गजनी, अफगानिस्तान, २९ साउन (रासस–एएफपी) । पूर्वी अफगानिस्तानको निजी बगैँचामा ५०० किलोग्राम तौलको विस्फोट नभएको सोभियतकालीन बम फेला परेको प्रहरीले बिहीबार पुष्टि गरेको छ । संयुक्त राष्ट्रसङ्घ खानी नियन्त्रण सेवाका अनुसार सन् १९८९ मा सोभियत सेना फिर्ता भएयता युद्धका विस्फोटक अवशेष र बारुदी सुरुङबाट ४५ हजारभन्दा बढी अफगान मारिएका वा घाइते भएका छन् ।
“बुधबार प्रत्यक्षदर्शी एक स्थानीय बासिन्दाले आफ्नो घरको आँगनभित्र बगैँचा क्षेत्रमा शङ्कास्पद वस्तु’ फेला पारेका थिए,” गजनी प्रान्तका प्रहरी प्रवक्ता खालिद सरहादीले भने । सूचना लगत्तै सुरक्षा बल र ‘डेनिस रिफ्युजी काउन्सिल’को वम निस्क्रिय पार्ने टोली सिर गाउँको घरमा गएको सरहादीले एएफपीलाई बताए ।
“सोभियत कालको ५०० किलोग्राम बम भएको पुष्टि भएपछि यसलाई पहाडी क्षेत्रमा लगेर सुरक्षित रूपमा विस्फोट गराइएको थियो,” प्रहरी प्रवक्ता सरहादीले थपे । सोभियत सेना लगभग एक दशक लामो कब्जापछि अफगानिस्तानबाट फिर्ता भएको थियो, तर त्यसपछि अफगानिस्तानमा लगातार युद्धहरू भएका थिए ।
“देशभर विस्फोट नभएका गोलाबारुद बाँकी रहे पनि समस्या समाधानका लागि तैनाथ गरिएका टोलीको सङ्ख्या विगत दुई वर्षमा ६४ प्रतिशतले कटौती गरिएको छ,” अफगानिस्तानस्थित संयुक्त राष्ट्रसङ्घीय मिसनको विष्फोटक पदार्थ नियन्त्रण शाखाका प्रमुख निक पन्डले जुनमा एएफपीसँग भने । बताउनुभएको थियो ।