Author: Amrita KC

अमृता के सी ( रोनी )
काठमाडौँ,जेष्ठ २०।लायन्स क्लब इन्टरनेसनल डिस्ट्रिक ३२५ ए १को आयोजनामा रक्तदान कार्यक्रम सम्पन्न भएको छ। कोभिड–१९ का कारण जारी भएको निषेधाज्ञाले राजधानी सहित देशका धेरै जसो अस्पताल र रक्तकेन्द्रमा रगतको चरम अभाव भएपछि कान्तिपुर अस्पताल रक्त संचारको प्राविधिक सहयोगमा बुधबार रक्तदान कार्यक्रम गरिएको हो। लायन्स क्लब इन्टरनेसनल डिस्ट्रिक ३२५ ए १ अन्तर्गतको लायन्स क्लब अफ काठमाडौं नयाँपाटी भिक्टोरियस र गोकर्ण महिला संजालको संयोजनमा गोकर्णेश्वर नगरपालिका वडा नं १ स्थित वी पी चोक सुन्दरीजल र गोकर्णेश्वर नगरपालिका वडा नं ४ गोकर्णमा आकस्मिक रक्तदान गरिएको छ ।स्वास्थ्य मापदण्डअनुसार सुरक्षित तवरले गरिएको रक्तदानमा महिला संजालको नेतृत्वमा गोकर्णेश्वर नगरपालिकाकी उप प्रमुख शान्ति नेपाल र लायन्स क्लब अफ काठमाडौं नयाँपाटी भिक्टोरियसको संस्थापक अध्यक्ष विख्यात प्रसाद थपलियाले गरेका थिए। कार्यक्रममा नगरपालिकाकी उप प्रमुख नेपालले “रक्तदान,जिवनदान,पुण्यकाम ” भन्दै कोभिडको महामारिमा पनि रक्तदान गरी रक्त अभावमा जीवन मृत्यु संग लडेकाहरुको जीवन बचाउन रक्तदाताहरुले खेलेको भूमिका प्रती आभार व्यक्त गरेकी थिइन् ।

उक्त आकस्मिक रक्तदानमा लायन्स क्लब अफ काठमाडौं नयाँपाटी भिक्टोरियसबाट ३७ पिन्ट र गाेकर्ण महिला संजालबाट १८ पिन्ट रगत संकलन भएको जानकारी आयोजकले विश्व न्युजलाई जानकारी गराएका छन् । हालको विषम परिस्थितिमा खेर जाने रगत स्वास्थ्य व्यक्तिलाई हरेक तीन महिनामा एक पटक रक्तदान गर्न समेत आयोजकले सम्पूर्ण रक्तदाताहरुलाई अनुरोध गरेको छ।कार्यक्रममा धेरै जना रक्तदाताहरुले रक्तदान गर्न इच्छा देखाए पनि स्वास्थ्य लगायतको कारणले गर्दा रक्तदान गर्न नसकेको जानकारी गराउदै कार्यक्रममा उपस्थित सम्पूर्णलाई आयोजकले धन्यवाद समेत दिएको छ।

अमृता के सी ( रोनी )
काठमाडौं, जेष्ठ १८ ।लायन्स क्लब इन्टरनेसनल डिस्ट्रिक ३२५ ए १ अन्तर्गतको लायन्स क्लब अफ काठमाडौं जर्नीले बाजुराको जगन्नाथ गाउँपालिकाको लागि स्वास्थ्य सामाग्री संकलन गरेको छ।नेपालकै विकट एवं विकासका दृष्टिकोणले पिछडिएको बाजुरामा कोरोना कहरको दोस्रो लहर व्यापक रुपमा फैलिराखेको अवस्थामा हाल सम्म ५०२ जना कोरोना संक्रमित भेटिएका छन् ।जगन्नाथ गाउँपालिकाबाट कोरोना संक्रमण रोकथाम र नियन्त्रणका लागि सहयोग आह्वान भैरहेको छ ।“भजन गाउने ओठ भन्दा सेवा गर्ने हात ठूलो हुन्छ” भन्ने मुल मन्त्र बोकेर लायन्स क्लब अफ काठमाडौं जर्नीकी संस्थापक अध्यक्ष लायन रोजिना बिष्ट (रोज) ले स्वास्थ्य सामाग्री आवश्यक परेको खरब पाउन साथ तुरुन्तै स्वास्थ्य सामाग्री जुटाउन लागि परेको बताईन् ।लायन्स क्लब अफ काठमाडौँ जर्नी टिमको आर्थिक सहयोगमा संकलित स्वास्थ्य सामाग्री संकलन कर्तालाई दिईसकेको समेत बिष्टले बताईन्।लायन्स क्लब जर्नीले सिटामोल, ओमिप्राजोल, भिटामिन सि, प्यान्टोप्राजोल इन्जेक्सन, डिक्लोफिनेक इन्जेक्सन ,मास्क आदि संकलन कर्ता समक्ष सोमबार नै पठाइएको छ।संकलन कर्ताले विभिन्न सहयोगी दाताहरुबाट आवश्यक स्वास्थ्य सामाग्री संकलन गरि रहेका छन्।हालको विषम परिस्थितिमा उक्त स्वास्थ्य सामग्री जगन्नाथ गाउँपालिकाको स्वास्थ्य केद्रमा पुर्‍याउने संकलन कर्ताले जानकारी दिएका छन्।

अमृता के सी ( रोनी )
काठमाडौँ,जेष्ठ १७।लायन्स क्लब इन्टरनेसनल डिस्ट्रिक ३२५ ए १ अन्तर्गतको लायन्स क्लब अफ काठमाडौं नयाँपाटी भिक्टोरियसले अक्सिजन भरिएको केही थान सिलिन्डर हस्तान्तरण गरेको छ ।लायन्स क्लब नयाँपाटी भिक्टोरिसले गोकर्णेश्वर नगरपालिका वडा नं १ लाई हस्तान्तरण गरेको हो । कोभिड -१९ को दोस्रो लहरमा धेरैजसो कोरोना संक्रमितलाई श्वासप्रश्वासमा समस्या आए पछी अक्सिजन आवश्यकता हुँदा अक्सिजन नपाएर समस्या थपिदै गएको छ ।अस्पतालहरुमा समेत अक्सिजन नपाएर हरेक दिन नेपाल सरकारले बिदेशबाट अक्सिजन ल्याउने क्रम जारी नै छ। अझै पनि सर्वसाधारणले अक्सिजनको समस्या भोगी रहेको बिषम परिस्थितीमा गोकर्णेश्वर नगर पालिका वडा नं १ मा रहेको लायन्स क्लब अफ काठमाडौँ नयँपाटी भिक्टोरियसले आइतबार एक कार्यक्रमको बिच वडा प्रमुख राम मानन्धर ५ सिलिन्डर अक्सिजन हस्तान्तरण गरेको हो । क्लबले हस्तान्तरण गरेको अक्सिजन सिलिण्डर आजै दुई जना संक्रमितलाई वडा कार्यालयले दिइसकेको छ भने अक्सिजनको आवश्यकता हुनेले वडामा सम्पर्क गर्न समेत वडा प्रमुखले जानकारी दिएका छन्।”जहाँ आवश्यकता त्यहाँ लायन्स” नितान्त सेवाभाव बोकेर देशमै कोरोना भाइरस संक्रमणको जोखिम समयमा आइसोलेशन सेन्टर,स्वास्थ्य सामाग्री देखि भोकालाई भोजन समेत लायन्स क्लब इन्टरनेसनल डिस्ट्रिक ३२५ ए १ ले दिदै आएको छ।हालको विषम परिस्थितिमा लायन्स क्लब अफ काठमाडौँ नयँपाटी भिक्टोरियसका चार्टर प्रेसिडेन्ट लायन बिख्यात प्रसाद थपलियाका अनुसार प्रायजसो वडाबासिले वडा कार्यालयमा अक्सिजनको माग गर्ने हुँदा उक्त अक्सिजन हस्तान्तरण वडामा पनि गरेको बताए ।नयाँ भेरियन्टको दोस्रो लहर नेपालमा व्यापक रुपमा फैलिराखेको अबस्थामा अग्रपन्तिमा खटेर लायन थपलियाले बिरामिको घर-घरमा अक्सिजन सिलिन्डर पुर्‍याइ दिइ रहेका छन्।

अमृता के सी ( रोनी )
काठमाडौँ, बैशाख १४ ।बागमती प्रदेश संसद छिरिङ दोर्जे लामाको समन्वय र काठमाडौँ महानगरपालिका ६ नं वडा कार्यालयको नेतृत्वमा अक्सिजन सहित १० शैयाको आइसोलेशन सेन्टर सुचारु भएको छ ।

कामपा महांकाल स्थित श्री जनकल्याण माध्यामिक विद्यालय,आर्ट अफ लिभिङ लगायत विभिन्न संघ संस्थाको साझेदारीमा आइसोलेशन सेन्टर निर्माण भएको हो ।प्रदेश संसद लामाले तीब्र रुपमा कोरोना संक्रमण बढीरहेको विषम परिस्थितिमा भाडामा बसोबास गरिरहेका संक्रमितहरुलाई होम आइसोलेशन बस्न समस्या हुने भएकाले आइसोलेशन केन्द्र निर्माण गरिएको बताए ।
बुधबारबाट संचालन गरिएको आइसोलेशनमा निःशुल्क औषधि, खाना र स्वास्थ्य सुविधाको व्यवस्था गरिएको छ।संक्रमित बिरामीलाई २४ सैं घण्टा स्वास्थ्यकर्मीको निगरानीमा स्वास्थ्य उपचार र हेरचाहको व्यवस्थापन गरिएको छ।आइसोलेशनको केन्द्र संचालन पछि आफ्नो वडामा रहेका संक्रमितहरुको उपचारमा सहजता हुने कुरामा वडा अध्यक्ष दिपेन्द्र लामा विश्वस्त छन् ।

अमृता के सी ( रोनी )
काठमाडौँ जेष्ठ ९ ।बूढानीलकण्ठ नगरपालिका १३ का जनप्रतिनिधि र कर्मचारीमा कोरोना संक्रमण देखिएकोले वडा कार्यालय बन्द गरिएको छ।निषेधाज्ञाको समयमा पनि वडा कार्यालयले सुरक्षाको मापदण्ड सहित सेवा प्रदान गर्दै आएको थियोे । वडामा संक्रमित संख्या वृद्धि साथै कर्मचारी र जनप्रतिनिधिमा समेत कोरोना पोजेटिभ देखिएकोले कोरोना जोखिम नियन्त्रण र रोकथामका लागि भन्दै वडा नम्बर १३ ले जेष्ठ १० गते देखि १४ गते सम्म बन्द रहने सूचना जारी गरेको छ।

अमृता के सी ( रोनी )
काठमाडौँ जेेेठ ०१ । गोकर्णेश्वर नगरपालिका स्थित गोकर्णमा शुक्रबार साँझ टिपरको ठक्करबाट एक व्यक्तिको मृत्यु भएको छ। साँझ करिव ८:४० को समयमा गोकर्ण अस्पताल मुनीको सुन्दरिजल सडक खण्डमा टिपरले पल्सर बाइकलाई ठक्कर दिँदा मोटर साईकल चालकको घटनास्थलमा मृत्‍यु भएको हो । घटनामा संलग्न टिपर चालक फरार भएको जानकारी स्थानीयले गराए। मृतक मोटर साईकल चालकको पहिचान नखुलेको प्रहरी श्रोतले जनाएको छ । दुर्घटनामा परेको पल्सर मोटर साईकलको नम्बर बा २० प ४५३० रहेको छ ।

कसैले उक्त बाइक नम्बर चिनेमा तुरुन्तै गोकर्ण प्रहरी प्रभागमा खबर गर्न गोकर्ण प्रहरीले अनुरोध गरेको छ।

अमृता के सी ( रोनी )
काठमाडौँ, बैशाख ३१ ।बूढानीलकण्ठ नगरपालिकाले बैशाख ३१ गते देखि नगरभित्र रहेका सम्पूर्ण सहकारी संस्थाहरूले कार्यालय मार्फत दिने सेवा प्रवाहलाइ स्थगित गर्न सूचना प्रकाशित गरेको छ ।अत्यावश्यक अवस्थामा प्रविधिकाे माध्यमबाट नभए सम्पर्क व्यक्ति ताेकि बैकल्पिक रूपमा वित्तिय सेवा प्रवाह गर्न नगरपालिकाले जानकारी गराएको छ।

भौतिक उपस्थिती बिना अधिकतम प्रबिधीको प्रयाेग गरि संस्थाका सदस्यहरूमा महामारी संक्रमण राेकथाममा लागि पर्न समेत नगरपालिकाले भनेको छ । आवश्यक स्वास्थ्य मापदण्डकाे र निषेधाज्ञाकाे पालना गर्नका सचेतना फैलाउनका साथै, सदस्यहरू सँग नियमित सम्पर्कमा रहि उनीहरूलाई परेकाे समस्या बारे जानकारी लिइ नगरपालिका सँग समन्वय गरी सदस्य तथा समुदायकाे स्वास्थ्य सेवामा सहजीकरण गर्न नगरको सम्पूर्ण सहकारी संस्थाहरूलाई प्रकाशित सूचनामा भनिएको छ ।

उक्त सूचनामा निषेधाज्ञा अवधिभर घर दैलाैमा गइ बचत संकलन गर्ने कार्य हाललाइ पूर्ण रूपमा स्थगन गर्न भनिएको छ । गैर वित्तय सेवा प्रवाह गर्ने सहकारी संघ संस्थाहरूले (खाद्यान्न, तरकारी, दुध) आदि भाैतिक दुरी तथा स्वास्थ्य सम्बन्धी मापदण्ड पालना गरि सुरूक्षित रूपमा वस्तु तथा सेवा प्रवाह गर्न सक्ने व्यवस्था गरिएको छ ।

अमृता के सी ( रोनी )
काठमाडौँ, बैशाख २३। लायन्स क्लब इन्टरनेसनल डिस्ट्रिक ३२५ ए १ संगको सहकार्यमा महानगरीय प्रहरी प्रभाग गोकर्णले दश शैयाको अक्सिजन थेरापी सेन्टर सञ्चालन गरेको छ । प्रहरी प्रभाग गोकर्णले प्रभाग परिसरमा नै अक्सिजन थेरापी सेन्टर सञ्चालन गरेको हो । कोरोना भाइरसको दोश्रो लहरमा संक्रमण वृद्धि संगै अग्रपंक्तिमा खटिएका सुरक्षाकर्मीहरुको साथै कारागारमा रहेका कैदी बन्दिहरु समेत संक्रमित हुनथाले पछी प्रभागले सेन्टर सञ्चालन ल्याएको हो। गोकर्णेश्वर नगरपालिकामा पछिल्लो समय कोरोना संक्रमित संख्या दिनहु बढेकोले पनि गोकर्ण प्रहरी प्रभागमा अक्सिजन थेरापी सेन्टर सञ्चालनमा ल्याइएको हो। बुधबार लायन्स क्लबले महानगरीय प्रहरी प्रभाग गोकर्णलाइ दश वटा बेड, पी पी इ, मास्क, पन्जा लगायतको सामाग्रीहरु लायन्स क्लब इन्टरनेसनलका जि.ए.टि एरिया लिडर लायन खगेन्द्र सिटौलाले महानगरीय प्रहरी वृत्त बौद्धका कार्यलय प्रमुख प्रहरी नायब उपरीक्षक नबिन कार्कीलाइ हस्तान्तरण गरेका थिए ।

कार्यक्रममा डिस्ट्रिक गभर्नर लायन टंक बहादुर श्रेष्ठ, पुर्व डिस्ट्रिक गभर्नर तथा हालका मल्टिपल डिस्ट्रिक जी एस टि कोर्डिनेटर लायन अनन्त प्रसाद भेटुवाल, जि एम टि डिस्ट्रिक कोर्डिनेटर लायन धर्म शरण श्रेष्ठ, लायन लिडर पेमा छिरी शेर्पा ,जोन चियरपर्सन भिष्म बिक्रम रायमाझी, डिस्ट्रिक चियरपर्सन लायन ठण्डराज ठकुरी, यज्ञडोल जगडोल सामुदायिक वनका अध्यक्ष सुदर्शन सिग्देल लगायतको उपस्थिति रहेको थियो ।दोस्रो लहरको कोरोना भाइरसको उच्च जोखिम बढे संगै धेरै जसो संक्रमितहरुलाई श्वासप्रश्वासमा समस्या देखिएकोले लायन्स क्लबको सहकार्यमा अक्सिजन थेरापी सेन्टर सञ्चालन गरिएको जानकारी गोकर्ण प्रहरी प्रभागले दिएको छ ।

अमृता के सी ( रोनी )
काठमाडौँ, बैशाख १८ । बूढानीलकण्ठ नगरपालिका वडा नं ११ स्थित जगडोल प्रवेशद्वारमा जथाभावी रंग पोतेर अज्ञात व्यक्तीले प्रवेशद्वार माथि क्षती पुर्‍याएका छन्। केही हप्ता अगाडि बूढानीलकण्ठ नगरपालिका ११ स्थित झन्डा पार्कमा गाडीएको राष्ट्रिय झण्डाको प्रतिक झण्डा बिगार्ने,भाच्ने र च्यात्ने जस्तो निर्कृष्ट कार्य भएको केही समय नबित्दै प्रवेशद्वारमा क्षती पुर्‍याइएको हो ।प्रवेशद्वारको सबै भन्दा माथि लेखिएको ” बूढानीलकण्ठ नगरपालिका ” लाई कालोले पोतेर छोपिएको छ । बि सं २०७४ आश्विन ३ गते संविधान दिवसको अवसरमा उप-प्रधानमन्त्री ईश्वर पोखरेलद्वारा उक्त प्रवेशद्वार उद्घाटन गरिएको हो ।
प्रवेशद्वारमा क्षती पुर्‍याए पछी बूढानीलकण्ठ नगरपालिकाले एक बिज्ञप्ती प्रकाशित गरी घटनाको भत्सर्ना गरेको छ भने त्यस्ता महत्वपुर्ण एवं एतिहासिक संरचनाहरु माथि लुकिछिपि आक्रमण गर्ने, हानि नोक्सान गर्ने जस्ता ध्वंसात्मक गतिबिधिमा संलग्न रहेका अराजक व्यक्ति, समुहको खोजि गरी कानुनि कारबाही गर्न बू.न.पा. वडा नं ११ ले सम्बन्धित निकाय र सुरक्षा निकाय सँग अनुरोध गरेको छ ।

अमृता के सी ( रोनी )
काठमाडौँ, बैशाख १६ ।
नेपाल मेडिकल कलेज शिक्षण अस्पताल स्वतन्त्र कर्मचारी युनियनले (आधिकारिक ट्रेड युनियन) कलेजको शैक्षिक तथा अस्पताल सेवा संचालनको माग राखी ज्ञापन पत्र बुझाएको छ।अस्पताल प्रशासनलाई गम्भीर ध्यानाकर्षण गराउदैंँ नेपाल मेडिकल कलेज शिक्षण अस्पताल स्वतन्त्र कर्मचारी युनियन ( आधिकारिक ट्रेड युनियन)का अध्यक्ष किरण के सी सहितको टोलीले ज्ञापन पत्र बुझाएको हो।
पत्रमा कोरोना महामारीको समयमा अग्रस्थानमा काम गर्ने कर्मचारीहरुलाइ पटक पटक धोका, भोक-भोकै राख्ने, अपहेलना गर्ने जस्तो अमानवीय कार्य तुरुन्त रोक्न अनुरोध गरिएको छ। त्यसको साथै यदि कुनै कर्मचारीहरुलाई हाजिर गर्नबाट रोक्ने र जागीर खाइ दिने धम्कि दिएमा २४ घण्टा भित्र सम्पूर्ण प्रशासन सेवा बन्द गरि कर्मचारीहरुको हक हितको लागि जुनसुकै कदम चाल्न कर्मचारी युनियन बाध्य हुने समेत जानकारी गराएको छ ।

उक्त ज्ञापन पत्रमा नेपाल मेडिकल कलेज प्रा.लि प्रशासन बाट २०७८ साल बैशाख १५ गतेको सूचना अनुसार नेपाल मेडिकल कलेजमा कार्यरत कर्मचारीहरुलाई २०७८ बैशाख १६ गते बाटै (निषेधाज्ञाको दिन देखि) आफ्नै संचित बिदा वा बेतलबी बिदा बस्नुपर्ने भनि आधिकारिक ट्रेड युनियन संग कुनै छलफल नगरी सूचना प्रकाशित गरेकोमा उक्त कार्यको घोर भत्सर्ना नेपाल मेडिकल कलेज शिक्षण अस्पताल स्वतन्त्र कर्मचारी युनियनले गरेको छ ।

अमृता के सी ( रोनी )
काठमाडौँ, बैैैशाख ७ ।बूढानीलकण्ठ नगरपालिकाका विद्यालयहरु आज बाट बन्द भएका छन्।कोभिड १९ को प्रकोपको दोश्रो चरण सक्रिय हुँदै गएको सन्दर्भमा मिति २०७८।०१।०६ गतेको संघीय मन्त्री परिषदले शहरी क्षेत्रका विद्यालयहरु बन्द गर्ने निर्णय गरेको हुँदा बूढानीलकण्ठ नगरपालिकाका नगर प्रमुखको अध्यक्षतामा मिति २०७८।०१।०६ गते बसेको नगर शिक्षा समितिको बैठकको निर्णय अनुसार सम्पुर्ण शैक्षिक संस्थाहरु बैशाख ७ गते बाट मसान्त सम्म बन्द गर्न निर्देशन दिएको छ ।

त्यस्तै शाखाले बैशाख १७ गते सम्म शिफ्टका आधारमा स्वास्थ्य मापदण्ड सहित सम्पूर्ण परिक्षा सम्पन्न गर्न पनि निर्देशन दिएको छ ।

अमृता के सी ( रोनी )
काठमाडौँ, बैशाख ६ ।गोकर्णेश्वर नगरपालिकाद्घारा आयोजित स-चेतना (बैठक सञ्चालन विधि) तालिमको आतिथ्य सुन्दरीमाई जेसिजले गरेको छ । बैशाख ३ र ४ गते २ दिन सञ्चालित तालिमको उद्घाटन नगर प्रमुख सन्तोष चालिसेले गरेका थिए भने समापन उप प्रमुख शान्ति नेपालको आतिथ्यतामा भएको थियोे ।

“शासन व्यक्तिको होइन विधिको हुनु पर्दछ” भन्ने मुल मन्त्रलाई आत्मसात गर्दै समृद्ध राष्ट्र निमार्णमा सुन्दरीमाई जेसीजले महत्त्वपूर्ण भुमिका खेलेको भन्दै जेसीजमा १८ देखिको ४० वर्ष उमेर समुहको व्यक्तीहरु मिलि युवाहरुको व्यक्तित्व तथा नेतृत्व विकासमा जोड दिदै समाज सेवा गर्दै आएको जानकारी संस्थापक अध्यक्ष जेसी कृष्ण चालिसेले गराए। सचेतना बैठक तालिमको प्रशिक्षण नेपाल जेसीजका पूर्व कार्यकारिणी उपाध्यक्ष एंव पूर्व कानूनी सल्लाहकार जेसी राजबाबु शाहले दिएका थिए ।उनले प्रक्रिया नमिलेको बैठकको केही औचित्य नहुने हुँदा बैठक के हो,कसरी बैठक सञ्चालन गर्ने,बैठकमा कसको काम के हो,आफ्नो भनाई कसरी राख्ने आदि कुराहरुको दृश्य सहित तालिम दिएका थिए। नगरपालिकाको आर्थिक सहयोगमा सञ्चालित तालिमको संयोजक सुन्दरीमाई जेसीजका महासचिव जेसी बिबेक सिग्देलले गरेका थिए भने अध्यक्षता वर्ष २०२१ का अध्यक्ष जेसी जानुका दाहालले गरेकी थिइन् ।उक्त स-चेतना तालिममा गोकर्णेश्वर नगरपालिकाका कार्यपालिका सदस्यहरु,वडा अध्यक्षहरु,विभिन्न महिला विकास समितिका अध्यक्षहरु,यज्ञडोल (जगडोल) सामुदायिक वनका अध्यक्ष तथा मानार्थ सदस्य सुदर्शन सिग्देल, समाजसेवी एंव मानार्थ सदस्य जेसी रामजी श्रेष्ठ,मातृ शाखा अध्यक्ष जेसी सुरज पोखरेल, सुन्दरीमाई जेसीजका पूर्व अध्यक्ष प्रमोद सिग्देल, निवर्तमान अध्यक्ष जेसी उत्तमराज चालिसे,सल्लाहकार जेसी शिबराज खनाल लगायत वर्ष २०२१ का पदाधिकारीहरुले सहभागिता लिएका थिए ।कार्यक्रम सञ्चालन उपाध्यक्ष जेसी अमृता के सी र जेसी प्रमिला शेर्पाले गरेका थिए ।
कार्यक्रममा सम्बोधन गर्दै उप प्रमुख नेपालले बैठक सञ्चालन विधिले बैठक व्यवस्थित अनि मर्यादित हुने भएकोले सिकेको सिपको सदुपयोग गर्न सहभागी सबैलाई सुझाव दिइन्।नेपालले गोकर्णेेेश्ववर जेसीजमा तीन वर्ष कार्यभार बहन गरि व्यक्तित्वमा निखार तथा नेतृत्व लिन सक्षम भएको बताउदै तालिममा सहभागीहरुलाई दुई दिनको तालिमले मात्र नपुग्ने अझै तालिम लिन इच्छुक भए गोकर्ण महिला संजालको भवनमा आफैले बैठक सञ्चालन विधि तालीमको प्रशिक्षण दिने प्रतिबद्धता जनाइन् ।

अमृता के सी ( रोनी )
काठमाडौँ ।उप्रेती समाजसेवा समितिको बार्षिक साधारणसभा तथा सम्मान वितरण कार्यक्रम सम्पन्न भएको छ । शनिबार सम्पन्न कार्यक्रममा समाजका पूर्व अध्यक्ष तथा पूर्व प्रमुख निर्बाचन आयुक्त श्री निलकण्ठ उप्रेती प्रमुख अतिथि रहेको कार्यक्रममा डा. बिष्णु राज उप्रेती तथा प्रहरी सेवाबाट निबृत गिता उप्रेती बिशेष अतिथि रहेका थिए । उप्रेती समाजसेवा समिति तथा लक्ष्मी देबि – गंगा प्रसाद उप्रेती स्मृति प्रतिष्ठानको संयुक्त सम्मान र पुरस्कार वितरण समारोहमा विभिन्न ५ वटा सामाजिक सेवामा कार्यरत संस्था सम्मानित भएका थिए ।
समाजका महासचिब लक्ष्मण प्रसाद उप्रेतीले स्वागत मन्तब्य र बरिष्ठ उपाध्यक्ष ओम प्रसाद उप्रेतीले धन्यबाद ज्ञापन गरेको कार्यक्रममा उपाध्यक्ष डा. धर्म राज उप्रेतीले दाताको सहयोग हस्तान्तरणमा समन्वय गरेका थिए । सम्मान बितरण कार्यक्रममा अक्षय कोषदाताको तर्फबाट श्री तुलसि प्रसाद उप्रेती र लक्ष्मी देबि – गंगाप्रसाद उप्रेती स्मृति प्रतिष्ठानको तर्फबाट श्री प्रेम प्रकाश उप्रेतीले मन्तब्य राखेका थिए । दुबै कार्यक्रमको अध्यक्षता समाजका अध्यक्ष मोहन कृष्ण उप्रेतीले गरेका थिए ।

त्यस्तै अक्षय कोषबाट समाजसेवी सुनौलो पाईलाको रोजिना बिष्ट र आवाज संस्थाका ईरादा पराजुली गौतमलाई सम्मान तथा पुरस्कार प्रदान गरिएको थियो।उप्रेती समाजसेवा समितिलाई विशेष सहयोग गर्ने ई. मन्जिल उप्रेती तथा होटल तपसका संचालक खेमराज उप्रेतीलाई प्रशंसापत्रले सम्मान गरिएको थियोे । समाजको साधारणसभामा आ.ब. २०७६ र ७७ को बार्षिक तथा आर्थिक प्रतिबेदन पारित भएका थिए । सभामा समाजको भावी रणनीतिको बारेमा छलफल भएको थियो ।

काठमाडौँ /लायन्स क्लब इन्टरनेसनल डिस्ट्रिक ३२५ ए १ का पूर्व गभर्नर एंव हालका जी एस टि मल्टिपल कोर्डिनेटर लायन अनन्त प्रसाद भेटुवाल वर्ल्ड बुक अफ रेकर्ड्स लन्डन युके स्टार २०२१ बाट सम्मानित भएका छन् ।

उनलाई कोरोना महामारीको बिचमा लायन्स आइसोलेसन केन्द्र स्थापना गर्न महत्वपूर्ण भूमिका खेल्नुको साथै लायन्स फुड बैंक स्थापना गरि निशुल्क खाना वितरण लगायतको थुप्रै सामाजिक तथा मानवीय सेवामा पुर्‍याएको योगदानको कदर गर्दै वर्ल्ड बुक अफ रेकर्ड्स लन्डन युके स्टार २०२१ बाट सम्मान गरिएको हो । चैत २१ गते आइतबार लायन्स क्लब अफ काठमाडौं क्रिएटिभ युथ द्वारा ललितपुर महालक्ष्मीस्थान स्थित डीलाइट पार्टी भेन्युमा आयोजित एक कार्यक्रममा उनलाई उक्त सम्मान गरिएको हो । संस्थाका अध्यक्ष सन्तोष शुक्लाले भेटुवाललाई सम्मान गरेका थिए । सम्मान पश्चात बोल्दै भेटुवालले सेवा गर्नको लागि नै लायन्समा आवद्द भएको जानकरी दिदैं सम्मानको लागि धन्यबाद दिएका छन्।

उनले उक्त सम्मानले थप सामाजिक तथा मानवीय सेवाका कार्य गर्न प्रेरणा मिलेको भन्दै सो सम्मानको हकदार आफु मात्र नभई सम्पूर्ण सेवा गर्छु भनेर लागेका लायन्स लिडर सदस्यहरुको साथै सो कार्यमा सहयोग गर्ने सबैमा समर्पित भएको बताएका थिए।उनले जहाँ आवश्यकता त्यहाँ लायन्स भन्ने नाराको साथमा काम गरिरहेको र आगामी दिनमा पनि गर्दै जाने बताएका छन्।
भेटुवालले विदेशमा आँखा बैंक, रगत बैंक जस्तै छाला बैंक पनि हुन्छन् जसबाट छालाका रोग भएका तथा आगोबाट जलेका मानिसको उपचार गर्न सजिलो हुन्छ। नेपालमा पनि लायन्स क्लबले स्किन बैंक स्थापना गरेको हुँदा छाला दान गर्नको लागि अनुरोध गरेका छन्।आगोले जलेकाहरूको उपचारका लागि छाला आवश्यक पर्छ । समयमा छाला नपाउँदा इन्फेक्सन भएर कतिपय बिरामीको मृत्यु सम्म हुने गरेको छ,’ भेटुवालले भने, ‘भारत पुगेर छाला ल्याउँदा डेढदेखि चार लाख रुपैयाँसम्म खर्च हुन्छ ।छाला किन्न मुम्बई सम्म जाँदा–आउँदा बिरामीका आफन्तले अनावश्यक खर्च गर्नु परिरहेको छ। सो समस्याको समाधानकाको लागि लायन्स क्लबले काठमाडौंको कीर्तिपुरमा ‘लायन्स स्किन बैंक’ स्थापना गरेको जानकारी दिएका थिए ।

पर्याप्त जनचेतना नभएका कारण छाला दान गर्नेको संख्या बढ्न नसकेको बताउदै लायन्स क्लब इन्टरनेसनल डिस्ट्रिक–३२५ ए १ ले विभिन्न स्थानमा सचेनता फैलाउँदै हिँडेपछि पछिल्लो समय धेरैले छाला दानका लागि नाम टिपाएको उनले बताएका थिए । ‘‘छाला दान, जीवनदान” को नयाँ अवधारणाका साथ मृत्युपर्यन्त छाला दान गर्न आह्वान गरेका थिए।

अमृता के सी ( रोनी )
काठमाडौँ /लायन्स क्लब इन्टरनेसनल डिस्ट्रिक ३२५ ए २ अन्तर्गतको लायन्स क्लब अफ नेपाल शेर्पाज र लायन्स क्लब हिमचुलीले शनिबार संयुक्त रुपमा सरसफाइ कार्यक्रम आयोजना गरे ।
गोकर्णेश्वर नगरपालिका र बुढानिलकण्ठ नगरपालिकाको सिमाना पर्ने जगडोल भञ्ज्याङ् देखि तारेभिर सम्म दुई संस्थाहरुले संयुक्त रुपमा बृहत सरसफाई कार्यक्रम सम्पन्न गरेका हुन्।यस अगाडि वन उपभोक्ता समूह र स्थानिय क्लबहरुले सरसफाइको व्यवस्थापन गर्दै आएको उक्त क्षेत्रमा यि दुई क्लबहरुले सरसफाई गरेका हुन् ।स्थानिय क्लब र वन उपभोक्ता समुहहरुले गर्दै आएको फोहोर व्यवस्थापन कार्यबाट प्रभाबित भएर उक्त सकारात्मक कार्यलाई साथ दिन कार्यक्रमको आयोजना गरेको प्रतिकृया आयोजक संस्थाले दिए। पर्यटकीय स्थल तारेभिर पदयात्रा लगायत उपत्यकाको तिनै शहर राम्रो संग देखिने भएकोले स्वदेशी तथा बिदेेशी पर्यटकको लोकप्रिय ठाउँ बन्दै आएको छ।लकडाउन पछि शान्त स्वच्छ जलबायुको खोजिमा तारेभिर सबैको थप रोजाइ बनेको छ।बिदाको दिन हजारौंको भिडले प्रयोग गरेका चिज वस्तुहरुले प्राकृति सम्पदा र स्रोतमा पारेका असरबारे सचेतना दिने होलिङ बोर्ड ठाउँ -ठाउँमा टासी करिब १० बोरा फोहोर संकलन गरेर फोहोर व्यवस्थापन गरेको कार्यक्रम आयोजक संस्थाहरुले बताएका छन् ।