काठमाडौं । सरकारले चैत २५ देखि देशभरका ७५ लाख बालबालिकालाई टाइफाइडविरुद्धको खोप दिइने भएको छ।
मंगलबार पत्रकार सम्मेलन गरि सरकारले सरकारले पहिलो पटक बालबालिकालाई टाइफाइडविरुद्धको खोप दिन लागेको जनाएको हो ।
यो अभियान आगामी चैत २५ देखि बैशाख १८ गतेसम्म चल्ने जनाएको छ। १५ महिनादेखि १५ वर्ष उमेरसमूहका बालबालिकालाई एक मात्रा खोप दिनेछ ।
२४ दिने राष्ट्रव्यापी अभियानको अवधिमा सरकारले १५ महिनादेखि १५ वर्ष मुनिका झण्डै ७५ लाख बालबालिकासम्म पुग्ने लक्ष्य राखेको छ।
अभियानको क्रममा टाइफाइड खोप स्थानीय तहको प्रत्येक वडामा तोकिएको विद्यालयहरूको खोप केन्द्रमा उपलब्ध हुने स्वास्थ्य सेवा विभाग परिवार कल्याण महाशाखाका निर्देशक डा. विवेककुमार लालले बताए ।
खोपको प्रभावकारिताको अध्ययनले टाइफाइड खोपबाट यो रोगको संक्रमणमा उल्लेखनीय रुपमा कमी ल्याउन सकिने पुष्टि गरेको डा लालको भनाइ छ ।
टाइफाइड खोपबाट यो रोगको संक्रमणमा उल्लेखनीय रुपमा कमी ल्याउन सकिने पुष्टि गरेकोले राष्ट्रिय खोप सल्लाहकार समितिबाट १४ अगष्ट, २०२० मा टाइफाइड खोपलाई राष्ट्रिय खोप कार्यक्रममा समावेश गर्न सिफारिस गरिएको थियो।
विश्व स्वास्थ्य संगठनले टाइफाइड खोपलाई नेपालसहित सबै टाइफाइड प्रभावित देशहरूमा प्रयोगको लागि सिफारिस गरेको छ।
यो खोप अभियानसँगै टाइफाइड खोपको सुरुवात गर्ने नेपाल दक्षिण एसियामै पहिलो राष्ट्र रहेको स्वास्थ्य तथा जनसंख्या मन्त्रालय अन्तरगतको परिवार कल्याण महाशाखाले जनाएको छ।
नेपालमा हाल दिन लागिएको खोप टाइफाइड कन्ज्युगेट भ्याक्सिन हो । यो विश्व स्वास्थ्य संगठनले सिफारिस गरेको र यो विश्वका धेरै देशमा प्रयोग भइरहेको छ ।
टाइफाइड बारे जानकारी
टाइफाइड साल्मोनेला टाइफी(Salmonella Typhi)बाट हुने गम्भीर रोग हो जुन ढल वा संक्रमित व्यक्तिको दिसाामा पाइने टाइफाइड रोगको जीवाणु स्वस्थ व्यक्तिमा दूषित खाना वा पानीको माध्यमबाट सर्दछ ।
यो रोग लागेमा उच्च ज्वरो आउने, टाउको दुख्ने,जिउदुख्ने, पसिना आउने ,पखाला लाग्ने र बान्ताहुने हुन्छ साथै कहिलेकाहीँ ज्यानै जान पनि सक्छ ।
विगत ५ वर्षको तथ्याँकअनुसार नेपालमा वर्षेनी औसत ४ लाख ५० हजार जनाभन्दा बढीमा टाइफाइड रोग संक्रमण पुष्टि भएको पाईएको छ ।
विगत ३ वर्षको तथ्यांकअनुसार पानी तथा खानाजन्य संक्रामक रोगहरु मध्ये तेश्रो र अस्पताल भर्ना हुने कारणहरु मध्ये यो रोग चौथो कारणमा रहेको देखिएको छ ।
यो रोगको संक्रमण सबै उमेर समूहमा हुन्छ तर १५ वर्ष मुनीकाबालबालिकामाअन्य उमेर समूहभन्दा बढी संक्रमण देखिएको छ ।
त्यस्तै पछिल्लो Global Burden of Disease Analysis २०१९ अनुसार नेपालमा ८२,४४९ टाइफाइडका बिरामीहरु रहेको अनुमान गरेको छ ।
जसमध्ये ६० प्रतिशत १५ वर्ष भन्दाकम उमेर समूहका बालबालिका रहेका छन् । हालसालैको तथ्याङ्कले औषधि प्रतिरोधी टाइफाइडमा वृद्धि भएको पनि देखाउँछ ।
