लण्डन । चीनले बेलायती टेलिभिजन बिबिसी वर्ल्ड न्युजको प्रसारणमा प्रतिवन्ध लगाएको छ । चीनको राष्ट्रिय रेडियो तथा टेलिभिजन प्रशासनले एक विज्ञप्ति जारी गरी यस्तो प्रतिवन्धको घोषणा गरको हो । बिबिसी वर्ल्ड न्युजले समाचार प्रसारणमा सत्यता र निष्पक्षताको मापदण्ड पूरा नगरेको आरोप चीनको छ ।
प्रशासनले चीनको राष्ट्रिय स्वार्थ तथा जातीय एकतामा खलल पुर्याउने सामग्री प्रसारण गरेको बताएको छ । खासगरी कोभिड १९ सम्बन्धी एक रिर्पोटलाई लिएर बिबिसीसँग चीन रुष्ट बनेको हो ।
चीन सरकारले कोभिड १९, वुइघुर मुस्लिमको बाहुल्यता रहेको पश्चिमी सिन्जियाङ प्रान्तमा प्रणालीगत बलात्कार, यौन र श्रम शोषण भइरहेको रिर्पोट बिबिसीले बजाएको थियो । बिबिसीको यो रिर्पोट निराधार रहेको चीनको आरोप छ ।
चिनियाँ रेडियो तथा टेलिभिजन प्रशासनले यो वर्ष बिबिसीको प्रसारण रोक्ने र अर्को वर्ष समेत प्रसारण अनुमतिका लागि दिने निवेदन स्वीकार नगर्ने उल्लेख गरेको छ । उता, बेलायती विदेश मन्त्री डोमिनिक राबले बिबिसीमाथिको प्रतिबन्ध संचार स्वतन्त्रतामाथिको अंकुश भएको उल्लेख गरेका छन् ।