Category: फिचर

ताप्लेजुङ । ताप्लेजुङ पुनः एक पटक आगोलागीको घटनाका कारण पिडामा पर्यो । आज बिहान ताप्लेजुङको दोस्रो ठूलो व्यापारिक केन्द्र दोभान बजारमा लागेको आगोले कम्तिमा ४७ वटा घर जलेर नष्ट भएका छन् ।अहिले भने आगो नियन्त्रणमा आइसकेको छ । आगलागीका कारण मेरिङदेन गाउँपालिका–३, दोभान बजारका ४७ वटा घर पूर्णरुपमा जलेको जिल्ला प्रहरी कार्यालय ताप्लेजुङले जनाएको छ ।

आगो करिब दुई घण्टापछि स्थानीय, दमकल र सुरक्षा निकायका जनशक्तिले नियन्त्रणमा लिएका छन् । सदरमुकाम फुङलिङबाट पुगेको दमकल र एक्स्काभेटरको सहायताले बजारमा थप आगो फैलिनबाट रोकिएको थियो । आगो फैलन नदिन एक्स्काभेटर प्रयोगले केही कच्ची घर समेत भत्काएको छ ।

बस्तीतर्फको जोखिम कम भए पनि आगो नजिकैको जंगलतर्फ फैलिएको बताइएको छ। त्यसलाई समेत नियन्त्रणको प्रयास भइरहेको छ । प्रारम्भिक जानकारी अनुसार ४७ वटा घरमा रहेका ७९ परिवार विस्थापित भएको बताइएको छ । बिहान ९ बजेतिर एक घरबाट सल्किएको आगो बस्तीभर फैलिएको हो।

यसैबीच ताप्लेजुङमा भएको आगोलागीको घटनाप्रति राष्ट्रपति र प्रधानमन्त्रीले दुख व्यक्त गरेका छन् । प्रधानमन्त्री ओलीले राहत दिने घोषणा गरेका छन् । ताप्लेजुङका सांसद तथा पूर्वमन्त्री योगेश भट्टराईले भने तत्काल पिडितका लागि ५ लाख रुपैयाँ दिने घोषणा गर्दै थप राहतका लागि पहल गर्ने प्रतिवद्धता व्यक्त गरेका छन् ।

काठमाडौं । नेपालमा थप ७८ जनामा कोरोना भाइरसको संक्रमण पुष्टि भएको छ ।

स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप ७८ जनामा कोरोना संक्रमण पुष्टि भएको हो ।

यो सँगै कोरोना संक्रमितको संख्या २ लाख ७४ हजार २९४ जना पुगेको छ । स्वास्थ्य मन्त्रालयका अनुसार ७२ जना कोरोनालाई जितेर अस्पतालबाट डिस्चार्ज भएका छन् ।

यो सँगै नेपालमा निको हुनेको संख्या २ लाख ७० हजार ५४२ जना पुगेको मन्त्रालयले जनाएको छ । संक्रिय संक्रमितको संख्या ९ सय ७४ रहेको छ । मृत्यु हुनेको संख्या शून्य रहेको छ ।

काठमाडौं । सरकारसँग वार्ताको नेत्रविक्रम चन्द विप्लव नेतृत्वको नेकपाले दुई सदस्यीय वार्ता टोली गठन गरेको छ ।

विप्लव नेतृत्वको नेकपाले प्रवक्ता खड्गबहादुर विश्वकर्मा प्रकाण्डको नेतृत्वमा दुई सदस्यीय वार्ता टोली गठन गरेको हो । वार्ता टोलीमा प्रकाण्डसँगै नेता दीपक चलाउने रहेको छन् ।

यसअघि सरकारले आज मंगलबार नै विप्लव समूहसँग वार्ताका लागि गृहमन्त्री रामबहादुर थापा बादलको नेतृत्वमा वार्ता टोली गठन गरेको थियो । टोलीमा प्रधानमन्त्रीका परराष्ट्र मामिला सल्लाहकार डा. राजन भट्टराई छन् । बादलले आफ्ना पूर्वसहकर्मीलाई शान्तिपूर्ण राजनीतिमा ल्याउने जिम्मेवारी पाएका छन् ।

प्रधानमन्त्री अ‍ोलीले विप्लवलाई शान्तिपूर्ण राजनीतिमा ल्याएर विप्लवसँग सहकार्य गर्ने मनस्थिति बनाएका छन् । ओली समूहमा रहेका बादल विप्लवसँग सहकार्य भएको खण्डमा प्रतिबन्धले चिसिएकाे जनयुद्धको मित्रता पुनः प्रगाढ हुने सम्भावना देखिन्छ ।

१० वर्ष सहकर्मी भएर जनयुद्ध लडेका बादल संयोगले सरकारमा छन् भने विप्लव भूमिगत जीवन बिताइरहेका छन् । १० वर्षे जनयुद्धसँगै लडेर आएका बादल र विप्लव प्रतिबन्ध फकुवापछि पहिलो पटक आमने-सामने हुँदैछन् ।

काठमाडौं । सरकार र प्रतिबन्धित नेत्रविक्रम चन्द ‘विप्लव’ नेतृत्वको नेकपाबीच वार्ता हुने भएको छ । विप्लव समूहसँग वार्ता गर्नका लागि सरकारले दुई सदस्यीय टोली गठन गरेको हो ।

गृहमन्त्री रामबहादुर थापा बादल र प्रधानमन्त्रीका परराष्ट्र सल्लाहकार राजन भट्टराई सम्मिलित वार्ता टोली गठन गरेको सरकारका प्रवक्ता सञ्चार तथा सूचना प्रविधिमन्त्री पार्वत गुरुङले जानकारी दिए ।

दुवै पक्षबीचका अनौपचारिक छलफलहरूपछि वार्ताको सहज वातावरण बनेको र दुवै पक्षका वार्ता टोलीबीच वार्ता हुने तयारी भएको गुरुङले बताए ।

नेत्रविक्रम चन्द ‘विप्लव’ समूहले सरकारसँग वार्ता गर्न सकारात्मक रहेको यस अगाडि विज्ञप्ति सार्वजनिक गरेको थियो। विप्लवले सहज रुपमा गतिविधि र कार्यक्रम गर्ने वातावरण बने सरकारसँग वार्ता हुने बताएका थिए।

सरकारले ०७५ फागुन २८ गते विप्लवका गतिविधि हिंसात्मक देखिएको भन्दै उनी नेतृत्वको पार्टीमाथि प्रतिबन्ध लगाउने निर्णय गरेको थियो। त्यसयता दुवै पक्षले एकअर्कालाई गलाउने गर्दै वार्तामा ल्याउन अनेक अनौपचारिक प्रयास जारी राख्दै आएका थिए।

काठमाडौं । संसद विघटनबाट जनताबीच अलोकप्रिय बनेका प्रधानमन्त्री केपी शर्मा ओली आफुलाई विकासवादी नेता स्थापित गर्न लागि परेका छन् । पछिल्लो समय राज्यस्रोतको दोहन गर्दै उनी शिलान्यासमा बढी केन्द्रित छन् । किनकी उनको तिनवर्षे कार्यकालको अवधिमा कुनै पनि आयोजना सम्पन्न हुन सकेका छैनन् । सोहीकारण उनल पूर्वतयारी समेत नसकिएका आयोजनाहरुको समेत धमाधम शिलान्यास गरिरहेका छन् ।

यसै सिलसिलामा उनी आज मोरङ र झापा जाने कार्यक्रम तय भएको छ । झापा उनी यो साता मात्र दोस्रो पटक जान लागेका हुन् । व्यापारी दुर्गा प्रसाईले निर्माण गरी एक वर्ष अगाडी नै संचालनमा ल्याएको पूर्वाञ्चल क्यान्सर अस्पतालको उद्घाटनमा प्रधानमन्त्री आज विर्तामोड जाने भएका छन् । आजै सहरी विकास मन्त्रालयले मोरङ जिल्लाको उर्लाबारी नगरपालिकामा निर्माण गर्न लागेको सन्थाल जातिको एकीकृत बस्तीको शिलान्यासमा समेत पुग्ने कार्यक्रम रहेको छ ।

प्रधानमन्त्री केपी शर्मा ओलीले सन्थाल जातिको एकीकृत बस्ती शिलान्यास गर्ने शहरी विकास राज्यमन्त्री रामवीर मानन्धरलाई उदृत गर्दै नेपाली संचारमाध्यमले जनाएका छन् । उर्लाबारी नगरपालिकाको रातोहोली खोल्सीको किनारमा सन्थाल एकीकृत बस्ती विकास गर्ने सम्पूर्ण तयारी भइसकेको छ । एकीकृत सन्थाल बस्ती निर्माणको लागि गुरुयोजना बनेको छ । रातोहोली खोल्सीको किनारमा २६ उराव र १०६ सन्थाल जातिको गरी कूल १३२ वटा घर निर्माण हुने भएको हो । बस्ती निर्माणको लागत ३० करोड अनुमान गरिएको छ ।

काठमाडौं । संसद सचिवालयले बुधबारदेखि संघीय संसदका दुवै सदनका सांसदहरूलाई कोरोना भाइरसविरुद्धको खोप लगाउने व्यवस्था मिलाएको छ।

खोप लगाएकाले मात्र संसद भवनमा प्रवेश पाउने पनि सचिवालयले जनाएको छ। सचिवालयका प्रवक्ता डा. रोजनाथ पाण्डेले सांसदहरूलाई बुधबारदेखि शुक्रबारसम्म खोप लगाउने व्यवस्था मिलाइएको जानकारी दिए।​

सांसद्सँगै संसद सचिवालयका कर्मचारी, मर्यादापालक (सुरक्षाकर्मी) र सांसद तथा मन्त्रीका अंगरक्षकसहित करिब एक हजार जनालाई खोप लगाइनेछ।

खोप लगाउने व्यवस्था संसद भवन नजिककै रहेको नेपाल निजामती अस्पतालमा मिलाइएको छ। खोप लगाएकालाई मात्रै प्रवेश दिइने भन्दै सचिवालयले सबै सांसद, कर्मचारी र सुरक्षाकर्मीलाई तोकिएको खोप केन्द्रमा पुगी खोप लगाउन अनुरोध गरेको छ।

सचिवालयका अनुसार अधिकांश सांसद ५५ वर्ष माथिका छन्। सरकारले ५५ वर्ष माथिका सर्वसाधारणलाई फागुन २३ गतेबाट खोप लगाउने व्यवस्था पनि गरिसकेको छ।

काठमाडौं । राष्ट्रपति विद्यादेवी भण्डारीले फागुन २३ गते अपरान्ह ४ बजेका लागि संसद अधिवेशन आह्वान गरेकी छन् ।

सोमबार बसेको मन्त्रिपरिषद बैठकको सिफारिस अनुसार राष्ट्रपतिले २३ गते संसद अधिवेशन आह्वान गरेकी हुन्। प्रधानमन्त्री केपी शर्मा ओलीको सिफारिसमा राष्ट्रपति भण्डारीले गत पुस ५ गते प्रतिनिधिसभा विघटन गरिदिएकी थिइन्।

त्यसपछि फागुन ११ गते सर्वोच्च अदालतले सरकारको निर्णय बदर गर्दै १३ दिनभित्र बैठक बोलाउन आदेश दिएको थियो।

सोहीबमोजिम मन्त्रिपरिषद्ले संघीय संसद् अधिवेशन आह्वानका लागि राष्ट्रपतिसमक्ष सिफारिस गरेको हो ।

प्रधानमन्त्री कार्यालयबाट प्राप्त संसद अधिवेशनको पत्र अनुसार राष्ट्रपतिले संविधानको धारा ९३ को उपधारा (१) बमोजिम संसद बैठक आह्वान गरेकी विज्ञप्तिमा जनाइएको छ ।

काठमाडौं । आज प्रधानमन्त्री केपी शर्मा ओली पोखरा जाँदैछन् । आइतबार दिनभर झापामा बिताएका उनी आज पोखरा जाने कार्यक्रम तय भएको उनको सचिवालयले जनाएको छ । उनी आज सभागृहमा प्रदेशस्तरीय कार्यकर्ता भेला तथा प्रशिक्षण कार्यक्रमको सम्बोधनको सिलसिलामा पोखरा जान लागेका हुन् ।

पोखरामा उनले गण्डकी प्रदेश सरकारले नदीपुरमा निर्माण गर्न लागेको प्रदेश प्रशिक्षण प्रतिष्ठानको भवन शिलान्यास गर्ने कार्यक्रम समेत राखिएको छ । प्रधानमन्त्री ओलीले पोखरा रंगशालाको समेत निरीक्षण गर्नेछन् । यसअघि संसदको फैसला आउनु अगाडी पोखरामा ओली पक्षिय भेलालाई सम्बोधन गर्न उनी पोखरा जाने कार्यक्रम थियो । तर, त्यो स्थगित भएको थियो ।