१८ साउन, काठमाडौं । सीमित सुधारका बाबजुद गाजामा प्रवेश गर्ने सहायताको रकम ‘अत्यन्त अपर्याप्त’ रहेको जर्मन सरकारले शनिबार बताएको छ । विदेशमन्त्री जोहान वेडफुलले बिहीबार र शुक्रबार यस क्षेत्रको भ्रमण गरेपछि र जर्मन सेनाले गाजामा आफ्नो पहिलो खाद्य हवाई अवतरण गरेपछि जर्मनीले आलोचना गरेको हो ।
गाजामा सहायताका लागि काम गर्ने निकायहरूले २० लाखभन्दा बढी प्यालेस्टिनीहरू भोकमरीको सामना गरिरहेको बताएका थिए। जर्मनीका सरकारका प्रवक्ता स्टेफन कोर्नेलियसले एक वक्तव्यजारी गर्दै भन्नुभयो, “गाजा पट्टीका जनतालाई मानवीय सहायता वितरणमा प्रारम्भिक प्रगति सीमित रहेको छ, जुन आपतकालीन अवस्थालाई कम गर्न अत्यन्त अपर्याप्त छ।”
कोर्नेलियसले भने, “इजरायल पूर्ण रूपमा सहायता सुनिश्चित गर्न तयार हुनुपर्छ।” गाजामा आफ्नो सैन्य कारबाहीलाई लिएर अन्तर्राष्ट्रिय आलोचनाको सामना गरिरहेको इजरायलले थप ट्रकहरूलाई सीमा पार गर्न अनुमति दिएको छ र केही विदेशी राष्ट्रहरूलाई खाद्यान्न र औषधिहरूको हवाइमार्गबाट ढुवानी गर्न अनुमति दिएको छ। अन्तर्राष्ट्रिय एजेन्सीहरूले गाजामा प्रवेश गर्ने सहायताको मात्रा अझै पनि निकै धेरै कम रहेको बताएका छन्।
संयुक्त राष्ट्रसङ्घले प्यालेस्टाइनको कब्जामा रहेको क्षेत्रमा प्रवेश गर्न इजरायलबाट छ हजार ट्रक अनुमतिको पर्खाइमा रहेको जनाएको छ । परम्परागत रूपमा इजरायलको बलियो समर्थक जर्मन सरकारले पनि ‘हमास र आपराधिक सङ्गठनहरूले ठूलो मात्रामा मानवीय सहायता रोकेको भन्ने रिपोर्टहरू’प्रति चिन्ता व्यक्त गरेको छ। इजरायलले गाजा क्षेत्रमा आउने अधिकांश सहायता गाजा सञ्चालन गर्ने हमासले दुरुपयोग गरेको आरोप लगाउँदै आएको छ ।
इजरायली सेनामाथि प्यालेस्टाइनी आपराधिक सञ्जाललाई हमासविरुद्धको लडाइँमा सुसज्जित गरेको र उनीहरूलाई सहायता वितरणमा लुटपाट गर्न दिएको आरोप लागेको छ। मानवीय मामिलाको समन्वय गर्ने संयुक्त राष्ट्रसङ्घीय निकाय ओसीएचएका जोनाथन ह्विटलले मे महिनामा पत्रकारहरूसँग भन्नुभएको थियो, “युद्धको सुरुदेखि नै सहायताको वास्तविक चोरी आपराधिक गिरोहहरूले इजरायली सेनाको निगरानीमा गरेका छन्।”
जर्मनीको एक सरकारी स्रोतले एएफपीलाई बताएअनुसार इजरायलले गाजामा दैनिक करिब २२० वटा सहायता ट्रकको सङ्ख्या बढाएको छ । बर्लिनले हालैका हप्ताहरूमा गाजा र कब्जा गरिएको वेस्ट बैङ्कमा इजरायलको कदमविरुद्ध कडा कदम चालेको छ। स्रोतका अनुसार शनिबार जर्मन सुरक्षा क्याबिनेटको बैठकमा इजरायललाई दबाब दिने ‘विभिन्न विकल्प’बारे छलफल भएको थियो तर कुनै निर्णय भएको थिएन । इजरायललाई हतियार आपूर्तिमा आंशिक रोक लगाउनु एउटा विकल्प हो जुन उठाइएको छ।
सन् २०२३ को अक्टोबर ७ मा हमास लडाकूसमूहले इजरायलमा आक्रमण गर्दा एक हजार २१९ जनाको मृत्यु भएको एएफपीले जनाएको छ । गाजाको स्वास्थ्य मन्त्रालयका अनुसार त्यसयता इजरायलले गाजामा गरेको सैन्य कारबाहीमा कम्तीमा ६० हजार २४९ प्यालेस्टिनीको मृत्यु भएको छ । संयुक्त राष्ट्रसङ्घले मन्त्रालयको तथ्याङ्कलाई भरपर्दो मानेको छ ।