Category: घूमघाम

काठमाडौं । आन्तरिक उडानमा वायुसेवा कम्पनीले हवाई भाडा घटाएका छन्। सरकारले आन्तरिक हवाई इन्धनको मूल्यमा ४ रुपैयाँ ५० पैसा घटाएपछि कम्पनीहरुले समेत हवाई भाडा कम गरेका हुन् ।

घटेको भाडा शुक्रबारदेखि लागु हुनेछ । वायुसेवा कम्पनीले कम्तीमा २५ रुपैयाँदेखि बढीमा २ सय रुपैयाँसम्म हवाइ भाडा घटाएको नेपाल वायुसेवा सञ्चालक संघका प्रवक्ता योगराज कँडेल शर्माले जानकारी दिएका छन् ।

कोरोना भाइरसले आन्तरिक उडानका कम्पनीहरुतर्फ पनि हेलिकोप्ट र  साना विमानस्थलमा उड्ने कम्पनीको व्यापार भने घटेको छ ।

किनकी पर्यटक आगमन ठप्प भएपछि यी वायुसेवा कम्पनीको व्यापार घटेको हो । ठूला विमानस्थलमा भने नेपाली यात्रुकै कारण पर्याप्त व्यापार भइरहेको छ ।

साना विमानस्थलमा उडाउने जहाजमध्ये केही जहाज ग्राउन्डेड गर्ने निष्कर्षमा व्यवसायी पुगेका छन् । हेलिकोप्टर समेत केही समय थन्किएर बस्नेछन् ।

कोरोना भाइरसका कारण नेपालमा पर्यटन व्यवसाय सबैभन्दा धेरै प्रभावित भएको छ ।

काठमाडौं । नेपाल एयरलाइन्सले जापानको नारिता र यूएईको दुवईबाट नियमित उडान बन्द गरेको छ ।

कोरोना भाइरसविरुद्ध सतर्कता अपनाउन सरकारले जापान र यूएईसहित ६६ मुलुकका नागरिकलाई नेपाल प्रवेशमा रोक लगाएको छ ।

सरकारले शुक्रबार राती बाट लागु हुने गरी ती मुलुकका नागरिक, त्यहास्थित नेपाली नागरिक र गैरआवासीय नेपालीलाई समेत नेपाल आउन रोकेको छ ।

यी दुई गन्तब्यको उडान चैत मसान्तसम्म स्थगित गरिएको नेपाल एयरलाइन्सले उल्लेख गरेको छ ।

उपप्रधानमन्त्री तथा रक्षामन्त्री ईश्वर पोखरेलको अध्यक्षतामा बुधबार बसेको कोभिड १९ संक्रमण रोकथाम तथा नियन्त्रण उच्चस्तरीय समन्वय समितिको बैठकले गरेको निर्णय अनुसार ती दुई गन्तव्यको नियमित उडान ३० चैतसम्मका लागि स्थगित गरिएको कम्पनीले जानकारी दिएको छ ।

चैत्र ७ गते र सो भन्दा पछिका उडानका टिकट खरीद गरेका यात्रुहरुलाई टिकट फिर्ता गर्दा भुक्तानी गरेको रकम पुरै उपलब्ध गराइने कम्पनीले उल्लेख गरेको छ ।

यसका अतिरिक्त नियमित उडान चालु रहेका गन्तव्यका लागि टिकट लिएका यात्रुहरुले उडानको एक दिन अघि उडान रद्द गर्न चाहेमा पनि भुक्तानी गरेको पुरै रकम उपलब्ध गराइने कम्पनीले विज्ञप्ती जारी गर्दै उल्लेख गरेको छ ।

यात्रुहरुको उडान मिति परिवर्तन गर्दा शुल्क नलाग्ने व्यवस्था गरिएको समेत नेपाल एयरलाइन्सको विज्ञप्तीमा उल्लेख छ ।

काठमाडौं । नेपाल एयरलाइन्सले विदेशमा गरिरहेको नियमित उडानको तालीका हेरफेर गरेको छ । कतिपय गन्तब्यको उडान कटौती भएको छ भने कतिपय गन्तब्यको उडान रद्द गरिएको छ ।

कम्पनीका अनुसार भारतको राजधानी नयाँ दिल्लीमा निर्धारित उडान कटौती भएको छ । दैनिक दुई उडान भइरहेको यस रुटमा अब आइतबारदेखि मात्र एक उडान दैनिक हुने नेपाल एयरलाइन्सले स्पष्ट पारेको छ ।

कोरोना भाइरसको संक्रमणका कारण यात्रुको संख्यामा कमी आएका कारण नेपाल एयरलाइन्सले विभिन्न रुटमा आफ्नो उडान तालीका परिवर्तन गरेको जनाएको छ ।

नेपाल एयरलाइन्सले बैंगलौरको नियमित उडान मार्च १९ र ३१ तारिखका लागि रद्द गरेको छ । मुम्वईका लागि हुने प्रत्येक शुक्रबारको उडान १५ मार्च देखि १५ अप्रिलसम्म स्थगित गरिएको छ ।

थाइल्याण्डको बैंककमा मार्च ११ र मार्च २५ को उडान रद्द गरिएको छ । हङकङको मार्च १९ र मार्च २६ को उडान पनि रद्द गरिएको कम्पनीले जनाएको छ ।

कम्पनीले काठमाडौं दोहा उडान फागुन २७ गते देखि अर्को सूचना नभएसम्मका लागि स्थगित गरेको थियो ।

उडानका टिकट खरीद गरेका यात्रुले टिकट फिर्ता गर्दा भुक्तानी गरेको रकम पुरै उपलब्ध हुने नीति ल्याएको छ ।

टिकट उडानको मिति १ पटक परिवर्तन गर्न समेत शुल्क नलाग्ने व्यवस्था गरिएको नेपाल एयरलाइन्सले शुक्रबार जानकारी गराएको हो ।

काठमाडौं । कोटेश्वर-कलंकी सडकमा अब डेडिकेटेड लेन तोकिने भएको छ । त्यसअनुसार अब यात्रुबाहक तथा मालबाहक सवारी साधनले छुट्टै लेनमा मात्र गुड्न पाउने छन् ।

८ लेन सडक रहेको यहाँ निजी र द्रुत गतिमा गुड्ने सवारी साधनले भने छुटटै लेनको प्रयोग गर्नुपर्ने भएको छ ।

यद्दपी यो नियम २ चैतबाट मात्र कार्यान्वयनमा आउने महानगरीय ट्राफिक प्रहरी महाशाखाले जानकारी दिएको छ । यस रुटमा अब यात्रुवाहक तथा मालवाहक गाडी बायाँ सर्भिस लेनबाट र निजी तथा साना सवारी साधन दाहिने मुख्य (द्रुत) लेनबाट मात्र चलाउन पाइने छ ।

यो रुटमा सबै सवारी साधन एकै लेनमा दौडिदा दूर्घटना बढेको छ । सडक लेन अनुशासित पालना गर्न, यातायात व्यवस्थित गर्न र सवारी आवागमनलाई सहज बनाउन यस्तो नियम ल्याउन लागिएको कार्यालयको भनाई छ ।

यसले ट्राफिक नियमको पालनामा समेत चालकहरुलाई सचेत गराउने छ । यो सडक खण्ड काठमाडौंमा तुलनात्मक रुपमा व्यबस्थित र सुविधायुक्त रहेको छ ।

यात्रुबाहक, मालबाहक र बिस्तारै गुड्ने गाडीहरु बाँया लेनबाट र साना हलुका र द्रुत गतिमा गुड्ने सवारी साधन दाहिने लेनबाट चल्ने अन्तर्राष्ट्रिय प्रचलन अनुसार यहाँ समेत सोही अपनाउन लागिएको हो । यो नियम अहिले जडिवुटी-सुर्यविनायक सडक खण्डमा कार्यान्वयनमा छ ।

काठमाडौं । नेपाली आन्तरिक वायुसेवा कम्पनीले कर्मचारीको सेवा सुविधा कटौती गर्ने भएका छन् । सेवा सुविधा कटौती गर्नुका साथै बेतलवी बिदामा बस्न समेत प्रोत्साहन गर्ने नीति कम्पनीले लिने भएका छन् ।

कोरोना भाइरसका कारण पर्यटक आगमन ८० प्रतिशतसम्म ओरालो लागेको छ ।

यस अवस्थामा व्यवसाय नचल्ने र खर्च धान्न मुस्किल पर्ने भन्दै व्यवसायीले कर्मचारीको सेवा सुविधा कटौतीको तयारी गरेका हुने । उनीहरुले सरकारसँग बैंकको ब्याजमा सहजिकरण गर्न समेत माग गरेका छन् ।

अब मागको तुलनामा आपूर्तिसमेत धेरै भएका कारण जहाजहरु ग्राउन्डेड समेत गरिने भएको छ । आवश्यक नभएको अवस्थामा सबै जहाज चलाउनुको साटो बन्द गर्न लागिएको वायुसेवा कम्पनीहरुको छाता संगठन वायुसेवा सचालक संघ (आयोन)ले जानकारी दिएको छ ।

वायुसेवा सञ्चालकहरुले कोरोना भाइरसका कारण अन्तर्राष्ट्रिय पर्यटक आगमन घटेका कारण आन्तरिक हवाई सेवा प्रभावित भएको बताएका हुन् । छिमेकी मुलुक चीनबाट फैलिएको कोरोना भाइरसले नेपालका मूख्य पर्यटकीय स्रोत बजार सबैभन्दा बढी प्रभावित भएका छन् ।

त्यसमा पनि संक्रमणले विश्वव्यापी रुप लिएसँगै संसारभर पर्यटन सेवा नराम्रोसँग प्रभावित भएको छ ।

यसले आन्तरिक वायुसेवा कम्पनीको व्यापार उल्लेख्य घटेको वायुसेवा सञ्चालकहरुको भनाई छ । नेपालको आन्तरिक उडानमा कोरोनाको प्रभावका कारण करीव ४ अर्ब रुपैयाँ बराबरको क्षतिको अनुमान वायुसेवा कम्पनीहरुले गरेका छन् ।

सन् २०२० को पहिलो दुई महिनामा आन्तरिक हवाई यात्रु ४० प्रतिशतले घटेको अनुमानका आधारमा यस्तो क्षतिको आंकलन गरिएको हो ।

नजिकिएको बसन्तु ऋतुको पर्यटक बुकिङ समेत धमाधम रद्द भइरहेको अवस्थामा आगामी दिनमा अझै नराम्रोसँग व्यवसाय प्रभावित हुने आंकलन कम्पनीहरुको रहेको छ ।

खासगरी नेपालको स्रोत बजार चीन, हङकङ, कोरिया, थाइल्याण्ड, भारत तथा मध्यपूर्वी मुलुकमा कोरोनाले प्रभाव देखाइसकेको छ ।

काठमाडौं । नेपालमा चीनबाट आउने पर्यटकको संख्या ओरालो लागेको छ । कोरोनाको प्रकोप फैलिएसँगै चीनबाट पर्यटक आवागमन करीव ठप्प प्राय छ ।

फेब्रुअरी महिनामा मात्र ३ हजार २ सय ८५ जना चिनियाँ पर्यटक नेपाल आएका छन् ।

सन् २०१९ को फेब्रुअरीमा चीनबाट करीव १४ हजार चिनियाँ पर्यटक नेपाल आएका थिए ।

यो वर्ष आएका चिनियाँमध्ये पनि अधिकांश कूटनीतिक नियोगमा कार्यरत कर्मचारी तथा विभिन्न आयोजनामा काम गर्ने कर्मचारी रहेको बताइएको छ । पर्यटक आगमन भने रोकिएको छ ।

चीनबाट साविकमा सातामा ६५ उडान हुने गरेकोमा अहिले खुम्चिएर सातामा ४ उडानमा सिमित भएको छ ।

चिनियाँ पर्यटकको आगमन घटेपछि समग्र पर्यटक आगमन समेत प्रभावित भएको छ ।

नेपाल भ्रमण वर्ष २०२० को दोस्रो महिनामा ०.९९ प्रतिशतले पर्यटक आगमन कम भएको हो ।

सन् २०१९ को दोस्रो महिनामा १ लाख २ हजार ४ सय २३ जना पर्यटक नेपाल आएका थिए ।

फेब्रुअरी २०२० मा कूल १ लाख १ हजार ४ सय जना पर्यटक नेपाल आएको तथ्यांक विभागले सार्वजनिक गरेको छ । फेब्रुअरीमा हवाई यात्राबाट ७७ हजार ६४ जना पर्यटक आएका छन् ।

गत वर्षभन्दा यो वर्ष हवाई यात्रु केही बढेका छन् ।

स्थलमार्गबाट भने २४ हजार ३ सय ३६ जना पर्यटक नेपाल आएको अध्यागमन विभागको तथ्यांकमा उल्लेख छ ।

समग्रमा पर्यटक आगमन खस्किएपनि म्यानमार, श्रीलंका र थाइल्याण्डबाट आउने पर्यटकमा भने ठूलो वृद्धि पाइएको छ ।

यी बौद्धमार्गी मुलुक हुन् । म्यानमार, श्रीलंका र थाइल्याण्डबाट अघिल्लो वर्षको यसै महिनाको तुलनामा क्रमशः ४५९५.६, ११२६.८ र ५६५.५ प्रतिशत बढी पर्यटक भित्रिएका छन् ।