Category: डायस्पोरा

काठमाडौं । कुवेतमा सात जना नेपाली महिला पक्राउ परेको कुवेती संचारमाध्यमले जनाएका छन् । कुवेत प्रहरीले घरेलु कामदारलाई भगाई अर्को साहूलाई बेचेको अभियोग उनीहरुमाथि लगाएको छ पक्राउ पर्नेमा सबै नेपाली नागरिक रहेको बताइएको छ ।

घरेलु कामदार आपूर्ति गर्ने म्यानपावर कम्पनीको इजाजत नलिई काम गरिरहेका महिलालाई आर्थिक प्रलोभनमा पारी अवैध तरिकाले बेचबिखन गरेको आरोप उनीहरुमाथि लागेको छ ।

कुवेतमा घरेलु कामको लागि महिला कामदार लैजान सरकारले कडाई गरेको छ । यसअघि भारतको बाटो हुँदै धेरै नेपाली महिलालाई त्यहाँ लगिन्थ्यो । अहिले भारतले समेत कडाई गरेको छ ।

दलालहरूले भने घरमै काम गरिरहेका नेपालीलाई भगाउने र अर्को साहुलाई बिक्री गर्ने गरेको अरब टाइम्सले लेखेको छ । कुवेतले हालै भने नेपालसहित ५ देशबाट घरेलु कामदार आउन सक्ने गरी निर्णय गरेको छ । पक्राउ परेकाको परिचय भने सार्वजनिक गरिएको छैन ।

काठमाडौं । कोरोना भाइरसको संक्रमणबाट विदेशमा यो साता थप तीन जना नेपालीको ज्यान गएको छ । गैरआवासीय नेपाली संघले यस्तो जानकारी दिएको हो । संघका अनुसार यो साता बेलायतमा दुई र अल्जेरियामा एकको संक्रमणका कारण मृत्यु भएको छ । योसहित २१ देशमा कोरोना संक्रमणका कारण मृत्यु हुने नेपालीको सङ्ख्या ३३३ जना पुगेको छ ।

गैरआवासीय नेपाली संघअन्तर्गतको स्वास्थ्य समितिका संयोजक सञ्जीव सापकोटाका अनुसार शनिबार साँझसम्म विभिन्न ५० देशमा रहेका ५८ हजार ८३२ नेपालीमा कोरोना संक्रमण देखिएको छ । तीमध्ये ५६ हजार २४७ जना कोरोनामुक्त भएका छन् ।

यो कूल सङ्क्रमितको ९४ प्रतिशत हो । गैरआवासीय नेपाली संघको स्वास्थ्य समितिका अनुसार यो साता बेलायत, मलेसिया, साउदी अरब, पोर्चुगल र नाइजेरियामा रहेका थप नेपालीमा कोरोना संक्रमण देखिएको छ । कोरोना भाइरसका कारण नेपालमा दुई हजार ३५ जनाको मृत्यु भएको छ ।

नेपालमा कोरोना भाइरसबाट संक्रमण हुनेको सङ्ख्या दुई लाख ७१ हजार ८०६ जना छन् भने दुई लाख ६६ हजार ८१२ अर्थात् ९८ दशमलव पाँच प्रतिशत कोरोनाबाट मुक्त भएको कोभिड–१९ उच्चस्तरीय समिति, गैरआवासीय नेपाली संघका प्रेस संयोजक चिरन शर्माले उल्लेख गरेका छन् ।

यूएई । संयुक्त अरब इमिरेट्स (युएई)ले विश्वमा विभिन्न माध्यमबाट ख्याती कमाएका विदेशी नागरिकलाई आफ्नो मुलुकको समेत नागरिकता दिने घोषणा गरेको छ । यूएईमा बसिरहेका नागरिकलाई टिकाइराख्न उक्त मुलुकले सो नीति ल्याएको हो ।

कोरोना संक्रमणको महामारी र तेलको मूल्यमा आएको गिरावटसँगै हजारौं विदेशी नागरिक युएई छोडेर हिँडेपछि युएई सरकारबाट यस्तो घोषणा आएको बीबीसीले लेखेको छ । युएईका उपराष्ट्रपति एवम् दुबईका शासक शेख मोहम्मद बिन रशिद अल मकतुमले लगानीकर्ता, डाक्टर, इन्जिनियर, कलाकारलगायत काबिल व्यक्तिहरुलाई युएईको नागरिकता दिइने भएको छ ।

विदेशी र उनका परिवारका सदस्यहरुले दोहोरो नागरिकता राख्न सक्ने नीति सरकारले ल्याएको हो । यसबाट युएईको विकासको यात्रामा योगदान दिन सक्ने व्यक्तिहरुलाई आकर्षित गर्ने उद्देश्य राखिएको छ । यो घोषणाबाट विभिन्न क्षेत्रमा विशेषज्ञता हाँसिल गरी यस मुलुकमा बसिरहेका विदेशी नागरिक लाभान्वित हुने भएका छन् ।

युएईको नागरिकता पाउन अलग्गै आवेदन दिनु नपर्ने भएको छ । युएईको शाही परिवार र सरकारी अधिकारीहरुले कुनै विदेशी नागरिकलाई नागरिकता दिन नामावली तयार पार्नेछन् । ती नामावलीबाट स्वीकृत गर्ने काम भने मन्त्रीपरिषद्बाट हुने भएको छ ।

काठमाडौं । सरकारले नेपाल आउने नागरिक र विदेशीलाई खोप लगाएर आएमा क्वारेन्टिन बस्न नपर्ने व्यवस्था गर्ने भएको छ । यसबारे छिट्टै मन्त्रिपरिषद्को निर्णय आउने संस्कृति, पर्यटन तथा नागरिक उड्डयन मन्त्री भानुभक्त ढकालले जानकारी दिए । उनका अनुसार विदेशबाट खोप लगाएर आएमा नेपालमा निर्वाध हिँडडुल गर्न सकिने गरी निर्णय आउने छ ।

यसका साथै पर्यटकको क्वारेन्टिन अवधि घटाएर पिसिआर परीक्षणमा नेगेटिभ आएलगत्तै बाहिर जान सकिने गरी नियम ल्याउन लागिएको छ । अहिले नेपालमा आउने नेपाली तथा विदेशी जो आएपनि १० दिन क्वारेन्टिन बस्नुपर्ने प्रावधान रहेको छ ।

यसले आगामी बसन्त ऋतुमा पर्यटक आगमन प्रभावित हुने भन्दै व्यवसायीले चिन्ता व्यक्त गरिरहेका थिए । यही सन्दर्भमा सरकारले सहजिकरण गर्न लागेको उनले जानकारी दिए । उनका अनुसार अब क्रमशः भारततर्फका नाकासमेत खोल्दै जाने योजना रहेको छ । यसले स्थलमार्गबाट समेत पर्यटक भित्रन सहज हुने छ । अहिले भारत र नेपाल दुबै मुलुकमा खोप अभियान जारी छ ।

काठमाडौं । नेपाली कांग्रेसले आफ्ना एक दर्जन भन्दा बढी भ्रातृ संगठनको म्याद ६ महिना लम्ब्याएको छ । मंगलबार राजधानीमा बसेको केन्द्रीय कार्यसमितिको बैठकले यस्तो निर्णय लिएको हो । नेपाली कांग्रेसले नेपाल महिला संघ, नेपाल तरुण दल, नेपाल विद्यार्थी संघ, नेपाल भूतपूर्व सैनिक संघ, नेपाल प्रजातन्त्र सेनानी संघको म्याद बढाउने निर्णय लिएको छ ।

यसैगरी नेपाल किसान संघ, नेपाल दलित संघ, नेपाल आदिवासी जनजाती संघ, राष्ट्रिय लोकतान्त्रिक अपांग संघ, नेपाल तामाङ संघ र नेपाल ठाकुर समाजको पदावधि समाप्त भएको मितिले ६ महिना म्याद थप हुने निर्णय समेत भएको छ ।

मगलबारको बैठकले नेपाली जनसम्पर्क समिति कतार, वहराइन, मलेसिया र साउदी अरबबाट प्राप्त क्रियाशील सदस्यतालाई स्वीकृत गर्ने निर्णय समेत लिएको छ । उता, नेपाली जनसम्पर्क तदर्थ समिति माल्टालाई आवद्धता प्रदान गरेको छ ।

जनसम्पर्क समिति युएईको विधान स्वीकृत गरेको समेत नेपाली कांग्रेसले जनाएको छ । ६ महिनाभित्र अधिवेशन सम्पन्न गर्ने गरी नेपाली जनसम्पर्क समिति इजरायलको कार्यकाल थप गर्ने निर्णय भएको बताइएको छ ।

काठमाडौं । कोरोना भाइरस (कोभिड-१९) को संक्रमणबाट विदेशमा थप ९ जना नेपालीको निधन भएको छ ।

गैरआवासीय नेपाली संघका अनुसार यो साता युकेमा ४ जना, कुवेतमा ३ जना, पोर्चुगलमा १ जना र मलेसियामा १ जनाको निधन भएको हो । गैरआवासीय नेपाली संघअन्तर्गतको स्वास्थ्य समितिका अनुसार यो सँगै विदेशमा कोरोना भाइरसबाट विदेशमा २० देशमा ३ सय २७ पुगेको छ।

संघको स्वास्थ्य समितिका संयोजक सञ्जिव सापकोटाका अनुसार शनिवार साँझसम्म विभिन्न ५० देशमा रहेका ५६ हजार २६ जना नेपालीमा कोरोना संक्रमण देखिएको छ ती मध्ये ५३ हजार ४ सय ३२ जना कोरोना मुक्त भएका छन् । यो कुल संक्रमितको ९५ प्रतिशत हो ।

गैरआवासीय नेपाली संघको स्वास्थ्य समितिका अनुसार यो साता बेलायत, प्रोतुगल, स्पेन, पोल्याण्ड, मलेसिया, जापान लगायत मध्यपूर्वमा रहेका थप नेपालीहरुमा कोरोना संक्रमण देखिएको छ ।

यस्तै कोरोना भाइरसका कारण नेपालमा १ हजार ९ सय ९४ जनाको निधन भएको छ । नेपालमा कोरोना भाइरसबाट संक्रमण हुनेको संख्या २ लाख ६९ हजार १ सय ८० जना छ भने २ लाख ६३ हजार ७ सय ३४ जना अर्थात ९७.५ प्रतिशत कोरोनाबाट मुक्त भएका छन् ।

एक सातामा औसतमा २ हजार नेपालीहरु संक्रमित
स्वास्थ्य समितिले एक सातामा औसतमा २ हजार नेपालीहरु संक्रमित हुने गरेको जनाएको छ।

सो आधारमा एक महिनामा औसतमा ८ हजार नेपाली संक्रमित हुने गरेको समितिका संयोजक सापकोटाले बताए। उनका अनुसार औसतमा एक महिना अवधिमा ४ हजार जना संक्रमणमुक्त हुने गरेका छन्।

स्वास्थ्य समितिले विश्वका विभिन्न मुलुकमा खोप अभियान सुरु भइसके पनि नेपाललगायत कयौँ मुलुकमा खोप अभियान सुरु नभएकाले सावधानी अपनाउन आग्रह गरेको छ ।

काठमाडौं । आज बिहान त्रिभुवन अन्तर्राष्ट्रिय विमानस्थल केहीबेर शोकमग्न रह्यो । दैनिक हजारौं यात्रु आवतजावत गर्ने विमानस्थलमा संनाटा छायो । कारण थियो, एक साथ १७ जना नेपाली दाजुभाईका शव बाकसमा नेपाल आइपुग्नु र वियोगमा आफन्तको चित्कार ।

मुलुकभित्र सत्ता र शक्तिका लागि नेताहरुबीच लडाई जारी रहेकै समयमा आज मलेसियाकोका क्वालालाम्पुरबाट नेपाल वायुसेवा निगमले एक साथ १७ वटा शव नेपाल ल्याएको छ । यसका लागि निगमले वाइडबडी जहाज क्वालालाम्पुर पठाएको हो । यस रुटमा न्यारोबडी जहाजबाटै उडान गरिरहेको निगमले शव ल्याउने प्रयोजनकै लागि आज वाइडबडी पठाएको थियो ।

त्रिभुवन विमानस्थल कार्यालयका अनुसार आज मलेसियाबाट १७ वटा शव आएका छन् । ५ जनाको भने उतै अन्येष्टी गरी अस्तुमात्र नेपाल ल्याइएको छ । यसरी ल्याएका शवलाई वैदेशिक रोजगार बोर्डले निःशुल्क घर वा आफन्तले सद्गत गर्ने स्थानसम्म पुर्‍याइदिनेछ । परिवारले शव ढुवानी गर्न बोर्डमा निवेदन दिनुपर्छ ।

काठमाडौं । गैरआवासीय नेपाली संघ (एनआरएनए) को विशेष महाधिवेशन आजबाट शुरु हुने भएको छ । परराष्ट्र मन्त्री प्रदीप ज्ञवालीले महाधिवेशनको उद्घाटन गर्ने कार्यक्रम रहेको छ । विधान संशोधनको साझा प्रस्तावलाई विशेष महाधिवेशनमा प्रस्तुत गर्ने सहमति बनेसँगै महाधिवेशन हुन लागेको हो ।

दुईदिनसम्म भर्चुअलरुपमा संचालन हुने विशेष महाधिवेशनमा ५० भन्दा बढी मुलुकबाट २६ सय जना प्रतिनिधि सहभागी हुने भएका छन् । नवौं महाधिवेशनबाट पारित हुन थाँती रहेका आर्थिक प्रतिवेदन र सहमतिका आधारमा तयार गरिएको विधान संशोधन प्रस्तावमाथि विशेष महाधिवेशनमा छलफल हुने संघले जनाएको छ ।

नयाँ विधान अनुसार अब एक थप युवासहित जम्मा ६ जना उपाध्यक्ष रहने, दुई सहकोषाध्यक्षमध्ये एकजना महिला अनिवार्य, एक महिलासहित दुईजना सचिव थप्ने, केन्द्रीय सल्लाहकार ११ जनाबाट बढाएर २१ जना बनाउने प्रस्ताव गरिएको छ ।

यसैगरी, संघका अध्यक्षले विश्वभरबाट १५ प्रतिनिधि थप्न सक्ने प्रावधान, राष्ट्रिय महाधिवेशनबाट २५ प्रतिशत प्रतिनिधि निर्वाचित गर्ने,निर्वाचन प्रक्रियासहितका प्रावधान समेत आउने भएको छ ।

काठमाडौं । मलेसियामा विभिन्न कारणले मृत्यु भएका र नेपालमा ल्याउन नसकिएका नेपाली नागरिकको शव लिन आज नेपाल वायुसेवा निगमको वाइडबडी जहाज क्वालालाम्पुर उड्दैछ । शुक्रबार राती ११ बजे उड्ने जहाजले शनिबार बिहान एकै पटक १७ वटा शव नेपाल ल्याउने छ ।

सामाजिक उत्तरदायित्व कार्यक्रम अन्तर्गत निगमले शव नेपाल ल्याउन लागेको बताइएको छ । क्वालालाम्पुरमा न्यारोबडी जहाजबाट नियमित उडान भइरहेको छ । तर, कार्गोमा एकै पटक धेरै शव ल्याउनु पर्ने भएकाले वाइडबडी जहाज पठाउन लागिएको हो ।

मलेसियाबाट नेपाल आउने क्रममा जहाजमा २५० हाराहारी यात्रु समेत हुने भएका छन् । जहाज शनिबार बिहान ८ः४० मा त्रिभुवन विमानस्थलमा अवतरण गर्नेछ । मलेसियामा कोरोना भाइरसको संक्रमणयता नै शवहरु रोकिएका छन् ।

काठमाडौं । इजरायलमा ५ सय नेपाली श्रमिकले रोजगारीको अवसर पाउने भएका छन् । आज नेपालले इजरायलसँग गर्ने प्रोटोकलमा हस्ताक्षर गरिएको छ । वैदेशिक रोजगार विभागका महानिर्देशक कुमार दाहाल र नेपालका लागि इजरायलका राजदूत खनान गोडेरबीच प्रोटोकलमा हस्ताक्षर भएको हो ।

यसअघि १४ असोजमा नेपालबाट श्रमिक आपूर्ति गर्ने सम्बन्धमा नेपाल र इजरायलीच श्रम सम्झौता भएको थियो । यस मुलुकमा ५ सय नेपाली केयर गिभरले रोजगारी पाउने भएका छन् ।

पछिल्लो सम्झौतासँगै इजरालयमा केयर गिभरका रुपमा श्रमिक लैजाने सम्बन्धमा आन्तरिक कार्यविधि बन्ने छ । त्यसपछि विज्ञापन प्रकाशित गरी आवेदन माग हुनेछ । इजरायलमा ६० प्रतिशत महिला र ४० प्रतिशत पुरुष केयर गिभर लैजाने सहमति भएको छ ।

उनीहरुको न्युनतम तलब १५ सय डलर हुने बताइएको छ । त्यसबाट ३१० डलर भने खाना र आवास सुविधाबापत रोजगारदाताले काट्नेछ ।

एसएलसी उत्तीर्ण गरेर १५ महिने स्वास्थ्य सेवासम्बन्धी विषय पढेका वा १२ कक्षा पास गरी तीनमहिने केयर गिभर तालिम लिएका, अंग्रेजी र हिब्रु भाषा बोल्न सक्नेले इजरायलमा रोजगारीको अवसर पाउने भएका छन् ।

इजरायल जाने श्रमिकले भिसा शुल्क, मेडिकल शुल्क, टिकट, बिमा लगायत खर्च भने आफैंले ब्यहोर्नुपर्नेछ ।

काठमाडौं । कोरोना महामारीका कारण रोकिएका विदेशी सहायताका आयोजना क्रमशः अगाडी बढ्ने क्रममा छन् । यसमा ठूलो भूमिका विदेशमै रोकिएका कामदार समेत हुन् । चालु आर्थिक वर्षको पहिलो ५ महिना (मंसिरसम्म) १३९५ जना विदेशी कामदार नेपाल आएको तथ्यांकले देखाएको छ ।

विभागका अनुसार कामदार भिषा लिएका उक्त संख्यामा विदेशी नेपाल भित्रिएका छन् । पछिल्लो दिनमा विदेशी कामदारको आगमन बढेको छ । ५ महिनामा कुल ५४७० जना पर्यटकले अनअराइभल भिसा लिएका छन् ।

८५६६ जना पर्यटकले नेपालमा भिसा थप गरेको विभागले जनाएको छ । यो अवधिमा ४८८ गैरआवासीय नेपालीले भिसा प्राप्त गरेका छन् । वैवाहिक भिसा लिनेको संख्या ५४६ रहेको छ । अध्ययन भिसामा ४८० जना विदेशी नेपाल आएको तथ्यांकले देखाएको छ ।

५ महिनाको अवधिमा विभागले ३० करोड ५ लाख ८२ हजार रपैयाँ राजस्व संकलन गरेको छ । पहिलो ५ महिनामा १ सय भन्दा बढी विदेशी नागरिकलाई भने नेपालले देश निकाला गरिदिएको छ ।

गैरकानूनी रुपमा नेपाल बसिरहेका तथा विभिन्न कसुरमा सहभागी भएका विदेशीलाई देश निकाला गर्ने गरिन्छ । साउनदेखि मंसिरसम्म १ सय १ जना विदेशीलाई नेपालबाट निकासा गरिएको हो । मंसिर महिनामा मात्र २० जना विदेशीलाई निकाला गरिएको विभागले सार्वजनिक गरेको तथ्यांकमा उल्लेख छ ।