झापा । नेपालमा युट्युवरका कारण पत्रकारिता बदनाम भइरहेको छ । पछिल्लो समय बिकृत युट्युवकारिता गरिरहेका केही व्यक्ति समाजको निसानामा पर्न थालेका छन् । झापामा चरित्र हत्या हुनेगरी भिडिओ खिचेको आरोपमा प्रहरीले युट्युबरसहित तीन जनालाई पक्राउ गरेको छ। होटलमा खाजा खाँदै गर्दा युट्युबरले अनुमति बिना कोठा भित्र प्रवेश गरी भिडिओ खिचेर सार्वजनिक गरेको उजुरी परेपछि उनीहरु पक्राउ परेका हुन् ।
अघिल्लो मंगलबार राति आठ बजे बिर्तामोड नगरपालिका वडा नम्बर ३स्थित सिमाना होटलको कोठामा खाजा खाँदै गर्दा युट्युबर खगेन्द्र घिमिरेलगायत केही व्यक्तिहरू त्यहाँ पुगेका थिए। उनीहरू एक्कासी होटलभित्र अनाधिकृत रूपमा प्रवेश गरी, गालीगलौज गरी बिना अनुमति भिडिओ बनाएका थिए। त्यसपछि उनीहरुले भिडिओ युट्युबमा हालेका थिए।
प्रहरीका अनुसार शुक्रबार इलाका प्रहरी कार्यालय अनारमनीमा जाहेरी परेपछि अभद्र व्यवहारको मुद्दामा प्रहरीले तीन जनालाई पक्राउ गरेको हो। प्रहरीले युट्युबर घिमिरे, हेमराज भट्टराई र सुवास कार्कीलाई पक्राउ गरेको छ । यसमा संलग्न थप व्यक्तिहरूको खोजी भइरहेको प्ररीले बताएको छ ।
