काठमाडौं । नेपालमा थप ५३४ जनामा कोरोना भाइरसको संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप ५३४ जनामा कोरोना संक्रमण पुष्टि भएको हो ।
योसँगै कोरोना संक्रमितको संख्या २ लाख ६० हजार ५९३ पुगेको छ ।
स्वास्थ्य मन्त्रालयका अनुसार ४ सय ४७ जना कोरोनालाई जितेर अस्पतालबाट डिस्चार्ज भएका छन् । यो सँगै अहिलेसम्म २ लाख ५२ हजार ३ सय ५९ जना संक्रमणमुक्त भएका छन् । संक्रिय संक्रमितको संख्या ६ हजार ३ सय ७८ रहेको छ ।
काठमाडौं । प्रमुख प्रतिपक्षी दल नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओलीले अचानक चुनाव घोषणा गरेर असंवैधानिक काम गरेको बताएका छन् ।
मेलमिलाप दिवसका अवसरमा कांग्रेसको सूचना, सञ्चार तथा प्रचार विभागले बिहीबार गरेको भर्चुअल कार्यक्रममा पूर्वप्रधानमन्त्रीसमेत रहेका सभापति देउवाले प्रधानमन्त्री ओलीको कदम अलोकतान्त्रिक भएको बताए ।
‘ओलीले अचानक चुनाव घोषणा गरेर असंवैधानिक काम गरेका छन् । ओलीको कदम अलोकतान्त्रिक पनि छ’, देउवाले भने ।
उनले नेपाली कांग्रेसले हिँसात्मक बाटो अवलम्बन नगर्ने बताएका छन् । सभापति देउवाले अदालतलाई धम्क्याएर निर्णय गर्न लगाउन नमिल्ने बताए ।
‘आन्दोलनको नाममा अदालतलाई धम्क्याउन मिल्दैन । कसैको खिलापमा भयो भने पछि पनि आन्दोलन हुने भएकोले सोचे विचार गरेरै हामीले आन्दोलन नगरेको हो,’ देउवाले भने, ‘अदालतको निर्णय पर्खनुपर्छ ।’
सभापति देउवाले ‘कुनै पनि बाहनामा एकदलीय शासन नमान्ने बताएका छन् । उनले प्रजातान्त्रिक तरिकाले, लोकतान्त्रिक तरिकाले र अहिंसात्मक तरिकाले अघि बढ्नुपर्ने बताए ।
‘स्वतन्त्र न्यायालय बचाइ राख्नुपर्छ । स्वन्तन्त्र न्यायलयको निर्णय हामीले मान्नुपर्छ,’ उनले भने, ‘यी कुराहरु सम्पूर्ण नेपाली जनतालाई बताउन चाहान्छौं ।’
एजेन्सी । खोप उत्पादन गर्ने फर्म र बोतलको पानी बेच्ने कम्पनीको स्वामित्व भएका एक चिनियाँ व्यापारी एशियाकै सर्वाधिक धनी व्यक्ति बनेका छन् । ब्लूमबर्गको बिलेनियर इन्डेक्स अनुसार चिनिया व्यापारी जङ शान्शान एसियाकै सर्वाधिक धनी घोषित भएका हुन ।
उनको कुल सम्पती ७७ दशमलब आठ अर्ब अमेरिकी डलर पुगेको छ । जङको यो वर्ष मात्रै कुल सात अर्ब डलरले बढेको छ । यससँगै उनले भारतका मुकेश अम्बानी र चीनका ज्याक मालाई समेत सम्पतीमा पछि पारेका छन । यसअघि अलिबाबाका ज्याक मा त्यतिबेला चीन र एशियाकै सर्वाधिक धनी व्यक्ति थिए । जङ संसारभरिका धनाढ्य व्यक्तिको सूचीमा ११ औँ स्थानमा पुगेका छन ।
उक्त फर्म कोरोना भाइरस बिरुद्धको खोप बनाउन समेत सग्लन रहेको छ । जङको खोप उत्पादन गर्ने फर्म बेइजिङ वान्ताई बायोलजिकल र बोतलबन्द पानी उत्पादन गर्ने कम्पनी नोङ्फु स्प्रिङको शेयरको मूल्य केही समय यता उच्च भएको छ ।
ब्लूमबर्गका अनुसार यो इतिहासमै सर्वाधिक सम्पत्ति संकलन भएका घटनामध्ये एक हो । अमेजन कम्पनीका संस्थापक जेफ बेजोससहित धेरै धनाढ्यहरू कोरोनाभाइरस महामारीका बेला अझ धनी भएका छन् । भारतका मुकेश अम्बानीको सम्पत्ति पनि यो अवधिमा १८ दशामलब ३ अर्ब डलरले बढेर ७६ दशमलब ९ अर्ब डलर पुगेको छ । अलिबाबाको ज्याक माको सम्पत्ति अक्टोबरमा ६१ दशमलब ७ अर्ब डलरबाट घटेर ५१ दशमलब २ अर्ब डलर पुगेको छ ।
काठमाडौं । नेकपा प्रचण्ड–माधव नेपाल समूहले प्रदेश १ को नेकपा संसदीय दलको नेता चयन गरेको छ ।
बिहीबार प्रचण्ड–नेपाल समूहले मुख्यमन्त्री शेरधन राईलाई हटाउँदै संसदीय दलको नेतामा भीम आचार्यलाई चयन गरेको हो ।
प्रचण्ड–नेपाल समूहले मुख्यमन्त्री राईविरुद्ध अविश्वास प्रस्ताव दर्ता गराएको थियो । राईलाई हटाएर उक्त समूहले आचार्यलाई मुख्यमन्त्री बनाउने प्रस्ताव लगेको थियो ।
संसदीय दलको बैठकले राईलाई दलको नेताबाट हटाएर आचार्यलाई चयन गरेको हो । सत्तारुढ नेकपा विभाजित भएपछि अहिले बिभिन्न प्रदेशमा त्यहाँका मुख्यमन्त्रीहरुविरुद्ध अविश्वासको प्रस्ताव पेस गर्ने र संसदीय दलबाट हटाउने अभियान सुरु भएको छ।
यसअघि नेकपा सांसदहरुले नै प्रदेश ३ का मुख्यमन्त्री डोरमणि पौडेलका विरुद्ध पनि अविश्वास प्रस्ताव दर्ता गराएका छन्।
प्रदेश ३ का बहुमत नेकपा सांसदले उनलाई संसदीय दलबाट हटाई नेकपाकै स्थायी समिति सदस्य अष्टलक्ष्मी शाक्यलाई संसदीय दलको नेता चयन गरेका छन्।
काठमाडौं । लुम्बिनी चिनी मिलका सञ्चालक मनोज अग्रवाल पक्राउ परेका छन् । उखु किसानको बक्यौता रकम नतिरेको आरोपमा उनलाई महानगरीय अपराध महाशाखाको टोलीले पर्सा प्रहरीको समन्वयमा वीरगन्जबाट पक्राउ गरेको हो ।
उनीविरुद्ध नवलपरासीमा उखु किसानको उजुरी छ । यो मिलले किसानको १५ करोड रुपैयाँभन्दा बढी रकम तिर्न बाँकी रहेको बताइएको छ । सरकारले किसानको पैसा नदिने मिल सञ्चालकलाई पक्राउ गरेर कारबाही अगाडि बढाउन निर्देशन दिएको थियो । १ वर्षअघिको सम्झौता कार्यान्वय नभएको भन्दै गत मंसिर २८ गतेदेखि किसानहरू फेरि आन्दोलनमा उत्रिएका थिए।
सरकारसँग ४ बुँदै सहमति भएसँगै पुस १३ गते उनीहरूले आन्दोलन स्थगित गरेका थिए। सम्झौता भएको दिनेदेखि २१ दिनभित्र चिनी मिललाई भुक्तानीको लागि म्याद तोकिएको छ। किसानलाई ठगी गरेको अभियोगमा सरकारले पक्राउ गर्न आदेश दिएका मध्ये चार मिलका मुख्य सञ्चालकहरु भने हालसम्म पक्राउ पर्न सकेका छैनन् ।
ओस्लो । नर्वेमा भीषण पहिरोमा परी कम्तिमा २० जना व्यक्ति बेपत्ता भएका छन्। कैयौ मानिसलाई सुरक्षित स्थानमा सार्ने काम भएको छ । घटनामा १० जना घाइते छन् । अन्तराष्ट्रिय संचारमाध्यमहरुका अनुसार यो घटना राजधानी ओस्लो नजिकै एक गाउँमा भएको हो ।
पहिरोले घटनास्थलका सयौँ घर बगेको वा पुरिएको आशंका गरिएको छ । त्यहाँका घर पहिरोले नष्ट समेत भएका छन् । घटनास्थलमा खोजी तथा उद्दारको काम भइरहेको अधिकारीहरुले जनाएका छन् । उक्त स्थानमा करीव दुई लाख १० हजार बर्गमिटर क्षेत्रफलमा पहिरो बगेको बताइएको छ ।
५ सय मानिस विस्थापित भएका छन् । घाइतेहरुको स्थानीय अस्पतालमा उपचार जारी छ । नर्वेका प्रधानमन्त्री इर्ना सेल्बेर्गले घटनाप्रति दुःख व्यक्त गर्दै घाइतेहरूको शीघ्र स्वास्थ्य लाभको कामना गरेका छन्।
काठमाडौं । यमनमा नयाँ मन्त्रीपरिषद्का सदस्यसहित प्रधानमन्त्रीसमेतलाई लक्षित गरी विमानस्थलमै भयानक आक्रमण भएको छ । आक्रमणमा २२ जनाको मृत्यु भ्एको छ । यद्दपी मन्त्रीपरिषद्का सबै सदस्य सकुसल रहेको बीबीसीेले उल्लेख गरेको छ ।
यमनको दक्षिणी शहर अदनको विमानस्थलमा मन्त्रिपरिषदका नयाँ सदस्यहरुलाई लक्षित गरी आक्रमण भएको हो । घटनामा कम्तिमा २२ को मृत्यु भएको र ५० जनाभन्दा बढी घाइते रहेको समाचारमा जनाइएको छ ।
सुरक्षा अधिकारीका अनुसार नयाँ सरकारका सदस्यहरुलाई लिएर छिमेकी देश साउदी अरबबाट एक विमान एयरपोर्टमा झर्नासाथ भयानक विष्फोट भएको हो । मारिनेमा विमानस्थलका कर्मचारी र अधिकारी रहेको बताइएको छ । प्रधानमन्त्री र उनको मन्त्रिपरिषदका सबै सदस्य सुरक्षित छन् ।
विष्फोटपछि प्रधानमन्त्री मइन अब्दुलमलिक सइद र उनको मन्त्रिपरिषदका सदस्यहरुलाई सुरक्षा घेरामा राखेर सुरक्षित स्थानमा लगिएको बीबीसीले जनाएको छ ।
यमनका संचारमन्त्री इरियानीले हुथी विद्रोहीबाट कायरतापूर्ण हमला भएको बताएका छन् । कम्तिमा दुई पटक विष्फोट भएको आवाज सुनिएको स्थानीयले जनाएका छन् । हुथी विद्रोहीहरुले देशको पश्चिमी क्षेत्रका अधिकांश भाग नियन्त्रणमा लिएका छन् ।
काठमाडौं । आज नेपाली कांग्रेस र पार्टीका भ्रातृ संस्थाहरुले ‘राष्ट्रिय एकता तथा मेलमिलाप दिवस’ मनाउँदै छन् । पार्टीका संस्थापक नेता बीपी कोइराला, गणेशमान सिंहसहितका नेता ४० वर्ष अगाडी आजकै दिन लामो निर्वासन अन्त्य गरी भारतबाट स्वदेश फर्किएका थिए । यस दिनको सम्झनामा कांग्रेसले मेलमिलाप दिवस मनाउने गरेको छ ।
आज कांग्रेसले ७७ वटै जिल्लामा बिभिन्न कार्यक्रमको आयोजना गरेको छ । खासगरी सरकारको दमकका विरुद्धमा जनचेतना जगाउने गरी कांगेसले कार्यक्रमहरु आयोजना गर्न लागेको बताएको छ ।
नेपाली कांग्रेसको सूचना सञ्चार तथा प्रचार विभागले आज आयोजना गर्न लागेको ‘नेपाली राजनीतिमा मेलमिलापको सान्दर्भिकता’ सम्बन्धी भर्चुअल कार्यक्रममा पार्टी सभापति शेरबहादुर देउवाले सम्बोधन गर्ने कार्यक्रम रहेको छ । २०१७ साल पुस १ गते तत्कालीन राजा महेन्द्रले ‘कू’ गर्दै शासन आफ्नो हातमा लिए ।
त्यसपछि पार्टीहरु प्रतिवन्धमा परे । नेताहरुलाई जेल हालियो । २०२५ कात्तिक १४ गते वीपी कोइरालालगायत नेता जेलमुक्त भए र उनीहरु भारतमा निर्वासनमा गए । २०३३ साल पुस १६ गते वीपी कोइराला, गणेशमान सिंह, शैलजा आचार्य, खुमबहादुर खड्कासहितका नेता आफूहरुमाथि लगाइएको मृत्युदण्डको मुद्दा यथावत रहँदै स्वदेश फर्किए । मुलुकमा प्रजातन्त्रको लडाईमा ठूलो योगदान गरेका नेताहरुको यस आँटको सम्झनामा कांग्रेसले मेलमिलाप दिवस घोषणा गरेको थियो ।
काठमाडौं । काठमाडौंको चन्द्रागिरि नगरपालिका–१२, गुर्जुधारामा टिपरको ठक्करबाट दुई जनाको ज्यान गएको छ । प्रहरीका अनुसार धादिङको गल्छी घर भइ थापाथली बस्ने २७ वर्षीय अभय लामा र चितवन घर भइ गुर्जुधारा बस्ने २५ सुभास गमालको मृत्यु भएको हो ।
बुधबार राति १० बजेतिर बा ४ ख २५७७ नम्बरको टिपरले काठमाडौं आयल स्टोर नजिकै बाटो काट्दै गरेका लामा र गमाललाई ठक्कर दिएको थियो । दुवै जनाको घटनास्थलमै ज्यान गएको छ । प्रहरीले चालक रामचन्द्र थापा र टिपरलाई समेत नियन्त्रणमा लिएको छ । राजधानीमा साँघुरा संरचनामा समेत तिब्र गतिमा कुद्ने टिपर सडक दुर्घटनाका मूख्य कारक बन्दै गएका छन् ।
काठमाडौं । नेकपा अध्यक्ष तथा पूर्वप्रधानमन्त्री पुष्प कमल दाहाल (प्रचण्ड)की पत्नी सीता दाहाल अस्पताल भर्ना भएकी छिन् । उनमा वंशानुगत पार्किन्सन जस्तो देखिने रोग रहेको छ । सीताको स्वास्थ्यमा थप समस्या देखिएपछि बुधबार बिहान करिब ११ बजे उनलाई मेडीसिटी अस्पताल भर्ना गरिएको दाहालकी छोरी गंगाले सामाजिक सञ्जालमार्फत पुष्टी गरेकी छिन् ।
सीता अस्पताल भर्ना भएपछि उनलाई भेट्न प्रचण्ड दिउँसो अस्पताल पुगेका थिए । पार्टीमा देखिएको विवादका बीच प्रचण्ड दौडधुपमा छन् । यसैबीच प्रधानमन्त्री केपी शर्मा ओलीले बुधबार साँझ प्रचण्डलाई टेलिफोन गरी पत्नि सीताको स्वास्थ्य लाभको कामना गरेका छन् ।
पार्टीमा फाटो आएपछि सार्वजनिक कार्यक्रममा नेताहरुबीच एक अर्काको उछितो काड्ने क्रम जारी छ । तर, पहिलो पटक टेलिफोनमा वार्ता भएको हो । बुधबार साँझ प्रधानमन्त्रीले आफु निकट दुई नेता विण्णु पौडेल र सुवास नेम्वांगलाई समेत आफ्नो सन्देशसहित अस्पताल पठाएका थिए ।
काठमाडौं । सत्तारुढ दल नेपाल कम्युनिष्ट पार्टी (नेकपा) को बैंक खाता रोक्का हुने निश्चित भएको छ । नेकपा भित्र प्रचण्ड-नेपाल समुहले बैंक खाता रोक्का गर्न निवेदन दिएको थियो । सबै बैंकहरुलाई निवेदन दिएसँगै बैंक खाता रोक्का प्रक्रिया अगाडी बढेको हो । आन्तरिक विवादपछि नेकपा विभाजनको औपचारिक घोषणा हुन मात्र बाँकि छ ।
यसको छिनोफानो भने निर्वाचन आयोगले गर्नेछ । नेकपाको विवाद समाधान नहुञ्जेलसम्म जुनजुन बैंकमा खाता छन्, ति सबै बैंक खाता रोक्का हुने निश्चित भएको हो । निर्वाचन आयोगको निर्णय नआउञ्जेलसम्म दुबै पक्षले खाता सञ्चालन गर्न नपाउने गरी रोक्का हुने प्रावधान रहेको नेपाल राष्ट्र बैंकलाई उदृत गर्दै नेपाली संचारमाध्यमले उल्लेख गरेका छन् ।
पार्टीभित्र बिवाद रहेको र सम्पत्तिमा कसको हक लाग्ने भन्ने यकिन नभएको भन्दै तत्काल खाता रोक्का गर्न पुष्पकमल दाहाल ‘प्रचण्ड’ र माधव नेपालले हस्ताक्षर गरेर बैंकहरुलाई पत्राचार गरेका हुन् । अन्य प्रक्रियामा ओली समुह अगाडी देखिएको छ ।
यसमा भने प्रचण्ड माधव नेपाल समुहले चलाखी गरेका छन् । विवाद भएको लिखित पत्र नै आएपछि विवाद समाधान नहुञ्जेलसम्म रोक्का गर्ने प्रचलन रहेको नेपाल राष्ट्र बैंकका अधिकारीहरुको भनाई छ । विवाद भएपछि खाता सञ्चालन नहुने बताइएको छ । यस प्रकारका विवाद अन्य समयमा आउने भन्दै राजनीतिक दलको हकमा भने यो पहिलो भएको बैंकर्षहरुको भनाई छ ।
काठमाडौं । प्रधानमन्त्री केपी शर्मा ओलीले प्रचण्ड(नेपाल समूहलाई निर्वाचनको तयारी थाल्न आग्रह गरेका छन् ।
सूदुरपश्चिम प्रदेश स्तरीय कार्यकर्ता भेलालाई काठमाडौंको बबरमहलस्थित कार्की ब्याङ्कवेटमा सम्बोधन गर्दै ओलीले यस्तो बताएका हुन्।
संसद पुनर्स्थापना नहुने उल्लेख गर्दै ओलीले भने कहाँ सडकमा गएर कपडा बिगार्या? उहाँहरु सिंगौरी खेल्दै हुनुहुन्छ।
कहिले माइतीघरमा कहिले भृकुटीमण्डपमा। एक्लै सिंगौरी खेलेर केही हुन्न। चुनाव लड्दा थाहा हुन्छ। जनताले देखाइदिन्छन्। तर पनि मेरो शुभकामना छ उहाँहरु पनि केही सिट जित्नुस्।’ निर्वाचनमा आउनुस्, बत्ती निभाइँदैन, मतपत्र च्यातिदैन । च्यात्न दिइँदैन । बाक्सा साट्न दिइँदैन । यस्तो तमासा लोकतन्त्रमा गर्न पाइदैन । स्वच्छ निर्वाचन हुन्छ । शान्त निर्वाचन हुन्छ ।’
सम्बोधनका क्रममा उनले यसअघि चुनावमा मतपत्र च्यातिएको समेत स्मरण गरे । ‘प्रचण्डले कांग्रेससँग मिलेर पनि छोरी जिताउन गाह्रो थियो । छोरी जिताउन नसकेपछि मतपत्र च्यातेर धुजाधुजा पार्नुभएको थियो,’ उनले भने ।
काठमाडौं । प्रधानमन्त्री केपी ओलीले संसद पुनःस्थापना कुनै पनि हालतमा नहुने प्रष्ट पारेका छन् ।
बुधबार काठमाडौंको कार्की बैंङ्क्येटमा आयोजित कार्यकर्ता भेलालाई सम्बोधन गर्दै ओलीले ६४ प्रतिशत बहुमत प्राप्त सरकारले विघटन गरेको दाबी गरे ।
अहिले जो जहाँ गए पनि विघटन हुँदा ६४ प्रतिशत थियो । संसद् पुनःस्थापना किन ? तमासाका लागि ? उनले प्रश्न गरे । अब अरुको सरकार बन्दैन । संविधानमा पनि त्यो व्यवस्था छैन ।
उनले बाँकी ३६ प्रतिशतले सरकार बनाउने अवस्था नभएकाले अबको विकल्प चुनाव नै भएको बताए । प्रधानमन्त्री ओलीले प्रचण्ड–नेपालसँग बहुमत नभएको स्पष्ट पारे ।
‘म मित्रताले अँगालो हाल्छु उहाँ धृतराष्ट्रको जस्तो अंगालो हाल्नुहुन्छ । मैले उहाँलाई षड्यन्त्रकारी राजनीतिक छोड्नुस् । राजनीति भनेको इमान्दारिताका साथ जनताको सेवा गर्नुपर्छ भनेको छु । उहाँ बहुमत छ भन्नुहुन्छ । के को बहुमत छ ?, उनले भने ।
काठमाडौं । उद्योगमन्त्री लेखराज भट्टले पुष्पकमल दाहाल ‘प्रचण्ड’ र माधव नेपाल समूहलाई सानो झिल्को भएको बताएका छन् ।
केपी ओली समूहले बबरमहलमा आयोजना गरेको सुदूरपश्चिम प्रदेश स्तरीय कार्यकर्ता भेलामा मन्त्री भट्टले यस्तो बताएका हुन् । मन्त्री भट्टले प्रचण्डसँग आफ्नो ४० वर्षको सहयात्रा रहेको बताउँदै प्रचण्ड पनि ओली समूहमा आउने दाबी गरेका छन् । उनले महाधिवेशनसम्म प्रचण्डले धैर्यता गर्न नसकेर नेकपा फुटेको आरोप लगाएका छन् । उनले व्यक्तिको महत्वकाङ्क्षा पूरा नभएपछि पार्टी विभाजन भएको बताएका हुन् ।
‘विभाजन भनेको सत्रुतापूर्ण नै हो । किनभने अहिले हामीबीच विचारमा मतभेद छैन् । सैद्धान्तिक, वैचारिक राजनीतिक रुपमा के हो भन्ने छैन् । अहिलेको विभाजन भनेको व्यक्तिको महत्वकाङ्क्षा पूरा नभएपछि विभाजन हो । कसैलाई प्रधानममन्त्री र कसैलाई अध्यक्ष चाहिएको छ ।
पार्टीको कार्यकारी अध्यक्षले आफ्नो जिम्मा पूरा गरेर महाधिवेशनसम्म जाने धैर्यता उहाँ भएन’, उनले भने, ‘त्यसकारण उहाँहरुको अधैर्यता, महत्वकांक्षा सबै बुझिन्छ । बिस्तारै सबैले बुझ्दै जान्छन् र फेरी उहाँहरु यही ठाउँमा आउनुहुन्छ । प्रचण्डसँग मैले ४० वर्ष सहकार्य गरेको छु ।
हामी गएपछि साथीहरु आइहाल्छन् यसमा शंकै छन् । बहुमत प्राप्त प्रधानमन्त्रीले सर्वस्वीकृतपार्टीको नेता त्यो नेतालाई काम गर्न नदिएपछि संविधानमा टेकेर नयाँ जनादेशमा जान्छु भन्नु त्यो कलंक कसरी हुन्छ ? जनादेशमा जान उहाँहरु(प्रचण्ड–नेपाल) किन आत्तिएको ?’
मन्त्री भट्टले कसैले चाहेर पार्टी विभाजन नभएको र गत बैशाखको निर्वाचन आफूहरुले नै जित्ने दाबी गरेका छन् ।
‘पार्टीभित्रको अन्तरद्वन्द्वले यो स्थितिमा पुर्यायो । कसैले पनि चाहेको कुरा होइन । प्रधानमन्त्रीले चाहेर भएको होइन् । परिस्थिति सिर्जना गरेपछि यसलाई रोक्ने को हो त ? संसद विघटन गरेर जनादेशमा जानु नै सही कदम हो ।
अब निर्वाचन हुन्छ । हामी जनताबाट जितेर आउँछौं । निर्वाचन हुन्छ भन्ने विश्वस्त छु । अदालतले सरकारको कदमलाई सही हो भन्छ’, उनले भने ।
काठमाडौं। नेपालमा थप ५११ जनामा कोरोना भाइरसको संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप ५११ जनामा कोरोना संक्रमण पुष्टि भएको हो ।
योसँगै कोरोना संक्रमितको संख्या २ लाख ६० हजार ५९ पुगेको छ ।
स्वास्थ्य मन्त्रालयका अनुसार ६ सय जना कोरोनालाई जितेर अस्पतालबाट डिस्चार्ज भएका छन् । यो सँगै अहिलेसम्म २ लाख ५१ हजार ९ सय १२ जना संक्रमणमुक्त भएका छन् । संक्रिय संक्रमितको संख्या ६ हजार ३ सय रहेको छ ।
काठमाडौं । नेपाल स्टक एक्सचेञ्ज (नेप्से) साताको चौथो दिन आज (बुधबार) हरियाली छाएको छ । आज नेप्से ४९.१७ अंकले बढेर दुई हजार ६२ दशमलब ६ विन्दुमा पुगेको छ भने ४ अर्ब ४४ करोड ६२ लाख २२ हजार ५७९ रुपैयाँ बराबरको कारोबार भएको छ ।
नेप्सेका अनुसार आज कारोबार भएका कूल १२ उपसमूहमध्ये दुई वटा समूह घटेका छन् भने १० वटा समूह बढेका छन् ।
आज कारोबारमा आएका १२ वटा समूहमध्ये होटल र विकास बैंक बाहेक अन्य सबै समूहको परिसूचकमा हरियाली छाएको छ । आज उत्पादनमूलक समूहको परिसूचक सबैभन्दा धेरै ३४८.२१ अंकले बढेको छ भने होटल समूह १९.२४ अंकले घटेको छ ।
कारोबारमा आएका २०८ कम्पनीमध्ये ११७ कम्पनीको सेयर मूल्य बढेको छ भने ६४ कम्पनीको मूल्यमा गिरावट आएको छ । २७ कम्पनीको मूल्य स्थिर रहेको छ ।
आज लगानीकर्ता शिवम् सिमेन्टको सेयरमा झुम्मिएका छन् । यसको आज सबैभन्दा धेरै ३४ करोड ४४ लाख रुपैयाँ बढीको कारोबार भएको छ ।
कारोबार रकमकै आधारमा एनआइसी एशिया बैंक ३२ करोड र हिमालयन डिस्ट्रीलरी २८ करोड सहित क्रमशः दोस्रो र तेस्रोमा रहे ।
बढ्दो बजारमा आज चार कम्पनीको सेयर मूल्यमा पोजेटिभ सर्किट लागेको छ । साल्ट ट्रेडिङ, हिमालयन डिस्ट्रीलरी, नागरिक लगानी कोष र एभरेष्ट बैंकको प्रमोटर सेयरधनीले करिब १० प्रतिशत कमाएका छन् ।
यस साता लगातार पोजेटिभ सर्किट लाग्दै आएको नारायणी विकास बैंकको सेयर मूल्यमा भने आज नेगेटिभ सर्किट लागेको छ । यसका सेयरधनीले ठ्याक्कै १० प्रतिशतले गुमाएका छन् ।
काठमाडौं । एसियाली विकास बैंक (एडिबी) ले नेपालको विद्युतीय ग्रीड आधुनिकीकरणका लागि १८ अर्ब २५ करोड रुपैयाँ (अमेरिकी डलर १५६ मिलियन बराबर) को ऋण दिने भएको छ ।
अर्थ मन्त्रालयमा आयोजित कार्यक्रममा सरकारको तर्फबाट सहसचिव श्रीकृष्ण नेपाल र एसियाली विकास बैंकका नेपाल आवासीय कार्यालयका अफिस इन्चार्ज रुडी भ्यान डेलले ऋण सम्झौतामा हस्ताक्षर हस्ताक्षर गरेका हुन् ।
विद्युतीय ग्रीड आधुनिकीकरण आयोजनाको कुल लागत करिब २२ अर्ब ८१ करोड रुपैयाँ (अमेरिकी डलर १९५ मिलियन बराबर) रहेकोमा १८ अर्ब २५ करोड एसियाली विकास बैंक र बाँकी ४ अर्ब ५६ करोड रुपैयाँ (अमेरिकी डलर ३९ मिलियन बराबर) नेपाल सरकार र नेपाल विद्युत प्राधिकरणको स्रोतबाट व्यहोरिनेछ ।
यो आयोजनाले विद्युत् वितरणसम्बन्धी तीनओटा मुख्य क्रियाकलापलाई जोड दिएको छ । विद्युत् सबस्टेसनलाई स्वचालित बनाउने, विद्युत् वितरणलाई विश्वसनीय र गुणस्तरीय बनाउने काम आयोजनाले गर्ने सहसचिव नेपालले बताए ।
आयोजनाले विद्युत् प्राधिकरणको संस्थागत क्षमता अभिवृद्धि गर्नलाई सहयोग गर्ने विश्वास गरिएको छ । आयोजना पाँच वर्षमा सम्पन्न हुनेछ ।
काठमाडौं । नेकपा प्रचण्ड–नेपाल समूहले वागमती प्रदेशको संसदीय दलको नेतामा अष्टलक्ष्मी शाक्यलाई चयन गरेको छ ।
बुधवार केन्द्रीय कार्यालय पेरिसडाँडामा शाक्यको अध्यक्षतामा बसेको प्रदेशसभा संसदीय दलको बैठकले वागमती प्रदेशको संसदीय दलको नेताबाट डोरमणि पौडेललाई हटाएर उनलाई ९शाक्य०चयन गरेको हो ।
बाग्मती प्रदेशका मुख्यमन्त्री पौडेलविरुद्ध अविश्वासको प्रस्ताव दर्ता भएको छ । अब उनले एक महिनाभित्र विश्वासको मत लिनुपर्नेछ ।
बागमती प्रदेशमा नेकपाका ८१ जना संसद छन् । जसमध्ये ४५ जना शाक्यको पक्षमा रहेको स्रोतले जानकारी दियो । बागमती प्रदेशमा जम्मा प्रदेश सांसदको संख्या ११० रहेको छ ।
काठमाडौं । चिनियाँ कम्युनिष्ट पार्टीको अन्तर्राष्ट्रिय विभागका उपमन्त्री गुओ येचौको नेतृत्वको टोली स्वदेश फर्किएको छ ।
चार दिने भ्रमणमा आइतबार नेपाल आएको चिनियाँ प्रतिनिधिमण्डलको टोली बुधबार बिहान हिमालय एयरलाइन्सबाट स्वदेश फर्किएको हो ।
भ्रमणका क्रममा उक्त उच्चस्तरीय प्रतिनिधि मण्डलले नेपालका शीर्ष नेतृत्वसँग भेटघाट गरेको थियो ।
प्रधानमन्त्रीको सिफारिसमा राष्ट्रपतिले पुस ५ गते प्रतिनिधिसभा विघटन गरेसँगै आन्तरिक किचलोमा रहँदै आएको नेकपा दुई भागमा विभक्त भयो । त्यसपछि चिनियाँ कम्युनिष्ट पार्टीका महासचिव समेत रहेका राष्ट्रपति सी जितपिङको एकता सन्देश लिएर टोली आएको थियो ।
नेपाल कम्युनिष्ट पार्टीको विभाजनपछि उनीहरुलाई पुनः एक ठाउँमा ल्याउन चिनियाँ टोली आएको भनिएका बेला त्यसलाई उनीहरुले खण्डन गर्दै नेपाल–चीन सहयोग, कोभिड–१९ महामारीलाई नियन्त्रण गर्न सहयोगको आदान प्रदान जस्ता विषयमा आफ्नो भ्रमण केन्द्रित रहेको स्पष्ट पारेको छ ।
काठमाडौं । बेलायतबाट पहिलो पटक पुष्टी भएको कोरोना भाइरस कोभिड १९ को नयाँ जिवाणु अमेरिका र भारतमा समेत पुष्टी भएको छ । अमेरिकाको कोलोराडोमा एक व्यक्तिमा नयाँ जिवाणु पुष्टी भएको अमेरिकी संचारमाध्यमले जनाएका छन् । ती व्यक्तिको ट्राभल हिष्ट्री सार्वजनिक गरिएको छैन । उनलाई आइसोलेसनमा राखिएको बताइएको छ ।
सरकारी अधिकारीहरुका अनुसार उनको सम्पर्क र अमेरिकामा अन्य नयाँ केसको बारेमा थप अध्ययन जारी रहेको छ । यता, भारतमा भने बेलायतबाट आएका ६ जनामा नयाँ भाइरस पुष्टी भएको हो । नेपालमा समेत १ पुसयता बेलायतबाट आएका ५ जनामा कोरोना पुष्टी भएको छ । तर, उनीहरुमा कुन प्रकारको भाइरस छ भन्ने चाँही खुलिसकेको छैन । बेलायतबाट आएका सबैजना होटेल आइसोलेसनमा छन् ।
काठमाडौं । नेपालमा पुसे १५ को विशेष महत्व छ । १५ पुुसका दिन नेपालमा सबैजसो समुदाय तथा जातिले छुट्टाछुट्टै महिमाका साथ यो पर्व मनाउँछ । आज मंसिर पूर्णिमा अर्थात् धान्य पूर्णिमा समेत हो । ब्रामण तथा क्षेत्रीहरुमा अधिकांशको आज कुल पूजा हुने गर्छ । आजको दिन नेवार समुदायले धान्य लक्ष्मीको प्रतिमा स्वरूप योमरीको पूजा गर्ने प्रचलन रहेको छ ।
प्रकृतिपूजक किरातहरूले यस दिलाई उधौली पर्वका रुपमा मान्ने गरेका छन् । त्यसो त हरेक वर्ष पुस १५ मा गुरुङ जातिको ल्होछार पर्व समेत आज नै परेको छ । आजको दिनबाट दिन लामो र रात छोटो हुन्छ ज्योतिषीय मान्यता रहेको छ । साथै आजबाट चिसो क्रमशः कम हुँदै जाने र तापक्रम बढ्ने विश्वास समेत लिइन्छ ।
नेपाल कृषिप्रधान मुलुकमा धान भित्र्याइसकेपछि फुर्सदिलो बनेका किसानहरुले पूर्णिमाको पवित्र दिन या रातमा विभिन्न नाच एवं पर्व मनाउने गर्छन् । पुस १५ भने गुरुङहरूको नयाँ वर्ष हो । सोहीकारण आज ल्होछार मनाइने गरेको छ । यता, धान्य पूर्णिमालाई गण्डकी प्रदेशमा समेत विभिन्न जातिहरुको साझा पर्वको रुपमा मान्ने प्रचलन छ ।
त्यहाँका मगर समुदायमा यो दिन जीवनसाथी रोज्ने पर्वको रूपमा प्रचलित छ । मगर समुदायमा भ्यालेन्टाइन डे जस्तै दिनका रुपमा यो दिनलाई चिनिन्छ । धान्य पूर्णिमाका दिन धान नाच गरिन्छ । धान्य पूर्णिमाको जुनेली रातमा कर्णालीको एउटा विशेष क्षेत्रमा मनाइने संस्कृतिका रुपमा धाननाच प्रख्यात छ । यसलाई दैलेखको दुल्लुस्थित कर्णाली नदीको फाँटमा नाच्ने गरिन्छ ।
काठमाडौं । यो वर्ष एसईई दिने विद्यार्थीका लागि आजबाट परीक्षा आवेदन खुलेको छ । राष्ट्रिय परीक्षा बोर्डले माध्यमिक शिक्षा परीक्षा एसईईको आवेदन फारम खुलाएको हो । परीक्षा नियन्त्रण कार्यालयका अनुसार कक्षा १० मा अध्ययनरत विद्यार्थीका लागि २०७७ सालमा सञ्चालन हुने एसईईको आवेदन फारम अब भर्नु पर्नेछ ।
२०७७ सालमा कक्षा १० मा नियमित अध्ययनरत विद्यार्थी, माध्यमिक तहको खुला तथा वैकल्पिक विद्यालय, अनौपचारिक पौढ विद्यालय र प्राविधिक धारतर्फका विद्यालयमा अध्ययनरत विद्यार्थी समेतलाई आवेदन खुला भएको छ । बोर्डका अनुसार आवेदन फारम पुस १६ देखि माघ २१ गतेसम्म भरिसक्नुपर्ने भएको छ ।
आवेदन फारम भर्न प्रतिविद्यार्थी पाँच सय रूपैयाँ शूल्क तोकिएको छ । बोर्डले कक्षा ९ का विद्यार्थीका लागि रजिष्ट्रेशन फारम भर्न समेत भनेको छ । यो वर्ष एसईई परीक्षा हलमै गर्ने तयारी छ । गत वर्ष भने आन्तरिक मूल्यांकनका आधारमा अंक दिइएको थियो ।
काठमाडौं । नेपालमा थप ७०८ जनामा कोरोना भाइरसको संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको ६ हजार १३५ जनाको पिसिआर परीक्षणमा थप ७०८ जनामा कोरोना संक्रमण पुष्टि भएको हो ।
योसँगै कोरोना संक्रमितको संख्या २ लाख ५९ हजार ५ सय ४८ सय पुगेको छ ।
यस्तै, पछिल्लो २४ घण्टामा कोरोना संक्रमणबाट ८ जनाको मृत्यु भएको छ। योसँगै कोरोना संक्रमणबाट अहिलेसम्म मृत्यु हुनेको संख्या १८४० पुगेको छ।
स्वास्थ्य मन्त्रालयका अनुसार ७ सय ३१ जना कोरोनालाई जितेर अस्पतालबाट डिस्चार्ज भएका छन्। यो सँगै अहिलेसम्म २ लाख ५१ हजार ३ सय १२ जना संक्रमणमुक्त भएका छन्। भने संक्रिय संक्रमितको संख्या ६ हजार ३९६ पुगेको छ ।
काठमाडौं । नेकपा प्रचण्ड-माधव समूहका अध्यक्ष पुष्पकमल दाहाल ‘प्रचण्ड’ले प्रधानमन्त्री केपी ओली अहिलेसम्म पनि बयलगाढावाला सिद्धान्तमै अडिग रहेको बताएका छन् ।
राजधानीमा आयोजित विरोधसभामा सम्बोधन गर्दै प्रचण्डले प्रधानमन्त्री ओलीले गणतन्त्रलाई स्वीकार गरिनसकेको र बयलगाडाकै सिद्धान्तमा रहेको टिप्पणी गरेका हुन् । केपी ओलीलाई चिन्न नसकेको भन्दै उनले क्षमासमेत मागेका छन् ।
‘गणतन्त्रको पक्षमा आँधीहुरी आए पनि म स्वीकार्छु भन्नुभएको थियो । तर, ओलीले मनबाट गणतन्त्र स्वीकार गर्नुभएको थिएन । प्रतिनिधिसभा विघटन गरेर उहाँ बयलगाडामा नै अडिग रहेको प्रष्ट देखिएको छ । उहाँलाई चिन्न नसकेकोमा म जनतासमक्ष माफी माग्न चाहान्छु,’ प्रचण्डले भने ।
सभामा बोल्दै उनले भने, ‘हामीले बुझ्न सकिएन छ,केपी ओलीलाई । यति छिटो संविधानमाथि निमर्म प्रहार गर्न सकेको थिएन् । हामीले बनाएको कम्युनिस्ट पार्टीको अध्यक्षले गर्नुहोला भनेर सपनामा पनि सोचेका थिएनौं ।’
उनले भने आफूले नै बनाएको प्रधानमन्त्री केपी ओलीका कारण संविधान र गणतन्त्रमाथि प्रहार भएको भन्दै जनतासँग क्षमा चाहान्छु । ‘तीन वर्षअघि पार्टी एकीकरणको प्रस्ताव लिएर जाँदा तीन वर्षपछि ओलीका विरुद्ध आन्दोलन गर्नुपर्ला भनेर सोचेको थिइनँ, विडम्बना आज विरोध प्रदर्शन र सभा गर्दैछौं,’ प्रचण्डले भने ।
प्रचण्डले केपी ओलीलाई प्रधानमन्त्री बनाएकोमा क्षमा माग्नुपर्ने अवस्था आएको बताए ।
‘गणतन्त्र उहाँको सिद्धान्त होइन, बयलगाडावाला सिद्धान्त हो भन्ने थाहा थियो । उहाँ संघीयता र धर्मनिरपेक्षता पक्षधर होइन भन्ने थाहा थियो, तर गणतन्त्रको बाढी आएपछि उहाँ बगेर आउनुहोला भन्ने लागेको थियो,’ प्रचण्डले भने, ‘आज घटनाक्रमले के पुष्टि गर्यो भने उहाँ गणतन्त्रविरोधी बयलगाडामै हुनुहुँदोरहेछ ।’
काठमाडौं । नेपाल कम्युनिस्ट पार्टीका अध्यक्ष माधवकुमार नेपालले प्रधानमन्त्री केपी ओलीमा कम्युनिस्टमा हुनुपर्ने गुण नै नभएको बताएका छन् ।
राजधानीमा आयोजित विरोध सभालाई सम्बोधन गर्दै नेपालले ओलीमा लोकतान्त्रिक गुणसमेत नभएको बताए । ओली असंवैधानिक कदमबाट पछि हटे आफूहरु सबै कुरा बिर्सनसमेत तयार रहेको नेता नेपालले बताए । नेपालले निरंकुश केपी ओलीको आयु पुगेको र सच्चिनका लागि अन्तिम मौका रहेको बताए ।
पार्टी अनुशासनको उल्लंघन गर्दै स्वेच्छाचारी कदम चालेपछि अध्यक्ष पदबाट हटाएपनि केन्द्रीय सदस्य र पार्टी सदस्यबाट नहटाएको उनले बताए ।
संसद विघटनको विरोधमा प्रचण्ड–माधव समूहले राजधानीमा गरेको विरोध सभालाई सम्बोधन गर्दै अध्यक्ष नेपालले भने, ‘सुध्रिनिहुन्छ कि भनेर आशा गरेका छौं । केन्द्रीय सदस्य, पार्टी सदस्यबाट हटाएका छैनौं । अन्तिम मौका दिएका छौं ।’
तर, मैले भनेको छु बालुवाटारको बालुवा पेल्दा-पेल्दा तेल निकाल्न सकिन्छ कि ? तेल निकाल्नुभयो भने धन्यवाद । बाङ्गो पुच्छरलाई तेल घस्दा सोझो बनाउन सक्नुहन्छ भने धन्यवाद,’’ उनले भने ।
काठमाडौं । नेपाल कम्युनिस्ट पार्टीका वरिष्ठ नेता झलनाथ खनालले प्रधानमन्त्री केपी ओलीको प्रतिगामी कदमका कारण आफूहरु सडकमा आउन बाध्य भएको बताएका छन् ।
राजधानीमा आयोजित विरोध सभालाई सम्बोधन गर्दै ओलीजस्ता तानाशाहले संविधान र लोकतन्त्रमाथि प्रहार गरे त्यसैले सडकमा आउन बाध्य भएका बताएका हुन् ।
खनालले प्रधानमन्त्री ओलीको चर्को आलोचना गरे । खनालले भने, ‘पार्टीका नीति बिर्सनुभयो, एकलौटी ढंगले मन्त्रिपरिषद् बनाउनुभयो, नीति कार्यक्रम ल्याउनुभयो ।’
‘कहिले पानी जहाजको कुरा गर्नुभयो, कहिले घरघरमा पाइपबाट ग्यास ल्याउने कुरा गर्नुभयो । खोइ पानी जहाज ? खोइ घरघरमा ग्यास पाइप ?’ उनले भने ।
हामीले पटक पटक सोध्यौँ–उहाँ भन्नुहुन्छ , मैले काम गरेको देखेर विश्व चकित भएको छ । उहाँ भन्नुहुन्छ मैले सडक र पूल हालेको छु । केपी ओलीले रानीपोखरी बनाएँ भन्नुहुन्छ । उहाँले बनाएको हो ? कालिगढहरुले बनाएका हुन् उहाँहरुलाई धन्यवाद दिनुपर्छ ।
त्यस्तै अष्टलक्ष्मी शाक्य प्रधानमन्त्री केपी शर्मा ओली कमरेड बन्न नसकेको बताएकी छन् । शाक्यले ओलीलाई निरंकुश शासक बनेको आरोप लगाइन् ।
‘हामीले आदर गरेको ओली कमरेड बन्नु भएन, उहाँ निरंकुश शासक बन्नुभयो, स्वच्छाचारी शासक बन्नुभयो, सामन्ती शासक बन्नुभयो, सर्वोसत्तावादी शासक बन्नुभयो’, उनले भनिन्,‘ जनतामाथि धावा बोल्नुभयो।’
प्रधानमन्त्री ओलीले संविधानमाथि कू गरेकोसमेत शाक्यले आरोप लगाइन् । उनका अनुसार जनताले ओली सरकारमाथि जुन आशा गरेका थिए त्यो तोडिएको छ । ‘जबसम्म ओलीले खोस्न लागेको अधिकार प्राप्त गर्न सक्दैनौँ जबसम्म हामी रोकिँदैनौँ’, उनले भनिन् ।
काठमाडौं । अमेरिकामा नोवेल कोरोना भाइरसको महामारीबाट प्रभावित बनेका व्यक्तिहरुले पुनः २ हजार डलर बराबरको राहत रकम पाउने भएका छन् ।
अमेरिकाले महामारीको चपेटामा परेकालाई तत्कालै पाउने गरी पुनः २ हजार डलर बराबरको राहत चेक वितरण गर्न लागेको हो ।
यसअघि अमेरिकाले अप्रिलमा कोरोना संक्रमित आफ्नो नागरिकलाई १२ सय डलर बराबरको राहत चेक वितरण गरेको थियो ।
कोरोनाको कारण सबैभन्दा धेरै मानविय क्षति व्यहोर्ने देशमा अमेरिका शिर्ष स्थानमा छ । सरकारले यसअघि विभिन्न चरणमा गरी कोरोना भइरसबाट उत्पन्न संकटमोचनका लागि अमेरिकाको इतिहासमै सर्वाधिक तीन ट्रिलियन डलरभन्दा बढी राशीको आर्थिक सहायता प्याकेज ल्याइसकेको छ ।
विधेयकमा राज्यको कर प्रणालीमा आबद्ध भई वार्षिक ७५ हजार डलरभन्दा कम आम्दानी गर्ने प्रत्येक वयस्क मानिसले २ हजार डलरको चेक आपतकालिन राहत स्वरूप पाउने छन् भने कोरोना महामारीका कारण काम गुमाएकाहरूलाई साप्ताहिक ३ सय डलर कम्तीमा १० हप्ताका लागि दिइने कुरा समेटिएको बताइएको छ ।
यद्यपि यो विधेयक चालु संसदको आयु सकिन ठिक ६ दिन बाँकी हुँदा ल्याइएको छ । गत नोभेम्वर ३ मा सम्पन्न राष्ट्रपतीय निर्वाचनमा जो बाइडेन विजयी भएका थिए । उनले जनवरी २० मा राष्ट्रपति पदको सपथ लिदैछन् । हालै विजयी सांसदहरूले जनवरी ३ बाट पदभार समाल्ने छन् ।
अमेरिकामा कोरोना संक्रमणबाट अहिलेसम्म ३ लाख ४० हजारभन्दा धेरै मानिसको मृत्यु भईसकेको छ भने संक्रमितको संख्या झण्डै २ करोड पुगेको छ ।
करीव ३ लाख नेपालीहरूको बसोबास अनुमान गरिएको अमेरिकामा झण्डै ५० हजार नेपालीले अमेरिकाको नागरिकता प्राप्त गरेको तथा करीव १ लाखको हाराहारीमा रहेका ग्रीनकार्ड होल्डरसहित अन्य विभिन्न स्टाट्समा रहेका समेत गरी लगभग २ लाख नेपालीहरू यस राहत प्याकेजबाट लाभान्वित हुने छन् ।
अमेरिकाले महामारीको चपेटामा परेकालाई तत्कालै पाउने गरी पुनः २ हजार डलर बराबरको राहत चेक वितरण गर्न लागेको हो ।
यसअघि अमेरिकाले अप्रिलमा कोरोना संक्रमित आफ्नो नागरिकलाई १२ सय डलर बराबरको राहत चेक वितरण गरेको थियो ।
कोरोनाको कारण सबैभन्दा धेरै मानविय क्षति व्यहोर्ने देशमा अमेरिका शिर्ष स्थानमा छ ।
अमेरिकामा कोरोना संक्रमणबाट अहिलेसम्म ३ लाख ४० हजारभन्दा धेरै मानिसको मृत्यु भईसकेको छ भने संक्रमितको संख्या झण्डै २ करोड पुगेको छ ।
काठमाडौं । । केपी ओली समूहमा रहेका सुदूरपश्चिम प्रेशका भौतिक पूर्वाधार विकास मन्त्री पठानसिंह बोहरालाई बर्खास्त गरिएको छ ।
विभाजित नेकपा अध्यक्षद्वय पुष्पकमल दाहाल ‘प्रचण्ड’ र माधवकुमार नेपाल पक्षीय मुख्यमन्त्री त्रिलोचन भट्टले ओली पक्षीय मन्त्री बोहरालाई मंगलवार बर्खास्त गरेका हुन् ।
नेकपा विभाजित भएपछि मन्त्री बोहरा ओली पक्षमा लागेका थिए । मुख्यमन्त्री भट्टले बोहरालाई बर्खास्त गरेर प्रचण्ड–नेपाल पक्षकै मन्त्री नियुक्त गर्ने तयारी गरेका छन् ।
आफ्नै समूहभित्र असन्तुष्टि देखिँदा मुख्यमन्त्री पद नै धरापमा पर्ने अवस्था आएपछि भट्टले ओली पक्षका मन्त्रीहरू हटाएर आफ्नो पक्षबाट नियुक्त गर्दै असन्तुष्टि समाधान गर्ने तयारी गरेका छन् ।
सुदूरपश्चिम प्रदेशका मुख्यमन्त्री भट्ट प्रचण्ड निकट हुन । नेकपा केन्द्रमा देखिएको विभाजनको असर प्रदेश सरकारमा पनि देखा पर्न थालेको छ ।
काठमाडौं । नेपालमा यो वर्ष अहिलेसम्मकै सबैभन्दा धेरै धान उत्पादन भएको छ। रासायनिक मलको चरम अभाव भएपनि मौसम अनुकूल भएकाले यस वर्ष धान उत्पादन बढेको हो।
कृषि तथा पशुपन्क्षी विकास मन्त्रालयले सार्वजनिक गरेको तथ्यांक अनुसार यस वर्ष चैते र बर्खे गरी ५६ लाख २१ हजार सात सय १० मेट्रिक टन धान फलेको छ । यो गत वर्षको तुलनामा ७० हजार मेट्रिक टन धेरै हो ।
गत आर्थिक वर्षमा धानको उत्पादन ५५ लाख ५० हजार ८ सय ७८ मेट्रिक टन भएको थियो । मन्त्रालयको तथ्यांक अनुसार गतआर्थिक वर्षको तुलनामा यस आर्थिक वर्षमा धानको उत्पादन १.२८ प्रतिशतले बृद्धि भएको छ ।
यसवर्ष विगतका वर्ष भन्दा १४ हजार हेक्टर ५ सय ५९ हेक्टर क्षेत्रफल बढीमा धान रोपाइ भएको थियो । मन्त्रालयको तथ्यांक अनुसार कुल १४ लाख ७३ हजार ४ सय ७४ हेक्टर क्षेत्रफलमा धान उत्पादन भएको हो । धानको उत्पादनकत्व ३.८२ पुगेको छ । यो गतवर्षको भन्दा यसवर्ष धान उत्पादकत्व ०.२८ प्रतिशत बढी हो ।
तथ्यांक अनुसार उत्पादन बढे पनि नेपाल अझै धानमा अत्मनिर्भर हुन सकेको छैन। यस वर्ष पनि झण्डै १० लाख टन धन अपुग हुने अनुमान छ। जनसंख्या बृद्धिको अनुपातमा नेपालमा हरेक वर्ष चामलको माग बढ्ने गरेको छ।
सातवटै प्रदेशमध्ये प्रदेश नम्बर २ मा सवैभन्दा बढी धान उत्पादन भएको छ । प्रदेश नम्बर २ मा १४ लाख ३२ हजार ८१९ मेट्रिक टन धान उत्पादन भएको छ ।
त्यस्तै, प्रदेश नम्बर १ मा १२ लाख ७५ हजार ५५४ मेट्रिक टन, बागमती प्रदेशमा ५ लाख ९ हजार ५९० मेट्रिक टन, गण्डकी प्रदेशमा ३ लाख ९७ हजार ९४ मेट्रिक टन उत्पादन भएको छ ।
लुम्बिनी प्रदेशमा १२ लाख २४ हजार ४९७ मेट्रिक टन, कर्णाली प्रदेशमा १ लाख ३७ हजार १६५ मेट्रिक टन र सुदूरपश्चिम प्रदेशमा ६ लाख ४४ हजार ९९१ मेट्रिक टन धान उत्पादन भएको मन्त्रालयले सार्वजनिक गरेको तथ्यांकमा उल्लेख छ ।
काठमाडौं । पूर्व नेपालको चर्चित धार्मिक गन्तब्य ताप्लेजुङको पाथिभरा यतिबेला आगोलागीको उच्च जोखिममा परेको छ । एक सातायता शुरु भएको डेडलो नियन्त्रणमा आउन नसकेपछि मन्दिर र यस आसपासका संरचना जोगाउनै चूनौति थपिएको छ । प्रहरीका अनुसार सोमबार मन्दिरमै आगो पुग्ने जोखिमपछि सिम्रिक एयरको हेलिकप्टर मगाएर आकासबाट पानी खन्याइएको छ ।
आकासबाट पाँच पटकसम्म पानी खन्याइएको थियो । यसले आगो मूख्य मन्दिरतर्फ अगाडी बढ्न नपाएको बताइएको छ । अहिले ताप्लेजुङको पाथीभरा मन्दिर सुरक्षित रहेपनि जोखिममुक्त भने नभइसकेको बताइएको छ । मन्दिर आसपासको जङ्गलमा बिहीबारदेखि नै डडेलो शुरु भएको हो । हेलिकप्टरले जोरपोखरीबाट पानी लगेर मन्दिर परिसरमा खन्याएको थियो । यसले आगो मन्दिरसम्म पुग्न पाएन ।
हेलिकोप्टरबाट मङ्गलबार पनि पानी खन्याइने भएको छ । त्यसका लागि हेलिकोप्टरलाई सुकेटार विमानस्थल मै राखिएको छ । स्थानीयबासी, नेपाली सेना, नेपाल प्रहरी र सशस्त्र प्रहरीको टोलीले आगो निभाउने प्रयास गरिरहेको भए पनि सफलता प्राप्त हुन सकेको छैन । नजिकमा पानीको स्रोत नभएका कारण पनि समस्या बढेको बताइएको छ ।