Category: फिचर

न्युयोर्क

गत हप्ता सोमबार मिनेसोटा राज्यको मिनियापोलिसमा प्रहरी कष्टडीमा मारिएका जर्ज फ्लोएडको न्यायको माग गर्दै जारी प्रदर्शन अमेरिकादेखि विश्वका अन्य देशमा पनि  फैलिएको छ । अमेरिकामा आइतबार दिउँसो पनि शान्तिपूर्ण सुरु भएको प्रदर्शनले रात पर्दै जाँदा हिँसात्मक रुप लिएको थियो ।  फ्लोएडको न्यायको माग गर्दै अमेरिकाको करिब २५ राज्यका ६० वटा ठुला सहरमा भएका प्रदर्शनले आईतबार पनि हिँसात्मकरुप लिएको थियो । अमेरिकाबाट फ्लोएडको मृत्‍युसंगै सुरु भएको प्रदर्शन सप्ताहन्तमा बेलायत, जर्मनी डेनमार्क, ईटली न्युजिल्यान्ड, क्यानाडा लगायतका देशहरुमा समेत फैलिएको छ ।  

अमेरिका :

अमेरिकामा यो सप्ताहन्त भएको प्रदर्शनमा देशभरबाट करिब ४ हजार प्रदर्शनकारीलाई प्रहरिले नियन्त्रणमा लिएको छ भने देशकै ठुलो सहर न्युयोर्कका मेयर बिल दि ब्लाजियोकी २५ बर्षीय छोरी चियारा पनि प्रदर्शनको क्रममा पक्राऊ परेकी छिन् । यो बीचमा जर्ज फ्लोएडलाई भुईमा सुताएर गर्धनमा घुँडाले थिच्ने पूर्व प्रहरी अधिकृत डेरेक चौभिनलाई प्रहरीले नियन्त्रणमा लिएर उनलाई ‘थर्ड डिग्री मर्डर’ को अभियोग लगाएको छ भने घटनामा संलग्न अन्य तीन प्रहरीलाई सेवा मुक्त गरिएको छ । एक हप्तादेखि जारी प्रदर्शनबाट देखिएको हिँसात्मकरुपलाई नियन्त्रणमा लिन देशका झन्डै आधा राज्यका गभर्नरले राष्ट्रिय सेनाको माग गरेका छन् । कोरोना महामारीले १८ लाख संक्रमित भएर १ लाख ४ हजार मान्छेको मृत्‍यु हुँदा तैनाथ नगरिएको राष्ट्रिय सेनालाई तैनाथ गरी आईतबार २६ राज्यका ४० ठुला सहरमा बसोबास गर्ने लाखौं जनतालाई कर्फ्युमा राखियो ।  

क्यालिफोर्निया राज्यको डाउन टाऊन क्षेत्रका राज्यस्तरीय सम्पूर्ण कार्यालय भवन सुरक्षाका लागि सोमबार बन्द गरिने निर्णय  गरिएको छ । ह्वाईट हाऊस नगरी डि सिमा सोमबारदेखि दुई दिनको लागि मेयर मुरियल ब्राउसर साँझ ७ बजेदेखि कर्फ्यु घोषणा गरी सकेका छन् ।  

अमेरिकामा मात्र होईन न्यायको माग गर्दै अमेरिका बाहिरका अन्य देशहरुमा पनि प्रदर्शन भएका छन् ।  

बेलायत : 

बेलायतस्थित चर्चित ट्राफल्गर स्क्वायरमा  ‘नो जस्टिक, नो पिस’ भन्दै आईतबार बिहान प्रदर्शन भएको थियो भने केही प्रदर्शनकारी नाईन एल्मस क्षेत्रको अमेरिकी दुताबास अगाडि पनि प्रदर्शनको लागि पुगेका थिए ।  

जर्मनी :

जर्मनीको बर्लिनस्थित अमेरिकी दुताबास क्षेत्रमा पनि शनिबार र आईतबार दिनभर जस्तो प्रदर्शन भएको थियो । त्यहाँ भएको प्रदर्शनमा ‘ब्ल्याक लाईफ म्याटर’ र ‘जस्टिस कान्ट वेट’ जस्ता नारा लगाईएका थिए ।  

डेनमार्क : 

आईतबार कोपनहेगनका सडकमा पनि मिनियापोलिसमा मारिएका जर्ज फ्लोएडको न्यायको माग गर्दै ‘नो जस्टिस, नो पिस’ को नारा लगाईए । प्रदर्शन राजधानीस्थित अमेरिकी दुताबासमा भएको थियो ।  

ईटली :

ईटलीको मिलानस्थित अमेरिकी कन्सुलेट अगाडि ‘ब्ल्याक लाईफ म्याटर’ जस्ता नारा लेखिएका ब्यानर सहित प्रदर्शन गरिएको थियो ।  

न्युजिल्याण्ड : 

न्युजिल्याण्डमा पनि सोमबार देशका बिभिन्न सहरमा प्रदर्शन गरिएका थिए । अकल्यान्ड विलिङ्टन क्रिस्ट्चर्च लगायतका ठाँऊमा हजारौंले प्रदर्शन गरेका थिए ।  

क्यानाडा  :

यो सप्ताहन्तको दुई दिन क्यानडाको टोरन्टोमा पनि ‘ब्ल्याक लाईफ म्याटर’ लगायतका नारा गुन्जिए । टोरन्टोमा मात्र होईन, भ्यानकुबरबाट पनि अमेरिकामा जारी प्रदर्शनलाई समर्थन भन्दै प्रदर्शन भए ।

समाचार श्रोत : सि एन एन

न्युयोर्क     

मिनेसोटा राज्यको मिनियापोलिसमा एक अश्वेत युवा जर्ज फ्लोएडको प्रहरी कस्टडीमा मृत्‍यु भएपछि लगातार ३ दिनदेखि भएको प्रदर्शनीमा १७ सय मानिस पक्राउ परेका छन् । गत २५ तारिख सोमबार मृतक फ्लोएडले २० डलरको नक्कली नोट स्थानीय किराना पसलमा चलाऊन खोजेको अभियोगमा पक्राउ परेका थिए । प्रहरीले नियन्त्रणमा लिएको करिव २० मिनेटपछि फ्लोएडको मृत्‍यु भएको थियो । प्रदर्शन अमेरिकाका २२ वटा ठुला सहरमा जारी छ । एक श्वेत जातीका प्रहरीले अश्वेत जातीका फ्लोएडलाई भुईमा सुताएर लगातार ८ मिनेट ४६ सेकेण्ड आफ्नो घुँडाले गर्दन थिचेको र करिब ६ मिनेट पछि मृतक फ्लोएड बेहोस देखिएको भिडियो सार्वजनिक भएको थियो । सोमबार भिडियो सार्वजनिक भएपछि मिनियापोलिसबाट सुरु भएको शान्तिपूर्ण बिरोध प्रदर्शन क्रमिक रुपमा हिँसात्मक बन्दै गएको थियो  । फ्लोएडको न्यायको लागि भन्दै सुरु भएको आन्दोलनले लगातर ३ दिनदेखि हिँसात्मक रुप लिएको छ । सहरका राजनैतिक नेतृत्वले प्रत्येक समुदायलाई कानून सम्मत तरिकाबाट बिरोध जनाउन अनुरोध गर्दै आए पनि तोडफोड लुटपाट र आगजनी साहितका प्रदर्शन शनिबार रातभर जस्तो जारी रह्यो ।  

फ्लोएडको मृत्‍यु पछि घटनाको भिडियोमा प्रत्यक्ष देखिएका प्रहरी अधिकृत डेरेक चौभिनलाई हिरासतमा लिएर मान्छे मारेको अभियोग लगाईएको छ भने भिडियोमा नदेखिएका अन्य ३ प्रहरिलाई सेवाबाट निलम्बन गरिएको छ । न्याय मन्त्रालयले फ्लोएड घटना पूर्ण अनुसन्धानको सबैभन्दा प्राथमिकतामा रहेको बताएको छ ।  

दोश्रो दिन शनिबारदेखि आईतबार बिहानसम्म न्युयोर्कमा भएको प्रदर्शनमा ३ सय ४५ जना पक्राउ परेका छन् । न्युयोर्कमा शनिबार दिउँसो भएको प्रदर्शन सामान्यतया शान्तिपूर्ण देखिए पनि रातीको प्रदर्शनमा प्रहरीको गाडीलाई बोतल हिर्काउने र आगो लगाउने गरिएको थियो । प्रहरीका थुप्रै गाडीमा आगो लगाईएको थियो भने कतिपय गाडीमा ग्राफिटी पेन्ट गरिएको थियो । शनिबार रातीको प्रदर्शनमा न्युयोर्कमा ३३ जना प्रहरी घाईते भएका छन् । ४७ वटा न्युयोर्क प्रहरीको गाडीमा क्षति पुर्याइएको छ ।  

प्रहरीले बिहीवारदेखि यता अमेरिकाका २२ वटा सहरबाट करिव १७ सय प्रदर्शनकारीलाई नियन्त्रणमा लिएको एसोसिएट्स प्रेसले सार्वजनिक गरेको छ । 

ईन्डियानापोलिसको प्रदर्शनीमा प्रहरीले गोली चलाउँदा एक जना प्रदर्शनकारीको मृत्‍यु भएको प्रहरी प्रमुख र्यान्डल टेलरले शनिबार रातीको प्रेस ब्रिफिङमा जानकारी दिए ।  टेलरले अन्य तीन जना प्रदर्शनकारीलाई गोली लागेको बताएका छन् ।  

न्यासभिलबाट गत रात कर्फ्यु उलंघन गर्ने २८ जना पक्राऊ परेको प्रहरीले जनाएको छ ।  एट्लान्टामा ७०, डेनभर १८ जना, मायामीमा ३८ जना पक्राऊ परेका छन् भने फ्लोएडको मृत्‍यु भएको मिजौरीमा सयौं प्रदर्शनकारी पक्राऊ परेको जनाईएको छ । मिनियासोटा  प्रहरी कमिस्नरले राज्यभर पक्राऊ पर्नेहरुको एकिन संख्या सार्वजनिक गर्ने तयारी भै रहेको बताएका छन् ।  

‘टार्गेट’ आन्दोलनको टार्गेटमा 

कोरोना भाईरसको महामारीले हजारौंको ज्यान लिएर लाखौं संक्रमित हुँदा आपूर्ति सेवामा लगातार जुटेको ‘टार्गेट’ अकस्मात फ्लोएड मृत्‍यु प्रकरणको आन्दोलनमा निसानामा परेपछि उस्ले देशका १३ राज्यमा संचालित १ सय ७५ वटा आफ्ना सुपरमार्केट अस्थाई रुपमा बन्द गर्ने निर्णय गरेको छ ।  उसले मिनियासोटाका ७१, क्यालिफोर्नियाका ४९, कोलोराडोका ४, जर्जियाका २’ ईलिनोईजका ७, मिचिगनको १, मिजौरीका ५, न्युयोर्कका १२, नेब्रास्काको १, वोरेगनका ८, पेन्सल्भानियाका ४, टेक्ससका ९ र विस्कन्सिनका २ स्टोर तत्कालका लागि बन्द गर्ने निर्णय गरेको हो ।  यद्यपी उस्ले स्टोर बन्द अवधिमा आफ्ना कर्मचारीलाई १४ दिनको ज्याला दिने घोषणा गरेको छ ।  

अन्तिम संस्कार टेक्ससमा

अन्तिम दाह संस्कारको लागि जर्ज फ्लोएडको मृत शरिर टेक्ससस्थित ह्युस्टन लगिने स्लाइभस्टर टर्नरले बताएका छँन्  ।  नर्थ क्यारोलिनामा जन्मिएका फ्लोएड  टेक्ससस्थित ह्युस्टनमा हुर्किएका हुन् । फ्लोएडको परिवार र वकिलले ४६ बर्षीय फ्लोएडको अन्तिम संसकारको स्वीकृति दिन बाँकी नै छ ।  

अमेरिकामा कोरोनाले झन्डै १८ लाख संक्रमित र १ लाख ३ हजार मानिसको मृत्‍यु भएको अवस्थामा फ्लोएड मृत्‍यु प्रकरणले भाईरस महामारी समेत छाँयामा परेको छ ।  

(एजेन्सीको सहयोगमा तयार पारेको रिपोर्ट)

न्यूयोर्क

मिनेसोटा राज्यको मिनियापोलिसमा एक अश्वेत युवा जर्ज फ्लोएडको प्रहरी कस्टडीमा मृत्‍यु भएपछि देशभर लगातार भएका प्रदर्शनले हिँसात्मक रुप लिएपछि अमेरिकाका कतिपय सहरहरुमा सुरक्षाका लागि कर्फ्यु घोषणा गरिएका छन् । कोरोना संक्रमणबाट १ लाख ३ हजार मानिसको मृत्‍यु भएर संक्रमण देशभर फैलिएको अवस्थामा राष्ट्रियरुपमा हिँसात्मक आन्दोलन भड्किए पछि ती ठुला सहरमा जनताको सुरक्षार्थ कर्फ्यु लगाइएको ती सहरका मेयरले जनाएका छन् ।  

लसएन्जलस : लसएन्जलसस्थित मेयर एरिक गारसिटीले शनिबार बेलुका ८ बजेदेखि भोलिपल्ट बिहान साँढे ५ बजेसम्म लसएन्जलस सहरमा कर्फ्यु घोषणा गरेका छन् । लसएन्जलसमा शनिबार दिनभर जसो भएको प्रदर्शनमा सार्वजनिक बस तोडफोड गर्नेदेखि प्रहरीका केही गाडीहरुमा आगो लगाइएका थिए । लसएन्जलसमा आज शनिबार लगातार चौथौं दिन प्रदर्शन भएको हो ।  

एट्लान्टा : एट्लान्टा सहरमा पनि शनिबार साँझ कर्फ्यु लगाइएको मेयर केश ल्यान्स बटम्सले  घोषणा गरेका छन् । मेयर बटम्सले कार्यकारी आदेश मार्फत कर्फ्यु जारी गरेका हुन् । उनले एट्लान्टा शहरको सम्पूर्ण भागमा बेलुका ९ बजेदेखि भोलिपल्ट सुर्योदयसम्म कर्फ्यु लागू हुने बताएका छन् । शुक्रबार  एटलान्टामा दिनभर जसो भएको प्रदर्शनमा प्रहरीलाई बोतलले हिर्काउने प्रहरीका गाडीमा आगो लगाउने सिएनएन मुख्यालयमा क्षति पुर्याइएको थियो ।  

डेनभर : डेनभरमा लगातार दुई दिनदेखि प्रदर्शन भै रहेको छ । आज प्रदर्शनको दोश्रो दिन मेयर माईकल ह्यानककले शनिबार कर्फ्यु घोषणा गरेका छन् । उनले जनताको सुरक्षाको लागि कर्फ्यु लगाईएको बताएका हुन् । डेनभरमा शनिबार बेलुका ८ बजेदेखि बिहान ५ बजेसम्म लागू भएको हो । मेयर ह्यानककले भोली आईतबार साँझको लागि पनि कर्फ्यु घोषणा गरिसकेका छन् । डेनभरमा भएको प्रदर्शनमा ३४ जनालाई नियन्त्रणमा लिइएको मेयर ह्यानककले बताएका छन् ।

फिलाडेल्फिया : फिलाडेल्फिया सहरमा पनि मेयर जिम केनिले शहरमा कर्फ्यु लगाएका छन् । त्यहाँ शनिबार बेलुका ८ बजेदेखि भोलिपल्ट ६ बजे बिहानसम्म कर्फ्यु लागू भएको हो । शनिबार त्यहाँ हजारौं प्रदर्शनकारी जम्मा भएर प्रदर्शन गरेका थिए भने प्रहरीको गाडीमा आगो लगाउनुको साथै एउटा स्टार बक्स स्टोरमा पनि आगो लगाईएको थियो ।

साथै सिनसिनाटी, मायामी, मिल्वाकी, पोर्ट्ल्याण्ड लगायतका सहरहरुमा पनि शनिबार कर्फ्यु घोषणा गरिएका छन् ।  मिनियापोलिसमा भने लगातार ३ दिनदेखि कर्फ्यु जारी नै छ ।

न्युयोर्क     

मिनियापोलिसमा मृत्‍यु हुने जर्ज फ्लोएडको पक्षमा शुक्रबार राती न्युयोर्क ब्रुकलिनमा आयोजित बिरोध कार्यक्रममा प्रहरीको गाडीमा पेट्रोल बम प्रहार गरेको आरोपमा  एक महिलालाई प्रहरीले नियन्त्रणमा लिएर मुद्धा चलाएको छ । ब्रुकलिनस्थित बार्कले सेन्टर अगाडिको प्रदर्शनीमा सडकमा रोकी राखेको न्युयोर्क पुलिस डिपार्टमेन्टको गाडीमा प्रज्वलनशिल पदार्थ भरिएको सिसाको बोतल प्रहार गरिएको थियो । बोतल प्रहार गर्दाको समयमा चार जना प्रहरीहरु गाडी भित्रै रहेको जनाईएको छ । यद्यपी बोतल भने बिस्फोट नभएको र प्रहरीलाई चोट पनि नलागेको डेली मेलले लेखेको छ । प्रहरीको गाडीमा पेट्रोल बम प्रहार गरिएको आरोपमा न्युयोर्क अपस्टेट निवासी सामन्था साडरलाई प्रहरीले पक्राऊ गरेको हो । साडरलाई प्रहरीले नियन्त्रणमा लिने क्रममा उनको २१ वर्षीय बहिनी डेरियनको प्रहरीसँग भनाभन भएपछि बहिनीलाई समेत नियन्त्रणमा लिईएको ‘डेली मेल’ ले लेखेको छ ।  

जर्ज फ्लोएडको मृत्‍युको बिषयलाई लिएर न्युयोर्कमा शुक्रबार करिब ३ हजार मानिस प्रदर्शनीमा सहभागि भएका थिए । न्युयोर्कमा शुक्रबारको प्रदर्शनीमा प्रहरीको एक गाडीमा आगो लगाईयो भने अर्को एक गाडी तोडफोड गरिएको जनाईएको छ । २ सय जनालाई प्रहरीले नियन्त्रणमा लिएको छ । 

शनिबार न्युयोर्क प्रहरी कमिसनर डर्मोन्ट सिआले; “भगवानको कृपाले कुनै पनि प्रहरी कर्मचारीको मृत्‍युको खबर सुन्नु नपरेको” प्रतिकृया दिएका छन् । अमेरिकाका अधिकांश राज्यमा प्रदर्शन भएको थियो ।