Author: Vishwanews.com

काठमाडौं । निर्वाचन आयोगले स्थानीय निर्वाचनमा उम्मेद्वारी दर्ता गरेकाहरुको संख्या सार्वजनिक गरेको छ ।

आयोगले मंगलबार सार्वजनिक गरेको तथ्यांक अनुसार (दिउँसो ३:३०) सम्ममा मनोनयन दर्ता गर्नेको संख्या १ लाख ४७ हजार २ सय ७४ जना रहेका छन् । तर, आयोगले सार्वजनिक गरेको संख्या प्रणाली प्रविष्ट भएको संख्या मात्रै हो ।

आयोगले जनाएअनुसार ७ सय ५३ स्थानीय तहको प्रमुख, उपप्रमुख, अध्यक्ष, उपाध्यक्ष, वडा अध्यक्ष, महिला सदस्य, दलित महिला सदस्य र खुल्ला सदस्य पदका लागि करिब चार गुणा बढी उम्मेदवारी परेको हो ।

सबैभन्दा बढी मधेश प्रदेशमा परेको आयोगले जनाएको छ । आयोगले जनाएअनुसार मधेश प्रदेशमा ३८ हजार ७ सय ८७ जनाले मनोनयन दर्ता गरेका छन् ।

मधेश पछि सबैभन्दा बढी बागमती प्रदेशमा २४ हजार ३३ जना, लुम्बिनी प्रदेशमा २३ हजार ४९ जना र प्रदेश १ मा २२ हजार ५ सय ४२ जनाले मनोनयन दर्ता गराएका छन् ।

कर्णाली प्रदेशमा १३ हजार ४ सय ७ जना, गण्डकी प्रदेशमा १२ हजार ७ सय ८७ जना र सुदूरपश्चिम प्रदेशमा १२ हजार ६ सय ७३ जनाले मनोनयन दर्ता गराएको आयोगले जनाएको छ । आइतबार र सोमबार देशभरका स्थानीय तहमा उम्मेदवारी दर्ता भएको थियो ।

स्थानीय तहमा ३० वैशाखमा ३५ हजार २ सय २१ जनप्रतिनिधिका लागि चुनाव हुँदैछ । २०७४ को स्थानीय तहको चुनावमा १ लाख ५१ हजार १ सय ९० जनाले उम्मेदवारी दिएका थिए ।

आज उम्मेदवारको विरोधमा उजुरी दिन आयोगले भनेको छ । १४ र १५ वैशाखमा मनोनयनपत्र जाँच गर्ने तथा उजुरीउपर जाँचबुझ गरी निर्णय गरी उम्मेदवारको नामावली प्रकाशन गर्ने कार्यतालिका तय गरेको छ ।

१६ वैशाखमा उम्मेदवारले नाम फिर्ता लिने र उम्मेदवारको अन्तिम नामावली प्रकाशन गर्ने तथा १७ वैशाखमा उम्मेदवारलाई निर्वाचन चिह्न प्रदान गर्ने आयोगको कार्यतालिका छ ।

काठमाडौं । स्थानीय तह निर्वाचनमा देशभर १ लाख ३७ हजारको उमेदवारी परेको छ । यो बिहान ८ः३० बजेसम्मको अपडेट हो । निर्वाचन आयोगले तथ्यांक अध्यावधि भइरहेको जनाएको छ । सोहीकारण यो संख्या अझै बढ्ने सम्भावना छ । मंगलबार बिहानसम्मको तथ्यांक अनुसार सबै पदमा कुल १ लाख ३७ हजार ५८ जनाले मनोनयन दर्ता गराएका छन् ।

देशभर २९३ नगरपालिकामा ३ हजार २७६ जनाले नगरप्रमुख (मेयर) पदमा उम्मेद्वारी दिएका छन् । उपप्रमुख (उपमेयर) पदमा २ हजार ९ जनाको मनोनयन परेको छ । ४६० गाउँपालिकामा अध्यक्षका लागि ३ हजार २६४ जनाको मनोनयन परेको छ । २ हजार २९७ जनाले उपाध्यक्षमा उम्मेद्वारी दिएका छन् । कुल ३५ हजार २२१ पदमा वैशाख ३० मा निर्वाचन हुँदैछ ।

काठमाडौं । काठमाडौं महानगरपालिकामा मेयरका लागि ५६ जना आकंक्षी मैदानमा उत्रिएका छन् । मुख्य निर्वाचन अधिकृतको कार्यालयले राति अबेर अद्यावधिक गरेको तथ्यांक अनुसार काठमाडौं महानगरपालिकाको मेयरमा ५६ जनाको उम्मेदवारी परेको हो । यसमा यसमा मूख्य प्रतिस्पर्धा भने गठबन्धन र एमाले बीच हुने छ । स्वतन्त्रतर्फ बालेन साह लोकप्रिय बनेका छन् । राप्रपा र विवेकसिलले समेत केही भेट ल्याउन सक्ने स्थान काठमाडौं हो । काठमाडौंमा अधिकांश स्वतन्त्र उमेदवारका रुपमा खडा भएका छन् ।

मनोनयन दर्ताको काम सोमबार अबेर सकिएको छ । स्वतन्त्र उमेदवार राजन कार्की (३६), रविकान्त मानन्धर (८४) समिक्षा बास्कोटा (३८) विवेकशील साझा पार्टी, सुरेश रत्‍न बज्राचार्य (५५) आधुनिक नेपाल समाजवादी पार्टीबाट उमेदवार बनेका छन् । बालेन्द्र साह ३२) स्वतन्त्र, सीता तामाङ (५५) मंगोल नेशनल अर्गनाइजेसन, आनन्द राज जोशी (३५) राष्ट्रिय यथार्थवादी पार्टी, नेपाल, राम बहादुर खड्का (४७) नेपाल समावेशी पार्टीबाट मेयर पदमा उठेका छन् ।

मनोज राज आचार्य (३७) मौलिक जरोकिलो पार्टी, ज्ञानु लामा तामाङ (स्वतन्त्र, सुमन सायमी (४९) स्वतन्त्र, अमोट महर्जन (३९) स्वतन्त्र, विपीन राज वैद्य (३५) स्वतन्त्र, सूर्य थापा (७४) स्वतन्त्र, जेठा महर्जन (७१) स्वतन्त्र, डिल्ली राम राजभण्डारी् सचेत नेपाली पार्टीबाट उमेदवार बनेका छन् । स्वईट थापा (४४) स्वतन्त्र, न्हुज मान्नधर (२४) स्वतन्त्र, सरिता घिमिरे (४७) नेपाल जनता पार्टी, सुशील थापा क्षेत्री (५२) स्वतन्त्र, दिपक सिलवाल (४०) स्वतन्त्र, बच्पन राज श्रेष्ठ (६९) स्वतन्त्र, शैलेन्द्र मान श्रेष्‍ठ (५४) स्वतन्त्र, विजय मानन्धर (३८) स्वतन्त्र उमेदवार बनेको निर्वाचन आयोगले जनाएको छ ।

सुरज श्रेष्ठ (४६) संघीय लोकतान्त्रिक राष्ट्रिय मञ्च, रुपा सुवाल (६०) आमूल परिवर्तन मसिहा पार्टी नेपाल, किरण रंजित (५१) स्वतन्त्र, भक्त राज भुसाल (५८) नेपाली कांग्रेस (बी।पी), दानिन्द्र जोशी (४६) लोकतान्त्रिक समाजवादी पार्टी, नेपाल, निमकान्त पाण्डे ( ६८) स्वतन्त्रको समेत उमेदवारी परेको छ ।

मधुसुदन खड्का (५८) स्वतन्त्र , मदन दास श्रेष्ठ (७३) राष्ट्रिय प्रजातन्त्र पार्टी , केशव स्थापीत (६२) नेपाल कम्युनिष्ट पार्टी (एमाले), विजय प्रकाश सैजु (६६) नेपाः राष्ट्रिय पार्टी, सन्देश शाक्‍य (४८) स्वतन्त्र, सुरेन्द्र बज्राचार्य (३३) स्वतन्त्र, सुनिल श्रेष्‍ठ (४७) स्वतन्त्र, इन्द्र मणि कपाली (५५) स्वतन्त्रमा उमेदवार बनेका छन् ।

सुरेन्द्र महर्जन (४८) नेपाल मजदुर किसान पार्टी, सिर्जना श्रेष्ठ (५९) नेपाली काँग्रेस , रजित मान शाक्य (४५) स्वतन्त्र, राहुल मानान्धर (३०) स्वतन्त्र, कान्ति तुलाधर (४२) स्वतन्त्र, पिय रत्‍न महर्जन (५५) नेपाल परिवार दल, उमेश कुमार सिंह (६३) स्वतन्त्र, विनय स्थापित (४९) स्वतन्त्र, रोशन शाही (३८) स्वतन्त्र, प्रेमसागर कर्माचार्य (५७) उन्‍नत लोकतन्त्र पार्टी, सैलेश ढुंगाना (३४) स्वतन्त्र, काजी लाल श्रेष्‍ठ (५०) नेपाल कम्युनिष्ट पार्टी (समाजवादी), मनिस श्रेष्ठ (२८) स्वतन्त्र, प्रणेश बहादुर मल्ल (४०) स्वतन्त्रले समेत मेयर पदमा उमेदवार दिएका हुन् ।

बाबुराजा संगत (४७) स्वतन्त्र, निश्चल जोशी (३५) नेपाली जनता दल, महेन्द्र प्रजापती (३७) स्वतन्त्र र राजेन्द्र बस्नेत (४२) स्वतन्त्र समेत मेयरको दौडमा समावेश गरेका छन् ।

काठमाडौं । ३० वैशाखमा हुन लागेको स्थानीय तह निर्वाचनका लागि सोमबार उमेदवारी दर्ताको समय सकिएको छ । आइतबार र सोमबार गरि दुई दिन उमेदवारी दर्ताको समय तोकिएको थियो । निर्वाचन आयोगले अपडेट गरेको पछिल्लो विवरण अनुसार स्थानीय तहमा ७१ हजार, २३७ जना चुनावी मैदानमा उत्रिएका छन् । कुल ३५ हजार, २२१ जना पदाधिकारीका लागि वैशाख ३० मा निर्वाचन हुँदैछ । नयाँ संविधान जारी भएपछि दोस्रो पटक स्थानीय तहको निर्वाचन हुन लागेको हो ।

सात वटै प्रदेशका ७५३ स्थानीय तहका प्रमुख\अध्यक्ष, उपप्रमुख\उपाध्यक्ष, वडा अध्यक्ष र सदस्य गरी कुल ३५ हजार, २२१ जना पदाधिकारी चयन हुनेछन् । आयोगका अनुसार देशभरको उम्मेदवारी अद्यावधिक गर्ने क्रम अबेर रातीसम्म चल्नेछ । सोहीकारण उमेदवार संख्या अझ बढ्न सक्नेछ । छवटा महानगर, ११ वटा उपमहानगर र २७६ वटा नगर गरी २९३ वटा नगरपालिका छन्।

साँझसम्मको विवरणअनुसार ती नगरको प्रमुखमा २११८ जना उपप्रमुखमा १३१८ जना प्रतिस्पर्धामा उत्रिएका छन्। गाउँपालिकाका ४६० वटा छन्। तिनको अध्यक्षमा २२२१ र उपाध्यक्ष १५४४ जना चुनावी मैदानमा होमिएका छन्। वडा अध्यक्षमा १७ हजार ७०१, महिला सदस्यमा ११ हजार ६५५, दलित महिला सदस्यमा १० हजार ३७१ र सदस्यमा २४ हजार ३०९ जनाको उम्मेदवारी परेको छ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डकी पुत्री रेणु दाहालमाथि कांग्रेसको बागी उम्मेद्वारी परेको छ ।

पूर्वसांसद एवं नेपाली कांग्रेसका नेता जगन्नाथ पौडेलले भरतपुर महानगरपालिकाको मेयरमा उम्मेदवारी दर्ता गरेका हुन् ।

गठबन्धनबाट भरतपुर महानगरपालिकाको मेयर पदमा रेणुमाथि कांग्रेस नेताले उम्मेदवारी दर्ता गराएका हुन् ।

उनलाई कांग्रेसका पूर्व जिल्ला सभापति कृष्णलाल सापकोटाले प्रस्ताव र महासमिति सदस्य मीना खरेलले समर्थन गरेका हुन् ।

भरतपुरको मेयरमा कांग्रेसले आफ्नो उम्मेदवार हुनुपर्ने अडान राख्दै आएको थियो ।

पौडेलले कांग्रेसको झण्डासहित मुख्य निर्वाचन अधिकृतको कार्यालय पुगेर उम्मेदवारी दर्ता गराए । उनीसँगै कांग्रेसका असन्तुष्ट कार्यकर्ताको जुलुस थियो।

काठमाडौं । नेपाली कांग्रेसले काठमाडौं महानगरपालिकाको मेयरमा सिर्जना सिंहलाई उमेदवार बनाउने निर्णय गरेको छ । सिंहले दिउँसो उमेदवारी दर्ता गराउने छिन् ।

कांग्रेस केन्द्रीय सम्पादन समिति र संसदीय बोर्डले आइतबार सभापति एवं प्रधानमन्त्री शेरबहादुर देउवालाई महानगर र उपमहानगरको उम्मेदवाट टुंगो लगाउने जिम्मा दिएको थियो।

दिउँसो शान्तिबाटीकामा भेला भएर उमेदवारी दर्ता गराउन जाने काठमाडौं कांग्रेसले जनाएको छ । आज साँझ ५ बजेसम्म उमेदवारी मनोनयन दर्ताको समय तोकिएको छ ।

सिंह कांग्रेस नेता प्रकाशमान सिंहकी पत्नी हुन् । सत्ता गठबन्धनले काठमाडौंको मेयर कांग्रेसलाई भाग लगाएको छ।

काठमाडौं । नेपाली कांग्रेसले विराटनगर महानगरपालिकाको नागेश कोइरालालाई मेयरको उम्मेदवार बनाउने निर्णय गरेको छ ।

कोइराला शेखर कोइराला निकट हुन् ।

विराटनगरको प्रमुखमा डा. कोइरालाले नागेश र अर्का नेता कृष्ण सिटौलाले वर्तमान प्रमुख भीम पराजुलीको नाममा अडान लिएका थिए।

यसअघि सभापति शेरबहादुर देउवाले अमृत अर्याल या डा। डिला संग्रौलामध्ये एकलाई उमेदवार बनाउने तयारी गरेका थिए । तर विवाद बढेको थियो ।

महानगरको प्रमुखमा उम्मेदवारका लागि टिकट पाएका नागेश मोरङ कांग्रेसका उपसभापति हुन्। १३ औँ महाधिवेशनमा उनी जिल्ला सचिव थिए। नागेश पार्टीका पूर्वकोषाध्यक्ष पनि हुन्।

नेपाली कांग्रेसले ललितपुर महानगरपालिकाको मेयरमा चिरिबाबु महर्जनलाई नै उठाउने भएको छ ।

महर्जन ललितपुरका वर्तमान मेयर हुन् । कांग्रेस सभापति शेरबहादुर देउवाले सोमबार विहान महर्जनलाई टिकट पक्का गरेका हुन् ।

काठमाडौं । प्रधानमन्त्री निवास बालुवाटारमा सत्तागठबन्धनको बैठक बस्दैछ । प्रधानमन्त्रीसमेत रहेका नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपाल, जसपा अध्यक्ष उपेन्द्र यादवलगायत शीर्ष नेता बैठक बस्नेछन् । पाँचदलीय गठबन्धनको बैठक आइतबार बेलुकी पनि बालुवाटारमा बसेको थियो।

तालमेल बाँकी रहेका र विवादित क्षेत्रबारे आज बिहान बैठक बसेर सहमति खोजिने नेताहरूले बताएका छन्। पाँचदलीय गठबन्धन स्थानीय चुनावमा मिलेर जाने सहमति गरेका थिए। तर केही स्थानीय तहमा तालमेलमा विवाद हुँदा एक्लाएक्लै प्रतिस्पर्धा गर्ने तयारीमा दलहरू छन्। ती स्थानमा अन्तिम पटक सहमतिको प्रयास गरिने भएको छ ।