काठमाडौं । सरकारले संविधान संशोधन गर्नका लागि पाँच जनाको कार्यदल बनाएको छ। जसपाका अध्यक्ष महन्थ ठाकुरले शुक्रबार संसदीय दलको बैठकपछि सञ्चारकर्मीसँग बिहीबार पाँच सदस्य कार्यदल गठन भएको बताए ।
उक्त कार्यदलमा एमालेबाट पूर्वमहान्यायाधीवक्ता अग्नि खरेल, सांसद कृष्णभक्त पोखरेल र प्रधानमन्त्री ओलीका प्रमुख राजनीतिक सल्लाहकार बिष्णु रिमाल भने जसपाबाट लक्ष्मणलाल कर्ण र सर्वेन्द्रनाथ शुक्ल छन्।
काठमाडौं । नेपालले ९ लाख भन्दा बढी जेष्ठ नागरिकलाई कोभिसिल्ड खोपको पहिलो डोज लगाएको छ । दोस्रो डोज खरीद गर्न भारतीय खोप निर्माता कम्पनी सिरमलाई रकम भुक्तानी गरिसकेको अवस्थामा पनि तत्काल खोप आउने सम्भावना छैन । किनकी भारत आफैले यतिबेला महामारीको सामना गर्नु परेको छ । यता नेपालमा पहिलो मात्रा लगाएकाहरुको दोस्रो डोज लगाउने अवधि सकिन लागेको छ । त्यसमाथि अधिकांश वृद्धवृद्धा छन् ।
जसले गर्दा तत्काल दोस्रो डोजको जोहो गर्नुपर्ने चूनौति सरकार सामु रहेको छ । कोभिसिल्ड सोही खोप हो, जुन बेलायतमा अस्ट्राजेनेका रुपमा उत्पादन भएको छ । भारतमा कोभिसिल्ड नाममा स्थानीय उत्पादन गरिएको हो । सोहीकारण सरकारले बेलायतबाट यो खोपको प्राप्तिमा जुटेको छ ।
प्रधानमन्त्री केपी शर्मा ओलीले बिहीबार बेलायती राजदूत निकोला पोलिटसँग भेट गर्दै खोप उपलब्ध गराउन आग्रह गरेका छन् । प्रधानमन्त्रीका प्रेस सल्लाहकार सूर्य थापाका अनुसार प्रधानमन्त्रीले नेपाली जनताको लागि अस्ट्राजेनेका कोभिड–१९ खोप उपलब्ध गराउन अनुरोध गरेका हुन् । त्यसअघि परराष्ट्रमन्त्री प्रदीप ज्ञवलीले बेलायती समकक्षीमार्फत खोप उपलब्ध गराइदिन अनुरोध गरिसकेका छन् ।
बेलायतबाट भने कुनै प्रतिक्रिया आइसकेको छैन । कोभिसिल्ड अमेरिकासँग स्टकमा रहेको खोप समेत हो । उसले आफुसँग रहेको ८ करोड डोज कोभिसिल्ड अन्य मुलुकलाई दिने बताएको छ । तर, त्यो सूचिमा नेपाल पर्छ वा पर्दैन, निश्चित छैन ।
काठमाडौं । नेपाली राष्ट्रिय फुबटल टोलीका लागि जेठ महिना महत्वपूर्ण छ । किनकी यो खेलबाट नेपालले अन्तर्राष्ट्रिय मञ्चमा आफ्नो उपस्थिति प्रमाणित गर्न सक्ने छ । नेपालले यो महिना कुल चार वटा प्रतिस्पर्धा गर्दैछ, सबै खेल बलियो टोलीविरुद्ध हुने छ । यसमध्ये एक खेल मैत्रीपूर्ण हो भने अन्य तीन खेल भने विश्वकप २०२२ को छनोट चरणका खेल हुन् ।
इराकसँगको मैत्रिपूर्ण खेलका लागि टोली आगामी मंगलबार चार्टर्ड उडानबाट इराक जाने तय भएको छ । यसका लागि कतार एयरवेजको जहाज चार्टर्ड गर्ने तयारी छ । इराकमा एक खेल खेल्ने नेपाल उतैबाट विश्वकप छनोट अन्तर्गत बाँकी रहेका तीन खेल खेल्न कुवेत जाने छ ।
तालिका अनुसार यी खेल नेपालमा हुनुपर्ने थियो । तर, महामारीका कारण नेपालमा खेल गर्न नसकिने भन्दै भेन्यु तटस्थ स्थानमा सारिएको हो । यस पटक नेपालको प्रशिक्षक अबदुल्लाह अलमुताइरी छन् । उनी पहिलो पटक नेपालको टीम सम्हाल्दैछन् ।
तालिका अनुसार नेपालले यही जेठ १५ गते इराकसँग मैत्रीपूर्ण खेल खेल्ने छ। मैत्रीपूर्ण खेल, विश्वकप छनोट र एसियन कप छनोटका लागि राष्ट्रिय टोलीका प्रशिक्षक अब्दुल्लाह अलमुताइरीले मङ्गलवार २३ खेलाडीको घोषणा गरेका छन् । कुवेतमा हुने छनोटको बाँकी खेल अन्तर्गत नेपालले जेठ २० गते चाइनिज ताइपे, जेठ २४ गते जोर्डन र जेठ २८ गते अष्ट्रेलियासँग प्रतिस्पर्धा गर्ने छ ।
काठमाडौं । प्रधानमन्त्री केपी शर्मा ओलीले राजिनामा नदिएकै अवस्थामा नयाँ सरकार गठनका लागि भन्दै राष्ट्रपतिले २१ घण्टाको समय दिएको विज्ञप्ती सार्वजनिक भएपछि प्रमुख प्रतिपक्षी दल नेपाली कांग्रेसका नेताहरु आक्रोसित बनेका छन् । नेताहरुले यो असंवैधानिक कदम भएको र प्रधानमन्त्री तथा राष्ट्रपति मिलेर संविधानको खिल्ली उडाउने काम भएको प्रतिक्रिया दिएका छन् ।
कांगे्रसका वरिष्ठ नेता रामचन्द्र पौडेलले यो कदमलाई संविधान फाल्ने षडयन्त्रको संज्ञा दिएका छन् । कांग्रेस नेता गगन थापाले अब राष्ट्रपतिलाई महाअभियोग लगाएर बिदा गर्नुपर्ने बताएका छन् । कांग्रेस प्रवक्ता विश्वप्रकाश शर्माले संविधान छल्ने र संसदलाई प्रयोजनहिन बनाउने संयुक्त प्रयास भएको उल्लेख गरेका छन् । यसै सन्दर्भमा कांग्रेसले शुक्रबार बिहान पदाधिकारी र पूर्वपदाधिकारीको बैठक बोलाएको छ।
राष्ट्रपति विद्यादेवी भण्डारीले संविधानको धारा ७६ (५)अनुसार सरकार गठन गर्न आह्वान गरेपछि त्यसबारे निर्णय लिन कांग्रेसले पदाधिकारीसहितको बैठक बोलाएको हो। बैठक शुक्रबार बिहान ९ बजे कांग्रेस सभापति शेरबहादुर देउवाको निवास बूढानीलकण्ठमा बस्नेछ।
काठमाडौं\एजेन्सी । इजिप्टको मध्यस्थतापछि इजरायल र प्यालेस्टीनी विद्रोहीबीचका युद्ध थामिएको छ । करीव दुई सातायता जारी युद्धका कारण अढाइ सय मानिसले ज्यान गुमाइसकेका छन् । बीबीसीका अनुसार युद्धविराम स्थानीय समयानुसार शुक्रवार राति २ बजेबाट शुरु भएको छ।
प्यालेस्टिनी विद्रोही तथा इजरायलको सुरक्षा क्याबिनेटले इजिप्टको मध्यस्थतामा गरिएको युद्धविरामप्रति स्वीकृति जनाएका हुन् । युद्धविरामपछि गाजामा विजयोत्सव मनाउन गोली चलाइएका आवाज आएको खबर छ । तर, इजरायल रकेट हान्न छाडिएको छ । यसअघि इजिप्टले इजरायल तथा गाजामा युद्धविराम पालना गराउन सुरक्षा प्रतिनिधिमण्डल पठाएको थियो ।
हमासले पूर्वी जेरुसलेमबारे नखुलाइएका केही सहमति भएको बताएको छ। तर इजरायलले भने दाबी अस्वीकार गरेको छ। अमेरिकी राष्ट्रपति जो बाइडनले युद्धविरामको स्वागत गरेका छन्। यसले मध्येपूर्वमा प्रगतिका निम्ति अवसर दिएको उनको भनाई छ ।
युद्धविराम लागु हुनुअगावै बोल्दै उनले इजरेलका प्रधानमन्त्री बेन्जामिन नेतन्याहुसँग कुरा गरेको र लडाइँ अन्त्य गराएकोमा उनलाई बधाइ दिएको बताएका थिए। साथै बाइडनले युद्धविरामको मध्यस्थता गराएकोमा इजिप्टका राष्ट्रपति सीसीलाई पनि धन्यवाद दिएका छन्।
फ्रान्स । कोरोना भाईरस बिरुद्धको खोप पूर्ण गरेका सबैको लागि युरोप खुल्ला हुने भएको छ। बुधबार युरोपियन युनियन अन्तर्गतका राजदुतहरुको राष्ट्रियस्तरको सहमतीले आगामी गर्मी याममा खोप पुरा गरेर छुट्टी मनाउन युरोप जानेहरुलाई प्रबेशमा कुनै रोक तोक नहुने निर्णय गरेको हो । राजदुतहरुको सहमतीले खोप पुरा गरेकाहरुले क्वेरण्टिनमा बस्नु नपर्ने र जाँच पनि गर्नु पर्ने छैन ।
गर्मी यामको पर्यटकिय सिजनको मुखमा युरोपियन युनियनले उक्त निर्णय गरेको हो । युरोपियन युनियन अन्तर्गतका २७ देशका राजदुतहरुले उक्त निर्णय गरेका हुन । खोपको मात्रा पुरा गरेका कुन कुन देशबाट बिना रोकतोक युरोप जान पाउने हो ति देशहरुको सुची आगामी हप्तासम्म सार्वजनिक गरिने जनाईएको छ ।
युरोपियन युनियन अन्तर्गतका ति देशहरु बाह्य मुलुकका पर्यटकका लागि करिब एक बर्षदेखी बन्द थिए । यसअघि अमेरिकाले खोपको मात्रा पुरा गरेका मानिसले सार्वजनिक स्थलमा मास्क लगाउन नपर्ने निर्णय गरिसकेको छ ।
काठमाडौं । कोरोना महामारीका कारण दैनिक २ सय मानिसले ज्यान गुमाइरहेका छन् । अस्पतालमा बेड र अक्सिजनको अभाव यद्दपी अभाव छ । जनतामा चरम निरासा र सास्ती छ । तर, प्रधानमन्त्री केपी शर्मा ओली गत पुसमा आफुले चालेको संसद विघटन सही थियो भन्ने देखाउन हरसम्भव प्रयासमा लागेका छन् । उनकै मुडेबलमा अब मुलुक अग्रिम निर्वाचनमा होमिने निश्चित भएको छ ।
सोही चालबाजी अनुसार राष्ट्रपति विद्यादेवी भण्डारीबाट संविधानको धारा ७६ को उपधारा ५ वमोजिम नयाँ सरकार गठनको प्रक्रिया शुरु भएको हो । प्रधानमन्त्री केपी शर्मा ओलीले उपधारा ४ बमोजिम संसदबाट विश्वासको मत नलिई नयाँ सरकार गठनको मार्ग प्रशस्त गरेको जानकारी आज राष्ट्रपतिलाई गराएका छन् ।
राष्ट्रपति कार्यालयले बिहीबार राति विज्ञप्ति जारी गर्दै शुक्रबार साँझ ५ बजेसम्म विश्वासको मत प्राप्त गर्न सक्ने आधार प्रस्तुत गर्न दलहरुलाई समय दिएको उल्लेख छ । अब विपक्षी गठबन्धनले आज रातभर र शुक्रबार दिनभरमा बहुमत देखाएर सरकारको दावि गर्न नसके प्रतिनिधिसभा संवैधानिक रुपमा भंग हुन्छ । त्यसपछि वर्तमान प्रधानमन्त्री केपी शर्मा ओलीको नेतृत्वमा निर्वाचन घोषणा हुन्छ ।
प्रधानमन्त्री ओली यही चाहन्छन् । उनको चाहना अनुसार मुलुकलाई राजनीतिक खेलबाट बचाउने हो भने अहिले निर्णायक मत बोकेको माधव नेपाल समुहका सांसदले राजिनामा गरि विपक्षी दलको बहुमत पुर्याउन सहयोग गर्नुपर्छ । त्यसो हुन नसके मुलुक महामारीका बीच निर्वाचनमा जाने छ । यसले थप जटिलता ल्याउने छ । जनस्वास्थ्य पुनः एक पटक ओझेलमा पर्नेछ ।
काठमाडौं । नेपालमा नयाँ सरकार गठनको कसरत शुरु भएको छ । नवनियुक्त प्रधानमन्त्री केपी शर्मा ओलीले एक महिना भित्र विश्वासको मत लिनु पर्ने थियो । तर, आफ्नो पक्षमा विश्वासको मत लिन नसक्ने निश्चित भएपछि ओली पुनः अर्को कदममा गएका हुन् । उनले विश्वासको मत नलिई वैकल्पिक सरकार गठनका लागि मार्ग प्रशस्त गर्ने जानकारी राष्ट्रपति विद्यादेवी भण्डारीलाई गराएका थिए ।
त्यसलगत्तै राष्ट्रपति विद्यादेवी भण्डारीले संविधानको धारा ७६(५) अनुसार नयाँ सरकार गठन गर्न आह्वान गरेकी छन् । राष्ट्रपतिले नयाँ सरकार गठन गर्न दलहरुलाई २१ घण्टाको समय दिएकी छिन् । अब दलहरुले शुक्रबार साँझ ५ बजेसम्म बहुमतको सरकार गठन गर्न दावि पेश गर्नुपर्नेछ ।
काठमाडौं । राष्ट्रपति विद्यादेवी भण्डारीले बिहीबार दुईवटा अध्यादेश जारी गरेकी छन् ।
मन्त्रिपरिषदको सिफारिसमा शपथ सम्बन्धी अध्यादेश, २०७८ र कोभिड–१९ संकट व्यवस्थापन अध्यादेश, २०७८ जारी गरेको राष्ट्रपति कार्यालयले जनाएको छ ।
काठमाडौं । नेपालमा पछिल्लो २४ घण्टामा थप ८३०५ जनामा कोरोना संक्रमण पुष्टी भएको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभरका विभिन्न प्रयोगशालामा गरिएको २२८७ जनाको पिसिआरमा ८२२७ र एन्टीजेन विधिबाट ७८ जना संक्रमित पुष्टि भएका हुन्।
यो सहित नेपालमा हालसम्म ४ लाख ८८ हजार ६४५ जनामा कोरोना संक्रमण पुष्टि भएको छ ।
त्यस्तै पछिल्लो २४ घण्टामा कोरोना भाइरस संक्रमणमुक्त हुनेको संख्या ६५४३ रहेको छ । हालसम्म ३ लाख ६६ हजार ९४६ जना संक्रमणमुक्त भएका छन् ।
२४ घण्टामा कोरोना संक्रमणबाट थप १९० जनाको मृत्यु भएको छ । मृतकको संख्या ५८४ठ पुगेको छ । यससँगै संक्रिय संक्रमितको संख्या १ लाख १५ हजार ८५२ पुगेको छ । उनीहरुमध्ये १ लाख ८ हजार ३८ होम आइसोलसेसनमा छन् ।
प्रदेश १ को इलाममा ११, उदयपुरमा २४, ओखलढुंगामा ७९, खोटाङमा २४, झापामा ६४, ताप्लेजुङमा ८, तेह्रथुममा २, धनकुटामा ४४, पाँचथरमा ६, भोजपुरमा १७, मोरङमा ४५०, संखुवासभामा १४, सुनसरीमा १२९ र सोलुखुम्बुमा ५ जनामा कोरोना भेटिएको छ।
प्रदेश २ को धनुषामा १९५, पर्सा ४५, बारामा २५, महोत्तरीमा १११, रौतहटमा ३१, सप्तरीमा ७२, सर्लाहीमा २८ र सिरहामा २७ जनामा कोरोना पाइएको छ।
बागमती प्रदेशको काठमाडौंमा मात्र २ हजार ६ सय जनामा कोरोना पुष्टि भएको छ। काभ्रेपलाञ्चोकमा १२५, चितवनमा १००, दोलखामा ६७, धादिङमा ५६, नुवाकोटमा २५, भक्तपुरमा २२९, मकवानपुरमा १३, रामेछापमा ४, ललितपुरमा ४०३, सिन्धुपाल्चोकमा ९ र सिन्धुलीमा ४६ जनामा कोरोना भेटिएको मन्त्रालयले जनाएको छ।
गत २४ घण्टामा गरिएको परीक्षणमा गण्डकी प्रदेशको कास्कीमा २०१, गोरखामा १२, तनहुँमा ६०, नवलपरासी पूर्वमा ६, पर्वतमा २०, मुस्ताङमा १, म्याग्दीमा ३३, लमजुङमा ४, बागलुङमा ७ र स्याङजामा ९ जनामा कोरोना पुष्टि भएको छ।
लुम्बिनी प्रदेशको अर्घाखाँचीमा ३०, कपिलवस्तुमा ९४, गुल्मीमा ३२, दाङमा २४५, नवलपरासीमा ९५, पाल्पामा १३६, प्युठानमा ४, बर्दियामा २०८, बाँकेमा ३०९, रुपन्देहीमा ५२० र रोल्पामा ३ जनामा कोरोना पाइएको छ।
गत २४ घण्टामा कर्णाली प्रदेशको कालिकोटमा २२, जाजरकोटमा १७, जुम्लामा १७, दैलेखमा ४४, रुकुम पश्चिमा ३, सल्यानमा ८२, सुर्खेतमा ३०० र हुम्लामा ३ जनामा कोरोना भेटिएको छ।
सुदूरपश्चिम प्रदेशको अछाममा ९४, कञ्चनपुरमा १०५, कैलालीमा २६०, डडेल्धुरामा ३८, डोटीमा ३७, दार्चुलामा ३५, बाजुरामा २ र बैतडीमा ६१ जनामा कोरोना भेटिएको मन्त्रालयले जनाएको छ।
काठमाडौं । राष्ट्रियसभा सदस्यमा डा. खिमलाल देवकोटा विजयी भएका छन् ।
रामबहादुर थापा बादललाई हराउँदै नेपाली कांग्रेस र नेकपा माओवादी केन्द्रलगायत दलका साझा उम्मेदवार देवकोटा निर्वाचित भएका छन्। उनले ५०८८ मतभार पाए ।
संघीयताविज्ञ देवकोटा नेता नेपालनिकट मानिन्छन्। तर उनी अहिले स्वतन्त्र पक्षबाट उम्मेदवार थिए।
काठमाडौं । सेयर बजारले कमब्याक गरेको छ । बुधबार दोहोरो अंकले घटेको बजार आज फेरि लयमा फर्किएको हो । यससाताको शुरुका ३ दिनमा करिब १०९ अंकले बढेको बजारमा हिजो १३ अंकले घटेको थियो । यससाता नेप्से समग्रमा १०५ अंकले बढेको छ ।
सूचक बढे पनि आज कारोबार रकममा भने भारी गिरावट आएको छ । बुधबार कीर्तिमानी ११ अर्ब ९५ करोडको कारोबार भएकोमा आज पौने ३ अर्बले घटेर सवा ९ अर्बमा सीमित भएको छ ।
आज सेयर बजार मापक सूचक नेप्से ६.३७ अंकले बढेर २७८७.१९ विन्दुमा पुगेको छ । नेपाल स्टक एक्सचेन्जका अनुसार आज २१४ कम्पनीको ९ अर्ब ३० करोड ५२ लाख २२ हजार ७ रुपैयाँ बराबरको २ करोड १ लाख ३३ हजार ६०२ कित्ता सेयर किनबेच भएका छन् ।
आज कारोबारमा आएका १३ वटा समूहमध्ये ५ समूहको परिसूचकमा हरियाली छाएको छ भने ८ समूहको परिसूचक राताम्मे भएका छन् ।विकास बैंक समूहको परिसूचक सबैभन्दा धेरै ११३.४४ अंकले बढेको छ भने जीवन बीमा समूह ७८.८५ अंकले घटेको छ ।
आज कारोबारमा आएका २१४ कम्पनीमध्ये ९३ कम्पनीको सेयर मूल्य बढेको छ भने ११३ कम्पनीको मूल्यमा गिरावट आएको छ । ८ कम्पनीको मूल्य स्थिर रहेको छ ।
आज नेपाल पुनर्बीमा कम्पनीको सर्वाधिक कारोबार भएको छ । यसको ३४ करोड ७० लाख रुपैयाँ बढीको कारोबार भएको छ । कारोबार रकमकै आधारमा बैंक अफ काठमाण्डू ३४ करोड र नेशनल लाइफ इन्स्योरेन्स २४ करोडको कारोबार सहित शीर्ष तीनमा रहे ।
आज ६ कम्पनीको सेयर मूल्यमा पोजेटिभ सर्किट लागेको छ । समता घरेलु लघुवित्त, गुडविल फाइनान्स, मञ्जुश्री फाइनान्स, गोर्खाज फाइनान्स, युनाइटेड इदीमार्दी हाइड्रोपावर र जानकी फाइनान्सका सेयरधनीले करिब १० प्रतिशत कमाएका छन् ।
यसैगरी, गुह्वेश्वरी मर्चेन्ट र मितेरी डेभलपमेन्ट बैंकको सेयर मूल्य पनि ९ प्रतिशतले बढेको छ । बढ्दो बजारमा आज पाँचथर पावरको सेयर मूल्य सबैभन्दा धेरै ६.५६ प्रतिशत घटेको छ ।
काठमाडौं । सांसद नरहेका ७ जना मन्त्रीलाई कामकाज गर्न रोक लगाउन सर्वोच्च अदालतले अन्तरिम आदेश जारी गरेको छ ।
प्रधानन्यायाधीश चोलेन्द्र शमसेर जबराको एकल इजलासले गृहमन्त्री रामबहादुर थापासहित पूर्वसंघीय संसदको सदस्य नरहेका सात मन्त्रीलाई मन्त्रिको हैसियतमा कामकाज गर्न नदिन आदेश दिएको हो ।
संविधानको धारा ७८ अनुसार एकपटकलाई बढीमा ६ महिनामात्र मन्त्री हुन सक्ने भन्दै पुनः नियुक्तिलाई अन्तरिम आदेशमार्फत बदर गरेको छ ।
नेकपा विवादमा गत फागुन २३ को फैसलापछि माओवादीमा नफर्की एमाले बसेका र सांसद पद खारेज भएका उनीहरुलाई प्रधानमन्त्री केपी शर्मा ओलीको पछिल्लो मन्त्रिपरिषद्मा नियुक्ती गरेका थिए ।
सर्वोच्चको आदेशपछि गृहमन्त्री रामबहादुर थापा बादल, उद्योगमन्त्री लेखराज भट्ट, ऊर्जामन्त्री टोपबहादुर रायमाझी, शहरी विकासमन्त्री प्रभु साह, खानेपानी मन्त्री मणि थापा, श्रममन्त्री गौरीशंकर चौधरी र युवा तथा खेलकुद मन्त्री दावा लामा मन्त्री पदबाट मुक्त भएका छन् ।
हेटौडा । राष्ट्रियसभा सदस्य उपनिर्वाचनका लागि मतदान गर्ने प्रक्रिया शुरु भएको छ । गृहमन्त्री तथा एमालेका उमेदवार रामबहादुर थापा बादल र अर्का एमालेका उमेदवार डा. खिमलाल देवकोटा ९ बजे नै मतदान केन्द्रमा पुगेका छन् । मतदान सकिनासाथ गणना सुरु हुने र आजै नतिजा सार्वजनिक गर्ने तयारी निर्वाचन आयोगको रहेको छ । मतदान ३ बजेसम्म हुनेछ ।
स्थनीय तहबाट धुलिखेल नगरपालिकाका प्रमुख र प्रदेशसभा सदस्यको तर्फबाट मुख्यमन्त्री डोरमणि पौडेलले मतदान गर्दै मतदानको प्रारम्भ गरेका हुन् । बादल र देवकोटालाई नेमकिपाका कृष्णबहादुर तामाङले चूनौति दिनेछन् । उम्मेदवार आफूले भने आफैंलाई भोट हाल्न नपाउउने प्रावधान रहेको छ ।
नयाँ दिल्ली । भारतमा कोरोना भाइरसको सङ्क्रण केही थामिने संकेत गरेको छ । नयाँ सङ्क्रमित थप हुने क्रममा ब्रेक लागिरहेको तथ्यांक आइरहेको छ । तर, मृत्युको ग्राफ भने अझै उस्तै छ । भारतमा दैनिक चार लाखभन्दा माथिको संक्रमण दर घटेर अब साढे दुई लाखमा सिमित भएको छ ।
पछिल्लो २४ घण्टामा भारतमा २ लाख ७६ हजार दुई सय ६१ जनालाई सङ्क्रमण भएको छ । अब भारतमा सङ्क्रमण हुनेको सङ्ख्या २ करोड ५७ लाखभन्दा धेरै छ । भारतमा नयाँ सङ्क्रमितको सङ्ख्या घट्दै गए पनि मृत्युदर उस्तै छ । २४ घण्टामा भारतमा कोरोना भाइरसका कारण तीन हजार ८ सय ८० जनाको मृत्यु भएको तथ्यांक आएको छ ।
अब भारतमा ज्यान गुमाउनेको सङ्ख्या दुई लाख ८७ हजार एक सय ५६ पुगेको छ । विश्वमा सबैभन्दा धेरै कोरोना सङ्क्रमित हुने देशको सूचीमा भारत दोस्रो स्थानमा रहेको छ । अमेरिका पहिलो स्थानमा छ । ब्राजिल तेस्रो स्थानमा रहेको छ । अमेरिकामा यस अवधिमा २८ हजार ५ सय ४१ जना नयाँ सङ्क्रमित थपिएको तथ्यांक आएको छ । यहाँ ६ सय ३६ जनाको मृत्यु भएको छ ।
लमजुङ । पहाडी जिल्ला लमजुङमा कोरोना सङ्क्रमण र निषेधाज्ञाका बीच भूकम्पले त्रसित बनाएको छ । यहाँ पछिल्लो २४ घण्टामा सानाठूला गरी ८६ पटक भूकम्पको धक्का महसुस गरिएको राष्ट्रिय भूकम्प मापन तथा अनुसन्धान केन्द्रले जनाएको छ ।
राससका अनुसार जिल्लाको मर्स्यांदी गाउँपालिकास्थित भुलभुले केन्द्रविन्दु बनाएर बुधबार बिहान ५ बजेर ४२ मिनेटमा ५ दशमलव ८ रिक्टर स्केलको भूकम्प गएयता बिहीबार बिहान ५ बजेर ५१ मिनेटसम्मको अवधिमा उक्त संख्यामा धक्का महसुस गरिएको छ । यस अवधिमा चार रेक्टरभन्दा माथिका ६ वटा र सो भन्दा कम रेक्टरका ८२ वटा भूकम्प गएको छ ।
चारभन्दा माथि बुधबार बिहान ५ बजेर ४२ मिनेटमा ५ दशमलव ८, ८ बजेर १६ मिनेटमा ४, ८ बजेर १७ मिनेटमा ४ दशमलव १, ८ बजेर २६ बजेटमा ५ दशमलव ३, बुधबार राति ९ बजेर २३ मिनेटमा ४ र १० बजेर ३९ मिनेटमा ४ दशमलव ५ रिक्टर स्केलको भूकम्प गएको उक्त केन्द्रले जनाएको छ।
केन्द्रका अनुसार आज बिहान ५ बजेर ५१ मिनेटमा ३ दशमलव २ रिक्टर स्केलको भूकम्प गएको छ। बुधबारको भूकम्पले जिल्लामा छ जना घाइते भएको खबर छ । २०० घरमा क्षति पुगेको छ ।
काठमाडौं । राष्ट्रियसभा उपनिर्वाचन आज हुँदैछ । वागमती प्रदेशमा आज हुने उपनिर्वाचनमा दुबै उमेदवार नेकपा एमालेबाट उठेका छन् । वागमती प्रदेशको अन्य समूहतर्फ रिक्त एक पदका लागि आज उपनिर्वाचनको कार्यक्रम छ । उपनिर्वाचनमा सत्तारुढ एमालेको तर्फबाट गृहमन्त्री रामबहादुर थापा (बादल) र विपक्षी गठबन्धनको तर्फबाट एमाले माधव नेपाल समूहका खिमलाल देवकोटा प्रतिस्पर्धामा छन् ।
उनीहरुलाई नेमकिपाका कृष्णबहादुर तामाङले चूनौति दिँदैछन् । देवकोटा र बादल दुबै एमाले भएकाले एमालेको एकता प्रक्रियाका लागि समेत यो महत्वपूर्ण निर्वाचन मानिएको छ । बादल सूर्य निर्वाचन चिह्नबाट चुनाव लड्दैछन् । यो एमालेको चिन्ह हो देवकोटाले भने कलम चुनाव चिह्नबाट निर्वाचन लड्दैछन् ।
देवकोटालाई कांग्रेस, माओवादी केन्द्र, जसपा र एमालेको माधव नेपाल समूहले समर्थन गरेका छन् । उपनिर्वाचनमा प्रदेशसभा सदस्य र स्थानीय तहका प्रमुख र उपप्रमुखले मतदान गर्नेछन् । मकवानपुरको हेटौंडास्थित भुटनदेवी मावि निर्वाचन केन्द्रमा बिहान ९ बजेदेखि अपरान्ह ३ बजेसम्म मतदानको समय निर्धारण गरिएको छ ।
काठमाडौं । कोरोना भाइरसको संक्रमणबाट महानगरीय प्रहरी परिसर काठमाडौंमा कार्यरत डीएसपी राजकुमार केसीको निधन भएको छ । कोरोनाबाट प्रहरी संगठनमा ज्यान गुमाउने उनी बहालवाला सबैभन्दा उच्च अधिकारी हुन् ।
बिहीबार बिहान नेपाल प्रहरी अस्पतालमा उपचारको क्रममा उनको निधन भएको नेपाली संचारमाध्यमले नेपाल प्रहरी प्रधान कार्यालय स्रोतलाई उदृत गर्दै जनाएका छन् । मुलपानी स्थायी घर भएका उनी दुई साता अघि संक्रमित भई अस्पताल भर्ना भएका थिए । बढ्दो महामारीले नेपालमा ज्यान जाने क्रम ह्वात्तै बढेको छ ।
काठमाडौं । सरकारले देशका विभिन्न स्थानमा रहेका ३० वटा निजी अस्पताल तथा मेडिकल कलेजलाई कोरोना अस्पतालका रुपमा वर्गिकरण गरि तोकेको छ । यी अस्पतालमा विपन्न नागरिकले कोरोना संक्रमित पछि निःशुल्क उपचार गर्न सक्ने छन् । स्वास्थ्य तथा जनसंख्या मन्त्रालयले ३० वटा निजी अस्पताल तथा मेडिकल कलेजहरुसँग विपन्न नागरिक कोरोना संक्रमितको निःशुल्क उपचारका लागि सम्झौता गरेको हो ।
ती अस्पतालहरुमा उपचारका लागि पुग्ने कोरोना संक्रमितले आफैंले शुल्क तिर्न नसक्ने भएमा बिरामीको उपचार बापतको खर्च स्वास्थ्य मन्त्रालयले बेहोर्ने भएको हो । आइसोलेसनमा प्रतिदिन प्रतिव्यक्ति ३५ सय, मध्यम जटिल केशका बिरामीको उपचारका लागि ७ हजार र आईसीयू तथा भेन्टिलेटरमा उपचारका गर्नेलाई १५ हजारका दरले सोधभर्ना बापत अस्पताललाई मन्त्रालयले दिने समेत सम्झौता भएको छ ।
मन्त्रालयसँग सम्झौता गरेका ३० अस्पतालहरुले संक्रमितको उपचारको खर्च विवरण स्वास्थ्य मन्त्रालयलाई बुझाउनुपर्ने हुन्छ । सरकारी अस्पताल तथा केही मेडिकल कलेजहरुमा यसअघि नै कोरोना संक्रमितको निःशूल्क उपचार हुँदै आएको छ।
काठमाडौं । कोरोना भाइरस महामारीसँग जुध्न मित्रराष्ट्र स्पेनले नेपाललाई स्वास्थ्य सामग्री पठाउने भएको छ । बिहीबार एक चार्टर्ड विमान काठमाडौं आउँदैछ । परराष्ट्र मन्त्रालयका अनुसार भेन्टिलेर, अक्सिजन कन्सन्ट्रेटर, पीपीईलगायत स्वास्थ्य सामग्री स्पेनले नेपाल पठाउन लागेको हो ।
बुधबार परराष्ट्रमन्त्री प्रदीपकुमार ज्ञवाली र स्पेनका विदेशमन्त्री अराँचा गोन्जलेज लयबीच टेलिफोन वार्ता भएको छ । कुराकानीका अवसरमा ज्ञवालीले गोन्जलेजलाई सहयोगका लागि धन्यवाद दिएका थिए ।
मन्त्रालयका अनुसार टेलिफोन कुराकानीमा दुई देशको समग्र सम्बन्ध र सहकार्यको विषयमा कुराकानी भएको छ । बिहीबार नै उक्त जहाजले नेपालमा रहेका स्पेनिस नागरिकलाई घर लैजाने छ । नेपाल भ्रमणमा आएर यतै रोकिएका स्पेनका नागरिक फर्कने छन् ।
काठमाडौं । चिनियाँ खोप भेरोसिल खोपको पहिलो मात्रा लगाएर गाउँ गएका नागरिकले दोस्रो डोजका लागि आफ्नो विवरण स्थानीय तहको स्वास्थ्य शाखामा टिपाउनु पर्ने भएको छ । स्वास्थ्य तथा जनसंख्या मन्त्रालयले खोप लगाउन पास माग्दै नआउन र स्थानीय तहमा पुगेर नाम टिपाउन आह्वान गरेको छ । अहिले कोरोना भाइरसविरुद्धको चिनियाँ खोपको दोस्रो डोज उपत्यकाका धमाधम लगाइरहेको छ ।
तर, निषेधाज्ञाका कारण उपत्यकाभन्दा बाहिर रहेका मानिसहरु भने खोपबाट बन्चित भएका छन् । सरकारले उनीहरुलाई काठमाडौं नआउन र सम्बन्धित स्थानीय तहमै खोप पुर्याउने व्यवस्थाका लागि पहल थालेको हो ।
मन्त्रालयले बुधबार सूचना जारी गरी भेरोसेल खोपको पहिलो मात्रा लगाएर उपत्यका बाहिर गएकाहरुले स्थानीय तहका स्वास्थ्य संयोजकमार्फत जिल्ला स्वास्थ्य कार्यालयमा विवरण टिपाउन आग्रह गरेको छ ।
मन्त्रालयले त्यसरी संकलन गरिएको लगत स्वास्थ्य सेवा विभागमा पठाउन पनि सम्बन्धित जिल्ला स्वास्थ्य कार्यालयलाई निर्देशन दिएको छ । खोप लगाउनुपर्ने व्यक्तिको लगत प्राप्त भएपछि प्रदेशको समन्वयमा खोप लगाउने मिति र स्थान तोकिने भएको मन्त्रालयको सूचनामा उल्लेख छ ।
मन्त्रालयले खोप लगाउनुपर्नेलाई निषेधाज्ञाको समयमा पनि आवतजावतको व्यवस्था मिलाइदिन जिल्ला प्रशासन कार्यालयहरुलाई आग्रह गरेको छ
काठमाडौं । नेपालमा पछिल्लो २४ घण्टामा थप ८१७३ जनामा कोरोना संक्रमण पुष्टी भएको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभरका विभिन्न प्रयोगशालामा गरिएको ८ हजार ६४ पिसिआर विधिबाट र १०९ जना एन्टीजेन विधिबाट संक्रमित पुष्टि भएका हुन्।
त्यस्तै पछिल्लो २४ घण्टामा कोरोना भाइरस संक्रमणमुक्त हुनेको संख्या ७, ९८९ रहेको छ ।
काठमाडौं । कोरोना भाइरसको महामारीबाट नेपालमा पछिल्लो २४ घण्टामा अहिलेसम्मकै सर्वाधिक मानवीय क्षति भएको छ ।
स्वास्थ्य तथा जनसंख्या मन्त्रालयले सार्वजनिक गरेको विवरण अनुसार २४ घण्टामा उक्त संख्यामा मानिसको ज्यान गएको हो । यो एकै दिन भएको सबैभन्दा धेरै मृत्यु हो । मन्त्रालयका अनुसार अब नेपालमा मृत्यु हुने मानिसको संख्या ५ हजार भन्दा माथि पुगेको छ । नेपालमा कोरोनाबाट ५६५७ जना मानिसको ज्यान गएको छ ।
काठमाडौं । सेयर बजारमा करेक्शन आएको छ । गत सोमबारदेखि निरन्तर उकालो लागेको बजार ७ कारोबार दिन पछि करेक्शन हो ।
यससाताको ३ दिनमा करिब १०९ अंकले बढेको बजारमा आज दोहोरो अंकको करेक्शन आएको हो । सूचकमा गिरावट आए पनि कारोबार रकममा भने ऐतिहासिक रेकर्ड बनेको छ ।
आज एकैदिन करिब ११ अर्ब ९५ करोडको कारोबार हुँदै कारोबार रकमले नयाँ इतिहास रचेको छ । यो नेपाली सेयर बजार इतिहासमै सबैभन्दा धेरै हो । यसअघि हिजो सर्वाधिक ११ अर्ब ३५ करोड रुपैयाँको कारोबार भएको थियो ।
यस्तै, आज सर्वाधिक २ करोड ५१ लाख कित्ता सेयर कारोबार हुँदै नयाँ रेकर्ड बनेको छ । यो इतिहासमै एकैदिन भएको सबैभन्दा धेरै कित्ता कारोबार हो । यसअघि हिजो २ करोड ३१ लाख ३१ हजार ६१५ कित्ता सेयर किनबेच भएको थियो ।
आज सेयर बजार मापक सूचक नेप्से १३.०९ अंकले घटेर २७८०.८१ विन्दुमा आइपुगेको छ । नेपाल स्टक एक्सचेन्जका अनुसार आज २१४ कम्पनीको ११ अर्ब ९५ करोड ८० लाख ९७ हजार ४११ रुपैयाँ बराबरको २ करोड ५१ लाख २१ हजार ५५४ कित्ता सेयर किनबेच भएका छन् ।
आज कारोबारमा आएका १३ वटा समूहमध्ये ५ समूहको परिसूचकमा हरियाली छाएको छ भने ८ समूहको परिसूचक राताम्मे भएका छन् ।व्यापार समूहको परिसूचक सबैभन्दा धेरै ३५.७२ अंकले बढेको छ भने निर्जीवन बीमा समूह १५७.५४ अंकले घटेको छ ।
आज कारोबारमा आएका २१४ कम्पनीमध्ये ८० कम्पनीको सेयर मूल्य बढेको छ भने १२८ कम्पनीको मूल्यमा गिरावट आएको छ । ६ कम्पनीको मूल्य स्थिर रहेको छ ।
आज नेपाल पुनर्बीमा कम्पनीको सर्वाधिक कारोबार भएको छ । यसको ५५ करोड ६९ लाख रुपैयाँ बढीको कारोबार भएको छ । कारोबार रकमकै आधारमा नेशनल लाइफ इन्स्योरेन्स ४५ करोड र नेशनल हाइड्रोपावर ३० करोडको कारोबार सहित शीर्ष तीनमा रहे ।
दोहोरो अंकले घटेको बजारमा पनि आज ५ कम्पनीको सेयर मूल्यमा पोजेटिभ सर्किट लागेको छ । समता घरेलु लघुवित्त, रुरु जलविद्युत्, गोर्खाज फाइनान्स, नेपाल फाइनान्स र कर्णाली डेभलपमेन्ट बैंकका सेयरधनीले करिब १० प्रतिशत कमाएका छन् ।
काठमाडौं । कोरोना भाइरस संक्रमणविरुद्धको कोभिशिल्ड खोप उत्पादन गरिरहेको भारतीय खोप उत्पादक कम्पनी सेरम इन्स्टिच्युटले तत्काल खोप निर्यात गर्न नसक्ने जनाएको छ । कम्पनीले एक विज्ञप्ति जारी गर्दै भारतको खोप अभियानलाई प्राथमिकतामा राखेकाले तत्काल अन्य देशमा खोप निर्यात नगर्ने स्पष्ट पारेको हो ।
‘हामीले खोप उत्पादन क्षमता वृद्धि गर्दै भारतलाई प्राथमिकतामा राख्नेछौं,’ सिरमका प्रमुख कार्यकारी अधिकृत अदार पुनावालाले बिज्ञप्ति जारी गर्दै भनेका छन्, ‘यो वर्षको अन्त्यसम्ममा कोभ्याक्स र अन्य मुलुकलाई खोप उपलब्ध गराउन सक्ने अपेक्षा गरेका छौं ।’
आफ्नो देशका नागरिकको जीवनलाई जोखिममा राखेर कोभिड–१९ विरुद्धको खोप निर्यात गरिएको भन्दै विरोध भएपछि सेरमले विज्ञप्ति नै निकालेर यस्तो बताएको हो । खोप खरिदका लागि रकम बुझाइसकेका देशको विषयमा सेरमले प्रष्ट रुपमा उल्लेख गरेको छैन् ।
भारत सरकारले अहिले खोप निर्यातमा रोक लगाएको छ । कम्पनीले सन् २०२१ को अन्त्यसम्ममा मात्रै अन्य देशमा खोप निर्यात गर्न सकिने बताएको छ । यो संगै नेपालको खोप अभियान प्रभावित हुने भएको छ ।
नेपालले सेरमबाट २० लाख डोज खोप खरीदका लागि रकम बुझाए पनि १० लाख डोज खोप अझै आउन सकेको छैन । कोरोना भाइरसको संक्रमणबाट जोगिने एकमात्र उपाय भनेको खोप नै हो भनेर विज्ञहरुले भनिरहेका छन् । तर, नेपालको ठूलो जनसंख्या खोपबाट बन्चित रहेको छ । यता पहिलो डोज कोभिशिल्ड खोप लगाएका ज्येष्ठ नागरिकहरुले दोस्रो डोज कहिले पाउने भन्ने पनि निश्चित छैन ।
गत फागुन २३ गते प्रधानमन्त्री केपी शर्मा ओलीले खोप लगाएर ज्येष्ठ नागरिकका लागि खोप अभियान सुरु भएको थियो । यो अभियानमा हिमाली जिल्लाको ५५ वर्ष भन्दा माथिकालाई र बाँकी जिल्लाका ६५ वर्ष भन्दा माथिकालाई लगाइएको थियो ।
पहिलो डोज लगाएको ८ देखी १२ हप्ता सम्म खोपको प्रभावकारिता रहने विज्ञहरुले बताइरहदा त्यसबेला पहिलो डोज लगाएकाहरुको दोस्रो डोज लगाउन समय घर्किन थालेको छ । ज्येष्ठ नागरिकलाई भारतीय कम्पनी सेरम इन्ष्टिच्युटले उत्पादन गरेको कोभिशिल्ड खोप दिइएको थियो । सेरमको विज्ञप्तिसंगै नेपालको खोप अभियानमा अन्यौलता देखिएको छ ।
काठमाडौं । नेकपा एमालेका अध्यक्ष एवं प्रधानमन्त्री केपी शर्मा ओलीले बागमती प्रदेशबाट राष्ट्रियसभाका उम्मेद्वार गृहमन्त्री रामबहादुर थापा बादललाई जिताउन अपिल गरेका छन् ।
बुधबार एक विज्ञप्ति जारी गर्दै प्रधानमन्त्री ओलीले जेठ ६ गते हुने राष्ट्रियसभाको उपनिर्वाचनमा बादललाई जिताउन अपिल गरेका हुन् । उनले सर्वोच्च अदालतको फागुन २३ को निर्णयपछि नेकपा एमालेको विशेष महत्व राख्ने भन्दै बादललाई जिताउन सबैलाई अपिल गरेका हुन् ।
‘एकताबद्ध सङ्कल्प र सफलताले पार्टी एकतालाई नयाँ उचाइमा पुर्याउने भएकाले बादललाई सूर्य चिन्हमा मतदान गरी अत्यधिक मतले विजयी बनाउन आह्वान गर्दछु,’ उनले भनेका छन्, ‘गत फागुन २३ गते एमाले पुनःस्थापना भएपछि हुन गइरहेको यस निर्वाचनको विशेष महत्व छ । यसले हाम्रो पार्टीको सामथ्र्य, उकता र एकता र अनुशासनलाई त स्थापित गर्ने नै छ । सँगसँगै २०७५ जेठ ३ गते एकीकरण भएको तर, कतिपय नेताका अवसरवादी एवं विभाजनकारी व्यवहारका कारण भंग नेकपाको विरासत पनि यसै पार्टीले बोक्छ र यो नै वामपन्थी तथा लोकतान्त्रिक आन्दोलनको मूलप्रवाह हो भन्ने पुष्टि पनि गर्नेछ ।’
प्रधानमन्त्री ओलीले पार्टीको आधिकारिक उम्मेदवारविरुद्ध उम्मेदवारी दिनु, लाखौं जनताको हृदयमा रहेको निर्वाचन चिन्हलाई अवमूल्यन गर्नु र पार्टी निर्णयको विपक्षमा उभिएर मत खसाउने विषय कल्पना बाहिरको कुरा भएको बताएका छन् ।
‘पार्टीको आधिकारिक उम्मेदवारविरुद्ध उम्मेदवारी दिनु, लाखौं जनताको हृदयमा रहेको निर्वाचन चिन्हलाई अवमूल्यन गर्नु र पार्टी निर्णयको विपक्षमा उभिएर मत खसाउने विषय हाम्रो जस्तो पार्टीमा त कल्पना बाहिरको कुरा हो,’ उनले भनेका छन्, ‘यस्ता प्रवृत्ति बहुदलीय शासन प्रणाली अवलम्बन गर्ने कुनै पनि पार्टीका लागि समेत स्वीकार्य या क्षम्य हुनै सक्दैन ।’
काठमाडौं । सगरमाथा आरोहणको सिजन जारी रहेका कारण अहिले करीव १२ सय आरोही तथा सहयोगी सगरमाथा क्षेत्रमा रहेका छन् । यसमध्ये २ सय हाराहारी आरोही क्याम्प २ मा रहेका छन् । उनीहरु अहिले आरोहणका लागि उपयुक्त मौसमको पर्खाइमा थिए । आधार शिविरमा रहेका सम्पर्क अधिकृत ज्ञानेन्द्र श्रेष्ठका अनुसार सबै आरोही उपयुक्त मौसम कुरेर बसेका छन् ।
तर, अरब सागरमा आएको ताउ ते आँधीका कारण भने आरोहीमा अन्यौल छाएको छ । यसले त्रास समेत उत्पन्न भएको छ । अन्तर्राष्ट्रिय मौसम सम्बन्धी जानकारी गराउने एजेन्सीहरुले २० मेबाट मौसम सफा हुने प्रक्षेपण गरेका थिए । सोहीकारण क्याम्प २ सम्म पुगेका आरोहीमा अन्यौल छाएको हो । जल तथा मौसम विज्ञान विभागले शुक्रबारसम्म मौसम प्रतिकुल हुने बताएको छ ।
सोहीकारण अझै एक दुई दिनको मौसम पर्ख र हेरकै रणनीतिमा रहने र त्यसपछि आरोही चुचुरोतर्फ लाग्ने उनले जानकारी दिए । यो सिजनमा सगरमाथा आरोहणमा ४ सय भन्दा बढीले अनुमति लिएा छन् । उनीहरुको सहयोगीका रुपमा करीव तेब्बर शेर्पाहरु खटिएका हुन्छन् । यसअघि अघिल्लो साता करीव १ सय ५० हाराहारी आरोही चुचुरो पुगेर फर्किसकेका छन् । त्यसमध्ये दई जनाको ज्यान गएको छ ।
नवलपरासी । नवलपरासी पश्चिमस्थित दाउन्नेमा यात्रुबाहक बस दुर्घटनामा कम्तिमा चार जनाको मृत्यु भएको छ । काठमाडौंबाट रुकुम पश्चिमको लागि छुटेको ना ५ ख २७१३ नम्बरको बस दाउन्नेको जंगलमा खुर्सानीखोलाबाट दुर्घटनामा पर्दा चार जनाको घटनास्थलमै ज्यान गएको प्रहरीलाई उदृत गर्दै संचारमाध्यमले जनाएका छन् ।
अहिले उद्धार कार्य जारी रहेका कारण थप क्षतिको विवरण आउने प्रहरीले जनाएको छ । नवलपरासी पश्चिम प्रहरी कार्यालयका अनुसार रुकुम पश्चिमको त्रिवेणी गाउँपालिकाकी कल्पना पुनको मात्रै परिचय खुलेको छ । घाइतेलाई विभिन्न अस्पताल पठाइएको छ । दुघर्टनामा घाइते भए पनि बस चालक भाग्दाभाग्दै पक्राउ परेका छन् । निषेधाज्ञाको समयमा बसमा भरिभराउ यात्रु कसरी बसले बोक्यो भन्ने समेत नखुलेको प्रहरीको भनाई छ ।
लमजुङ । बुधबार बिहानै आएको भूकम्पले लमजुङमा कच्चि घरहरु भत्किएका छन् । जिल्ला प्रहरी कार्यालयका अनुसार क्षतिको विवरण आइसकेको छैन । यद्दपी जिल्लाका विभिन्न स्थानमा कच्चि घर भत्किएका छन् । केही मानिस घाइते भएको खबर छ । भुलभुलेमा ८५ वर्षीया वृद्धा घाइते भएको स्थानीय संचारमाध्यमले जनाएका छन् । उनको उपचार जारी छ ।
आज बिहान लमजुङको भुलभुलेलाई केन्द्र बनाएर ५ बजेर ४२ मिनेटमा ५.८ म्याग्निच्युडको भूकम्प गएको हो । राष्ट्रिय भूकम्प मापन तथा अनुसन्धान केन्द्रका अनुसार यो स्तर ठूलो भूकम्पका रुपमा मापन गरिन्छ । आज भूकम्प गएसँगै लमजुङ र यस आसपासमा मानिसहरु घरबाट बाहिर निस्किएका छन् ।
काठमाडौं । नेपालमा लमजुङ केन्द्र भएर बुधबार बिहानै ठूलो भूकम्प गएको छ । यो भूकम्पको तिब्रता ५.८ म्याग्नेच्युट मापन भएको छ । राष्ट्रिय भूकम्प मापन केन्द्रका अनुसार बिहान ५ बजेर ४२ मिनेटमा भूकम्प गएको हो । यसको धक्का राजधानी काठमाडौंसम्म महसुस भएको छ ।
लमजुङको भुलभुले केन्द्र भएर भूकम्पको क्षति बारे विवरण भने आइसकेको छैन । कोरोना महामारीका कारण घर भित्र थुनिएका मानिस भूकम्पपछि झन तर्सित बनेका छन् ।