Category: घूमघाम

काठमाडौं । बुधबार विभिन्न मुलुकबाट १ हजार जना नेपाली घर फर्किएका छन् । ६ देशबाट ९ सय ९९ जना नेपाली स्वदेश फर्किएको त्रिभुवन अन्तर्राष्ट्रिय विमानस्थल कार्यालयले जनाएको छ । कोरोना भाइरसको संक्रमणका बीच विदेशमा रोकिएका र अलपत्र परेका नेपालीको उद्दारको काम अहिले भइरहेको छ ।

बुधबार साउदीको दमामबाट हिमालय एयरलाइन्सको चार्टर्ड उडानमार्फत १५४ जना नेपाली घर फर्किए । साउदीकै जेद्दाबाट नेपाल एयरलाइन्सले २५५ जनालाई नेपाल ल्याएको छ । जेद्दाबाट एउटा शव पनि नेपाल आएको छ । हिमालय एयरलाइन्समार्फत यूएईको आबुधाबीबाट ३ बालबालिकासहित १४९ जना घर फर्किए ।

कुवेतबाट १५५ जना र मलेसियन एयरको कार्गो लिएर आएको जहाजमार्फत चार जना नेपाली घर आए । टर्कीको राजधानी इस्तानाबुलबाट टर्किस एयरलाइन्सको चार्टर्ड जहाजमार्फत २८२ जना नेपाली घर आएका छन् । बुधबार मात्र कुल १४ अन्तर्राष्ट्रिय उडान भएका छन् ।

६ वटा चार्टर्ड जहाज नेपाली लिएर काठमाडौं आए । बुधबार नै कतारको दोहा, यूएईको आबुधाबी, कुवेत र जापानको नारितामा नेपाली लिन जहाज उडेका छन् । बुधबार कुल १३ वटा अन्तर्राष्ट्रिय उडानको तालिका तय भएको छ ।

काठमाडौं । मंगलबार विदेशमा अलपत्र परेका नेपालीमध्ये ७ सय ८३ जनाले नेपालको भूमि टेक्न पाए । जसमा दुई यात्रु पूर्वराजकुमारी हिमानी शाह र उनका पुत्र हृदयेन्द्र शाह थिए । विभिन्न पाँच देशबाट चार्टर्ड उडानमार्फत ७८३ जना नेपाली स्वदेश फर्किएका हुन । त्रिभुवन अन्तर्राष्ट्रिय विमानस्थलका महाप्रवन्ध देवेन्द्र केसीका अनुसार थाइल्यान्डबाट आएको नेपाल एयरलाइन्सको जहाजबाट हिमानी शाह र उनका पुत्र आएका थिए ।

मंगलबार कतारको दोहाबाट हिमालय एअरलाइन्सको चार्टर्ड उडानमार्फत १४४ जना नेपाली घर फर्किए । कतारबाट नेपालीका लागि दोस्रो उडान भएको छ । कुवेतको जजिरा एअरलाइन्सले आममाफी पाएका १६० जना नेपालीलाई निःशुल्क काठमाडौं ल्यायो । यसको खर्च कुवेत सरकारले बेहोरेको हो ।

गैरकानुनी श्रमिकलाई आममाफी दिँदै कुवेत सरकारले हरेक दिन निःशुल्क कामदार काठमाडौं पठाइरहेको छ । थाइल्याण्डबाट भने आज ७८ जना स्वदेश फर्किए । सोही समुहमा हिमानी समेत थिइन् ।

अस्ट्रेलियाको सिड्नीबाट पनि त्यहाँ रोकिएका नेपालीहरु स्वदेश फर्किएका छन् । नेपाल एअरलाइन्सको चार्टर्ड वाइडबडी जहाजमार्फत २५८ जना आज स्वदेश फर्किए । माल्दिभ्ससबाट १४३ जना नेपाली घर फर्किएका छन् । बुधबार विभिन्न आधा दर्जन गन्तब्यबाट उडान हुने भएको छ ।

काठमाडौं । विदेशमा रहेका नेपालीको उद्दार गर्ने सिलसिलामा आज अष्ट्रेलियाबाट पहिलो चरणमा नेपालीहरु घर फर्कने भएका छन् । त्यसका लागि नेपाल एयरलाइन्सको जहाज अष्ट्रेलियाको सिड्नी पुगिसकेको छ । नेपाल एयरलाइन्सको वाइडबडी जहाज अन्नपूर्णले २५९ जना नेपालीलाई बोकर काठमाडौं आउनेछ ।

उनीहरु अधिकांश छोराछोरी भेट्न पुगी उतै अलपत्र परेका नागरिक रहेको बताइएको छ । यस उडानमा न्यूजिल्याण्डबाट समेत ११ जना नेपाली मिसिएका छन् । उनीहरु बिहान न्यूजिल्याण्डबाट अष्ट्रेलिया आइपुगेका छन् । अष्ट्रलियाबाट नेपाल फर्किन इच्छुक नेपालीको संख्या १३ सय रहेको छ ।

पहिलो चरणमा २५९ जनालाई काठमाडौं पठाउन लागिएको छ । यस गन्तब्यबाट प्रतियात्रु २ हजार ३ सय ५० अष्ट्रेलियन डलरमा उडान भएको हो । सबै यात्रुको पीसीआर परीक्षण गरिएको र नतिजा नेगेटिभ आएको बताइएको छ ।

यो जहाज सिड्नी आउने क्रममा भने २९ जना अष्ट्रेलियन नागरिक तथा अष्ट्रेलियन स्थायी बासिन्दालाई लगेर गएको थियो । अष्ट्रेलियाबाट दोस्रो उद्दार उडान भने २७ जुनमा मेलबर्नबाट तोकिएको नेपाली दूतावासले जनाएको छ ।

काठमाडौं । आइतबार विभिन्न मुलुकबाट नेपालमा एकै दिन ११५० जना नेपाली घर फर्किएका छन् । कारोना भाइरसको महामारीका कारण संकटमा परेका नेपालीको उद्दारको काम अहिले भइरहेको छ । यसै क्रममा आइतबार मात्र एक शिशुसहित ११५० जना नेपाली घर फर्किएका हुन् ।

कोभिड १९ संकट व्यवस्थापन सेन्टरको तथ्यांक अनसार आइतबार यूएईबाट ३३८ जना नेपाल आएका छन् । उनीहरु दुई वटा उडानबाट नेपाल आएका हन् । एक उडानमा १५३ र अर्को उडानमा १८५ जना थिए ।

बंगलादेशबाट २५० जना आएका छन् । साउदी अरबबाट एक शिशुसहित २४७ जना, कुवेतबाट १६६ जना र कतारबाट १४९ जना स्वदेश फर्किएको तथ्यांक छ ।

यूएई र मलेसियाबाट १५०, १५० जना घर फर्किएका छन् । उनीहरुलाई एक दिन होल्डिंग सेन्टरमा राखेर अर्को दिन सम्बन्धित स्थानीय तहको क्वारेन्टिनमा पठाइनेछ ।

काठमाडौं । साउदीको रियादबाट आइतबार बिहानै २४७ जना नेपाली काठमाडौं अवतरण गरेका छन् । नेपाल एअरलाइन्सको वाइडबडी जहाजबाट उनीहरु काठमाडौं आएका हुन् । यस उडानमा एक नाबालकसहित २४७ जना नेपाली थिए । साउदीस्थित नेपाली दूतावासका अनुसार यस उडानमार्फत ६ महिनादेखि नेपाली राजदूतावासको सेल्टरमा रहेका ४ महिलासहित १२ जना महिला र बाँकी पुरुष घर फर्किएका हुन् ।

आज यूएईबाट तीन उडानमार्फत नेपाली स्वदेश फर्कनेछन् । कुवेतमा आममाफीमा सहभागी नेपाली पनि स्वदेश फर्कंने भएका छन् । कतारको दोहाबाट पनि नेपाली आउनेछन् । मलेसियाबाट पनि नेपाली फर्कने कार्यक्रम रहेको छ ।

यूएईको आबुधाबीबाट १ सय ५१ जना नेपाली लिएर हिमालय एअरलाइन्सको जहाज काठमाडौंका लागि उडिसकेको त्रिभुवन विमानस्थल कार्यालयले जनाएको छ । यो जहाजमा २ जना नाबालक सहित २६ जना महिला र १ सय २३ जना पुरुष छन् ।

नेपाल फर्किनेहरुमा ज्येष्ठ नागरिक, महिला, आफन्त गुमाएका परिवारका सदस्य र भिजिट भिसामा आएर समस्यामा परेका नेपाली छन् ।

काठमाडौं । बिहीबार त्रिभुवन अन्तर्राष्ट्रिय विमानस्थल सामान्य दिनको तुलनामा केही व्यस्त रह्यो । नेपाली नागरिकलाई विदेशबाट नेपाल ल्याउने अभियान अन्तर्गत विदेशबाट जहाज आउन गालेपछि विमानस्थलमा समेत चहलपहल बढेको हो । विमानस्थलका महाप्रवन्धक देवेन्द्र केसीले सार्वजनिक गरेको विवरण अनुसार बिहीबारमात्र आन्तरिक र बाह्य गरी कुल १४ वटा उडान-अवतरण भएका छन् ।

बिहीबार हिमालय एयरलाइन्सले मलेसियाबाट ११७ जना नेपालीलाई नेपाल ल्याएको छ । यो जहाज मलेसिया जादा भने एकजना नेपाली र १५ विदेशी गरी १६ जना यात्रु मलेसिया लगेको छ । बिहीबार नै जजिरा एयरले कुवेतबाट नेपालीलाई घर फर्काएकोछ । सलाम एयरले ओमानबाट नेपालीलाई काठमाडौं ल्याएको हो ।

यी दुई जहाजमा क्रमशः १५० र १४६ जना यात्रु आए । कतार एयरवेज समेत बिहीबार काठमाडौं आयो । यो जहाजले दोहाबाट एक जना नेपालीलाई बोकेर आएको थियो । उसले नेपालमा रहेका २६३ जना विदेशीलाई दोहा लगेको छ । बिहीबार साँझ हिमालय एयरलाइन्सको जहाज दमाम उठेको छ ।

यो जहाज शुक्रबार फर्कने छ । बिहीबार साँझ नै नेपाल एयरलाइन्स दुबई उडेको छ । हिमालय एयरलाइन्सले साउदी उड्दा चार जना नेपालीलाई दमाम लगेको छ । आन्तरिकमा समेत केही उडानहरु भएको विमानस्थलले जनाएको छ ।

काठमाडौं । नेपालीको उद्दारका लागि तय भएका युएईका दुई उडान रद्द भएका छन् । समस्यामा परेका नेपालीको उद्धार गर्न भन्दै मंगलबार र बिहीबारका लागि निर्धारित चार्टर्ड उडान रद्द गरिएको छ । नेपाल एयरलाइन्सले जहाज नउड्ने जनाएको छ । युएई सरकारको तर्फबाट उडान उडान अनुमति नभएका कारण रद्द गर्न परेको नेपाल एयरलाइन्सको भनाई रहेको छ ।

उता, नेपाली दूतावास आबुधाबीले समेत सोमबार यसको जानकारी गराएका हो । दूतावासका अनुसार असार २ र ४ गतेको उडान स्थगित भएको उल्लेख गरेको हो । असार २ र ४ मा नेपाल एयरलाइन्स युएई आउने कार्यक्रम तय भएको थियो । सबैभन्दा बढी समस्यामा रहेका नेपालीलाई प्राथमिकताका आधारमा स्वदेश फर्काउने अभियान चलिरहेको छ ।

सोही अनुसार यूएईमा उडान हुने भनिएको थियो । नयाँ उडान तालीका समेत सार्वजनिक नगरिएका कारण घर फर्कन तयार भएका नेपालीमा भने अन्यौल र आक्रोस बढेको छ । तोकिएको मितिमा उडान नहुने निश्चित भएपछि केही नेपाली स्वदेश फर्कने वातावरण मिलाउन आग्रह गर्दै दूतावास नै पुगेका थिए ।

युएइमा खान र बस्नकै समस्या भएको भन्दै नेपालीले घर फर्काइदिन माग गरेका हुन् । यसअघि सोमबार ओमन र हंकगंबाट नेपाली घर फर्किएका छन् ।

काठमाडौं । सोमबार ओमानबाट १६६ नेपाली घर फर्किएका छन् । कोराना भाइरसको महामारीसँगै उत्पन्न संकटका बीच अहिले नेपालीको उद्दारको काम जारी छ । सोहीक्रममा ओमानबाट नेपालीलाई घर ल्याइएको हो । सलाम एअरको उडान नम्बर ओभी ४२७ मार्फत नेपाली घर आएका छन् । ओमानबाट एउटा शव पनि ल्याइएको छ ।

समस्यामा परेका नेपालीलाई प्राथमिकताको आधारमा त्यहाँ रहेको नेपाली दूतावासले सलाम एअरमार्फत स्वदेश पठाएको हो । सरकारले हिमालय र नेपाल एअरलाइन्समार्फत नेपालीको स्वदेश फिर्ता गराउने भनेको भएपनि विदेशी एयरलाइन्सले सस्तोमा उडाउन तयार भएपछि नेपाल ल्याइएको बताइएको छ ।

ओमानबाट फर्कने सबै नेपालीको पीसीआर जाँच गराएरै पठाइएको ओमानस्थित नेपाली दूतावासले जनाएको छ । पीसीआर जाँच गरेर फर्किएकाले उनीहरु सिधै होम क्वरेण्टीनमा जान पाउनेछन् ।

कतिपय नेपालीले आफैंले स्वदेश फर्कने टिकट काटेका छन् भने कतिपयलाई कम्पनीले टिकट काटिदिएको छ । समस्यामा परेका १३ जना महिलालाई भने दूतावासले नै खर्चको व्यवस्थापन गरेर पठाएको हो । सलाम एयरको दोस्रो उडान असार ४ मा हुँदैछ । यो उडानमार्फत १८० जना नेपाली स्वदेश फर्कने भएका छन् ।

काठमाडौं । अफगानिस्तानबाट संयुक्त राष्ट्रसंघका कर्मचारी नेपाल फिर्ता भएका छन् । अफगानिस्तानबाट १८ जना नेपाली कर्मचारी आइतबार काठमाडौं आएका हुन् । उनीहरुलाई संयक्त राष्ट्रसंघ आफैले चार्टर्ड जहाज काठमाडौं पठाएको काठमाडौं विमानस्थल कार्यालयले जनाएको छ । उक्त जहाज काठमाडौंबाट अफगानिस्तान फर्कदा भने एक जना यात्रु बोकेर गएको छ ।

उता, आइतबार नेपाल एयरलाइन्सले बंगलादेशबाट १ सय ५८ जना नेपालीलाई स्वदेश फर्काएको छ । नेपाल वायुसेवा निगमको वाइडबडी जहाजमार्फत १ सय ५८ जना नेपाली स्वदेश फर्किएका हुन् । उनीहरु सबैको पीसीआर परीक्षण गरिएको छ । सोहीकारण उनीहरु काठमाडौंमा एक दिन होल्डिङ सेन्टरमा बसेर त्यसपछि सम्बन्धित स्थानीय तहमा पठाइनेछ । सरकारले विभिन्न मुलुकबाट अलपत्र नेपालीको उद्धार थालेको छ । उद्धार गरी करीव ३० हजार नेपाली घर फर्कने छन् ।

काठमाडौं । कोरोना भाइरसको संक्रमणपछि विदेशका विभिन्न गन्तब्यमा अलपत्र नेपालीको उद्दारको काम आजबाट पुनः शुरु हुँदैछ । आज कुवेतबाट दुई वटा जहाजमा महिला श्रमिक काठमाडौं आउँदैछन् । उनीहरुलाई जजिरा एयरवेजका दुई उडानले काठमाडौं छाड्नेछ । लकडाउन तथा व्यवसायिक उडान बन्द भएपछि विदेशमा समस्यामा परी अलपत्र नेपालीलाई प्राथमिकताका आधारमा उद्दार थालिएको हो ।

संस्कृति, पर्यटन तथा नागरिक उड्डयन मन्त्रालयले विदेशमा हुने रेस्क्यू उडानको तालीका तय गरेको छ । तालिका अनुसार राष्ट्रिय ध्वजावाहक नेपाल एयरलाइन्स र निजी वायुसेवा कम्पनी हिमालय एयरलाइन्सलाई नेपालबाट परिचालित गरिनेछ । यसबाहेक विदेशी जहाजले समेत नेपालीलाई उद्दार गरी काठमाडौं ल्याउँदैछन् । नेपाल एयरलाइन्सका वाइडबडी र न्यारोबडी दुवै प्रकारका जहाज लामो र छोटो दूरीमा प्रयोग हुँदैछन् ।

हिमालय एयरलाइन्ससँग न्यारो बडी जहाज रहेका छन् । बिहीबार कुवेतबाट करिब ३ सय महिला श्रमिक नेपाल आइरहेका छन् । मन्त्रालयका अनुसार रेस्क्यू उडानका दौरान नेपाल एयरलाइन्सले २४ र हिमालय एयरलाइन्सले १९ वटा उडान गर्ने भएका छन् ।

यसबीचमा थप २४ वटा विदेशी एयरलाइन्सले नेपालमा नेपालीलाई छाड्नेछन् । मन्त्रालयको तालीका अनुसार बंगलादेशको ढाकाबाट जुन १४ तारिखमा दुई वटा उडान हुने भएको छ । यी दुवै उडानमा उतैबाट जहाज आउनेछ ।

जुन १५ मा नेपाल एयरलाइन्स माले र क्वालालम्पुर जानेछ । उक्त दिन हिमालय एयरलाइन्स साउदी अरब र सिंगापुर जानृ तय भएको छ ।

जुन १६ मा युएई र कतारमा नेपाल एयरलाइन्स जानेछ । सो दिन कुवेत, श्रीलंका र मालेबाट नेपाली ल्याउन हिमालय एयरलाइन्स जाने भएको छ ।

जुन १७ मा अष्ट्रेलिया, बैंकक र बहराइनमा नेपाल एयरलाइन्स जाने तय भएको छ । उक्त दिन हिमालय एयरलाइन्स बंगलादेश र कतार जानेछ ।

जुन १७ मा अमेरिकाबाट एक विदेशी एयरलाइन्स आउनेछ । जुन १८ मा नेपाल एयरलाइन्स साउदी र युएई जानेछ । उक्त दिन हिमालय एयरलाइन्स क्वालालम्पुर र मस्कट जानेछ ।

जुन १९ मा जापान र कुवेतबाट नेपाल एयरलाइन्सले नेपालीलाई ल्याउनेछ । साउदी र नाइजेरीयाबाट हिमालय एयरलाइन्सले नेपालीलाई फिर्ता ल्याउने तरी उडान तय भएको छ ।

२० जुनमा साइप्रस, क्वालालम्पुर र कतारबाट नेपाल एयरलाइन्सले उडान गर्नेछ । सो दिन हिमालय एयरलाइन्सले युएई र बंगलादेशबाट नेपालीलाई फिर्ता ल्याउने भएको छ । २० जुनमा यूरोपबाट विदेशी कम्पनी नेपाल आउने छ ।

२१ जुनमा दक्षिण कोरिया र मस्कटमा नेपाल एयरलाइन्स जानेछ । सो दिन हिमालय एयरलाइन्स भने कुवेत र क्वालालम्पुर जानेछ ।

२२ जुनमा अष्ट्रेलिया र बैंककबाट नेपाल एयरलाइन्सले नेपालीलाई ल्याउनेछ । पाकिस्तान र कतारमा हिमालय एयरलाइन्स पठाइने भएको छ ।

२३ जुनमा जापानको नारिता र मालेबाट नेपाल एयरलाइन्स जानेछ । युएई र युगान्डाबाट हिमालय एयरलाइन्सले उडान गर्ने तालिका तय भएको छ ।

२४ जुनमा नेपाल एयरलाइन्सको मात्र फ्लाइट छ । सो दिन नेपाल एयरलाइन्सले साउदी र कुवेतका नेपालीहरुलाई उद्धार गर्ने छ ।

२५ जुनमा नेपाल एयरलाइन्स फेरी जापान पुगेर थप नेपालीलाई घर ल्याउनेछ । यो दिन हिमालय एयरलाइन्स साइप्रस\इजरायल जाने भएको छ ।

काठमाडौं । शुक्रबार काठमाडौं स्थित त्रिभुवन अन्तर्राष्ट्रिय विमानस्थल साविकको तुलनामा केही व्यस्त देखियो । बिहान म्यानमारबाट आएको एयरफोर्सको जहाज उडेलगत्तै नेपाल एयरलाइन्सको जहाज जापानको नारिताबाट फर्किएर काठमाडौं अवतरण गर्यो । त्यसको केही समयमै चीनमा कार्गो उडानका लागि गएको हिमालय एयरलाइन्सको जहाज अवतरण गर्यो ।

शुक्रबार साँझ भने एयर अरेवियाको जहाज काठमाडौं आयो । यो जहाजमा कोभिड–१९ भाइरसको महामारीका कारण यूएईमा समस्यामा परेका १५७ जना नेपाली थिए । सारजाह विमानस्थलबाट आएको एयर अरेवियाको जी ९ १७५१ नम्बरको जहाजले ती नेपालीलाई घर ल्याएको हो । उनीहरुको भाडा तथा जहाजको व्यवस्थापनसमेत यूएई सरकारले गरिदिएको हो ।

यूएईले यसअघि नै नेपालीलाई आफ्नै जहाजमा राखेर नेपाल फर्काउन चाहेको थियो । तर, नेपालले तयारी नसकेका कारण फर्काइएको थिएन । शुक्रबार यूएइको इजादा फ्यासिलिटी म्यानेजमेन्टमा कार्यरत ६७, टान्स गार्ड सेक्युरिटी कम्पनीमा कार्यरत ७९ जना र अन्य ११ जना गरी १ सय ५७ जना नेपाली नेपाल आएका छन् । उनीहरुलाई समेत होल्डिङ सेन्टर राखिएको छ । त्यहाबाट आइसोलेसन, क्वारेन्टाइन वा होम क्वारेन्टाइन कहाँ राख्ने भन्ने तय हुने भएको छ ।

शुक्रबार भएका दुई उडान सम्बन्धित मुलुकले नै पठाएका कारण सम्भव भएको हो । अन्य स्थानका लागि भने सरकारले अझै तयारी पुरा गरिसकेको छैन । नेपालले खाडी मुलुक, बंगलादेश, अष्ट्रेलियालगातबाट नेपाली जहाज पठाएर नेपालीको उद्दारको योजना बनाइरहेको छ ।

यूरोप र अमेरिकाबाट आउने हो भने ट्रान्जिटसम्म आउनुपर्नेछ । किनकी यूरोपेली यूनियनले नेपाली जहाजलाई उसको आकासमा उड्ने अनुमति दिँदैछ ।

काठमाडौं । विदेशबाट नेपाली नागरिकको उद्दार हुने अवधिभर त्रिभुवन विमानस्थल सुरक्षाको सम्पूर्ण जिम्मा नेपाली सेनाले लिएको छ । विमानस्थलबाट यात्रुलाई होल्डिंग सेन्टरसम्म लैजाने, त्यहाँबाट सम्बन्धित स्थानीय तह र होटेलसम्म लैजाने जिम्मा पनि सेनाले पाएको हो । त्रिभुवन विमानस्थलका एक अधिकारीका अनुसार उद्दार उडानको समयमा विमानस्थल भित्रका सबै गतिविधिलाई सेनाले नियन्त्रण गर्नेछ ।

सरुवा रोगको संक्रमणसँग सम्बन्धित विषय भएकाले गोल्डेन गेटबाट सर्वसाधाणलाई समेत प्रवेश रोक लगाइने भएको छ । आज बर्माबाट सैन्य जहाजले नेपालीलाई काठमाडौं ल्याउने तयारी छ । सो जहाजले नेपालमा रहेका बर्मेली नागरिकलाई स्वदेश फर्काउँदैछ । आज अन्य मुलुकबाट पनि उडानको तयारी भएपनि आधिकारिक जानकारी सार्वजनिक गरिएको छैन ।

सरकारले विभिन्न मुलुकमा अलपत्र परेका नेपाली नागरिकलाई घर फर्काँदैछ । खाडी मुलुकहरुबाट मात्र २५ हजार भन्दा बढी तत्काल घर फर्कने अवस्था रहेको बताइएको छ । विदेशबाट आउने मानिसको तथ्यांक संकलनको काम भने परराष्ट्र मन्त्रालयबाट भइरहेको छ ।

काठमाडौं । सरकारले निकट भविश्यमा विदेशमा अलपत्र नेपाली नागरिकलाई स्वदेश फर्काउँदै छ । यसका लागि परराष्ट्र मन्त्रालय मातहतका निकायले तथ्यांक संकलन तिब्र बनाएका छन् । यता, स्वदेशमा समेत भौतिक संरचना निर्माणले गति लिएको छ । यसका लागि नेपाली सेना र अन्य सरोकारवाला निकाय खटिएका छन् । सरकारले बनाएको कार्यविधि अनुसार त्रिभुवन विमानस्थलमा झरिसकेपछि यात्रुलाई होल्डिङ सेन्टरमा लगिने छ ।

त्यहाबाट होटेलमा बस्ने व्यक्ति होटेलमा निर्माण भएको क्वारेन्टाइनमा जानेछन् भने सरकारी खर्चमा क्वारेन्टाइनमा बस्ने व्यक्ति भने आफ्नो स्थानीय तहमा त्यहाँ निर्माण भएको क्वारेन्टाइनमा जानुपर्नेछ । सरकारले विदेशबाट ल्याइने नेपालीलाई व्यवस्थापन गर्न उपत्यकाभित्र ९ स्थानमा होल्डिङ सेन्टर स्थापना गरेको छ । ४ स्थानमा भने कोरोना डेडिकेटेड क्वारेन्टाइन तयार पारिएको छ ।

काठमाडौं, भक्तपुर र ललितपुरका ९ वटा पार्टी प्यालेसमा होल्डिङ सेन्टर बनाइएको छ । होल्डिङ सेन्टर बनाउन काठमाडौंमा ४, ललितपुरमा ३ र भक्तपुरमा २ वटा पार्टी प्यालेस प्रयोग गरिएको हो । होल्डिङ सेन्टर र क्वारेन्टाइनमा सुरक्षा व्यवस्थापन नेपाली सेनाबाट हुने भएको छ । होल्डिङ सेन्टरबाट सवारी साधनमा नेपाली सेनाले मानिसलाई स्थायी ठेगाना भएका स्थानीय तहसम्म पुर्‍याउने छ ।

होटेलमा आफ्नै खर्चमा बस्न चाहनेलाई भने होटेलमा लगिनेछ । सरकारले आगामी साताबाट उद्दार थाल्ने तयारी गरेको हो । दैनिक २५ सय हाराहारी मानिस ल्याउने गरी तयारी थालिएको छ । नेपाल एयरलाइन्सको जहाजले अष्ट्रेलिया, बंगलादेश, खाडी मुलुक तथा मलेसियाबाट नागरिक ल्याउने छ ।

यूरोप र अमेरिकाबाट आउन चाहने व्यक्ति भने ट्रान्जिट प्वाइन्टसम्म आउनु पर्छ । किनकी यूरोप र अमेरिकासम्म नेपाली जहाजलाई उडानको अनुमति दिइदैन । यूरोपले नेपाली एयरलाइन्सलाई कालोसूचिमा राखेको छ ।

काठमाडौं । नेपाल एयरलाइन्सको इतिहासमा आज एकै गन्तब्यमा एकै पटक सर्वाधिक यात्रुसहित उडान भएको छ । नेपाल एयरलाइन्सका अपरेशन विभाग प्रमुख दीपु ज्वार्चनका अनुसार नेपाल एयरलाइन्सले आज हङकङका लागि तीन वटा जहाज उडाएको छ । सोमबार साँझ एक एक घण्टाको फरकमा यी उडान भएका हुन् । यी जहाजले नेपालमा रहेका हङकङ आइडी होल्डर यात्रु बोकेका छन् ।

करीव ६ सय यात्रु नेपालबाट हङकङतर्फ लागेका हुन् । लामो लकडाउनका कारण नेपालमा रोकिएका हङकङको आइडी होल्डर नेपालीहरु यी उडानबाट फिर्ता भएका हुन् । नेपाल एयरलाइन्सले हङकङमा नियमित उडान गर्छ । तर, अहिले भने नेपालमा अन्तर्राष्ट्रिय व्यवसायिक उडानमाथि प्रतिवन्ध लागेका कारण १४ सय भन्दा बढी हङकङ आडी होल्डर नेपाली नेपालमै अड्किएका छन् ।

उनीहरुलाई ट्राभक कम्पनीमार्फत आफ्नै खर्चमा टिकट काटी हङकङ फर्काउने व्यवस्था मिलाइएको हो । यसक्रममा टिकट दर भने झण्डै दोब्बर परेको छ । नेपाल एयरलाइन्सले दुई वटा न्यारोबडी र एउटा वाइडबडी जहाज एकै पटक उडाएको हो ।

काठमाडौं । मंगलबार राती नेपाल एयरलाइन्स जापानको फुकुओकातर्फ उड्दैछ । नेपालबाट नेपाली विद्यार्थीलाई लिएर पहिलो पटक नेपाल एयरलाइन्स यो शहरमा जान लागेको हो । यसअघि नेपाल एयरलाइन्स नारिता र ओशाकामा पुगेको थियो । लकडाउनका कारण नेपालमै अड्किएका दुई जापानीसहित प्रवासी नेपालीलाई लिएर नेपाल एयरलाइन्सको चार्टर्ड विमान जापानको क्युसुको फुकुओकातर्फ उड्न लागेको नेपालको सरकारी समाचार समिति राससले जनाएको छ । नेपाल एयरलाइन्सको जहाजमा २६४ जना नेपाली छन् ।

उनीहरु जापानमा विद्यार्थी र कामदार भिसामा कार्यरत रहेका बेला बिदामा नेपाल आएका थिए । नेपालमा लकडाउन भएपछि यतै रोकिएकाहरुलाई सरकारको अनुमतिपछि मार्गिक ट्राभल्स एण्ड टुर्स र रेसेन्ट एण्ड रिदम ट्राभल्स एण्ड टुर्सले चार्टर्ड फ्लाईटको व्यवस्थापन गरेको हो । मार्गिक ट्राभल्स एण्ड टुर्सका प्रबन्ध निर्देशक पर्शु बस्नेतका अनुसार २ जना जापानिजसहित २६६ यात्रु लिएर नेपाल एयरलाइन्स मंगलबार राति ११ बजे पहिलोपटक जापानको क्युसुको फुकुओका उडन लागेको हो । जहाज बुधबार बिहान ८ बजे जापान पुग्नेछ । सबै यात्रुसँग ११ सय डलरमात्रै भाडा लिइएको छ ।

सो समितिले जापानको नियम(कानूनअनुसार यात्रुहरुको व्यवस्थापन गर्ने बस्नेतले जानकारी दिए । यसअघि गत मे २४ मा टोकियोका लागि उडान भएको थियो । फुकुओकामा हुने उडान क्युसु क्षेत्रकै पहिलो चार्टड फ्लाईट हो । नारितामा भने नेपाल एयरलाइन्सले नियमित उडान समेत गर्छ ।