काठमाडौं । २०७७ सालमा शनिबारसहित कूल ६७ दिन सार्वजनिक बिदा हुने भएको छ । सरकारले आगामी वर्षको पात्रो सार्वजनिक गर्दै यस्तो जानकारी गराएको हो ।
यस वर्ष कूल ५२ दिन शनिबार पर्नेछ । त्यो बाहेक दशैंमा ५ दिन बिदा हुने भएको छ ।
तिहारमा तीन दिन बिदा राखिएको छ भने अन्य दिन मात्र ७ दिन सार्वजनिक बिदा हुने भएको छ ।
२०७७ सालको दशैंको टीका १० कात्तिकमा परेको छ । तिहारको भाइटिका १ मंसिरका दिन मनाइने भएको छ ।
दशैंमा कात्तिक ७ गते फूलपातीदेखि ११ गते एकादशीसम्म पाँच दिन देशैभर सार्वजनिक बिदा तोकिएको छ । तिहारमा कात्तिक २९ गते लक्ष्मी पूजादेखि मंसिर १ गते भाइटीकासम्म तीन दिन सार्वजनिक बिदा राखिएको पात्रोमा उल्लेख छ ।
शनिबार बाहेक बैशाख १ गते नयाँ वर्ष, बैशाख १९ गते मजदुर दिवस, असोज ३ गते संविधान दिवसका दिन सार्वजनिक बिदा तोकिएको छ ।
फागुन २४ गते अन्तर्राष्ट्रिय महिला दिवस, बैशाख २५ गते बुद्ध जयन्ती र फागुन २७ गते महाशिवरात्रिको दिन देशैभर सार्वजनिक बिदा राखिएको छ ।
चैत १५ गते आइतबार फागूपूर्णिमाको दिन ५६ जिल्लामा र चैत १६ गते बाँकी २१ जिल्लामा पनि सार्वजनिक बिदा हुने पात्रोमा उल्लेख छ ।