काठमाडौं । सरकारले कोरोना परिक्षणको दायरा बढाएको छ । बुधबारसम्म कूल २३६६ जनाको नमुना परिक्षण भएको छ । त्यसमध्ये ९ जनामा मात्र कोरोना पोजेटिभ पाइएको छ ।
स्वास्थ्य तथा जनसंख्या मन्त्रालयका प्रवक्ता डा. विकास देवकोटाका अनुसार लगातार चौथो दिन नेपालमा थप संक्रमित भने फेला परेनन् ।
सरकारले अहिले काठमाडौंस्थित केन्द्रिय प्रयोगशालासहित देशभर १० स्थानबाट कोरोनाको परिक्षण थालेको छ ।
जसले गर्दा पछिल्लो एक सातामा दोब्बरले नमुना परिक्षण भएको छ । तर, नेपालमा थप संक्रमित नभेटिनुलाई सकारात्मक रुपमा लिइएको छ ।
सरकारले यसअघि भेटिएका संक्रमितको नजिकका परिवार, उनीहरुले संगत गरेका व्यक्तिको पहिचान र परिक्षणलाई समेत तिब्रता दिएको बताएको छ ।
संसारभर १४ लाखभन्दा बढी मानिसमा फैलिएको यो रोगको संक्रमणले पौने १ लाख मानिसको ज्यान गइसकेको छ ।
सरकारले अहिले सुदुरपश्चिमका कैलाली र कंचनपुर तथा बागलुंगमा समुदाय स्तरमा परिक्षण बढाएको छ ।