आमाको शानलाई शुभकामना

मृदुला आचार्य
ओमाहा, नेव्रास्का

छोरा शान
नाम जस्तै त छौ तिमी
मेरो जीवनको मीठो उपहार
तिमी मेरो सानो छोरा, मेरो शान
हिजो जस्तै लाग्छ
तिम्रो स साना कोमल हातहरू
सुम्सुम्यादै चुमेर
टपक्क छातिमा टॉसेको ।

आहा !
तिम्रा ती पहिलो मुस्कान
तोते बोली
आमा आमा भन्न्दै पछि पछि लागेको ।
तिम्रा ती अवोध बालापन
हाम्रो सुनशान घरलाई
स्वर्ग नै बनायौ छोरा तिमीले ।

थाहै नपाई सुटुक्कै
तिमी फूल झै फक्रियौ छोरा,
हातेमालो गरेर भाइ खेलायौ
हजुरबा हजुरआमाको साथी
बाबा आमाको आज्ञाकारी तिमी
हामीलाई गौरवान्वित बनायौ ।
सुमधुर हाम्रो सहयात्रामा
तिमीले गौरव कमाएका छौ
हाम्रो शान बढाएको छौ ।
तिम्रो आफ्नो लक्ष्यमा प्रतिवद्द छौ
नयॉ पिडीको मार्गदर्शक बनेका छौ बाबु !
तिम्रो अविभावक बन्न पाउदा
हामीलाई गौरव छ छोरा !

छोरा,
अब तिम्रो जीवनको बाटोमा
अलिकति मोडिने बेला भएको छ
तिमी स्वतन्त्र पँक्षी बनेर
नयॉ अकासमा उडान भर्ने छौ ।
तिम्रा गन्तव्य विशाल र फराकिलो हुनेछन
केही कठिनाई आउन सक्लान
तर तिमी बिचलित हुने छैनौ ।
तिमी सधै सफलताको बाटो हिड्ने छौ
सदा सही सही मार्ग रोज्ने छौ तिमी ।

जब तिमी हाम्रो आगन छोडेर
केही पर हुनेछौ
तिम्रो यादमा घर बेचैनि हुनेछ
तिमीसँग बिताएका
सुनौला पलहरूको स्मृतिमा
खुसी खोज्ने छौं हामी
तिम्रो सुन्दर भविष्यको
कल्पनामा रमाएर
रोमान्चित बन्नेछौ छोरा
सुर्ता नमान्नु है,
रून्चे हाँसोमा मुस्कुराउने छौं हामी
तिम्रो आगमनको प्रतिक्षा गर्दै
स्वागत गर्न तयार रहने छौ छोरा।

तिमीलाई कुनै बाधा अडचन नपरोस छोरा
तिमीसँग अपठ्यारो पार गर्ने क्षमता छ
जीन्दगी अनुभवको पाठशाला हो
तिमी छिट्टै सफलताको सिखर चुम्नु
तिमीलाई हृदय भरिको शुभकाममा
तिम्रो दीर्धायूको मँगलमय कामना !
छोरा !
तिमीलाई मुरी मुरी शुभकामना !
तिमीलाई दिक्षान्तको शुभकामना !!