अमृता के सी ( रोनी ) काठमाडौँ, असोज ६ ।काठमाडौँ क्षेत्र नं ३ नेपाली काँग्रेस गोकर्णेश्वर नगरपालिका वडा नं ३ को इकाई सभापतिमा श्याम बहादुर श्रेष्ठ निर्वाचित भएका छन्। गोकर्णेश्वर वडा नं ३ का वडा अध्यक्ष राजेन्द्र कुमार भण्डारीको प्रमुख आतिथ्यता अधिवेशन सम्पन्न भएको थियो ।
अधिवेशनबाट वडा नं ३ को उपसभापतिमा राम कृष्ण श्रेष्ठ निर्वाचित भएका छन् भने सचिवमा मैना गिरी र जन्जित के सी अत्यधिक मतले निर्वाचित भएका छन् ।उक्त अधिवेशनले कोषाध्यक्षमा निर्मला कामी, सहसचिवमा विजय श्रेष्ठ र जनक गिरी निर्विरोध निर्वाचित भएका छन्।
अधिवेशनमा निर्वाचन समितिलाई धन्यवाद दिदै वडा अध्यक्ष भण्डारीले जो निर्वाचित भएपनी सबैको व्यक्तिगत विजय नभई काँग्रेसको विजय भएको भन्दै निर्वाचित सबैलाई बधाई तथा शुभकामना दिए।साथै सबै क्रियाशिल सदस्यहरू हातेमालो गरि अघि बढ्न अनुरोध गरे।
काठमाडौँ, असोज ५ ।नेपाली काँग्रेस बूढानिलकण्ठ -१३ को सभापतिमा भाइनारायण श्रेष्ठ निर्वाचित भएका छन् । बूढानिलकण्ठ नगरपालिका वडा नं १३ को सार पार्टी प्यालेसमा मंगलबार भएको वडा अधिवेशनले श्रेष्ठलाई सभापतिमा चयन गरेको हो।श्रेष्ठको अध्यक्षतामा उपसभापतिमा निवेश श्रेष्ठ र रामलाल श्रेष्ठ सचिब दिनेस श्रेष्ठ र विकास श्रेष्ठ निर्वाचित भएका छन्।
सह सचिवमा श्याम काजी श्रेष्ठ र दिनेश नगरकोटीलाई निर्वाचित गरेको अधिवेशनमा विशाल श्रेष्ठ ,रामचन्द्र श्रेष्ठ ,संकल्प श्रेष्ठ , संकल्प श्रेष्ठ ,रोसन श्रेष्ठ ,किरण श्रेष्ठ ,राम नगरकोटी ,बिनोद श्रेष्ठ ,पार्वती श्रेष्ठ ,सुस्मिता पाण्डे ,ममता श्रेष्ठ ,संगीता श्रेष्ठ ,सहकुल कार्की ,राजेन्द्र खत्री ,कविता खत्री ,कल्पना पौडेल ,बिजेन्द्र श्रेष्ठ ,राजन श्रेष्ठ ,कल्पना श्रेष्ठ र सम्झना श्रेष्ठ सदस्यमा निर्वाचित भएका छन्।
काठमाडौँ, असोज ४ । नेपाली काँग्रेसको आसन्न १४ औं अधिवेशनका लागि नेपाली काँग्रेस गोकर्णेश्वर नगरपालिका वडा नं ३ ईकाइ सभापतिमा किरण बहादुर बिष्टले दाबी गरेका छन्। अनुशासन,आर्थिक पारदर्शिता, पार्टी प्रतिको ईमान्दारिता र निरन्तरता नै आफ्नो उम्मेद्वारीको मुख्य आधार रहेको बताउदै बिष्टले आसन्न १४ औं अधिवेशनका लागि नेपाली काँग्रेस गोकर्णेश्वर नगरपालिका वडा नं ३ को ईकाइ सभापतिमा दाबी गरेका हुन् ।
नेपाली काँग्रेसको गौरवमय इतिहासलाई सम्मान गर्दै गतिशील र बैचारिक संगठन निर्माणका लागि भन्दै बिष्टले उम्मेद्वारी घोषणा गरेका हुन्। लामो समय देखि नेपाली काँग्रेसमा सक्रिय रहेका बिष्ट अनुशासित र जुझारु नेपाली काँग्रेसलाई सहि दिशा प्रदान गर्ने कुशल छवि भएको व्यक्ती हुन् । काँग्रेसको राजनीतिमा सक्रिय बिष्ट हालका पनि इकाई सभापति हुन् । उनले नगरपालिका भित्र विभिन्न सामाजिक संघ सस्थामा क्रियाशील रहदै समाजसेवामा सक्रिय भूमिका खेल्दै आउनुले उनि राजनीतिक मात्र नभई सामाजिक व्यक्तित्व पनि भएको प्रष्ट बुझिन्छ। आजसम्म कसैलाई पनि घाटा हुने काम नगरेको बताउने उनले समाजमा भए गरेका विकास निर्माणमा सहभागिता जनाउदै आएका छन् ।
उनले अहिले सम्म आफूले पार्टी र समाजमा गरेको योगदानको कदर हुने समेत बिश्वास व्यक्त गर्दै बिगतमा भएका कमि कमजोरीलाई सच्याउदै उनले विधि पद्धतिमा रहेर पार्टीलाई सक्रिय बनाउने, काम गर्दा सबैसँग सल्लाह गरेर मात्र गर्ने र आउँदै गरेको चुनावमा पार्टीलाई अत्याधिक मतका साथ जिताउने गरी काम गर्ने योजना बनाएर आफूले इकाई सभापतिका लागि उम्मेद्वारी घोषणा गरेकोले सबै क्रियाशिल दाजुभाई दिदीबहिनीहरुलाई अत्यधिक मत दिई निर्वाचित गर्न समेत आग्रह गरेका छन् ।
अमृता के सी ( रोनी ) काठमाडौँ, असोज ३ । महानगरीय प्रहरी वृत्त बौद्ध कार्यालय प्रमुख प्रहरी नायब उपनिरीक्षक ढुण्डीराज न्यौपानेको नेतृत्वमा गाँजाका बोटहरु काटी नष्ट गरिएको छ।
शनिबार बौद्ध प्रहरी वृत्तको नेतृत्वमा खटिएको टोलिले गोकर्णेश्वर नगरपालिका वडा न.१ स्थित ओख्रेनी, मुलखर्क र चिलाउने एरियामा गाँजाका बोटहरु काटेर नष्ट गरेको छ। लागु औषधमा पर्ने गाँजा प्राकृतिक रुपमा उत्पादन हुने साथै व्यवसायिक रुपमा खेती गरेको पाइएकोले करिब ३५ हजार गाँजाका उम्रेका बोटहरु काटी नष्ट गरिएको जानकारी गोकर्ण प्रहरी प्रभागका प्रमुख प्रहरी नायब निरीक्षक रामजी घिमिरेले दिए। पछिल्लो समयमा युवा देखि वृद्धहरु सम्म नसामा फसेर दिनहुँ घटना घटी रहेकोले प्रहरीले दुर्व्यसनि न्यूनीकरण गर्न जनसमुदायलाई लागु औषधको सम्बन्धमा जनचेतना गराउने साथै गाँजाका खेतिलाई रोक लगाएको छ।
कार्यक्रममा बौद्ध प्रहरी वृत्तका टोलि, गोकर्ण प्रहरी प्रभागका टोलि लगायत गोकर्णेश्वर नगरपालिका स्थानीय क्लब, संघ र संस्थाहरुको उपस्थिति रहेको थियो ।
काठमाडौँ, असोज २। काठमाडौँको १३८ वटै वडामा नेपाली कांग्रेसको वडा अधिवेशन हुने भएको छ।अधिवेशनको तयारी सम्बन्धमा केन्द्रीय निर्वाचन समितिबाट तोकिएका निर्वाचन अधिकृत सहित बैठक बसेर अधिवेशन प्रक्रिया शुरू गरेको छ। देशका विभिन्न जिल्लाका वडाहरुमा अधिवेशन भए पनि काठमाडौँ जिल्लाका ११ स्थानीय तहका १३८ वडामा भने अधिवेशन भएको थिएन।
पार्टी जिल्ला कार्यालय ज्ञानेश्वरमा शुक्रबार बसेको बैठकले भोलि असोज २ गते शनिवार सम्म निर्वाचन अधिकृत तोकेर अधिवेशन प्रक्रिया शुरु गर्ने लगायतका निर्णयहरु गरेको छ।
काठमाडौँ जिल्लामा क्रियाशील सदस्यता विवाद टुंगिए संगै अव असोज ५ गते सबै वडामा अधिवेशन गर्ने तयारीलाई तीव्र पारिएको छ। त्यसै क्रममा वडा अधिवेशनको व्यवस्थापन र परिचालनका लागि जिल्ला सभापति सबुज बानियाँको अध्यक्षतामा बैठक बसेर अधिवेशनको मिति तय गरिएको हो।
काठमाडौं भाद्र २४ ।गोकर्णेश्वर नगरपालिका स्थित राष्ट्रिय शहिद तथा शान्ति पार्कमा नेपाल सरकारका मुख्य सचिब शंकरदास बैरागिकाे प्रमुख आतिथ्यतामा वृक्षारोपण कार्यक्रम सम्पन्न भएको छ । निजामति सेवा दिवस २०७८ को अवसरमा निजामति ऐन जारि मिति २०१३ भाद्र २२ काे सम्झनामा तत्कालिन प्रधान मन्त्रि टंक प्रशाद आचार्य र तत्कालिन मुख्य सचिब चन्द्र बहादुर थापाको शालिक समेत शिलान्यास गरिएको छ।
निजामति क्षेत्र व्यवस्थापन समिति र बियुराे ८१ नेपालको आयोजनामा बुधबार भएको कार्यक्रममा मुख्य सचिव शंकरदास बैरागीले यज्ञडोल सामुदायिक वनमा निर्माणधीन निजामती स्मारकको शिलान्यास गरेका हुन् ।निर्माणाधीन निजामती स्मारकमा तत्कालीन समयमा पहिलो पटक निजामती सेवा ऐन जारी गर्न नेतृत्व लिएका उनीहरुको शालिक बन्न लागेको हो। अगामी एक वर्षमा निर्माण सम्पन्न गर्ने लक्ष्य राखिएको राष्ट्रिय शहीद तथा शान्ति पार्क, निजामती (स्मारक) यज्ञडोल (जगडोल) सामुदायिक वन पर्यापर्यटन प्रबर्द्धन तथा उद्यान व्यवस्थापन समितिका अध्यक्ष सुदर्शन सिग्देलले जानकारी गराए ।
कार्यक्रममा पूर्व मुख्यसचिव थापाका आफन्त डा पार्थिवेश्वर तिमल्सिना, समितिका अध्यक्ष सिग्देल लगायत वक्ताले निजामती इतिहासमा महत्वपूर्ण काम गर्नुभएका दुई व्यक्तित्वको शालिक निर्माणले भावी पुस्तालाई सकारात्मक सन्देश प्रवाह गर्ने जानकारी गराए । चालु आर्थिक वर्षमै शालिक निर्माण सम्पन्न गरी अर्को वर्ष देखि निजामती सेवा दिवसको मूल कार्यक्रम स्मारक स्थलमै गर्ने लक्ष्य राखिएको समेत जानकारी गराइएको थियो ।सो अवसरमा स्मारक निर्माणस्थलमा कपुर, अमला,धुपी, रुद्राक्ष लगायत ५० जातका बिरुवा पनि रोपिएको थियो ।कार्यक्रममा पूर्व मुख्यसचिव थापाले ९० वर्ष अघि लेखेको पुस्तक ‘छोटो रामायण’ को दोस्रो संस्करण विमोचन गरिइएको थियो । विद्यालय तहका विद्यार्थीलाई रामायणका मुख्य कुरा बुझ्न सजिलो होस् भनी थापाले यो पुस्तक रचना गरेको उनको नातिनी विद्या भण्डारीले जानकारी गराइन ।
सो अवसरमा मुख्यसचिव वैरागीले चालु आर्थिक वर्षभित्र दुवै शालिक निर्माण सकिने गरी काम गर्न निर्देशन दिए । राष्ट्रिय शहीद तथा शान्ति पार्क, निजामती (स्मारक) निर्माणको कार्य योजना स्वीकृतिको बेलामै मन्त्रिपरिषद्ले कर्मचारीले पदभार ग्रहण गर्नुअघि स्मारकमा माल्यार्पण गर्ने व्यवस्था अर्को वर्षदेखि कार्यान्वयनमा ल्याइने समेत जानकारी गराएका थिए ।कार्यक्रममा शिक्षा, विज्ञान तथा प्रविधि मन्त्रालयका विज्ञान सचिव सुरेश आचार्यले स्मारक क्षेत्रमा निर्माण हुन लागेको युनेस्को ग्रामको अवधारणाले धेरै विषयलाई जोड्ने बताए । वन मन्त्रालयका सचिव डा पेमनारायण कँडेलले सामुदायिक वनमा स्मारक निर्माण गरेर पनि वन संरक्षण गर्न सकिन्छ भन्ने उदाहरण जगडोल सामुदायिक वनले प्रस्तुत गरेको जानकारी दिए ।
निर्माणाधीन राष्ट्रिय शहीद स्मारकसँगै निजामती स्मारक असी प्रतिशत भौतिक प्रगति भएर काम अलपत्र भएको समितिका अध्यक्ष सिग्देलले जानकारी गराएका छन् । शान्ति तथा पुनर्निर्माण मन्त्रालयअन्तर्गत निर्माण सुरु भएको आयोजना मन्त्रालय खारेजीसँगै हाल शहरी विकास मन्त्रालयमार्फत् सञ्चालनमा छ । शहरी विकास तथा भवन निर्माण विभागले जिम्मा लिएको चार वर्ष पूरा भएपनि काममा प्रगति हुन सकेको छैन । डाँफे–गौरी–पर्वत–सुनौला–खिम्ती जेभीले स्मारक निर्माण ठेक्का पाएको छ । पछिल्लो समय विभागले पनि ध्यान नदिँदा कामममा ढिलाइ भएको स्थानीयवासीको गुनासो रहेको छ ।
विभागबाट आयोजना प्रमुखका रुपमा काम गरिरहेका वरिष्ठ डिभिजनल इञ्जिनीयर मचाकाजी महर्जन अब पनि काम नगर्ने निर्माण व्यवसायीलाई कालो सूचीमा राख्ने गरी तयारी भइसकेको जानकारी गराएका छन् । चालु आर्थिक वर्षभित्रमा अलपत्र रहेका आयोजनाका सबै काम सम्पन्न गरी स्मारक सञ्चालन हुने उनको भनाइ छ ।
काठमाडौँ, भाद्र २४। बूढानीलकण्ठ नगरपालिका वडा ११ स्थित सूर्यमुखी महिला समूहकाे भवनमा “गरिबी निवारणका लागि लघु उद्यम विकास कार्यक्रम” (मेडपा) अन्तर्गतकाे ४५ दिने एडभान्स सिलाई कटाई तालिम सुरू भएकाे छ ।“सीप सिकाै, सीपकाे सदुपयाेग गरी उद्यमी बनाै” नारका साथ उपप्रमुख रमा देवी राइद्वारा कपडा सिएर यस तालिम उट्घाटन गरिएकाे हो ।
बूढानीलकण्ठ नगरपालिकाले दक्ष जनशक्ति उत्पादन गरि गरिबी निवारण गर्नका लागि विभिन्न कार्यक्रमहरु ल्याएको छ।यसका लागि नगरपालिकाले विभिन्न समयावधीमा सिपमुलक कार्यक्रमहरू संचालन गर्दै आएकाे छ । जस अन्तर्गत बुधबार एक कार्यक्रम बिच एडभान्स सिलाइ कटाइ तालिमको सुरु भएकाे हो ।
तालिमका लागि नगरपालिकाले रू. ३ लाख १५ हजारकाे लागत छुट्टाएकाे छ। सीप सिकाउनका लागि ७ वटा कपडा सिलाउने मेसिन, १ वटा इन्टरलक मेसिन, २ वटा आइरन, १३ प्रकारका कपडाहरू लगायतका सिकाईका लागि आवश्यक सरसामान खरिद गरिएकाे छ । उपलब्ध मेसिनहरू तालिम पश्चात उत्कृष्ट प्रशिक्षार्थीहरूलाइ कुल रकमकाे ८० प्रतिशत छुटमा बिक्री गरिने जानकारी गराईएको छ ।
अमृता के सी ( रोनी ) काठमाडौं, भाद्र २१। गोकर्णेश्वर नगरपालिका वडा नं ४ स्थित गोकर्णमा रहेको गोकर्ण प्राथमिक अस्पतालमा विशेषज्ञ सेवा शुभारम्भ भएको छ। आइतबार नगर प्रमुख चालिसेले पानसमा दिप प्रज्वलन गरि कार्यक्रमको उद्घाटन गरेका हुन् ।
” गोकर्णेश्वर नगरपालिकाको चाहना स्वास्थ्य जीवनको कामना ” भन्ने मुल नाराको साथमा गोकर्ण प्राथमिक अस्पतालबाट नियमित तथा आकस्मिक स्वास्थ्य सेवा उपलब्ध गराउदै आइरहेकोमा सेवाग्राहीलाई सहज रुपमा भरपर्दो स्वास्थ्य सेवा उपलब्ध गराउने उदेश्यले विशेषज्ञ सेवा शुभारम्भ भएको जानकारी गराइएको छ। विशेषज्ञ सेवा अन्तर्गत स्त्री रोग ,बाल रोग, जनरल फिजिसियन र रेडियोलोजिष्ट सहितका सेवा सर्वसुलभ मुल्यमा उपलब्ध गराउने भएको छ।
स्वागत मन्तब्य सहित कार्यक्रमको उदेश्य माथि प्रकाश पार्दै गोकर्ण प्राथमिक अस्पताल व्यवस्थापन समितिका सदस्य राजकुमार श्रेष्ठले वि.सं.२०३२ मा स्थापना भएको स्वास्थ्य चौकीलाई २०७६ साल असारमा गोकर्ण प्राथमिक स्वास्थ्य केन्द्र विशेषज्ञ सेवा सहित १५ शय्याको अस्पतालमा स्तरोन्नति गरिएको जानकारी गराएका थिए ।कार्यक्रममा डा .सुवास प्याकुरेलले शुभकामना मन्तब्य सहित विशेषज्ञ सेवाको बारेमा जानकारी गराएका थिए। उनले गोकर्ण प्राथमिक अस्पतालाई केन्द्रमा राखेर नगरपालिकाको दुर्गम भागहरुमा समेत स्वास्थ्यको पहुच पुर्याउनु पर्नेमा जोड दिएका थिए।
कार्यक्रममा शुभकामना मन्तब्य राख्दै उप प्रमुख शान्ति नेपालले विगतको गोकर्ण प्राथमिक अस्पतालको अवस्थाबारे अवगत गराउदै लामो समयको पहल पश्चात सुबिधा सम्पन्न अस्पताल निमार्ण गरि उक्त सेवा शुचारु गर्न पाउदा खुसि लागेको जानकारी गराएकी थिइन्। उनले आफु पनि महिला स्वास्थ्य स्वयं सेविकाको रुपमा काम गरेको स्मरण गर्दै महिला स्वास्थ्य स्वयं सेविकाको सेवा सुबिधालाइ क्रमिक रुपमा वृद्दि गर्न आफुले पहल गरेको पनि जानकारी गराएकी थिइन्।कार्यक्रममा कोभिड महामारी न्यूनीकरणमा सहयोग गरेका डा. सुबास प्याकुरेललाइ दोसल्ला ओढाएर सम्मान गरिएको थियो।
कार्यक्रमलाई सम्बोधन गर्दै नगर प्रमुख सन्तोष चालिसेले गोकर्ण अस्पतालको क्षमता वृद्धि गर्ने क्रममा २०७६ घोषणा पश्चात अस्पतालको स्वरुपमा परिवर्तन आएको र नगरपालिकाले सबैको सहयोगमा सो अस्पताललाइ पूर्ण क्षमतामा संचालन गर्न सफल भएको बताए ।निम्न आय भएका व्यक्ति बिरामी भएको खण्डमा अन्य अस्पताल जाँदा धेरै पैसा खर्च हुने बताउदै गोकर्ण प्राथमिक अस्पतालले न्यून शुल्कमा गुणस्तरीय सेवा प्रदान गर्ने विश्वास व्यक्त गरेका थिए।आगामी दिनमा पनि उक्त अस्पताललाइ नगरपालिकाको सहयोग रहने जानकारी गराएका थिए ।
गोकर्णेश्वर वडा नं ४ का वडा अध्यक्ष श्रीकुमार श्रेष्ठको सभापतित्वमा सम्पन्न कार्यक्रममा विशेष अतिथिको रुपमा गोकर्णेश्वर नगरपालिका उप प्रमुख शान्ती नेपाल, प्रमुख प्रशासकीय अधिकृत राम प्रसाद आचार्य, गोकर्णेश्वर नगरपालिका वडा नं १ का वडा अध्यक्ष राम मानन्धर, वडा नं ९ का वडा अध्यक्ष राजिब थापा, नेकपा एमाले काठमाडौं जिल्ला सचिवालय सदस्य एवं प्याब्सन काठमाडौं जिल्ला अध्यक्ष हरि कृष्ण श्रेष्ठ, यज्ञडोल जगडोल सामुदायिक वनका अध्यक्ष सुदर्शन सिग्देल, वडा नं ४ का वडा सदस्य जयराम महत, वडा नं ८ का वडा सदस्य नन्दलाल श्रेष्ठ, स्वास्थ्य शाखा प्रमुख हरि प्रसाद उपाध्याय, डा. सुवास प्याकुरेल, महानगरीय प्रहरी प्रभाग गोकर्णका प्रमुख प्र.ना.नि. रामजी घिमिरे, गोकर्ण महिला संजालको अध्यक्ष अम्बिका पौडेल लगायत गोकर्ण प्राथमिक अस्पताल व्यवस्थापन समितिका पदाधिकारी, महिला स्वास्थ्य स्वयं सेविका लगायत स्थानीयको उपस्थिति रहेको थियो।
कार्यक्रममा धन्यवाद ज्ञापन गर्दै गोकर्णेश्वर नगरपालिका वडा नं ४ का अध्यक्ष एवं गोकर्ण प्राथमिक अस्पताल व्यवस्थापन समितिका अध्यक्ष श्री कुमार श्रेष्ठले अस्पतालमा अन्य सेवाहरु पनि क्रमिक रुपमा विस्तार गर्दै जाने बताए । उनले उक्त अस्पतालबाट विशेषज्ञ सेवा लिन साथै आर्थिक अवस्था कमजोर भइ अस्पताल जान नसक्नेहरुले समेत सर्वसुलभ सेवा प्राप्त गरुन् भन्ने उदेश्यले सेवाको प्रचार प्रसार गर्न अनुरोध गरेका थिए ।साथै जेष्ठ नागरिक, गरिब, अपांग भएका व्यक्ति, विपन्न परिवार, असाहय र एकल महिलाहरुलाई वडा कार्यालयको सिफारिसको आधारमा छुटको व्यवस्था गरिने समेत जानकारी दिएका थिए ।
काठमाडौं, भाद्र १७। गोकर्णेश्वर नगरपालिका वडा नं ९ शंखडोल स्थित भगवती स्थानमा शंख मुर्ति निर्माणको लागि शिलान्यास गरिएको छ । नगर प्रमुख सन्तोष चालिसेले भगवतीस्थान चोकमा सोमबार एक कार्यक्रम बिच शंख निर्माणको लागि भुमिपुजन सहित शिलान्यास गरेका हुन् ।
कार्यक्रमलाई सम्बोधन गर्दै नगर प्रमुख चालिसेले शंखडोल नामको जगेर्ना गर्ने उदेश्य सहित शंखको मुर्ति निर्माण गरिन लागेको बताउदै गुणस्तरीय रुपमा समयमा नै निर्माण गर्न अनुरोध गरेका थिए।करिब १५ लाखको लागतमा निर्माण हुने उक्त मुर्तिको लागि हाललाई वडाले ५ लाख विनियोजन गरेको शंख पार्क उपभोक्ता समितिको अध्यक्ष अश्मिता श्रेष्ठले बताइन् ।
उक्त कार्यक्रममा गोकर्णेश्वर नगरपालिका उप प्रमुख शान्ति नेपाल ,गो.न.पा. प्रमुख सल्लाहकार दिपक रिसाल, गो.न.पा. नं ९ का वडा अध्यक्ष राजिब थापा , गो.न.पा. वडा नं ४ का वडा अध्यक्ष श्री कुमार श्रेष्ठ, गो.न.पा.वडा नं ९ को वडा सदस्य सत्यभामा श्रेष्ठ, हरिकृष्ण करन्जित, गमला परियार, गो.न.पा. वडा नं ४ का वडा सदस्य बालकृष्ण श्रेष्ठ शंखडोल कराते एकेडेमी प्रमुख प्रशिक्षक शिबराम करन्जित, महानगरीय प्रहरी प्रभाग गोकर्ण प्रहरी प्रमुख नायब निरीक्षक रामजी घिमिरे लगायत विभिन्न संघ संस्थाका प्रतिनिधि सहित स्थानियको उपस्थिति रहेको थियो।
अमृता के सी ( रोनी ) काठमाडौँ, भाद्र १६ । गोकर्णेश्वर नगरपालिका वडा नं ४ स्थित राष्ट्रिय शहिद तथा शान्ति पार्कमा राष्ट्र सेवक कर्मचारी वृक्षारोपण अभियानको शुभारम्भ गरियो । बुधबार एक कार्यक्रमका बिच महानगरीय प्रहरी वृत्त बौद्धका प्रमुख प्रहरी नायब उपरिक्षक ढुण्डीराज न्यौपानेको प्रमुख आतिथ्यतामा राष्ट्र सेवक कर्मचारी वृक्षारोपण अभियान सुरु गरिएको हो ।
बूढानीलकण्ठ वडा नं ११ का वडा अध्यक्ष राजु अधिकारीको सभापतित्वमा सम्पन्न कार्यक्रममा गोकर्णेश्वर नगरपालिका नगर प्रवक्ता एवं वडा ८ का अध्यक्ष मनोज कुमार ढुंगाना, गो.न.पा. वडा नं ३ का वडा अध्यक्ष राजेन्द्र कुमार भण्डारी, गो.न.पा. ९ का वडा अध्यक्ष राजीव थापा, राष्ट्रिय शहिद तथा शान्ति पार्क निजामति (स्मारक) यज्ञडाेल (जगडाेल) सामुदायिक वनका अध्यक्ष सुदर्शन सिग्देल, गोकर्ण प्रहरी प्रभाग प्रमुख प्र.न.नि. रामजी घिमिरे, गो.न.पा.४ का सचिव नवराज सेन लगायत स्थानिय संघ संस्थाका पदाधिकारीहरुको उपस्थिती रहेको थियो।
वृक्षरोपण अभियान बारे प्रकाश पार्दै राष्ट्रिय शहिद तथा शान्ति पार्क निजामति (स्मारक) यज्ञडाेल (जगडाेल) सामुदायिक वनका अध्यक्ष सिग्देलले प्रधानमन्त्रीबाट देशभरी निजामती कर्मचारी, राष्ट्रसेवक प्रहरी, आर्मीबाट अभियानको रुपमा भाद्र २२ गते निजामती सेवा दिवसको दिन सम्म साताव्यापी कार्यक्रम रहेको जानकारी गराए। उनले निजामति (स्मारक) यज्ञडाेल (जगडाेल) सामुदायिक वन क्षेत्रमा नै राष्ट्रसेवक कर्मचारीहरुले सुरु गरेको अभियानलाई स्थानिय संघ, संस्था,समुदाय र सरोकारवाला निकायहरुले साथ दिने बताए।साथै ” जल, जमिन र जंगलको संरक्षण र उपयोग गरौं। एक घर दुइ रुख, एक गाउँ एक वन र एक नगर अनेक उध्यानको अवधारणा साथ समितिलाई टेवा पुर्याउ भन्ने सन्देश दिएका थिए” ।
कार्यक्रमलाई सम्बोधन गर्दै गोकर्णेश्वर नगरपालिकाका नगर प्रवक्ता एवं वडा ८ का अध्यक्ष मनोज ढुंगानाले हाल सम्म नेपालको भुभाग भन्दा पनि वृक्षारोपण धेरै भएकोले कार्यक्रमले सार्थकता पाउन वृक्षारोपण गरि रोपेको विरुवालाई स्याहार, सम्भार र संरक्षणमा जोड दिनुपर्ने बताए।
कार्यक्रमलाई सम्बोधन गर्दै महानगरीय प्रहरी वृत्त बौद्धका प्रमुख प्र.ना.उ. ढुण्डीराज न्यौपानेले महानगरीय प्रहरी वृत्त बौद्धको आयोजनामा सप्ताह व्यापी वृक्षरोपण कार्यक्रम सफल शुभारम्भ भएको बताउदै ” हरियो वन नेपालको धन” नारालाई आत्मसात गर्दै थोरै बिरुवा रोपौं तर रोपिएको विरुवाको जगेर्ना गर्न सबै लागि पर्न सुझाव दिए।
कार्यक्रममा धन्यवाद ज्ञापन गर्दै बूढानीलकण्ठ वडा नं ११ का वडा अध्यक्ष राजु अधिकारीले सरकारले राष्ट्रव्यापी अभियान सुरु गरेकोले सफल बनाउन सबैलाई अनुरोध गरेका छन्।साथै वृक्षारोपणले राष्ट्रिय शहिद तथा शान्ति पार्क निजामति (स्मारक) यज्ञडाेल (जगडाेल) सामुदायिक वन साथै आसपासको सार्वजनिक भूभागको संरक्षण, हरियाली र सौन्दर्यतालाई बढाउने बताउदै जति बिरुवा रोपेका छौँ ती सबै विरुवालाई हुर्काउन सामुहिक रूपमा सबैले हालेमालो गर्नुपर्ने बताए।वृक्षरोपण कार्यक्रममा फल दिने साथै सौन्दर्य जातका करिब ३० बोट बिरुवा रोपिएको थियोे।
काठमाडौँ, भाद्र १५ । गोकर्णेश्वरको महादेव मन्दिर कुशे औँसीको दिन बन्द रहने भएको छ । कोरोनाको दोस्रो लहरमा संक्रमित संख्या दिनहुँ बढ्दै साथै तेस्रो आउँन सक्ने जोखिम रहेकाले गत वर्ष जस्तै यस वर्ष पनि गोकर्णेश्वर महादेव मन्दिर क्षेत्रमा लाग्ने कुशे औँसी मेला स्थगन हुने भएको हो । प्रत्येक वर्ष भाद्र कृष्ण औँसीका दिन गोकर्णेश्वर महादेव मन्दिर परिसरमा दिवंगत पितृका नाममा जलदान, सिधादान र पिण्डदान गर्न स्वदेश तथा विदेशबाट लाखौँ भक्तजन आउने गर्छन्।गोकर्णेश्वर महादेव मन्दिर क्षेत्र प्रबन्ध समितिको शनिबारको बैठकले मन्दिर क्षेत्रमा लाग्ने कुशे औँसी मेला स्थगन गर्ने निर्णय गरेको समितिका अध्यक्ष एवं गोकर्णेश्वर नगरपालिका वडा नं ४ का अध्यक्ष श्रीकुमार श्रेष्ठले जानकारी दिए। उनले कोरोना संक्रमण तीब्र रूपमा बढिरहेको बेला मन्दिरमा आउने श्रद्धालु भक्तजनहरु साथै बजारमा ठूलो मेला लाग्ने भएकोले मेला हेर्न आउने लाखौंको स्वास्थ्य सुरक्षाको लागि मेला स्थगन गर्न बाध्य भएको बताए। यस वर्ष भदौ २२ गते कुशे औँसी मेला परेको छ।भाद्र कृष्ण औँसीमा गोकर्णेश्वरमा आएर जलदान, सिधादान र पिण्डदान गरेमा २१ कुल सम्मका पितृ तर्छन् भन्ने धार्मिक विश्वास छ। गत वर्ष पनि कोरोना महामारीका कारण मेला स्थगन गरिएको थियो।
काठमाडौँ, भाद्र १३ । गोकर्णेश्वर नगरपालिका भित्रका विद्यालयहरु भाद्र १५ गते देखि भौतिक रुपमा संचालन हुने भएका छन्।
नगरपालिकामा भाद्र १३ गते बसेको नगर शिक्षा समितिको बैठकले आगामी भाद्र १५ गते देखि सुरक्षा मापदण्ड सहित विद्यालयहरु खोल्ने निर्णय गरेको हो ।
कोभिड १९ को दोस्रो लहर बढे संगै बैशाख १६ गते देखि बन्द गरिएका नगरपालिका भित्रका शैक्षिक संस्थाहरु खोलिने भएका हुन् ।गोकर्णेश्वर नगरपालिकाको शिक्षा तथा खेलकुद शाखाको सूचना:-
काठमाडौँ, भाद्र १२ ।बौद्ध ६ तीनचुली स्थित भुवालडाँडामा हिमालय मैत्री फाउण्डेसन नेपालको उद्घाटन भएको छ ।शुक्रबार एक कार्यक्रम बिच फाउण्डेसनका संस्थापक संरक्षक खेन रिम्पोछे फुर्वा दोर्जेले फाउण्डेसनको उद्घाटन गरेका हुन् ।
फाउण्डेसनको उद्घाटन कार्यक्रम अघि फाउण्डेसनको कार्यालयमा लामा गुरु उर्गेन लामाको नेतृत्वमा हरित तारा पुजा (ढोल्छ्योक) भएको थियो । ९ जनाको कार्यसमिति रहेको फाउण्डेसनको उपाध्यक्ष छिरिङ गुरुङ, सचिव आचार्य बुद्ध लामा र कोषाध्यक्ष समाजसेवी याङ योञ्जन रहेका छन् ।
फाउण्डेसनका अध्यक्ष आचार्य थुप्तेन (अशोक लामा)ले बुद्ध शिक्षाको प्रवद्धर्नका साथै धर्म संस्कृतिको संरक्षणका लागि फाउण्डेसनले कार्य गर्ने बताए। साथै उनले फाउण्डेसनको प्रशिक्षण कक्षमा बौद्ध शिक्षाको ज्ञान, ध्यान कक्षा, सम्भोटालिपी कक्षा सञ्चालन गरिने जानकारी दिए।
कार्यक्रमलाई सम्बोधन गर्दै फाउण्डेसनका संस्थापक संरक्षक खेन रिम्पोछे फुर्वा दोर्जेले नेपालमा बौद्ध धर्म संस्कृतिको विकास र संरक्षणमा फाउण्डेसनले महत्वपूर्ण भूमिका निर्वाह गर्ने साथै सामाजिक परिवर्तन, सामाजिक विकास र चारित्रिक विकासका लागि समेत कार्य गर्ने बताए।उनले बौद्ध शिक्षाको विकासका लागि समेत समुदाय सचेत भएर कार्य गर्नुपर्ने बताए।
काठमाडौं, भाद्र १० । चर्चित गायिका मेलिना राई र नेपाल आइडलबाट आफ्नो परिचय बनाएका चर्चित युवा गायक निशान भट्टराईको आवाजमा “सालघारीमा” गीतको म्युजिक भिडियो सार्वजनिक भएको छ।
गीतकार सन्जिब कोयी राईको शब्द रचना रहेको म्युजिक भिडियो सन्जिब कोयी युटुव च्यानल मार्फत शुक्रबार सार्वजनिक गरिएको हो। युट्युव मार्फत सार्वजनिक गरिएको म्युजिक भिडियोमा मोडल अञ्जुली अधिकारी र विजय पुनले अभिनय गरेका छन्। म्युजिक भिडियोको निर्देशन र कोरियोग्राफी आशिष राईले गरेका हुन्। दुर्गा बान्तावा राई र मनोज राईको छायांकन,राजु कार्कीको एरेन्ज रहेको गीतको संगीत संगीकार दिलीप कोयी राईले गरेका हुन्। गीतकार राई लामो समयदेखि मकाउमा छन्।
राईका अनुसार म्युजिक भिडियोका लागि मकाउका सफल युवा व्यवसायी हिमालयन हाउस मकाउका संचालक रुस्तम श्रेष्ठको मुख्य प्रायोजन रहेको बताएका छन् ।त्यस्तै नेपाली सहयोगी हातहरु मकाउ, गुरुङ “तमु” समाज मकाउ, किरात राई यायोक्खा मकाउ, मगर संघ मकाउ, शेर्पा समाज मकाउ, नेपाल आदिबासी जनजाति महासंध मकाउ, मकाउ तामाङ घेदुङ एशोसियएसन मकाउ, किरात याक्थुम चुम्लुङ मकाउ, एन-होप ट्रेडिङ एण्ड ब्राण्ड लिमिटेट, महिला शक्ति समाज सुनसरी नेपाल र लायन कविता राई डिस्ट्रिक ३२५ ए १, एडभाइजर लायन वर्ष २०२१/२२ लगायतको विशेष सहयोग र सह प्रायोजन गरेको गीतकार राईले जानकारी दिएका छन ।
दक्षिणकाली फर्पिङ , काठमाडौं लगायतको रमणीय क्षेत्रमा छायांकन गरिएको उक्त गीतका गीतकार राईका अनुसार म्युजिक भिडियो निर्माण गर्न मकाउमा रहेका नेपाली समुदायको विशेष माया, सद्भाव र ठुलो सहयोग रहेको बताउदै आफुलाई सहयोग गर्ने मकाउमा कार्यरत सहयोगी मानुभावहरु र मकाउमा गठीत विभिन्न संधसंस्थाहरुमा विशेष आभार प्रकट गरेका छन्।
काठमाडौँ, भाद्र १०।कालिकोटमा एक किशोरीको शव मकैबारीमा भेटिएको छ।गत शुक्रबार देखि हराएकि खाँडाचक्र नगरपालिका-६ की १६ वर्षीया किशोरी निरु विकको शव मकै बारीमा भेटिएको कालीकोट प्रहरीले बताएको छ।
उनको शव मंगलबार दिउँसो घर नजिकैको मकै बारीमा भेटिएको हो। प्रहरीका अनुसार निरुको शरीर जंगली जनावरले क्षत विक्षत पारेका छन् ।साथै निरुको शरीरको तल्लो भाग नभेटिएको र शव पोस्टमार्टमको लागि जिल्ला अस्पताल लगिएको छ ।घटनाको थप अनुन्धानका लागि कालिकोटका प्रहरी नायव उपरीक्षक डिएसपी चक्रबहादुर शाहको नेतृत्वमा सदरमुकाम मान्मबाट प्रहरी टोली खटिएको बताइएको छ।
काठमाडौं, भाद्र ६। लायन्स क्लब इन्टरनेशनल डिस्ट्रीक ३२५ ए १ को चिफ एरिया कोर्डिनेटर लायन दिपेन्द्र सिम्खडाले आफ्नो जन्म दिन बालबालिकाहरु संग मनाएका छन्। गोकर्णेश्वर नगरपालिका वडा नं ९ स्थित सुनौलो पाइलाका अभिभावकबिहिन बालबालिकाहरुलाई खाद्यान्न र एक दिनको खाना सहित सम्पूर्ण परिवारका साथ सिम्खडाले बाल आश्रममा जन्म दिन मनाएका थिए।
उक्त कार्यक्रममा लायन्स क्लब इन्टरनेसनल डिस्ट्रिक ३२५ ए १ का निवर्तमान डिस्ट्रिक गभर्नर लायन टंक बहादुर श्रेष्ठले जन्म दिनको शुभकामना दिँदै हामी सेवा गर्छौं भनी सेवाभावले जसले समाजमा केही दिन्छ त्यही व्यक्तिले नै जीवनमा सफलता प्राप्त गर्न सक्ने बताएका थिए। साथै सुनौलो पाइलाका छोराछोरीको सुनौलो भविष्य निमार्णमा लायन्स क्लब डिस्ट्रिक ३२५ ए १ ले सकेको साथ र सहयोग गर्ने बताए।कार्यक्रममा फर्स्ट भाइस डिस्ट्रिक गभर्नर लायन कर्म गुरुङ लगायत लायन्स लिडर तथा सदस्यहरुले शुभकामना व्यक्त गरेका थिए ।
लायन्स क्लब अफ काठमाडौं धापाखेलको आयोजनामा हंगर रिलिफ कार्यक्रम अन्तर्गत सिम्खडाले आफ्नो भाद्र ५ गते परेको जन्मदिन सुनौलो पाइलामा रहेका बालबालिका संग मनाएका हुन् ।बालबालिकाहरु संग जन्म दिन मनाउन पाउदा हर्ष साथै आत्म सन्तुष्टि मिलेको भन्दै सामाजिक सेवामा अग्रपंक्तिमा खडा उनले विगत एक दशक देखि जन्म दिनको दिनमा ठूला भोज तथा रमझममा भन्दा पनि त्यस्ता फजुल खर्चलाई कटौती गरि विभिन्न ठाउँमा पुगि सहयोग अनि सेवा गरि अरु भन्दा भिन्न तरिकाले जन्मदिन मनाएको बताए। साथै विभिन्न संघसंस्था वृद्ध आश्रम साथै बालगृह संचालन गरि सेवा गरि रहेकाहरुलाई प्रोत्साहन स्वरुप सकेको सेवा र सहयोग गरी मानवीय कर्तब्य पुरा हुने पनि उनि बताउछन्।
संस्थाकी अध्यक्ष रोजिना बिष्टले सहयोगी मनहरुप्रति आभार प्रकट गर्दै संस्थाले गर्दै आएको गतिविधि साथै वस्तुस्थिति बारेमा जानकारी गराइन् । २०७२ सालको भूकम्प र अन्य कारणले बेसाहारा भएका बालबालिकाहरुलाई लालनपालन देखि आवस, स्वास्थ्य र शिक्षा दिने उदेश्यले २०७५ साल भाद्रमा स्थापित सुनौलो पाइला संस्थामा हाल १४ जना असाहय बालबालिकालाई सुरक्षित आवास र असल अभिभावकत्व प्रदान गरिरहेको छ। राष्ट्रिय युवा संघका केन्द्रिय निर्वाचन विभागका सचिब समेत रहेका सिम्खडाले सोहि दिन आफ्नो जन्म दिनको अवसर पारेर नेपाल खेलकुद महासंघको कार्यालयलाई एक थान डेस्कटप सेट र प्रिन्टर प्रदान गरेका छन् भने मनाङको बाढी पहिरो पिडितलाई रु १० हजार समेत सहयोग गरेका छन् । त्यसै गरि भाद्र ६ गते उनको बुवाको पुण्य तिथि भएको हुँदा सोहि संस्थामा रहेका बालबालिकाहरुलाई खाना खुवाउने समेत जानकारी गराएका थिए ।
काठमाडौँ, भाद्र ६ । गिरिजा प्रसाद कोइराला फाउण्डेशन काठमाडौं क्षेत्र नं. ४ (२) मा रक्तदान कार्यक्रम सम्पन्न भएको छ।सामाजिक क्रियाकलाप सक्रिय जिपि कोइराला फाउण्डेशनले बूढानीलकण्ठ नगरपालिका वडा नं १३ नौलिन भद्रकाली मन्दिर परिसरमा शनिबार रक्तदान आयोजना गरेको हो । रक्तदान कार्यक्रममा ६९ जना रक्तदाताले रक्तदान गरेका थिए।
रक्तदान कार्यक्रम जिपि कोइराला फाउण्डेसन क्षेत्र नं ४ (ख) का अध्यक्ष बिजेन्द्र श्रेष्ठकाे सभापतित्वमा सम्पन्न भएको थियो । कार्यक्रमका प्रमुख अतिथिको रुपमा पूर्व स्वास्थ्यमन्त्री एवं काठमाडौं क्षेत्र नं ४ का प्रतिनिधि सभा सदस्य गगन कुमार थापा र विशेष अतिथिमा बागमती प्रदेश सभा सदस्य न्हुच्छेनारायण श्रेष्ठ सहभागि भएका थिए। स्थानीय युवाहरूकाे सक्रिय सभागितामा सम्पन्न रक्तदान कार्यक्रममा सांसद गगन थापाले फाउण्डेसनले समाजसेवाकाे क्षेत्रमा पुर्याइरहेकाे याेगदान मूल्यांकनयाेग्य भएकाे बताउँदै फाउण्डेसनकाे क्षेत्र नं ४ ख ले बूढानीलकण्ठको विविध क्षेत्रमा गरेको कार्यको प्रशंसा गरेका छन् ।
“रक्तदान नै जीवनदान” भन्ने मूल मन्त्रलाई आत्मसात गर्दै गरिएको कार्यक्रममा सय जना भन्दा बढी रक्तदाताहरु सहभागी भए पनि स्वास्थ्य साथै विविध कारण रक्तदाता कम भएको कार्यक्रम संयोजक विजेन्द्र श्रेष्ठले बताए। साथै उनले कोभिड १९ को विषम परिस्थितिमा रक्त अभाव भइ रगतको लागि हस्पिटलमा बिरामीका परिवारले भोग्नु पर्ने समस्या कम गर्न साथै बिरामीको जीवन रक्षा गर्ने उदेश्यले कार्यक्रमको आयोजना गरेको बताए।कार्यक्रममा रक्तदाता र सहयोगीहरुलाई प्रमाण पत्र वितरण गरिएको थियो।
अमृता के सी (रोनी) काठमाडौँ, भाद्र ६।अन्तराष्ट्रिय युवा दिवसको अवसरमा नेपाल युनेस्काे संघसंस्था तथा क्लबहरुको राष्ट्रिय महासंघको आयोजनामा गोकर्णेश्वर नगरपालिका वडा नं ४ स्थित राष्ट्रिय शहिद तथा शान्ति पार्क निजामति (स्मारक) यज्ञडाेल (जगडाेल) सामुदायिक वनमा वृक्षारोपण गोडमेल तथा पुनरोंपण गरिएको छ। वातावरण समितिले संयोजन गरेको कार्यक्रममा गोकर्णेश्वर नगर प्रमुख सन्तोष चालिसेको प्रमुख आतिथ्यता सम्पन्न भएको हो।
कार्यक्रममा सामुदायिक वनमा पहिले रोपेका वृक्षहरुको गोडमेल गरि फल दिने साथै सौन्दर्य जातका बोट बिरुवा रोपण गरिएको थियो।कार्यक्रमलाई सम्बोधन गर्दै नगर प्रमुख चालिसेले समृद्धिका लागि पर्यापर्यटन माध्यमबाट सामुदायिक वनमा वृक्षहरुको गोडमेल, हेरविचार गरी खाली ठाउँमा वृक्षरोपण गरि संरक्षण गरे आगामी दिनमा राम्रो हुने बताए।साथै उनले युवाहरुमा नयाँ जोस, जागर र उत्साह भएको हुँदा युवा शक्तिलाई सहि मार्गदर्शन गरि समृद्ध नेपाल बनाउन सबैले हालेमालो गर्नुपर्ने बताए।
नेपाल युनेस्काे संघसंस्था तथा क्लबहरुको राष्ट्रिय महासंघका अध्यक्ष आनन्द राज त्रिपाटीको सभापतित्वमा शुक्रबार सम्पन्न कार्यक्रममा राष्ट्रिय शहिद तथा शान्ति पार्क निजामति (स्मारक) यज्ञडाेल (जगडाेल) सामुदायिक वनका अध्यक्ष सुदर्शन सिग्देल, दिपक सरकार, केदारनाथ दाहाल लगायत सामुदायिक वनका पदाधिकारीहरुको उपस्थिति रहेको थियो ।
काठमाडौँ, भाद्र ४ । बूढानीलकण्ठ नगरपालिकाले कोभिड १९ विरुद्धको पहिलो मात्रा खोप नलगाएकाहरुको लागि १३ वटै वडाबाट खोप संचालन गर्ने भएको छ। खोप लगाउने लक्षित समूह भित्र पर्ने १८ वर्ष माथिका विधार्थी र ४० माथिका व्यक्तिहरुलाई कोभिड १९ विरुद्धको चाइनिज भेरोसेलको पहिलो मात्रा खोप भोलि भाद्र ०८ गते प्रदान गरिने भएको हो।
नगरपालिकाका सबै वडामा खोप केन्द्र सञ्चालन गरीने जनस्वास्थ्य महाशाखाले जनाएको छ। खोप भाद्र ८ गते एक दिनका लागि मात्र प्रदान गरिने भएकाले बिहान ९ बजे देखि ४ बजे सम्म खोप सेवा लिन नगरपालिकाले अनुरोध गरेको छ।
कोभिड १९ रोगको रोकथाम, नियन्त्रण र व्यवस्थापनको लागि नेपाल सरकारबाट निर्धारित उमेर समुह अन्तर्गत ४० वर्ष माथिका व्यक्तिहरु साथै १८ वर्ष भन्दा माथिका विधार्थीलाई खोप प्रदान गरिने भएको हो। १८ वर्ष भन्दा माथिका विधार्थीलाई विधार्थी परिचयपत्रको आधारमा र ४० वर्ष भन्दा माथिकालाई आफ्नो उमेर खुल्ने परिचयपत्रको आधारमा खोप लगाइने जानकारी गरेको छ।
अमृता के सी ( रोनी ) काठमाडौं भाद्र, ३। गोकर्णेश्वर नगरपालिकाका नगर प्रमुख सन्तोष चालिसेले प्राचीन दक्षिणकाली माता मन्दिर निमार्णको शिलान्यास गरेका छन् ।दक्षिणकाली नगरपालिका वडा नं ५ स्थित नगर्चु-गोरखनाथ डांँडामा निर्माण गर्न लागिएको मन्दिर गोकर्णेश्वर नगरपालिकाको आर्थिक सहयोगमा बन्न लागेको हो। बिहिबार एक औपचारिक कार्यक्रमको बिच गोकर्णेश्वर र दक्षिणकाली नगरपालिका प्रमुखले मन्दिर निर्माण शुभारम्भ गरेका हुन् ।
कार्यक्रमलाई सम्बोधन गर्दै गोकर्णेश्वर नगर प्रमुख चालिसेले धार्मिक ठाउँको प्रवर्द्धन र विकासमा धार्मिक क्षेत्रमा जस्ले पनि सहयोग गर्न सकिने बताउदै मन्दिरको शिलान्यास गर्न पाउँदा खुसी लागेको बताए।
कार्यक्रमलाई सम्बोधन गर्दै दक्षिणकाली नगरपालिकाका प्रमुख मोहन बहादुर बस्नेतले वडा नं ५,६ र ९ वडाको संगम स्थल रहेको नगर्चु-गोरखनाथ डाँडामा अवस्थित प्राचिन धरोहर पुरानो दक्षिणकाली माताको मन्दिर पौराणिक शैलिमा आकर्षित र व्यवस्थित बनाउने जानकारी गराए।उनले गोकर्णेश्वर नगरपालिकालाई धन्यवाद दिदै दुई नगरपालिका बिचमा सुमधुर सम्बन्धलाई अझ बढी विकसित गर्ने बताए।साथै तीन महिना भित्र मन्दिर निर्माण गरेर पुर्णता दिने बताए।
दक्षिणकाली नगरपालिकाको आयोजनामा बिहिबार सम्पन्न उक्त कार्यक्रममा गोकर्णेश्वर नगरपालिकाका प्रमुख प्रशासकिय अधिकृत राम प्रसाद आचार्य लगायत नगरपालिकाका विभिन्न शाखाका प्रमुख र दक्षिणकाली नगरपालिकाको उप मेयर बसन्ती डँगोल तामाङ लगायत दक्षिणकाली नगरपालिका विभिन्न शाखाका प्रमुख र वडा अध्यक्षहरुको उपस्थिती रहेको थियो।
काठमाडौं, भाद्र २ ।बूढानीलकण्ठ नगरपालिकाभित्र स्थायी रूपमा बसाेबास गर्ने विद्यार्थीहरूलाई मेयर छात्रवृत्ति प्रदान गरिने भएको छ।नगरपालिकामा बसाेबास गर्दै आएका गरिब तथा जेहेनदार विद्यार्थीहरूलाई उच्च तथा प्राविधिक शिक्षामा सहयाेग पुर्याउने उदेश्यले मेयर छात्रवृत्तिकाे आयाेजना गरिएकाे नगर प्रमुख उद्धव खरेलले बताएका छन्।
यो कार्यक्रम अन्तर्गत नगरपालिकाबाट ८ जना विद्यार्थी र श्रीबूढानीलकण्ठ मा. वि. द्वारा २ जना गरी जम्मा १० विद्यार्थीहरूलाई छात्रवृत्ति प्रदान गरिने छ । छात्रवृत्तिमा छनाैट हुनका लागि विद्यार्थीहरूले २०७८ साल भाद्र १५ गते भित्र नगरपालिकाकाे शिक्षा, युवा तथा खेलकुद महाशाखामा निवेदन दिनु पर्नेछ ।
साे छात्रवृत्ति डिप्लोमा इन सिभिल इन्जिनियरिङ र डिप्लोमा इन कम्प्युटर इन्जिनियरिङ काेर्षकाे लागि उपलब्ध छ। काेर्षहरूकाे अवधी ३ वर्षकाे रहकाे छ भने मान्यता ओभरसियर वा +२ बराबरकाे रहकाे छ ।
विद्यार्थीहरूले कक्षा १० मा अङ्ग्रेजीमा न्युनतम डि+, विज्ञान र गणितमा न्युनतम सी ग्रेड ल्याएकाे हुनुपर्ने छ । सामाजिक समानता सुनिश्चित गर्नका लागि २ जना नगरकाेटी, २ जना दलित र अन्य ४ विद्यार्थीहरूलाई नगरपालिकाले छात्रवृत्ति प्रदान गर्ने छ ।सो छात्रवृत्तिमा आवेदन दिन इच्छुक विद्यार्थीहरूले सि.टि.इ.भि.टी. (CTEVT) बाट २०७८ सालमा लिइने प्रवेश परिक्षामा उतीर्ण भएकाे हुनुपर्ने छ ।
अमृता के सी ( रोनी ) काठमाडौं, भाद्र १। गोकर्णेश्वर नगरपालिका न्यायिक समितिको आयोजनामा मेलमिलाप कर्ताहरुलाई शपथ ग्रहण तथा अभिमुखीकरण कार्यक्रम सम्पन्न भएको छ। शपथ ग्रहण कार्यक्रम नगर प्रमुख सन्तोष चालिसेको प्रमुख आतिथ्यतामा सम्पन्न भएको हो ।
आइतबार गोकर्णेश्वर नगरपालिकाको सभाहलमा सम्पन्न कार्यक्रममा उप प्रमुख एवं न्यायिक समिती संयोजक शान्ति नेपालले मेलमिलाप कर्ताहरुलाई शपथ ग्रहण गराएकी थिइन्। कार्यक्रममा मेलमिलाप कर्ताहरुलाई शपथ ग्रहणका साथै अभिमुखीकरण तालिम समेत गराइएको थियो।कार्यक्रममा प्रमुख प्रशासकिय अधिकृत राम प्रसाद आचार्य, वडा नं १ का वडा अध्यक्ष राम मानन्धर, नगरका विभिन्न शाखाका पदाधिकारीहरु लगायत मेलमिलाप कर्ताहरुको उपस्थिती रहेको थियो।
कार्यक्रमलाई सम्बोधन गर्दै नगर प्रमुख चालिसेले शपथ लिएका सहजकर्तालाई नगरको न्यायीक क्षेत्र संग जोडिएको बताउदै नगर भित्रको झैझगडा, विकृति , विसंगती जस्ता नराम्रो कुराहरूमा सर्वसाधारण जनताहरुलाई आपसमा मेलमिलाप गराइ समाजमा शान्ति, अमन चयन राख्न मेलमिलापकर्ताहरुले ठूलो सहयोगी भुमिका खेल्ने बताए ।साथै उनले भने ” नगरको सबै वडाहरुमा मेलमिलापकर्ता हुँदा न्यायीक क्षेत्रमा नगरपालिकाले ठूलो फड्का मार्ने कुरामा नगरपालिकाले विश्वास लिएको बताए “।
नगर उप प्रमुख एवं कार्यक्रमका सभापती नेपालले मेलमिलापकर्ताको आवश्यकता, गर्नुपर्ने काम, कर्तव्य र अधिकारबारे जानकारी गराइन्।उनले मेलमिलाप कर्तालाई कुनै पनि उजुरी र मुद्दालाई कसैको पक्ष/विपक्ष नभनि दुबै पक्षलाई समझदारीको रूपमा आफ्नो ढंगले वडामै मेलमिलाम गराउन आग्रह गर्दै आज सम्म मेलमिलाप कर्ताले गरेको कार्यको प्रशंसा समेत गरिन्।नगरको ९ वटा वडामा गरि करिब ६१ जना मेलमिलाप कर्ता र ४ जना अधिवक्ता समेत सुचिकृत हुन आएको जानकारी गराइन्।न्यायीक समिति, नगरपालिका र वडाका मेलमिलाप कर्ता मिलेर नगरको न्यायीक समितिमा परेका उजुरी जस्तै घरेलु हिंसा, सिमाना, विकृती, विसंगति लगायतका मुद्दाहरुलाई मेलमिलाप गरि पठाउन सहज वातावरण सिर्जना भएको बताइन्।
अमृता के सी ( रोनी ) काठमाडौं, श्रावण ३२।लायन्स क्लब इन्टरनेसनल डिस्ट्रिक ३२५ ए १ अन्तर्गत लायन्स क्लब अफ काठमाडौं जर्नीले फलफूल, पानी, माक्स र सेनिटाइजर वितरण गरेको छ।गोकर्णेश्वर मन्दिर परिसरमा सोमबार लायन्स क्लब जर्नीले गरेको उक्त कार्यक्रममा गोकर्णेश्वर नगरपालिका वडा नं ४ का वडा अध्यक्ष श्रीकुमार श्रेष्ठ, गो.न.पा. वडा नं ८ का वडा अध्यक्ष मनोज ढुंगाना, गोकर्ण प्रहरी प्रभाग प्रमुख रामजी घिमिरे लगायत लायन्स क्लब जर्नीका पदाधिकारीहरुको उपस्थित रहेको थियो।
गोकर्णेश्वर मन्दिरमा साउनको अन्तिम सोमबारमा शिवजीको पुजा आराधना सहित ब्रत थन्काउने ब्रतालुको भिडभाड हुने भएकोले श्रद्धालु भक्तजनहरुको सुरक्षाको लागि माक्स र सेनिटाइजर वितरण कार्यक्रम गरिएको वर्ष २१/२२ का अध्यक्ष लायन विशाल भण्डारी जानकारी गराए।साथै धार्मिक ठाउँमा विशेष गरि पर्वहरुमा श्रद्धालु भक्तजनलाई रोक्न नसकिने भएकोले संक्रमण दिनहुँ बढी रहेको विषम परिस्थितिमा संक्रमणलाई बढ्न नदिन कार्यक्रमको आयोजना गरेको बताए।
“हामी सेवा गर्छौं ” भन्ने भाव बोकेर सेवामा समर्पित लायन्स क्लब अफ काठमाडौं जर्नीले मन्दिरमा आउनु भएको साथै बोलबम जाने भक्तजनहरुलाई सेनिटाइजर लगाइ दिदै फलफूल, पानी, र माक्स करिब ३०० जनालाई वितरण गरेको थियो ।
काठमाडौं, श्रावण ३२ ।काठमाडौं महानगरपालिका ६ स्थित भृकुटीचोकबाट १ केजी गाँजाको धुलो (पोल्याण्ड ) सहित एक जना पक्राउ परेका छन्। लागुऔषध विक्रि वितरण भई रहेको भन्ने गोप्य सूचनाको आधारमा महानगरीय प्रहरी प्रभाग कपनबाट खटिएको प्रहरी टोलिले शनिबार बेलुका करिव ५.३० बजेको समयमा चेक जांच गर्दा नियन्त्रित लागुऔषध गाँजाको धुलो (पोल्याण्ड) १ के.जि ३२ ग्राम सहित एक व्यक्तिलाई पक्राउ गरेको हो।
पक्राउ पर्ने पाँचथर स्थायी घर भई हाल काठमाडौं -६ कपन तेन्जिङचोक बस्ने बर्ष २३ को दिपेन भारती हुन् ।उनललाई नियन्त्रणमा लिई थप अनुसन्धान तथा कारबाहिको लागि महानगरीय प्रहरी वृत्त बौद्ध पठाएको छ।
अमृता के सी ( रोनी ) काठमाडौँ, श्रावण ३०। गोकर्णेश्वर नगरपालिका वडा नं ३ स्थित गाम्चा युवा क्लबको समुद्घाटन तथा वृक्षरोपण कार्यक्रम सम्पन्न भएको छ । गोकर्णेश्वर नगर प्रमुख सन्तोष चालिसेले क्लबको उद्घाटन गरेका हुन्।नगरपालिका प्रमुख चालिसेले क्लब द्वारा आयोजित वृक्षरोपण समेत गरेका थिए ।
शनिबार आयोजित कार्यक्रममा क्लबका सचीव कुमार नगरकोटिले अतिथीहरुलाई स्वागत गर्दै भने गाम्चाको चौतर्फी विकास साथै पर्यटकीय गाउँ बनाउने उदेश्यले क्लबको स्थापना गरेको बताए ।साथै सडकको पेटिमा फूलका बोट बिरुवा रोपेर सुन्दर सडक बनाइ सरसफाईलाई बढि प्राथमिकता दिने समेत बताए।
“आफ्नो ठाउँ आफै बनाउ” भन्ने नारा सहित सम्पन्न कार्यक्रमको सभापतित्व जुठे नगरकोटिले गरेका थिए भने उक्त कार्यक्रममा गोकर्णेश्वर नगर उप प्रमुख शान्ति नेपाल, गो.न.पा. वडा नं ३ वडा अध्यक्ष राजेन्द्र कुमार भण्डारी, गो.न.पा. ३ वडा सदस्य लक्ष्मि भण्डारी, गो.न. पा. ३ वडा सदस्य लक्ष्मण गोलें,गोकर्ण प्रहरी प्रभाग प्रमुख रामजी घिमिरे, समाजसेवी जयराम बिष्ट, समाजसेवी राम राज थापा स्थानीय संघ संस्थाका प्रतिनिधि, बुद्धिजीवी, समाजसेवी, सहयोगीदाताहरु लगायत स्थानीयहरुको उपस्थित रहेको थियो।
कार्यक्रमलाई सम्बोधन गर्दै उप प्रमुख नेपालले युवा शक्तिले परिवर्तन ल्याउन सक्ने भएकोले यसको सहि सदुपयोग गरी नगरकै उत्कृष्ट गाउँ बनाउन क्लबलाई बधाई तथा शुभकामना दिइन्।भने नगर प्रमुख सन्तोष चालिसेले गाम्चामा जोस जाँगरका साथ युवाहरु विउँझिएको र नयाँ उर्जा थपिएको भन्दै नगरबाट गर्नुपर्ने साथ र सहयोग गर्ने बताए।साथै उनले युवाहरु एकजुट भए भने असम्भवलाई सम्भव बनाउन सकिने बताउदै वृक्षरोपण गरी रोपेको वृक्षहरुको हेरविचार समेत गर्न सुझाव दिए।
वृक्षरोपण कार्यक्रममा जगडोल भञ्ज्याङ देखि गाम्चा पिपलबोट सम्म करिब ११५ फूलका बोट रोपण गरिएको थियो ।उक्त वृक्षाको सुरक्षा गर्नका लागि जालि विभिन्न संघ–संस्था, समाजसेवी, व्यापारी लगायतका व्यक्तिहरुद्वारा सहयोग प्रदान गरिएको थियो ।
काठमाडौं, श्रावण २८ । गोकर्णेश्वर ९ स्थित सुनौलो पाइलाले कोभिडमा अग्रपंक्तिमा खटिएका मिडियालाई सम्मान तथा कोभिड सुरक्षा सामाग्री वितरण गरेको छ। गोकर्णेश्वर नगरपालिका भित्र कोरोना कहरको बिचमा आफ्नो ज्यान जोखिममा राखेर आम मानिसलाई सु-सूचित गराउन हरदिन कार्य क्षेत्रमा खटेर महत्वपूर्ण भूमिका खेलेको भन्दै सुनौलो पाइला संस्थाले रोज बायोमेडिकल कन्सर्नसंगको सहकार्यमा विभिन्न संचारगृहमा कार्यरत पत्रकारहरुलाई सम्मान गरेको छ । उक्त संस्थाले एक कार्यक्रमका बीच सम्मान सहित प्रेस ज्याकेट र स्वास्थ्य सुरक्षा सामाग्री प्रदान गरेको थियो।
सम्मान कार्यक्रमको उद्घाटन प्रमुख अतिथि नेपाली कांग्रेस बागमती प्रदेश संसदीय दलका सचेतक छिरिङ दोर्जे लामा र विशेष अतिथि गोकर्णेश्वर नगर प्रमुख सन्तोष चालिसेले संयुक्त रूपमा पानसमा दिप प्रज्वलन गरि गरेका थिए ।कोभिड–१९ को महामारीका बीच पनि अग्रपङ्तिमा रही काम गर्ने विभिन्न सञ्चार संस्था र त्यहाँ कार्यरत पत्रकारहरुलाई संस्थाकी अध्यक्ष रोजिना बिष्ट, प्रमुख अतिथि र विशेष अतिथिले संयुक्त रुपमा सम्मानपत्र, प्रेस ज्याकेट, स्वास्थ्य सुरक्षाका सामग्रीहरु सहित पत्रकार र सञ्चार संस्थालाई सम्मान गरेका थिए।सम्मान पाउने संचार संस्थाहरुमा गोकर्णेश्वर खबर डटकम, कपन अनलाइन, मकालु खबर, विश्व न्युज डटकम, न्युज 24, योहो टि. भि., हिमपात डटकम, अक्षरपाटी डटकम र सिधा दृष्टि रहेका थिए।
बुधबार गोकर्णेश्वर नगरपालिका वडा नं ८ बेंसीगाउ स्थित भेनस नेशनल कलेजको सभाहलमा सम्पन्न कार्यक्रमको अध्यक्षता सुनौलो पाइलाकी संस्थापक अध्यक्ष रोजिना बिष्टले गरेकि थिइन् । उक्त कार्यक्रममा नगरपालिकाका प्रमुख सल्लाहकार दिपक रिसाल, गो. न.पा.वडा नं ३ का वडा अध्यक्ष राजेन्द्र कुमार भण्डारी, गो.न.पा.वडा नं ५ का वडा अध्यक्ष नारायण बहादुर सुवेदी, गो. न. पा. वडा नं ६ का वडा अध्यक्ष रमेश अर्याल,भेनस नेशनल कलेजका क्याम्पस प्रमुख कृष्ण गौतम, नेपाल मेडिकल कलेज ट्रेड युनियनका अध्यक्ष किरण के सी, मानवअधिकार तथा शान्ति समाज काठमाडौं शाखा सभापति ईश्वर पुडासैनी, समाजसेवी, बुद्धिजीवी लगायत विभिन्न संघ संस्थाका प्रतिनिधिहरु सहित संस्थाको पदाधिकारीहरुको उपस्थिति रहेको थियो।
कार्यक्रमलाई प्रमुख अतिथिको रुपमा सम्बोधन गर्दै सांसद छिरिङ दोर्जे लामाले आयोजकलाई धन्यबाद दिएका थिए। विषम परिस्थितिमा सम्भावित जोखिमको ख्याल नगरी नागरिकलाई सु-सूचित गराउने पेशागत कर्ममा जुटेका पत्रकारले स्रोतसाधन तथा स्वास्थ्य सामग्रीको अभावमा उच्च जोखिम मोलेर पत्रकारिता गरिरहेको बताउदै उनीहरुले गर्दै आएको कामको उच्च प्रसंशा गरेका थिए। साथै उनले आलोचनात्मक विषयलाई नि सकारात्मक तरिकाले प्रचार प्रसार गर्न समेत सुझाव दिएका छन् ।
कार्यक्रमलाइ सम्बोधन गर्दै गोकर्णेश्वर नगरपालिका प्रमुख चालिसेले आयोजकलाई धन्यबाद दिदै छिट्टै नगरमा पनि पत्रकार तथा सञ्चार संस्थालाई सम्मान गर्ने बताए । ‘राज्यले गर्नुपर्ने सम्मान एउटा संस्थाले गरेकोमा संस्थाको प्रसंशा गरेका थिए।उनले पत्रकारलाई सत्य तथ्य र निश्पक्ष तरिकाले पत्रकारीता गर्न आग्रह गर्दै राम्रोलाई राम्रो र नराम्रोलाइ नराम्रो भन्नु पर्ने बताएका थिए।
कार्यक्रम धन्यवाद ज्ञापन गर्दै सभापति बिष्टले कोभिड १९ को पहिलो अवस्था देखि हालको अवस्था सम्म आइपुग्दा समेत विभिन्न संघ संस्था बन्द भइ निषेधाज्ञा जारी भएको संक्रमणकाल समेत आफ्नो ख्याल नगरि अग्रपङ्तिमा रही जनतालाई सु-सूचित गराउँदै आएका पत्रकारलाई सम्मान गर्न पाउँदा खुसी लागेको बताएकी थिइन्।साथै आफू पनि यो भयावह समयमा ठाउँ-ठाउँमा राहत लिएर जादाको स्थिती स्मरण गर्दै पत्रकारहरुको हौसला बढाउन सकेको सहयोग गरेको बताइन् ।
काठमाडौं, श्रावण २५। वन तथा भु-संरक्षण विभाग बबरमहल डिभिजन वन कार्यालयद्वारा सामुदायिक वन दिवस तथा भु-संरक्षण दिवसको अवसरमा राष्ट्रिय शहीद तथा शान्ति पार्क,निजामती ( स्मारक ) यज्ञडोल (जगडोल) सामुदायिक वनमा वृक्षारोपण समारोह २०७८ सम्पन्न गरेको छ।
“प्रकृतिको भरपोषण प्रभावकारी भु – संरक्षण “को नाराका साथ भु-संरक्षण दिवस साथै “सामुदायिक वनको सम्पति:समृद्धि,प्रकृति र संस्कृति” नाराका सामुदायिक वन दिवस दुई वटै कार्यक्रम समायोजन गरेर सौन्दर्यजात र फलफूलका वृक्षहरु रोपण गरेर मनाइएको थियो।
वन तथा भु-संरक्षण मन्त्रालयका सचिव डा.पेम नारायण कडेलले वृक्षरोपण गरि समुद्घाटन गरेको कार्यक्रममा राष्ट्रपति चुरे तराई मधेस संरक्षण विकास समितिका अध्यक्ष डा.किरण पोखरेल, वन तथा भु-संरक्षण विभागका महानिर्देशक देवशमणी त्रीपाटी, डिभिजन वन कार्यालय प्रमुख बद्री कुमार कार्की, बौद्ध प्रहरी वृत्त प्रमुख ढुण्डीराज न्यौपाने, गोकर्णेश्वर नगरपालिका वडा नं ४ वडा अध्यक्ष श्री कुमार श्रेष्ठ, फेकाेपन महासचिब बृख बहादुर शाहि ,सचिब ठाकुर भण्डारी, राष्ट्रिय शहीद तथा शान्ति पार्क,निजामती ( स्मारक ) यज्ञडोल (जगडोल) सामुदायिक वनका अध्यक्ष सुदर्शन सिग्देल, सामुदायिक वन अध्ययन केन्द्रका प्रमुख विष्णु ज्ञवालि लगायत विभिन्न संघ संस्थाको प्रतिनिधिहरुको उपस्थिति रहेको थियो।
कार्यक्रममा आफ्नो भनाइ राख्दै राष्ट्रिय शहीद तथा शान्ति पार्क,निजामती ( स्मारक ) यज्ञडोल (जगडोल) सामुदायिक वनका अध्यक्ष एवं सामुदायिक वन पर्यापर्यटन तथा वन उधम राष्ट्रिय संजालको अध्यक्ष सिग्देलले राष्ट्रिय शहीद तथा शान्ति पार्क, निजामती ( स्मारक ) सातै प्रदेशको पर्यापर्यटनको अभियानको एउटा स्तम्भ केन्द्र बिन्दुको रूपमा जाने बताए। साथै उनले जनप्रतिनिधि, जनता,राजनीति दल र सरकारको तर्फबाट शहिदहरुलाई माल्यर्पण गर्ने पुन्य भुमिमा वृक्षरोपण समारोह गरि दुई वटा कार्यक्रम संगै गर्न सफल भएको बताए।कार्यक्रमलाई सम्बोधन गर्दै वन तथा भु-संरक्षण मन्त्रालयका सचिव डा. कडेलले माटो र पानी प्राकृतिका आधारभूत स्रोतहरु भएकोले यसको संरक्षण गर्ने विषयलाई प्रभावकारी बनाउने बाताए।साथै कडेलले वृक्षरोपण गरि भु -संरक्षण हुने र सामुदायिक वन सबैको साझा सम्पति भएकोले सबैले संरक्षणमा जोड दिनु पर्ने बताए।
अमृता के सी ( रोनी ) काठमाडौं, श्रावण २४ । गोकर्णेश्वर नगरपालिकाले वडा नं ३ स्थित गाम्चामा कुखुराको चल्ला वितरण गरेको छ।नगरपालिकाले विपन्न वर्गका लागि आय-आर्जन गर्न प्रेरित गर्ने उदेश्यका साथ वस्तुगत टेवा कार्यक्रम अन्तर्गत कुखुराका चल्ला वितरण गरेको हो । महिला समुहलाई लक्षित गरि करिब ५१ घर परिवारका महिला दिदी बहिनीहरुलाई आय आर्जन गर्न प्रेरित गर्ने उदेश्यका साथ करिब १०२० वटा कुखुराको चल्लाहरु नगर प्रमुख सन्तोष चालिसेले शनिबार एक कार्यक्रम बिच वितरण गरेका हुन्।
कुखुराका चल्ला वितरण कार्यक्रममा गोकर्णेश्वर नगरपालिका उप-प्रमुख शान्ति नेपाल, प्रमुख प्रशासकिय अधिकृत रामप्रसाद आचार्य, स्वास्थ्य शाखा प्रमुख हरिप्रसाद उपाध्यय,सामाजिक विकास शाखा प्रमुख गोमा प्रसाईं, नगर कानुनी सल्लाहकार विनय कुमार पण्डित, गो.न.पा. ३ वडा सदस्य लक्ष्मि भण्डारी लगायत स्थानियहरुको बाक्लो उपस्तिथि रहेको थियो।
कार्यक्रमलाई सम्बोधन गर्दै उप प्रमुख नेपालले नगरपालिकाबाट उक्त क्षेत्रका महिला दिदिबहिनी साथै स्थानियको जीवनस्तर उकास्न समय समयमा विभिन्न कार्यक्रम गर्दै आएको बताइन्।साथै वितरण गरेको चल्लालाई उत्पादन मुखी बनाएर वस्तिमा आर्थिक समृद्धिलाई टेवा पुग्ने हेतुले व्यवसाय सुरु गर्न समेत अनुरोध गरिन् ।भने नगर प्रमुख सन्तोष चालिसेले वितरण गरेको एक घर प्रती २० वटा चल्लाबाट सयौं चल्ला उत्पादन गरि उत्पादनलाई व्यवसायीक हिसाबले सुरु गर्न सुझाव दिए। चालिसेले स्थानिय निकाय संग आफ्नो ठाउँ अनुसारको आवश्यकता पर्ने जस्ले उत्पादनका साथै आर्थिक उपार्जन गरि आय आर्जनको बाटो अगाडि बढाउन सक्ने कार्यक्रमको माग गरि स्वरोजगार हुन समेत आग्रह गरेका छन् ।
काठमाडौं, श्रावण २३ ।बूढानीलकण्ठ नगरपालिकाका प्राविधिक बिनोद पौडेल घुस रकम सहित पक्राउ परेका छन्। बूढानिलकण्ठ नगरपालिका वडा नं ६ स्थित होटलबाट अख्तियार दुरुपयोग अनुसन्धान आयोगको टोलीले पौडेललाई रंगेहात पक्राउ गरेको हो।
नगरपालिका भित्रको एक सडक निर्माण कार्य सम्झौता बमोजिम सम्पन्न भए पश्चात भुक्तानी दिने क्रममा सेवाग्राही सँग ७२ हजार घुस रकम माग गरेको सूचना पाएको आधारमा अख्तियार टोलीले पौडेललाई पछ्याएको थियो । होटल सब्रिनामा अख्तियार टोलिले उक्त रकम सहित पौडेललाई पक्राउ गरेको हो ।पौडेललाई पक्राउ गरी थप अनुसन्धान गरिरहेको आयोगले जानकारी दिएको छ। पौडेल तात्कालीन कपन गा.बि.स. हुँदा देखी कपन गा.बि.स. र हाल बूढानिलकण्ठ नगरपालिकाको प्राविधिकको रुपमा निकै सकृया हुँदै आएका छन् ।
काठमाडौं, श्रावण २२ ।नेपाल कम्युनिस्ट पार्टी एमालेको बूढानिलकण्ठ नगर कमिटीको पहिलो बैठक सम्पन्न भएको छ। बूढानिलकण्ठ नगरपालिका वडा -१३ चुनिखेलको सार पार्टी प्यालेसमा आयोजना गरिएको बैठक नेकपा एमालेका केन्द्रीय कमिटी सदस्य तथा विदेश विभाग प्रमुख डा. राजन भट्टराईको प्रमुख आतिथ्यतामा समापन भएको छ।
बिहिवार सम्पन्न कार्यक्रममा केन्द्रीय सदस्य तथा काठमाडौं जिल्ला कमिटी अध्यक्ष कृष्ण राई , केन्द्रीय सदस्य तथा काठमाडौं जिल्ला कमिटी सह इन्चार्ज नारायण सिलवाल ,जिल्ला सचिव दिपक निरौला , क्षेत्रीय संयोजक तेज ढकाल ,जिल्ला सदस्यहरु संगम गहतराज, मिठाराम अधिकारी, लक्ष्मी संग्रौला, सुशीला सिलवाल ,बिदुर बिक्रम खड्का ,अनिता लामा, बूढानिलकण्ठ नगर प्रमुख उदव खरेल, उपप्रमुख रमा राई लगायत अतिथि रहेका थिए।कार्यक्रममा पार्टीका विभिन्न विषयहरुमा छलफल साथै शाखा अध्यक्ष र सचिवको नाम घोषणा गरिएको थियो ।
को को बने अध्यक्ष र सचिव ?
वडा नं १ : हरी भारती ( अध्यक्ष ) र नबिन श्रेष्ठ ( सचिव )
वडा नं २. राजेन्द्र श्रेष्ठ ( अध्यक्ष ) र निशा बराल ( सचिव )
वडा नं ३ : गणेश कुँवर ( अध्यक्ष ) र राज कुमार महर्जन ( सचिव )
वडा नं ४ : कमला पन्त ( अध्यक्ष ) र पर्शुराम शर्मा ( सचिव )
वडा नं ५ : नारायण दुलाल ( अध्यक्ष ) र चन्द्रमान श्रेष्ठ ( सचिव )
वडा नं ६ : प्रशान्त डंगोल ( अध्यक्ष ) र रामहरी खड्का ( सचिव )
वडा नं ७ : मंगलदास श्रेष्ठ ( अध्यक्ष ) र विश्व निरौला ( सचिव )
वडा नं ८ : बिनोद थापा ( अध्यक्ष ) र सबिन अधिकारी ( सचिव )
वडा नं ९ : दिलिप थिङ्ग ( अध्यक्ष ) र मिना श्रेष्ठ ( सचिव )
वडा नं १० : जगत प्रसाद निरौला ( अध्यक्ष ) र शम्भु पौडेल ( सचिव )
वडा नं ११ : कृष्ण भट्टराई ( अध्यक्ष ) र अंगुर पौडेल ( सचिव )
वडा नं १२ : शंकर भट्टराई ( अध्यक्ष ) र विष्णु भट्टराई ( सचिव )
वडा नं १३ : टिकेस नारायण श्रेष्ठ ( अध्यक्ष ) र धर्म श्रेष्ठ ( सचिव )
