Category: अमेरिका

प्रभात भट्टराई/अमेरिका
अमेरिकामा कोरोना भाइरसको प्रकोप चर्कंदो छ । दुई सातामा अमेरिकी जनजीवनमा नाटकीय परिवर्तन आइ सकेको छ । अझै पनि भाइरस नियन्त्रणको कुनै लक्षण देखिएको छैन । अस्पतालहरुमा मास्क, पञ्जा, भेन्टिलेटर जस्ता जरुरी स्वास्थ्य उपकरणको खाँचो भइ रहेको छ । सोमबार साँझसम्ममा भाइसरबाट मृत्यु हुनेको संख्या साढे पाँच सयबाट उकालो लागेको छ भने संक्रमित ४५ हजार पुग्न लागेका छन् । अमेरिकामा अहिलेसम्मको दर अनुसार हरेक तीन दिनमा मृतकको संख्या दोब्बर भइ रहेको छ ।

राष्ट्रपति डोनाल्ड ट्रम्प सरकारले गत साता देखि १५ दिनका लागि ‘सोलियर डिष्टेन्स’ नीति लागु गरेसँगै देशभरका रेष्टुरेन्ट देखि बारहरुमा भेला भएर खान रमाइलो गर्न बन्देज छ । कतै पनि १० जनाभन्दा धेरै भेला हुन पाइँदैन । तर, अझै पनि भाइरस विस्तार ओरालो लाग्ने लक्षण देखिएको छैन । सोमबार पहिलो पटक अमेरिकामा एकै दिन १०० जना बढिको मृत्यु भएको छ । संक्रमितको संख्या बृद्धिको दर हेर्दा अमेरिकाले छिट्टै चीनलाई उछिन्ने देखिन्छ ।

दुई साता अघि सयमा रहेको संक्रमितको संख्या यति चाँढो ५० हजार नजिक पुग्नुले चीनको ८१ हजार आँकडा उछिन्न धेरै समय लाग्ने देखिन्न । विश्वभरमा संक्रमितको संख्या चार लाख पुग्न लागेको छ भने १६ हजार बढिले ज्यान गुमाइ सकेका छन् । एक पटक निर्मुल घोषणा गरि सकेका ‘इपिसेन्टर’ चीनले पनि नयाँ रोगी भेटिएको रिपोर्ट गर्न थालेको छ । अर्कोतिर कोरोना भाइसर नियन्त्रणका लागि भ्याक्सिन तयार हुन लाग्ने समय सीमाको कुनै निश्चितता छैन । बैज्ञानिकहरुले एक देखि डेढ बर्ष भित्रमा भ्याक्सिन बन्न सक्ने बताएका छन् । अमेरिकी जनस्वास्थ्य बिज्ञहरुले भाइसरको प्रकोपट रोकथामका लागि पाँच दर्जन बढि औषधी स्वीकृत गरेका छन् । तर, ति औषधी कोरोनाका लागि नभइ अरुनै रोगमा प्रयोग हुँदै आएका हुन् ।

अर्कोतिर संकटको समयमा अमेरिकी राष्ट्रपति ट्रम्पमा चरम अस्थिरता देखिन्छ । गत साता ‘सोलियर डिष्टेन्स’ नीति घोषणा गर्दा उनले यो प्रकोप जुलाई देखि अगष्टसम्म जाने बताएका थिए । त्यसयता जनस्वास्थ्य विज्ञहरुलाई चुनौती दिँदै मलेरियाको औषधि क्लोरोक्वाइन, ‘एन्टिबायोटिक एजिथ्रोमाइसिन’ लगायतले कोरोना भाइरस निको पार्न सक्ने दावी गरे । अमेरिकी अर्थतन्त्रले भाइरसका कारण खेपेको चोट सम्बोधनका लागि २० खर्ब अमेरिकी डलर बढिको प्याकेज ल्याउने तयारी भइ रहेको बताएका ट्रम्पले सोमबार अचानक ‘सोलियर डिष्टेन्स’ नीति धेरै लामो नलैजाने उद्घोष गरेका छन् । अमेरिकी सर्जन जनरल जेरोमी एमम्सले यो साता भाइरसका कारण अझ धेरै खराव हुने बताएका केही घण्टामै ट्रम्पले फेरि उक्त नीति घटाउने घोषणा गरेका हुन् । अमेरिकी बिजनेशलाई नयाँ जीवन दिन र निरोगी युवा पुस्तालाई काममा फर्काउन त्यसो गर्न लागेको उनको दावी छ । कोरोना भाइरसले मृत्यु हुने दर सडक दुर्घटनाका कारणभन्दा पनि कम रहेको उनको दावी छ । ट्रम्पको यो भनाइले जनस्वास्थ्य विज्ञहरुलाई थप चुनौतीमा धकेलिदिएको छ ।

सबैभन्दा धेरै प्रभावित देखिएको न्यूयोर्कमा अहिलेसम्म संक्रमितको संख्या २० हजार नाघि सकेको छ भने १५० बढिले ज्यान गुमाइ सकेका छन् । राज्यका गभर्नर एन्ड्रु कुम्मोले स्वास्थ्य उपकरणको खाँचोप्रति पटक पटक केन्द्र सरकारको ध्यानाकर्षण गराए पनि चाहिए जति पाउन नसकेको गुनासो गर्दै आएका छन् । उनी सहित धेरै डेमोक्रेटिक नेताहरुले ‘डिफेन्स प्रोडक्सन एक्ट’ सकृय गराएर अमेरिकी कम्पनीहरुलाई अत्यावश्यक स्वास्थ्य उपकरण उत्पादनका लागि आदेश दिन माग गरि रहेका छन् । तर, आफैंलाई युद्दकालको राष्ट्रपति घोषणा गरेका ट्रम्पले उक्त प्रस्ताव मानेका छैनन् । त्यसरी कम्पनीहरुलाई आदेश दिनुलाई राष्ट्रियकरणसँग तुलना गर्दै आफु पुँजीबादी अर्थतन्त्रको समर्थक रहेको तर्क गर्दै आएका छन् । उनको यो तर्क जारी रहँदा न्यूयोर्क मात्र होइन क्यालिफोर्निया, वासिंटन, मिसिगन लगायत धेरै संक्रमित रहेका स्वास्थ्यकर्मीले उपकरण अभाव भएको दोहोर्याइ रहेका छन् । उक्त कानून कार्यान्वयन भएमा कुनै अमेरिकी राष्ट्रियकरण हुने होइन । सरकारले अत्यावश्यक वस्तु निश्चित संख्या तोकेरै कम्पनीलाई उत्पादन गर्न लगाउने हो र आकर्षक मूल्यमा त्यसलाई खरिद गर्ने हो ।

अमेरिकी सरकारको यो अस्थिरताबीच एक बृद्ध डाक्टर सम्हाल्न दौडधुप गरि रहेका छन् । नेशनल इष्टिच्युट अफ एलर्जी एण्ड इन्फेक्सन डिजिज (एनआईएआईडी) का निर्देशक एन्थोनी फाउसी ट्रम्पको अस्थिर मानसिकतालाई स्थिरतामा ल्याएर जनस्वास्थ्य संकट सम्बोधनका लागि लगातार संघर्षरत छन् । ७९ बर्षका यी बृद्ध डाक्टर एचआईभी एड्सको पत्ता लागेको समय देखि नै लगातार सरुवा रोगसम्बन्धि अनुसन्धान र नीति तर्जुमामा सकृय छन् । छ जना राष्ट्रपतिसँग काम गरेका उनले यसपाली जति अफ्ठ्यारो नेतृत्व कहिल्यै झेल्नु परेकाे थिएन होला ।

फाउसीलाई सन् १८८४ मा राष्ट्रपति रोनाल्ड रेगनले एनआईएआईडी निर्देशक नियुक्त गरेका थिए । त्यसबेला अमेरिकामा लगायत विश्वमै तीब्र रुपले फैलि रहेको एचआईभी एड्स अनुसन्धान र रोकथामका लागि केन्द्र स्थापना गरि उनलाई नियुक्त गरिएको थियो । त्यसयता उनले समय समय जनस्वास्थ्यलाई चुनौती बनेका टिबी, मलेरिया, डाइरियल डिजिज, एबोला देखि जिका भाइरससम्मको अनुसन्धान र रोकथामका लागि काम गरे । अहिले कोरोना भाइरससँग संघर्ष गरि रहेका छन् । कोरोनाको चुनौती र प्रभावप्रति उनले पटक पटक सजग गराए पनि ट्रम्पले बेलामा सुनेका थिएनन् । सबैभन्दा पहिला उनले जाँचलाई जोड दिएका थिए । त्यसबेला ट्रम्प सबैले परिक्षण गर्नु नपर्ने भन्दै थिए । त्यसपछि उनले घरमै बस्ने र भिडभाड कम गर्नु पर्ने सुझाए । उनलाई चुनौती दिँदै कैयन् रिपब्लिकन नेताहरुले रेष्टुरेन्टमा गएर खान र बारमा रमाइलो गर्न अमेरिकी जनतालाई आह्वान गरेका थिए । अन्ततः डा. फाउसीका सुझाव मान्न ट्रम्प बाध्य भए । चाहनेलाई परिक्षण गर्न मात्र होइन ‘सोलियर डिष्टेन्स’ नीति मार्फत भिडभाड नियन्त्रणको निर्देशन दिनेसम्मको अवस्थामा ट्रम्प पुगे । त्यति हुँदा पनि भाइरस सम्बन्धि ह्वाइट हाउस ब्रिफिङमा दिनहुँ डाक्टरहरुलाई चुनौती दिने गरि ट्रम्पले अप्रमाणित औषधी सुझाउँदा फाउसी हेरिरहन बाध्य हुन्छन् । सोमबार साइन्स म्योगेजिनसँगको अन्तर्वार्तामा उनले भनेका छन्– ‘साँचो बोल्न सुझाव दिने हो तर पोडियमा गएर ट्रम्पको माइक्रोफोननै खोस्न भने हामी सक्दैनौँ ।’

(तश्विर- ह्वाइट हाउस ब्रिफिङमा डाक्टर फाउसी, न्यूयोर्क पोष्टबाट)

कल्पना घिमिरे
न्युयोर्क/अमेरिका
यो समाचार तयार पार्दै गर्दा अमेरिकामा कोभिड १९ (कोरोनाभाइरस)बाट १८ हजार ८ सय ३९ संक्रमित भएका छन् । आज मात्रै ४ हजार ४ सय ८८ संक्रमित भएका हुन् । जसमध्ये २ सय ३७ जनाको मृत्यु भइसकेको छ । कोरोना भाइरसको संक्रमण देखिएका १ सय २५ जना उपचार पछि घर फर्किएका छन् । संक्रमित ब्यक्तिमध्ये अत्यन्तै न्युय संख्याको मात्रै उपचार सफल भएको छ । बिश्व स्वास्थ्य संगठन (डब्लुएचओ), सेन्टर फर डिजिज कन्ट्रोल एण्ड प्रिभेन्सन (युएससिडिसी), सिसिडिसी र इसिडिसीमा रेकर्ड भएको तथ्याङ्क अनुसार पछिल्लो समय कोरोना भाइरस संक्रमितको संख्या ह्वात्तै बढेको देखिएको हो ।
न्यूयोर्क राज्यमा भने ८ हजार ३ सय १० जना संक्रमित भएका छन् भने ४२ जनाको मृत्यू भएको छ । न्यूयोर्कमा आज मात्रै २ हजार ५ सय ९८ संक्रमित भएको तथ्याङ्क छ ।
दैनिक हजारौं संक्रमितहरुको संख्या बढ्दै गएपछि न्यूयोर्कका गर्भनर एन्ड्रु कुमोले न्यूयोर्कबासीहरुलाई घरमै बस्ने आदेश दिएका छन् । शुक्रवार आयोजित पत्रकार सम्मेलनमा सत प्रतिसत न्युयोर्कवासीलाई घरमै बस्न आदेश दिएका हुन् ।
उनले न्यूयोर्कमा कार्यरत सबै कामदारहरुलाई घरमै रहनु पर्छ भन्ने कार्यकारी आदेशमा हस्ताक्षर गर्ने जनाएका छन । कोरोनाभाइरसको संख्या बढेकोले अत्यावश्यक सेवाबाहेक घर बाहिर ननिस्कन उनले आदेश दिएका हुन् ।
अत्यावश्यक बाहेकका अन्य ब्यापारमा काम गर्ने कामदारलाई घरमै बस्न आदेश दिएका हुन् । आइतबार साँझदेखि यो आदेश कार्यान्वय गरिने पनि जानकारी दिएका छन् । न्यूयोर्कमा सबै ‘पज’ गर्न लागिएको हो । आदेश नमान्नेलाई कडा कानुनी कारवाही गरिने भएको छ ।
सुपरमार्केट, ग्रोसरी स्टोर, फार्मेसी, हेल्थ केयर, डे केयर सेन्टर, हार्ड वेयर स्टोर, ग्यास स्टेसन, गाडी मर्मत केन्द्र, बैंक, हुलाक, लण्ड्री, पशु अस्पताल, क्लिनिकहरु, कन्भिनेन्स स्टोर, फोहोर संकलन, विग बक्स स्टोर अत्यावश्यकमा पर्दछन् ।

काठमाडौं
मानव अधिकारको लागि महिला एकल महिला समूहले आवश्यक परेमा सरकारलाई छहारी भवन उपलब्ध गराउने भएको छ ।
एकल महिला समूहका संस्थापक अध्यक्ष लिली थापा र अध्यक्ष कुन्दा शर्माले उपप्रधान तथा रक्षामन्त्री ईश्वर पोखरेललाई भेटी क्वारेन्टाइन सेवाका लागि एकल महिला समुहको छहारी भवन उaपलब्ध गराउने जानकारी दिएका हुन् ।
रक्षामन्त्री पोख्रेल कोभिड–१९ संक्रमण, रोकथाम तथा नियन्त्रण उच्चस्तरीय समन्वय समितिका संयोजक पनि हुन् । सिङ्गो मुलुक र सरकार कोभिड–१९ संक्रमण, रोकथाम तथा नियन्त्रणको तयारीमा जुटिरहेको बेला सरकारलाई एकल महिला समूहले सहयोग गर्ने प्रस्ताव गरेको हो ।
एकल महिला समुहकी संस्थापक अध्यक्ष थापाले एकल महिला समुहको निम्ति विभिन्न जिल्लामा बनाइएका १० वटा छहारी भवन सरकारलाई उपलब्ध गराउने जानकारी दिइन् । भवनमा ३ सय ६५ जनालाई राख्न सकिने थापाको भनाइ छ ।
समूहले सुनसरी, झापा, धनकुटा, संखुवासभा, काठमाडौं, काभ्रे, चितवन, धादिङ, सुर्खेत र कैलाली जिल्लामा रहेको भवनको सम्पूर्ण विवरणसहित सरकारलाई उपलब्ध गराएको छ ।
एकल महिला समूहले क्वारेन्टाइन सेवाका लागि आवश्यक समय सम्मका लागि प्रयोग गरी सञ्चालन गर्न आग्रह गरेका हो ।
उपप्रधानमन्त्री एवं रक्षामन्त्री पोखरेलले समूहको यो प्रस्तावको सराहना गर्दै महामारी रोकथामका लागि सबैको सहयोग आवश्यक पर्ने बताए ।
उपप्रधानमन्त्री पोखरेलले, विश्वव्यापी महामारी बनेको कोभिड–१९ बाट बच्नका लागि सरकाराले तयारी गरिरहेको उल्लेख गर्दै आतंकित नहुन र सरकारमाथि विश्वास गर्न आग्रह गरे ।

न्यूयोर्क

अमेरिकी सरकारले कोरोना भाइरसका कारण उत्पन्न आर्थिक संकटसँग जुध्न नागरिकहरुलाई नगद राहत दिने मापदण्ड पारित भएको छ । सिनेट रिपब्लिकनहरुले बिहीबार साँझ पारित गरेको मापदण्ड अनुसार एक जनाले एक हजार दुई सय डलरसम्म प्राप्त गर्नेछन् ।

बार्षिक ७५ हजार अमेरिकी डलरसम्म आय भएको व्यक्ति या एक लाख ५० हजार डलरसम्म कमाउने परिवारलाई प्रतिव्यक्ति १२ सय डलरको चेक पठाउने प्रस्ताव सिनेट रिपब्लिकनले पारित गरेका हुन् । यो रकम एक पटक उपलब्ध हुनेछ । राष्ट्रपति डोनाल्ड ट्रम्प र अर्थमन्त्री स्टिभेन म्नुचिनले यो रकम जति सक्दो चाँडो अमेरिकीको हात हातमा पुर्याउने बताउँदै आएका थिए ।

कोरोनाले उत्पन्न गरेको आर्थिक संकटसँग जुध्न नागरिकलाई नगद राहत दिनु पर्ने प्रस्ताव सुरुमा रिपब्लकिन सिनेटर मिट रोम्नीले अघि सारेका थिए । बार्षिक ७५ हजार डलर भन्दा धेरै कमाउनेको हकमा भने प्रत्येक १०० डलर आय बराबर पाँच डलर कटौती हुँदै जानेछ । यसरी बार्षिक ९९ हजार डलर भन्दा धेरै कमाउनेले कुनै रकम प्राप्त गर्नै छैनन् ।

कोरोना भाइरसको संकट गहिरिँदै जाँदा अमेरिकामा बेरोजगारी दर बढ्न थाली सकेको छ । अर्थमन्त्री म्नुचिनले बेरोजगारी दर २० प्रतिशतसम्म पुग्न सक्ने आँकलन केही दिन अघि गरेका थिए ।

न्यूयोर्क
कोरोना भाइरसको त्रासबीच मंगलबार सम्पन्न तीन अमेरिकी राज्यको डेमोक्रेटिक राष्ट्रपतिय प्राइमरी निर्वाचनमा पूर्व उपराष्ट्रपति जो बाइडेनले सानदार जित हासिल गरेका छन् । फ्लोरिडा, इलाइनोइस र एरिजोनामा सम्पन्न निर्वाचनमा सिनेटर बर्नी स्यान्डर्सलाई ठूलो मतान्तरले बाइडेनले पराजित गरेका हुन् ।

यससँगै बाइडेनले आउँदो नोभेम्बरमा हुने राष्ट्रपतिय निर्वाचनमा दलको टिकट हत्याउने निश्चित प्रायः भएको छ । स्यान्डर्स गणितिय रुपमा नै असम्भव विन्दुमा पुगि सकेका छन् । कोरोना भाइसरको प्रकोप चर्किँदै जाँदा डेमोक्रेटिक मतदाता राष्ट्रपति डोनाल्ड ट्रम्पप्रति थप क्रुद्ध बनेका छन् । ट्रम्पले सुरुमै सावधानी नअपनाउँदाको परिणाम स्वरुप भाइसरले यो स्तरमा फैलिन पाएको उनीहरुको बुझाइ छ । त्यसैले मंगलबारको निर्वाचनमा सामेल ७० प्रतिशत डेमोक्रेटिक मतदाताले संकट जुध्न सक्ने बाइडेनको अनुभव र क्षमताका कारण उनलाई रोजेको बताएका छन् ।

उत्साहजनक मतदान भइ रहेको डेमोक्रेटिक प्राइमरीमा मंगलबार भने कोरोना प्रकोपकै कारण त्यसो हुन सकेन ।घरैबाट हुलाक मार्फत भोट खसाउन पाइने फ्लोरिडा र एरिजोनामा २०१६ भन्दा धेरै मत खसे पनि बुथमै पुगेर मत हाल्नु पर्ने इलाइनोइसमा भने त्यस अनुरुप मतदान भएन । फ्लोरिडामा बाइडेनले ६० प्रतिशत बढि मत पाएका छन् भने इलाइनोइसमा पनि झन्डै ६० प्रतिशत भोट पाएका छन् । एरिजोनामा ठूलो संख्याका मतदाताले यस अघि ड्रप आउट भएका उम्मेद्वारलाई समेत भोट दिएर हुलाकबाट पठाएको कारण ७० प्रतिशत हाराहारी गणना हुँदा बाइडेनले ४३ प्रतिशत मत पाएका छन् । स्यान्डर्सले ३० प्रतिशत पनि पाउन सकेका छैनन् । एरिजोनामा ६७, फ्लोरिडामा २१९ र इलाइनोइसमा १५५ जना डेमोक्रेटिक डेलिगेट्स रहेका छन् ।

मंगलबार मध्यरातसम्मको अपडेट अनुसार बाइडेनले एक हजार १४७ डेलिगेट्स पाइ सकेका छन् भने स्यान्डर्ससँग ८६१ जना मात्र छन् । आजको सबै भोट गनिसक्दा डेलिगेट्स अन्तर ३०० सय नाघ्न सक्नेछ । पार्टीको तर्फबाट राष्ट्रपतिको टिकट पाउन एक हजार ९९१ जना डेलिगेट्स आवश्यक पर्छ । त्यसका लागि अब प्राइमरी निर्वाचन हुन बाँकी राज्यमा बाइडेनले ४७ प्रतिशत डेलिगेट्स हत्याए पुग्छ भने स्यान्डर्सले ६३ प्रतिशत जित्नु पर्ने हुन्छ । प्राइमरी हुन बाँकी कुनै पनि राज्यमा स्यान्डर्सको त्यस्तो प्रभावशाली अग्रता नदेखिएको कारण अब उनलाई त्यति डेलिगेट्स पुर्याउन सम्भव छैन ।

मंगलबारको निर्वाचन परिणाम पछि मतदाताहरुलाई सम्बोधन गर्दै बाइडेनले सबैलाई समेटेर देशलाई एकढिक्का बनाउने बताएका छन् । आफुले स्यान्डर्सका युवा मतदाताको आवाज पनि सुन्ने भन्दै संकट समाधानका लागि एक भएर अघि बढ्न सिंगो पार्टी पंक्तीलाई आह्वान गरे । स्यान्डर्सले भने निर्वाचन परिणाम पछि कुनै सन्देश प्रवाह गरेका छैनन् । मंगलबार ओहायोमा पनि प्राइमरी निर्वाचन तय भएको थियो । तर, कोरोना भाइरस फैलन सक्ने त्रासका कारण बुथमा उपस्थित भएर भोट खसाउने अवस्था नरहेको भन्दै गभर्नर माइक डेवाइले अन्तिम समयमा जुन दुई तारिखसम्म निर्वाचन सार्ने निर्णय लिएका थिए ।

प्रभात भट्टराई/अमेरिका
कोरोना भाइरसको प्रकोप बढ्दै जाँदा अमेरिका कहालीलाग्दो संकटको चरणमा प्रवेश गरेको छ । सुरुमा भाइरसलाई खासै मतलव नगरेका अमेरिकी राष्ट्रपति डोनाल्ड ट्रम्पको बोली कमजोर बन्दै जाँदा नागरिकमा त्रासको मात्रा आकाशिएको हो ।

अमेरिकामा जनवरी तेस्रो साता पहिलो कोरोना भाइसर संक्रमित व्यक्ति फेला परेका थिए । त्यसपछि धेरैले अब गम्भिर बन्ने बेला आएको सुझाव दिए पनि ट्रम्पले पत्याएनन् । कहिले निणन्त्रणमा आइ सकेको त कहिले विदेशी भाइरसले अमेरिकालाई केही गर्न नसक्ने दावीका साथ ट्रम्पले आफ्नै प्रशासनका स्वास्थ्य विज्ञहरुको सुझाव बिपरित बक्तव्य जारी गरिराखे । उनको भनाइलाई समर्थन पुर्याउन केही रिपब्लिकन जनप्रतिनिधीहरुले समेत रेष्टुरेन्ट गएर खान एवं बारमा गएमा रमाइलो गर्न सुझाव दिइ रहे ।

ट्रम्पप्रति निरपेक्ष समर्थनमा रहेको फक्स न्यूज लगायत ‘कन्जरभेटिम’ समाचार संस्थाहरुले पनि यस्तै धारणा एवं खवरहरु बजाए । सुरुमा त उनीहरु कोरोना भाइरसलाई डेमोक्र्याट र लिबलर मिडियाले चलाएको हौवा बताउँदै थिए । तर, एक पछि अर्को संक्रमित फेला पर्ने र विज्ञहरुले गम्भिरता दर्शाइ रहँदा नागरिकमा एक किसिमको छटपटी सुरु भइ सकेको थियो । सोही कारण गत साता देखिनै अमेरिका भर आवश्यक पर्ने खाद्य सामग्री एवं दैनिक उपभोग्य वस्तुहरु ट्वाइलेट पेपर देखि ह्यान्ड स्यानिटाइजर घरमा थन्क्याउने क्रम बढ्यो । अहिले प्रायः सबै स्टोरमा ट्वाइलेट पेपर एवं पेपर टावेल राखिएको ठाउँ खाली भइ सकेका छन् । ह्यान्ड स्यानिटाइजर पाउनै छोडेको छ भने खाद्यान्न र तरकारीकै अभाव हुन सक्ने देखिएको छ । हरेक स्टोरमा घटौँ लामा लाइन लाग्न थालेका छन् ।

राष्ट्रपति ट्रम्प आईतबारसम्म पनि भाइरस नियन्त्रण भित्रै रहेको दावी गरि रहेका थिए । अझ गत शुक्रबार ह्वाइट हाउसमा बिभिन्न औषधी एवं खाद्यान्न बिक्रेता कम्पनीका प्रमुख कार्यकारीहरुसँग पत्रकार सम्मेलन गर्दै भाइरस नियन्त्रणका लागि अब सहज जाँचको व्यवस्था मिलाइएको बताएका थिए । साढे तीन बजे ट्रम्पको पत्रकार सम्मेलन सुरु भए पछि सेयर बजार एकाएक आकाशिएर बढेको थियो । एकातिर खुद्रा ब्यापारमा काम गर्ने प्रमुख सिइओहरुको सहकार्य अर्कोतिर राष्ट्रपतिले भाइरस नियन्त्रणमा रहेको बताए पछि आधा घण्टा भित्र डाउजन इण्डष्ट्रियल एभरेज एक हजार अंकले उक्लिन पुग्यो र समग्रमा झन्डै दुई हजार अंकको बृद्धि सहित बन्द भयो ।

मुलुकभर कोरोना भाइसरको कहर गहिरिँदै जाँदा ट्रम्पका लागि भने उक्त बृद्धि उत्सवको विषय बन्यो । उनले शुक्रबार दिन भरको कारोबार चार्टमा अटोग्राफ दिएर फक्स न्यूजमा पठाएका थिए । फक्सले साँझ ठुलै खड्गो पार गरेर ट्रम्प प्रशासनले मुलुकलाई नयाँ गति दिलाएको ढंगले उक्त चार्ट प्रचार गर्यो । तर, त्यो फुर्ती फार्ती दुई दिन पनि टिकेन । सोमबार बजार खुल्दा नै १० प्रतिशतले घटेपछि सर्किट ब्रेक लगाउनु पर्यो । दिनभर ६ देखि १० प्रतिशत गिरावटको बिचमा कारोबार चालु थियो । जब सवा तीन बजे कोरोना बिफ्रिङका लागि ट्रम्प ह्वाइट हाउसको पत्रकार भेटभाट कक्षमा उपस्थित भए बजार पहिरो शैलीमा ओरालो लाग्यो । मंगलबार भने खुले देखिनै बजारमा तिब्र उतार चढाव देखिएकाे छ ।

हिजोसम्म कोरोना माथि आफ्नो नियन्त्रण रहेको बताउँदै आएका ट्रम्पले सोमबार बल्ल सत्य स्वीकारे । भाइरस नियन्त्रणमा आउन कम्तिमा जुलाई अगष्टसम्म लाग्ने ट्रम्पको प्रष्टोक्तिसँगै सेयर बजारमा बिक्रीको चाप ह्वात्तै बढ्यो । र, डाउजन इण्डष्ट्रियल एभरेज तीन हजार अंकले घटेर बन्द हुन पुगेको छ । साथै उनले १० जनाभन्दा बढि एकै ठाउँमा भेला हुन रोक लगाएका छन् भने रेष्टुरेन्ट र बारहरु बन्दका लागि आह्वान गरेका छन् ।

ट्रम्पले सत्य स्वीकारेर भाइरस नियन्त्रणमा आउन समय लाग्ने बताए पनि भाइरस जाँच किटहरु सर्वसुलव हुन सकेका छैनन् । विश्व स्वास्थ्य संगठनले दिन प्रस्ताव गरेका किट ट्रम्प प्रशासनले आफैँ बनाउने भन्दै लिन अटे। गरेको थियो । अमेरिकी मिडियाहरुका अनुसार अहिलेसम्म ३० हजार हाराहारीको मात्र जाँच गरिएको छ । १० बर्ष अघि स्वाइन फ्लु महामारी आउँदा बाराक ओबामा प्रशासनले सुरुमै गम्भिरता मनन गरि केही महिना भित्रै लाखौँ जाँच किटहरु देशभर पठाएका थिए । पहिलो अमेरिकीले ज्यान गुमाउने वित्तिकै उनले देशब्यापी जनस्वास्थ्य संकटकाल घोषणा गरेका थिए । ट्रम्प भने अमेरिकीले ज्यान गुमाउन थाल्दा पनि यो प्रकरणमा मजाककै विषय बनाइ रहे । स्थिती नियन्त्रण बाहिर जान थाले पछि बल्ल उनले गत शुक्रबार उनले संकटकाल घोषणा गरे । त्यस अघि कैयन् गभर्नरले ट्रम्पलाई उछिन्दै सम्बन्धित राज्यमा संकटकाल घोषणा गरि सकेका थिए ।

आईतबारको पत्रकार सम्मेलनमा भने ट्रम्पले अर्थतन्त्रमा मन्दीको संभावनालाई पनि स्वीकारेका छन् । कोरोना भाइरसको कारण आवतजातव ठप्प हुँदा एयरलाईन्स, क्रुजसिप, होटल लगायत उद्योगमा गम्भिर असर परेको छ । एयरलाईन्स उद्योगले त ५० अर्ब डलरको बेल आउट (राहत प्याकेज) माग गरि सकेको छ । अब बार र रेष्टुरेन्टहरु बन्द हुँदा त्यसको थप चोट अर्थतन्त्र र रोजगारीलाई पर्नेछ । त्यसमाथि भाइरस नियन्त्रणमा आउन कम्तिमा पाँच महिना लाग्ने ट्रम्पको प्रष्टोक्तिले सेयर बजार देखि अन्य क्षेत्रमा पनि थप दबाब बढ्नेछ ।

उपभोक्तामा गम्भिर त्रास सञ्चार भइसक्दा पनि ट्रम्प प्रशासनले गम्भिरता देखाउन ढिला गर्दाको नराम्रो परिणामले अमेरिकाले भोग्नु पर्ने चिन्ता बढेको छ । अहिलेसम्म वेष्ट भर्जिनिया बाहेक सबै अमेरिकी राज्यमा कोरोना भाइरस संक्रमित फेला परि सकेका छन् । सोमबार साँझसम्म अमेरिकामा चार हजार बढि भाइरस पिडित फेला परेका छन् भने छ ८० बढिको मृत्यु भइ सकेको छ । न्यूयोर्क जस्तो घनावस्ती भएको सहरमा रोगीको संख्या तिब्र गतीमा बढि रहेको छ । अब थप जाँच हुँदै जाँदा रोगीको संख्या अझै उकालो लाग्नेछ । यसले नागरिकको मनोविज्ञान कुन दिशा तर्फ लैजाला भन्ने त्रास पनि बाँकी नै छ ।

न्यूयोर्क
कोरोना भाइरसको त्रासबीम मंगलबार तीन अमेरिकी राज्यमा राष्ट्रपतिय प्राइमरी निर्वाचन हुन गइ रहेको छ । चार ठूला राज्यमा प्राइमरी मतदान तय भए पनि ओहायो गभर्नर माइक डेवाइनले अन्तिम समयमा स्थगनको निर्णय लिएसँगै एरिजोना, फ्लोरिडा र इलाइनोइसमा पुर्व तयारी अनुरुप चुनाव हुन लागेको हो ।

कोरोना भाइरस फैलन सक्ने त्रासका कारण बुथमा उपस्थित भएर भोट खसाउने अवस्था नरहेको भन्दै गभर्नर डेवाइले जुन दुई तारिखसम्म निर्वाचन सार्न प्रस्ताव गरेका थिए । तर, उनको प्रस्ताव सोमबार साँझ राज्यको एक अदालतले खारेज गरि दिएको थियौ । फ्रांकलिन काउन्टीका न्यायाधिश रिचार्ड एले यसरी अन्तिम समयमा चुनाव सार्नु उपयुक्त नहुने आदेश जारी गरेका हुन् । राज्यमा डेमोक्रेटिक पार्टीका १३६ डेलिगेट्स रहेका छन् । तर, चुनावकै दिन माथिल्लाे अदालतमा पुनरावेदन गर्ने भन्दै गभर्नरले स्थगनको निर्णय कायम राखे ।

एरिजोनामा ६७, फ्लोरिडामा २१९ र इलाइनोइसमा १५५ जना डेमोक्रेटिक डेलिगेट्स रहेका छन् । सर्भेक्षणहरुमा ओहायो सहित यी चारवटै राज्यमा पूर्व उपराष्ट्रपति जो बाइडेनको प्रष्ट अग्रता छ । मंगलबारको प्राइमरी नतिजा सर्बेक्षणहरुले देखाएजस्तै आएमा सिनेटर बर्नी स्यान्डर्स होडबाट बाहिरिने कतिपयले प्रक्षेपण गरेका छन् । स्यान्डर्स अहिलेनै डेलिगेट्स गणनामा बाइडेनभन्दा डेढ सयले पछि छन् । मंगलबार निर्वाचन हुने राज्यमा फ्लोरिडा बाइडेनका लागि सबैभन्दा अनुकुल देखिएको छ । त्यहाँ उनको ४० प्रतिशत बिन्दुसम्मको अग्रता छ । बाँकी तीन राज्यमा पनि उनी प्रष्ट दोहोरो अंकको अग्रतामा छन् ।

मंगलबारको निर्वाचनसँगै ६० प्रतिशत बढि डेलिगेट्स तय हुनेछन् । अहिलेकै अवस्थामा स्यान्डर्सले दलको टिकट हत्याउन प्राइमरी हुन बाँकी राज्यमा ५७ प्रतिशत डेलिगेट्स हत्याउनु पर्ने हुन्छ । मंगलबारको निर्वाचन पछि यो आंकडा अझ फराकिलो हुनेछ । यही साताका लागि तय जर्जियाको प्राइमरी पनि कारोना त्रासका कारण पछि सारिएको छ । त्यहाँ पनि बाइडेन अघि छन् । अहिलेसम्मको आँकडामा प्राइमरी हुन बाँकी कुनै पनि राज्यमा स्यान्डर्सको बलियो अग्रता देखिएको छैन । त्यसैले मंगलबारको निर्वाचन पछि उनले पार्टीमा एकताको अपिल गर्दै बाइडेनलाई ‘इन्डोर्स’ आँकलन गरिएको हो ।

आईतबार बाइडेन र स्यान्डर्सबीच पार्टीको ११ औँ राष्ट्रपतिय बहस सम्पन्न भएको छ । त्यसमा दुबैजनाले एक अर्काको विगत प्रति प्रश्न उठाए पनि अन्त्यमा ट्रम्पलाई हराउन एक हुने बाचा गरे । त्यसमाथि टिकट होडमा प्रष्ट अग्रतामा रहेका बाइडेनले आईतबार स्यान्डर्सको बार्षिक एक लाख २० हजार डलरभन्दा कम आय भएको व्यक्तिलाई सार्वजनिक कलेजमा अध्ययन शुल्क नलिने प्रस्ताव अघि बढाउने घोषणा गरेका छन् । साथै उनले सिनेटर एलिजावेथ वारेनले अघि सारेको सन् २००५ को ब्यांक्रप्सी कानून पनि संसोधनको बचन दिएका छन् । उक्त कानून संसोधन गरि शैक्षिक कर्जा लिएका विद्यार्थीले ब्यांक्रप्सी फायल गर्न पाउने बनाउन लागिएको हो । बाइडेनले स्यान्डर्स र वारेनका युवा एवं प्रोग्रेसिभ मतदाता तान्न त्यसो गरेका हुन् ।

न्युयोर्क/अमेरिका
कोरोना भाईरसको प्रकोपले संसारभर त्रास फैलाईरहँदा अमेरिकाको बाल्टिमोर स्थित जोन हप्किन्स युनिभर्सिटीका अनुसन्धानकर्ताहरुले कोरोनाको उपचारमा नयाँ आशा ब्यक्त गरेका छन् । विश्वभर ५ हजार ८ सय ८८ को ज्यान लिइसकेको र ८० हजार मानिस मृत्युसँग पौठाजोरी खेल्न वाध्य पारेको कोरोना संक्रमणको उपचारमा सताप्दी पहिला प्रयोग गरिएको उपचार बिधी अपनाउदा बिरामीलाई बचाउन सकिने बिचार ब्यक्त गरेका छन् । कोरोना संक्रमणको बिरुद्ध कुनै पनि भ्याक्सिन र एन्टि भाइरल औषधी नबनेको अवस्थामा ‘सम्भोग सिरम’ पद्धती लागु गरे रोग निको हुने बताएका छन् ।
सम्भोग सिरम पद्धती भनेको कोरोना संक्रमणबाट उन्मुक्ती पाएका बिरामीको रगत नयाँ बिरामीको शरीरमा राखेर उपचार गर्दा रोग निको हुने बिचार जोन हप्किन्स युनिभर्सिटीका अनुसन्धानकर्ता चिकित्सक डा अर्टुरो कासाडेभलले बताएका हुन् ।
डाक्टर अर्टुरोले कोरोना संक्रमणबाट पूर्णरुपमा निको भएका बिरामीको रगतलाई एन्टिबडीको रुपमा प्रयोग गरेर उपचार गर्दा बिरामी निको हुने कुरा बताएका हुन् । संन् १९१८ को स्प्यानिस फ्लुको महामारी होस् वा दादुरा पोलियो जस्ता महामारीको समयमा त्यस्ता प्राण घातक रोगको उपचारको लागि कुनै औषधी थिएन तर त्यही रोग लागेर निको भएका बिरामीको शरीरको रगत झिकेर अरु बिरामीको उपचार गर्दा मृत्युदरमा ५० प्रतिशत कमी आएको इतिहास समेत डा अर्टुरोले कोरोनाको उपचारको बिषयमा भनेका छन् । सन् १९५० पछि यस्ता महामारीहरुको उपचारमा औषधी आए पछि यस्तो उपचार बिधी बन्द गरिएको समेत डा अर्टुरोले बताएका छन् ।
शुक्रबार प्रकाशित क्लिनिकल जर्नलमा डा अर्टुरोको साथमा डा लिजी एन प्रिरोफ्स्कीले कोरोना भाइरसको संक्रमणका कारण हुने कोभिड –१९ को उपचारमा अन्य बैकल्पिक औषधी नहुँदा सम्म निको भएका बिरामीको शरीरबाट रगत निकालेर नयाँ बिरामीको उपचार गर्ने प्राचिन बिधी नै सुरु गर्नु पर्ने बताएका छन् ।