Author: Vishwanews.com

काठमाडौं। नेपालमा पछिल्लो २४ घण्टामा ४ सय ५१ जनामा कोरोना भाइरस संक्रमण पुष्टि भएको छ ।

स्वास्थ्य तथा जनसंख्या मन्त्रालयका प्रवक्ता डा. जागेश्‍वर गौतमको अनुसार देशका विभिन्न प्रयोगशालामा गरिएको परीक्षणमा थप ४ सय ५१ जनामा कोरोना संक्रमण पुष्टि भएको हो । यो सँगै संक्रमितको संख्या ६ हजार २ सय ११ पुगेको छ ।

पछिल्लो २४ घण्टामा सोमबार ६७ जना डिस्चार्ज भएका छन् । जसमध्ये ७ जना महिला ६० जना पुरुष रहेका छन् । यो सहित डिस्चार्ज हुनेको संख्या १ हजार ४१ पुगेको छ। जसमध्ये पुरुष ९ सय ३७ र महिला १ सय ७ जना छन्।

काठमाडौं । सरकारले निजी प्रयोगशालाहरुलाई पनि कोरोना संक्रमण परीक्षण गर्न दिने भएको छ ।

पछिल्लो समय सरकारी प्रयोगशालाहरूले परीक्षण धान्न नसकेपछि सरकारले निजी प्रयोगशालाहरूलाई समेत परीक्षण गर्ने अनुमति दिएको हो।

स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले अनुसार पीसीआर टेस्टका लागि संकलन भएका नमुना आवश्यक प्रक्रिया पूरा गरी निजी प्रयोगशालालाई पनि जाँच्न दिइनेछ ।

यसरी जाँच गर्दा लाग्ने खर्च सरकारले व्यहोर्नेछ । राष्ट्रिय जनस्वास्थ्य प्रयोगशालामा ९ वटा निजी प्रयोगशालाहरूले परीक्षणको लागि आवदेन दिएका थिए। तर कुन-कुन निजी प्रयोगशालालाई परीक्षण अनुमति दिने कुरा टुंगो लागेको छैन।

काठमाडौं । नेपालमा पछिल्लो २४ घण्टामा ४ सय २५ जनामा कोरोना भाइरस संक्रमण पुष्टि भएको छ ।
स्वास्थ्य तथा जनसंख्या मन्त्रालयका प्रवक्ता डा. जागेश्‍वर गौतमको अनुसार देशका विभिन्न प्रयोगशालामा गरिएको परीक्षणमा ४ सय २५ जनामा कोरोना संक्रमण पुष्टि भएको हो ।

स्वास्थ्य तथा जनसंख्या मन्त्रालयका अनुसार कुल संक्रमितको संख्या ५७६० पुगेको छ । आइतबार ६१ जना डिस्चार्ज भएका छन् । यो सहित डिस्चार्ज हुनेको संख्या ९७४ पुगेको छ। जसमध्ये पुरुष ८७७ र महिला ९७ जना छन्।

काठमाडौं । सरकारले काठमाडौं उपत्यका प्रवेशका लागि झन् कडाइ गरेको छ । आइतवार सूचना जारी गर्दै जिल्ला प्रशासन कार्यालय काठमाडौँले पासहरू बन्द गर्दै नयाँ व्यस्था गरेको हो ।

नयाँ व्यवस्था अनुसार काठमाडौं बाहिरबाट उपत्यका प्रवेश गर्न चाहनेले अब पास लिन सम्बन्धित स्थानीय तहको स्वीकृति लिनुपर्नेछ।

जेठ २८ गतेको निर्णयले जोरबिजोर प्रणालीमा निजी सवारी सञ्चालन गर्ने निर्णय गरेपछि पास बन्द गरिएको जिल्ला प्रशासन कार्यालयले जारी गरेको विज्ञप्तिमा उल्लेख गरिएको छ।

‘काठमाडौं जिल्लाको जुन नगरपालिकामा बसोबास रहेको छ सोही नगरपालिकाले प्रवेशको लागि दिएको अनुमतिसहित यात्रा सुरू गर्ने जिल्ला प्रशासन कार्यालयमा निवेदन दिनु हुन,’ प्रशासकीय अधिकृत मानबहादुर बुढाले आइतबार निकालेको सूचनामा उल्लेख छ।

त्यसपछि जिल्ला प्रशासन कार्यालयले कोरोना सङ्क्रमणको जोखिम निर्धारण, फर्किनुको औचित्य आदिको विश्लेषण गरेर पास उपलब्ध गराउने जानकारी गराएको छ।

काठमाडौँबाट बाहिर जानको लागि भने व्यक्तिगत र संस्थागत आवश्यकता देखाएर कागजपत्र पेश गर्न अनुरोध गरेको छ।

पर्वत । पर्वतमा गतरातीको भीषण पहिरोमा परी अहिलेसम्म ५ जनाको मृत्यु भएको छ । ४ जना अझै बेपत्ता रहेको प्रहरीले जनाएको छ । पर्वतको कुश्मा नगरपालिका–३ मा गएराति गएको पहिरोमा परेर मृत्यु हुनेको संख्या ५ पुगेको हो । आइतबार बिहान पहिरोबाट दुई जनाको शव निकालिएको छ ।

जिल्ला प्रहरी कार्यालय, पर्वतका अनुसार शनिबार राती नै तुलबहादुर थापा, मिनकुमारी थापा र विविशा थापाको शव भेटिएको थियो । घटनामा अझै चार जना बेपत्ता रहेको बताएको छ । अबिरल वर्षा पछि पहिरो गएको हो । अहिले पनि उद्घारको काम जारी रहेको छ ।

काठमाडौं । प्रधानमन्त्री केपी शर्मा ओलीले नयाँ नक्सा जारी भएसँगै अब अतिक्रमित भूभाग फिर्ता गर्न भारतसँग वार्ता प्रक्रिया अगाडी बढ्ने बताएका छन् । शनिबार संविधान विधेयक प्रतिनिधिसभाबाट पास भएको छ । उक्त बैठक सकेर निस्कने बेला संचारकर्मीलाई दिएको संक्षिप्त प्रतिक्रियामा उनले अब भारतसँग वार्ता थाल्ने बताएका हुन् ।

अतिक्रमित नेपाली भूभाग कालापानी, लिम्पियाधुरा र लिपुलेक समेटिएको नेपालको नक्सा समावेश गर्दै संविधानको अनुसूची ३ को संशोधन भएपछि अब भारतसँग वार्ताको काम अघि बढ्ने उनले उल्लेख गरे ।

प्रधानमन्त्री ओलीले राष्ट्रियताको पक्षमा देश एकजुट भएको यो क्षण राम्रा पक्ष भएको भन्दै भारतसँग चाँडै वार्ता गरिने बताए । आज सिंगो देश एक भएको प्रधानमन्त्रीको भनाई छ ।

महाकाली सन्धीका प्रखर पक्षधर ओलीलाई उक्त समयमा भएको गल्ची सच्याउने मौकाका रुपमा पनि नयाँ नक्साको विषय आएको छ । यसलाई राजनीतिक दाउपेचको मात्र मुद्दा नबनाउन प्रधानमन्त्रीलाई सबैले सुझाव दिइरहेका छन् ।

काठमाडौं । भारतीय कब्जामा रहेका लिम्पियाधुरा, कालापानी, र लिपुलेक क्षेत्र समेटेर बनाइएको नेपालको नयाँ राजनीतिक नक्सा प्रतिनिधिसभाबाट सर्वसम्मतले अनुमोदन भएको छ । शनिबार बसेको प्रतिनिधिसभाको ऐतिहासिक बैठकले संविधान संशोधन विधेयकलाई सर्वसम्मत पारित गरेको हो । नयाँ नक्साअनुसार निशान छाप परिर्वतन गर्न ल्याइएको संविधान संशोधन विधेयक अब पास भएको छ ।

शनिबारको बैठकमा २५८ जना सांसदको उपस्थिति थियो । उपस्थित सबैले संविधान संशोधन विधेयकको पक्षमा मतदान गरेका कारण सर्वसम्मत भएको हो । संविधान संशोधन विधेयक दुई तिहाईभन्दा बढी मतले पास भएको सभामुख अग्नि सापकोटाले घोषणा गरे ।

संसदमा २ सय ७५ जना सांसद रहेका छन् । यो संशोधन विधेयकको विपक्षमा रहेकी सांसद सरिता गिरी आफुले बोल्न नपाएपछि शुरुमै निस्किएकी थिइन् । सरकारले जेठ ५ गते नयाँ नक्सा पास गरेको थियो । ७ गते उक्त नक्सा सार्वजनिक भएको थियो ।

नयाँ नक्साअनुसार निशान छाप परिर्वतन गर्न जेठ ९ मा संसद सचिवालयमा संविधान संशोधन विधेयक दर्ता भएको हो । अब यो प्रस्ताव राष्ट्रिय सभामा जान्छ । राष्ट्रिय सभाले पास गरेपछि राष्ट्रपतिसमक्ष पुगेर यसले औपचारिकता पाउनेछ ।

काठमाडौं । लिम्पियाधुरा, कालापानी र लिपुलेक क्षेत्रलाई समेटिएको नयाँ नक्साअनुसार निसान छाप परिर्वतन गर्न सरकारले ल्याएको संविधान संशोधन विधेयकमाथि प्रतिनिधिसभामा छलफल प्रारम्भ भएको छ । बैठकमा अहिले नेताहरुले संविधान संशोधन विधेयकबारे पार्टिगत रुपमा धारणा राखिरहेका छन् ।

नेकपाका अध्यक्ष प्रचण्ड, कांग्रेस नेता शेरबहादुर देउवा, जसपाका नेता राजेन्द्र महतोलगायत नेताले आफ्नो धारणा राखेका छन् । उनीहरुले राष्ट्रियताको सवालमा देखिएको एकताले नेपाली हुनुको गरौव दर्शाउने उल्लेख गरे । यसअघि बैठकको प्रारम्भ मै सभामुख अग्नि सापकोटाले समाजवादी पार्टीकी सांसद सरिता गिरीको संशोधन आफूले अस्वीकृत गरेको जानकारी गराएका थिए ।

संसदको शनिबारको बैठकमा संशोधन विधेयकमाथि सैद्धान्तिक छलफल प्रारम्भ हुनासाथ सांसद गिरी बोल्न खोजेकी थिइन् । तर उनलाई बोल्न दिइएन । सभामुख अग्नि प्रसाद सापकोटाले उनको संशोधनलाई आफूले अस्वीकृत गरेको बताए । त्यसपछि उनले प्रचण्डलाई बोल्ने समय दिएकी थिइन् ।

काठमाडौं । प्रतिनिधि सभाको आजको बैठकले संविधान संशोधन विधेयक पास गर्दैछ । बैठक दिउँसो १ बजे बोलाइएको छ । नक्सा सम्बन्धी नेपालको संविधान दोस्रो संशोधन विधेयक पारित गर्ने कार्यसूची आजका लागि तय भएको छ । आजको संभावित कार्यसूची अनुसार बैठकमा कानुन, न्याय तथा संसदीय मामिलामन्त्री शिवमाया तुम्बाहाङफेले नेपालको संविधान दोस्रो संशोधन विधेयक २०७७ माथि दफावार छलफल गरियोस् भन्ने प्रस्ताव प्रस्तुत गर्दैछिन् । त्यसपछि छलफल हनेछ । अनि कानुनमन्त्री तुम्बाहाङफेले नै उक्त विधेयकलाई पारित गर्ने प्रस्ताव प्रस्तुत गर्नेछिन् ।

लिम्पियाधुरा, कालापानी, लिपुलेक, कुटी, गुञ्जी, नावीसहितको भूभाग समेटेर सार्वजनिक गरेको नेपालको नयाँ राजनीतिक तथा प्रशासनिक नक्सालाई संवैधानिक मान्यता दिने गरी सरकारले संविधान संशोधन विधेयक ल्याएको हो ।

विधेयकमा प्रतिनिधिसभामा प्रतिनिधित्व गर्ने सबै दलको समर्थन रहेका कारण यो पारित हुने निश्चित भएको छ । जेठ २७ गते प्रतिनिधि सभामा भएको सैद्धान्तिक छलफलमा सबै दलहरुले यस विधेयकको पक्षमा मतदान गर्ने प्रतिवद्धतासहित मिचिएको भूमि फिर्ता गर्न भारत सरकारलाई आग्रह गरेका थिए । यो संशोधनको विपक्षमा सांसद सरिता गिरी मात्र रहेकी छिन् ।

काठमाडौं । नेपालका थप एक जना कोरोना संक्रमितको मृत्यु भएको छ। स्वास्थ्य मन्त्रालयका प्रवक्ता डा जागेश्वर गौतमले अर्घाखाँची मालरानी ४ का ५७ वर्षीय पुरुषको उपचारपछि फर्कने क्रममा बुधबार मृत्यु भएको जानकारी दिए।

भारतको महाराष्ट्रबाट १२ दिन अघि आएका उनी अर्घाखाँचीको क्वारेन्टाइनमा बसेका थिए।

श्वासप्रश्वासमा समस्या आएपछि उपचारका लागि उनलाई लुम्बिनी प्रादेशिक अस्पताल बुटवलमा ल्याइएको थियो। उपचारपछि घर फर्किने क्रममा उनको निधन भएको स्वास्थ्य मन्त्रालयले जनाएको छ।

यो सहित नेपालमा हालसम्म १६ जना संक्रमितको मृत्यु भएको छ।