् ।
उडिशाको मयुरभञ्ज जिल्लामा जन्मेकी मुर्मु झारखण्डको अल्पसंख्यक सन्थाल जनजाति समुदायकी महिला हुन् । सन् १९५८ जुन २० मा जन्मिएकी मुर्मु सन् २०१५ देखि २०२१ सम्म झारखण्ड राज्यको राज्यप्रमुख बनेकी थिइन् ।