काठमाडौं । वाग्मती प्रदेशका मुख्यमन्त्री डोरमणि पौडेलले राजीनामा दिएका छन्।
बुधबार पौडेलले राजीनामा दिएसँगै नेता अष्टलक्ष्मी शाक्य नयाँ संसदीय दलको नेता चुनिएकी छन्।
एमाले संसदीय दलको बैठकले शाक्यलाई संसदीय दलको नेता चयन गरेको हो।
अष्टलक्ष्मी शाक्यलाई वाग्मती प्रदेशकी मुख्यमन्त्री बनाउने सहमतिमा पौडेलले राजीनामा दिएको बताइएको छ।
एमाले उपाध्यक्षसमेत रहेकी शाक्य लामो समयसम्म माधवकुमार नेपाल समूहमा थिइन्।
काठमाडौं । नेकपा (एमाले) विभाजन भएको छ । सरकारको सिफारिसमा राष्ट्रपतिले दल विभाजनसम्बन्धी अध्यादेश जारी गरेपछि एमाले विभाजन भएको हो ।
ओलीसँग मिल्न नसक्ने निष्कर्षसहित वरिष्ठ नेता माधवकुमार नेपालले आफ्नो नेतृत्वमा नयाँ दल ‘नेकपा एमाले समाजवादी’ बनाउने निर्णय गरेका हुन् । चुनाव चिन्हमा खुला किताब प्रस्ताव गरिएको छ ।
कम्युनिष्ट आन्दोलनमा लागेदेखि संस्थापन पक्षमा रहँदै आएका नेपालले पहिलाे पटक संस्थापनका बिरुद्ध विद्राेह गरेका हुन्।
‘नेकपा एमाले समाजवादी’को संयोजकमा नेता नेपाल छन् भने ९५ सदस्यीय केन्द्रीय कमिटी हुनेछ । नेपाल समूहको पार्टी दर्ता भएपछि सरकारमा जाने तयारीमा छ।
पार्टी विभाजनका लागि तेस्रो तहका नेताहरुले नेता नेपाललाई साथ दिएको भए पनि दोस्रो तहका नेताहरु एकताको पक्षमा उभिएका छन्।
एकताको माहोल बनाइरहेको बेलामा अध्यक्ष केपी शर्मा ओलीले १४ जना सांसदलाई पदमुक्त गरेपछि विवाद मिल्ने अवस्था टरेको हो। २०५४ सालमा विभाजित भएको एमाले ०५६ मा एक भएको थियो।
काठमाडौं । राष्ट्रपति विद्यादेवी भण्डारीले मन्त्रिपरिषद्को सिफारिसमा पेस भएको राजनीतिक दलसम्बन्धी ऐनलाई संशोधन गर्ने अध्यादेश जारी गरेकी छन् ।
नेपालको संविधानको धारा ११४ को उपधारा १ बमोजिम मन्त्रिपरिषद्को सिफारिसमा राष्ट्रपति भण्डारीले बुधबार दिउँसो १:१० अध्यादेश प्रमाणीकरण गरेकी हुन् ।
सरकारले सो अध्यादेश राष्ट्रपतिकहाँ मंगलबारको मन्त्रिपरिषद् बैठकबाट निर्णय गरी जारी गर्न सिफारिस गरेको थियो ।
राजनीतिक दलसम्बन्धी ऐन संशोधन अध्यादेशमा पार्टी केन्द्रीय समिति वा संसदीय दलमध्ये एउटामा २० प्रतिशत मत पुर्याएमा पार्टी विभाजन गर्न सकिने व्यवस्था गरिएको छ ।
यसअघि कम्तीमा ४० प्रतिशत सदस्य पुगेमात्रै दल फुटाउन पाइने व्यवस्था थियो । योसँगै विभाजनको संघारमा रहेको नेकपा एमाले पार्टी विभाजन हुने निश्चित देखिएको छ ।
काठमाडौं । एमाले विभाजनको मुखमा पुगेको छ । लामो समयको असफल एकता प्रयासपछि एमाले फुटको संघारमा पुगेको हो । एकातर्फ सरकारले दल फुटाउन सक्ने गरी अध्यादेश ल्याएको छ । अध्यादेश अहिले राष्ट्रपति कार्यालयमा सिफारिस भएको छ । अर्कोतर्फ एमालेका अध्यक्ष केपी शर्मा ओलीले वरिष्ठ नेता माधव कुमार नेपालसहित १४ नेतालाई कारवाही गरि त्यसको पत्र संसद सचिवालय र निर्वाचन आयोगमा पठाएका छन् ।
मंगलबार भएका यी दुई घटनाक्रमले अन्त्तः एमालेको फुटलाई औपचारिकता दिने छ । दल विभाजनसम्बन्धी अध्यादेश राष्ट्रपतिबाट जारी भएसँगै नयाँ दल दर्ता गर्ने नेपाल समूहको तयारी छ । त्यसपछि सो दल सरकारमा समेत सहभागी हुने छ । विपक्षी गठबन्धनलाई आगामी निर्वाचनसम्म लैजाने तयारी रहेको छ । नेताहरुका अनुसार नयाँ दल दर्ता गर्ने प्रक्रिया, सबै कागजात तयार गरिएका छन् ।
एकताको सम्भावना सकिएको भन्दै नेताहरु नयाँ दल दर्तामा लागेका हुन् । अध्यादेश अनुसार अब २० प्रतिशत सदस्यले पार्टी विभाजन गर्न सक्ने छन् । प्रधानमन्त्री देउवालाई विश्वासको मत दिएका २२ सांसद नयाँ पार्टीको पक्षमा हुने छन् । यसमा अझै नेता थपिने सम्भावना रहेको बताइएको छ ।
विभाजनपछि यसअघि वार्ता टोलीमा सदस्य भने अन्यौलमा छन् । योगेश भट्टराई, गोकर्ण विष्ट, सुरेन्द्र पाण्डे, घनयाम भुसालसहितका नेताहरुको भविय अन्यौलमा छ । उनीहरु ओलीविरुद्ध संघर्ष गरेका नेता हुन् । तर, अब नेता नेपालले पार्टी फुटाएपछि उनीरु के गर्छन भन्ने खुलेको छैन ।
काबुल । अफगानिस्तानबाट विदेशी फौज फिर्ता भएपछि मुलुकको सत्ता कब्जा गरेको विद्रोही समुह तालिबानले पहिलो पटक पत्रकार सम्मेलन आयोजना गरेको छ । सम्मेलनमा प्रवक्ता जबिहुल्लाह मुजाहिदले २० वर्षे सङ्घर्षपछि देश मुक्त भएको र विदेशीलाई भगाउन सफल भएको बताए । यो देशका लागि गर्वको क्षण भएको उनको प्रतिक्रिया छ । उनले अफगानिस्तान अब द्वन्द्वको रणभूमि नहुने भन्दै त्यसको सुनिश्चिता तालिबानले गर्ने बताए । उनले तालिबान विरुद्ध लडेका सबैलाई आममाफी दिएको समेत बताए ।
उनले तालिबानले अब बाह्य वा आन्तरिक शत्रु नचाहेको समेत स्पष्ट पारे । उनले अब तालिबानका कारण कसैले पनि हानी बेहोर्नु नपर्ने समेत बताए । आफूहरू शरिया कानुनका आधारमा महिलाहरूको हक अधिकारप्रति प्रतिबद्ध रहेको भन्दै विश्वस्त हुन आग्रह गरे । अब महिलाले काँधमा काँध मिलाएर काम गर्न सक्ने उनको भनाई छ ।
तालिबानले आफ्नो सांस्कृतिक ढाँचाभित्र रहेर सञ्चारमाध्यमप्रति प्रतिबद्ध रहेको विश्वास दिलाउन चाहेको समेत उल्लेख गरेको छ । पत्रकार सम्मेलनका क्रममा प्रवक्ता मुजाहिदले निजी क्षेत्रका सञ्चारमाध्यमहरू स्वतन्त्र र निष्पक्ष रहिरहन पाउने बताए । उनले कसैसँग पनि बदला नलिइने भन्दै नडराउन आह्वान गरेका छन् ।
कतार । कतारमा निर्वासित अवस्थामा रहेका तालिबानका उच्च तहका नेताहरु स्वदेश फर्किएका छन् । अफगानिस्तानमा तालिबानले नियन्त्रण गरेसँगै समूहका उच्च तहका नेता कतारबाट स्वदेश फर्केको बीबीसीले जनाएको छ । तालिबानका संस्थापकमध्येका एकजना नेता मुल्लाह अब्दुल गनी बरादर पनि अफगानिस्तान पुगेका छन्।
अमेरिकी सैन्य फिर्तीबारे भएका वार्ताहरूमा महिनौँ नेतृत्व गरेका उनको स्वदेश फिर्तीलाई एउटा नाटकीय पुनरागमनको सङ्केतका रूपमा लिइएको छ। उनी स्वदेश फर्कने क्रममा कान्दहार विमानस्थलनमा उत्रिएका हुन्। कान्दहार तालिबानकै शब्दमा उनीहरूको पवित्र उद्गमस्थल हो। २० वर्षअघि अमेरिकी फौजले तालिबानलाई हटाउनु अघिसम्म कान्दहार उनीहरूको महत्त्वपूर्ण आधार क्षेत्र रहेको थियो।
कान्दहार विमानस्थलबाट उनी कारमा बसेर बाहिरिँदा उनको स्वागत गर्न कैयौँ मानिसहरू आएको देखिने भिडिओ फुटेजहरू बाहिरिएका छन्। मुल्लाह अब्दुल गनी बरादर सन् १९९४ मा तालिबानको गठन गर्ने संस्थापक मध्येका एक हुन् । सन् २००१ मा अमेरिकी नेतृत्वको गठबन्धन सेनाले तालिबानलाई सत्ताबाट हटाइदिएपश्चात् उनी विदेशी सैन्य फौजविरुद्धको विद्रोहका एक प्रमुख नाइके बनेका थिए।
सन् २०१० मा अमेरिका र पाकिस्तानको संयुक्त कारबाहीका बेला उनलाई कराची सहरबाट पक्राउ गरिएको थियो। त्यतिखेर अफगानिस्तान सरकारले शान्ति वार्ताको कुरा गर्दा पहिले आफ्ना बन्दी मुक्त गर्नुपर्ने भन्दै तालिबानले दिने गरेको सूचीमा उनको नाम प्रमुख रूपमा राखेको समेत बीबीसीले जनाएको छ । सन् २०१३ मा पाकिस्तानी सरकारले उनलाई रिहा गरेको हो ।
काठमाडौं । सरकारले अफगानिस्तानमा शान्ति, सुरक्षा र अमन–चयनको सुनिश्चितता हुनुपर्ने नेपालको धारणा रहेको बताएको छ । अफगानिस्तानमा विकसित पछिल्लो घटनाक्रमबारे सरकारको औपचारिक धारणा सार्वजनिक गर्दै परराष्ट्र मन्त्रालयले यस्तो बताएको हो । मङ्गलवार प्रेस विज्ञप्ति निकालेर नेपालले अफगानिस्तान छाड्न चाहनेहरूलाई सडक मार्ग तथा हवाई मार्ग प्रयोग र सीमा पार गर्न दिन आग्रह समेत गरेको छ ।
परराष्ट्र मन्त्रालयले सार्क सदस्य राष्ट्रको हैसियतमा नेपालले अफगानिस्तानमा शान्ति र स्थिरता कायम भएको देख्न चाहेको बताएको छ । अफगानिस्तानमा तालिबानले सत्ता हातमा लिएसँगै अब के हुने भन्ने अन्यौल बढिरहेको छ । अफगानिस्तानमा अमेरिकी संरक्षणको सरकारका राष्ट्रपतिले देश छाडिसकेका छन् । सोहीकारण त्यहाँ रहेका मानिसहरुमा त्रास बढेको हो ।
काबुल । अफगानिस्तान नियन्त्रणमा लिएको तालिबानले सबै सरकारी कर्मचारीहरूलाई आममाफीको घोषणा गरेको छ । तालिबानले उनीहरूलाई पूर्ण विश्वासका साथ काममा फर्कन समेत आह्वान गरेको छ । सबैका लागि आम माफी घोषणा गरिएको बीबीसीले जनाएको छ । तालिबानले विज्ञप्ति निकाल्दै यस्तो जानकारी गराएको हो । तालिबानको पछिल्लो घोषणा अफगानिस्तानमा छाएको त्रासकाबीच आएको हो ।
सरकारी कर्मचारी, पश्चिमा राष्ट्रको संलग्नता रहेका संस्था र अमेरिकी सेनाका लागि दोभासेका रूपमा काम गरेकाहरू तालिबानले बदला लिन सक्ने सम्भावनाका कारण त्रसित रहेका छन्। तालिबान उसले दिने क्रूर सजायका लागि परिचित छ। युद्ध अपराध गरेको आरोप लगाइएको भए पनि उसले त्यो आरोप अस्वीकार गर्दै आएको समेत बीबीसीले लेखेको छ ।
सोमबारबाट सैन्य विमानहरूले काबुलस्थित विमानस्थलबाट त्यहाँ रहेका कूटनीतिज्ञ र सर्वसाधारणहरूलाई अन्यत्रै लान पुनः सुरु गरेका थिए । सोमवार उक्त विमानस्थल अस्तव्यस्त देखिएको थियो। देश छोड्न व्यग्र दशौँ हजार अफगानहरू धावन मार्गसम्मै पुगेको र उडान भर्न लागेका विमान चढ्ने प्रयास गरेको तस्बिरहरू सार्वजनिक भएका थिए। अधिकारीहरूका अनुसार मंगलवार भने तुलनात्मक रूपमा अवस्था निकै शान्त छ। अधिकांश मानिस घर फर्किएका छन् ।
काठमाडौं । अफगानिस्तानको राजधानी काबुलस्थित अमेरिकी राजदूतावासमा सुरक्षा गार्डको रूपमा काम गरिरहेका ११८ जना नेपाली मंगलबार काठमाडौं फर्किएका छन् । उनीहरुलाई अमेरिकी सेनाको जहाजले काबुलबाट उद्धार गरेको थियो । उनीहरूलाई नेपाली सेनाले राजधानीको सामाखुसीस्थित एक आइसोलेशन केन्द्रमा लगेर राखेको छ ।
अमेरिकी सेनाले उनीहरूलाई उद्धार गरेर काबुलबाट कुवेत पठाएको थियो । त्यहाँबाट उनीहरू जजिरा एयरवेजको जहाज चढेर नेपाल आइपुगेका हुन् । उनीहरुलाई अमेरिकी दूतावासका कर्मचारीले विमानस्थलमै स्वागत गरे । उद्धार गरिएका नेपाली एक दिनअघि कुवेत पुगेका थिए। उनीहरुको आवश्यक कागजपत्रको परीक्षण गरिने, कोरोनाभाइरसको एन्टिजन जाँच गरिने र प्रक्रिया पुर्याएर होम आइसोलेशनमा जाने मिल्नेगरी सेनाले व्यवस्थापन मिलाउने भएको छ ।
नेपालस्थित अमेरिकी दूतावासले सामाजिक संजालमा लेखेको छ, ‘काबुलस्थित अमेरिकी मिशनमा कार्यरत हाम्रा साथीहरू तथा गठबन्धनका सहकर्मीहरूसँग काम गर्नुभएका नेपालीहरूमध्ये पहिलो उडानमार्फत् आउनु हुनेलाई सकुशल काठमाण्डूमा स्वागत गर्न पाउनु हाम्रो लागि सम्मानको विषय हो, हामी यहाँहरूको सुरक्षा लगायतको सेवाको लागि अत्यन्तै कृतज्ञ छौँ। धेरै धन्यवाद।’
काठमाडौं । पछिल्लो २४ घण्टामा देशभर ३२७४ जनामा कोरोना संक्रमण पुष्टी भएको छ ।
स्वास्थ्य तथा जनसंख्या मन्त्रालयका अनुसार देशभर गरिएको ११ हजार ६६५ पीसीआर परीक्षणका क्रममा २४५६ र ६१२६ एन्टीजेन परीक्षणका क्रममा ८१८ जना गरी ३२७४ जनामा कोरोना पुष्टी भएको हो ।
योसँगै नेपालमा कोरोना संक्रमितको संख्या ७ लाख ३७ हजार ९९४ पुगेको छ ।
पछिल्लो २४ घण्टामा १९२९ जना संक्रमण मुक्त भएका छन् । यो सहित संक्रमण मुक्त हुनेको संख्या ६ लाख ८७ हजार ६९ जना पुगेको छ । संक्रिय संक्रमितको संख्या ३९ हजार ८७१ रहेको छ ।
पछिल्लो २४ घण्टामा २७ जना संक्रमितको मृत्यु भएको छ । यो सहित नेपालमा कोरोना मृत्यु हुनेको संख्या १० हजार ३५४ पुगेको छ ।
काठमाडौं । नेकपा एमालेले माधवकुमार नेपालसहित प्रतिनिधिसभाका १४ जना सांसदलाई कारवाही गरेको छ ।
पार्टी विभाजन गर्न अघि बढेको भन्दै नेपालसहित १४ जनालाई कारबाही गरेको सूचना संसद सचिवालयलाई दिएको छ ।
राजनीतिक दलसम्बन्धी ऐन दफा २८ -१) बमोजिम कार्य नगरी दलको हृवीप उल्लंघन गरेको भन्दै कारबाही गरिएको जनाइएको छ ।
कारबाहीमा पर्ने सांसदहरुमा वरिष्ठ नेता नेपालसँगै मुकुन्द न्यौपाने, जीवनराम श्रेष्ठ, रामकुमारी झाक्री लगायत रहेका छन् ।
यी हुन् कारवाहीमा पर्ने सांसदहरू
१. माधव नेपाल
२. जीवनराम श्रेष्ठ
३. मुकुन्द न्यौपाने
४. विरोध खतिवडा
५. कृष्णलाल महर्जन
६. भवानी खापुङ
७. मेटमणी चौधरी
८. रामकुमारी झाँक्री
९. कल्याणी खड्का
१०. लक्ष्मीकुमारी चौधरी
११. निरादेवी जैरु
१२. पुष्पाकुमारी कर्ण
१३. सरला यादव
१४. कलिला खातुन
काठमाडौं । प्रमुख विपक्षी दल एमालेले सरकारले २० प्रतिशत भए पार्टी फुटाउन पाइने गरी दल विभाजनसम्बन्धी अध्यादेश ल्याए कडा प्रतिपाद गर्ने जनाएको छ ।
एमाले स्थायी कमिटी बैठकले अध्यादेश ल्याउने सरकारले योजना निन्दनीय र अस्वीकार्य भएको ठहर गर्दै उक्त निष्कर्ष निकालेको हो ।
स्थायी कमिटी बैठकपछि जानकारी दिँदै एमाले प्रवक्ता प्रदीप ज्ञवालीले सरकारले एमाले विभाजन गर्ने गरी अध्यादेश ल्याए एमालेले सशक्त प्रतिवाद गर्ने बताए । उनले भने, ‘त्यसपछिको परिणाम के आउँछ त्यसको जिम्मेवार सरकार हुनुपर्छ ।’
ज्ञवालीले केपी ओली प्रधानमन्त्री हुँदा अध्यादेश ल्याइएको तर, पछि गल्ती भएको स्वीकार गरेर फिर्ता गरिएको पनि दाबी गरे । ‘अध्यक्ष केपी ओली प्रधानमन्त्री हुँदा अध्यादेश आएको थियो ।
‘एक दर्जन अध्यादेशमा निर्णय गर्नुपर्ने, कयौं विधेयक टुंगो लगाउनुपर्ने र जनसरोकारमा विषयमा बहस गर्नुपर्ने अवस्थामा १ महिनासम्म संसदलाई बिजनेस नदिइ हठात अधिवेशन अन्त्य गरिएको छ,’ एमालेले भनेको छ, ‘यसले विगतमा गठबन्धनमा आवद्ध पार्टीहरुबाट संसदका बारेमा भनिएका विषयहरु ढोंग र अवरण मात्रै थिए भन्ने पुष्टि हुन्छ ।’
काठमाडौं । मन्त्रिपरिषद् बैठकले दल विभाजनलाई सहज बनाउने गरी राजनीतिक दल सम्बन्धी ऐन २०७३ संशोधन अध्यादेश ल्याएको छ ।
मंगलबार बालुवाटारमा बसेको बैठकले संसदीय दल वा केन्द्रीय समितिका २० प्रतिशत सदस्यले चाहेमा दल विभाजन गर्नसक्ने प्रावधान सहित अध्यादेश जारी गरेको हो । यो अध्यादेशले फुट नजिक पुगेका प्रमुख विपक्षी नेकपा एमाले र सत्तारुढ जनता समाजवादी पार्टी (जसपा) लाई पार्टी विभाजन गर्न सहज हुनेछ ।
यसअघि राजनीतिक दलसम्बन्धी ऐनमा दल विभाजनका लागि केन्द्रीय समिति र संसदीय दलमा ४० प्रतिशत संख्या अनिवार्य हुने उल्लेख थियो ।
यो ऐनलाई संशोधन गर्न ल्याइएको अध्यादेशमा केन्द्रीय समिति वा संसदीय दलमा २० प्रतिशत संख्या भए दल विभाजनले मान्यता पाउने व्यवस्था गरिएको हो ।
त्यस्तै अध्यादेशमा राजनीतिक दल विभाजन भएको २१ दिनभित्र प्रदेशसभाका सदस्य र स्थानीय तहका जनप्रतिनिधिले नयाँ दल रोज्न चाहेमा सम्बन्धित सभामा सूचना दिन सक्ने व्यवस्था गरिएको छ ।
त्यसो हुँदा प्रदेशसभा र स्थानीय तहका जनप्रतिनिधि जो माधव नेपाल पक्षमा लाग्छन् उनीहरुको पद जोगिने र प्रदेश सरकारहरु पनि परिवर्तन गर्न सहज हुनेछ । प्रमुख प्रतिपक्षी दल नेकपा एमालेले सरकारको योजना निन्दनीय र अस्वीकार्य भएको बताउँदै प्रतिवाद गर्ने घोषणा गरिसकेको छ ।
काठमाडौं । अघिल्ला साता हैटीमा आएको विनासकारी भूकम्पमा परि ज्यान गुमाउने व्यक्तिको संख्या १३०० पार भएको छ । अन्तराष्ट्रिय संचारमाध्यमले हैटीको नागरिक सुरक्षा एजेन्सीलाई उदृत गर्दै यस्तो जानकारी गराएका हुन् । हैटीमा ७.२ रेक्टर स्केलको भूकम्प गएको थियो । हैटीको सुद, ग्रान्ड एन्सलगायत क्षेत्र बढी प्रभावित बनेका छन् । समाचारमा जनाइए अनुसार शहरमा त्राहीमाम जारी छ अस्पतालहरु घाइते र बिरामीका कारण भरिएका छन् । भूकम्पपछि अहिले पनि परकम्पहरुको अनुभव भइरहेको छ ।
दिनरात नै परकम्प गइरहेको बताइएको छ । अहिले क्षतिको आंकलनको काम जारी छ । त्यसपछि भने अन्तर्राष्ट्रिय समुदायसँग सहयोगको अपिल गर्ने तयारी रहेको छ । समाचार एजेंसी सिन्हुआका अनुसार प्रधानमन्त्री एरियल हेनरीले भूकम्पपछि मुलुकले निकै गम्भीर परिस्थितिको सामना गर्नु परेको छ । हैटीमा शनिबार ठूलो भूकम्प गएको हो । कोरोना महामारीका बीच आएको विनासकारी भूकम्पले यो मुलुकमा संकट थपेको छ । हैटी सन् २०१० मा आएको भूकम्पबाट माथि उठ्ने कोसिस गरिरहेको थियो ।
काठमाडौं । अमेरिकी राष्ट्रपति जो बाइडेनले अफगानिस्तानबाट अमेरिकी सैन्य फिर्तीबारे सरकारको निर्णयको बचाउ गरेका छन् । अफगानिस्तानका लागि अमेरिकी सैनिकले नभई त्यहाँका सैनिकले नै लड्नु पर्ने भन्दै अमेरिकी बहिर्गमनको निर्णयमा आफू पूर्ण रूपमा कटिबद्ध रहेको बताए । युद्धग्रस्त अफगानिस्तानमा तालिबानको नियन्त्रणपछि अमेरिकाको चौतर्फी आलोचना भइरहेको छ ।
बीबीसीका अनुसार उनले सरकारको निर्णयको बचाउ गरेका छन् । कति थप अमेरिकी जीवन त्यसको लागि अर्पण गर्नुपर्थ्यो ? राष्ट्रपतिले प्रश्न गरे ।
उनले काबुलका अत्यन्त विदारक दृश्यका बावजूद अमेरिकी फौज हटाउने उपयुक्त समय कहिल्यै पनि नहुने बताएका हुन् । अफगान राष्ट्रपति अशरफ गनीले देश छाडेर उनको सरकार ढलेपछि आइतवार तालिबानले लडाइँ जितेको घोषणा गरेको छ ।
सशस्त्र विद्रोहीहरू पुनः सत्तामा आउने अवस्थासँगै अफगानिस्तानमा करिब २० वर्ष लामो अमेरिकी नेतृत्वको गठबन्धनको उपस्थिति समेत सकिएको छ । राष्ट्रपति बाइडेनले क्याम्प डेभिडबाट सोमवार ह्वाइट हाउस फर्केर करिब एक सातापछि अफगानिस्तानबारे आफ्नो धारणा सार्वजनिक गरेका हुन्। उनले भनेका छन्, ‘अफगान फौजले उनीहरूकै लागि लड्न नचाहेको लडाइँ अमेरिकी सैनिकहरू लड्न सक्दैनन् र लड्नु र युद्धमा मर्नु हुँदैन।’
काठमाडौं । आज नेकपा (एमाले)ले स्थायी कमिटी र संसदीय दलको बैठक बस्ने भएको छ । एमाले अध्यक्ष केपी शर्मा ओलीले बिहान ११ बजेका लागि बैठक बोलाएका छन् । सरकारले संसद् अधिवेशन अन्त्य गरेपछि ओलीले मध्यरातमा विज्ञप्ती निकालेका थिए । उनले सोही विज्ञप्तीमार्फत स्थायी कमिटी बैठक आह्वान गरेका हुन् ।
सरकारले दल विभाजन सम्बन्धी अध्यादेश ल्याउने र वरिष्ठ नेता माधव कुमार नेपालले पार्टी फुटाउने अनुमानका बीच बैठक बस्न लागेको हो । अहिले एमाले विभाजन वा एकता के हुने भन्ने टुंगो आगामी केही दिनमै लाग्ने भएको छ । त्यसपछि भने सरकार पूर्ण क्षमतामा चल्ने छ । सरकारले दल विभाजनसम्बन्धी अध्यादेश ल्याउने तयारी गरेको आरोप समेत एमाले नेताहरुको छ ।
काठमाडौं । नेकपा एमालेका अध्यक्ष केपी शर्मा ओलीले सोमबार मध्यराती एक विज्ञप्ती जारी गरि एमाले फुटाउन लागेको भन्दै त्यस्तो कार्य पार्टीका लागि क्षम्य नहुने बताएका छन् । राजनीतिक दल विभाजनसम्बन्धी अध्यादेश ल्याउने र एमालेलाई विभाजन गर्ने षड्यन्त्र भइरहेको भन्दै उनले यस्तो बताएका हुन् । सरकारले पूर्व घोषित प्रतिवद्धता विपरित हठात् प्रतिनिधिसभाको अधिवेशन अन्त्य गरेको समेत उनले बताएका छन् ।
उनी विपक्षी दलका नेता समेत हुन् । एमाले अध्यक्ष ओलीले सोमबार साँझ विज्ञप्ति जारी गर्दै नेकपा एमाले र पार्टीको संसदीय दलमा विभाजन गर्ने कुनै पनि वाहाना वा षड्यन्त्र पार्टीका लागि मान्य र क्षम्य नहुने बताएका हुन् । उनले पार्टी नेता कार्यकर्ता र सांसदहरुलाई पार्टी विभाजनको प्रयास विरुद्ध एक हुनुपर्ने समेत उनले आह्वान गरेका छन् । पार्टीमा एकताका लागि कार्यदल स्तरमा भएको १०बुँदे सहमति कार्यान्वयन गर्ने निर्णय भइसकेको भन्दै ओलीले स्थायी, केन्द्रीय लगायतका सम्वद्ध कमिटीहरुको बैठकमा सहभागी हुन समेत आग्रह गरेका छन् ।
काठमाडौं । सरकारको सिफारिसमा राष्ट्रपति विद्यादेवी भण्डारीले सङ्घीय संसदको दुवै सदनको अधिवेशन अन्त्य गरेकी छिन् । सोमबार बिहान बसेको मन्त्रिपरिषदको बैठकले राष्ट्रपति भण्डारी समक्ष चालू अधिवेशन अन्त्य गर्न सिफारिस गरेको थियो । सभामुख अग्निप्रसाद सापकोटाले सोमबार प्रतिनिधिसभा बैठकमा राष्ट्रपति कार्यालयबाट पठाएको पत्र पढेर सुनाउँदै संसदको दुवै सदनको चालू अधिवेशन अन्त्य भएको जानकारी गराएका हुन् ।
उनले संसदीय संसदको दुवै सदनको चालू अधिवेशन साउन ३२ गते राति १२ बजेदेखि अन्त्य गरिएको जानकारी दिए । सर्वोच्च अदालतले प्रतिनिधिसभा ब्यूँत्याएपछि गत साउन ३ गतेबाट अधिवेशन सुरु भएको थियो । चालू अधिवेशन प्रतिनिधिसभा पुनर्स्थापनापछिको पहिलो अधिवेशन हो । यसैबीच, सरकारले अकस्मात संसद अन्त्य गरेपछि विपक्षी दल एमालेका नेताहरुले सशंकित बनेका छन् । उनीहरुले एमाले फुटाउन राजनीतिक दलसम्बन्धी अध्यादेश ल्याउने तयारी गरेको समेत आंशका गरेका छन् ।
काठमाडौं । नेपाली राष्ट्रिय क्रिकेट टोलीले पपुवा न्युगिनीसँग दुई खेलको एकदिवसीय क्रिकेट सिरिज खेल्ने भएको छ । यी दुई मुलुकबीच सेप्टेम्बर ५ र ८ तारिख (भदौ २० र २३)मा खेल हुने लागेको हो । नेपाल क्रिकेट सङ्घ (क्यान)का अनुसार यो खेलले आगामी आईसीसी विश्व कप क्रिकेट लिग–२ अन्तर्गत नेपाल, ओमान र अमेरिकासँगको त्रिदेशीय शृङ्खलामा नेपाललाई सहयोग पुग्ने छ । सेप्टेम्बरमै नेपालले त्रिदेशीय शृङ्खला खेल्दैछ । अहिले नेपाली टीम बन्द प्रशिक्षणमा छ । यो सिरिज नेपालले पारस खड्का बीना नै खेल्ने छ । पारसले भने अन्तर्राष्ट्रिय क्रिकेटबाट सन्यास लिएका छन् । उनी क्लव क्रिकेटमा भने उपलब्ध हुने छन् ।
काठमाडौं । अफगानिस्तानको राजधानी काबुलबाट ३३० जना नेपालीको उद्धार भएको छ । नेपालबाट अफगानिस्तानमा नेपाली श्रमिक पठाउने दुई वटा म्यानपावर कम्पनीले ३३० जना नेपालीको उद्धार गरिएको जानकारी सरकारलाई दिएका छन् । देशिक रोजगार विभागमा यस्तो जानकारी प्राप्त भएको हो । नेपाली काम गरिरहेको विदेशी नियोग र कार्यालयकै समन्वयमा नेपालीको उद्धार भएको हो । उनीहरुले कतारको राजधानी दोहामा सुरक्षित अवतरण भएका छन् ।
त्यहाँबाट प्रक्रिया पुरा गरि उनीहरु नेपाल आउन सक्ने छन् । काबुलस्थित विमानस्थलमा अझै साढे ४ सय हाराहारीको संख्यामा नेपाली नागरिक भने उद्धारको पखाईमा रहेका छन् । सरकारले आइतबार सार्वजनिक गरेको सम्पर्क रजिष्ट्रेसन फारम भरेर पोर्ट र विभिन्न सम्पर्क नम्बरबाट सोमबार साँझसम्म १३४ जनाले आफ्नो नाम टिाएका छन् ।
अब सरकारले उनीहरुको समेत उद्धारको बन्दोबस्त गर्ने भएको छ । काबुलस्थित विभिन्न मुलुकका कूटनीतिक नियोगहरु तथा अन्तर्राष्ट्रिय संघ संस्थाहरुमा कार्यरत नेपालीहरुलाई तत्काल उद्धार गरी सुरक्षित स्थानमा राख्न र स्वदेश फर्काउन नेपाल सरकारले संयुक्त राज्य अमेरिका, संयुक्त अधिराज्य बेलायत, क्यानडा, जर्मनी, युरोपियन युनियन, जापान तथा संयुक्त राष्ट्रसंघको कार्यालयमा औपचारिक पत्राचारसमेत गरिसकेको छ ।
काठमाडौं । उज्बेकिस्तानमा अफगानिस्तानको एक सैनिक विमानलाई जमिनबाट प्रहार गरि खसालिएको छ । बीबीसीका अनुसार उज्वेकिस्तानको रक्षा मन्त्रालयले यसको पुष्टी गरेको हो । आफ्नो सीमा उल्लङ्घन गरेको एउटा अफगान सैन्य विमानलाई हवाई प्रतिरक्षा बलले खसालिदिएको पुष्टी गरेको छ । मन्त्रालयका प्रवक्ताका अनुसार उक्त विमानले गैरकानुनी रूपमा उक्त मध्यएशियाली राष्ट्रको हवाई क्षेत्रमा प्रवेश गर्ने प्रयास गरेको हो ।
उक्त विमानमा कति जना सवार थिए वा कोही जीवित छन् कि छैनन् भन्ने कुरा उनले खुलाएका छैनन् । अहिले अफगानिस्तानबाट सैनिकहरु भागेर छिमेकी मुलुक छिरिरहेका छन् । आइतवार उज्बेकिस्तानमा सीमा पार गरेका कारण ८४ अफगान सैन्य अधिकारी पक्राउ परेका थिए ।
काबुल । आइतबार अफगानिस्तानको राजधानी काबुललाई तालिबानले नियन्त्रणमा लिएपछि काबुलमा त्राहीमाम फैलिएको छ । मानिसहरु आत्तिएको र उनीहरुले त्यहाँबाट मुक्ति चाहिरहेको संचारमाध्यमहरुले रिर्पोटिंग गरिरहेका छन् । सोमबार हामिद कारजाई विमानस्थलमा अत्यधिक भिड देखिएको छ । यो विमानस्थल अहिले अमेरिकाको नियन्त्रणमा छ ।
भिड धेरै भएपछि सेनाले यहाँ गोली चलाएको छ । सो क्रममा तीन जनाको मृत्यु भएको छ । केही मानिस उडिरहेको जहाजमा झुण्डिएका थिए । त्यसक्रममा जहाजबाट खसेर समेत तीन जनाको मृत्यु भएको छ । मानिस जहाजबाट खसिरहेको दृष्यलाई पश्चिमी संचारमाध्यमहरुले महत्वका साथ प्रसारण गरिरहेका छन् । यसरी बाहिरिन चाहनेमा त्यहाँ रहेका विदेशी नागरिक र अफगानी नागरिक समेत छन् ।
अमेरिकी सेनाले विमानस्थलमा सबै व्यवसायिक उडान बन्द गरिदिएको छ । अहिले यहाँ सैन्य उडान मात्र जारी छन् । सामाजिक सञ्जालमा शेयर गरिएको अर्को भिडियोमा मानिसहरु विमानमा चढ्नको लागि तँछाडमछाड गरिरहेको देखिएको छ । तालिबानका प्रवक्ताले शान्तिपूर्ण रुपमा सत्ता हस्तान्तरण हुने बताए पनि मानिसहरु आत्तिएका छन् ।
काठमाडौं । पछिल्लो २४ घण्टामा देशभर ३४५१ जनामा कोरोना संक्रमण पुष्टी भएको छ ।
स्वास्थ्य तथा जनसंख्या मन्त्रालयका अनुसार देशभर गरिएको १० हजार ९३ पीसीआर परीक्षणका क्रममा २५६६ र ५५१८ एन्टीजेन परीक्षणका क्रममा ८८५ जना गरी ३४५१ जनामा कोरोना पुष्टी भएको हो ।
योसँगै नेपालमा कोरोना संक्रमितको संख्या ७ लाख ३४ हजार ८३८ पुगेको छ ।
पछिल्लो २४ घण्टामा २५५८ जना संक्रमण मुक्त भएका छन् । यो सहित संक्रमण मुक्त हुनेको संख्या ६ लाख ८५ हजार १४० जना पुगेको छ । संक्रिय संक्रमितको संख्या ३९ हजार ३७१ रहेको छ ।
पछिल्लो २४ घण्टामा ३३ जना संक्रमितको मृत्यु भएको छ । यो सहित नेपालमा कोरोना मृत्यु हुनेको संख्या १० हजार २९८ पुगेको छ ।
काठमाडौं । नेपाल विद्युत प्राधिकरणको कार्यकारी निर्देशक पदमा ‘थमौती गरिपाउँ’ भन्दै हितेन्द्रदेव शाक्यले सर्वोच्च अदालतमा रिट निवेदन दर्ता गराएका छन् ।
शाक्यले पदाधिकारीबाट आफूलाई हटाएको आधिकारिक पत्र नपाएको र सरकारले आफूलाई हटाएर कुलमानलाई ल्याउँदा ‘संविधान सम्मत मेरो अधिकार हनन भएको’ दावी गर्दै सर्वोच्चमा रिट दायर गरेका हुन् ।
यसका साथै शाक्यले विद्युत प्राधिकरणमा आफैंलाई कायम गर्न समेत अन्तरिम आदेशको माग गरेका छन् ।
‘मेरो सहमति बेगर मलाई विपक्षी जल तथा ऊर्जा आयोगको विज्ञ सदस्य पदमा नियुक्त गर्ने र विपक्षी कुलमान घिसिङलाई मेरो पदाधिकार नटुटेको र कायम रहेको विपक्षी प्राधिकरणको कार्यकारी निर्देशक पदमा नियुक्त गर्ने निर्णयबाट मेरो उक्त पदमा रही काम गर्ने मेरो अधिकारमा आघात पुग्नगै मलाई अपुरणीय क्षति हुने भएको हुनाले मिति २०७८।०४।२५ को नेपाल सरकार मन्त्रिपरिषदको अवैधानिक निर्णय कुलमान घिसिङलाई नियुक्त गर्ने नेपाल सरकार मन्त्रिपरिषदको निर्णय र सो निर्णयको आधारमा भएका सम्पूर्ण पत्राचार कार्यान्वयन नगर्नू र मलाई विद्युत प्राधिकरणको कार्यकारी निर्देशक पदमा काम गर्न दिनू दिलाउनू भनी श्री सर्वोच्च अदालत नियमावलीको नियम ४९ बमोजिम अन्तरीम आदेशसमेत जारी गरी पाऊ’ उनले दायर गरेको रिट निवदेनमा भनिएको छ ।
काठमाडौं । काठमाडौं उपत्यकामा थप ९६१ जनामा कोरोना संक्रमण पुष्टि भएको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टाको अवधिमा काठमाडौंमा ६७७, भक्तपुरमा ११७ र ललितपुरमा १६७ संक्रमित थपिएका हुन् ।
योसँगै काठमाडौं उपत्यकामा ११ हजार ५४५ जना सक्रिय संक्रमित छन् । काठमाडौंमा मात्रै ८ हजार १२३ जना, ललितपुरमा २ हजार १७ र भक्तपुरमा १ हजार ४०५ जना सक्रिय संक्रमित छन् ।
काठमाडौं । सरकारले नम्बर २ का प्रदेश प्रमुख परिर्वतन गरेको छ ।
मन्त्रिपरिषद्को सोमबार बसेको बैठकले राजेश झा अहिराजलाई पदमुक्त गरेको हो । झाको ठाँउमा हरिशंकर मिश्र नियुक्त गर्ने निर्णय गरेको छ।
अहिराजलाई अघिल्लो सरकारले ७ फागुन २०७७ मा प्रदेश प्रमुख नियुक्त गरेको थियो ।
नयाँ प्रमुख प्रमुखमा सिफारिस भएका महोत्तरीका मिश्र कांग्रेसका पुराना नेता हुन् ।
महोत्तरीको पिपरा गाउँपालिकाको पिपरा बस्ने उनी नेपाली कांग्रेसका नेता स्वर्गीय रामनारायण मिश्रका छोरा हुन्। मिश्र नेपाली कांग्रेसबाट संसद समेत निर्वाचित भएका थिए।
काठमाडौं । अमेरिकी पूर्वराष्ट्रपति डोनाल्ड ट्रम्पले राष्ट्रपति जो बाइडेनले राजीनामा दिनुपर्ने बताएका छन् । अफगानिस्तानबाट सैन्य फिर्तिको औचित्यबारे बाइडेन प्रशासनमाथि प्रश्न उठिरहेका बेला ट्रम्पको यस्तो भनाई सार्वजनिक भएको हो । ट्रम्पलाई उदृत गर्दै अमेरिकी संचारमाध्यमले जनाए अनुसार अफगानिस्तानमा गरेको अपमानका लागि बाइडेनले राजीनामा दिनुपर्छ । ट्रम्पले यदि आफू राष्ट्रपति भएको भए अफगानिस्तानबाट अमेरिका फिर्ता ‘निकै अलग र निकै सफलतापूर्वक’ हुने समेत दावि गरेका छन् ।
यस्तै बाइडन प्रशासनले ट्रम्पलाई जवाफ फर्काउँदै अमेरिकी सेना अफगानिस्तानबाट फिर्ता हुने निर्णय ट्रम्पकै पालामा भएको स्मरण गराएको छ । अमेरिकी सेना फिर्ताको स्पष्ट जानकारी भने बाइडनले सत्ता सम्हालेपछि सार्वजनिक भएपनि प्रक्रिया ट्रम्पले शुरु गरेका थिए । अमेरिकी सेना अफगानिस्तानबाट फिर्ता भएसँगै ४५ दिनमै तालिबानले सो मुलुकको सत्ता कब्जा गरेको छ ।
काठमाडौं । अफगानिस्तान अब पूर्ण रुपमा विद्रोही तालिबानको कब्जामा आएको छ । यससँगै देशको बागडोर सम्हालिरहेका राष्ट्रपति अशरफ गनी र उपराष्ट्रपति अमीरुल्लाह सालेह भने भागेका छन् । आइतबार बिहानसम्म स्थिति नियन्त्रणमै रहेको बताएका राष्ट्रपति साँझ एकाएक देश छाडेको खबर सार्वजनिक भएको हो । समाचार एजेन्सीहरुले जनाए अनुसार यी दुई नेता विमानस्थलबाट छिमेकी मुलुक उज्वेकिस्तान पुगेका छन् । विमानस्थललाई अमेरिकी सेनाले घेर हालेको छ । गनीको साथमा उनकी पत्नी, सेना प्रमुख र राष्ट्रीय सुरक्षा सलाहकार समेत भागेर उज़्बेकिस्तानको राजधानी ताशकंद पुगेका छन् ।
राष्ट्रपतिका व्यक्तिगत सुरक्षागार्डले यसको पुष्टी गरेका हुने । देशबाट भागेसँगै गनीले एक भिडियो सन्देश सार्वजनिक गरेका छन् । उनले देश छाड्नु कठिन अवस्था भएपनि रक्तपात रोक्न यस्तो निर्णय लिनुपरेको बताएका छन् । आफुले देश नछाडेको भए लाखौं मानिसको जिन्दगी खतरामा पर्ने जोखिम रहेको उनको भनाई छ । उनले तालिबानले बन्दुकको बलमा सत्ता लिएको भन्दै अब मुलुकका नागरिकको जिम्मेवारी समेत उसले लिनुपर्ने बताएका छन् ।
काबुल । आफ्नो दूतावासका कर्मचारीको सुरक्षा, महत्वपूर्ण कागजातको रक्षामा दौडधुप गरिरहेको अमेरिका अफगानिस्तानमा निरिह सावित भएको छ । यहाँ निर्णायक युद्ध शुरु गरेको ४५ दिनमै विद्रोहीले सत्ता कब्जा गरेको छ । अमेरिकाले २० वर्षसम्म सहयोग गरेको सरकारी सेनाले भने सबै स्थानमा आत्मसमर्पण गरेको छ । राष्ट्रपति भागेर उज्वेकिस्तान शरण लिन पुगेका छन् । तालिबानले सैन्य कारवाहीबारे नसोच्न विदेशी राष्ट्रहरुलाई चेतावनी दिएको छ । साथै, अफगानिस्तानको राजधानी काबुलमा प्रवेश गरेर राष्ट्रपति भवन कब्जामा लिएको तालिबानले युद्ध जितेको घोषणा समेत गरेको छ ।
तालिबानका प्रवक्ताले अल जजिरालाई प्रतिक्रिया दिँदै अब अफगानिस्तानमा युद्ध सकिएको बताए । बीबीसीका अनुसार उनले भनेका छन्, हामीले चाहेको कुरा प्राप्त गरेका छौँ, हाम्रो देशको मुक्ति अनि हाम्रा जनताको स्वतन्त्रता । उनले अब फेरि विदेशी शक्तिहरूले अफगानिस्तानमा तिनको विगतको विफल अनुभव नदोहोर्याउने आफूहरूले ठानेको बताए। आइतवार अबेर तालिबानहरू राष्ट्रपति भवनभित्र रहेका तस्बिर सार्वजनिक भएका थिए। तिनले राजधानी काबुलको ११ जिल्ला केन्द्र कब्जा गरेका छन् ।
अहिले काबुलमा अराजकता रहेको र त्यहाँका निवासी एवम् विदेशी नागरिक काबुलबाट बाहिर निस्कन खोजिरहेको समाचारमा उल्लेख छ । अमेरिकाले काबुलको रक्षाका लागि तैनाथ गरेको उसका ६ हजार फौजलाई विमानस्थल परिसरको सुरक्षामा खटाएको छ । उसले त्यहा लगेर आफ्नो दूतावास समेत राखेको छ ।
काबुल । तालिबानले अफगानिस्तानको राजधानी काबुलमा रहेको राष्ट्रपति कार्यालय कब्जा गरेको छ । अमेरिकी सेना फर्कन शुरु गरेको ४५ औं दिनमै तालिबानले मुलुकमा विजयी हाँसिल गरेको हो । आइतबार राष्ट्रपति अशरफ गनीले देश छाडेर भागेपछि तालिबान राष्ट्रपति कार्यालय छिरेको हो । करीव ६ हजार सैनिकले नियमित पहरा दिने राष्ट्रपति भवनलाई उनीहरुले अब कब्जा जमाएका छन् ।
अफगानिस्तानको अधिकांश भाग नियन्त्रणमा लिएर काबुललाई घेरेको तालिबानले जनधनको क्षति नगर्न शान्तिपूर्ण शक्ति हस्तान्तरणको आशामा सहर प्रवेश नगरी काबुलको प्रवेशद्वारमा रहेको जानकारी गराएको थियो । तर सहरमा लुटपाट हुन नदिन तालिबान लडाकुलाई सहर पस्न अनुमति दिइएको तालिबानका एक प्रवक्ताले बताएको बीबीसीले लेखेको छ । ती प्रवक्ताले अफगानिस्तान र काबुलका बासिन्दाहरू डराउनु नपर्ने र तालिबानले बदला नलिने बताएका छन्।
तालिबानसँग वार्ता गरिरहेका समूहले राष्ट्रपति कार्यालयमै शक्ति हस्तान्तरण हुने कुरो बताए पनि राष्ट्रपति गनीले आफ्ना सहयोगीहरू सहित देश छोडेका हुन्। उता, काबुललाई तालिबानले घेरेपछि अमेरिकाले आफ्नो दूतावास भवन छोड्दै काबुल अन्तर्राष्ट्रिय विमानस्थलको परिसरमा स्थानान्तरण गरेको छ। हेलिकप्टरबाट दूतावासका सबै कर्मचारी र झन्डालाई विमानस्थल परिसरमा सारिएको हो ।
आफ्ना नागरिकको सुरक्षा गर्न विमानस्थल परिसरमा ४,००० अमेरिकी सैनिक परिचालन गरिएको समाचारमा उल्लेख छ । अमेरिकी सञ्चारमाध्यमका अनुसार अफगानिस्तानमा १,४०० अमेरिकी कर्मचारी थिए। तीमध्ये सानो समूह मात्रै केही समयका लागि काबुलमा रहने र बाँकीलाई त्यहाँबाट निकालिनेछ ।