Author: Vishwanews.com

काठमाडौं । दुई महिनामा कूल वस्तु निर्यात ३४.९ प्रतिशतले घटेको छ।

नेपाल राष्ट्र बैंकको चालू आर्थिक वर्षको दुई महिनाको तथ्यांकको आधारमा प्रकाशित गरेको मुलुकको आर्थिक तथा वित्तीय अवस्थाको प्रतिवेदनको तथ्यांक यस्तो देखिएको हो ।

दुई महिनाको अवधिमा वस्तु निर्यात २८ अर्ब ६८ करोड पुगेको नेपाल राष्ट्र बैंकले सार्वजनिक गरेको तथ्यांकले देखाएको छ। अघिल्लो वर्षको सोही अवधिमा यस्तो निर्यात ११५.४ प्रतिशतले वृद्धि भएको थियो।

गन्तव्यका आधारमा भारत र चीनतर्फ भएको निर्यात क्रमशः ४५.२ प्रतिशत र २१.६ प्रतिशतले कमि आएको छ भने अन्य मुलुकतर्फको निर्यात १३.२ प्रतिशतले वद्धि भएको छ। वस्तुगत आधारमा जिंक शिट, ऊनी गलैँचा, पार्टिकल बोर्ड, तयारी पोशाक, औषधि (आयुर्वेदिक) लगायतका वस्तुको निर्यात बढेको छ भने सोयाविन तेल, पाम तेल, पिना, अलैंची, दन्त मञ्जन लगायतका वस्तुको निर्यात घटेको छ।

यता, आर्थिक वर्ष २०७९/८० को दुई महिनामा कूल वस्तु आयात १३.० प्रतिशतले कमि २७३ अर्ब ६० करोड पुगेको छ। अघिल्लो वर्षको सोही अवधिमा यस्तो आयात ७५.९ प्रतिशतले बढेको थियो।

वस्तु आयात गरिने मुलुकका आधारमा भारत, चीन तथा अन्य मुलुकबाट भएको आयात क्रमशः ९.५ प्रतिशत, १३.३ प्रतिशत र २०.७ प्रतिशतले कमि आएको छ।

वस्तुगत आधारमा पेट्रोलियम पदार्थ, रासायनिक मल, स्पंज आइरन, औषधि, हवाईजहाज तथा स्पेयर पार्टपूर्जा लगायतका वस्तुको आयात बढेको छ भने सवारी साधन तथा स्पेयर पार्टपूर्जा, चाँदी, कच्चा सोयाविन तेल, हट रोल्ड शिट इन क्वाइल, एमएस विलेट लगायतका वस्तुको आयात घटेको छ।

काठमाडौं । नेपालमा पछिल्लो दुई महिनामा रेमिट्यान्स आयातमा वृद्धि भएको छ । नेपाल राष्ट्र बैंकले शुक्रवार सार्वजनिक गरेको चालू आर्थिक वर्षको दुई महिनाको तथ्यांकले यस्तो देखाएको हो ।

तथ्याङ्कअनुसार रेमिट्यान्स १९.८ प्रतिशतले वृद्धि भएको हो । उक्त तथ्याङ्कअनुसार रेमिट्यान्स १९.८ प्रतिशतले वृद्धि भएर १ खर्ब ८७ अर्ब ४ करोड भित्रिएको छ । अघिल्लो वर्षको सोही अवधिमा रेमिट्यान्स ५.८ प्रतिशतले घटेको थियो ।

अमेरिकी डलरमा रेमिट्यान्स ११.३ प्रतिशतले वृद्धि भएर १ अर्ब ४७ करोड पुगेको राष्ट्र बैंकले जनाएको छ । वैदेशिक रोजगारमा जानको संख्या बढेको कारण रेमिट्यान्स बढेको हो ।

राष्ट्र बैंकका अनुसार पछिल्लो दुई महिनामा वैदेशिक रोजगारमा जनेको संख्या १६९.९ प्रतिशतले बढेको छ । दुई महिनामा १ लाख ३ हजार ८९८ जनाले स्वीकृति लिएका छन् ।

काठमाडौं । विदेशी मुद्रा सञ्चिति निराशाजनक देखिएको छ ।

नेपाल राष्ट्र बैंकले शुक्रवार सार्वजनिक गरेको चालू आर्थिक वर्षको दुई महिनाको अवधिमा आउँदा कूल विदेशी विनियम सञ्चिति घटेको छ। २०७९ असार मसान्तमा १२१५ अर्ब ८० करोड बराबर रहेको कूल विदेशी विनिमय सञ्चिति २.२ प्रतिशतले कमी आई २०७९ भदौ मसान्तमा ११८९ अर्ब १६ करोड कायम भएको छ।

अमेरिकी डलरमा यस्तो सञ्चिति २०७९ असार मसान्तमा ९ अर्ब ५४ करोड रहेकोमा २०७९ भदौ मसान्तमा २.० प्रतिशतले कमी आई ९ अर्ब ३५ करोड कायम भएको छ।

कूल विदेशी विनिमय सञ्चितिमध्ये नेपाल राष्ट्र बैंकमा रहेको सञ्चिति २०७९ असार मसान्तमा १०५६ अर्ब ३९ करोड रहेकोमा २०७९ भदौ मसान्तमा ०.५ प्रतिशतले कमी आई १०५१ अर्ब ५३ करोड कायम भएको छ।

बैंक तथा वित्तीय संस्था (नेपाल राष्ट्र बैंकबाहेक)सँग रहेको विदेशी विनिमय सञ्चिति २०७९ असार मसान्तमा १५९ अर्ब ४१ करोड रहेकोमा २०७९ भदौ मसान्तमा १३.७ प्रतिशतले कमी आई १३७ अर्ब ६३ करोड कायम भएको छ।

भदौ मसान्तको कूल विदेशी विनिमय सञ्चितिमा भारतीय मुद्राको अंश २४.३ प्रतिशत रहेको छ।

काठमाडौं । बीमा समितिले पौने २ अर्ब कोरोना बीमाको दाबी भुक्तानी गर्ने भएको छ । सरकारले निकासा गरेको १ अर्ब रुपैयाँमा बीमा समिति, बीमा कम्पनी र पुनर्बीमा कम्पनीले ८१ करोड रुपैयाँ थपेर १ अर्ब ८१ करोड रुपैयाँ भुक्तानी गर्न लागिएको हो ।

सरकारले गत भदौमा १२ अर्ब ३२ करोड रुपैयाँ कोरोना बीमाको दाबी भुक्तानीको दायित्व स्वीकारेको थियो । जसअनुसार पहिलो चरणमा १ अर्ब रुपैयाँ निकासा गरेको छ ।

समितिले सो रकम बीमा कम्पनीहरु मार्फत पहिले दाबी परेकाहरूको प्राथमिकताका आधारमा भुक्तानी गर्ने जनाएको छ । कोरोना बीमा १७ लाख ५८ हजार ३४३ जनाले गरेकोमा १ लाख ६५ हजार ५९ बीमितको १५ अर्ब ८२ करोड २१ लाख ७१ हजार ५५४ रूपैयाँ बराबरको दाबी परेको थियो ।

जसमध्ये बीमा कम्पनी, पुनर्बीमा कम्पनी र बीमा समितिले ३ अर्ब ५० करोड दाबी भुक्तानी गरिसकेका छन् । कोभीडको समयमा बीमा गर्न सरकारले बनाइएको मापदण्ड अनुसार सरकारले तिर्नुपर्ने १२ अर्बभन्दा बढी दायित्व बाँकी छ । जसमध्ये १ अर्ब रकम निकासा गरेपछि ११ अर्ब रुपैयाँ अझै बाँकी रहन्छ ।

डेढ वर्षदेख कारोना बीमा दाबी भुक्तानी गर्ने बिमीतले हालसम्म रकम पाएका छैनन् । सरकारले भुक्तानी दिने बताएपनि स्रोत सुनिश्चित गरेको थिएन् । २०७७ जेठमा बीमा कम्पनी,समिति र सरकारबीच कोरोना बीमाको दाबी भुक्तानी सबैले बेहोर्ने सहमति भएको थियो ।

उक्त मापदण्ड अनुसार १ अर्ब रुपैयाँसम्मको दाबी बीमा कम्पनीहरू, १ अर्बदेखि २ अर्ब रुपैयाँसम्मको नेपाल पुनर्बीमा कम्पनी, २ अर्बदेखि साढे २ अर्ब रुपैयाँसम्मको बीमा कम्पनीहरूको महाविपत्ति कोषबाट दाबी भुक्तानी बेर्होनु पर्ने थियो ।

साढे २ अर्बदेखि साढे ३ अर्ब रुपैयाँसम्मको दाबी भुक्तानी बीमा समिति र साढे ३ अर्ब रुपैयाँ भन्दा माथिको दाबी भुक्तानी सरकारले बेहोर्ने सहमति भएको थियो  ।

कम्पनीहरुले आफूले बेहोर्नुपर्ने दायित्व भुक्तानी गरिसकेका छन् भने सरकारले रकम नदिएपछि गत चैतदेखि बाँकी रहेको दाबी भुक्तानी दिन समेत बन्द गरेका छन् ।

बाँकी रहेको रकम भुक्तानीका लागि १ लाख १३ हजार ३९० वटा दाबी परेको छ । कोभीड अवधिमा २० वटा निर्जीवन बीमा कम्पनीले १७ लाख ५८ हजार ३४३ बीमा लेख जारी गरेर १ अर्ब ५ करोड २७ लाख रूपैयाँ बीमाशुल्क संकलन गरेका थिए ।

काठमाडौं । शेयर बजार झिनो अंकले घटेको छ ।

साताको कारोबारको अन्तिमदिन शेयर बजार मापक सूचक(नेप्से) १.३८ अंकले घटेर १८४४.१४ विन्दुमा झरेको हो ।

नेपाल स्टक एक्सचेन्जका अनुसार विहीवार २२१ कम्पनीको ५० करोड ७६ लाख ८९ हजार ५६० रुपैयाँ बराबरको १५ लाख ४६ हजार ८७५ कित्ता शेयर किनबेच भएका छन् ।

अघिल्लो दिनको तुलनामा कारोबार रकम भने घटेको छ । बुधवार ६४ करोड ३६ लाख ७ हजार ९७५ रुपैयाँ बराबरको कारोबार भएको थियो ।

विहीवार कारोबारमा आएका १३ वटा उपसमूह मध्ये इनभेष्टमेन्ट,विकास बैंक र ट्रेडिङ बाहेक सबै समूहको परिसूचक घटेको छ ।

एक कम्पनीको शेयरमूल्यमा उच्च वृद्धि भएको छ । आज सयपत्री हाइड्रोपावर लिमिटेडको शेयरमूल्य ९.९७ प्रतिशतले बढेर प्रतिकित्ता २५९.१० रुपैयाँ पुगेको छ ।

नेप्सेका अनुसार सेन्चुरी डिबेन्चर र सामुदायिक लघुवित्त वित्तीय संस्थाको शेयरमूल्यमा सबैभन्दा बढी गिरावट भएको छ ।

यसको शेयरमूल्य ७ प्रतिशत भन्दा बढीले घटेको हो । त्यस्तै, कारोबारको आधारमा आज सबैभन्दा बढी अभियान लघुवित्त वित्तीय संस्थाको भएको छ ।

यसको आज तीन करोड ६९ लाख भन्दा बढीको कारोबार भएको छ । यसैगरी, गरिमा विकास बैंक,एभरेष्ट र नबिल बैंकको २ करोड रुपैयाँ बढकिो शेयर किनबेच भएको छ ।

काठमाडौं । अमेरिकी डलरको मूल्यले पुनः कीर्तिमान कायम गरेको छ । बिहीबार नेपाल राष्ट्र बैंकले एक अमेरिकी डलरको बिक्रीदर मूल्य १ सय ३३ रुपैयाँ १४ पैसा तोकेको छ । खरिददर मूल्य १ सय ३२ रुपैयाँ ५४ पैसा तोकिएको छ । यसससँगै डलरको मूल्य सबैभन्दा माथिल्लो विन्ुदमा पुगेको हो । डलरको भाउ बुधबार १ सय ३२ रुपैयाँ ८ पैसा थियो ।

डलर खरिदमा उच्च चाप बढेसँगै अहिले डलरको मूल्य निरन्तर बढिरहेको छ । जसका कारण नेपाली मुद्रा कमजोर बनेको छ । नेपाल आयातमूखी अर्थतन्त्र भएको मुलुक हो । सोहीकारण डलर बढ्दा आयातित सामानको मूल्य बढ्छ । डलरको भाउ उच्च रेमिट्यान्स पठाउनेलाई भने फाइदा हुन्छ । किनकी डलरको तुलनामा नेपालमा मूल्य अधिक प्राप्त हुन्छ ।