Category: डायस्पोरा

न्यूयोर्क/अमेरिका
शेर्पा किदुग अमेरिकाले वार्षिक रुपमा आयोजना गर्दै आएको शेर्पा किदुग अमेरिका गल्फ प्रतियोगिता गत शनिबार सम्पन्न गरेको छ । खेल प्रतियोगिता न्युयोर्कको ब्रुकलिनस्थित मरीन गल्फ कोर्षमा सम्पन्न भएको थियो । हिमालयन समुदायका गल्फ खेलाडीबिच एकता, पारस्परिक सम्बन्ध र गल्फ खेलप्रति समुदायको अभिरुची जगाउने उदेश्यले किदुगले १२ वर्षदेखि आयोजना गर्दै आएको हो ।
नेपाल, भुटान, भारत र तिब्बतका लो र हाई हेन्डीक्याप समुहका ३० जना खेलाडीहरु सहभागी भएको उक्त प्रतियोगितामा ठिन्ले लामाले प्रथम, दावा लामाले दोश्रो र समिर श्रेष्ठले तेस्रो स्थान प्राप्त गरेका थिए । हाई हेन्डिक्याप समुहका आङ दावा शेर्पा र लो हेन्डिक्याप समुहका ल्हाक्पा लामाले क्लोसेट टु पिनको उपाधि प्राप्त गरेका थिए भने लाङ्गेस्ट ड्राइभ (लामो दुरी)को उपाधि हाई हेन्डिक्याप समुहका फुर्बा शेर्पा र लो हेन्डिक्याप समुहका ल्हाक्पा लामाले प्राप्त गरेका थिए । बिजयी खेलाडीलाई शेर्पा किदुगको भवनमा अयोजित कार्यक्रममा किदुगका खेलकुद संयोजक तथा उपाध्यक्ष फुर्बा शेर्पा र गल्फ प्रतियोगिता संयोजक ल्हाक्पा रिन्जी शेर्पाले प्रमाण पत्र र ट्रफी बितरण गरेका थिए ।

न्यूयोर्क/अमेरिका
न्यूयोर्कमा बसोबास गर्दै आएको नेवारी समुदायको संस्था ‘नेवाः गुठी न्यूयोर्क’ र नेपाल आदिवासी जनजाति महासंघ अमेरिका (फिप्ना)ले सरकारले संसदमा दर्ता गरेको गुठी विधेयक खारेज गर्न माग गर्दै प्रदर्शन गरेका छन् । गत शनिबार ज्याक्सन हाइटको ड्राइभरसिटी प्लाजामा नेवारी समुदाय, आदीवासी जनजाती लगायत सम्पूर्ण नेपालीको सहभागितामा बिभिन्न प्लेकार्ड र ब्यानर लिएर सरकार बिरुद्ध नारावबाजी गरिएको थियो । गुठी सम्पदा र उपत्यकाको संस्कृति मास्न खोजेको भन्दै सहभागीहरुले सञ्चारमन्त्री गोकुल बाँस्कोटाको राजीनामा समेत माग गरेका थिए ।
सरकारले गत बैशाख १६ गते संसदमा दर्ता गरेको गुठी सम्बन्धी कानूनलाई एकीकरण र संशोधन गर्न बनेको विधेयक पेश गरेको थियो । उक्त विधेयक जस्ताको तस्तै पारित भएमा गुठीको कुल जग्गामध्ये ६५ प्रतिशत सम्म भूमाफिया वा अन्य व्यक्तिका नाममा जाने भन्दै यसको चर्को बिरोध भइरहेको छ ।
प्रस्तावित गुठीसम्बन्धी विधेयकमा निजी गुठीलाई समेत सार्वजनिक गुठी बनाउन पाइने व्यवस्था गर्न लागिएको थियो । जसअनुसार देशभरिका करिब पाँच हजार निजी गुठीको जग्गा गुठियारले मोहीयानी हक लगाएर आफ्नो नाममा बनाउने बाटो खुल्ने थियो । गुठी विधेयक संसदमा पेश भएपछि यसको चौतर्फी बिरोध गर्दै सर्बसाधारण आन्दोलनमा उत्रिएका थिए । चौतर्फी विरोध पछि एक साता अघि नै सरकारले विधेयक फिर्ता लिएको छ ।
‘तर, फिर्ता लिएर मात्रै हुँदैन, खारेजै गर्नुपर्छ’ नेवाः गुठी न्यूयोर्कका उपाध्यक्ष बिजयमान सिंहले भने, ‘नेवारी समुदायको धर्म, संस्कृति र परम्परालाई मास्न खोज्ने गरी विधयेक ल्याइएकोले खारेज नै गराउनुपर्ने दवाव दिनकै लागि प्रदर्शन गरेका हौं ।’
गुठीको जग्गा पहाडमा ५ लाख ६१ हजार ९९० रोपनी र तराईमा ६६ हजार ३३० विघा छ । गुठी संस्थानका अनुसार देशभरि रहेका गुठीका जग्गा मध्ये रैतान नम्बरी जग्गा पहाडमा ३ लाख १५ हजार ४७२ रोपनी र मधेसमा ६२ हजार २५६ विघा छ । त्यस्तै गुठी अधीनस्थ जग्गा पहाडमा २ लाख ४३ हजार ६०७ रोपनी र तराईमा २१ सय ९६ विघा छ । गुठी तैनाथी जग्गा भने २९ सय ११ रोपनी पहाडमा र १८ सय ७८ विघा तराईमा छ ।

कल्पना घिमिरे
न्यूयोक/अमेरिका
अमेरिकामा टिपीएस प्राप्त गरेकाहरुलाई स्टेट आइडी कार्ड र ड्राइभर लाइसेन्स नबीकरण गर्न नदिएको र निकै झण्झटिलो भएको गुनासो बढिरहेको छ । टिपीएस प्राप्त गरेकाहरुले आगामी जुन २५ सम्म स्टेट आइडी र ड्राइभर लाइसेन्स नबीकरण गरिसक्नु पर्नेछ । नबीकरण गराउन नेपालीलाई सहयोग गर्ने उदेश्यले महिला र मानब अधिकारका क्षेत्रमा न्यूयोर्कमा कार्यरत संस्था अधिकारले ‘टिपीएस टाउनहल’ कार्यक्रम आयोजना गरेको थियो । सन् २०१५ देखि नै नेपालीलाई टिपीएस सुविधा दिलाउनका लागि अधिकारले निकै महत्वपूर्ण भुमिका खेल्दै आएको छ । टाउन हलमा अमेरिकी सरकारका कर्मचारीलाई आफ्ना समस्याबारे सुनाइएको थियो । टिपीएसको अवधि मार्च २४, २०२० सम्म स्वत लम्बिए पनि ड्राइभर लाइसेन्स र स्टेट आइडीको नबीकरण गराउने म्याद आगामी जुन २४ सम्म मात्र भएकोले नबिकरण गर्नका लागि ‘फेडरल रजिस्टर्ड नोटिस’ आवश्यक पर्ने जानकारी गराएका छन् । कार्यक्रममा गत मे १० मा प्रकाशित सुचना ‘फेडरल रजिस्टर्ड नोटिस’ पनि वितरण गरिएको थियो । टाउन हल कार्यक्रममा टिपीएस बाहकक नेपालीहरुको बाक्लो उपस्थिति थियो ।
अधिकारले टीपीएस टाउन हलको आयोजना गरेर नेपालीले भोगिरहेको बिभिन्न समस्याबारे युएससीआइएसका कर्मचारी र इमिग्रेसन लयर लाई सुनाएर समस्याको समाधान खोज्ने प्रयास गरेको अधिकारकी डाइरेक्टर पबित्रा बेन्जामिनले बताइन् । ‘हामीहरु टिपीएस प्राप्त गराउन सुरुवाती चरणदेखि नै लागिरहेका छौं’ उनले भनिन्, ‘तर, अब टिपीएस मात्र हाम्रा लागि पर्याप्त छैन । हामीलाई यसको दिर्घकालिन समाधानको बाटो चाहिएको छ ।’ उनका अनुसार नेपालीलाई टिपीएस प्राप्त गराउन देखि म्याद थप गराउन समेत अधिकारले नेतृत्वदायी भुमिका खेल्दै आएको छ । टिपीएसको स्थायी समाधानको लागि के गर्न सकिनेबारे आफुहरु लडिरहेको पनि उनले जानकारी दिइन् ।
कार्यक्रममा उपस्थित युएससीआइएस की कम्युनीटि रिलेसन अफिसर स्याकोनिया वर्डनले टिपीएसको म्याद थपिएर पनि प्रुफ देखाउन नसकेर ड्राइभर लाइसेन्स लगायतमा नविकरण गर्न समस्या भइरहेको बताइन् । सबै आवशयक कागजात लिएर आवेदन दिने हो भने तुरुन्तै नबीकरण हुने उनले बताइन् । ‘टेम्प्रोररी प्रोटेक्टेड स्टाटस भनेको केही समयका लागि मात्रै हो यसलाई टेम्प्रोररी भनेरै बुझ्नुहोला । यसबाट ग्रिन कार्ड पाउन सकिदैन’ उनले भनिन् ।
इमिग्रेसनकी एटोर्नी मेलोनीले लाइसेन्स नबीकरण गर्न डिएमभी कार्यालय जाँदा फेडरल रजिस्टर नोटिस लिएर मात्र जान आग्रह गरिन् । फेडरलको नोटिस लिएर गएमा लाइसेन्सको अवधि पनि स्वत थपिने उनले जानकारी दिइन् ।
कार्यक्रममा टिपीएसबाहकहरुले आफुले भोग्दै आएका समस्या सुनाएका थिए । अमेरिकाकै थुप्रै सरकारी निकाय र रोजगारदातालाई टीपीएस र ‘अटो एक्सटेन्सन’ भनेको थाहा नभएको गुनासो गरिएको थियो । काम गर्ने अनुमति पत्रको म्याद मार्च २४, २०२० सम्म बढेको भन्ने पुष्टि गर्ने आधार के ? रोजगारदाता कम्पनीलाई के कसरी सम्झाउने ? लगायत थुप्रै प्रश्नहरु सोधिएका थिए । टिपीएसबाहक हरुलाई अधिकारले के कसरी सहजीकरण गर्छ भन्ने विषयमा बृहत छलफल भएको थियो । कार्यक्रममा उपस्थित सबैलाई समयमै नबिकरण गराउन पनि अनुरोध गरिएको थियो ।
अमेरिकी सरकारको फेडरल रजिस्टरमा सुचना प्रकाशित भए अनुसार ८ हजार ९ सय ५० नेपालीले टिपीएस सुविधा लिइरहेका छन् । सन् २०१५ मा भने १४ हजार नेपालीले यो सुविधा लिएका थिए । एक पटक टिपीएस सुविधा सकिएर नवीरकण गर्ने क्रममा टिपीएसबाहकको संख्या घटेको हो ।
चार वर्ष अघि बिं स.२०७२ साल बैशाख १२ गते (अप्रिल २५, २०१५)मा नेपालमा ठूलो महाभुकम्प गएको थियो । भुकम्पले नेपालमा ठूलो जनधनको क्षति भएपछि अमेरिकी सरकारले त्यसको २ महिनामै (जुन २४, २०१५) अमेरिकामा रहेका रहेका सम्पूर्ण कागजपत्र विहिन नेपालीलाई ‘टेम्पोररी प्रोटेक्टेड स्टाटस’ (टिपीएस) सुविधा प्रदान गरेको थियो । नेपालमा रहेका आफन्त र परिवारलाई सहयोग गर्न पाउन् भन्ने उदेश्यले कागज बिहिन नेपालीलाई अध्यागमन सम्बन्धी अस्थायी संरक्षणको व्यवस्था गर्न अमेरिकी सरकारले तत्काल टिपीएसको व्यवस्था गरेको हो ।

विश्वन्युज संवाददाता
काठमाडौं
गैरआवासीय नेपाली संघ (एनआरएन)ले आफ्ना सदस्य र उनीहरुका आफन्तका लागि एनआरएन फेमिली मेम्बर कार्ड वितरण शुरु गरेको छ । संघले आइतबार काठमाडौंमा विशेष कार्यक्रम गरेर कार्ड वितरण शुरु गरेको छ । संघका अध्यक्ष भवन भट्टले फेमिली मेम्बर कार्ड वितरण शुरु गरेका छन् । एनआरएनले गैरआवासीय नेपाली र उनीहरुका आफन्तका लागि बिपत परेका बेला आर्थिक सहायता उपलब्ध गराउन कार्ड वितरण गरिएको जनाएको छ ।
कार्ड प्राप्त गर्ने सदस्यले होटेल, ट्राभल एजेन्सी, अस्पताल, व्यापारिक मल लगायतका क्षेत्रमा सहुलियत दिने एनआरएनको तयारी छ । त्यसका लागि एनआरएनले क्षेत्र पहिचान गरेर काम गरिरहेको जनाएको छ । विभिन्न ७ सय कम्पनीसँग एमओई गर्ने तयारी भइरहेको पनि एनआरएनले जनाएको छ । एनआरएन फेमिली मेम्बर कार्ड लिनका लागि शुरुमा प्रतिव्यक्ति १ हजार नेपाली रुपैयाँ शुल्क तिर्नुपर्ने हुन्छ ।
हरेक वर्ष नेपालमा डिजास्टर आएका बेला रकम संकलन गर्नुपर्ने बाध्यता हटाउने उद्देश्यले स्थायी प्रकृतिको संरचना बनाउन लागिएको संघका अध्यक्ष भवन भट्टले बताए । उनले भने– ‘हरेक वर्ष नेपालमा कुनै न कुनै प्रकारको डिजास्टर आउँछ । कहिले आँधीबेहरी आउँछ भने कहिले भूकम्प आउँछ । धेरै सोसाइटी प्रोगाम गर्नुपर्ने हुन्छ । त्यसैले यस्तो खालको कार्यक्रम गर्नुपर्ने भएकाले यो कार्यक्रमलाई ल्याइएको हो ।’
एनआरएनमा संसारभरका झण्डै ७० हजार आबद्ध रहेका छन् । सम्पूर्ण सदस्य र उनीहरुका आफन्तलाई लक्षित गरेर पनि यो कार्यक्रम ल्याइएको अध्यक्ष भट्टको दाबी छ । उनले भने– ‘ग्लोबल्ली एनआरएनमा आबद्ध छन् उनीहरुका लागि विशेष कार्यक्रम सञ्चालन गर्नुपर्छ । त्यति मात्र होइन धेरै सोसाइटी प्रोग्राम पनि गर्नुपर्ने हुन्छ । महिला समितिसँग मिलेर महिलाको आङ खस्ने रोगको क्याम्पेन गर्नुपर्ने हुन्छ । घरेलु हिंसाका समस्या पनि छन् । त्यसका लागि सजिलोसँग च्यारिटी होस् भनेर पनि नयाँ कार्यक्रम आएको हो ।’
हरेक मेम्बरका लागि प्रतिव्यक्ति १ हजार रुपैयाँ तिरेपछि दुई वर्षसम्म नवीकरण गर्न नपर्ने मेम्बर कार्ड दिइने एनआरएनले जनाएको छ । ‘हरेक सदस्यका लागि दुई वर्षको कार्ड दिइनेछ । त्यसको शुल्क प्रतिव्यक्ति १ हजार रुपैयाँ रहेको छ । त्यसबाट एनसीसीले ३ सय रुपैयाँ राख्नेछन् । बाँकी रहेको दुई सय रुपैयाँ डिजास्टर, शिक्षा र महिला बालबालिकाको क्षेत्रमा खर्च हुनेछ । बाँकी रहेको ५० प्रतिशत रकम संस्थाले प्रयोग गर्नेछ,’ अध्यक्ष भट्टले जानकारी दिए ।
फण्ड सञ्चालनका लागि एनआरएनले नयाँ खालको मेकानिजम बनाएको जनाएको छ । डिजास्टरको क्षेत्रमा हरेक वर्ष अभियान चलाउनुपर्ने भएकाले स्थायी प्रकृतिको कोष स्थापनाका लागि एनआरएन आईसीसीले पहल थालेको हो । संघका अध्यक्ष भट्टले भने– ‘यसमा सबै एनआरएन सदस्य र उनका आफन्तले भाग लिने संघको अपेक्षा छ । यसका लागि मेकानिजम बनाइएको छ । डिजास्टरका लागि च्यारिटी गर्नुपर्ने भएकाले यसलाई नयाँ ढंगले अगाडि बढाउन खोजिएको हो । सम्भवतः सबै साथीले भाग लिनुहुन्छ । हामीले सबैको सहभागिताको विश्वास गरेका छौं । मेम्बरसिप लिएका व्यक्तिलाई लाभ दिनका लागि ७ सय कम्पनीसँग एमओई गर्ने तयारी गरेका छौं । मेकानिजम बनाइएको छ । डिजास्टरबाट च्यारिटी गरेरै गर्नुपर्ने भएकाले सम्भवतः सबै साथीहरुले भाग लिनुहुन्छ भन्ने लाग्छ । यसले लगानी पनि हुने र सबै साथीहरु भाग लिनुहुन्छ भन्ने विश्वास गरेका छौं । ७०० सय कम्पनीसँग एमओई गर्दैछौं ।’

कार्डबाट हुने फाइदा

एनआरएनका सदस्य र तिनका परिवार तथा आफन्तलाई लक्षित गरेर कार्ड वितरण शुरु गरिएको हो । आइतबार गैरआवासीय नेपाली संघको सचिवालय बालुवाटारमा पत्रकार सम्मेलन गरेर कार्ड वितरण प्रक्रियाका बारेमा समेत जानकारी दिइएको छ । एनआरएन फेमिली मेम्बर कार्ड एनआरएनमा आबद्ध सदस्य, उनका नेपालमा बसोवास गर्ने बाबुआमा, श्रीमान्–श्रीमती, छोराछोरीले प्राप्त गर्नेछन् । तर, विवाह गरेका सन्तानका लागि यो योजना लागू नहुने संघले जनाएको छ ।
एनआरएनले नेपालको डिजास्टर म्यानेजमेन्टमा सहयोग पु¥याउने उद्देश्यले ल्याएको यो योजनाअन्तर्गत सदस्यले समेत लाभ लिनसक्ने गरी योजना बनाएको छ । फेमिली मेम्बर कार्ड लिने व्यक्तिले विभिन्न व्यावसायिक प्रतिष्ठानबाट लिने सेवा, बस्तुमा सहुलियतको सुविधा पाउनेछन् । कार्डबाहक आफ्ना व्यक्तिलाई एनआरएनसँग सम्झौता गरेका प्रतिष्ठानले बस्तु तथा सेवामा निश्चित प्रतिशतको छुट दिनेछन् । यो योजनाअन्तर्गत नेपालभित्र मात्र नभएर एनआरएनले सम्झौता गरेका विदेशस्थित कम्पनीले पनि छुट दिने एनआरएनले जनाएको छ ।
नेपालभित्र संघले विभिन्न अस्पताल तथा स्वास्थ्य संस्था, बालबालिका तथा ज्येष्ठ नागरिक हेरचाह केन्द्र, विद्यालय, क्याम्पस, होटल तथा रेष्टुरेन्ट, सुपर मार्केट, एयरलाइन्स, ट्राभल एण्ड टुर एजेन्सीबाट टिकटमा छुट, बैंकिङ क्षेत्र, बीमा, फिटनेस सेन्टर र सूचना तथा सञ्चार लगायतका विभिन्न ७ सय कम्पनीसँग सम्झौताको तयारी गरिरहेको छ । संघका सदस्यले फेमिली मेम्बर कार्डका लागि एनआरएनको केन्द्रीय सचिवालयमा कार्ड बनाउन चाहने परिवारका सदस्यको विवरण बुझाउनुपर्ने हुन्छ । कार्ड क्यूआरसहितको हुनेछ ।
एनआरएनले विदेशमा बस्ने आफ्ना सदस्यको हित र नेपालको डिजास्टर म्यानेजमेन्ट दुवै काम एकैसाथ गर्न सकियोस् भनेर यो योजना ल्याएको हो । विदेशमा झण्डै ४० लाख नेपाली रहेको अनुमान गरिए पनि अहिलेसम्म संघमा झण्डै ७० हजारको हाराहारीमा मात्र आबद्धता रहेको छ । त्यसैले सदस्यता थप्ने र सदस्य लिन प्रोत्साहन पुग्नेगरी यो योजना ल्याइएको संघकी उपाध्यक्ष सपिला राजभण्डारीले जानकारी दिइन् । उनले लामो समयदेखिको प्रयासले सफलता प्राप्त गरेको जानकारी दिँदै सेवा सुविधा बिस्तार गरेर सबैको हितमा एनआरएन सक्रिय हुने बताइन् । कार्ड वितरण शुरु गर्ने कार्यक्रममा एनआरएन एकेडेमीका संयोजक डा. प्रमोद ढकालसहित एनआरएनका आईसीसी सदस्य, एनसीसी पदाधिकारी तथा सदस्य लगायतको उपस्थिति रहेको थियो ।
सामाजिक क्षेत्र र मानवीय क्षेत्रका विभिन्न पक्षमा काम गर्ने एनआरएनको घोषणासँगै अहिले सामूहिक लगानीको पनि प्रक्रिया अगाडि बढेको छ । निश्चित कोष कडा गरेर सामूहिक लगानी गर्नेगरी उपाध्यक्ष कुमार पन्त नेतृत्वको टोलीले यसअघि सरकारसँग गरेको सम्झौताअनुसार सबै नेपालीको लगानीका लागि पनि काम गरिरहेको अध्यक्ष भट्टले बताएका छन् । विभिन्न क्षेत्रमा विदेशमा बस्ने नेपालीले आईपीओका रुपमा लगानी गर्न पाउने र त्यसको प्रतिफल पनि समान ढंगले वितरण गर्नेगरी आफूहरु काममा जुटेको उनको भनाइ रहेको छ ।
लगानीको क्षेत्रमा पनि फेमिली मेम्बर कार्ड जस्तै गरी लगानी जुटाउने तयारी गरिएको छ । अहिले सबै प्रकारका लगानीका सम्भावनामा छलफल चलिरहेको छ । विदेशमा बस्ने नेपालीको सामूहिक लगानी र व्यक्तिगत प्रतिफल दिने गरी लगानीको वातावरण बनाउन एनआरएनका नेताहरु लागेका छन् । संघले सरकारसँग १० अर्बको लगानी सम्झौता गरिसकेको छ । यसले एनआरएनको सामूहिकतामा सहयोग पुग्ने संघको विश्वास छ । विदेशमा बस्ने तर थोरै पूँजी हुने सदस्यलाई समेत प्रत्यक्ष लाभ मिल्नेगरी लगानीको वातावरण बनाइने एनआरएनका पदाधिकारीको प्रतिबद्धता रहेको छ ।
एनआरएनमा पछिल्लो समय व्यक्तिगत हितका लागि संस्थालाई नेताहरुले प्रयोग गरेको आरोप लागेपछि सामूहिक लगानी र व्यक्तिगत प्रतिफलको अवधारणामा छलफल चलिरहेको हो । अध्यक्ष लगायत पदाधिकारीले राज्य संयन्त्रको पहुँचमा पुगेर आफ्नो व्यक्तिगत व्यवसायमा फाइदा पुग्ने काम गरेको आरोप लागेको छ । पूर्व अध्यक्ष उपेन्द्र महतो, जीवा लामिछाने, शेष घले र वर्तमान अध्यक्ष भवन भट्टले नेपालमा सञ्चालित विभिन्न परियोजनाामा राज्य संयन्त्रको प्रयोग गरेर व्यक्तिगत फाइदा लिएको आरोप लाग्दै आएको छ ।

कल्पना घिमिरे ,न्युयोर्क
ब्यस्त दैनिकी, काम, थकान सबै बिर्सिएर नेपाली महिलाले ज्याक्सन हाइटमा ‘लेडिज साँझ’ मनाएका छन् । अमेरिकाको न्यूयोर्क र आसपासका नेपाली महिला शनिबार साँझ नाजगान र खानपानमा मात्रै मस्त थिएनन् आफु भित्र रहेको प्रतिभा र क्षमता देखाउने होडबाजीमा पनि ब्यस्त थिए । नेपाली लेडिज साँझ डट कमले उनीहरुलाई यो सबै गर्ने अवसर जुराइदिएको हो । बर्षमा एक दिन भएपनि महिलाले परिवार, बालबच्चा र काम सबै छोडेर रमाइलो गरुन भन्ने उदेश्यले लेडिज साँझ कार्यक्रम गरिदैँ आएको हो । महिलाको काँधमा जहिलेपनि दोहोरो तेहोरो जिम्मेवारी हुने गर्छ । त्यसमाथि पनि विदेशमा बस्ने महिलाको जीवन निकै संघर्षपूर्ण हुन्छ । बालबच्चा, परिवार, घरभित्र र बाहिरको कामले उनीहरु निकै ब्यस्त हुन्छन् । लेडिज साँझमा यी सबै बिर्सिएर एकदिन भएपनि स्वतन्त्र रमाउँदै आफु भित्र लुकेर रहेको प्रतिभा प्रदर्शन गर्ने, साथीभाईसंग कुरा गर्ने गर्छन् । बिदेशमा रहेका नेपाली महिलाको शसक्तीकरण र विकासमा कार्यक्रमले योगदान पु¥याउँदै आएको कार्यक्रम संयोजक मुना राईले जानकारी दिइन् ।
नेपाली लेडिज साँझ डट कमले आयोजना गरेको कार्यक्रममा महिलाहरुले निर्धक्क नाँचे । १८ वर्षका युवतीदेखि ४०÷५० वर्षका अधवैशे महिलाहरु एकै ठाउँमा जम्मा भएर रमाइलो गरेका थिए । गत वर्ष युवती र महिलाहरुलाई फेसन शो र ¥यापमा उतारिएको थियो । यस वर्ष भने नृत्य प्रस्तुत गर्दै बिभिन्न कार्यक्रम गरी मनाइयो ।
दिनरात काममा खट्ने, पारिवारिक र बालबच्चाको जिम्मेवारीमै समय बिताउने हाम्रा दिदी बहिनीहरु एकैछिन सबैथोक बिर्सेर मेकअपले सजिसजाउ र राम्रा भएर कार्यक्रम हलमा पुगेका थिए ।
कार्यक्रममा १८ वर्ष भन्दा माथिका महिलाको मात्रै उपस्थिति थियो । कार्यक्रम हलभित्र क्यामरा मेन, टेक्निसियन, डिजे र होटलका केही स्टाफ मात्र पुरुष थिए । अन्य पुरुष र बालबालिकालाई कार्यक्रम हल भित्र छिर्न अनुमति थिएन । कुनै जाती, वर्ग क्षेत्र, राजनीतिक दल, ठूलो सानो केही नहेरी सबै महिला समान हुन् भन्ने उदेश्यले कार्यक्रम सञ्चालन गरिदँै आएको आयोजकले जनाएको छ ।
सन् २०१२ देखि महिलाहरु सहभागी गराएर कार्यक्रम गर्न सुरु गरिएको हो । कार्यक्रमबाट उठेको रकमको मुनाफाबाट नेपालको बिभिन्न ठाउँमा र अमेरिकामा पनि सामाजिक सेवामा लगाउँदै आएको छ । सन् २०१३ मा नेपालकी मृगौला पीडित साबिका थापालाई मृगौला प्रत्यारोपणका लागि सहयोग गरेको थियो । २०१४ मा न्यूयोर्कमा प्रासा तुलाधरलाई फोक्सोको उपचारका लागि सहयोग गरेको थियो । फोक्सोको बिरामी तुलाधरको छ महिना अघि नै मृत्यु भइसकेको छ । एनआरएनमा उठेका महिला उम्मेद्धारको अन्तरक्रिया, गोर्खाल्याण्ड आन्दोलनका पीडितलाई राहत पु¥याउन सहयोग गरेको आयोजक समुहले जनाएको छ ।

न्युह्याम्पसायर

अमेरिकास्थित न्युह्याम्पसायर राज्यको स्थानीय सिटी हुक्सेटमा आयोजित एक अन्तरक्रिया कार्यक्रममा समाजवादी पार्टीका बरिष्ठ नेता अशोक राईले नेपालको संबिधानका केही प्राबधानहरु विभेदकारी भएको बताएका छन् । स्थानीय समाजवादी पार्टी समर्थित नेपालीहरुको आयोजनामा आयोजित अन्तरक्रिया कार्यक्रममा नेता राईले संबिधानका ति विभेदकारी प्राबधानहरु हटाउनु पर्ने बताउँदै भने; “त्यो संशोधन गर्नु अहिलेको आवश्यकता हो। यो संबिधानमा मौलिक हक सम्बन्धि धाराहरु अत्यन्त राम्रा छन् तर पहिचान, भाषा, धर्म जस्ता सवालमा यो संबिधानले विभेद गरेका छन् । यसलाई संसोधन गरेर उत्कृस्ट संबिधान बनाउने उद्देश्यले प्रधानमन्न्रीसँग लिखित सम्झौता गरेर हामी सरकारमा गएका हौं । त्यसको पालना हुन्न भने हामी सरकारमा बस्नुको औचित्य छैन” ।
न्युह्याम्पसायर राज्यको स्थानीय हुक्सेटमा बिभिन्न संघ संस्थाका प्रतिनीधिहरु बीच आयोजित अन्तरक्रियामा उठेका जिज्ञासाहरुको उत्तर दिदै नेता राईले “स्थिर सरकारको कुरो उठेको बेला प्रचण्डजीले अहिले सम्झौताको कागज निकालेर किन बखेडा गर्नु परेको ? पांच वर्ष ओलीजीलाई नै दिए के बिग्रन्थ्यो र? पांच वर्ष मै प्रचण्डजी एक्स्पाएर भै हाल्ने पनि होइन होला ?” भन्दै आक्रोश ब्यक्त गरे ।
अर्को एक प्रश्नको जवाफ दिदै नेता राईले आफूले एमाले छाडेकोमा कुनै पश्चाताप नभएको बताउदै भने “मैले एमाले फोडेको होइन छोडेको हो र चाइनिज उखान अनुसार दश पटक नाप, एक चोटी काटको सिद्धान्त अनुसार मैले एमाले परित्याग गरेकोले मलाइ कुनै पश्चाताप छैन । एमालेमा अत्याधिक मतले उपाध्यक्ष निर्वाचित भाको हुँ । त्यो पार्टीक नेताहरु सबैको बारेमा राम्रो थाहा छ । गौरव र आत्मसन्तुष्टी कै बिषय खोजी गर्ने हो भने त मैले हात समाएर पोलिटिक्समा लगाएको, मदन भण्डारीसंग बिहेको प्रस्ताव मैले नै लगेको र बिहे समेत गराई देको व्यक्ति अहिले रास्ट्रपति छिन् । म एमालेमा भएको भए लाभको पद त मिल्थ्यो होला तर देशको समुल परिवर्तनको लागि त्यहाँ बसेर केही गर्ने अवस्था थिएन। अहिले हिमाल पहाड तराईलाई एक बनाई मुलुकको आमुल परिवर्तनको लागी लागेको छु । त्यसमा मलाइ गर्व छ” ।
राई अहिले अमेरिकाको निजी भ्रमणमा छन् ।गत हप्ता म्यासाच्युसेट्स राज्यस्थित प्रतिष्ठित कलेज एम आई टिबाट उनका छोराले कम्प्युटर साईन्समा बिद्याबारिधी गरेको दिक्षान्त समारोहमा सहभागी हुन आएका हुन्