Category: अमेरिका

ओक्लाहोमा । अमेरिकामा अर्को सामुहिक गोलीकाण्ड भएको छ । ओक्लाहोमा राज्यको टुलसास्थित एउटा अस्पतालमा भएको गोलीकाण्डमा चारजना सर्वसाधारण मारिएको बीबीसीले लेखेको छ । सन्दिग्ध आक्रमणकारी पनि मारिएको सरक्षाकर्मीको दावि छ । अधिकारीहरूका अनुसार सेन्ट फ्रान्सिस अस्पताल खाली गराउन अझै काम भइरहेको छ जहाँ एक पुरुष राइफलसहित रहेका विवरण आएका थिए। गोलीकाण्डमा कैयौँ घाइते भएको पनि अधिकारीहरूले जनाएका छन्।

बुधवार एउटा पत्रकार सम्मेलनमा बोल्दै प्रहरी उपप्रमुख एरिक डालग्लिशले भनेः ‘अहिले भन्नुपर्दा चारजना सर्वसाधारण र एक आक्रमणकारी मारिएका छन’ आक्रमणकारीको अहिलेसम्म पहिचान खुलेको छैन। गोली चलाउँदा उनी आफू पनि घाइते भएको प्रहरीको अनुमान छ। प्रहरी उपप्रमुखका अनुसार सन्दिग्ध आक्रमणकारीसँग टाढाबाट निसाना लगाउने एउटा बन्दुक र अर्को ह्यान्ड गन पनि थियो। आक्रमण गर्नुको उद्देश्यबारे थाहा हुन नसकेको प्रहरीले जनाएको छ।

गत साता टेक्ससस्थित एउटा विद्यालयमा २१ जनाको ज्यान जाने गरी भएको गोलीकाण्डपछि यो आक्रमण भएको छ। प्रहरी उपप्रमुख डालग्लिशका अनुसार स्थानीय समयअनुसार ४ बजेर ५२ मिनेटमा बन्दुकधारीबारे प्रहरीलाई खबर आएको थियो र त्यसको तीन मिनेटभित्र प्रहरी घटनास्थल पुगेको थियो।

त्यहाँ पुगेका प्रहरी अधिकारीहरूले गोली चलेको आवाज सुने र त्यही आवाज सुनेर उनीहरू दोस्रो तलातर्फ बढेको बताइएको छ । अधिकारीहरूले दोस्रो तलामा रहेका मानिस लगायतका प्रत्यक्षदर्शीहरूसँग अहिले सोधपुछ गरिरहेका छन्। एबीसी न्यूजसँग कुरा गर्दै कप्तान रिचर्ड म्यूलेनबर्गले बताएअनुसार प्रहरीहरू मेडिकल क्याम्पस पुग्दा केही मानिसहरूलाई गोली लागेको देखिएको थियो भने केहीको मृत्यु नै भइसकेको थियो।

ह्यूस्टन । अमेरिकी निवर्तमान राष्ट्रपति डोनाल्ड ट्रम्पले टेक्ससको एक प्राथमिक विद्यालयमा भएको हमलाबारे आफ्नो प्रतिक्रिया सार्वजनिक गरेका छन् । उनले युक्रेनलाई सहायता दिनुको साटो आफ्नो विद्यालयमा सुरक्षा बढाउन भनेका हुन् । उनले अमेरिकाले युक्रेनमा सहायता बढाउनुको साटो विद्यालयको सुरक्षामा बढी फण्डिङ गर्न सरकारको ध्यानाकर्षण गराएका छन् । पूर्व राष्ट्रपतिले यदि अमेरिकाले युक्रेनको सहायतामा अर्बौ डलर खर्च गर्न सक्छ भने विद्यालयको सुरक्षा किन गर्न सक्दैन भन्दै प्रश्न गरेका हुन् ।

ह्यूस्टनमा नेशनल राइफल एशोसिएशनको एक बैठकमा भाग लिएका ट्रम्पले यस्तो बताएका हुन् । नेशनल राइफल एशोसिएशन अमेरिकाको सबैभन्दा ठूलो गन ग्रुप हो । पूर्व अमेरिकी राष्ट्रपतिको यो बयान यूवाल्डेमा एक विद्यालयमा भएको हमलाको तीन दिन पछि आएको हो । हमलामा दुई दर्जन बालबालिका तथा शिक्षकको ज्यान गएको छ । उनले इराक, अफगानिस्तानमा अमेरिकाले गरेको अर्बौं रुपैयाँको लगानीको समेत कुनै प्रतिफल नआएको समेत स्वीकार गरे ।

टेक्सस (बीबीसी) । अमेरिकाको टेक्सस राज्यस्थित एउटा प्राथमिक विद्यालयमा २१ जनाको ज्यान लिने गरी आक्रमण गरेका बन्दुकधारीले हमला गर्नुअघि सामाजिक सञ्जालमा त्यसबारे लेख्दै पूर्व सूचना दिएको अधिकारीहरूले खुलासा गरेका छन् । फेसबुक सञ्चालक कम्पनी मेटाका अनुसार १८ वर्षीय सन्दिग्धले लेखेका कुरा सीमित मानिसले हेर्न सक्नेगरी पोस्ट भएको थियो ।

टेक्सस राज्यका गभर्नर ग्रेग याबटका अनुसार १९ जना बालबालिका र दुईजना शिक्षकलाई गोली प्रहार गर्नुअघि आक्रमणकारीले तीन वटा चेतावनी फेसबुकमा पोस्ट गरेका थिए। सुरुमा उनले आफ्नै हजुरआमालाई गोली हान्ने र पछि आफूले त्यसो गर्ने लेखेको याबटले बताएका छन्। त्यसपछि उनले एउटा एलिमेन्ट्री विद्यालयमा आक्रमण गर्न लागेको खुलासा गरेका थिए ।

उक्त सन्देश ती बन्दुकधारी विद्यालय पुग्नुभन्दा १५ मिनेटअघि मात्रै पोस्ट गरिएको थियो । ती बन्दुकधारीले टेक्सस एलिमेन्ट्री स्कूलको एउटै कक्षा कोठामा १९ जना बालबालिका र दुई शिक्षकलाई गोली हानी हत्या गरेका छन् । उनले सबैलाई कोठामा थुनेका थिए। पछि उनलाई एक सीमारक्षक अधिकारीले गोली हानेर मारेका थिए। घटनामा कैयौँ बालबालिका घाइते भएका छन्। समाचारसंस्था एपीका अनुसार उक्त आक्रमण सुरु भएपछि नजिकै रहेका एक सीमारक्षक अधिकारी उक्त विद्यालय गए र ती युवकलाई गोली हानेर मारिदिए।

घटना भएको युभाल्डी मेक्सिकोसँगको सीमाभन्दा ८० माइल पर छ। मङ्गलवारको घटनामा दुईजना प्रहरी अधिकारी घाइते भएको तर उनीहरूको अवस्था सामान्य रहेको बताइएको छ। बन्दुकधारी १८ वर्षका युवाले के कारण आक्रमण गरे भन्ने कुरा स्पष्ट हुन सकेको छैन। दश दिनअघि मात्रै न्यूयोर्क राज्यमा भएको हमलामा १० जनाको मृत्यु भएको थियो।

टेक्सस (बीबीसी) । अमेरिकाको टेक्सस राज्यस्थित एउटा प्राथमिक विद्यालयमा बन्दुकधारीले गोली प्रहार गर्दा कम्तीमा १८ जना विद्यार्थी र एक शिक्षक मारिएका छन्। राज्यका गभर्नर ग्रेग याबटले आक्रमणकारीले पिस्तोल प्रयोग गरेको र राइफलको पनि प्रयोग भएको हुनसक्ने बताएका छन्। अठार वर्षका आक्रमणकारीको पनि मृत्यु भएको बताइएको छ। कानुन पालना गराउने अधिकारीहरूले उनलाई मारिदिएको हुनसक्ने विश्वास गरिएको छ।

रब एलिमेन्ट्री स्कूलमा पुग्नुअघि ती बन्दुकधारीले आफ्नी हजुरआमालाई गोली हानी हत्या गरेका विवरण सार्वजनिक भएको पनि याबटले जानकारी दिए। उक्त विद्यालयमा सातदेखि १० वर्षका बालबालिका अध्ययन गर्छन्। राष्ट्रपति जो बाइडनले मृतकहरूको सम्झनामा तीन दिनसम्म राष्ट्रिय झन्डा आधा झुकाउन निर्देशन दिएका छन्। स्थानीय अस्पतालका अनुसार विद्यार्थीहरूलाई आकस्मिक सेवा उपलब्ध गराइएको छ।

६६ वर्षकी एक महिला अनि १० वर्षकी एक बालिका भने गम्भीर अवस्थामा रहेको जनाइएको छ। उक्त विद्यालयमा झन्डै ५०० बालबालिका भर्ना भएको बताइएको छ। अधिकारीहरूका अनुसार घटनामा मृत्यु हुनेहरूको सङ्ख्या बढ्नसक्ने देखिएको छ। अमेरिकाकी उपराष्ट्रपति कमला ह्यारीसले यस्ता गोलीकाण्ड नदोहोरिउन् भनेर सुनिश्चित गर्नका लागि उनकै शब्दमा उचित र समझदारीपूर्ण नीति बनाउन आह्वान गरेकी छन्।

मङ्गलवारको घटनामा दुई जना प्रहरी अधिकारी घाइते भएको तर उनीहरूको अवस्था सामान्य रहेको बताइएको छ। बन्दुकधारी १८ वर्षका युवाले के कारण आक्रमण गरे भन्ने कुरा स्पष्ट हुन सकेको छैन।

तेहरान । कडा सुरक्षाका बीच निकै शक्तिशाली मानिने इरानको रेभलूशनरी गार्ड्सका एक कर्णेलको राजधानी तेहरानमा हत्या भएको छ । बीबीसीका अनुसार मोटरसाइकलमा सवार दुई व्यक्तिले आफ्नो निवासअगाडि कारमा रहेका सय्यद खोदाइमाथि पाँच पटक गोली प्रहार गरेको थिए । हत्याको हालसम्म कुनै पनि समूहले जिम्मेवारी लिएको छैन। इरानले भने अमेरिका र उसका साझेदार राष्ट्रहरूले हत्या गरेको आरोप लगाएको छ।

आइतवार भएको उक्त घटनामा संलग्न भएकाहरूको खोजी भइरहेको छ। बीबीसीका मध्यपूर्वी क्षेत्रीय सम्पादकका अनुसार यो सन् २०२० मा इरानमा एकजना वरिष्ठ परमाणु ऊर्जा वैज्ञानिकको हत्यापछि भएको सबैभन्दा ठूलो सुरक्षा त्रुटि हो। घटनास्थलका तस्बिरमा रगताम्य व्यक्ति सिटबेल्टसहित कारमा रहेको देखिन्छ। कर्णेल खोदाइ रेभलूशनरी गार्ड्स अन्तर्गत गोप्य रूपमा काम गर्ने सैन्य निकाय कूड्स फोर्सका वरिष्ठ सदस्य थिए। अमेरिकाले उक्त सैन्य बलले आतङ्कवादी समूहलाई समर्थन गरेको र मध्यपूर्वमा भएका आक्रमणमा उसको हात रहेको आरोप लगाउँदै आएको छ।

पछिल्ला वर्षहरूमा मारिने कूड्स फोर्सका खोदाइ दोस्रो वरिष्ठ अधिकारी हुन्। सन् २०२० मा इरानका सबैभन्दा शक्तिशाली कमान्डर कासिम सुलेमानी अमेरिकी हवाई हमलामा मारिएका थिए। सन् २०२० मै परमाणु ऊर्जासम्बन्धी वरिष्ठ वैज्ञानिकको समेत तेहरानमा गोली हानेर हत्या गरिएको थियो। इरानका लागि निकै महत्त्वपूर्ण भूमिका निर्वाह गर्ने उनी सधैँ सुरक्षाकर्मीहरूसँगै हुन्थे।इरानका सञ्चारमाध्यमहरूले स्रोतलाई उद्धृत गर्दै उनी विश्वभरि इरानले गरेका कैयौँ आक्रमणका लागि जिम्मेवार रहेको जनाएका छन्।

सोल (बीबीसी) । दक्षिण कोरियामा झगडा गरेपछि त्यहाँ खटिएका अमेरिकी गुप्तचर सेवाका दुई कर्मचारीलाई विमानमा हालेर स्वदेश फिर्ता पठाइएको छ । उनीहरू अमेरिकी राष्ट्रपति जो बाइडनको दक्षिण कोरिया भ्रमणअघि सोल पठाइएको अगुवा टोलीका सदस्य थिए। अमेरिकी सञ्चारमाध्यमहरूमा प्रकाशित विवरणअनुसार उनीहरू बिहीवार राति सोलको मदिरालयमा गएका थिए। तीमध्ये एक जनाले एक स्थानीय ट्याक्सीचालकसँग हात हालाहाल गरेका थिए।

उक्त घटनामा कसैलाई पनि पक्राउ गरिएको थिएन। तर प्रहरीले उक्त घटनाबारे अनुसन्धान गरेको थियो। अमेरिकी गुप्तचर सेवा यूएस सिक्रिट सर्भिसका एक प्रवक्ताले एउटा विज्ञप्ति प्रकाशित गर्दै आफ्नो निकायलाई दुई कर्मचारी संलग्न उक्त घटनाबारे जानकारी रहेको र उनीहरूले सम्भवतः नीति उल्लङ्घन गरेको हुनसक्ने बताएका छन्। एन्थनी गूल्एल्मीका अनुसार ती दुवै जनालाई ूप्रशासनिक बिदाूमा पठाइएको छ र उनीहरूको अनुपस्थितिले बाइडनको भ्रमणमा कुनै प्रभाव पर्ने छैन।

चीन र उत्तर कोरियाले दिने धम्कीका कारण उत्पन्न चिन्ताका माझ बाडइन चारदिने एशिया भ्रमणमा निस्किएका छन्। उक्त भ्रमणको पहिलो चरणमा उनी दक्षिण कोरिया पुगेका हुन्। बीबीसीको अमेरिकी साझेदार सीबीएस न्यूजलाई स्रोतहरूले अमेरिका फिर्ता पठाइएका दुई गुप्तचरमध्ये एक जना स्पेशल एजेन्ट र अर्का सुरक्षा विशेषज्ञ भएको बताएका छन्।

अमेरिकी राष्ट्रपति दक्षिण कोरियाको राजधानी आइपुग्नु एक घण्टा पनि बाँकी नहुँदा शुक्रवार अपराह्ण उनीहरूलाई घर फिर्ता पठाइएको थियो। सीबीएसका अनुसार प्रशासनले घटनाका बारेमा नभई त्यतिबेला उनीहरू मातेका थिए कि थिएनन् भनेर छानबिन गर्ने छ। ट्याक्सीचालकसँग कसरी झगडा सुरु भयो भन्ने स्पष्ट छैन। उनीहरू राति घुमेर आफू बसेको होटलमा फर्किन लाग्दा झगडा परेको थियो।

काठमाडौं (बीबीसी) । वासिङ्टनले मस्कोमाथि थप प्रतिबन्धको घोषणा गरेकै बेला अमेरिकी राष्ट्रपति जो बाइडनकी पत्नी जील बाइडनले युक्रेनी समकक्षी ओलेना जेलेन्स्कासँग युक्रेनमा भेट गरेकी छन्। यो उनीहरूबीच भएको पहिलो भेटघाट हो र त्यो युक्रेनको सीमावर्ती शहर उज्होरेडको एक विद्यालयमा भएको थियो। गत फेब्रुअरी २४ मा युक्रेनमा रुसी आक्रमण सुरु भएयता जेलेन्स्का सार्वजनिक रूपमा देखा परेको यो पहिलोपटक हो।

युक्रेनमाथि रुसी आक्रमणको पछिल्लो प्रतिक्रियाका रूपमा अमेरिकाले रुस र बेलारुसका २६ सय नागरिकमाथि भिसा प्रतिबन्धसहित नयाँ रोकहरू लगाएको छ। अमेरिकाले तीनवटा रुसी टेलिभिजन स्टेसनमाथि पनि प्रतिबन्ध लगाएको छ। उसले रुसी वित्तिय संस्था ग्याजप्रमब्याङ्कका अधिकारीहरुमाथि पनि रोक लगाएको छ। यसैबीच औद्योगिक राष्ट्रहरूको समूह जी-सेभेनका नेताहरूले रुसी तेललाई चरणबद्ध रूपमा प्रतिबन्ध लगाउन आफूहरू प्रतिबद्ध भएको बताएका छन्।

अमेरिकी र युक्रेनी राष्ट्रपतिका पत्नीबीच हाल विस्थापितहरूका लागि अस्थायी आश्रयस्थलका रूपमा प्रयोग भइरहेको विद्यालयमा भेट भएको हो। त्यहाँ बाइडनपत्नीले आफूले संयुक्त राज्य अमेरिकाका जनता युक्रेनका जनतासँग उभिएको देखाउन चाहेको बताइन्। उनले हाल तेस्रो महिनामा चलिरहेको युद्ध क्रूर रहेको भन्दै त्यसलाई रोक्नुपर्नेमा जोड दिइन्।

जेलेन्स्काले युक्रेन युद्धमा रहेको बेला भ्रमण गर्नु एउटा साहसी कार्य भएको बताइन्। उनले युक्रेन र अमेरिकामा मनाइने ुमदर्स डे का दिन भएको भ्रमण निकै प्रतीकात्मक रहेको समेत बताएकी छन्। दुवै महिलाहरू उक्त विद्यालयमा बसेर हाल त्यहाँ राखिएका दर्जनौँ बालबालिकामध्ये केहीसँग खेलेका थिए।

कोलम्बो । श्रीलंकाका राष्ट्रपतिले मुलुकमा घोषणा गरेको संकटकालप्रति अमेरिका र युरोपेली सङ्घले आलोचना गरेका छन् । सरकारविरुद्ध भइरहेका प्रदर्शन भइरहेको समयमा श्रीलङ्काका राष्ट्रपति गोटबय राजपक्षलेले संकटकाल घोषणा गरेका हुन् । राष्ट्रपति राजपक्षले गत रातिबाट लागु हुने गरी सङ्कटकालको घोषणा गरेका छन् । गम्भीर आर्थिक सङ्कटसँग गुज्रिरहेको श्रीलङ्कामा मानिसहरूले औषधिसहित अत्यावश्यक सामग्रीहरू प्राप्त गर्न सङ्घर्ष गरिरहेको खबर छ ।

बीबीसीका अनुसार शुक्रवार बसेको मन्त्रिपरिषद्को एउटा विशेष बैठकपछि सङ्कटकाल लगाउने निर्णय लिइएको थियो। कोलम्बोस्थित अमेरिकी राजदूत जुली चुङले मानिसहरूको आवाज सरकारले सुन्नुपर्ने बताइन्। उनले ट्विटरमा लेखेकी छन्, ‘अर्को सङ्कटकालको अवस्थाबाट चिन्तित छु। शान्तिपूर्ण नागरिकहरूका आवाज सुनिनुपर्छ, श्रीलङ्कालीहरू बेहोरिरहेको वास्तविक चुनौतीहरूसँग जुझ्न र देशमा सबैका लागि समृद्धि र अवसर रहने बाटोमा फर्काउन दीर्घकालीन समाधानको आवश्यकता पर्छ। सङ्कटकालीन अवस्थाले त्यसलाई मद्दत गर्दैन्।’

युरोपेली सङ्घले सङ्कटकालले श्रीलङ्काका अप्ठेराहरू हल गर्न मद्दत नगर्ने बरु त्यो प्रत्युत्पादक हुनसक्ने चेतावनी दिएको छ। उसले भनेको छ, ‘एक महिना लामो शान्तिपूर्ण प्रदर्शनले दक्षिण एशियाको पुरानो लोकतन्त्रमा कसरी श्रीलङ्काली नागरिकहरूले आफ्नो अभिव्यक्ति स्वतन्त्रतालाई पूर्ण रूपमा अनुभूत गरिरहेका छन् भन्ने देखिएको थियो।’

राष्ट्रपति राजपक्षको कार्यालयले सार्वजनिक सुरक्षालाई मध्यनजर राख्दै सङ्कटकाल लगाइएको जनाएको थियो। विदेशी मुद्रा सञ्चितमा गम्भीर सङ्कट बेहोरिरहेको श्रीलङ्काले खाद्यान्न, इन्धन र औषधि आयात गर्न गम्भीर समस्या भोगिरहेको छ। योभन्दा अघि पनि श्रीलङ्काका राष्ट्रपतिले गएको एप्रिल २ मा सङ्कटकाल लगाएका थिए जसलाई उनले एप्रिल ५ मा फिर्ता लिए।

काठमाडौं । रुस र युक्रेनको युद्धका कारण विस्थापन भएको युक्रेनस्थित अमेरिकी दूतावास यसै महिनाबाट पुनः संचालनमा ल्याइने भएको छ । अन्तर्राष्ट्रिय संचारमाध्यमले जनाए अनुसार अमेरिकाले यसका लागि तयारी गरिरहेको छ । अमेरिकाले युक्रेनमा मे महिनाको अन्त्यसम्म आफ्नो दूतावास पुनर्स्थापना गर्ने जनाएको छ । क्रेनको राजधानी किभमा अमेरिकाले आफ्नो दूतावास पुनःर्स्थापना गर्ने छ । फेब्रुअरीमा रूसले आक्रमण सुरू गरेपछि सुरक्षाको कारण देखाउँदै अनिश्चितकालका लागि दूतावास बन्द गरेको हो ।

अमेरिकी कूटनीतिज्ञहरुका अनुसार दूतावास पुनर्स्थापनाका लागि आवश्यक गृहकार्य तीब्र रुपमा भइरहेको छ । समाचार संस्था एएफपीले यसको पुष्टी गरेको छ । युक्रेनमाथि रुसले गरेको आक्रमणको सबैभन्दा चर्को विरोध गर्दै आएको अमेरिकाले रूसी आक्रमणकारीले आफ्नो दूतावासमा पनि आक्रमण गर्ने खतरा रहेको भन्दै दूतवास बन्द गरेर आफ्ना सबै कर्मचारीहरूलाई स्वदेश फिर्ता गरेको थियो। फेब्रुअरी २४ मा रुसले पहिलो पटक आक्रमण गरेको हो ।

काठमाडौं (बीबीसी) । युक्रेन युद्धमा हस्तक्षेप गर्न खोज्ने कुनै पनि देशले बिजुलीको गतिमा प्रतिक्रियाको सामना गर्नुपर्ने रुसी राष्ट्रपति भ्लादिमिर पुटिनले चेतावनी दिएका छन्। ‘हामीसँग सबै खाले उपकरण छन्, त्यसैले कसैले घमण्ड गर्न गर्नुपर्दैन, आवश्यक भए हामी तिनीहरूको प्रयोग गर्नेछौँ,’ उनले भने। उनको उक्त भनाइलाई बलिस्टिक क्षेप्यास्त्र र आणविक हतियारहरूसँग जोडेर हेर्न सकिने बताइएको छ। युक्रेनका सहयोगी देशहरूले हतियारको आपूर्ति बढाएका बेला पुटिनको यस्तो चेतावनी आएको हो।

अमेरिकासहित अन्य देशले रुसलाई पराजित गर्ने सुनिश्चित गर्ने वाचा गर्दै युक्रेनलाई सैन्य सहायता दिइरहेका छन्। पश्चिमा अधिकारीहरूले युक्रेनको पूर्वी क्षेत्रमा जारी रुसी विस्तारको प्रयासमा आफूहरूले बाधा पुर्‍याएको बताएका छन्। गत साता रुसले युक्रेनी राजधानी किएभ वरपरका क्षेत्रहरूबाट पछि हटेर डोनबास क्षेत्र कब्जा गर्न ठूलो आक्रमण सुरु गरेको थियो। तर एक अधिकारीका अनुसार रुसी सेनालाई ‘कठोर युक्रेनी प्रतिरोधलाई सामना गर्न गाह्रो भइरहेको छ र उनीहरूले हार बेहोरिरहेका छन्।’ यसैबीच युरोपेली आयोगले रुसले पोल्याण्ड र बल्गेरियामा ग्यास निर्यात बन्द गरेर मोलमोलाइ गरेको आरोप लगाएको छ।