Author: Vishwanews.com

काठमाडौं । प्रतिनिधि सभाको उपसभामुखमा पुष्पा भुसाल निर्वाचित भएकी छन् ।

शुक्रबार संसदमा भएको मतदानमा सत्ता गठबन्धनकी संयुक्त उम्मेदवार भुसालले १४८ मत पाएर निर्वाचित भइन्। प्रमुख प्रतिपक्षी दल नेकपा एमालेकी सांसद विद्या भट्टराईले ९३ मत पाइन्।

२०७६ साल माघ ६ गते तत्कालीन उपसभामुख शिवमाया तुम्बाहाम्फेले राजीनामा दिएपछि अहिलेसम्म खाली रहेको थियो ।

उपसभामुख निर्वाचित हुनु अघिसम्म भुसाल कांग्रेसको तर्फबाट सचेतक थिइन्। अर्घाखाँची पोखराथोककी पुष्पा भुसाल २०२८ सालदेखि राजनीतिमा आवद्ध छिन् ।

त्यस्तै उनी २०७४ सालको निर्वाचनमा भने उनी समानुपातिक तर्फको सूचीमा बसेकी थिइन्।

राजनीतिमा सक्रिय हुनुअघि पुष्पा अध्यापनमा समेत संलग्न थिइन्। उनले त्रिभुवन विश्वविद्यालयमा १७ वर्ष प्राध्यापन गरेकी थिइन्।

उनी वरिष्ठ अधिवक्तासमेत हुन्।

कुल सांसद : २७५
पदमुक्त : ४
निलम्बित : ४
कुल उपस्थिती : २४२
अनुपस्थित : २४
पुष्पा भुसालको मत : १४८ (विजयी)
विधा भटटराईको मत : ९३
मत दिन्न : १

काठमाडौं । सर्वोच्च अदालतले धिरजप्रताप सिंहलाई प्रहरी महानिरीक्षक (आईजीपी) नियुक्त गर्ने मन्त्रिपरिषदको निर्णय कानुनसम्मत भएको ठहर गरेको छ ।

कामु प्रधानन्यायाधीश दीपककुमार कार्की र न्यायाधीश कुमार चुडालको इजलासले सिंहलाई आईजीपी नियुक्त गर्ने मन्त्रिपरिषदको निर्णय कानुनसम्मत भएको ठहर गरेको हो ।

उक्त निर्णयसँगै सरकारले आफूभन्दा जुनियर धिरजप्रताप सिंहलाई नियुक्त गर्ने मन्त्रिपरिषद्को निर्णयविरुद्ध सर्वोच्च अदालतमा अतिरिक्त महानिरीक्षक (एआईजी) विश्वराज पोखरेलले दायर गरेको रिट खारेज भएको छ ।

शुक्रबार रिट निवेदक पोखरेलको तर्फबाट अधिवक्ताहरूले जवाफी बहस गरेका थिए। सुनुवाइ सकिएपछि सर्वोच्चले यो मुद्दामा फैसला दिएको हो।

यो मुद्दामा गत जेठ ३० गते अन्तिम सुनुवाइ सुरु भएको थियो। निवेदकले दुई दिन र प्रतिवादीले दुई दिन बहस गरेपछि निवेदकका तर्फबाट जवाफी बहससँगै सुनुवाइ टुंगिएको थियो।

वसन्तकुमार पन्त र रवीन्द्रबहादुर धानुकलाई एआईजी बढुवा गर्ने निर्णयविरुद्ध डीआईजीहरु ईश्वरबाबु कार्की, घनश्याम अर्याल र प्रकाशजंग कार्कीले हालेको रिट पनि सर्वोच्चले खारेज गरेको छ ।

साउन २० गतेदेखि अनिवार्य अवकाशमा जाँदै गरेका एआईजी पोखरेलसामु अब प्रहरी प्रधान कार्यालयमा हाजिर हुने वा राजीनामा दिने दुईमध्ये एक विकल्प बाँकी रहेको छ ।

काठमाडौं । साताको कारोबारको अन्तिम दिन शेयर बजार झिनो अंकले बढेको छ । कारोबार शुरु भएदेखि नै उकालो लागेको शेयर बजार मापक सूचक (नेप्से) ७.९३ अंकले बढेर २००९.४६ विन्दुमा पुगेको हो ।

नेपाल स्टक एक्सचेन्जका अनुसार बिहीवार २३१ कम्पनीको १ अर्ब ४५ करोड ६२ लाख ५९ हजार ८३२ रुपैयाँ बराबरको ४० लाख ५१ हजार ७७१ कित्ता शेयर किनबेच भएका छन् ।

आज दुईघण्टाको कारोबारमा आएका १३ उपसमूहहरू मध्ये ६ वटा बढेको छ भने ७ वटा घटेको छ ।म्युचुअल माइक्रोफाइनान्स समूह सबैभन्दा धेरै १.५७ प्रतिशतले बढेको छ भने अन्य समूह १.६८ प्रतिशतले घटेको छ ।

एकल अंकले बढेको बजारमा आज आधादर्जन म्यूचुअल फण्ड र डिबेन्चरको शेयर मूल्यमा पोजेटिभ सर्किट लागेको छ । नेपाल इन्भेष्टमेन्ट डिबेन्चर २०८२ र माछापुच्छे डिबेन्चर २०८५ का धनीले ठ्याक्कै १० प्रतिशत कमाएका छन् ।

त्यसैगरी, सानिमा बैंक डिबेन्चर २०८५, एनआइसी एशिया डिबेन्चर २०८३, कृषि विकास बैंक डिबेन्चर २०८३, नबिल ब्यालेन्स फण्ड ३ र आरबीबी म्युचुअल फण्ड १ का इकाईधनीले करिब १० प्रतिशत कमाएका छन् ।

नेप्सेका अनुसार आज ग्रीन लाइफ हाइड्रोको शेयरमूल्यमा उच्च गिरावट भएको छ । यस कम्पनीको शेयरमूल्य ५ प्रतिशत भन्दा बढीले घटेको हो ।

आज अपर तामाकोशीकोे सर्वाधिक कारोबार भएको छ । यसको पौने २० करोड रुपैयाँ बढीकोे शेयर किनबेच भएको छ । त्यस्तै, एभरेष्ट बैंक झन्ड ७ करोड र किसान लघुवित्तको प्रमोटर शेयर साढे ५ करोड बढीको कारोबार हुँदै शीर्ष तीनमा रहे ।

काठमाडौ । प्रधानमन्त्री शेरबहादुर देउवाले गभर्नर महाप्रसाद अधिकारीले राजीनामा दिनुपर्ने बताएका छन् । आज बालुवाटारमा भएको सत्ता साझेदार दलहरुको बैठकमा प्रधानमन्त्री देउवाले अधिकारीले नैतिकताको आधारमा राजीनामा दिनुपर्ने बताएका हुन ।

बैठकमा शीर्ष नेताहरुले गर्भनर एमालेको आर्थिक विभागमा समेत रहेको विषयमा प्रश्न उठाएपछि देउवाले सो कुरा बताएको नेताहरुले बताएका छन । अर्थ मन्त्रालयको समेत जिम्मेबारी सम्हालेका प्रधानमन्त्री देउवाले बिहीबार आफुले गर्भनरसँग समेत पछिल्लो विवादको विषयमा कुरा गरेको बताएका छन ।

गभर्नर अधिकारीले मौद्रिक नीति सार्वजनिक गरेपछि आफुले उपयुक्त निर्णय लिने आश्वासन प्रधानमन्त्री देउवालाई दिएको बताइएको छ ।

एम अधिकारी, खोटाङको नाममा नेकपा एमालेको अर्थ तथा योजना विभागको सदस्यमा सहभागी भएपछि गभर्नर अधिकारी विवादमा छन । एमालेले भने गभर्नर अधिकारी एमालेको आर्थिक विभागको सदस्य नरहेको स्पष्टीकरण दिएको छ ।

काठमाडौं, ३० असार । पछिल्लो २४ घण्टामा नेपालमा २६० जनामा कोरोना संक्रमण पुष्टी भएको छ ।

स्वास्थ्य तथा जनसंख्या मन्त्रालयका अनुसार २ हजार २७ जनाको पीसीआर परीक्षण गर्दा २१४ जना र १ हजार ८१७ जनाको एन्टिजेन परीक्षण गर्दा ४६ गरी २६० जनामा कोरोना भाइरसको संक्रमण देखिएको हो ।

योसँगै नेपालमा कोरोना संक्रमितको संख्या ९ लाख ८० हजार ९८१ जना पुगेको छ ।

पछिल्लो २४ घण्टामा ४८ जना संक्रमण मुक्त भएका छन् । यो सहित संक्रमण मुक्त हुनेको संख्या ९ लाख ६७ हजार ८५८ पुगेको छ । सक्रिय संक्रमितको संख्या११७१ रहेको छ ।

पछिल्लो २४ घण्टामा मृत्यु हुनेको संख्या शून्य रहेको छ । नेपालमा कोरोना मृत्यु हुनेको संख्या ११ हजार ९५२ पुगेको छ ।