Category: समाचार

कास्की । प्रहरीले विप्लव समूहका १८ कार्यकर्तालाई कास्कीबाट पक्राउ गरेको छ । शनिबार राति विप्लव नेतृत्वको नेपाल कम्यूनिस्ट पार्टीका कास्की जिल्ला सेक्रेटरीसहित १८ जनालाई पक्राउ गरेको प्रहरीले जानकारी दिएको छ।

कास्की, अन्नपूर्ण गाउँपालिकामा बैठक बसिरहेको स्थानबाट प्रहरीले उनीरुलाई पक्रेको हो । ४ महिलासहित पक्राउ परेका उनीहरु विरुद्ध प्रहरीले सुराक पाएपछि उक्त स्थानमा खटिएको थियो ।

पार्टीका कास्की जिल्ला सेक्रेटरी मिलन राई(आक्रोश) समेत रहेका छन्। प्रहरीका अनुसार पक्राउ परेका उनीहरुलाई शनिबार राति नै पोखरा ल्याइएको छ ।

सरकारले विप्लव समूहका गतिविधिमा प्रतिवन्ध लगाएको छ । सोहीकारणअहिले उनीहरु भूमिगत रुपमा आफ्ना गतिविधि तीब्र पारेका छन् ।

काठमाडौं । प्रधानमन्त्री केपी शर्मा ओली शनिबारदेखि यूरोप भ्रमणमा निस्कदै छन् । आगामी जुन १९ सम्म प्रधानमन्त्री ओली यूरोपका विभिन्न तीन मुलुकमा पुग्नेछन् ।

प्रधानमन्त्री ओली अन्तरराष्ट्रिय श्रम संगठन (आइएलओ)को शतवार्षिकीका अवसरमा आयोजना हुने समारोहमा भाग लिन जुन ९ देखि १० सम्म स्वीट्जरल्याण्डमा रहने तय भएको परराष्ट्र मन्त्रालयले जानकारी दिएको छ ।

कार्यक्रमलाई प्रधानमन्त्री ओलीले सम्बोधन समेत गर्नेछन् । जेनेभामा प्रधानमन्त्रीले विभिन्न मुलुकका राष्ट्राध्यक्षसँग भेटवार्ता गर्ने तय भएको मन्त्रालयले उल्लेख गरेको छ ।

त्यसपछि प्रधानमन्त्री ओली बेलायत भ्रमणमा जानेछन् । बेलायतमा १० देखि १२ जुनसम्म रहँदा प्रधानमन्त्रीले समकक्षी थेरेसा मेसँग भेट वार्ता गर्नेछन् । अक्स्फोर्ड विश्वविद्यालयमा आयोजना हुने कार्यक्रममा १० जुनमा प्रधानमन्त्रीले सम्बोधन गर्ने मन्त्रालयले जानकारी दिएको छ ।

१२ देखि १४ जुनसम्म भने प्रधानमन्त्री फ्रान्स जाने कार्यक्रम तय भएको छ । फ्रान्समा रहँदा प्रधानमन्त्री ओलीले समकक्षी एडवार्ड फिलिपसँग भेटवार्ता गर्नेछन् ।

काठमाडौं । संघीय संसद, राज्य व्यवस्था तथा सुशासन समितिले लोकसेवा आयोगद्धारा खुलाएको नयाँ भर्ना विवाद सम्बन्धका छलफल गर्न शुक्रबार बैठक डाकेको थियो ।

बैठकमा संघीय मामिला तथा सामान्य प्रशासनमन्त्री लालबाबु पण्डितलाई पनि आमन्त्रण गरिएको थियो । तर, मन्त्री पण्डित बैठकमा उपस्थित भएनन् ।

यसलाई संसदको अपमान गरेको ठहर समितिले गर्यो । त्यसपछि समितिले आगामी २७ जेठका लागि अर्को बैठक आह्वान गरि मन्त्री पण्डितलाई बैठकमा सहभागी हुन ‘अन्तिम मौका’ दिएको बताएको छ ।

स्थानीय तहको कर्मचारी भर्नासम्बन्धि लोक सेवा आयोगले खुलाएको विज्ञापनमा प्रदेश सरकारहरुले असहमति देखाएपछि भर्ना प्रक्रिया अहिले विवादमा छ ।

सोही सम्बन्धमा संघीय सरकारको धारणाबारे छलफल गर्न समितिले शुक्रबार बैठक बोलाएको थियो । उक्त बैठकमा पनि मन्त्री पण्डित सहभागी भई चित्त बुझ्दो जवाफ नदिए विज्ञापन फिर्ता लिन लोक सेवा आयोगलाई निर्देशन दिने तयारी समितिको छ ।

शुक्रबारको बैठकमा प्रमुख प्रतिपक्ष दल नेपाली काँग्रेसका सांसद दिलेन्द्रप्रसाद बडु, अमरेश कुमार सिंह, मिना पाण्डे र राष्ट्रिय जनता पार्टी नेपालका सांसद राजेन्द्र महतोले मन्त्री पण्डित पटक पटक अनुपस्थित भएको भन्दै तत्काल विज्ञापन फिर्ता लिन लोक सेवा आयोगलाई निर्देशन दिनु पर्ने भन्दै समितिकी सभापति श्रेष्ठलाई दवाव दिएका थिए ।

त्यसो त मन्त्री पण्डित पनि पछिल्लो समय अनेक बाहना बनाउँदै बैठकमा उपस्थित भइरहेका छैनन् । शुक्रबारको समितिको बैठकले लोकसेवा आयोगलाई दिने निर्देशनको खाका तयार पारिसकेको छ ।

लोकसेवा आयोगले ५ सय १५ स्थानीय तहका विभिन्न पदमा ९ हजार १ सय ६१ कर्मचारी माग गर्दै विज्ञापन सार्वजनिक गरेको छ ।

काठमाडौं । सरकारले विभिन्न चार मुलुकका लागि नयाँ राजदूत सिफारिस गरेको छ । बिहीबार बसेको मन्त्रीपरिषद् बैठकले राजदूत नियुक्तिका लागि नाम सिफारिस गरेको प्रधानमन्त्री तथा मन्त्रीपरिषद् कार्यालय स्रोतले जानकारी दिएको छ ।

बैठकले बंगलादेशका लागि वंशिधर मिश्र, कतारका लागि नारद भारद्वाज, अष्ट्रेलियाका लागि महेशराज दाहाल र स्पेनका लागि आङफुटी शेर्पाको नाम सिफारिस गरेको हो ।

संसदीय सुनुवाई प्रक्रिया पार गरेपछि उनीहरु राजदूतमा नियुक्त हुने प्रावधान रहेको छ । संसदीय सुनुवाई विशेष समितिले सुनुवाईको काम गर्छ ।

काठमाडौं । बिहीबार साँझ र शुक्रबार बिहानै देशका विभिन्न स्थानमा हावाहुरी र वर्षाले जनजीवन प्रभावित भएको छ । काठमाडौं उपत्यकामा शुक्रबार बिहानै भिषण हावाहुरी चल्यो ।

हावाहुरीका कारण मावनीय क्षति नभएको प्रहरीले जानकारी दिएको छ । उता, विहीबार साँझ कैलाली र त्यस आसपास आएको हावाहुरीका कारण २ जनाको मृत्यु भएको प्रहरीले बताएको छ । धेरै घरहरुमा क्षति पुगेको छ । दर्जनौं मानिस घाइते भएका छन् ।

मौसम पूर्वानुमान महाशाखाका अनुसार आगामी तीन दिनसम्म पनि देशका विभिन्न स्थानको मौसम पूणतया सफा हुने छैन । मौसम बदली भइरहने र मेघ गर्जनसहित पानी पर्ने सम्भावना रहेको महाशाखाले जानकारी दिएको छ ।

देशका उच्च हिमालि भेगमा हिमपातको संभावना समेत महाशाखाले औल्याएको छ । पश्चिमी भागमा बढी वर्षातको सम्भावना रहेको महाशाखाको भनाई छ ।

राति देशका अधिकांश स्थानहरूमा आंशिक देखि सामान्य वदली रही पश्चिमी पहाडी  स्थानहरुमा र मध्य तथा पुर्वीका केही स्थानहरुमा मेघ गर्जन सहित वर्षाको सम्भावना रहेको महाशाखाले जानकारी दिएको छ

काठमाडौं । प्रहरीले आपराधिक क्रियाकलापमा संलग्न रहेको भन्दै तरुण दल धादिङका उपाध्यक्ष राधाकृष्ण भण्डारी (राधे)लाई पक्राउ गरेको छ । उनको पृष्ठभूमि अपराधसँग जोडिएको छ । उता, आफ्ना नेता पक्राउको विरोधमा तरुण दल जिल्ला समिति, धादिङले २४ घण्टे अल्टिमेटम दिँदै बिहीबार आन्दोलन गरेको छ ।

तरुण दलले जिल्ला प्रहरी कार्यालयको गेटमा प्रदर्शन गर्दै राधेको रिहाईको माग गरेको थियो । प्रहरीले बिहीबार राधेलाई ज्यान मार्ने उद्योग अन्तर्गतको मुद्दामा पक्राउ गरेको थियो । उनको साथबाट छुरा समेत बरामद भएको प्रहरीको दावि छ ।

जिल्ला प्रहरी कार्यलयका अनुसार गजुरी गाउँपालिका–२ ताल्ती भन्ने स्थानमा स्थानीयहरुसँग झगडा गरिरहेको स्थानबाट उनलाई प्रहरीले पक्राउ गरेको हो ।

प्रहरी स्रोतका अनुसार स्थानीयले हतियारसहितको समूहले आतंकित बनाएको खबर गरेपछि उनलाई प्रहरीले पक्राउ गरेको हो । राधेको समूहले प्रहरीमाथि पनि आक्रमण गरेको बताइएको छ ।

राधेसँगै उनको समूहका सुजन लामा, विमल शाह ठकुरी, काजी शाक्य, समीर थापा मगरलाई पनि प्रहरीले पक्राउ गरेको हो । उनीहरुमाथि ज्यान मार्ने उद्योग र ड्युटीमा खटिएको प्रहरीलाई दुव्र्यवहार गरेको आरोपमा जिल्ला अदालत धादिङबाट पाँच दिनको म्याद थप गरी अनुसन्धान गरिरहेको छ ।

धादिङमा हुने विभिन्न ठेक्का पट्टामा उनको संलग्नता रहने गरेको बताइएको छ । उनी प्रहरीको खोजिको सूचिमा समेत थिए । २०७० सालमा अर्का गुण्डा नाइके चरीलाई गोली चलाएपछि राधे चर्चामा आएका हुन् । चरी  २०७१ सालमा प्रहरी इन्कान्टरमा मारिएका थिए ।

काठमाडौं । राष्ट्रपति विद्यादेवी भण्डारीले बाँडेको संविधानसभा पदकमा सूर्य चिन्ह अंकति रहेको भन्दै कांग्रेसले आपत्ति जनाएको छ । गृह मन्त्रालयका अनुसार २०६४ र २०७० सालको संविधानसभाका सभासद्लाई यो पदक दिने निर्णय भएको थियो ।

गणतन्त्र दिवसको भोलीपल्ट अर्थातः जेठ १६ मा पदक बाँडियो । तर, यस पदकमा सूर्य चिन्ह अंकति रहेको भन्दै प्रमुख प्रतिपक्षी दल नेपाली कांग्रेसले आपत्ति जनाएको छ ।

त्यसो त संविधानसभाबाट संविधान जारी गर्नु सभासदको कर्तब्य भएको भन्दै यसमा स्याबासी दिएर पदक प्रदान गर्ने काम नै गलत रहेको प्रतिक्रिया दिएको छ । त्यसो त कांग्रेसकै सभासदले पनि पदक बुझेका थिए ।

मंगलबारको प्रतिनिधिसभा बैठकमा कांग्रेस सांसदहरुले पदकका विषयमा प्रश्न उठाएका थिए । सांसद मीनेन्द्र रिजालले संविधान निर्मातालाई स्यावासी दिनुपर्ने आवश्यकता नरहेको भन्दै ‘सुशोभनको शैली र पदकको डिजाइनले संविधान निर्माणका लागि भएको बलिदानीपूर्ण संघर्ष र संविधानको मर्म नबुझेको प्रतिक्रिया दिए ।

पदकका सूर्य चिन्ह भएको भन्दै यो डिजाइन नै मन नपरेको उनको भनाई छ । पदक भित्र प्रष्ट देखिने गरी सूर्यको चिन्ह राखिएको भन्दै उनले एउटा पार्टीले संविधानलाई मनपरी गर्नए खोजेको उल्लेख गरे । कांग्रेस सांसद गगन थापाले पदक बुझेका छैनन् ।

काठमाडौंं। नेपाली कांग्रेसका उपसभापति विमलेन्द्र निधी यही जुन ५ मा हुने संसदीय निर्वाचनको पर्यवेक्षणका लागि सोमबार डेनमार्कको राजधानी कोपनहेगन प्रस्थान गरेका छन् । डेनिस इन्स्टिच्यूट फर पार्टीज एण्ड डेमोक्रेसी (डीआइपीडी)को निम्तोमा उपसभापति निधी कोपनहेगन प्रस्थान गरेका उनका प्रेस सल्लाहकार रामजी दाहालले जानकारी दिए । निधीले आफ्नो भ्रमण अफिसियल भएको दाबी गरेका छन् ।
डेनमार्क भ्रमणका क्रममा  इलेक्सन अभियानको स्थलगत अवलोकन गर्ने कार्यक्रम रहेको छ । त्यसक्रममा उपसभापति निधिले त्यहाँका मतदाता, युवा, महिला लगायतका समूहसँग भेटेर कुराकानी गर्नेछन् । यसैगरी चुनावको दिन बिहीबार मतदान स्थलमा पुगेर अवलोकन गर्ने कार्यक्रम रहेको छ । उपसभापति निधिले चुनावको भोलिपल्ट राजनीतिक दलका नेताहरुसँग अन्तरक्रिया गर्ने तयारी गरिएको छ ।
नेपाल डेनमार्क बाहिर बनेको डीआइपीडीको पहिलो सदस्य मुलुक हो । जसलाई सन् २०१० मे २६ मा त्यहाँको संसद्ले मान्यता दिएको थियो । त्यसपछि नेपालको संसद्ले सन् २०१२ मा विभिन्न राजनीतिक दलहरुको प्रतिनिधित्व रहेको दलहरुको सहकार्यका लागि संयुक्त संयन्त्र गठन गरेको थियो ।
नेपालजस्तो विकासशील मुलुकमा प्रजातान्त्रिक शासन व्यवस्थाको सबलीकरणका लागि दलहरु बलियो हुनुपर्छ भन्ने मान्यताअनुसार डेनमार्कको संसद्ले यो संस्था गठन गरेको हो । यो संस्थाले मुलुकमा दलहरुबीचको सहकार्यमा जोड दिने गर्दछ ।
परिवारसहित पुगेका निधिको आलोचना
नेपाली काँग्रेसका संसारभर छरिएर रहेका कार्यकर्ताको भेला डेनमार्कको राजधानी कोपनहेगनमा हुँदै छ । त्यसका लागि झण्डै ३० जना नेता कार्यकर्ता यूरोप भ्रमणमा निस्किने भएका छन् । निधी पहिल्यै गएर परिवारसहित घुमघाम गर्ने योजनाले डेनमार्क लागिसकेका छन् । अन्य केही नेता पनि परिवारसहित जाने भएपछि चर्को आलोचना भएको छ ।
तीन दिनसम्म चल्ने भेलामा संसारका तीन दर्जन देशका प्रतिनिधिको सहभागिता रहने भएको नेपाली जनसम्पर्क समिति डेनमार्कले जनाएको छ । संसारभरबाट जुन २१देखि २३ तारिखसम्म भेला आयोजना गरिएको हो । भेलामा नेपालबाट विदेश गएका नेपालीलाई मताधिकारको व्यवस्थाको माग र अक्टोबरमा हुने एनआरएन चुनावका विषयमा समेत विशेष छलफल हुने तय भएको छ ।
नेपाली काँग्रेसको केन्द्रीय नीति अनुसन्धान तथा प्रशिक्षण प्रतिष्ठानले आयोजना गरेको कार्यक्रममा पार्टी उपसभापति विमलेन्द्र निधी, महामन्त्री डा. शशांक कोइराला, पार्टी प्रवक्ता विश्वप्रकाश शर्मा, नेताहरु डा. मिनेन्द्र रिजाल, भीष्मराज आङदेम्बे, धनराज गुरुङ लगायत झण्डै एक दर्जन नेता सहभागी हुनेछन् ।
कार्यक्रमको संयोजन नेपाली जनसम्पर्क समिति डेनमार्कले गरेको छ । समितिले तयारीसमेत शुरु गरेको छ । विभिन्न उपसमिति बनाएर तयारी गरिएको नेपाली जनसम्पर्क समिति डेनमार्कले जनाएको छ । गैरआवासीय नेपाली संघ (एनआरएन)को अक्टोबरमा हुने महाधिवेशनका विषयमा समेत भेलामा छलफल हुने भएको छ ।
भेलामा नेपाली काँग्रेस निकट एनआरएनका पदाधिकारी उपस्थित हुने भएका छन् । एनआरएनमा अल्पमतमा परेको नेपाली काँग्रेस निकट एनआरएनका पदाधिकारीले पार्टीगत हिसाबले अबको चुनावमा नलागे विदेशमा पार्टीको अवस्थासमेत मजबुत नहुने जानकारी गराउने भएका छन् । त्यसका लागि एनआरएनका उपाध्यक्ष कुल आचार्य, सोम सापकोटा लगायतको टोलीले आन्तरिक रुपमा तयारी गरेको स्रोतको दाबी छ ।
समितिको डेनमार्क सभापति वीरेन्द्रसिंह कार्कीले भने अन्य विषयबस्तुभन्दा पनि पार्टीको अवस्थाका विषयमा भेलामा छलफल हुने बताए । उनले विदेशमा रहेका नेपालीले कूटनीतिक नियोगमार्फत मताधिकारको सुनिश्चतताका लागि पहल गरिने जानकारी दिए । डेनमार्कको राजधानी कोपनहेगनको भेष्टरपोर्टमा कार्यक्रम आयोजना गरिएको छ । रिचमण्ड होटलमा हुने भेलाको तयारीका लागि विभिन्न २० उपसमिति बनाइएको छ । नेपाली जनसम्पर्क समिति डेनमार्कका सभापति कार्कीको संयोजकत्वमा तयारी समिति गठन गरिएको छ । नेपाली काँग्रेसभित्रको गुटगत राजनीति भेलामा पनि झल्किने भएको छ । काठमाडौंबाट डेनमार्क पुग्ने नेताहरु पनि हरेक गुटबाट प्रतिनिधित्व गरेर जान लागेका छन् । एक हुल नेता कार्यकर्तालाई बोलाउँदा सबै गुटको प्रतिनिधित्व भएको तयारी समितिका एक सदस्यले व्यङ्ग्य गरेका छन् ।

बुटवल । द्धन्द्धकालमा तत्कालिन नेकपा माओवादीले निकै प्राथमिकताका साथ उठाउने गरेको गोलमेच सम्मेलनलाई अब राष्ट्रिय प्रजातन्त्र पार्टीले उठाउन थालेको छ ।

राप्रपा अध्यक्ष कमल थापाले मुलुक राजनीतिक संकटमा परेको दाबी गर्दै गोलमेच सम्मेलनको माग गरेका हुन् । सम्मेलनमा पूर्वराजादेखि विप्लव समूह समेत सहभागी गराउनु पर्ने उनको प्रस्ताव छ ।

अझ रोचक के छ भने विगतमा माओवादीले गोलमेच सम्मेलनको माग गर्दा सत्तामा कमल थापा शक्तिशाली पात्रका रुपमा उपस्थित थिए ।

राप्रपाको प्रदेश नंं ५ का जिल्ला अध्यक्ष तथा सचिवहरुको भेलालाई बुटवलमा सम्बोधन गर्दै अध्यक्ष थापाले मुलुक जटि अवस्थामा रहेको बताए ।

गणतन्त्र, संघीयता र धर्मनिरपेक्षताको सफल कार्यान्वयन हुन नसकेको उनको तर्क छ । अब गम्भीर समिक्षा गर्दै राजादेखि विप्लवसम्म अटाउने मौलिक प्रजातन्त्रको विकास गर्नुपर्ने उनको प्रस्ताव थियो ।

गोलमेच सम्मेलनले देशमा दीगो शान्ती स्थापना गर्ने उनको भनाई छ । राजतन्त्र हटेपछि पनि बेरोजगारी, भ्रष्टाचार, मौलिक धर्म संस्कृतिमाथि आक्रमण, राष्ट्र विखण्डनको चुनौती, लोकतन्त्रको आवरणमा सर्वसत्तावाद र विप्लव माओवादीको नयाँ द्वन्द्वको जन्म भई समस्या कायम रहेको भन्दै उनले गोलमेच सम्मेलन आवश्यक रहेको बताएका हुन् ।

संघीयताको मोडेल सुधार गरी केन्द्र र स्थानीय सरकारलाई बलियो बनाउनुपर्ने तथा प्रदेश खारेज गर्नुपर्ने उनको तर्क छ ।

बजेटमा टिप्पणी गर्दै अध्यक्ष थापाले वर्षमा ५ लाख रोजगारी सिर्जना गर्ने लक्ष्यमा ठोस कार्यक्रम नभएको बताए । यस्ता कार्यक्रम कार्यकर्तालाई धनी बनाउने उद्देश्यले आएको उनी बताउँछन् ।

लोकतन्त्रको आवरणमा वर्तमान सरकार सर्वसत्तावादतर्फ उन्मुख भइरहेको भन्दै अध्यक्ष थापाले मिडिया काउन्सिल विधेयक, सेना प्रमुखलाई उपेक्षा गरेर सेना परिचालन गर्न सक्ने, न्यायपालिका र संवैधानिक अंगहरुमा पार्टीकरणको प्रयासले सरकार क्रमशः र विस्तारै सर्वसत्तावादमा जाने निश्चित रहेको उल्लेख गरे ।