जङ्जो । चीनमा बाढीको कहर जारी छ । मङ्गलवार त्यहाँ एक व्यस्त भूमिगत रेल स्टेशनमा बाढी पसेको छ । यसले ठूलो भौतिक क्षति गरेको छ । यात्रुमा भने भागाभाग भएको बीबीसीले लेखेको छ । केही मानिसलाई बाढीले बगाएर प्लेटफर्म भन्दा टाढासम्म पुर्याएको छ । रेलको एउटा खण्डमा पानी छिरेर मानिसहरूको घुँडाबाट कम्मर हुँदै पछि घाँटीसम्म पुगेको समाचारमा उल्लेख छ । कैयौँ घण्टापछि त्यहाँ फसेका मानिसहरुलाई उद्धार गरिएको थियो ।
यो जङ्जो सहरुको घटना हो । जङ्जो सहरमा क्रमिक रूपमा सयौँ मानिसहरूलाई बाढीका कारण डुबेको सबवेबाट बचाउन उद्धारकर्ताहरू सफल भएको समाचारमा जनाइएको छ । खनान प्रान्तस्थित एल्लो रिभरको किनारमा रहेको उक्त सहरमा १ करोड २० लाख मानिस बस्छन् । पछिल्लो घटनामा कम्तीमा १२ जनाको मृत्यु भएको र पाँच जना घाइते भएको समाचार छ ।
बाँके । बाँकेमा कपाल काटिसकेपछि खोलामा नुहाउन पसेका तीन किशोरको खेलामा डुबेर ज्यान गएको छ । प्रहरीका अनुसार कोहलपुर नगरपालिका वडा नम्बर १० चटारमा रहेको डुडुवा खोलाको बाँधमा डुबेर तीन किशोरको ज्यान गएको हो । घटना बुधबारको हो । ज्यान गुमाउनेमा नेपालगञ्ज उपमहानगरपालिका वडा नम्बर ११ का १७ वर्षीय आरिफ जसगर, अरमान जसगर र १८ वर्षीय रासिद जसगर छन् । साथिहरु मिलेर कपाल काटेपछि उनीहरु नुहाउन पसेका थिए । पौडी खेल्ने क्रममा तीन जना बेपत्ता भएको खबर प्रहरीलाई पुगेको थियो । त्यसपछि भएको खोजीमा उनीहरुको शव भेटिएको हो । थप दुई जनालाई भने सकुसल उद्धार गरिएको छ ।
काठमाडौं । नेकपा एमालेमा करीव एक वर्ष देखि बल्झिएको विवाद अझै जारी छ । एमालेका वरिष्ठ नेता माधव कुमार नेपाल समूहले निरन्रत अडानसहित पार्टी अध्यक्ष केपी शर्मा ओलीमाथि दवाव बर्ढापछि ओलीले आफु वरिष्ठ नेता माधवकुमार नेपाललाई दोस्रो अध्यक्ष बनाउन तयार रहेको घोषणा गरेका छन् । एमालेको केन्द्रीय कमिटीको बुधबार बसेको बैठकमा उनले यस्तो घोषणा गरेका हुन् ।
तर नेता नेपालले बहुमत नभएको कमिटीमा नजाने भन्दै अडान राखेपछि सहमति जुट्न नसकेको उनको भनाई छ । पार्टी एक्ताका लागि आफु हदै लचिलो बनेको भन्दै उनले अझै पनि एकताको प्रयास जारि रहेको बताएका हुन् । केही समय अगाडी निकै आक्रामक ओली अब रक्षात्मक अवस्थामा पुगेका छन् । सत्ताच्यूत भएसँगै एमालेको दोस्रो खेमाले उनलाई अध्यक्षबाट समेत हटाउने बताएको छ ।
पार्टीमा एकता कायम भए सबै संरचना ०७५ जेठ २ कै अवस्थाबाट क्रियाशील हुने समेत उनको भनाई छ । एमालेबाट कांग्रेस सभापति देउवालाई विश्वासको मत दिएका सांसदसहितको बैठकमा नेताहरुले अब ओलीलाई हटाएर मात्र एकता हुने भन्दै आक्रामक रुपमा लाग्ने गरि छलफल अगाडी बढाएका छन् ।
मुम्बई । बलिउडकी चर्चित नायिका शिल्पा शेट्टीका श्रीमान राज कुन्द्राको अश्लिल फिल्मको धन्धा बाहिरिएसँगै यतिबेला संचारमाध्यममा उनी छाएका छन् । पोर्न भिडियोबाटै दैनिक ५ लाख भन्दा बढी आम्दानी हुन थालेपछि उनी यो धन्धामा लागेको खुलेको छ । कुन्द्रा व्यापारी हुन् । उनी अर्बपति पनि हुन् । शिल्पासँग उनको दोस्रो विवाह हो । पोर्न सामग्री बनाउने धन्धामा श्रीमति शिल्पाको सहभागिताको पुष्टी भएको छैन ।
प्रहरीले यसबारे समेत अनुसन्धान गरिरहेको भारतीय संचारमाध्यमले लेखेका छन् । राज कुन्द्राबारे आएका अनेक सामग्रीमध्ये एकमा उनको नेपाल कनेक्सनबारे खुलासा गरिएको छ । यो खुलासा बीबीसी हिन्दीले गरेको हो । २९ वर्षको उमेरमा बेलायतमा रहने सबैभन्दा धनी एसियाली नागरिकमध्ये उनी १९८ औं सूचिमा रहेका थिए । यो २००२ मा निकालिएको एक रिर्पोटको तथ्य हो । शिल्पा र राजका दुई पुत्र छन् ।
के हो नेपाल कनेक्सन बीबीसी हिन्दीका अनुसार राज कुन्द्राका पिता बालकृष्णन कुन्द्रा केही बर्ष पहिले लन्डन गएका थिए । उनले सुरुमा कटन उद्योगमा काम गरेका थिए । त्यसपछि उनी बसको कन्डक्टर बने । लन्डनमा नै राज कुन्द्राको जन्म भएको हो । १८ बर्ष पुगेपछि राज कुन्द्रालाई उनका पिताले काम गर्न सल्लाह दिए । त्यसपछि पिताले लगानी गर्न दिएको पैसा लिएर उनी दुबई गए । त्यहाँ केही समय बसेपछि उनी नेपाल आए । उनलाई कसैले पश्मिना सलको व्यापार गर्न सुझाव दियो ।
Photo : thehindubusinessline.com
राज कुन्द्रा यो व्यापारबाट मालामाल भए । यो सन् १९९४ को कुरो हो । जब उनी नेपाल आए, नेपालबाट उनले एक कन्टेनर पश्मीना शल लण्डन लगे । शल ब्रिटिश फेसन हाउसमा सप्लाई गरे । पहिलो बर्षमा नै उनले करिब दुई करोड पाउन्डको फाइदा कमाए । यसपछि भने उनले पछाडी फर्केर हेर्नु परेन । यहाँबाट सुरु भएको उनको व्यापार अहिले भने सामाज्य बनिसकेको छ । त्यसपछि उनी दुबईबाट हिराको व्यापारमा चम्किए ।
अभिनेत्री शिल्पा शेट्टीसँग विवाह गरेपछि यो जोडीले आइपीएलको टीम राजस्थान रोयल्सको सेयर खरीद गरेको छ । सन् २०१२ मा राजमाथि आइपिएलमा सट्टेबाजी गरेको आरोप लाग्यो । उनको टीमले दुई बर्षको प्रतिवन्ध भोग्यो । त्यसपछि भने राजले राजस्थान रोयल्सको आफ्नो सेयर बेचे ।
काठमाडौं । पोखराको मूख्य पर्यटकीय आकर्षण फेवातालको डुङ्गा शयर पुनः सञ्चालनमा आएको छ । कोरोना भाइरसको महामारी बढेसँगै फेवातालमा ढुंगा व्यवसाय समेत रोकिएको थियो । निषेधाज्ञा लागु भएपछि १४ वैशाखबाट फेवातालमा डुंगा चलाउन बन्द भएको थियो । डुङ्गा व्यवसाय सोमबारदेखि सञ्चालनमा आएको राससले लेखेको छ । डुङ्गा चढ्दा यात्रुले मास्क अनिवार्य लगाउनु पर्छ । भीडभाड हुन नदिन २० फुटे डुङ्गामा चार र १८ फुटेमा तीन जना राखेर सञ्चालन गरिएको छ ।
यसअघि आठ\नौ जनासम्म राख्ने गरिएको थियो । दैनिक आठदेखि नौ वटा डुङ्गाले व्यवसाय शुरु गरिएको छ । यसबाट सो व्यवसायमा आश्रित मजदुरले काम पाउने अपेक्षा गरिएको छ । तालमा डुङ्गा सञ्चालनमा आएको भएपनि तालबाराही मन्दिर दर्शन भने अझै खुला गरिएको छैन । नेपालमा निषेधाज्ञा खुकुलो भएसँगै आन्तरिक पर्यटनमा पुनः चहलपहल शुरु भएको छ । शहर नजिकका रिर्सोटहरुमा पाहुनाको भिड लाग्न थालेको छ ।
काठमाडौं । नेपाली कांग्रेसका सांसद अमरेश कुमार सिंहले सांसद पदबाट राजिनामा गरेका छन् । उनले पार्टी सभापति तथा प्रधानमन्त्री शेरबहादुर देउवा समक्ष सांसद पदबाट दिएको राजीनामा पत्र थमाएका छन् । कांग्रेसको महाधिवेशन नजिकिएको छ । यो असन्तुष्टी महाधिवेशनका सन्दर्भमा उठेको असन्तुष्टीको एक झिल्को मात्र हो ।
क्रियाशील सदस्यता विवादलाई लिएर नेता सिंहले बुधबार प्रधानमन्त्री देउवालाई भेटेर राजीनामा पत्र बुझाएका हुन् । क्रियाशील सदस्यता विवादलाई लिएर कांग्रेस पार्टी कार्यालयमा सर्लाहीका नेता तथा कार्यकर्ता धर्ना बसिरहेका छन् । उनीहरुले पार्टी विधानविपरीत क्रियाशील सदस्यता दिएको आरोप लगाएको छन । यो काम रोक्नुपर्ने उनीहरुको भनाई छ । धर्नामा बसेका नेता तथा कार्यकताको मागमा सहमति जनाउँदै आफुले सांसद पदबाट राजिनामा गरेको उनको तर्क छ ।
प्रधानमन्त्रीलाई राजिनामा पत्र थमाउनु अगाडी उनले वरिष्ठ नेता रामचन्द्र पौडेल, महामन्त्रीद्वय शशांक कोइराला र पूर्णबहादुर खड्कासँग भेटेका थिए । उनी सर्लाही क्षेत्र नम्बर ४ बाट निर्वाचित सांसद हुन् । उनको गुनासो कांग्रेसले ठेकेदार र व्यापारीलाई क्रियासिल सदस्यता दिएर कार्यक्रतामाथि अन्याय गरेको प्रति छ ।
काठमाडौं । पछिल्लो २४ घण्टामा देशभर २८३८ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामा ८७१५ पीसीआर परीक्षणमा १९१८ र ३९०१ जनाको एन्टिजेन परीक्षणमा ९३१ जना गरी २८३८ जनामा संक्रमण पुष्टी भएको हो ।
यो सहित नेपालमा कोरोना संक्रमितको संख्या ६ लाख ७१ हजार ८७१ पुगेको छ । पछिल्लो २४ घण्टामा १४७५ जना संक्रमण मुक्त भएका छन् । यो सहित संक्रमण मुक्त हुनेको संख्या ६ लाख ३४ हजार ४०२ जना पुगेको छ । संक्रिय संक्रमितको संख्या २६ हजार ८३२ रहेको छ ।
पछिल्लो २४ घण्टामा ३० जना संक्रमितको मृत्यु भएको छ । यो सहित नेपालमा कोरोना मृत्यु हुनेको संख्या ९ हजार ६३७ पुगेको छ ।
काठमाडौं । नेपाली कांग्रेसका नेता गगन थापाले विदेशमा गरिएको उपचार खर्च व्यहोर्न नमिल्ने भन्दै प्रधानमन्त्री शेरबहादुर देउवाको ध्यानाकर्षण गराएका छन् ।
नेता थापाले नेकपा एमालेका वरिष्ठ नेता तथा पूर्वप्रधानमन्त्री झलनाथ खनालको उपचार खर्च सरकारले व्यहोर्ने समाचार सार्वजनिक भएपछि नेता थापाले सरकारको निर्णय गैरकानुनी भएको भन्दै सामाजिक सञ्जालमार्फत प्रधानमन्त्री देउवाको ध्यानाकर्षण गराएका हुन् ।
‘२०७४ सालमा बनेको जनस्वास्थ्य ऐनमा हाम्रै पहल र संशोधनमा ‘प्रचलित कानुनमा जुनसुकै कुरा लेखिएको भए तापनि कुनै व्यक्तिलाई विदेशमा उपचार गर्नु परेमा सोको लागि लाग्ने खर्च नेपाल सरकारबाट उपलब्ध गराइने छैन’ भन्ने व्यवस्था छ र उक्त कान्न २०७५/६/२ गतेदेखि लागु भइसकेको छ,’ थापाले सामाजिक सञ्जालमार्फत भनेका छन् ।
उनले लेखेका छन्, ‘यो कानुन कार्यान्वयनमा आइसकेको अहिलेको अवस्थामा नेपालको बहालवाला राष्ट्रपति, प्रधानमन्त्रीदेखि अन्य कसैको पनि विदेशमा भएको उपचारको खर्च नेपाल सरकारले व्यहोर्न पाउँदैन । कानुनको यो व्यवस्थाको सम्बन्धमा सम्मानीय प्रधानमन्त्री प्रष्ट हुनुहुन्छ भन्ने मलाई विश्वास छ ।’
उनले अहिले खनालको स्वास्थ्योपचारको चर्चा भइरहेको र त्यसमा उनको पार्टीले पहल गरिरहेको भन्दै अप्ठेरो अवस्था भए सबैले सहयोग गर्नुपर्ने बताएका छन् ।
‘जहाँसम्म पूर्वप्रधानमन्त्री झलनाथ खनालको उपचारको सन्दर्भ छ, हामी सबै उहाँको शीघ्र स्वास्थ्यलाभको कामना गरिरहेका छौँ । नेपालको लोकतान्त्रिक आन्दोलनमा अभूतपूर्व योगदान पुर्याउनुभएका झलनाथ खनालले पछिल्लोपटक निजी नाफा–घाटाको हिसाब नगरी संविधान र लोकतन्त्रको पक्षमा आफूलाई जसरी उभ्याउनुभएको छ, यसले उहाँको कद अझ बढेको छ,’ उनले भनेका छन्, ‘झलनाथ खनालसमेतको अडान र नेतृत्वदायी भूमिकाका कारणले जोगिएको संसद्मा सँगै काम गर्न हामी प्रतीक्षारत छौँ । मलाई विश्वास छ, हाम्रो चाहना छिटै पूरा हुनेछ ।’
उनले खनालको उपचारको लागि परिवार, स्वजन, पार्टीपंक्ति लागिरहेको बताएका छन् । ‘उहाँलाई उपचार खर्च जुटाउनुपर्ने अवस्था नै आएमा त्यसको लागि देश–विदेशमा रहेका हामी सबै नेपाली हरदम तयार छौँ र रहन्छौँ नै,’ थापाले भनेका छन्, ‘यस्तो बेलामा उहाँको विदेशमा गरेको उपचारको खर्च सरकारले व्यहोर्ने भन्ने विषय उठाई उहाँको बारेमा अनावश्यक टीकाटिप्पणी गर्ने वातावरण बनाएर उहाँ र उहाँको परिवारलाई दुःखी नबनाऊँ ।’
थापाले खनालको उपचारका विषयमा अनावश्यक चर्चाले उनको कद घटाउने पनि बताएका छन् । ‘कुनै पनि व्यक्तिले विदेशमा गरेको उपचार खर्च राज्यले व्यहोर्ने विषय गैरकानुनी हो र अघिल्लो सरकारले कानु्नविपरीत गरेको निर्णयको भारी यो सरकारले बोक्ने छैन भन्ने कुरामा तपाईं सचेत हुनुहुन्छ र तपाईंको भनाइ उद्धृत गर्दै आएका समाचार गलत हुन् भन्ने विश्वास छ,’ थापाले भनेका छन् ।
टेक्सास । अन्तरिक्ष वैज्ञानिक बाहेक आम सर्वसाधारणका लागि अन्तरिक्ष यात्रा एक सपना मात्र हो । तर यो सपना पुरा गरेका छन् । अमेरिकी अर्बपति जेफ बेजोस र अन्य तीन यात्रुले । उनीहरुले मंगलबार अन्तरिक्षको सफल यात्रा पुरा गरि धर्तिमा ओर्लिएका छन् । अन्तरिक्ष पर्यटनलाई बढावा दिन यो अभियान शुरु गरिएको हो । बेजोसको आफ्नै कम्पनी कम्पनी ब्लु ओर्जिनले बनाएको अन्तरिक्ष यान ‘न्यु सेफर्ड’मा उनीहरूले यात्रा गरे ।
मंगलबार साँझ १० मिनेटमा यो यात्रा पुरा गरेका उनीहरु सकुसल अवतरण भए । बीबीसीका अनुसार यो यात्रामा बेजोसका भाइ मार्क, पूर्वपाइलट ८२ वर्षिय महिला वाली फन्क र १८ वर्षीय किशोर ओलिभर डाइमेन पनि थिए । यसमध्ये ती महिला र किशोरले सबैभन्दा बढी र कम उमेरमा अन्तरिक्ष जाने रेकर्ड समेत बनाएका छन् । फन्क सन् १९६० तिरै नासामार्फत अन्तरिक्षमा जाने तयारीमा रहेको भएपनि सफल भएकी थिइनन् ।
AP Photo/Tony Gutierrez
यो यान पृथ्वीको सतहबाट ६६.५ माइल माथि गएर यान रोकिएको थियो । त्यहाँ गुरूत्व बल समाप्त भएको थियो । सोहीकारण जहाज केवल हावामा तैरिएजस्तै अनुभव भएको उनीहरुले बताएका छन् । करीव ४ मिनेट उनीहरुले संसारलाई नियाल्ने मौका पाए । त्यसबेला जहाजमा उनीहरुले रोमान्चित भई बोलेका शब्दहरु रेकर्ड भएका थिए । त्यसपछि उनीहरु जमिनमा फर्किए ।
बेजोसको कम्पनीले कैयौं रकेट अन्तरिक्षमा पठाएपनि ती मानवरहित थिए । मंगलबार भने मानिससहितको रकेट अन्तरिक्षमा पठाइएको हो । जसको अनुभव मालिक आफैले पहिलो पटक गरे । न्यु सेफर्डको सीटमा फराकिला झ्याल राखिएको छ । जसकारण यात्रुले सजिलै पृथ्वीको नजर देख्न सक्छन् । यो रकेट अमेरिकाको टेक्सासबाट अन्तरिक्षमा पठाइएको थियो ।
काठमाडौं । नेपाल वायुसेवा निगमको जहाजले आजबाट चीनमा खरीद गरेको कोरोना भाइरसविरुद्धको ओप ल्याउँदैछ । सो प्रयोजनका लागि लगातार तीन दिन जहाज चीन जाने भएको छ । नेपाल एयरलाइन्सका अनुसार आज पौने ६ बजे चीन जाने जहाजले बिहीबार बिहान खोप ल्याउने छ । यो जहाज बिहीबार साँझ पुनः चीन उड्ने छ । सो जहाज शुक्रबार काठमाडौं आउने छ । तेस्रो उडान ९ साउनमा हुने छ । १० सउनमा जहाज नेपाल आउने छ ।
यी तीन उडानबाट कम्तिमा ३० लाख डोज आउने छ । त्यसपछि नेपालमा पुनः प्राथमिकताका आधारमा खोप अभियानले तिव्रता पाउने भएको छ । सरकारले चीनबाट ४० लाख डोज खोप किनेको हो । यसमध्ये ८ लाख डोज खोप यसअघि नै नेपाल आइसकेको छ । चीनले थप १६ लाख डोज खोप अनुदानमा दिने भनेको छ । सरकारले चैतसम्म सबै नागरिकलाई खोप लगाइसक्ने भनेको छ ।
ओरेगन । अमेरिकी राज्य ओरेगनको जंगलमा लागेको आगोको फैलावटसँगै यहाँ स्थिति भयावह हुने चेतावनी जारी भएको छ । अमेरिकी संचारमाध्यमहरुका अनुसार अहिलेसम्म आगोको चपेटामा तीन लाख एकड जमीन आइसकेको छ । भयानक आगोलागीसँगै आसपासका मानिसलाई सुरक्षित स्थानमा सारिएको छ । करीव दुई हजार भन्दा बढी फायरफाइटर्स आगो नियन्त्रणमा खटिएका छन् । सो राज्यमा इतिहासकै सबैभन्दा भयानक आगोलागी भएको संचारमाध्यमको भनाई छ । आगो ६ जुलाईबाट फैलन थालेको हो ।
अहिले अमेरिकाका १३ अलग अलग क्षेत्रको ८० भन्दा बढी स्थानमा आगोलागी भएको छ । उच्च तापमानका कारण आगोको फैलावट तिब्र बनेको छ भने नियन्त्रणमा कठिनाई उत्पन्न भएको छ । आगोलागीका कारण ग्रामिण भेग नराम्रोसँग प्रभावित भएको अधिकारीहरुले जनाएका छन् । अहिलेसम्म १६० वटा घर आगोमा जलेका छन् । २ हजार मानिसको उद्धार भएको छ । फायर एसिस्टेण्ड कमान्डर जो हेसेल ले सोमवार एक बयान जारी गरि आगो नियन्त्रणमा दिनरात टोली खटिएको जनाएका छन् । पोर्टल्याण्डको दक्षिण पूर्वमा समेत आगोलागी फैलिएको छ ।
काठमाडौं । चीनमा अविरल वर्षापछि आएको भिषण बाढीका कारण विभिन्न प्रान्त नराम्रोसँग प्रभावित बनेका छन् । बीबीसीका अनुसार मध्य चीनमा बाढीको बढी वितण्डा देखिएको छ । कैयौँ स्थानमा बाढी आएपछि मानिसहरुलाई सुरक्षित स्थानमा सार्ने काममा तिव्रता दिइएको छ । रेल स्टेशन र सडक डुबानमा परेका छन्। ख्वनान प्रान्तका १०,००० भन्दा बढी सर्वसाधारणलाई उद्धार गरी स्थानान्तरण गरिएको बीबीसीले लेखेको छ ।
बाढी सुरु भएयता राजधानी जङ्जोमा मात्र कम्तीमा १२ जनाको मृत्यु भएको खबर छ । मुख्य सडक बन्द र उडान रद्द गरिएका छन् । चीनका एक दर्जनभन्दा बढी सहर डुबानमा परेको बताइएको छ । झन्डै ९ करोड ४० लाख जनसङ्ख्या रहेको ख्वनान प्रान्तले असामान्य रूपमा सक्रिय वर्षा देखिएसँगै मौसमसम्बन्धी कडा चेतावनी समेत जारी गरेको छ ।
काठमाडौं । आज संसारभर मुस्लिम धर्मावलम्बीले दोस्रो महान चाड बकर इद (इदुल जोहा) मनाउँदैछन् । यो पर्वको उपलक्ष्यमा नेपाल सरकारले समेत आज सार्वजनिक बिदा घोषणा गरेको छ । इदुल फित्र अर्थात् रमजान पर्वको ७० औँ दिनमा बकर इद मनाउने प्रचलन अनुसार आज मुस्लिम समुदायमा यो चाड मनाइँदैछ । यो दिन मुस्लिम धर्मावलम्बीले स्नान गरी नजिकैको मस्जिद वा इदगाहमा गई सामूहिक नमाज पढ्ने प्रचलन रहेको छ ।
नमाज पढेपछि एकापसमा अङ्कमाल गर्दै शुभकामना आदान प्रदान गर्ने गरिन्छ । नेपालमा दरबारमार्गको नेपाली जामे मस्जिद, काश्मीरी मस्जिदसहितका मस्जिदमा बढी भिड लाग्छ । यो वर्ष भने मस्जिदमा नगई घरमै चाड मनाउन आह्वान गरिएको छ । मुस्लिम आयोगले समेत घरमै बसेर सुरक्षितरुपमा बकर इद मनाउन आह्वान गरेकोछ हो । यस पर्वका अवसरमा मक्का मदिनामा संसारभरबाट लाखौं धर्मावलम्बी पुग्ने गर्छन् ।
काठमाडौं । नेपालका स्टार क्रिकेटर सन्दिप लामिछानेले बेलायतमा अपमान बेहोर्नु परेको छ । साथै उनले ‘द हन्ड्रेड’ प्रतियोगिता समेत गुमाएका छन् । बेलायतको क्रिकेट बोर्डले उनलाई तत्काल देश छोड्न समेत भनेको छ । यो सन्दीपले कुनै गल्ती गरेका कारण भने होइन । बेलायतले शुरुमा प्रवेश अनुमति दिएर १० दिन होटेल क्वारेन्टिन समेत बसिसकेपछि उनलाई भिषा अवैध भएको भन्ने जानकारी गराइएको छ । तर, यो कसरी भयो भन्ने बारे भने स्पष्ट नभनिएको सन्दीपले सामाजिक संजालमा सार्वजनिक गरेका छन् ।
‘द हन्ड्रेड’ प्रतियोगिता खेल्न उनी ९ जुलाईमा बेलायत पुगेका थिए । बेलायत पुग्दा अध्यागमनमा आफुलाई कुनै समस्या नभएको उनले जानकारी गराएका छन् । सामान्यता भिषा अवैध भएमा अध्यागमनले नै रोक्ने गर्छ । त्यसपछि उनी सरकारले व्यवस्थापन गरेको क्वारेन्टाइनमा गएर बसेका थिए । नियमानुसार क्वारेन्टाइन सकिनुभन्दा दुईदिन अघि उनलाई बेलायतको क्रिकेट बोर्डले भिसा बैध नभएको र चाँडोभन्दा चाँडो देश छोड्न भनेको उनले जानकारी गराएका छन् ।
तर, किन यसो भयो भन्ने बारे भने कसैले पनि जानकारी नगराएको उनको गुनासो छ । यसअघि समेत बेलायतले समयमै भिषा नदिएपछि उनले टी २० ब्लास्ट प्रतियोगिता समेत गुमाएका थिए । एक करोड रुपैयाँ भन्दा बढी मूल्यमा आवद्ध भएका उनी अब प्रतियोगितामा सहभागी नै हुन नपाई घर फर्कनु पर्ने भएको छ ।
यस्तो छ सन्दीपको स्टाटस
I am extremely gutted for missing out on The Hundred. I was so looking forward to play for my team Oval Invincibles and followed all the instructions that was given to me by the ECB officials.
Briefly, when I applied for the Tier 5 visa, I was told that one Certificate of Sponsorship would be enough for my gig at Vitality Blast and The Hundred. Due to COVID-19 situation, there was a delay in my visa and Worcestershire pulled out but it was again communicated to me by officials that as long as I come into the UK before July 10, I would be okay as my COS was still active.
I came in the UK by July 9, had no issues whatsoever at the immigration and moved into the government managed quarantine facility to complete my quarantine. On July 18, two days before my quarantine completion, I was told by ECB that may visa is not valid and I have to leave the country ASAP. I have been asking what went wrong but apparently no one at the ECB have the correct answer. I can totally understand that things can go south at anytime, however I at least deserve a clear answer on why my valid visa is not valid anymore.
I left a lot to be the part of this exciting tournament and totally pray and wish the best for all teams out there. I always got love from the lovely people of UK and I would urge ECB to look into the matter so that no one else has to go through this ordeal. I can also feel for my people who were so looking forward to my participation in this amazing tournament. There will be better days ahead.
बाग्लुङ । विषाक्त रक्सी पिउँदा बाग्लुङमा चार जनाको मृत्यु भएको छ । बाग्लुङ प्रहरीका अनुसार सोमवार बेलुकी विषाक्त रक्सी पिएका ६ मध्ये चार जनाको ज्यान गएको हो । ज्यान गुमाउनेमा गलकोट नगरपालिका ७ मल्ममा रहेको खानेपानी आयोजनामा काम गर्ने २१ वर्षीय दीपेन्द्र पुन, ३९ वर्षीय दूधबहादुर राना, ५१ वर्षी रेखबहादुर राना र ३० वर्षीय प्रवीन घर्ती छन् । उनीहरूको उपचारका क्रममा ज्यान गएको हो । उनीहरूसँगै रक्सी पिएका ३८ वर्षीय खेमराज घर्ती र २६ वर्षीय रवीन्द्र पुनको अवस्था गम्भीर छ ।
उनीहरुको धौलागिरि अस्पतालमा प्राथमिक उपचारपछि गण्डकी अस्पताल पोखरा पठाइएको छ । प्रहरीले यो घटनाबारे छानविन गर्न समिति गठन गरेको छ । घटनाको छानबिन गर्न प्रहरी नायब उपरीक्षक (डीएसपी) इकवाल हवारीको नेतृत्वमा अनुसन्धान समिति गठन भएको हो । बाग्लुङमा पहिलो पटक यस प्रकारको घटना भएपछि प्रहरी गम्भीर बनेको छ । प्रहरीले अहिलेसम्म दुई जनालाई पक्राउ गरेको र मजदुरले खाएका चाउचाउ, दालमोठ र मदिराका भाँडासमेत बरामद भएको बताइएको छ ।
काठमाडौं । कक्षा १२ को परीक्षा साउन ३१ गतेदेखि शुरु हुने गरि मिति तय भएको छ । मंगलबार राष्ट्रिय परीक्षा बोर्डको बैठकले परीक्षाको मिति तय गरेको हो । विद्यार्थीले परीक्षा सम्बन्धित विद्यालयबाटै अर्थात होम सेन्टरबाटै दिन पाउने भएका छन् । यो परीक्षा ९ भदौसम्म चल्ने छ । परीक्षा अवधिमा गाइजात्रा र जनैपूर्णिमाको दिन बिदा दिइने छ । तर, शनिबार भने परीक्षा चल्ने छ । यसअघि परीक्षा जेठ २६ मा तोकिएको थियो ।
तर, कोरोनाको दोस्रो लहरसँगै परीक्षा स्थगित भएको थियो । यस पटक तीन लाख ८६ हजार विद्यार्थीले परीक्षाको फाराम भरेका छन् । माध्यामिक तहको अन्तिममा लिइने कक्षा १२ को परीक्षा राष्ट्रिय परीक्षा बोर्डले यो पटक १०० पूर्णांककै गराउने भएको छ । गत वर्षको मूल्यांकन पद्धति प्रभावकारी नदेखिएकाले यो वर्ष सय पूर्णांककै परीक्षा गराउने तयारी गरेको बोर्डको भनाई छ । गतवर्ष भने परीक्षा समय र अंक भार घटाएर परीक्षा लिइएको थियो ।
काठमाडौं । पछिल्लो २४ घण्टामा देशभर ३१०८ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामा ८८३६ पीसीआर परीक्षणमा २२०२ र ४२९९जनाको एन्टिजेन परीक्षणमा ९०६ जना गरी ३१०८ जनामा संक्रमण पुष्टी भएको हो ।
यो सहित नेपालमा कोरोना संक्रमितको संख्या ६ लाख ७० हजार ९५३ पुगेको छ । पछिल्लो २४ घण्टामा १५९५ जना संक्रमण मुक्त भएका छन् ।
यो सहित संक्रमण मुक्त हुनेको संख्या ६ लाख ३४ हजार ९२७ जना पुगेको छ । संक्रिय संक्रमितको संख्या २६ हजार ४१९ रहेको छ ।
पछिल्लो २४ घण्टामा २५ जना संक्रमितको मृत्यु भएको छ । यो सहित नेपालमा कोरोना मृत्यु हुनेको संख्या ९ हजार ६०७ पुगेको छ ।
काठमाडौं । प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ यसअघिको केपी शर्मा ओली सरकारले गरेका नियुक्तिहरु खारेज गर्ने सहमतिमा पुग्नु भएको छ ।
मंगलबार नेकपा एमालेका वरिष्ठ नेता माधव कुमार नेपालसँग भेटवार्तापछि बालुवाटार पुगेका प्रचण्ड र प्रधानमन्त्री देउवाबीच ओली सरकारले गरेका नियुक्ति खारेज गर्ने सहमति भएको हो ।
जेठ ७ गते मध्यरातमा तत्कालीन प्रधानमन्त्री ओलीको सिफारिसमा राष्ट्रपति विद्यादेवी भण्डारीले प्रतिनिधि सभा विघटन गर्नुभएको थियो । तर त्यसलाई सर्वोच्च अदालतले बदर ठहर गर्दै देउवालाई प्रधानमन्त्रीमा नियुक्त गर्न परमादेश जारी गरेको थियो ।
काठमाडौं । सेयर बजारमा करेक्शन आएको छ । यससाता आइतबारदेखि निरन्तर उकालो लागेको बजारमा आज सामान्य करेक्शन आएको हो ।
पछिल्लो दुई दिनमा नेप्से ११० अंकले बढेको थियो भने आज ९ अंक्ले करेक्शन आएको हो । आज सूचकसँगै कारोबार रकममा पनि गिरावट आएको छ । अघिल्लो दिनको तुलनामा कारोबार रकम ४ अर्बले घटेर पौने ८ अर्बमा सीमित भएको छ ।
आज सेयर बजार मापक सूचक नेप्से ९.०१ अंकले घटेर २९८५.५७ विन्दुमा आइपुगेको छ । आज २१९ कम्पनीको ७ अर्ब ८९ करोड ७५ लाख ९४ हजार २६९ रुपैयाँ बराबरको ३ करोड १६ लाख ८ हजार १९३ कित्ता सेयर किनबेच भएका छन् ।
कारोबारमा आएका १३ वटा समूहमध्ये ५ समूहको परिसूचकमा हरियाली छाएको छ भने ८ समूहको परिसूचक राताम्मे भएको छ ।सामूहिक लगानी कोष समूह सबैभन्दा धेरै ६.२९ प्रतिशतले बढेको छ भने फाइनान्स समूह १.३७ प्रतिशतले घटेको छ ।
आज कारोबारमा आएका २१९ कम्पनीमध्ये ९२ कम्पनीको सेयर मूल्य बढेको छ भने ११९ कम्पनीको मूल्यमा गिरावट आएको छ । ८ कम्पनीको मूल्य स्थिर रहेको छ ।
आज अरुण काबेली हाइड्रोपावरको सर्वाधिक कारोबार भएको छ । यसको झन्डै ३९ करोड रुपैयाँको कारोबार भएको छ । कारोबार रकमकै आधारमा अरुण भ्याली २७ करोड र नेपाल इन्स्योरेन्स २४ करोड बढीको कारोबार सहित शीर्ष तीन स्थानमा रहे ।
घट्दो बजारमा आज ४ कम्पनीको सेयर मूल्यमा पोजेटिभ सर्किट लागेको छ । लक्ष्मी उन्न्ति कोष र लक्ष्मी म्युचुअल फण्डको मूल्य १० प्रतिशतले बढेको छ ।
यस्तै, वरुण र माउन्टेन हाइड्रोपावरको सेयर मूल्य ९ प्रतिशतभन्दा धेरैले बढेको छ भने ग्लोबल आइएमई सम्मुनत स्कीम, एनआइसी एशिया ब्यालेन्स फण्ड, सानिमा इक्वीटी फण्ड, एनआइसी एशिया ग्रोथ फण्ड र सिटिजन्स् म्युचुअल फण्डको मूल्य ८ प्रतिशतभन्दा धेरैले बढेको छ ।
मुम्बई । बलिउड अभिनेत्री शिल्पा शेट्टीका पति तथा बिजनेसम्यान राज कुन्द्रा पक्राउ परेका छन् । मुम्बईको क्राइम ब्रान्चले उनलाई सोमवार राती गिरफ्तार गरेको हो । यो वर्षको फेब्रुअरी महिनामा पोर्नोग्राफिक सामग्री बनाएर त्यसलाई एप्समा सार्वजनिक गरेको आरोप उनीमाथि लागेको छ । प्रहरीका अनुसार यो काममा मूख्य योजनाकार कुन्द्रा थिए ।
यो आरोपमा यसअघि ४ जना पक्राउ परिसकेका छन् । उनीहरुको बयानकै आधारमा राज कुन्द्राको असली अनुहार बाहिरिएको हो । प्रहरीका अनुसार मुम्बईमा रंगिन फिल्मी दुनियाँमा आउन चाहने सोझासिधा युवतीलाई ललाईफकाई गरि प्रलोभनमा पारि यस्तो फिल्ममा खेल्न बाध्य पार्ने गरिएको थियो । यसलाई एप्समा राखेर त्यसमार्फत लाखौं कमाई गर्ने धन्धाको मास्टरमाइण्डका रुपमा राज कुन्द्राले काम गरिरहेका थिए ।
बगदाद । इराकको राजधानी बगदादमा बम विस्फोट भएको छ । घटनामा कम्तीमा २५ जनाको मृत्यु भएको र दर्जनौँ घाइते भएको सुरक्षा स्रोतलाई उदृत गर्दै बीबीसीले जनाएको छ । विस्फोटन एउटा व्यस्त बजारमा भएको हो । सर्वसाधारणहरूले मङ्गलवार मुस्लिम पर्व इदको तयारी गरिरहँदा उत्तरी साड सहर क्षेत्रमा विस्फोट भएको हो। पछिल्लो छ महिनामा त्यहाँ भएको यो सबैभन्दा घातक विस्फोट हो। इस्लामिक स्टेट (आईएस) समूहले घटनाको जिम्मेवारी लिएको छ।
इराकी सरकारले सन् २०१७ को अन्त्यमा सुन्नी मुस्लिम जीहादी समूहमाथि विजयी भएको घोषणा गरेको थियो। तर, यो समूह अझै सक्रिय छ । गत अप्रिलमा चार जनाको मृत्यु हुने गरी गरिएको कार बम हमलामा पनि आफ्नो हात रहेको आईएसले जनाएको थियो। उसले गत जनवरीमा ३२ जनाको ज्यान जाने गरी गरिएको आक्रमणको समेत जिम्मा लिएको थियो ।
काठमाडौं । संविधानको रक्षार्थ प्रधानमन्त्री शेर बहादुर देउवालाई विश्वासको मत दिएका नेकपा एमालेका नेतालाई कारवाहीको तयारी गरिएको छ । सोमबार बसेको केन्द्रीय कमिटी बैठकले उनीहरुलाई २४ घण्टे स्पष्टिकरण सोधेको थियो । तर, अदालतले ह्वीप नलाग्ने भनेका कारण २२ सांसदले स्पष्टिकरण नबुझाउने भएका छन् । उनीहरुमाथि तत्काल कारवाहीको माग उठेको थियो । तर, एमाले भित्रै नराम्रो सन्देश जाने भन्दै आजसम्मका लागि समय दिइएको थियो ।
एमालेको केन्द्रीय कमिटी बैठक आजसमेत तुलसीलाल प्रतिष्ठान भवन च्यासलमा बोलाइएको छ । अपरान्ह ३ बजे बैठक बस्नेछ । अध्यक्ष केपी शर्मा ओली पक्षका ८ जनासहित कुल २२ जनाले प्रधानमन्त्रीमा देउवालाई विश्वासको मत दिएका थिए। माधव पक्षका १० नेता भने अनुपस्थित भए । भीम रावलले भने राजिनामा घोषणा गरेका छन् । अनुपस्थित भएका नेतालाई भने एमालेले कारवाही नगर्ने भएको छ । अब माधव कुमार नेपाल बीनै एमाले एकता प्रक्रिया अगाडी बढाउने तयारी ओली पक्षीय नेताले गरेका हुन् । यसमा भीम रावल, गोकर्ण विष्ट, योगेश भट्टराईलगायतका नेतासमेत सहमत हुने संकेत देखिएको छ ।
काठमाडौं । नेपाल र भारतबीचमा आवाज जावतको एक मात्र औपचारिक रुट काठमाडौं-दिल्लीमा अब उडान संख्या थप हुने भएको छ । २४ जुलाईबाट नेपाल एयरलाइन्सले तीन र भारतको ध्वजाबाहक एयर इण्डियाले तीन गरि सातामा कुल ६ उडान गर्ने भएका हुन् । अहिले भारतको नयाँ दिल्लीमा साताको दुई उडान भइरहेको छ । नेपाल एयरलाइन्सका अनुसार नयाँ दिल्लीमा काठमाडौंबाट सोमबार, बुधबार र शनिबार नेवानिको उडान हुने छ । भारतबाट एयर इण्डियाले उडान तालिका तय गर्नेछ ।
यो उडान शुरु भएपछि भारतमा हवाई भाडा सस्तो हुने अपेक्षा छ । साविकमा ९ हजारसम्म तोकिएको भाडा अहिले एकतर्फी नै ३० हजार माथि पुगेको छ । नेपाल र भारतबीच एयर बबल सम्झौता अनुसार उडान भइरहेको छ । सो सम्झौतामा उडान थप गर्न नेपालले प्रस्ताव गरेको थियो । प्रस्ताव स्वीकृत भएसँगै उडान संख्या बढेको हो । भारतको बैंलौर र मुम्बईमा भने तत्काल उडानको सम्भावना छैन ।
काठमाडौं । प्रधानमन्त्री शेरबहादुर देउवा र भारतीय समकक्षी नरेन्द्र मोदीबीच टेलिफोन वार्ता भएको छ । सोमबार दिउँसो प्रधानमन्त्री देउवा र मोदीबीच कुराकानी भएको प्रधानमन्त्री स्वयमःले सामाजिक संजालबाट जानकारी गराएका छन् । फोनवार्तामा मोदीले प्रधानमन्त्री देउवालाई कोभिड १९ विरूद्धको खोप भारतबाट नेपाल आउने आश्वासन दिएका छन् । देउवाले आज दिउँसो प्रधानमन्त्री नरेन्द्र मोदीसँग फोनवार्ता गरेको भन्दै द्विपक्षीय सम्बन्धलाई थप सुदृढ बनाउनेबारे छलफल गरेको जनाएका छन् ।
आइतबार प्रधानमन्त्री देउवाले प्रतिनिधि सभाको बैठकमा विश्वासको मत पाएसँगै मोदीले टुइटमार्फत बधाई दिएका थिए । उक्त बधाईको देउवाले धन्यवाद रिप्लाई समेत गरेका छन् । भारतले लगातार दुई दिन देखाएको सदासयताबाट नयाँ सरकारसँग समेत भारत सुमधुर सम्बन्ध बनाउन चाहेको रुपमा हेरिएको छ । भारतीय कम्पनीसँग नेपाल सरकारले किनेको खोप नआउँदा करीव १४ लाख जेष्ठ नागरिकले दोस्रो डोज खोज लगाउन पाएका छैनन् ।
काठमाडौं । सरकारले बाढी र पहिरोबाट ठूलो मानवीय क्षति भएका सिन्धुपाल्चोक र मनाङलाई विपद् संकटग्रस्त क्षेत्र घोषणा गरेको छ । सोमबार बसेको मन्त्रिपरिषद् बैठकले यस्तो निर्णय गरेको हो । यी दुई जिल्ला असोज मसान्तसम्म विपद संकटग्रस्त क्षेत्र घोषित भएको सरकारका प्रवक्ता ज्ञानेन्द्रबहादुर कार्कीले जानकारी गराए । उनका अनुसार विपद् जोखिम न्यूनिकरण तथा व्यवस्थापन ऐन २०७४ बमोजिम सिन्धुपाल्चोक तथा मनाङ जिल्लालाई २०७८ असोज मसान्तसम्म लागु हुनेगरी विपत संकटग्रस्त क्षेत्र घोषणा गर्ने निर्णय सरकारले गरेको हो ।
यो वर्ष बाढी र पहिरोले यी दुई जिल्ला सबैभन्दा बढी प्रभावित भए । सिन्धुपाल्चोकमा २६ परिवारको घर पूर्णरुपमा बगेको छ । ५६९ जना विस्थापित भएका छन् । मनाङमा बाढीमा ५३ घर पूर्ण र २६ मा आंशिक क्षति पुगेको छ । यो वर्ष जारी मनसुनका कारण अहिलेसम्म ६३ जनाको मृत्यु भएको छ । ३५ जना अझै बेपत्ता छन् ।
काठमाडौं । सामान्यतया २ देखि ८ डिग्री सेल्सियस तापक्रम कायम गरि निश्चित समय भित्र लगाइसक्नु पर्ने चिनियाँ खोप भेरोसिलको काठमाडौं उपत्यकामा असुरक्षित तरिकाले चुवावट हुने गरेको फेला परेको छ । काठमाडौंमा भेरोसिल खोप पत्रिकाले बेरेर प्लास्टिकको झोला भित्र केही टुक्रा आईसभित्र राखेर लगाउन हिँडेको विश्व न्युजले फेला पारेको छ । काठमाडौंको जिल्लाका एक प्राबिधिकले आफु खोप लगाउनु पर्ने प्राथमिकतामा रहेको भन्दै स्वास्थ्य मन्त्रालयबाटै खोप ल्याएको स्वीकार गरे । नाम नबताउने शर्तमा उनले यो तथ्यको खुलासा गरेका हुन् ।
उनी जस्तै धेरै प्राबिधिक तथा औषधी व्यवसायीले यसैगरि खोप चुवाहट गरेको उनी स्वीकार गर्छन् ।आफुले यसैगरी ५० जना जतिलाई खोप लगाएको उनले जानकारी दिए । यसरी खोप लगाउनेमा आफ्नो चिनजानका रहेको उनको भनाई छ । यसरी चुहावट भएको खोप कतिपय औषधी व्यवसायीले समेत लगाउने गरेको आफ्नो जानकारीमा रहेको उनले बताए ।
अहिले नेपालमा खोप अभियान चलिरहेको छ । चीनबाट आएको भेरोसेल र अमेरिकाबाट आएको जोन्सन एण्ड जोन्सनको खोप लगाइएको छ । चीनबाट सरकारले खरीद गरि ल्याएको पछिल्लो खोप काठमाडौं उपत्यकामा केही दिनमै सकिएको भन्दै अभियान बन्द गरिएको थियो । तर, औषधी पसलेहरु र प्राबिधिकहरुले भने स्वास्थ्य मन्त्रालयबाटै र कती पय खोप केन्द्रबाट ल्याएर सामान्य मापदण्ड समेत पुरा नगरी लगाउने गरेको खुलेको हो ।
पालो कुर्दा सकिएको खोप झोलामा कसरी ?
काठमाडौं उपत्यकासहित देशभर सबै नागरिकले खोप सजिलै पाउने भन्दै स्वास्थ्य तथा जनसंख्या मन्त्रालयले केही दिन अगाडी एक विज्ञप्ती निकालेको थियो । मन्त्रालयले उपत्यकामा छुट्याइएको कोटा सकिएको भन्दै छिट्टै थप खोप आउने बताएको थियो । तर, विश्व न्यूजले सोमबार नै खोप वितरण गरिरहेको अवस्थामा फेला पारेको छ । यस स्वास्थ्य तथा जनसंख्या मन्त्रालयसँग प्रतिक्रिया माग्दा भने मन्त्रालयका अधिकारीले अनविज्ञता प्रकट गरेका छन् ।
Photo : Vishwanews
स्वास्थ्य मन्त्रालयका सहप्रवक्ता डा. समीर कुमार अधिकारीले कुनै पनि पसलमा खोप बेचविखन गर्न नपाइने बताउँछन् । उनी भन्छन्, हल्लाहरु धेरै आएपछि स्वास्थ्य तथा जनसंख्या मन्त्रालयले यसबारेमा सचेतना जगाउने गरी भिडियो नै बनाएको छ । त्यस्तो पाइएमा तत्काल स्वास्थ्य मन्त्रालय वा नजिकको प्रहरी कार्यालयमा सम्पर्क गर्न भनेका छौँ । मन्त्रालयको फेसबुकपेजमा पनि अवैधरुपमा बेचबिचन भएमा कारबाही हुने र लुकाइछिपाई गरेर बजारमा बेच्न राखेका खोप नक्कली हुनसक्ने सन्देश राखिएको छ । कोरोनाविरुद्धको खोप सरकारले निःशुल्क उपलब्ध गराउने मन्त्रालयले जनाएको छ ।
Photo : Vishwanews
कहाँ पुग्यो नेपालमा खोप अभियान ?
नेपाल आफै खोप उत्पादक मुलुक होइन । सोहीकारण उसले अन्य मुलुकसँग खोपमा भर पर्नु परेको छ । नेपाललाई भारतले पहिलो पटक १० लाख डोज कोभिसिल्ड अनुदानमा दिएको थियो । भारतबाट नेपाली सेनाका लागि थप एक लाख डोज खोप समेत अनुदानमा आएको थियो । त्यसपछि नेपाल सरकारले २० लाख डोज खरीद गर्न भारतलाई रकम दियो । भारतबाट खरीद गरेको १० लाख डोज खोप डेलिभरी भएपछि भारतबाट थप खोप आएन । त्यसबीचमा कोभ्याक्स कार्यक्रममार्फत ३ लाख डोज खोप नेपाल आएको थियो ।
यो खोप करीव २१ लाख मानिसलाई पहिलो डोज लगाइएको थियो । त्यसमध्ये करीव १४ लाख जेष्ठ नागरिकले कोभिशिल्डको दोस्रो डोज लगाउनबाट बन्चित छन् । भारतबाट खोप आउन नपाएपछि सरकारले चीनतर्फ पहल थाल्यो शुरुमा १० लाख डोज खोप अनुदानमा दिएको चीनले ४० लाख डोज खोप बिक्रि गरेको छ । ४० लाखमध्ये पहिलो चरणमा ८ लाख डोज आएपछि सरकारले खोप अभियान चलाएको हो ।
पछिल्लो समय अमेरिकाबाट १५ लाख ४० हजार डोज खोप नेपाल आएको छ । सो खोप लगाउने कार्य सोमबारबाट शुरु भएको छ । चीनले थप १८ लाख डोज खोप अनुदान दिने घोषणा गरेको छ । नेपाललाई जापानले समेत १६ लाख डोज खोप दिने बताएको छ । सोमबार भारतीय प्रधानमन्त्री नरेन्द्र मोदीले समेत नेपाल पठाउन बाँकि रहेको खोप पठाउने आश्वासन दिएका छन् ।
खोप केन्द्रमा थामिनक्सनु भिड सरकारले प्राथमिकतामा वितरण थालेको खोप प्राथमिकता भन्दा बाहिरका मानिसले पाउँदा वितरण अव्यवस्थित बनेको छ । सरकारले उमेर र पेशा अनुसार कोरोना बिरुद्धको भ्याक्सिन लगाउने बुथहरु तोके पनि अधिकांश बुथमा टोकन लिएर भ्याक्सिन लगाउन लाईन लाग्दा लाग्दै खोप सकिएको भन्दै फर्काउने गरिएको छ । उमेरको हद बन्दी तोकेर जेष्ठ नागरिकलाई खोप लगाउन तोकिएका बुथमा युवाहरु लाइनमा देखिएका छन् । खोप वितरणको अव्यवस्थित अवस्थाबारे धेरै गुनासो आएपछि सोमबार स्वयमः प्रधानमन्त्री शेर बहादुर देउवा खोप केन्द्रको अवलोकनमा निस्किए ।
काठमाडौं । सरकारले साउन ६ मा सार्वजनिक बिदा दिएको छ । सोमबार बसेको मन्त्रिपरिषद्को बैठकले यस्तो निर्णय गरेको सरकारका प्रवक्ता ज्ञानेन्द्रबहादुर कार्कीले जानकारी दिए । उनका अनुसार बुधबार बकर इदको अवसरमा बिदा दिने निर्णय भएको हो । सरकारले बैठकले तत्कालीन प्रधानमन्त्री केपी शर्मा ओली सरकारले नियुक्ति सिफारिस गरेका ११ जना राजदूतको नियुक्ति खारेज गर्ने निर्णय समेत गरेको छ । सरकारले नेपाललाई खोप सहायता उपलब्ध गराउने मुलुकलाई धन्यवाद ज्ञापन गरेको छ । निःशुल्क थप खोप उपलब्ध गराउन खोप उत्पादक मुलुकसँग आग्रह गर्ने निर्णय समेत आजको मन्त्रिपरिषद् बैठकले गरेको उनले जानकारी दिए ।
काठमाडौं । काठमाडौं महानगरपालिकाले आजदेखि शुरु गरेको ‘जोन्सन एण्ड जोन्सन’ खोपका लागि २८ अस्पतालमा केन्द्र तोकेको छ । आज (साउन ४ गते) देखि यही साउन ६ गतेसम्म ५० देखि ५४ वर्ष उमेर समूहका व्यक्ति, पूर्ण र अति अशक्त अपाङ्गता भएर ‘क’ र ‘ख’ वर्गको कार्ड प्राप्त गरेका व्यक्ति, नेपालमा बसोबास गरिरहेका शरणार्थी र यसअघि छुटेका स्वास्थ्यकर्मी तथा सफाइकर्मीलाई उक्त खोप दिइने व्यवस्था गरिएको छ ।
कामपाले यसपटक करीब ७६ हजार मात्रा खोप माग गरेको छ । सरकारले खोपका लागि तोकेका समूहको सङ्ख्यालाई २०६८ को जनगणना र जनसङ्ख्या वृद्धि दरका आधारमा विश्लेषण गरेर यो सङ्ख्यामा खोप मागेको जनस्वास्थ्य विभागका प्रमुख हरिबहादुर कुँवरको भनाइ छ ।
जोन्सन एण्ड जोन्सन खोप अमेरिकी सरकारबाट सहयोगस्वरुप प्राप्त भएको हो । खोप केन्द्र वीर अस्पताल, त्रिवि शिक्षण अस्पताल, महाराजगञ्ज, निजामती कर्मचारी अस्पताल, बानेश्वर, शुक्रराज ट्रपिकल तथा सरुवा रोग अस्पताल टेकु, परोपकार स्त्री तथा प्रसूति रोग अस्पताल, काठमाडौं मेडिकल कलेज, नेपाल प्रहरी अस्पताल पानीपोखरी, वीरेन्द्र सैनिक अस्पताल छाउनी, पिपल्स डेण्टल तथा जनरल अस्पताल सोह्रखुट्टे, हिमाल अस्पताल ज्ञानेश्वर, सामुदायिक स्वास्थ्यसेवा परिषद डल्लु, छत्रपाटी निःशुल्क चिकित्सालय छत्रपाटी र जनमैत्री अस्पताल बालाजुमा तोकिएको छ ।
त्यसैगरी मनमोहन अस्पताल स्वयम्भू, काठमाडौं मोडल अस्पताल प्रदर्शनी मार्ग, ह्याम्स हस्पिटल एण्ड रिसर्च सेन्टर धुम्बाराही, शहीद गङ्गालाल राष्ट्रिय हृदय केन्द्र बाँसबारी, नेशनल हस्पिटल कलङ्की, रामघाट प्राथमिक स्वास्थ्य केन्द्र गौशाला, कान्तिपुर अस्पताल तीनकुने, राधास्वामी आइसोलेशन सेन्टर बसुन्धरा र जनकल्याण माध्यमिक विद्यालयमा केन्द्र तोकिएको छ ।
नरदेवी आयुर्वेद अस्पताल नरदेवी, महेन्द्रनारायणनिधि अस्पताल बसुन्धरा, नेपाल भारत मैत्री अस्पताल चावहिल, मेट्रो अस्पताल नारायण गोपाल चोक, इरा इन्टरनेशनल अस्पताल सोह्रखुट्टे र हेल्पिङ् ह्याण्ड्स अस्पताल चावहिलमा केन्द्र रहेको छ । कामपाले हालसम्म सात प्रतिशत नागरिकलाई कोरोनाविरुद्धको पूर्ण खोप लगाएको छ भने १६ प्रतिशत नागरिकले एक मात्रा मात्र खोप लगाएका छन् ।
