काठमाडौं । असंलग्न आन्दोलन (नाम) को समन्वय ब्युरोको बैठकमा सहभागी हुन अजरबैजानको राजधानी बाकु पुगेका परराष्ट्रमन्त्री एनपी साउदले बुधबार बैठकलाई सम्बोधन गरेका छन् । यसका साथै उनी विभिन्न मुलुकका मन्त्री तथा राज्यमन्त्रीहरूसँग द्विपक्षीय भेटवार्तामा व्यस्त छन् ।
परराष्ट्र मन्त्रालयका अनुसार परराष्ट्रमन्त्री साउदले मलेसिया र भेनेजुयलाका परराष्ट्रमन्त्री, इथोपियाका परराष्ट्र राज्यमन्त्री र भियतनामका उपपरराष्ट्रमन्त्रीसँग द्विपक्षीय भेटवार्ता गरे । उक्त भेटवार्तामा द्विपक्षीय चासो र हितका विषयमा कुराकानी भएको मन्त्रालयले जनाएको छ । उनी मंगलबार त्यसतर्फ गएका हुन् । सोमबारदेखि सुरु भएको बैठक बिहीबार सकिनेछ । मन्त्री साउद शनिबार नेपाल फर्कने कार्यक्रम छ ।