काठमाडौं । दक्षिणी इटलीको समुन्द्रमा मौसम बिग्रिएर डुङ्गा डुबेपछि १२ बालबालिकासहित कम्तीमा ५९ जना आप्रवासीहरूको मृत्यु भएको छ। दुर्घटनामा परी दर्जनौँ मानिस बेपत्ता भएको आशङ्का गरिएको छ। कलाब्रिया क्षेत्रको तटीय सहर क्रोटोन नजिकै रोक्ने क्रममा जहाज टुक्रा टुक्रा भएको थियो।
घटनापछि बाँचेका यात्रुले त्यसमा कम्तीमा १५० जना सवार रहेको बताएका छन्। उनीहरूमध्ये धेरै आफ्नो देशभित्रको कठिन अवस्थाका कारण पलायन भइरहेको इटलीका राष्ट्रपतिले बताए। घटनास्थलमा पुगेका आन्तरिक मन्त्री माटेओ पियानटेडोजीले ३० जना अझै बेपत्ता रहेको हुनसक्ने बताए।
इटलीको आन्सा समाचार एजेन्सीका अनुसार मृतकमध्ये केही महिनाको एउटा बच्चासमेत रहेको ठानिएको छ। शवहरू नजिकैको समुद्र तटबाट निकालिएको थियो। तट रक्षकले ूडुबेपछि किनारसम्म पुग्न सफल भएकाू सहित ८० जना मानिस जीवितै फेला पारेको जनाएको छ। यद्यपि, डुङ्गा दुर्घटना हुँदा त्यसमा कति मानिस थिए भन्नेबारे यकिन सङ्ख्या स्पष्ट छैन। उ
द्धारकर्मीहरूले एएफपी समाचार एजेन्सीसँग उक्त डुङ्गाले दुई सयभन्दा बढी मानिस बोकेको बताएका छन्। त्यसो हो भने अझै ६० भन्दा बढी मान्छे भेटिएका छैनन्। केही दिनअघि टर्कीबाट प्रस्थान गरेको उक्त डुङ्गामा अफगानिस्तान, पाकिस्तान, सोमालिया र इरानका यात्रु थिए। द्वन्द्व वा गरिबी छल्न भाग्ने थुप्रै मानिसहरू हरेक वर्ष अफ्रिका हुँदै इटली पुग्ने गरेका छन्।
प्रतिकुल मौसमका कारण चट्टानमा ठोक्किएपछि जहाज डुबेको विवरणहरू सार्वजनिक भएको छ। घटना लगत्तै समुद्रभित्र र बाहिर खोजी तथा उद्धार अभियान सुरु गरिएको छ। सार्वजनिक भएको एउटा भिडिओको अंशमा टुक्रा टुक्रा भएको काठको भग्नावशेष समुद्री तटसम्म पुगेको देखिन्छ। जीवितहरू रेडक्रसका कर्मचारीको सहयोगमा सिरक भित्र एकसाथ बसिरहका देखिन्छन्। दुर्घटनामा परेका कतिपयलाई अस्पताल पुर्याइएको छ।
गत वर्ष निर्वाचित इटालीकी प्रधानमन्त्री जोर्जा मलोनीले देशमा आप्रवासीहरूको आगमन रोक्ने प्रतिबद्धता जनाएकी थिइन्। उनले घटनाप्रति गहिरो दुःख व्यक्त गरिन् र यस्तो हुनुमा तस्करहरू जिम्मेवार रहेको बताइन्।
सुरक्षित यात्राको झुटो आशामा खरिद गरेको टिकटको मूल्यसँग मानिसको जीवन साट्नु अमानवीय काम हो। सरकार यस्तो क्रम रोक्न प्रतिबद्ध छ, उनले एक विज्ञप्तिमा भनेकी छन्। मेलोनीको दक्षिणपन्थी सरकारले आप्रवासीलाई इटलीको तटहरूमा पुग्न रोक्ने वाचा गरेको छ र पछिल्ला दिनहरूमा नयाँ कडा कानुनको आधारमा उद्धारसम्बन्धी नियमहरूलाई कडा बनाइएको छ।
BBC