काठमाडौं । नेपाल पत्रकार महासंघको सबै तहको नेतृत्वका लागि भएको निर्वाचनको मतगणना जारी रहेको छ । मतदान बुधबार सकिएको थियो । आज बिहानैबाट जिल्ला स्तरमा नतिजा आउने क्रम शुरु छ ।
जिल्लास्थित पत्रकार महासंघ निर्वाचन कार्यालयले जनाए अनुसार धेरैजसो जिल्लामा विपुल पोखरेल प्यानलको अग्रता रहेको छ । यो प्यानलमा कांग्रेस, माओवादी र एमाले (नेपाल) समुह संयुक्त रुपमा निर्वाचन लडेको हो । प्रधानमन्त्री केपी ओलीले नेतृत्व गरेको एमाले निकट पत्रकारको प्रतिनिधित्व गर्दै निर्मला शर्मा अध्यक्षको प्रतिस्पर्धी रहेकी छिन् ।
पत्रकार महासंघको नयाँ नेतृत्वको लागि केन्द्रसहित १० वटा प्रदेश, ७६ जिल्ला शाखा, ४२ वटा प्रतिष्ठान र एसोसियटमा निर्वाचन भएको हो । यो पटक पत्रकार महासंघको निर्वाचन प्रत्यक्ष प्रणालीबाट भएसँगै केन्द्रित नेतृत्वका लागि समेत सबै पत्रकारले प्रत्यक्ष भोट हाल्न पाएका छन् । १३ हजार मतदाता मध्ये ९२ प्रतिशतले भोट हालेको पाइएको छ । महासंघको नेतृत्वको कार्यकाल तीन वर्षे रहेको छ ।