नवलपरासी । पूर्वी नवलपरासीस्थित कावासोतीमा शनिबार राती भएको बस दुर्घटनामा १७ जना घाइते भएका छन् । दुई जनाको अवस्था गम्भीर रहेको छ ।
सेनाका जवान चढेको बस दूर्घटनामा परेको नवलपरासी प्रहरीले जानकारी दिएको छ । बस सुर्खेतबाट काठमाडौं आइरहेको थियो ।
नेपाली सेनामा भर्ना भएका नयाँ जवानहरु तालिमका लागि काठमाडौं आउने क्रममा बस दूर्घटनामा परेको हो ।
गम्भीर घाइतको चितवन र अन्यको मध्यविन्दु जिल्ला अस्पताल तथा कालीगण्डकी अस्पतालमा उपचार जारी छ । ना ६ ख ४०४ नम्बरको बस दूर्घटनामा परेको हो ।
भक्तपुर । अब भक्तपुरमै जीपलाइनको रमाइलो अनुभव गर्न पाइने भएको छ । शाहसिक पर्यटकीय प्रडक्ट मानिने यो खेल आगामी तीन महिनाभित्र शुरु गर्ने गरी शिलान्यास भएको छ ।
भक्तपुरको सूर्यविनायक नगरपालिका क्षेत्रमा जीपलाइन बन्ने भएको हो । सूर्यविनायक नगरपालिका–७ घ्याम्पेडाँडा नयाँगाउँमा घ्याम्पेडाँडा पर्यटन प्रवद्र्धन समिति र ताण्डव इन्भेष्टमेन्ट प्रालिले जीपलाइन बनाउन शुरु गरेका छन् ।
घ्याम्पेडाँडा रानीकोटगढी हावाघरबाट जीपलाइन हुने हुने छ । यो जीपलाइन पाइलटबाबा आश्रम पछाडिको नयाँ गाउँमा अवतरण हुने गरी निर्माण गरिने भएको छ ।
रानीकोटगढी हावाघरमा एउटा पोल र पाइलटबाबा आश्रम पछाडि रहेको नयाँगाउँमा अर्को पोल राखेर तार टागीने छ ।
सोही तारमा झुण्डिएर रोमान्चक यात्रा गर्न सकिने छ । यो स्थान काठमाडौँबाट मात्र १९ किलोमिटरको दूरीमा पर्छ ।
अहिले सडक कालोपत्रेका काम धमाधम भइरहेको छ । यहाँ ५ करोड मूल्य लागतमा जीपलाइन शुरु गर्न लागिएको हो ।
जनकपुर । धनुषामा भएको बम विस्फोटमा तीन जनाको ज्यान गएको छ । धनुषाको छिरेश्वरनाथ नगरपालिका, ५ महेन्द्रनगर बजार नजिकै बम विष्फोट हुँदा एक प्रहरी अधिकृतसहित तीन जनाको निधन भएको हो ।
घटनामा ती जना गम्भीर घाइते छन् । स्थानिय कुचाइ टोलस्थित राजेश साहको घर बाहिर राखिएको बम विस्फोट भएको थियो ।
विस्फोटमा राजेश साह र उनका छोरा आनन्दको घटनास्थलमा मृत्यु भएको छ । प्रहरी निरीक्षक (इन्स्पेक्टर)अमिर कुमार दाहालको उपचारका क्रममा शनिबार बिहान मृत्यु भएको हो ।
घटना राती १२ बजेतिर भएको थियो । घाइतको धरानस्थित बीपी कोइराला स्वास्थ्य विज्ञान प्रतिष्ठानमा उपचार जारी छ । घरमा बम राखिएको खबर पछि प्रहरी पुगेको थियो ।
त्यहाँ रहेको स्थानीयको बाक्लो भीड हटाउटा हटाउँदै भएको विस्फोटमा प्रहरीसहितको मृत्यु भएको हो । बम कसले राखेको थियो भन्ने बारे स्पष्ट भइसकेको छैन ।
काठमाडौं । विश्वकप छनोट प्रतियोगिता अन्तर्गत कुवेतविरुद्धको महत्वपूर्ण खेलका लागि भूटान उड्ने अघिल्लो रात ठमेलका नाइट क्लवमा पुगेर मस्ती गर्ने फूटबल खेलाडीहरुमाथि अखिल नेपाल फूटबल संघ (एन्फा)ले प्रतिवन्धको घोषणा गरेको छ ।
चार जना खेलाडी क्लोज क्याम्पबाट भागेर नाइट क्लव पुगेका थिए । विमल घर्ती मगर, दिनेस राजवंशी, अञ्जन बिष्ट र देवेन्द्र तामाङमाथि एन्फाले प्रतिबन्ध लगाएको छ ।
त्यसमध्ये विमल र दिनेशमाथि ९० दिनको प्रतिबन्ध लागेको छ । उनीहरुले शनिबार बाट शुरु हुने शहीद स्मारक लीगसमेत गुमाएका छन् ।
अञ्जन बिष्ट र देवेन्द्र तामाङलाई ४५ दिनको प्रतिबन्ध लागेको छ । प्रतिबन्धका साथ एन्फाले प्रति खेलाडी ५० हजार नगद जरिवाना समेत तोकेको छ ।
अनुशासनहिन बन्दै गएका खेलाडीमाथिको कारवाहीपछि यता राष्ट्रिय टीमले भने उनीहरु बीना पनि निकै राम्रो प्रदर्शन गरेका कारण एन्फालाई सजाय तोक्न कुनै दवाव सिर्जना भएन् ।
यी चार खेलाडीले सागमा फूटबल गुमाएका थिए । तर उनीहरु नभएपनि नेपालले स्वर्ण जितेको छ । कुवेतविरुद्ध समेत नेपाल मात्र १ गोलले पराजित भई नेपाल फर्किएको थियो ।
काठमाडौं । नेपाल र फ्रान्सबीच परामर्श संयन्त्रको स्थापना गरिएको छ । दुई देशबीचको सम्बन्ध, क्षेत्रीय र अन्तरराष्ट्रिय साझा चासोका विषयमा नियमित रूपमा परामर्श लिन सकिने गरी नेपाल र फ्रान्सबीच द्विपक्षीय परामर्श संयन्त्र स्थापना भएको हो ।
दुई मुलुकका उच्च अधिकारीबीच शुक्रबार संयन्त्र स्थापनासम्बन्धी समझदारीपत्रमा हस्ताक्षर सम्पन्न भयो । परराष्ट्र मन्त्री प्रदीप ज्ञवालीको उपस्थितिमा संयन्त्र स्थापनासम्बन्धी सम्झौतामा हस्ताक्षर भएको हो । शुत्रबार नै संयन्त्रको पहिलो बैठक बसेको छ ।
फ्रान्सको विदेश मन्त्रालयमा एशिया र ओसिनिया मामिला हेर्ने निर्देशक थिरी मथाउ नेपाल आएका छन् ।
उनी र परराष्ट्र मन्त्री ज्ञवालीको उपस्थितिमा परराष्ट्र मन्त्रालयका सहसचिव निर्मलराज काफ्ले र नेपालका लागि फ्रान्सका राजदूत फस्वा जाभिए लेजेबीच सम्झौता पत्रमा हस्ताक्षर भयो ।
परराष्ट्रसचिव शङ्करदास वैरागी र निर्देशक मथाउ नेतृत्वको प्रतिनिधिमण्डलबीच परामर्श संयन्त्रको पहिलो बैठक शक्रुबार बसेको हो ।
बैठकमा आर्थिक विकास, व्यापार, पर्यटन, लगानी, जनता–जनताबीच सम्पर्क विस्तारका सम्बन्धमा दुई देशबीच छलफल भएको छ ।
काठमाडौं । तातोपानी भन्सार कार्यालय सिन्धुपाल्चोकका प्रमुख भन्सार अधिकृत कृष्णबहादुर बस्नेतविरुद्ध साढे १० करोड रुपैयाँ भ्रष्टाचार गरेको आरोपमा मुद्दा दर्ता भएको छ ।
अख्तियार दुरुपयोग अनुसन्धान आयोगले १० करोड ५६ लाख ९१ हजार ६ सय ९ रुपैयाँ ९१ पैसा बिगो दाबी गर्दै शुक्रबार विशेष अदालतमा मुद्दा दर्ता गरेको हो ।
अख्तियारले शुक्रबार मुद्दा दायर गरेको जनाएको छ । अख्तियारले अकूत सम्पत्ति आर्जन गरेको अभियोगमा उनीविरुद्ध मुद्दा दायर गरेको छ ।
बस्नेतले कमाएको पैसा आफू र आफ्ना परिवारको नाममा राख्ने गरेका थिए । २०४५ सालमा लेखापालको रुपमा उनी सरकारी सेवा छिरेका थिए ।
त्यसयता उनको वैधानिक कमाई १ करोड ७८ लाख २० हजार ९ सय ७५ रुपैयाँ ८२ पैसा मात्र रहेको अख्तियारको अनुसन्धानले देखाएको छ ।
उनको नाममा भने वैधानिक आम्दानीबाहेक नै १० करोड ५६ लाख ९१ हजार ६ सय ९ रुपैयाँ ९१ पैसा खर्च र बचत देखिएपछि अख्तियारले मुद्दा चलाएको हो ।
उनले भन्सार नाकाबाट नेपाल आयात हुने सामानको भन्सार पास गर्ने बेला व्यापारी, क्यारिङ्ग व्यवसायी र भन्सार एजेन्टसँग गैरकानूनी रुपमा रकम बुझ्ने गरेका थिए ।
बस्नेतले लिने घुस बुझ्ने काम भने संखुवासभाको खाँदबारी–१ बस्ने जेठान नबिनकुमार गौलीबाट हुने गरेको अख्तियारले उल्लेख गरेको छ ।
ज्वाइँले लिएको घुस जेठानको नाममा जमिन तथा घरमा लगानी भएको पाइएको छ । त्यसपछि भने जेठानबाट बक्सिस पाएको भन्दै आफ्नो नाममा गराउने धन्दा उनको थियो ।
अख्तियारले विशेष अदालतमा दायर गरेको मुद्दामा प्रमुख भन्सार अधिकृत कृष्णबहादुर बस्नेतविरुद्ध १० करोड ५६ लाख ९१ हजार ६ सय ९ रुपैयाँ ९१ पैसा बिगो तथा बिगोअनुसार जरिवाना, २ वर्षसम्म कैद तथा गैरकानून रुपमा आर्जन गरेको सम्पत्ति जफतको मागदाबी गरिएको छ ।
जेठान नबिन कुमार गौलीको हकमा भने ९ करोड २१ लाख ५२ हजार ७ सय ९२ रुपैयाँ बिगो तथा २ वर्षसम्म कैद तथा गैरकानून रुपमा आर्जन गरिएको सम्पत्ति जफत गर्न मागदाबीसहित मुद्दा दर्ता भएको छ ।
काठमाडौं । करीव दुई वर्षयता रोकिएको सवारी साधनमा इम्बोस्ड नम्बर प्लेट लगाउने काम सूचारु गर्ने बाटो खुलेको छ ।
सर्वोच्च अदालतले इम्बोस्ड नम्बर प्लेट कार्यान्वयन विरुद्ध परेको रिट खारेज गरेसँगै अब सवारी साधनमा इम्बोस्ड नम्बर प्लेट राख्ने बाटो खुलेको हो ।
शुक्रबार प्रधानन्यायाधीश चोलेन्द्रशमशेर राणासहित पाँच न्यायाधीशको संवैधानिक इजलासले अधिवक्ताद्वय भरतकुमार बस्नेत र राजन बुर्लाकोटीले हालेको रिट खारेजीको निर्णय गरेको हो ।
देवनागरीको सट्टा अंग्रेजीमा नम्बर प्लेट लेखिएको भन्दै अभियन्ताबाट यसको विरोध भएको थियो । त्यसपछि सर्वोच्चमा रिट परेको हो ।
रिटमाथिको प्रथम सुनुवाईमा तत्कालीन प्रधानन्यायाधीश गोपाल पराजुलीको एकल इजलासले अर्को आदेश नभएसम्मका लागि इम्बोस्ड नम्बर प्लेट लागु नगन अन्तरिम आदेश गरेको थियो ।
शुक्रबार भएको फैसलाले भने बाटो खुला गरिदिएको हो । बंगलादेशी कम्पनी डेकाटुर टाइगरसगँ ५ वर्षमा २५ लाख नम्बर प्लेट छाप्नेगरी सरकारले सम्झौता गरेको थियो ।
सरकारले ४ अर्व ९० करोड २० लाख रुपैयाँमा उक्त सम्झौता गरेको थियो । तर, करिब ४ हजार ६ सयवटा सवारी साधनमा नम्बर प्लेट राखेपछि सर्वोच्चको अन्तरिम आदेशले अन्य प्लेन जडान रोकिएको थियो ।
यसले सरकारलाई निरन्तर घाटा भएको थियो ।
यातायात व्यवस्था विभागले मोटरसाइकललाई २ हजार ५ सय, तीन पांग्रे सवारीलाई २ हजार ९ सय, चारपांग्रे सवारीलाई ३ हजार २ सय र हेभी सवारीलाई नम्बर जडान गर्न ३६ सय रुपैँया शुल्क निर्धारण गरी नम्बर प्लेट राख्न थालेको थियो ।
काठमाडौं । पश्चिमी वायुको प्रभावले बदली भएको मौसमले देशभर चिसो बढाएको छ । यसको प्रभाव अझै एक दुई दिनसम्म जारी रहने मौसम पूर्वानुमान महाशाखाले जनाएको छ ।
शुक्रबार दिनभर जसो काठमाडौंमा वर्षा जारी रहेको छ । काठमाडौंको चन्द्रागिरिमा शुक्रबार हिमपात भएको छ । त्यसो त हिमाली भेगका सबै जिल्लामा बाक्लो हिमपात जारी रहेको छ ।
मौसम चिसिएसँगै त्यसले आफ्नो प्रभाव देखाउन थालेको छ । मौसमविद्हरुका अनुसार शुक्रबार परेको पानीले अब देशभर चिसो ह्वात्तै बढाउने छ ।
खासगरी बिहानमा तुसारो पर्ने र तराईमा शितलहरको जोखिम निम्त्याउन सक्ने खतरा रहेको छ ।
हिमापातका कारण हिमाली भेगमा ताल जम्ने क्रम शुरु भएको छ । हिमाली भेगको हवाई सेवा समेत अवरुद्ध भएको विमानस्थल कार्यालयले जनाएको छ ।
लण्डन । शनिबार मिस वर्ल्डको फाइनल प्रतिस्पर्धा हुँदैछ । बेलायतको लण्डनमा जारी मिस वर्ल्ड प्रतियोगितामा नेपाली सुन्दरी अनुष्का श्रेष्ठले मल्टिमिडिया अवार्ड हात पारेकी छिन् ।
मिस नेपाल श्रेष्ठ हेड टु हेड च्यालेन्जका आधारमा दोस्रो चरण पार गर्दै टप टेनमा समेत पुग्न सफल भएकी छिन् ।
यससँगै अब उनी फाइनल राउन्डकी पतिस्पर्धी समेत भएकी छिन् । अनुष्का ब्यूटी विथ पर्पोज विधाबाट पनि टप १० मा पुग्न सफल भएकी छिन् ।
शनिबार अनुष्कासँगै ४० प्रतिस्पर्धीले मिस वर्ल्डको उपाधीका लागि अन्तिम प्रतिस्पर्धा गर्नेछन् । मिस वर्ल्डमा नेपालसहित विश्वभरका एक सय २५ देशका सुन्दरीले भाग लिएका छन् ।
काठमाडौं । पछिल्लो समय काठमाडौं उपत्यकाका दुई महानगरपालिका साइकल लेन प्रवद्र्धनमा जोडतोडका साथ लागिरहेका छन् । दुई साताअघि ललितपुर महानगरपालिकामा पहिलो साइकल लेन प्रारम्भ भयो ।
कुपण्डोलदेखि पुल्चोकसम्म साइकल लेन उद्घाटन गरियो । साइकल लेन विस्तार गरेर गोदावारीसम्म पुर्याउने योजना बनाएको छ ।
सोही मेसोमा काठमाडौं महानगरपालिका समेत साइकल लेनको तयारीमा जुटेको हो ।
महानगरपालिकाका अनुसार पहिलो चरणमा माइतीघर-तीनकुने साइकलमा साइकल लेन बनाउने तयारी छ । दुबैतर्फ बनाउँदा यस सडक खण्डमा ५ किलोमिटर लामो साइकल लेन हुनेछ ।
काठमाडौंमा साइकल पारखी तथा आवश्यकताका लागि साइकल चढ्नेको संख्या ठूलो छ । तर काठमाडौंले पैदल यात्रु र साइकल यात्रुलाई मान्छे गन्दैन ।
सकभर सवारीसाधनमा यात्रा गर्नेहरुले उनीहरुलाई पेलेर असुरक्षित बनाइरहेका छन् । तर, प्रश्न के उठ्छ भने कुनै एक सडक खण्डमा मात्र साइकल लेन बनाउँदा त्यहासम्म पुग्ने चाँहि कसरी ?
समग्र काठमाडौंलाई साइकल यात्रामैत्री नबनाएसम्म २ या ५ किलामिटर सडक साइकलका लागि तोक्दैमा काठमाडौं साइकलयात्रा मैत्री सडक बनिहाल्दैन ।
यसका लागि काठमाडौं उपत्यकामा वैज्ञानिक ट्राफिक व्यवस्थापनको आवश्यकता पर्छ । त्यो भनेको ठूला सार्वजनिक सवारी साधन भित्राएर अहिले अत्यधिक गुडिरहेका निजी सवारीको विस्थापन नै हो ।
काठमाडौं । आजबाट मुग्लिन-नारायणघाट सडक खण्ड दैनिक ४ घण्टा बन्द हुँदैछ । शुक्रबारदेखि दुई सातासम्म दैनिक चार घण्टा सडक बन्द गर्न लागिएको हो ।
यो सडक खण्ड पश्चिम नेपालसँग काठमाडौं जोड्ने मूख्य मार्ग हो । सडकमा पहिरो रोकथामको बाँकी काम सम्पन्न गर्न आवातजावत रोक्न लागिएको नारायणघाट मुग्लिन सडक आयोजनाले जानकारी दिएको छ।
दैनिक बिहान ११ बजेदेखि दिउँसो ३ बजेसम्म सडक बन्द हुने भएको छ । नारायणघाट तर्फबाट छिर्ने यात्रुवाहक सवारीसाधनलाई पन्ध्र किलो बजारमा रोक्ने र मालवाहक सवारीसाधनलाई दासढुंगामा रोक्ने तयारी छ ।
मुग्लिनतर्फबाट छिर्ने यात्रुवाहक सवारीसाधनमा काठमाडौंबाट छिर्नेलाई मुग्लिन बजारमा रोकिनेछ र पोखराबाट आउनेलाई बेनीटारमा रोकिने भएको छ ।
मालवाहक सवारीसाधन भने काठमाडौंबाट मुग्लिन छिर्नेलाई लेवाटारमा र पोखराबाट मुग्लिन आउनेलाई आँबुखैरेनीमा रोकिने आयोजनाले उल्लेख गरेको छ ।
काठमाडौं । यूरोपेली यूनियनले फेरी पनि नेपाललाई निरास पार्दै एयर सेफ्टी लिस्ट सार्वजनिक गरेको छ । सूचिमा नेपालमा दर्ता भएका सबै वायुसेवा कम्पनी समावेश रहेका छन् ।
हरेक ६ महिनामा इयूले सूचि अपडेट गर्छ । सोही आधारमा कुनै देश कालोसूचिबाट उम्कन्छन् भने कुनै देश कायम रहन्छन् ।
यस पटक इयूले नेपालको बारेमा छलफल नै नगरेको प्राधिकरणका उच्च अधिकारीहरु बताउँछन् । इयूले नेपाल नागरिक उड्डयन प्राधिकरण ऐन कुरेर बसेको छ ।
सो ऐन आएपछि मात्र नेपालबारे उसले केही निर्णय लिने प्राधिकरणका अधिकारीहरु बताउँछन् ।
तर, इयूले भने हवाई सुरक्षामा सुधार नभएको, दूर्घटना नबढेको, नियमन कमजोर रहेको भन्दै सन् २०१३ बाट निरन्तर नेपाललाई यूरोप उडानमा रोक लगाउने गरी कालोसूचिमा राखेको छ ।
नेपालले यसबीचमा अन्तर्राष्ट्रिय नागरिक उड्डयन संगठनको गम्भीर सुरक्षा चासो पार गरिसकेको छ । तर, इयू भने अझै विश्वस्त हुन सकेको छैन ।
इयूले नेपालसहित विश्वका १५ देशका सय १५ वायुसेवा कम्पनीलाई यस सूचिमा राखेको छ ।
जसले गर्दा नेपालबाट यूरोप उडान गर्न चाहने कुनै पनि वायुसेवाले यूरोपमा उडानको अनुमति पाउँदैन । यसले भ्रमण वर्षमा नेपालबारे यूरोपमा नकारात्मक प्रभाव समेत पार्नेछ ।
काठमाडौं । सरकारले चालु आर्थिक वर्ष २०७६्\७७ मा ८ प्रतिशतभन्दा माथिको आर्थिक वृद्धि गर्ने लक्ष्यसहित बजेट कार्यान्वयन गरिरहेको छ ।
तर, नेपालको सबैभन्दा ठूलो विकास साझेदार मध्ये एक विश्व बैंकले आर्थिक वृद्धि ६.४ प्रतिशतमा मात्र खुम्चिने प्रक्षेपण अर्थ मन्त्रीकै अगाडी गरेपछि अर्थमन्त्री बिच्किएका छन् ।
बिहीबार विश्वबैंकले नेपालको अर्थतन्त्रसम्बन्धी पछिल्लो अपडेट सार्वजनिक गर्दै सन् २०२० मा आर्थिक वृद्धि ६.४ प्रतिशत रहने अनुमान गर्यो ।
अर्थमन्त्रीले भने नेपालमा अनुमानको भरमा तथ्यांक आउने गरेको भन्दै यथार्थपरक तथ्यांक नै नभएको उल्लेख गरे ।
उनको भाव विश्वबैंकको तथ्यांकप्रति स्पष्ट झल्कन्थ्यो । उनले नेपालको आर्थिक वृद्धिदर ८ प्रतिशतबाट सरकारले कुनै पनि संशोधन नगरेको समेत पुनः दोहोर्याए ।
विश्व बैंकको तथ्यांक अनुसार सन् २०१९ मा आर्थिक वृद्धि ७.१ प्रतिशत रहेको छ । त्यसपछिका दुई वर्ष पनि लगातार ६ प्रतिशत भन्दा माथिको आर्थिक वृद्धि भने कायम रहनेछ ।
सन् २०२१ को आर्थिक वृद्धिको अनुमान ६.५ प्रतिशत रहेको विश्वबैंकले स्पष्ट पारेको छ । खासगरी सन् २०२० मा सरकारले नेपाल भ्रमण वर्ष मनाउँदैछ ।
यसैवर्ष केही ठूला होटेल संचालनको तयारीमा छन् । एउटा अन्तर्राष्ट्रिय विमानस्थलसमेत यसै वर्ष संचालनमा आउने छ ।
यसले आर्थिक वृद्धिमा सकारात्मक भूमिका खेल्ने विश्व बैंकको भनाई रहेको छ ।
विद्यूत आपूर्तिमा भएको सुधार, राजनीतिक स्थायित्व, नीतिहरुमा समय सापेक्षा सुधारले समेत लगानी अभिवृद्धि हुने र त्यसले आर्थिक वृद्धिमा सघाउने विश्व बैंकको भनाई रहेको छ ।
काठमाडौं । काठमाडौंसहित यस आसपासका जिल्लामा बिहीबार साँझ भूकम्पको धक्का महशुस भएको छ ।
भूकम्प मापन केन्द्रका अनुसार सिन्धुपाल्चोक केन्द्रविन्दु बनाएर ४.८ रेस्कटर स्केलको भूकम्प गएको हो ।
करीव ७ बजे काठमाडौंमा भूकम्पको धक्का महशुस गरिएको थियो । १२ वैशाख २०७२ यता सयौं पराकम्पहरु गइसकेका छन् ।
काठमाडौं । दशरथ रंगशाला पुनर्निर्माणको काम सम्पन्न भएसँगै अब नेपालमा फूटबलको पुनरावृत्ति भएको छ ।
यससँगै अखिल नेपाल फूटबल संघ (एन्फा)को आयोजनामा देशको सबैभन्दा ठूलो फुटबल लीग शहिद स्मारक ए डिभिजन लीग शनिवारदेखि प्रारम्भ हुने भएको छ ।
यसका लागि कतार एयरवेज प्रायोजकका रुपमा भित्रिएको छ । लीगमा अब कतार मूख्य प्रायोजकको भूमिकामा रहने भएको छ ।
कतारले संसारका चर्चित लीगहरुलाई स्पोन्सर गर्दै आएको छ । एन्फा र कतार एयरवेजबीच यसअघि नै सम्झौता भएको थियो । बिहीबार आयोजित औपचारिक कार्यक्रममा भने सार्वजनिक गरियो ।
एन्फा र कतार एअरवेजबीच भएको सम्झौता अनुसार कतारले लीगका लागि कूल १ लाख ५० हजार अमेरिकी डलर उपलब्ध गराउने भएको छ ।
यता लीगको नाम भने अब कतार एयरवेज शहीद स्मारक ए डिभिजन लीग हुने भएको छ । लीगमा भाग लिने हरेक टोलीको जर्सीमा समेत कतार एयरवेजको लोगो अंकित हुने छ ।
स्टेडियम बोर्ड, स्टेडियम फ्लाग, अनलाइन डिजिटल कन्टेन्टमा समेत कतारको लोगो उपलब्ध हुने भएको छ ।
काठमाडौं । कोरियाली कम्पनी मोट्रेक्सले नेपालमा गाडीको एसेम्बल्ड प्लान्ट लगाउने गरी सरकारसँग सम्झौता गरेको छ ।
लगानी बोर्ड र कोरियाली कम्पनी मोट्रेक्सबीच वुधबार प्रारम्भिक चरणको परियोजना लगानी सम्झौंता (पिआइए)मा हस्ताक्षर भएको छ ।
मोट्रेक्सले एसेम्बल्ड प्लान्ट लगाउन करीव ११ अर्ब रुपैयाँ नेपालमा लगानी गर्ने भएको छ ।
लगानी बोर्डका अनुसार कोरियाली कम्पनीलाई सरकारले जग्गा उपलब्ध गराउने भएको छ । एसेम्बल्ड प्लान्ट लगाउन मोतिपुर औद्योगिक क्षेत्रमा सय विघा जग्गा कोरियाली कम्पनीलाई दिने भएको छ ।
मोतिपुरको ब्लक ‘बी’मा सय विघा जग्गा यस कम्पनीलाई दिइने भएको हो । जग्गामा एसेम्बल्ड प्लान्ट राखिने भएको छ भने गोदाम भने बुटवल औद्योगिक क्षेत्रमा रहने भएको छ ।
बुटवल औद्योगिक क्षेत्रसँगै जोडिएको मोतिपुर औद्योगिक परियोजना ८ सय १३ रोपनी क्षेत्रफलमा रहने बताइएको छ ।
बोर्डले गत फागुनमा कम्पनीलाई चार पाँग्रे गाडी एसेम्बल्ड गर्न स्वीकृति दिएको थियो। कम्पनीले अबको ४ वर्ष भित्र नेपालमा गाडी तयार पारिसक्ने भएको छ ।
पहिलो वर्ष ५ हजार ८ सय २०, दोस्रो वर्ष ९ हजार ५ सय ३०, तेस्रो वर्ष १५ हजार ८०, चौथो वर्ष २० हजार थान सवारी उत्पादन गर्ने कम्पनीले आफ्नो प्रस्तावमा राखेको थियो ।
काठमाडौं । शक्तिशाली मानिने पश्चिमी वायु नेपाल प्रवेश गरेको छ। यो वायुको प्रभाव अब कम्तिमा ३ दिनसम्म देखिने छ ।
मौसम अदलबदल भई केही स्थानमा वर्षा तथा उच्च पहाडी र हिमाली भेगमा भारी हिमपात हुने सम्भावना रहेको मौसम पूर्वानुमान महाशाखाले उल्लेख गरेको छ ।
जल तथा मौसम विज्ञान विभागअन्तर्गत मौसम पूर्वानुमान महाशाखाका अनुसार बुधबार साँझ नेपालको पश्चिमी क्षेत्रबाट पश्चिमी वायुबाट विकसित न्यून चापीय प्रणाली प्रवेश गरिसकेको छ ।
यसले नेपालको पश्चिमी उच्च पहाडी र हिमाली भूभागमा भारी हिमपात बनाउन सक्ने सम्भावना रहेको छ ।
बिहीबार यो प्रणाली अझै सशक्त हुनेछ । जसले गर्दा देशका मध्य र पूर्वका उच्च पहाडी र हिमाली भूभागमा समेत हल्कादेखि मध्यमसम्म हिमपातको सम्भावना रहेको छ ।
उक्त प्रणालीका कारण देशैभरी मौसम बदली हुनेछ । अधिकतम र न्यूनतम तापक्रममा गिरावट आउनेछ । यसले देशभर चिसो बढाउने भएको छ ।
यस वायुले पश्चिमी भूभागका धेरै स्थानहरूमा र मध्य र पूर्वी भूभागका केही स्थानहरूमा हल्का वर्षाको समेत सम्भावना छ ।
त्यसपछि देशभैभर चिसो ह्वात्तै बढ्नेछ ।
उच्च पहाडी र हिमाली भूभागमा भारी हिमपात हुन सक्ने र पहाडी भेगमा वर्षा हुने र साथसाथै तापक्रममा गिरावट पनि हुने सम्भावना रहेको हुनाले सतर्कता अपनाउन महाशाखाले सर्वसाधारणमा अनुरोध समेत गरेको छ ।
बिहीबार बिहानैदेखि राजधानीको आकास समेत हुस्सले ढाकिसकेको छ ।
काठमाडौं । हालै सम्पन्न उपनिर्वानबारे समीक्षा गर्न नेपाली कांग्रेसको केन्द्रीय कार्य समिति बैठक बिहीबार डाकिएको छ ।
पार्टी केन्द्रीय कार्यालय सानेपामा दिउँसो १ बजेका बैठका बोलाइएको कांग्रेस सचिवालयले जानकारी दिएको छ ।
१४ मंसिरमा सम्पन्न उपनिर्वाचनका दौरान पार्टीका उमेदवारमाथि घात गर्नेहरुमाथि कारवाही हुने कांग्रेस सभापति शेरबहादुर देउवाले बताइएका छन् ।
उपनिर्वाचन र समसामयिक विषयमा छलफल गर्न बैठक डाकिएको हो । बैठकमा पार्टीका रिक्त विभाग एवम् भ्रातृ संस्थाहरुलाई पूर्णता दिने विषयमा समेत छलफल हुनेछ ।
पार्टीको आगामी महाधिवेशनको तयारी, सरकारका कामहरुको समीक्षा र प्रतिनिधिसभामा रिक्त सभामुख पदमा पार्टीको दावेदारीका सम्बन्धमा समेत छलफल हुने भएको छ ।
सभामुख पद नेकपाले नै लिने र उपसभाुमख पनि कांग्रेस नदिने बताएको छ । किनकी प्रतिनिधिसभामा नेकपा एक्लैको बहुमत छ ।
काठमाडौं । सरकारले विभिन्न ७ मुलुकमा काउन्सेलर र श्रम सहचारी नियुक्तीका प्रक्रिया थालेको छ ।
रिक्त काउन्सेलर र श्रम सहचारी पदमा इच्छुक कर्मचारीबाट श्रम तथा रोजगार तथा सामाजिक सुरक्षा मन्त्रालयले दसखास्त आह्वान गरेको हो ।
मन्त्रालयले दक्षिण कोरिया, कतार र मलेसियाका लागि ३ जना काउन्सेलर मागेको छ । संयुक्त अरब इमिरेट्स, साउदी अरब, मलेसिया, कुवेत र ओमानमा श्रम सहचारी एक एक जना भर्ना गरिने भएको छ ।
काउन्सेलर तथा श्रम सहचारी छनोट तथा नियुक्ति सम्बन्धी कार्यविधि तथा मापदण्ड २०७३ अनुसार योग्यता पुगेका कर्मचारीहरुले ३५ दिन भित्र यस्तो दरखास्त दिन सक्ने भएका छन् ।
खासगरी विदेशमा कुनै कामदारलाई कानून समस्या आइपरे त्यसको समाधानमा यस्ता काउन्सिलरले भूमिका खेल्ने गर्छन् ।
आफ्ना नागरिकलाई समस्या पर्दा त्यसमा सहजिकरण गर्न काउन्सेलर तथा श्रम सहचारी खटाउन थालिएको हो । अन्य मुलुकले पनि नेपालमा यस्त सहचारी खटाएका हुन्छन् ।
काठमाडौं । आज विभिन्न जात जाती तथा समुदायले छुट्टाछुट्टै चाड बनाउँदैछन् । मार्गशीर्ष शुक्ल पूर्णिमाका दिन पर्ने धान्य पूर्णिमा, उधौली र योमरी पूर्णिमा एकै दिन मनाउन लागिएको हो ।
सरकारले सम्बन्धित समुदायका व्यक्तिलाई आज बिदा दिएको छ । अन्य जात र समुदायका कर्मचारीले भने साविकमा झै काम गर्नुपर्छ ।
धान्य पूर्णिमाका अवसरमा भर्खरै भित्राइएको धानको विधिपूर्वक पूजा आजा तथा दान गर्ने प्रचलन रहि आएको छ ।
शुक्ल पूर्णिमामा धान, गणेश, कुलदेवता, गैडु देवता, गोठ देवता, महारुद्र, महालक्ष्मीलगायत देवताको पूजा गरी नयाँ भित्रिएको धान कुटेर चामल बनाउने साथै साही पीठोबाट बनाइएका सेल, बाबर, पुरी मालपुवा जस्ता प्रसाद चढाउने गरिन्छ ।
आज काभ्रेको धनेश्वर, भक्तपुरको अनन्तलिङ्गेश्वर, चम्पादेवीजस्ता स्थानमा भक्तजनको घुइचोसमेत लाग्छ । उता नेवार समुदायमा पनि आजैका दिन योमरी पूर्णिमा मनाइन्छ ।
योमरी पुन्हिःका नाममा मनाइने यस चाडमा नयाँ धानबाट बनेको चामलको पिठो, चाकु र तिलबाट बनेको योमरी खाने प्रचलन रहेको छ ।
उता, याक्खाको चासुवा, सुनुवारको फोलस्यादर, राईको उधौली सकेला र लिम्बुहरूको चासोक तङनाम समेत आजै परेको छ ।
यता, ब्रामण क्षेत्री समुदायमा समेत कतिपय जातको आज कूलपूर्जा पर्छ । देशभर पर्ने यस्तो कूलपूँजालाई ति समुदाय दशैंभन्दा पनि प्राथमिकता दिएर मनाउने गरेका छन् ।
सिड्नी । एक महिना भारतको राजधानी दिल्लीमा स्वास्थ्य संकटकाल घोषणा भयो । मानिसहरुलाई विकास निर्माणका काम रोक्न लगाइयो ।
स्कूल बन्द भए । ठिक यस्तै हालत अहिले अष्टे्रलियाको ठूलो शहर सिड्नीले यस्तै समस्या भोगिरहेको छ ।
अष्ट्रेलियाको जंगलमा लागेको आगोले भिषण रुप लिँदै गर्दा त्यसको धुवाँले वायुमण्डलमा विषालु हावा फैलिएको छ ।
सरकारले मानिसलाई सतर्क रहन चेतावनी समेत दिएको छ । मंगलबार भारतको नयाँ दिल्लीको तुलनामा सिड्नीको प्रदूषणको स्तर बढी देखिएको थियो ।
सिड्नीको हार्बर ब्रिज तथा ओपेरा हाउससमेत धुलो र धुँवाको बाक्लो च्यादरले छोपिएको तस्वीर सार्वजनिक भएको छ ।
एजेन्सी
काठमाडौं । भाइबर, इमोजस्ता सामाजिक सञ्जालबाट नेपालीलाई ठग्ने गिरोह पक्राउ परेको छ ।
भाइबर, इमो, ह्वाट्सएप, फेसबुकजस्ता सामाजिक संजालबाट चिठ्ठा परेको, पार्सल आएको छ भन्दै ठगी गर्ने गिरोह प्रहरीको फन्दामा परेको हो ।
महानगरीय अपराध महाशाखाको विशेष अनुसन्धान टोलीले उनीहरुलाई पक्राउ गरेको हो ।
पक्राउ पर्नेमा दोलखाका ५२ वर्षिय रमेश खड्का, नवलपरासीका ३७ वर्षिय विशेश्वर प्रसाद तिवारी र सोही ठाउँका संदिप कलवार रहेको प्रहरीले बताएको छ ।
उनीहरुको सम्बन्ध नाइजेरियन नागरिक पिटर हेर्मन र बेलायती स्मिथ मोरिससँग रहेको प्रहरीले बतायो ।
अनलाइन ठगीमा १० जना भारतीय नागरिक पनि संलग्न रहेको प्रहरीको अनुसन्धानले देखाएको छ ।
सामाजिक सञ्जाल मार्फत ठगीधन्दा चलाउँदै आएका उनीहरुले विभिन्न बैंक तथा वित्तिय संस्था समेत ह्याक गरेको अनुसन्धानको निष्कर्ष छ ।
पिटर र स्मिथले नेपालमा ठगीका लागि मात्र ४० भन्दा बढी एजेन्ट परिचालन गरेको र पक्राउ पर्नेहरु उनीहरुको एजेन्ट भएको प्रहरीको प्रारम्भिक अनुसन्धानले देखाएको छ ।
यसअघि कृषि विकास बैंक र पानस रेमिट ह्याकिङ प्रकरणमा उनीहरुको संलग्नता रहेको निष्कर्षमा प्रहरी पुगेको छ ।
एजेण्टले १५ देखि २० प्रतिशत कमिसन खाएर बाँकी रकम भारत पठाउने गरेको खुलेको हो ।
उनीहरुले नेपालका विभिन्न १७ वटा बैंकबाट १७ करोड ६७ लाख ९१ हजार रुपैयाँको कारोबार गरिसकेका थिए ।
काठमाडौं । मुग्लिन-नारायणघाट सडकखण्ड दैनिक ४ घण्टा बन्द गरिने भएको छ । शुक्रबारदेखि दुई सातासम्म दैनिक चार घण्टा सडक बन्द गर्न लागिएको हो ।
यो सडक खण्ड पश्चिम नेपालसँग काठमाडौं जोड्ने मूख्य मार्ग हो । सडकमा पहिरो रोकथामको बाँकी काम सम्पन्न गर्न आवातजावत रोक्न लागिएको नारायणघाट मुग्लिन सडक आयोजनाले जानकारी दिएको छ।
दैनिक बिहान ११ बजेदेखि दिउँसो ३ बजेसम्म सडक बन्द हुने भएको छ । नारायणघाट तर्फबाट छिर्ने यात्रुवाहक सवारीसाधनलाई पन्ध्र किलो बजारमा रोक्ने र मालवाहक सवारीसाधनलाई दासढुंगामा रोक्ने तयारी छ ।
मुग्लिनतर्फबाट छिर्ने यात्रुवाहक सवारीसाधनमा काठमाडौंबाट छिर्नेलाई मुग्लिन बजारमा रोकिनेछ र पोखराबाट आउनेलाई बेनीटारमा रोकिने भएको छ ।
मालवाहक सवारीसाधन भने काठमाडौंबाट मुग्लिन छिर्नेलाई लेवाटारमा र पोखराबाट मुग्लिन आउनेलाई आँबुखैरेनीमा रोकिने आयोजनाले उल्लेख गरेको छ ।
काठमाडौं । निजी क्षेत्रको वायुसेवा कम्पनी श्री एयरलाइन्सले जनकपुर र सिमरामा उडान बिस्तारको तयारी गरेको छ । कम्पनीले बुधबार यी दुई विमानस्थलमा सफल परिक्षण उडान गरेको छ ।
अब नागरिक उड्डयन प्राधिकरणबाट उडान अनुमति पाएसँगै ती दुई विमानस्थलमा समेत श्री एयरलाइन्सका जहाज उड्नेछन् ।
श्री एयरलाइन्सले बम्बाडियर सीआरजे जहाजबाट उडान गरिरहेको छ । कम्पनीले अहिले तराईका ७ वटा विमानस्थलमा काठमाडौंबाट जहाज उडाइरहेको छ ।
श्री एयरलाइन्सले ६ वटा जहाजबाट उडान दिइरहेको छ । कम्पनीले जनकपुर सिमरा तथा पोखराबाट उडान थाल्ने तयारी गरेको हो ।
काठमाडौं । १६ वर्षीया ग्रेटा थनवर्ग टाइम म्यागजिनले घोषणा गर्ने वर्ष व्यक्ति घोषित भएकी छिन् । उनी जलवायु परिवर्तनबारे खरो उत्रिएर अभियानमा लागेकी अभियन्ता हुन् ।
१६ वर्षीया स्वीडेन की नागरिकले उनले वर्ष व्यक्तिको सूचिमा अमेरिकी राष्ट्रपति डोनल्ड ट्रम्प, चिनियाँ राष्ट्रपति सी चिनफिङ, फेसबुकका संस्थापक मार्क जुकरबर्क, हङकङका आन्दोलनकारीसहित विश्वका शक्तिशाली शासक र व्यक्तिहरुलाई उछिनेकी छिन् ।
टाइम म्यागजिनले सन् २०१९ का लागि वर्ष व्यक्ति घोषणा गरेको हो । वर्षभर संसारमा प्रभावशाली काम गरेका व्यक्तिलाई यो उपाधी दिने गरिएको छ ।
ग्रेटाले सेप्टेम्बर २०१९ मा संयुक्त राष्ट्र संघको जलवायु परिवर्तन एक्सन सम्मेलनमा दिएको मन्तव्यले संसारभर चर्चा बटुलेको थियो ।
त्यसपछि उनी संचारमाध्यमको केन्द्रमा पर्न थालेकी थिइन् ।
ग्रेटाले टप १० सूचिमा रहेका न्यूजल्याण्डकी पूर्व प्रधानमन्त्री जेसिन्दा एड्रिन, अमेरिकी फुटबलर मेगान रिपोनी, ट्रम्पका वकिल रुदी जिलिनी, दि ह्विसेल ब्लोअर र युएस हाउस अफ रिप्रिजेन्टेटीभकी सभामुख न्यान्सी पेलोसीसमेत उछिनेकी छिन् ।
सन् २००३ मा स्वीडेनको राजधानी स्टकहोममा जन्मेकी ग्रेटा सन् २०१८ मा स्वेडनको संसद भवन अगाडि धर्ना बसेर चर्चामा आएकी थिइन् ।
उनले जलवायुका लागि विद्यालय हड्ताल नारा नै प्रारम्भ गरेकी थिइन् । उनका बुबा र आमा संगित र कलाकारिता क्षेत्रमा आवद्ध छन् ।
उनले हरित गृह ग्यास उत्सर्जन विरुद्ध आन्दोलन गरिरहेकी छिन् । उनी सन् २०१९ को नोवेल शान्ति पुरस्कारको मनोनयनमा समेत परेकी किशोरी हुन् ।
एजेन्सी
काठमाडौं । १३ औं दक्षिण एसियाली खेलकुद (साग) सकिएको भोलीपल्ट बुधबार सरकारले पदक विजेता खेलाडीका लागि नगद पुरस्कार घोषणा गरेको छ ।
प्रधानमन्त्री केपी शर्मा ओलीले बुधबार सबै खेलाडीलाई वालुवाटार बोलाएका थिए । सरकारले ‘सरप्राइज प्याकेज’का रुपमा खेलाडीका लागि नगद घोषणा गरेको हो ।
त्यसअनुसार स्वर्ण पदक विजेताले जनही ९ लाख नगद पाउने भएका छन् । रजत पदकका विजेताका लागि ६ लाख र काश्य पदक विजेतालाई भने ३ लाख नगद घोषणा गरिएको छ ।
टीम इभेन्टमा स्वर्ण जित्नेलाई भने ५ लाख मात्र दिने गरी सरकारले प्याकेज घोषणा गरेको छ । एकभन्दा बढी स्वर्ण जित्नले जनही ११ लाख रुपैयाँ पाउने सरकारको घोषणा छ ।
सरकारले खेलकुद इतिहासमा खेलाडीका लागि सर्वाधिक पुरस्कार राशी घोषणा गरेको छ । यद्दपी यसमा कतिपय द्धिविधा भने बाँकि छन् ।
सरकारले स्वर्ण जित्ने खेलाडीका लागि घोषणा भएको प्याकेजले टीम इभेन्टका खेलाडीलाई निरास बनायो । किनकी स्वर्ण नै जित्दा पनि आधा कम रकममा खेलाडीले चित्त बुझाउनु पर्ने भएको छ ।
टीम इभेन्टमा रजत र काश्य जित्ने खेलाडीलाई भने कुनै पुरस्कार घोषणा गरिएन् । राष्ट्रिय खेलकुद परिषद्का अनुसार बाँकि रहेको पुरस्कार घोषणा मन्त्रीपरिषद्बाट कार्यविधि पास भएअनुसार हुने भएको छ ।
काठमाडौं । प्रधानमन्त्री केपी शर्मा ओलीले १३ औं दक्षिण एसियाली खेलकुद (साग)का पदक विजेता खेलाडीलाई सामूहिक भेट गर्ने भएका छन् ।
उनले खेलाडीलाई अपरान्ह आफ्नै सरकारी निवास बालुवाटारमा बोलाएका छन् । खेलाडीलाई सम्बोधन गर्ने र नेपाल सरकारको तर्फबाट विशेष प्याकेज घोषणाको तयारी प्रधानमन्त्रीले गरेका छन ।
सागको सफल आयोजना गरेको नेपालले ५१ स्वर्ण पदक जित्दै इतिहास रचेको छ । प्रधानमन्त्रीले सागको समापनका अवसरमा पनि भिडियो कन्फ्रेन्समार्फत सम्बोधन गरेका थिए ।
काठमाडौं । काठमाडौंका सडकलाई माग्नेमुक्त बनाउने अभियानस्वरुप काठमाडौं महानगरपालिकाले कारवाही थाल्ने भएको छ ।
२८ मंसिरबाट महानगरपालिकाले अभियानकै रुपमा माग्नेहरुमाथि पनि कारवाही थाल्ने तयारी गरेको हो ।
विभिन्न बाहनामा सडकमा माग्न बस्ने वा सहयोगको अपिल गर्नेका लागि कारवाहीका तयारी भएको महानगरपालिकाले सूचना निकाल्दै जनाएको छ ।
त्यसो त सरकारले पनि नेपाललाई माग्नेमुक्त बनाउने अभियान थाल्ने जनाएको छ । नेपालका शहरहरुमा नेपालीभन्दा बढी भारतीय माग्नेहरुको सडकमा बाहुल्य रहेको छ ।
मंगलबार सूचना निकालेको महानगरले तीन दिनभित्र सबै प्रकारका माग्नेलाई सडकबाट हट्न अल्टिमेटम दिएको छ । २९ मंसिरमा महानगरपालिकाले स्थापना दिवस मनाउँदै छ ।
सोही अवसर पारेर काठमाडौं महानगरपालिकाले काठमाडौंलाई माग्नेरहित क्षेत्र घोषणा गर्दैछ । माग्ने र माग्न प्रोत्साहन गर्ने दुबैलाई कारबाही हुने महानगरपालिकाले जनाएको छ ।
मुलुकी अपराध संहिताको दफा १ सय २६ मा भिक्षा माग्न र भिक्षा माग्न प्रोत्साहन गर्न नहुने र गरेमा बढीमा ३ वर्षसम्म कैद र ३० हजार रुपैयाँसम्म जरिवाना हुने महानगरपालिकाले जनाएको छ ।
तीन दिन भित्र बाटोबाट माग्ने नहटे मानव सेवा आश्रमसँगको सहकार्यमा उनीहरूको व्यवस्थापन थालिने र उनीहरुलाई बालाजु २२ धारास्थित एक घरमा राखेर व्यवस्थापनको योजना छ ।
त्यसपछि वास्तविक पिडामा रहेर माग्ने वा पेशेवर माग्ने छुट्याएर सोहीअनुसार कारवाही अगाडी बढ्ने भएको छ ।
काठमाडौंमा कसैले पेशा वा व्यवसायका रुपमा माग्नेलाई सडकमा खटाउने गरेका पाइए उनीहरु दुबैमाथि कारवाही हुने भएको छ ।
काठमाडौं । सरकारी अधिकृतका लागि तयारी गरेका विद्यार्थीका लागि खुसीको खबर छ । लोक सेवा आयोगले एक हजार ९६ शाखा अधिकृत पदका लागि विज्ञापन मागेको छ ।
प्रशासन, लेखा, राजश्व, परराष्ट्र, न्याय, संसदलगायत सेवाका लागि कूल १ हजार ९६ पदमा बुधबार विज्ञापन खुलाइएको छ ।
त्यसमध्ये खुलाबाट ४१९ र बढुवाबाट ३२८ जनाको पदपूर्ति हुने आयोगले जनाएको छ । ३४९ जना समावेशी समूहबाट लिइने भएको छ ।
विज्ञापन अनुसार प्रशासन सेवाको सामान्य प्रशासन समूहमा ५६० जना अधिकृत मागिएको छ । त्यसमध्ये खुल्लाबाट २१६ र बढुवाबाट १६८ जनाको पदपूर्ति हुने भएको छ ।
उक्त समूहमा समावेशीतर्फ महिलामा ५८, आदिवासी जनजातीमा ४८, मधेसीमा ३९, दलितमा १५, अपांगमा ९ र पिछडिएको क्षेत्रमा ७ जनाको कोटा राखिएको छ ।
राजश्व समूहमा ६९, लेखापरीक्षण समूहमा ४२, लेखा समूहमा ३० जना अधिकृतको माग भएको आयोगले जनाएको छ ।
व्यवस्थापिका संसद सेवातर्फ २८ जना र न्याय सेवा तर्फ न्याय समूहमा २९०, कानुन समूहमा ४९ र सरकारी वकिल समूहमा २४ अधिकृतको अवसर छ ।
परराष्ट्र सेवामा ४ जना अधिकृतले जागिर पाउने छन् । आन्तरिक बढुवाका लागि आवेदन दिने म्याद २९ पुस तोकिएको छ ।
खुल्ला तथा समावेसी पदमा प्रतिस्पर्धा गर्नेले १५ पुससम्म आवेदन दिनुपर्छ । दोब्बर दस्तुर तिरेर २२ पुससम्म आवेदन दिन सकिने भएको छ ।
न्यूजर्सी । अमेरिकाको न्यु जर्सीमा फेरी अन्धाधुन्द चलेको गोलीकाण्डमा ६ जना मारिएका छन् । मारिनेमा १ जना प्रहरी अधिकृतसमेत रहेको अमेरिकी संचारमाध्यमले उल्लेख गरेका छन् ।
न्यूयोर्क टाइम्सका अनुसार ६ जनाको निधन भएको छ भने अन्य दुई जना प्रहरी घाइते छन् । दुई जना सुटर र प्रहरीबीच गोली हानाहान भएको हो ।
जर्सी सीटीको कोशेर मार्केटमा भएको यो घण्टामा करीव घण्टा सुटर र प्रहरीबीच गोली हानहान भएको हो । प्रहरी अधिकृतहरुका अनुसार यसलाई आतंकवादी हमलाको रुपमा हेरिएको छ ।
रेसिडेन्टल एरिया नजिकै एक पसललाट गोलीबारी भएको थियो । त्यहाँ दुई जना हतियारधारी लुकेका थिए । प्रहरीका अनुसार मारिएका प्रहरी अधिकृत ३९ वर्षीय जोसेफ सिल्स रहेका छन् । उनी १३ वर्षदेखि जर्सी शहरको प्रहरी सेवामा कार्यरत थिए ।
जोसेफले बन्दुकधारीलाई पक्रने कोसिस गर्दा उनीमाथि गोली चलेको थियो ।
दुई जना व्यक्ति जोसेफको हत्यापछि ट्रकमा चढेर भागेको नजिकैको एक सुपरमार्केटमा छिरेर प्रहरीलाई फेरी गोली बर्साउन थालेका थिए ।
त्यसक्रममा तीन सर्वसाधारणको ज्यान गएको छ । त्यसपछि प्रहरीले थप सुरक्षा बल बोलाएर उनीहरुलाई घेरा हाल्यो र दुबै आक्रमणकारी मारिएका छन् ।
घटनाबारे थप अनुसन्धान भइरहेको प्रहरीले जनाएको छ ।
एजेन्सी