हेटौडा । पूर्व–पश्चिम राजमार्ग अन्तर्गत हेटौंडा ९ पशुपतिनगरमा सवारी दुर्घटनामा परी बावु छोरीको मृत्यु भएको छ । भारतबाट ग्याँस बोकेर आएको एनएल–१एल २९७१ नम्बरको ग्याँस बुलेटले हेटौंडा बजारतर्फ आउँदै गरेको ना६१प ४५९७ नम्बरको मोटरसाइकलाई पछाडिबाट ठक्कर दिएको थियो ।
प्रहरीका अनुसार घटनामा ५५ वर्षीय बावु ईश्वरकुमार तामाङ र उनकी २६ वर्षीय छोरी अमिना तामाङको मृत्यु भएको छ । ग्याँस बुलेटको ठक्करबाट मोटरसाइकल उछिट्टिएर घाइते भएका उनीहरूलाई हेटौंडा अस्पतालमा ल्याउनासाथ डाक्टरले मृत घोषणा गरेका थिए । जिल्ला प्रहरी कार्यालय मकवानपुरका अनुसार घटनाबारे थप अनुसन्धान भइरहेको छ ।