काठमाडौं । पछिल्लो २४ घण्टामा २३५१ जनामा कोरोना भाइरस संक्रमण पुष्टि भएको छ ।
स्वास्थ्य तथा जनसंख्या मन्त्रालयको अनुसार पछिल्लो २४ घण्टामा विभिन्न प्रयोगशालामा गरिएको ८ हजार ८८४ जनाको पीसीआर परीक्षणबाट २२२० जना र ८०३ एन्टिजेन परीक्षणबाट १३१ जनाको रिपोर्ट पोजेटिभ आएको हो ।
जसमध्ये १ हजार ५१ जना काठमाडौं उपत्यकाका छन् । काठमाडौंका ७८६, ललितपुरका १८१ र भक्तपुरका ८४ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
काठमाडौं । भारतको महाराष्ट्र राज्य नासिकको एक अस्पतालमा अक्सिजन लिक हुँदा ११ जनाको मृत्यु भएको छ।
अस्पतालमा १५० जना बिरामी उपचाररत थिए। तीमध्ये २३ जना भेन्टिलेटरमा उपचार गराइरहेको भारतीय सञ्चारमाध्यमले जनाएका छन्।
ट्यांकरबाट अक्सिजन भर्ने बेलामा लिक भएको समाचारमा जनाइएको छ।
काठमाडौं । सर्वोच्च अदालतले अख्तियार दुरुपयोग अनुसन्धान आयोगलाई ‘स्टिङ अपरेसन’’ नगर्न आदेश दिएको छ ।
प्रधानन्यायाधीश चोलेन्द्रशमशेर राणासहित न्यायाधीशहरू दीपककुमार कार्की, मीरा खड्का, हरिकृष्ण कार्की र ईश्वरप्रसाद खतिवडा रहेको संवैधानिक इजलासले बुधबार उक्त आदेश दिएको हो ।
अख्तियार दुरुपयोग अनुसन्धान आयोगले सरकारी कार्यालयमा घुस रकमसहित पक्राउ गर्न स्टिङ अपरेसन गर्दै आएको थियो ।
अधिवक्ता विष्णु्प्रसाद घिमिरेले २०७४ पुस २ गते अख्तियारको स्टिङ अपरेशन रोक्न माग गर्दै सार्वजनिक सरोकारको रिट निवेदन दायर गरेका थिए। उक्त रिटमा २०७४ पुस ७ गते पहिलो सुनुवाई भएको थियो।
‘फौजदारी न्यायका मान्य सिद्धान्त कानुनको उचित प्रक्रिया तथा प्रमाण संकलनसम्बन्धी न्यायिक मान्यताका दृष्टिलेसमेत मनासिब र तार्किक देखिएन । अनुसन्धान अधिकारीलाई स्वेच्छाचारी तबरबाट कार्य गर्न प्रोत्साहित गर्ने प्रकृतिको समेत देखियो’ अदालतको आदेशमा भनिएको छ ।
अख्तियारले २०५९ पछि नियमावलीका आधारमा सरकारी कार्यालयमा घूस न्यूनीकरणअन्तर्गत ‘स्टिङ अपरेसन’ चलाउँदै भ्रष्टाचार मुद्दा लगाउँदै आएको थियो ।संवैधानिक इजलासले रिट जारी गरेसँगै चार सय बढी भ्रष्टाचार मुद्दा प्रभावित हुनेछ । ‘स्टिङ अपरेसन’मै परेका केही सरकारी कर्मचारीले आत्महत्याको बाटोसमेत रोजेका थिए ।
अधिवक्ता विष्णुप्रसाद घिमिरेले २०७४ मा ‘स्टिङ अपरेसन’ संविधान र प्रचलित कानुनसँगै बाँझिएको जिकीरसहित रिट निवेदन दर्ता गराएका थिए । रिट निवेदकका पक्षबाट बहसमा संलग्न अधिवक्ता ललितबहादुर बस्नेतले भने, ‘अख्तियार आफैँले पैसा दिंदै ‘स्टिङ अपरेसन’ गर्न मिल्दैनथ्यो । यो सरासर गैरसंवैधानिक र गैरकानुनी कार्य थियो । अब अदालतबाट रिट जारी भएपछि अख्तियारले यो काम गर्न पाउँदैन ।’
काठमाडौं । आज चैत्र शुक्ल नवमी, हिन्दु धर्मावलम्बीले मर्यादा पुरुषोत्तम भगवान् रामचन्द्र पूजा आरधना गरी मनाउँदैछन् । ‘रामनवमी’का नाममा परिचित यो पर्व देशभरका राम मन्दिरमा श्रद्धापूर्वक पूजा गरि मनाइन्छ । असत्यमाथि सत्यको विजय तथा भगवान् श्रीरामको सम्झनामा मनाइने रामनवमी पर्वका उपलक्ष्यमा भगवान् रामचन्द्रका मन्दिरमा पूजापाठ गरिन्छ ।
जनकपुरस्थित रामजानकीको मन्दिरमा मेला भर्न नेपाल तथा भारतबाट ठूलो संख्यामा मानिसहरुको घुइँचो लाग्छ । त्रेतायुगमा आजकै दिन अयोध्यामा राजा दशरथ र रानी कौशल्यावतीको सुपुत्रका रुपमा विष्णुको अवतार लिएर भगवान् रामको जन्म भएको किंवदन्ती रहेको छ ।
सोही दिनको सम्झनामा नदी, ताल तथा कुण्डमा स्नान गरी व्रत बस्ने र भगवानको पूजाआजा गरिन्छ । आजै चितवनको चितवनको माडीस्थित अयोध्यापुरीमा प्रधानमन्त्री केपी शर्मा ओलीले बनाउन लगाएका सीतारामको मूर्ति प्रतिस्थापन गर्ने कार्यक्रम रहेको छ । प्रतिस्थापन गर्न मूर्ति रथयात्रासहित मंगलबार काठमाडौंबाट लगिएको हो । यी मूर्ति वालुवाटारमै बनाउन लगाइएको हो । यो क्षेत्र माओवादी केन्द्रका अध्यक्ष प्रचण्डको निर्वाचन क्षेत्र हो ।
मिनिआपुलिस । अमेरिकाको मिनिआपुलिसको सडकमा भएको अफ्रिकी-अमेरिकी जोर्ज फ्लोइडको हत्यामा घाटी थिच्ने प्रहरी अधिकारी दोषि ठहर भएका छन् । अमेरिकाको एक जुरीले गत वर्ष भएको यो घटनामा उनलाई दोषि हठर गरेको बीबीसीले लेखेको छ ।
गत वर्षको मे महिनामा फ्लोइडको गिरफ्तारीका बेला ४५ वर्षीय श्वेत जातिका प्रहरी अधिकारी डेरेक शोभिनले नौ मिनेटभन्दा बढी समयसम्म घुँडाले उनको घाँटी थिचेको दृश्य छायाङ्कन गरिएको थियो। यो भिडियो विश्वव्यापी रुपमा भाइरल समेत भएको थियो । यसमा जातिवाद र प्रहरीद्वारा अधिक बल प्रयोग भएको भन्दै प्रहरीविरुद्ध विश्वव्यापी प्रदर्शन समेत भएको थियो ।
बीबीसीका अनुसार शोभिनलाई तीनवटा अभियोगमा दोषी ठहर भएका छन् । जसमा सेकेन्ड डिग्री हत्या, थर्ड डिग्री हत्या र आशय बिनाको गैरकानुनी हत्या रहेको छ । सेकेण्ड डिग्रीमा हत्याको आशय हुनुपर्छ तर त्यो पूर्वनियोजित हुँदैन । थर्ड डिग्री हत्यामा प्रतिवादीले पीडितलाई मार्न खोजेको भन्ने प्रमाण आवश्यक पर्दैन। त्यहाँ कारबाही खतरनाक भए पनि खासगरी ज्यान लिन खोजिएको हुँदैन।
जेल सजायको घोषणा नहुन्जेल अब शोभिन हिरासतमा रहनेछन् । उनीमाथि चार दशकभन्दा लामो समय जेल सजाय हुन सक्ने बताइएको छ । निर्णयपछि अदालतबाहिर मानिसहरुले खुसी मनाएका छन् ।
काठमाडौं । मानिसहरुले आफुले लगाएको मास्क जथाभाजी फ्याँक्न थालेपछि सरकारले कडाई गरेको छ । सरकारले स्थानीय प्रशासनमार्फत स्वास्थ्य सुरक्षा मापदण्ड पालनामा विशेष निगरानी थालेको राससले लेखेको छ । यसअघि सडकमा यत्रतत्र मास्क अब पाँच दिनसम्म सुरक्षित राख्नु पर्ने भएको छ । साथै त्यसरी मास्क सडकमा फ्याँक्नेमाथि कारवाही समेत गर्ने स्थानीय प्रशासनको तयारी रहेको छ ।
खासगरी यातायातका साधन सञ्चालनमा थप कडाइका साथै प्रयोग गरेका मास्कलगायत सामग्री विसर्जनमा ध्यान दिन जिल्ला प्रशासन कार्यालयले अनुरोध गरेको छ । विसर्जन गर्नुपर्ने मास्क बन्द डस्टविन वा प्लाष्टिकको झोलामा बन्द गरी सुरक्षित साथ पाँच दिन अनिवार्यरूपमा सुरक्षित साथ राख्नुपर्ने छ । त्यसपछि मात्रै विसर्जन गर्नुपर्ने छ ।
अटेर गरेमा कारवाही हुने प्रशासनको चेतावनी छ । घर तथा सार्वजनिक स्थानमा जथाभावी नथुक्न र प्रयोग गरेको मास्क जथाभावी नफ्याँक्न पनि भनिएको हो । सरकारले दिएको आदेश नमान्नेलाई सङ्क्रामक रोग ऐन २०२० अनुसार कारवाही गरिने काठमाडौँका प्रमुख जिल्ला अधिकारी कालीप्रसाद पराजुलीले जानकारी दिएका छन् ।
काठमाडौं । विदेश जाँदा आवश्यक पर्ने प्रहरी प्रतिवेदन लिन अब नेपाली नागरिकले कन्सुलर सेवा विभाग धाउनु नपर्ने भएको छ । विभागका अनुसार प्रहरी प्रतिवेदनलाई सम्बन्धित व्यक्ति आफैले रंगीन स्वरुपमा प्रिण्ट गरी काठमाडौंस्थित दूताबासहरुमा पेश गर्न सक्ने भएका छन् ।
‘नेपाल प्रहरीमार्फत् जारी हुने प्रतिवेदनलाई निवेदक स्वयंले अनलाइनबाटै रंगीन प्रिण्ट गरी काठमाडौंस्थित विदेशी नियोगहरुमा यस विभागको प्रमाणीकरण विनै पेश गर्न सक्ने छन्’, विभागद्धारा जारी विज्ञप्तीमा भनिएको छ ।
यसबारे विभागले अघिल्लो मे ३१ मै विदेशी नियोगहरुलाई जानकारी गराएको थियो । यता, विदेशमा रहेका नेपालीले पनि अनलाइनकै प्रतिवेदन सम्बन्धित मुलुकका संस्थामा पेश गर्न सक्ने र ति संस्थाले अनलाइनमै त्यस्ता रिपोर्टको आधिकारिकता बुझ्न सक्ने बताइएको छ ।
कोरोनाभाइरस महामारीका कारण यस्तो व्यवस्था गरेको विभागको भनाइ छ ।
यसका साथै विभागले प्रमाणीकरणको समय बिहान ८ बजेदेखि बेलुका ५ बजेसम्म तोकेको छ । एक पटकमा २५ जनासम्मलाई मात्र सेवा दिइने पनि उसले बताएको छ ।
काठमाडौं । नेपालमा २७ वैशाखपछि कतारी रियाल नचल्ने भएको छ । नेपाल राष्ट्र बैंकले एक सूचना प्रकाशित गरी आफुसँग कतारी रियाल भएमा वैशाख २७ गते भित्र साटिसक्नु आह्वान गरेको छ । नेपालमा कतारी रियालको कारोबार बन्द हुने जनाएको छ । राष्ट्र बैंकका अनुसार कतारको केन्द्रीय बैंकले चलनचल्तीमा रहेका बैंक नोट विस्थापित गर्दैछ ।
आगामी असार १७ देखि कतारमा नयाँ नोट प्रकाशनमा ल्याउने भएको छ । सोहीकारण पुराना नोट नचल्ने निर्णय कतारको केन्द्रिय बैंकले गरेको छ । त्यस अवधिभन्दा अघि नै सटहीका लागि समयसीमा तोकिएको हो । वैदेशिक रोजगारीका लागि कतार गएका नेपालीले कतारी नोट ल्याएर राखेको हुन सक्ने भन्दै सटहीको लागि सूचना प्रकाशित गरिएको राष्ट्र बैंकले जनाएको छ ।
काठमाडौं\एजेन्सी । अफ्रिकी मुलुक चाडका राष्ट्रपति इड्रिस डेबीको हत्या भएको छ । चुनाव जितेको दोस्रो दिनमै उनको हत्या भएको हो । चाडको सेनाले ६८ वर्षीय डेबीको चाडको उत्तरी क्षेत्रमा मृत्यु भएको मंगलबार जानकारी गराएको छ । उनी सन् १९९०मा सत्तामा आएका थिए । छैटौं कार्यकालका लागि चुनाव जितेको घोषणा सोमबार भएको हो ।
चुनावी परिणामपछि डेबी उत्तरी चाडमा रहेका सेनालाई भेट्न उनी गएका थिए। लिबियाबाट आएका विद्रोहीहरूसँग झडप भइरहेको ठाउँमा उनी पुगेको र त्यहाँ उनको हत्या भएको आशंका छ । यद्दपी राष्ट्रपति डेबीको मृत्युको कारणबारे सेनाले भने स्पष्ट बोलेको छैन । राष्ट्रपतिको हत्या भएपछि सैनिक परिषदले त्यहाँ सरकार चलाउने समेत अन्तर्राष्ट्रिय संचारमाध्यमले जनाएका छन् ।
काठमाडौं । रुसी खोप स्पुतनिक भील नेपालमा आपतकालीन प्रयोग अनुमति प्राप्त गरेको छ । औषधि व्यवस्था विभागका अनुसार रुसी खोपलाई नेपालमा आपतकालीन प्रयोगको अनुमति दिइएको हो । नेपालमा यसअघि भारतको कोभिशिल्ड र चीनको भेरोसेल खोपले आपतकालीन प्रयोगको अनमुति पाएका छन् ।
यसमध्ये भारतीय र चिनियाँ खोपको भने प्रयोग भइसकेको छ । नेपालमा भारतले १० लाख खोप अनुदान र २० लाख खोप खरीद गरिएको छ । चीनबाट भने ८ लाख डोज खोप अनुदानमा आएको हो । रुसी खोप आपूर्ति भने निजी क्षेत्रमार्फत गर्ने तयारी रहेको छ ।
काठमाडौं । पछिल्लो २४ घण्टामा १७३६ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयको अनुसार पछिल्लो २४ घण्टामा विभिन्न प्रयोगशालामा गरिएको ८ हजार ५५ जनाको पीसीआर परीक्षणबाट १६६७ जना र ६८३ एन्टिजेन परीक्षणबाट ६९जनाको रिपोर्ट पोजेटिभ आएको हो ।
यससँगै हालसम्म संक्रमण पुष्टि हुनेको संख्या २ लाख ८७ हजार ५६७ जना पुगेको छ। स्वास्थ्य मन्त्रालयका अनुसार २५१ जना कोरोनालाई जितेर अस्पतालबाट डिस्चार्ज भएका छन् ।
यो सँगै नेपालमा निको हुनेको संख्या २ लाख ७५ हजार ८०६ जना पुगेको मन्त्रालयले जनाएको छ ।
संक्रिय संक्रमितको संख्या ८ हजार ६५९ जना रहेको छ । पछिल्लो २४ घण्टामा मृत्यु हुनेको संख्या ११ रहेको छ । नेपालमा कोरोनाबाट मृत्यु हुनेको संख्या ३१०२पुगेको छ ।
काठमाडौं । भारतको हरिद्वारमा आयोजित कुम्भ मेलामा सहभागी भएर आइतबार स्वदेश फर्किएका पूर्वराजा ज्ञानेन्द्र शाह दम्पतीलाई कोरोना भाइरस संक्रमण भएको छ ।
भारतको हरिद्वारमा आयोजित कुम्भ मेलामा स्नान गरेर स्वदेश फर्किएको केही दिनमै पूर्वराजा ज्ञानेन्द्र शाह र पूर्वरानी कोमल शाहलाई कोरोना संक्रमण देखिएको हो ।
काठमाडौं । शेयर बजार सामान्य अंकले बढेको छ । दुई दिनमा ७३ अंकले घटेको बजारमा मंगलबार न्यून अंकको सुधार आएको हो ।
मंलगबार बजार मापक सूचक नेप्से २।६८ अंकले बढेर २६६४।६१ विन्दुमा पुगेको छ । नेपाल स्टक एक्सचेन्जका अनुसार आज २१६ कम्पनीको ५ अर्ब ५३ करोड ८६ लाख १७ हजार ६४० रुपैयाँ बराबरको १ करोड २३ लाख ६९ हजार ५०१ कित्ता सेयर किनबेच भएका छन् ।
सोमबार कारोबारमा आएका १३ वटा समूहमध्ये ९ समूहको परिसूचकमा हरियाली छाएको छ भने ४ समूहको परिसूचक राताम्मे भएका छन् । जीवन बीमा समूहको परिसूचक सबैभन्दा धेरै ५३।९८ अंकले बढेको छ भने निर्जीवन बीमा समूह २४।५३ अंकले घटेको छ ।
आज कारोबारमा आएका २१६ कम्पनीमध्ये १२० कम्पनीको सेयर मूल्य बढेको छ भने ६७ कम्पनीको मूल्यमा गिरावट आएको छ । २७ कम्पनीको मूल्य स्थिर रहेको छ ।
आज नागरिक लगानी कोषको सर्वाधिक कारोबार भएको छ । यसको २१ करोड ४२ लाख रुपैयाँ बढीको कारोबार भएको छ । कारोबार रकमकै आधारमा नेपाल इन्फ्रास्ट्रक्चर बैंक १९ करोड र नबिल बैंक १५ करोडको कारोबार सहित शीर्ष तीनमा रहे ।
झिनो अंकले बढेको बजारमा आज ४ कम्पनीको सेयर मूल्यमा पोजेटिभ सर्किट लागेको छ । युनाइटेड मोदी हाइडोपावर, महिला लघुवित्त, ज्योति लाइफ इन्स्योरेन्स र हिमालयन ऊर्जा कम्पनीका सेयरधनीले १० प्रतिशत कमाएका छन् ।
काठमाडौं\एजेन्सी । अमेरिकी अन्तरिक्ष संस्था (नासा)ले पहिलो पटक मंगलग्रहमा हेलिकोप्टर उडाउन सफल भएको छ । वैज्ञानिकले पहिलो पटक एक ग्रहबाट नियन्त्रण गरी अर्को ग्रहमा हेलिकोप्टर उडाउन सफल भएका हुन् । नासाले पठाएको अन्तरिक्ष यान पर्सिभरेन्सले यो हेलिकप्टर लिएर गएको हो ।
सोमबार पहिलो पटक मंगल ग्रहमा हेलिकोप्टरले उडान गरेको छ । नासाका अनुसार इन्जेन्युटी नामको उक्त हेलिकप्टरले ३९ सेकेन्ड उडान भरेको छ । यो हेलिकोप्टर १० फिटसम्म उचाइमा पुगेको छ । उडान क्षेत्रबाट २ सय फिट पर रहेको पर्सिभरेन्सको क्यामेराले इन्जेन्युटीको उडानको भिडिओ कैद गरेको छ ।
१.८ किलोग्राम तौल भएको हेलिकप्टर फेब्रुअरी १८ मा मंगल ग्रहको सतहमा अवतरण भएको अन्तरिक्ष यान पर्सिभरेन्सको रोभरभित्र राखिएको थियो । अत्यन्तै चिसो भूमि रहेको मंगलग्रहमा उपकरणको रक्षा गर्दै हेलिकोप्टरको सफल उडान गर्नुलाई वैज्ञानिकहरुले ठूलो सफलता मानेका छन् । यो उडानले मंगलग्रहको अनुसन्धानमा एक कोशेढुंगा थपेको वैज्ञानिहरुको भनाई छ ।
काठमाडौं । नेपाली कांग्रेसले प्रत्येक नागरिकलाई कोरोनाविरूद्ध खोप उपलब्ध गराउन सरकारसँग माग गरेको छ। कांग्रेस केन्द्रीय कार्यसमितिको सोमबारको बैठकले कोरोनाबाट जनतालाई बचाउन विशेष कार्ययोजना तयार पारी सबै नागरिकसँग खोपको पहुँच पुर्याउन माग गरेको हो ।
जनताको जीवन रक्षका लागि विशेष कार्ययोजना आवश्यक रहेको निष्कर्षमा कांग्रेस पुगेको हो । कोरोनाविरूद्ध खोप विश्व बजारमा उपलब्ध भइसकेको भन्दै हरेक नागरिकलाई पुग्ने गरी खोप आपूर्ति गर्न समेत माग गरेको छ । अहिले नेपालमा हरेक दिन १ हजार भन्दा बढी संक्रमति देखिएका छन् । यसले जनस्वास्थ्यमा असर गरिरहेको छ ।
काठमाडौं । आज हिन्दु धर्मावलम्बी नेपालीले नेपाल तथा विदेशमा चैते दशैं पर्व मनाउँदैछन् । २०७८ सालमा कुल तीन वटा दशैं परेका छन् । त्यसमध्ये आज एउटा हो । बडा दशैं असोज र आगामी चैतमा चैते दशैं मनाइने छ । प्रत्येक वर्ष चैत्र शुक्ल अष्टमीका दिन नवदुर्गा भगवतीको पूजा गरी चैते दसैँ मनाउने गरिन्छ ।
गतवर्षको चैत देशैं भने तिथिका कारण वैशाखमा सरेको हो । चैते दसैँमा अष्टमी र नवमीलाई विशेष रुपमा मनाउने प्रचलन रहेको छ । अष्टमीको दिनलाई चैते दसैँ मानिन्छ । नवमीलाई त्रेता युगमा अयोध्याका राजा दशरथ र रानी कौशल्यावतीको ज्येष्ठ सुपुत्रका रुपमा श्रीरामको जन्म भएको दिनका रुपमा रामनवमीका रुपमा मनाइन्छ ।
काठमाडौं उपत्यकाका गुहृयेश्वरी, जगबागेश्वरी, मैतीदेवी, नक्साल भगवती, भद्रकाली, शोभा भगवती, कालिकास्थान, बज्रयोगिनी, इन्द्रायणी, बिजेश्वरी, सुन्दरीमाई, चामुण्डादेवीलगायत पीठमा चैते दसैँका अवसरमा पूजा गरिन्छ ।
उपत्यका बाहिरका पलाञ्चोक भगवती, चण्डेश्वरी, नाला भगवती, पाल्चोक भगवती, शैलेश्वरी, वागेश्वरी, गहवामाई, मनकामना, कालिकादेवीलगायत शक्तिपीठमा पनि चैत्र नवरात्रका अवसरमा विशेष पूजा गर्ने प्रचलन रहेको छ ।
हनुमानढोकाको दसैँघरमा चैतदशैंमा पनि घटस्थापना गरेर विधिवत् पूजा आराधनाका साथ अष्टमीका दिन बलि दिने प्रचलन रहेको छ । आज पूजा आराधनासहित वसन्तपुरमा ५४ बोका र ५४ राँगाको बलि दिइने छ ।
काठमाडौं । आजबाट काठमाडौंमा सेतो मच्छेन्द्रनाथको रथयात्रा शुरु हुँदैछ । रथयात्रा अवलोकन गर्न राष्ट्रपति विद्यादेवी भण्डारी जाने कार्यक्रम तय भएको छ । रथयात्राका लागि दिउँसो चार बजे केलटोलबाट देवताको खट दरबारमार्गस्थित तीनधारा पाठशालाअघि लगिने कार्यक्रम छ ।
रथयात्रा आज बेलुकी ६ बजे शुरु हुने छ । पहिलो दिन आज करिब ७ बजे रथ असनमा लगी राखिने भएको छ । असनमा आज राति राष्ट्रपति विद्यादेवी भण्डारीले रथको दर्शन गरी प्रसाद ग्रहण गर्ने कार्यक्रम राखिएको हो । रथ दोस्रो दिन असनबाट वसन्तपुरस्थित कालभैरवअघि लगिनेछ ।
तेस्रो दिन वसन्तपुरबाट लगन लगेर जात्रा गरिन्छ । ३२ हात लामो रथलाई असन, बसन्तपुर, जैसीदेवल, लगन हुँदै पुनः मच्छेन्द्रबहालमा ल्याएर जात्रा सम्पन्न गर्ने प्रचलन रहेको छ । सरकारले २५ जना भन्दा बढी मानिस भेला नहुने भनेको छ । तर, जात्रा महोत्सव रोक्न नसक्दा कोरोना जोखिम भने उस्तै रहने छ ।
काठमाडौं । काठमाडौंमा जारी ट्राइ नेसन्स सिरिज क्रिकेटमा आज नेपाल र नेदरल्याण्ड्सबीच खेल हुँदैछ । दिउँसो सवा एक बजेबाट शुरु हुने खेलमा आज पनि नेपाल उच्च मनोवलका साथ मैदान उत्रने छ । नेपालले जारी सिरिजमा नेदरल्याण्ड्लाई शनिबार ९ विकेटले हराएको थियो ।
सोमबार मलेसियालाई समेत ९ विकेटले हराएको नेपाल अहिले उच्च फर्ममा देखिएको छ । उता, नेदरल्याण्ड्सले पनि मलेसियाविरुद्ध भने उत्कृष्ट प्रदर्शन गरेको थियो । लगातार तेस्रो जित निकाल्न सके नेपाल एक खेल अगाडी नै फाइनल पुग्ने छ । डबल राउण्ड रोविन लिगपछि शीर्ष दुई टोलीबीच फाइनल हुनेछ ।
आजबाट नेपालको मैदानमा दर्शकको साथ भने हुने छैन । रंगशालामा दर्शक बीना नै खेलाउनु पर्ने सरकारको आदेशको पालना गर्दै क्रिकेट संघ नेपाल (क्यान)ले आजबाट प्रवेश रोकेको छ ।
बुटवल । लुम्बिनी प्रदेशको राजनीतिमा सोमबार नाटकीय घटनाक्रम देखिएको छ । सोमबार बिहान लुम्बिनी प्रदेश सरकारविरुद्ध नेपाली कांग्रेस, नेकपा माओवादी केन्द्र र जसपाका सांसदले अविश्वास प्रस्ताव दर्ता गरे । प्रस्ताव दर्ता गरेको केही बेरमै जसपाका ४ जना नेता मन्त्रीमा नियुक्त भए । त्यसमध्ये तीन सांसद मन्त्री बनाइए, जसले मूख्यमन्त्री विरुद्ध अविश्वासको प्रस्तावमा हस्ताक्षर गरेका थिए । एक जनाले भने गरेका थिएनन् ।
नैतिकताको सामान्य ख्याल नगरी विजयबहादुर यादव, सन्तोष पाण्डे, सुमन शर्मा रायमाझी र कल्पना पाण्डे लम्साल मन्त्री बनेका हुन् । उनीहरुलाई जनता समाजवादी पार्टीले सांसद पद नै नरहने गरी कारवाहीको तयारी गरेको छ । पार्टीले आजै मन्त्री पदको सपथ लिने ४ नेतालाई निलम्बन गरी २४ घण्टे स्पष्टीकरण सोधेको छ ।
जसपाको लुम्बिनी प्रदेश समितिका अध्यक्ष अशोककुमार यादवले सोमबार विज्ञप्ति जारी यस्ते जानकारी गराएका हुन् । सरकारबाट राजीनामा दिई चित्तबुझ्दो स्पष्टीकरण नदिए सांसद पद नरहने गरी उनीहरु कारबाहीमा पर्ने भएका छन् । मन्त्री बनेका चारै जनाले आज नै सपथ लिएका छन् ।
काठमाडौं । नेपालमा मंगलबारबाट सबै प्रकारका खेलहरु दर्शकबीना खेलाईने भएको छ । नेपाल क्रिकेट संघ क्यानले कीर्तिपुरमा क्रिकेट मैदानमा जारी ट्राइ नेशन्स् क्रिकेट सिरिज अन्तर्गतका खेल मंगलबारदेखि दर्शक बिना नै खेलाउने निर्णय गरेको छ । उता, सरकारले रंगशालामा दर्शक बीना नै खेल खेलाउनु पर्ने नियम ल्याएका कारण अब हुने सबै प्रतियोगितामा दर्शकलाई मैदान प्रवेशको अनुमति हुने छैन ।
टेलिभिजनबाट भने खेलहरु प्रत्यक्ष प्रसारण हुने छन् । सरकारले २५ जनाभन्दा धेरै भेला नहुन नपाइने गरी आज आदेश जारी गरेको छ । नेपालमा अहिले नेपाल, मलेसिया र नेदरल्याण्ड्स सहभागी त्रिदेशीय क्रिकेट सिरिज चलिरहेको छ । प्रतियोगितामा नेपालले उत्कृष्ट प्रदर्शन गरिरहेको छ ।
काठमाडौं । नेपालमा थप १२८१ जनामा कोरोना संक्रमण पुष्टी भएको छ ।
स्वास्थ्य तथा जनसंख्या मन्त्रालयको अनुसार पछिल्लो २४ घण्टामा विभिन्न प्रयोगशालामा गरिएको ७ हजार १ जनाको पीसीआर परीक्षणबाट १२२७ जना र ५४७ एन्टिजेन परीक्षणबाट ५४ जनाको रिपोर्ट पोजेटिभ हो ।
यससँगै हालसम्म संक्रमण पुष्टि हुनेको संख्या २ लाख ८५ हजार ९०० जना पुगेको छ। स्वास्थ्य मन्त्रालयका अनुसार २५५ जना कोरोनालाई जितेर अस्पतालबाट डिस्चार्ज भएका छन् ।
यो सँगै नेपालमा निको हुनेको संख्या २ लाख ७५ हजार ५५५ जना पुगेको मन्त्रालयले जनाएको छ ।
संक्रिय संक्रमितको संख्या ७ हजार २५४ जना रहेको छ । पछिल्लो २४ घण्टामा मृत्यु हुनेको संख्या ८ रहेको छ । नेपालमा कोरोनाबाट मृत्यु हुनेको संख्या ३०९१ पुगेको छ ।
कुल संक्रमितमध्ये ६३४ जना मात्र काठमाडौं उपत्यकामा भेटिएका छन्। काठमाडौंमा ५०५, ललितपुरमा ९७ र भक्तपुरमा ३२ जना संक्रमित भेटिएको मन्त्रालयले जनाएको छ।
काठमाडौं । त्रिकोणात्मक टी–२० सिरिजमा नेपालले मलेसियामाथि शानदार जित हात पारेको छ । नेपालले दोस्रो खेलमा मलेसियालाई ९ विकेटले हराएको हो ।
टियु क्रिकेट मैदानमा ११० रनको लक्ष्य पछ्याएको नेपालले १२.१ ओभरमै भेट्टाएको थियो। नेपालका लागि कुशल भुर्तेल र आशिफ शेखले उत्कृष्ट प्रदर्शन गरे ।
आशिफ ११.१ ओभरमा ४२ रन बनाएर आउट भएका थिए। तेस्रो विकेटका लागि आएका दीपेन्द्र सिंह ऐरीले ६ रन बनाए। नेपालका लागि नायक बनेका कुशलले सर्वाधिक ६१ रन बनाएका थिए। उनले ४१ बलमा ३ चौका र ५ छक्का प्रहार गरेका थिए।
यसअघि मलेसियाले १६।५ ओभरमा १०९ रन बनाएर आलआउट भएको थियो। टस जितेर फिल्डिङ रोजेको नेपालका लागि करण केसीले तीन विकेट लिएका थिए। त्यस्तै सन्दीपले दुई र बाँकी सोमपाल कामी, दीपेन्द्र सिंह ऐरी, साहब आलम र कुशल मल्लले एक एक विकेट लिए।
यसअघिको खेलमा नेपालले नेदरल्यान्ड्सलाई पराजित गरेको थियो भने मलेसिया नेदरल्यान्ड्ससँग पराजित भएको थियो।
काठमाडौं । सरकारले रात्रिकालीन व्यवसाय वैशाख महिनाभर बन्द गर्ने निर्णय गरेको छ । कोरोनाभाइरस संक्रमण बढ्दै गएको भन्दै सोमबार बसेको मन्त्रिपरिषद् बैठकले वैशाखभर डान्स बार, क्लब, दोहोरी साँझलगायतका रात्रिकालीन व्यवसाय वैशाख महिनाभर बन्द गर्ने निर्णय भएको एक मन्त्रीले जानकारी दिए ।
सरकारले सीसीएमसी बैठकको सिफारिसअनुसार नै सो निर्णय गरेको बताउँदै उनले धार्मिक स्थलमा समेत २५ जना भन्दा बढी भेला हुन नपाइने निर्णय भएको बताए ।
उनका अनुसार स्वीमिङ पुल, पार्टी प्यालेस, जिमखाना बन्द गर्दै मेला महोत्सव र भिडभाड हुने सबै स्थलमा कडाइ गर्ने निर्णय पनि भएको छ ।
यसैगरी यातायातसहितका सार्वजनिक स्थानमा मापदण्ड तोकेर सञ्चालन गर्न लगाउने निर्णयसमेत गरेको छ। बैठकले चालू हिउँदे अधिवेशन आज दिउँसो १ बजेबाट अन्त्य गर्न राष्ट्रपतिसमक्ष सिफारिससमेत गरेको छ।
काठमाडौं । सरकारले शहरी क्षेत्रका विद्यालय बन्द गर्ने निर्णय गरेको छ ।
सोमबार प्रधानमन्त्री निवास बालुवाटारमा बसेको मन्त्रीपरिषद्को बैठकले कोभिड १९ संकट व्यवस्थापन केन्द्र सिसीएमसीको सिफारिस अनुसार शहरी क्षेत्रका विद्यालयमा भर्चुअल कक्षा सञ्चालन गर्नुपर्ने निणय गरेका हुन् ।
स्वास्थ्य तथा जनसंख्या मन्त्रालयले केही पहिले नै शहरी क्षेत्रका विद्यालय बन्द गर्न प्रस्ताव गरेको थियो ।
तर मन्त्रिपरिषदले निर्णय नगरेपछि मन्त्रालयले काठमाडौं उपत्यकासहित १४ जिल्लालाई अति प्रभावित क्षेत्रमा राख्दै बालबालिकालाई विद्यालय नपठाउन अपील गरेको थियो ।
त्यस्तै जिमहल, पार्टी प्यालेस, सभा सम्मेलन, रात्रीकालिन व्यवसाय रोक लगाउनुका साथै जनस्वास्थ्य मापदण्ड पूरा गरेर २५ जना भन्दा बढी भेला हुन नपाउने निर्णय गरेको छ।
यस्तै आजको बैठकले अन्तर्राष्ट्रिय नाकामा हेल्प डेस्क राख्ने विषयमा पनि निर्णय भएको छ।
‘आजको बैठकमा अन्तर्राष्ट्रिय नाकामा ६ वटा होल्डिङ सेन्टर जसमा प्रदेश १ मा २, प्रदेश २ मा १, लुम्बुनी र सुदूरपश्चिम प्रदेशमा २(२ वटा होल्डिङ सेन्टर राख्ने निर्णय गरेको छ।
त्यस्तै बैठकले चालू हिउँदे अधिवेशन आज दिउँसो १ बजेबाट अन्त्य गर्न राष्ट्रपतिसमक्ष सिफारिस गरेको छ।
पुस ५ गते विघटन भएर सर्वोच्च अदालतको फैसलापछि फागुन ११ गते पुनःस्थापित प्रतिनिधिसभाको अधिवेशन फागुन २३ गते सुरु भएको थियो ।
काठमाडौं । त्रिदेशीय टी ट्वान्टी क्रिकेट सिरिज अन्तर्गत आज नेपालले दोस्रो खेलमा मलेसियाको सामना गर्दैछ । त्रिवि अन्तर्राष्ट्रिय क्रिकेट मैदान कीर्तिपुरमा दिउँसो एक बजेबाट क्रिकेट शुरु हुनेछ । नेपालले पहिलो खेलमा नेदरल्याण्ड्सलाई ९ विकेटले हराएका कारण उच्च मनोवलका साथ मैदानमा उत्रने छ । मलेसिया भने आइतबार नेदरल्याण्ड्ससँग १५ रनले हारेको छ । यद्दपी मलेसियाले ब्याटिंगमा राम्रो प्रदर्शन गरेको थियो । तीन मुलुक सहभागी रहेको यो प्रतियोगितामा सबै टोलीले एक अर्को विरुद्ध दुई दुई खेल खेल्नेछन् ।
काठमाडौं । गगन थापासहित प्रमुख प्रतिपक्षी दल नेपाली कांग्रेसका चार सांसदले वायु प्रदुषणबारे सार्वजनिक महत्वको प्रस्ताव दर्ता गरेका छन् । वायु प्रदूषण बढेको र यसबारे छलफल गर्न अत्यावश्यक रहेको भन्दै सांसदहरुले संसदमा जरूरी सार्वजनिक महत्वको प्रस्ताव दर्ता गरेका हुन् ।
वायु प्रदूषण न्युनिकरण गर्न तत्काल गर्नुपर्ने काम र दीर्घकालीन रूपमा गर्नुपर्ने तयारी तथा पहल कदमीबारे छलफल गर्न काठमाडौं उपत्यकाका जनप्रतिनिधिका रूपमा चार सांसदले प्रस्ताव दर्ता गरेका छन् ।
मंगलबार बस्ने संसद बैठकमा यस प्रस्तावबारे महत्वपूर्ण छलफल हुने विश्वास सांसदहरुको छ । थापासहित भिमसेनदास प्रधान, राजेन्द्रकुमार केसी र जीवनराम श्रेष्ठले वायु प्रदूषणबारे प्रस्ताव संसदमा आइतबार दर्ता गरेका छन् ।
काठमाडौं । नेकपा (माओवादी केन्द्र)को स्थायी समिति बैठक आजका लागि बोलाइएको छ । दिउँसो एक बजेका लागि बोलाइएको बैठकको एजेण्डा भने सार्वजनिक गरिएको छैन । समसामयिक राजनीतिक विषयमा छलफल गर्न भनि बोलाइएको बैठकमा पछिल्लो राजनीतिक घटनाक्रमबारे छलफल हुने बताइएको छ ।
सरकारले एमसीसी संसदमा अगाडी बढाउन गरेको प्रस्ताव र यसले कांग्रेस प्रधानमन्त्री केपी शर्मा ओलीतर्फ आकर्षित हुने आशंकाका बीच माओवादी केन्द्रको स्थायी समिति बैठक बस्न लागेको हो । सरकारको चर्को विरोध गरेपनि समर्थन फिर्ता नलिएको माओवादीको समेत आलोचना भइरहेको छ ।
आजको बैठकले नयाँ सत्ता समिकरणका सम्भावनाबारे छलफल हुने छ । प्रदेश तहमा माओवादी केन्द्रको रणनीति सफल बन्दै गएको सन्दर्भका संघीय सरकारमा समेत आफ्नो रणनीति बुनिरहेको माओवादी केन्द्रले आगामी सरकारको नेतृत्व भने कांग्रेसलाई दिने बताइसकेको छ ।
काठमाडौं । मंगलबारबाट नेपालमा कोरोना भाइरसविरुद्धको खोपको पहिलो खोप लगाइसकेका व्यक्तिका लागि दोस्रो डोज लगाइने भएको छ । पहिलो डोज लगाएका पहिलो प्राथमिकतामा परेका व्यक्तिका लागि वैशाख ७ देखि ११ गतेसम्म दोस्रो डोज लगाउने दिन तोकिएको छ ।
स्वास्थ्य सेवा विभागका अनुसार कोभिसिल्ड खोपको पहिलो मात्रा लगाएका ४ लाख ३९ हजार जनालाई दोस्रो मात्रा दिइने छ । पहिलो डोज जुन कम्पनीको खोप लगाएको हो, दोस्रो डोज पनि त्यही खोप लगाउनु पर्छ । सरकारले २०७७ साल माघ १४ गतेदेखि कोरोनाविरुद्धको खोप अभियान सुरु गरेको थियो ।
माघ १४ देखि फागुन १० गतेसम्म पहिलो प्राथमिकताको पहिलो र दोस्रो चरणमा पहिलो मात्रा खोप लगाइएको थियो । स्वास्थ्य मन्त्रालयका अनुसार
२०७७ माघ १४, १५, १६, १७ र २६ गते पहिलो डोज लगाएकालाई वैशाख ७ मा दोस्रो डोज लगाउन भनिएको छ ।
माघ १८, १९, २०, २१ र २७ गते खोप लगाएकालाई वैशाख ८ मा दोस्रो खोप लिन भनिएको छ । माघ २२, २३, २४, २८ र फागुन २ गते पहिलो डोज लगाएकालाई वैशाख ९ मा मिति तोकिएको छ ।
माघ २९ र फागुन ३, ४, ५ र ६ गते खोप लगाएकालाई वैशाख १० माघ ३०, फागुन ७, ८, ९ र १० गते पहिलो खोप लगाएकालाई वैशाख ११ को मिति तोकिएको हो । खोप बिहान १० बजेदेखि दिउँसो ४ बजेसम्म लगाइने छ । यसअघि खोप लगाएको स्थानमै पुगेर खोप लगाउनु पर्नेछ ।
काठमाडौं । नेपालको निजी क्षेत्रको ठूलो वायुसेवा कम्पनी बुद्ध एयरले पोखराबाट अब अन्तर प्रदेश उडान गर्ने भएको छ । १ मेबाट एकै पटक चार गन्तब्य जोड्ने गरी अन्तर प्रदेश उडानको घोषणा बुद्धले गरेको हो । बुद्धले पर्यटकीय शहर पोखराबाट विराटनगर, सिमरा र नेपालगन्जलाई एकै पटक जोड्न लागेको हो । साथै भैरहवाबाट भरतपुर उडानको तयारी समेत बुद्धले गरेको छ ।
यी रुटमा बुद्धले १८ सिट क्षमता भएको बिच १९००–डी विमान उडाउने भएको छ । बुद्धले विराटनगरबाट तुम्लिङटारमा ठूलो जहाजबाट उडानको समेत घोषणा गरेको छ । नयाँ घोषणा भएको रुटबाट आन्तरिक उडानमा कोशेढुंगा सावित हुने अपेक्षा गरिएको बुद्ध एयरका प्रवन्ध निर्देशक बीरेन्द्र बहादुर बस्नेतले बताए ।
बुद्धले पोखरा नेपालगन्ज ४५ सय, पोखरा–विराटनगर ६ हजार, पोखरा–सिमरा ४३ सय, विराटनगर–तुम्लिङटार २५ सय, पोखरा–भैरहवा ३१ सय र भैरहवा–भरतपुर २५ सय रुपैयाँको टिकट न्यूनतम तोकेको समेत जानकारी गराएको छ । बुद्धले अहिले १४ वटा विमानबाट दैनिक १ सय २० भन्दा बढी उडान गरिरहेको छ ।
काठमाडौं । गृहमन्त्री रामबहादुर थापाको सांसद पद गएको छ । नेकपा माओवादी केन्द्रबाट सांसद बनेका उनलाई पार्टीले कारवाही गरेसँगै सांसद पद गुमेको हो । सांसद पद गुमेपनि उनी आजै गृहमन्त्री पदमा भने पुनःनियुक्त भएका हुन् । अब उनी नेकपा एमालेका नेताको हैसियतमा गृहमन्त्री बनेका छन् । गृहमन्त्रीमा नियुक्त भएका उनले अब सांसद बीना बढीमा ६ महिना मात्र मन्त्री पदमा बस्न पाउने छन् ।
आइतबार शीतल निवासमा राष्ट्रपति विद्यादेवी भण्डारीले थापालाई मन्त्री पदको सपथ ग्रहण गराएकी छन् । आजै उनले कार्यभार समेत सम्हालेका छन् । उनी प्रधानमन्त्री केपी शर्मा ओलीलाई साथ दिँदै एमाले बनेसँगै माओवादी केन्द्रले कारबाही गरेको हो । उनी राष्ट्रिय सभा सांसद थिए ।