Category: अर्थतन्त्र

काठमाडौं । सरकारले वर्षाका कारण धानबालीमा भएको क्षतिका आधारमा ६५ प्रतिशतसम्म क्षतिपूर्ति दिने भएको छ । क्षतिको आंकलन गरि अधिकतम ६५ प्रतिशतसम्म राहत दिने निर्णय सरकारले गरेको हो । बिहीबार बसेको मन्त्रिपरिषद् बैठकले तोकिएको क्षेत्रफलका आधारमा साना, मध्यम र ठूला किसान वर्गीकरण गरी २० देखि ६५ प्रतिशतसम्म राहत दिने निर्णय गरेको छ ।

सञ्चार तथा सूचना प्रविधि मन्त्री ज्ञानेन्द्रबहादुर कार्कीका अनुसार बढीमा १० कट्ठासम्म वा सो बराबरको जग्गामा लगाएको धानको पूर्ण क्षति व्यहोरेका किसानलाई क्षतिको अधिकतम ६५ प्रतिशतसम्म क्षतिपूर्ति दिने निर्णय भएको छ । मध्यम किसान (१० कठ्ठादेखि तीन बिघा वा सो बराबरको जग्गा) मा क्षति व्यहोरेका किसानलाई ३० प्रतिशत र तीन बिघाभन्दा बढी वा आंशिक क्षति भएकाको हकमा अधिकतम २० प्रतिशत राहत दिने निर्णय सरकारले गरेको हो ।

नेपाल सरकारबाट न्यूनतम समर्थन मूल्य निर्धारण गरी उक्त राहत दिइने पनि उनले जानकारी गराए। त्यसका लागि प्रधानमन्त्री तथा मन्त्रिपरिषद्को कार्यालयका सचिवको संयोजकत्वमा कार्यदल बनउने र उक्त कार्यदलले पाँच दिनभित्र कार्यविधि बनाई स्वीकृतिका लागि पेश गर्ने निर्णय पनि गरेको छ।

काठमाडौं । मंसिरदेखि लागु हुने गरि विद्युत् नियमन आयोगले विद्युत्को नयाँ महसुल दर सार्वजनिक गरेको छ । दरअनुसार पहिलेको भन्दा औसतमा महसुल २.८४ प्रतिशत कम भएको छ । सिँचाइको प्रयोजनमा प्रयोग हुने बिजुली भने अब ४०.६९ प्रतिशत सस्तो भएको छ । मङ्सिर १ देखिको खपतमा नयाँ महसुल लागु हुनेछ । नयाँ महसुल संरचनाअनुसार करिब १९ लाख ८६ हजार ग्राहकले मासिक ३० रुपियाँ तिरेर २० युनिटसम्म बिजुली बाल्न पाउने छन् ।

नेपाल विद्युत् प्राधिकरणले प्रस्ताव गरेअनुरूप आयोगले सिङ्गल फेज पाँच एम्पियर जडान गरेका ग्राहकले मासिक २० युनिटसम्म मात्र खपत गरेमा न्यूनतम मासिक शुल्क ३० रुपियाँ मात्र तिर्नुपर्नेछ । इनर्जी शुल्क तिर्नु नपर्ने व्यवस्था गरिएको छ तर खपत २० युनिटभन्दा बढी हुनासाथ ३० युनिटसम्म भने मासिक न्यूनतम ५०, इनर्जी शुल्क २० युनिटसम्मको ६० र थप युनिटका लागि प्रतियुनिट छ रुपियाँ ५० पैसा लाग्नेछ । ३१ देखि ५० समूहलाई आठ रुपियाँ तोकिएको छ भने ५१ देखि १०० सम्म नौ रुपियाँ ५० पैसा प्रतियुनिट निर्धारण गरिएको छ।

२० युनिटसम्मको छुट १५ एम्पियर र माथिको क्षमता जडितलाई उपलब्ध नहुने आयोगका अध्यक्ष दिल्लीबहादुर सिंहले जानकारी दिए । गार्हस्थ्य उपभोक्तालाई लक्षित गर्दै पाँच, १५, ३० र ६० एम्पियर जडित ग्राहकको न्यूनतम महसुल साबिकभन्दा २५ रुपियाँ घटाइएको छ । गार्हस्थ्य उपभोक्ताले इन्डक्सन चुलो प्रयोग गरून् भन्ने हेतुले १५१ देखि २५० युनिटसम्मको विद्युत्मा प्रतियुनिट ५० पैसा घटाएर नौ रुपियाँ ५० पैसा बनाइएको छ ।

त्यस्तै ४०० युनिटभन्दा माथिको खपतमा प्रतियुनिट ११ कायम गरिएको छ । थ्री फेजका ग्राहकले असारदेखि कात्तिकसम्म मौसमी दरअनुरूप सस्तोमा बिजुली पाउने व्यवस्था गराइएको छ । थ्री फेज तल्लो भोल्टेज ग्राहकले वर्षामा प्रतियुनिट १० रुपियाँ ५० पैसा र सुक्खायाममा ११ रुपियाँ ५० पैसा पर्ने व्यवस्था गराइएको छ।

काठमाडौं । सेयर बजारमा उछाल आएको छ । आइतबार करिब २८ अंकले बढेको बजारमा आज उच्च अंकको बढोत्तरी आएको हो ।

पछिल्ला दुई दिनमै नेप्से ११४ अंकले बढेको छ । गत साता नेपाल राष्ट्र बैंकले ब्याजदरमा हस्तक्षेप गरेपछि बजारमा सकरात्मक प्रभाव देखिएको लगानीकर्ताहरु बताउँछन् ।

सूचकसँगै आज कारोबार रकममा पनि सुधार आएको छ । अघिल्लो दिनको तुलनामा कारोबार रकम डेढ अर्ब बढीले बढेर सवा ४ अर्ब पुगेको छ ।

सेयर बजार मापक सूचक नेप्से आज ८७.६३ अंकले बढेर २६७२.२५ विन्दुमा पुगेको छ । यसदिन २२९ कम्पनीको ४ अर्ब ३० करोड ८८ लाख ९५ हजार ५७५ रुपैयाँ बराबरको ८३ लाख ९५ हजार ८६४ कित्ता सेयर किनबेच भएका छन् ।

आज कारोबारमा आएका १३ वटै समूहको परिसूचकमा हरियाली छाएको छ । फाइनान्स, विकास बैंक र हाइड्रोपावर समूहमा उछाल आएको छ । हाइड्रो र फाइनान्स सबैभन्दा धेरै साढे ७ प्रतिशतले बढेको छ भने विकास बैंक साढे ६ प्रतिशतले बढेको छ ।

कारोबारमा आएका २२९ कम्पनीमध्ये २११ कम्पनीको सेयर मूल्य बढेको छ भने १० कम्पनीको घटेको छ । ८ कम्पनीको मूल्य स्थिर रहेको छ ।

आज महालक्ष्मी विकास बैंकको सर्वाधिक कारोबार भएको छ । यसको १६ करोड रुपैयाँ बढीको कारोबार भएको छ । यस्तै, अपी पावर र सिद्धार्थ बैंकको १३१३ करोड बढीको कारोबार हुँदै सर्वाधिक कारोबार हुने कम्पनीको शीर्ष तीनमा रहे ।

उच्च अंकले बढेको बजारमा आज साढे २ दर्जन कम्पनीको मूल्यमा पोजेटिभ सर्किट लागेको छ । मल्टी प्रपोज फाइनानस, सिनर्जी पावर, हिमालयन पावर, गुह्येश्वरी मर्चेन्ट, नेपाल हाइड्रो, शिवश्री हाइड्रो, दिब्यश्वरी हाइड्रो, राधी विद्युत्, गोर्खाज फाइनान्स, श्री इन्भेष्टमेन्ट, सांग्रिला डेभलपमेन्ट बैंक, सेन्टर फाइनानन्सको मूल्य ठ्याक्कै १० प्रतिशतले बढेको छ ।

त्यसैगरी, अरुण काबेली, युनिभर्सल पावर, युनियन, हिमाल दोलखा, ग्रीन लाइफ हाइड्रोपार र बेस्ट फाइनान्सका सेयरधनीले पनि ठ्याक्कै १० प्रतिशत कमाएका छन् । त्यस्तै, अरुण भ्याली, युनाइटेड इदी मार्दी, आँखुखोला, वरुण हाइड्रोपावर, एभरेष्ट इन्स्योरेन्स, माउन्टेन इनर्जी, सप्तकोशी डेभलपमेन्ट बैंक, जोशी हाइड्रोपावर, माउन्टेन हाइड्रो र प्रोग्रेसिभ फाइनान्सको सेयर मूल्य करिब १० प्रतिशतले बढेको छ ।

बढ्दोे बजारमा आज मेरो माइक्रोफाइनान्सको सेयर मूल्यमा भने सबैभन्दा धेरै ३.९७ प्रतिशतले घटेको छ ।

विराटनगर । बाढी पसेर बन्द भएको विराटनगर विमानस्थल शनिबारबाट सञ्चालनमा आएको छ । दिउँसोको समयमा मौसम सफा भएको अवस्थामा उडान गर्न मिल्ने गरि विमानस्थल आंशिक रुपमा खुलेको छ । रात्रिकालिन उडान भने तत्काल हुने छैन । दुई दिनसम्म उपकरणहरुको परीक्षण गर्नुपर्ने भएकाले रात्रिकालिन उडान नभएको बताइएको छ । बिहान देखि साँझ ५ बजेसम्म मात्र यहाँ जहाज जाने छन् । तत्कालका लागि आईएफआर (उपकरणमा आधारित) उडान नगरी भीएफआर उडान मात्र हुने भएको हो ।

काठमाडौं । पछिल्लो केही दिन यता परेको बेमौसमी वर्षाका कारण देशको विभिन्न स्थानमा साढे ७ अर्ब बढीको धानबालीको क्षति भएको छ ।

कृृषि तथा पशुपन्छी विकास मन्त्रालयले तीनवटा प्रदेशमा गरेको प्रारम्भिक अध्ययनअनुसार ७ अर्ब २२ करोड बराबरको धानबालीमा क्षति भएको हो ।

मन्त्रालयको अध्ययन अनुसार प्रदेश १ र सुदुरपश्चिम प्रदेशको तुलनामा लुम्बिनी प्रदेशका जिल्लामा धेरै क्षति भएको छ । बढी क्षति हुनेमा लुम्बिनीको बर्दिया,कपिलबस्तु, बाँके र रुपन्देही रहेका छन् ।

लुम्बिनीमा ४ अर्ब ५१ कारोड बराबारको क्षति भएको छ । लुम्बिनीपछि प्रदेश १ मा १ अर्ब ९१ करोड र सुदूरपश्चिमको ८० करोड बराबरको धानबालीमा वर्षाले बढी क्षति पुर्याएको छ ।

सुदूरपश्चिम कैलाली र कञ्चनपुर रहेका छन् । प्रदेश १ मा झापा, मोरङ र सुनसरी रहेका छन् ।

असोज ३१ देखि लगातार परेको पानीका कारण किसानले भित्र्याउन लागेको धान बालीमा ठूलो क्षति पुगेको हो । कृषि सूचना प्रणाली व्यवस्थित बनाउन नसक्दा धान बालीमा बढी असर पुगेको किसानहरु बताउँछन् ।

मौसम पूर्वानुमानका तथ्यांक कृषकले बुझ्ने भाषा र समयमै पुयाउने व्यवस्था प्रभावकारी नहुँदा क्षति बढी भएको अनुमान गरिएको छ ।

काठमाडौं । सेयर बजारमा दोहोरो अंकको गिरावट आएको छ । ब्याजदरमा नेपाल राष्ट्र बैंकक हस्तक्षेपपछि बुधबार ६० अंकले बढेको बजार आज फेरि दोहोरो अंकले घटेको हो ।

सूचकसँगै जस्तै कारोबार रकममा पनि गिरावट आएको छ । बिहीबार करिब साढे २ अर्ब रुपैयाँ बराबरको सेयर किनबेच भएको छ ।

सेयर बजार मापक सूचक नेप्से आज १४.७० अंकले घटेर २५५६.९६ विन्दुमा आइपुगेको छ । यसदिन २१६ कम्पनीको २ अर्ब ६३ करोड ५३ लाख ९० हजार ४६० रुपैयाँ बराबरको ६१ लाख ६ हजार ४५२ कित्ता सेयर किनबेच भएका छन् ।

आज कारोबारमा आएका १३ वटा समूहमध्ये ३ वटा समूहको परिसूचकमा हरियाली छाएको छ भने १० वटा समूह्को परिसूचक राताम्मे भएको छ । अन्य समूह सबैभन्दा धेरै १.३० प्रतिशतले बढेको छ व्यापार समूह २.१९ प्रतिशतले घटेको छ ।

आज सानिमा बैंकको सर्वाधिक कारोबार भएको छ । यसको २७ करोड रुपैयाँ बढीको कारोबार भएको छ । यस्तै, माछापुच्छ बैंक साढे ११ करोड र नबिल बैंक ९ करोडसहित सर्वाधिक कारोबार हुने शीर्ष तीन भित्र रहे ।

दोहोरो अंकले घटेको बजारमा आज जोशी हाइड्रोपावरका लगानीकर्ताले सबैभन्दा धेरै ५.८७ प्रतिशत गुमाएका छन् ।

यस्तै, गुडविल फाइनान्स ५.०९ प्रतिशत, ग्रीन डेभलपमेन्ट बैंक, रैराङ हाइड्रोपावर, शिवश्री हाइड्रोपावर, श्री इन्भेष्टमेन्ट, फर्स्ट माइक्रोफाइनान्स, महुली सामुदायिक लघुवित्त र सेन्टर फाइनान्सको सेयर मूल्य ४ प्रतिशतभन्दा धेरैले घटेको छ ।

घट्दो बजारमा आज मेरो माइक्रोफाइनान्सको सेयर मूल्यमा भने पोजेटिभ सर्किट लागेको छ । यसका सेयरधनीले ठ्याक्कै १० प्रतिशत कमाएका छन् ।

काठमाडौं । नेपाली कांग्रेसले बाढीपहिरो र डुबानमा परेर ज्यान गुमाएका व्यक्तिका परिवारलाई २५ हजार रूपैयाँ दिने भएको छ । पार्टीको बाढीपहिरो विपद् व्यवस्थापन केन्द्रीय समन्वय समितिले विज्ञप्ती निकाल्दै यस्तो जानकारी गराएको हो । संयोजक मोहनबहादुर बस्नेतका अनुसार बाढीपहिरोमा परेर मृत्यु भएका प्रति मृतक परिवार २५ हजार राहत उपलब्ध गराइने भएको छ । कांग्रेसले यसअघि पनि विपदमा परेर मृत्यु भएकाहरूको परिवारलाई आर्थिक सहयोग उपलब्ध गराउँदै आएको छ ।

संयोजक बस्नेतले बाढीपहिरो पीडितको उद्धार तथा राहतमा जुट्न सबैमा आह्वान समेत गरेका छन् । नेपालमा मंगलबारयताको बाढी र पहिरोले देशभर ठूलो मानवीय तथा भौतिक क्षति गरेको हो । यसअघि सरकारले पनि मृतक परिवारलाई २ लाख दिने निर्णय गरिसकेको छ । सरकारी सहयोगको हस्तान्तरण आजबाटै शुरु हुने भएको छ ।

काठमाडौं । बुधबार बाढी पसेर अवरुद्ध भएको विराटनगर विमानस्थल बिहीबार समेत नचल्ने भएको छ । नेपाल नागरिक उड्डयन प्राधिकरणले बिहीबार साढे ५ बजेसम्मका लागि विमानस्थल बन्द घोषणा गरेको छ । यसले करीव दुई दर्जन उडानमार्फत हरेक दिन यात्रा गर्ने सयौं यात्रु प्रभावित बनेका छन् । एयरलाइन्सहरुले आजका लागि निर्धारित सबै उडान रद्द भएको सूचना जारी गरिसकेका छन् । विराटनगर नेपालको व्यस्त विमानस्थलमध्ये एक हो । उता, बाढीका कारण सो विमानस्थलमा फसेका दुई जहाज समेत अड्किएका छन् । श्री एयरलाइन्सको एक र बुद्ध एयरको एउटा जहाज अहिले विराटनगर विमानस्थलमा रोकिएका छन् । विमानस्थल सूचारु नभएसम्म यी जहाज उड्ने छैनन् ।

काठमाडौं । साताको कारोबार चौथो दिन आज शेयर बजारमा हरियाली छाएको छ ।

साताको कारोबारको पहिलो दिन दोहोरो अंकले बढेता पनि दोस्रोदिन ६९.५१ अंक र तेस्रोदिन ७७ ले घटेर बन्द भएको थियो ।

बुधबार भने नेपाल स्टक एक्सचेञ्ज (नेप्से) ६०.५६ अंकले घटेर २५७१.६६ विन्दुमा पुगेर बजार बन्द भएको छ ।

नेपाल स्टक एक्सचेन्जका अनुसार त्यसदिन २१७ कम्पनीको २ अर्ब ६७ करोड ९० लाख २८ हजार १५५ रुपैयाँ बराबरको ६१ लाख १ हजार ४१४ कित्ता शेयर किनबेच भएका छन् ।

बैंकिङ समूहको शेयर ३२ अङ्कले, विकास बैंकको एक सय ४१, होटलको ९१ फाइनान्सको एक सय २१,माइक्रोफाइनान्सको ९९ र जलविद्युत् समूहको शेयर एक सय ८ अङ्कले बढेको छ ।

यस्तै उत्पादन समूहको शेयर एक सय २२ अङ्कले, जीवन बीमा समूहको एक सय ८९ अङ्कले, निर्जीवन बीमा समूहको दुई सय ४८ र अन्य समूहको शेयर ६३ अङ्कले बढेको छ ।

आज कारोबारमा आएका १३ समूहको परिसूचक हरियो भएका छन् । धेरै कमाउनेमा फाइनान्स र हाइड्रोका लगानीकर्ता रहेका छन् । बुधबार तीन कम्पनीको शेयर मूल्य १० प्रतिशतले बढेको छ भने अन्यको सर्किट लेभलले नै मूल्य बढेको छ ।

आँखुखोला जलविद्युत कम्पनी लिमिटेड, युनिभर्सल पावर कम्पनी लिमिटेड र मैलुङ खाेला जलविद्युत कम्पनी लिमिटेडकाे शेयरमूल्यमा सकारात्मक सर्किट लागेकाे हाे ।

आँखुखोला जलविद्युत कम्पनी लिमिटेडको शेयरमूल्य १० प्रतिशतले बढेर २ सय ९९ रूपैयाँ २० पैसा पुगेको छ । युनिभर्सल पावर कम्पनीकाे सेयरमूल्य १० प्रतिशतले बढेर ३ सय २७ रूपैयाँ ८० पैसा पुगेकाे छ ।

मैलुङ खाेला जलविद्युतकाे शेयरमूल्य १० प्रतिशतले बढेर ४ सय २२ रूपैयाँ ४० पैसा पुगेकाे छ । यसका साथै, सिइडिबी हाइड्राेपावरकाे शेयरमूल्य ९.९९ प्रतिशत र नेशनल हाइड्राेपावरकाे शेयर मूल्य ९.९७ प्रतिशतले बढेकाे छ ।

त्यसैगरी, बुधबार एभरेष्ट इन्स्याेरेन्सकाे संस्थापक शेयरकाे मूल्य सबैभन्दा धेरै घटेकाे छ ।

काठमाडौं । साताको कारोबारको तेस्रोदिन पनि शेयर बजारमा पहिरो गएको छ । पहिलो दिन दोहोरो अंकले बढेता पनि दोस्रोदिन ६९.५१ अंकले घटेर बन्द भएको थियो । मंगलबार नेपाल स्टक एक्सचेञ्ज (नेप्से) ७७.३३ अंकले घटेर २५१०.७३ विन्दुमा झरेको छ ।

नेपाल स्टक एक्सचेन्जका अनुसार त्यसदिन २२१ कम्पनीको ३ अर्ब ७७ करोड ७७ लाख ९३ हजार ६६६ रुपैयाँ बराबरको ९५लाख ७२ हजार १६ कित्ता शेयर किनबेच भएका छन् ।

आज कारोबारमा आएका १३ समूह मध्ये १२ वटाको परिसूचक राताम्मे भएका छन् । धेरै गुमाउने फाइनान्स र हाइड्रोका लगानीकर्ता रहेका छन् ।

बैंकिङ समूहको शेयर ५१ अङ्कले, विकास बैंकको एक सय ९४, होटलको ८८, फाइनान्सको एक सय १२, माइक्रोफाइनान्सको एक सय ३५ र जलविद्युत् समूहको शेयर एक सय १७ अङ्कले घटेको छ ।

यस्तै उत्पादन समूहको शेयर एक सय ७५ अङ्कले, जीवन बीमा समूहको चार सय २८ अङ्कले, निर्जीवन बीमा समूहको तीन सय १४ र अन्य समूहको शेयर ३३ अङ्कले घटेको छ ।

आजको कारोबारमा पनि ७ कम्पनीका लगानीकर्ताले भने कमाएका छन्। तर, १७८ कम्पनीका लगानीकर्ता भने आजको कारोबारबाट निराश बन्नु परेको छ। दुई वटा कम्पनीको मूल्यमा भने परिवर्तन आएको छैन।

काठमाडौं । साताको कारोबारको दोस्रो दिन शेयर बजारमा पहिरो गएको छ । सोमबार नेपाल स्टक एक्सचेञ्ज (नेप्से) ६९.५१ अंकले घटेर २५८७.४५ विन्दुमा झरेको छ ।

नेपाल स्टक एक्सचेन्जका अनुसार त्यसदिन २१८ कम्पनीको २ अर्ब ९६करोड ६८ लाख ९९ हजार ७९० रुपैयाँ बराबरको ८७ लाख ७६ हजार ३३७ कित्ता शेयर किनबेच भएका छन् ।

आज कारोबारमा आएका १३ समूह मध्ये १२ वटाको परिसूचक राताम्मे भएका छन् । धेरै गुमाउने फाइनान्स र हाइड्रोका लगानीकर्ता रहेका छन् ।

बैंकिङ समूहको शेयर ३८ अङ्कले, विकास बैंकको एक सय ६७, होटलको ८८, फाइनान्सको ९८, माइक्रोफाइनान्सको एक सय ८५ र जलविद्युत् समूहको शेयर एक सय दुई अङ्कले घटेको छ ।

यस्तै उत्पादन समूहको शेयर एक सय ७७ अङ्कले, जीवन बीमा समूहको तीन सय ५८ अङ्कले, निर्जीवन बीमा समूहको चार सय २७ र अन्य समूहको शेयर ३३ अङ्कले घटेको छ ।

आज दुई सय १८ कम्पनीको शेयर कारोबार भएकोमा १० वटाबाहेक सबैको शेयर ओरालो लागेको छ । सबैभन्दा धेरै घलेम्दी हाइड्रोको शेयर १० प्रतिशतले घटेको छ ।

काठमाडौं । स्पञ्ज आइरन र तयारी बिलेट आयातमा भन्सार दर हेरफेरका कारण उत्पन्न बहसबारे अध्ययन गरी प्रतिवेदन पेस गर्न अर्थमन्त्रालयले राजस्व सचिव कृष्णहरि पुष्करको संयोजकत्वमा एक कार्यदल गठन गर्ने निर्णय गरेको छ ।

अर्थ मन्त्रालयमा स्टिल उद्योगीसँगको छलफलमा अर्थमन्त्री शर्माले कार्यदल बनाई अध्ययन गर्ने जानकारी दिँँदै कार्यदलको अध्ययन प्रतिवेदन प्राप्त भएपछि डण्डी विवादका विषयमा आवश्यक निर्णय गरिने बताए ।

कार्यदलले दुवैथरी स्टिल उद्योगका सम्बन्धमा मूल्य अभिवृद्धि, विद्युत् खपत, रोजगारीको अवस्था, श्रम शक्ति, कानूनी प्रावधान, छिमेकी देशको अभ्यास, प्रदूषणलगायत विषयमा अध्ययन गरी प्रतिवेदन तयार गर्नेछ ।

मन्त्री शर्माले आन्तरिक उत्पादनमा आधारित अर्थतन्त्रलाई प्रवद्र्धन गर्ने उद्देश्यमा आधारित भएर स्पञ्ज आइरन आयातमा लाग्दै आएको भन्सार र अन्तःशुल्क हटाइएको स्पष्ट पारे।

‘म टुँडिखेलमा उभिएर चुनौती स्वीकार गर्न तयार छु कि यो निर्णय मैले राष्ट्रको हितमा गरेको हुँ । कतिपयले भनेजस्तो अन्य कुनै प्रभावमा परेर गरेको होइन,’ उनले प्रश्न गरे, ‘व्यापार मात्र गरेर खाने हो कि देशमा उद्योगधन्दा खोलेर आत्मनिर्भर बन्दै जाने हो ?’ देशलाई घाटा पर्ने निर्णय आफूले कदापि नगर्ने प्रतिबद्धता दोहोर्याए ।

प्रतिस्थापन बजेटमार्फत सरकारले स्टिल उद्योगमा प्रयोग हुने कच्चापदार्थ आयातमा भन्सार दर हेरफेर गरेपछि त्यसको पक्ष विपक्षमा बाँडिएका स्टिल उद्योगीले आ–आफ्ना अडान दोहोर्याएका छन् ।

तयारी बिलेट आयात गरी डण्डी उत्पादन गर्दै आएका उद्योगीहरुले स्पञ्ज आइरनमा भन्सार र अन्तःशुल्क छुट दिने निर्णयले २४ वटा उद्योग धरापमा परेको भन्दै आफूहरुको माग सुनुवाइ गर्न आग्रह गरे भने स्पञ्ज आइरन आयात गरी बिलेट र डण्डी उत्पादन गरिरहेका उद्योगीहरुले सरकारको निर्णयको स्वागत गरे ।

पूर्वअर्थराज्यमन्त्री डा रुप ज्योति, उद्योग वाणिज्य सङ्घका उपाध्यक्ष अञ्जनकुमार श्रेष्ठ र पूर्वउपाध्यक्ष प्रदीपकुमार श्रेष्ठ, किरण प्रकाश साखःलगायतले ऐनमा आएको विषय तत्काल परिवर्तन गर्न सम्भव नहुने भए पनि विद्युत् महसुलमा छुट गरी बिलेट आयात गरी डण्डी उत्पादन गर्ने उद्योगहरुलाई राहत दिन माग गरे ।

उनीहरुले स्पञ्ज आइरनमा अन्तःशुल्क छुट गर्ने निर्णय विश्व व्यापार सङ्गठनको सिद्धान्त विपरीत हुने भएकाले पुरानै व्यवस्था कायम गर्नुपर्ने माग दोहोर्याए । दुवै पक्षबीच जुहारी चलेको छलफल कार्यक्रममा पत्रु पगाल्ने उद्योगहरुले वातावरणीय प्रदूषण फैलाएको, भट्टी पड्किएर मजदुरहरुको ज्यान गइरहेको, गुणस्तरहीन डण्डी उत्पादन गरिरहेको जस्ता आरोप बिलेटवाला उद्योगीहरुले लगाए ।

सरकारको निर्णयको स्वागत गर्दै उद्योगी विष्णु न्यौपाने, साहिल अग्रवाल, आनन्द नेपाललगायतले सरकारको नयाँ निर्णयले ४० अर्बको आयात प्रतिस्थापन हुने, थप २० हजार रोजगारी सृजना हुने, नेपालमा धौवाडी र फुलचोकीमा फलाम खानी सञ्चालनमा ल्याउन सकिने, ५०० मेगावाट विद्युत् खपत हुने तर्क गरे।

संसारभर ६० देखि ७० प्रतिशत धातुजन्य वस्तुहरु रिसाइकल प्रविधिबाटै तयार हुने गरेको तथ्याङ्क सुनाउँदै उनीहरुले तयारी बिलेटबाट बन्ने र स्पञ्ज आइरनबाट बन्ने डण्डीको गुणस्तरमा कुनै फरक नरहेको दाबी गरे ।

सरकारले नयाँ आर्थिक ऐनमार्फत स्पञ्ज आइरन आयातमा लाग्दै आएको ४.७५ प्रतिशत भन्सार महसुल र अन्तःशुल्क पूरै छुट दिएको छ भने तयारी बिलेट आयातमा लाग्दै आएको ४.७५ प्रतिशत भन्सार महसुल यथावत् राखी प्रतिमेट्रिक टन २ हजार ५०० अन्तःशुल्क लगाएको छ । यो निर्णयपछि ३० वटा स्टिल उद्योग पक्ष विपक्षमा विभाजित भएका छन् ।

काठमाडौं । काठमाडौं उपत्यकामा सञ्चालित सार्वजनिक सवारी साधनको भाडा बढेको छ । बाग्मती प्रदेशको भौतिक पूर्वाधार विकास मन्त्रालयले बुधबार काठमाडौँ उपत्यकासहित बाग्मती प्रदेशमा सञ्चालित सार्वजनिक सवारी साधनको भाडा बढाउने निर्णय गरेको हो । बाग्मती प्रदेशका १३ जिल्लामा यो नियम लागु भएको छ । काठमाडौँ उपत्यका बाहिरको हकमा २३ प्रतिशतले भाडा वृद्धि गरेको वाग्मती प्रदेश सरकारले काठमाडौँ उपत्यकामा भने किलोमिटरका आधारमा भाडा बढाएको हो।

उपत्यकाभित्र सार्वजनिक सवारी साधनमा शून्य किलोमिटरदेखि पाँच किलोमिटरसम्म १८, १० किलोमिटरसम्म २३, १५ किलोमिटरसम्म २७, २० किलोमिटसम्म ३० र २० किलोमिटर भन्दामाथि ३५ भाडादर कायम गरेको छ। भौतिक पूर्वाधार तथा यातायात मन्त्रालयको २०७८ असार २७ को मन्त्रीस्तरको निर्णयानुसार यातायात व्यवस्था विभागबाट २०७८ असार २९ गते अन्तर प्रदेश रुटको भाडा समायोजन गरेर प्रदेशभित्र सञ्चालन हुने छोटो रुटको हकमा प्रदेश सरकारबाट नै भाडा समायोजन गरिनुपर्ने कानुनी व्यवस्था गरेको थियो। दशैंको मुखमा बढेको भाडाले सर्वसाधारणलाई भने मर्का परेको छ ।

काठमाडौं । सेयर बजारमा उछाल आएको छ । माइक्रोफाइनान्स र फाइनान्स कम्पनी चम्किँदा नेप्सेमा उच्च अंक्को बढोत्तरी आएको हो ।

सूचकमा उछाल आए पनि कारोबार रकममा भने बढोत्तरी आएको छैन । आज कारोबार रकम साढे ४ अर्बमा सीमित भएको छ ।

बुधबार सेयर बजार मापक सूचक नेप्से ६८.४७ अंकले बढेर २६८१.१० विन्दुमा पुगेको छ । यसदिन २२७ कम्पनीको ४ अर्ब ५० करोड ६ लाख ५८ हजार १४२ रुपैयाँ बराबरको ८१ लाख ८९ हजार ८९० कित्ता सेयर किनबेच भएका छन् ।

आज कारोबारमा आएका १३ वटै समूहको परिसूचकमा हरियाली छाएको छ । फाइनानस समूह सबैभन्दा धेरै ६.५९ प्रतिशतले बढेको छ । यस्तै, माइक्रोफाइनान्स ५.८ र विकास बैंक समूह ४.८२ प्रतिशतले बढेको छ ।

आज कारोबारमा आएका २२७ कम्पनीमध्ये २०९ कम्पनीको मूल्य बढेको छ भने १४ कम्पनीको घटेको छ । ४ कम्पनीको मूल्य स्थिर रहेको छ ।

आज सिटिजन्स बैंकको सर्वाधिक कारोबार भएको छ । यसको २३ करोड रुपैयाँ बढीको कारोबार भएको छ । यस्तै, एनआइसी एशिया लघुवित्त झण्डै १७ करोड र निर्धन उत्थान साढे १६ करोड बढीको कारोबार हुँदै सर्वाधिक कारोबार हुने शीर्ष तीन भित्र रहे ।

उच्च अंकले बढेकोे बजारमा आज १५ वटा कम्पनीको सेयर मूल्यमा पोजेटिभ सर्किट लागेको छ । बेस्ट फाइनान्स, प्रोग्रेसिभ फाइनान्स, ग्रामीण विकास, नयाँ सारथी, मिथिला, किसान, जनउत्थान, ग्लोबल आइएमई, सपोर्ट माइक्रोफाइनान्स, ग्रीन डेभलपमेन्ट बैंक, सबैको र सामुदायिक लघुवित्तको मूल्य ठ्याक्कै १० प्रतिशतले बढेको छ ।

यसैगरी, मैलुङखोला जलविद्युत्, उन्नति सहकार्य लघुवित्त र महालक्ष्मी विकास बैंकका सेयरधनीले पनि करिब १० प्रतिशत कमाएका छन् । बढ्दो बजारमा आज रिडी हाइड्रोपावरका सेयरधनीले भने सबैभन्दा धेरै २.१६ प्रतिश गुमाएका छन् ।