१२ साउन, काठमाडौं । सिन्धुलीबाट बेपत्ता एकै परिवारका १६ जनामध्ये १२ जना पोखरामा रहेको पुष्टी भएको छ । स्थानीय संचारमाध्यमले यसको पुष्टी गरेका छन् ।
सिन्धुलीको गोलन्जोर गाउँपालिका–६ छेत्पाबाट एकै परिवारका १६ जना बेपत्ता भएका थिए । १२ जना पोखरामा सम्पर्कमा आएको आफन्त बच्छु हायूलाई उदृत गर्दै सञ्चारमाध्यमले लेखेका छन् ।
गोलन्जोर गाउँपालिका६ स्थित छेत्पा नजिक भण्डास बिप्पर कटेरी भन्ने ठाउँमा बसोबास गर्दै आएकी उर्मिला हायुको १६ जनाको परिवार ४ दिनदेखि सम्पर्कविहीन भएपछि प्रहरीले आज दिनभर खोजेको थियो । प्रहरीले उनीहरु पोखराको लेकसाइडस्थित एक होटलमा गएर बसेको सूचना पाएको थियो । उनीहरू गत शनिबार पोखरा लेकसाइडमा रहेको होटल जननी पुगेको पाइएको छ । उनीहरुबारे थप जानकारी भने प्रहरीले सार्वजनिक गरिसकेको छैन ।