काठमाडौं । कांग्रेस सभापतिको चयनका लागि पुनः मतदान हुने भएको छ । पहिलो चरणको निर्वाचनमा पहिलो र दोस्रो भएका क्रमशः शेर बहादुर देउृवा र शेखर कोइरालाबीचमा दोस्रो चरणको निर्वाचन हुने भएको हो । पहिलो चरणको निर्वाचनमा कसैले पनि ५० प्रतिशत कटाउन नसकेपछि पुनः मतदान हुने भएको हो । महाधिवेशनका ४ हजार ७ सय ४३ प्रतिनिधिहरूमध्ये ४ हजार ६ सय ७९ ले भोट हालेका थिए । पहिलो चरणमै जित निकाल्न २३४० मत चाहिन्थ्यो ।
पहिलो चरणमा देउवाले २२५८ मत प्राप्त गरे । उनी बहुमत पाउनबाट ८२ मत पछि रहे । कोइरालाले १७२९, प्रकाशमान सिंहले ३७१ विमलेन्द्र निधिले २४९ र कल्याण गुरुङले २० मत पाए । निर्वाचन आजै हुने छ । कांग्रेसमा सभापति १, उपसभापति २, महामन्त्री २ र सहमहामन्त्री ८ सहित १३४ पदका लागि निर्वाचन भएको छ । अब अन्य पदको मतगणना थाल्ने तयारी छ ।