Category: अमेरिका

वासिंटन डिसी । अमेरिकी संसद भवन (युएस क्यापिटल बिल्डिङ) चक्कु प्रहार गरि एक प्रहरी अधिकारीको हत्या भएकोछ । थप केही मानिस घाइते रहेको र उनीहरुको उपचार जारी रहेको प्रहरीले जनाएको छ ।

प्रहरीका अनुसार एक कार चालकले चक्कु आक्रमण गरेका हुन् । कार ठोक्काउँदै अगाडी बढेका उनले प्रहरी अधिकारीमाथि आक्रमण गरेको बताइएको छ । आफ्नो प्रतिरक्षामा प्रहरीले समेत ती कार चालकमाथि गोली चलाएको छ ।

गोली लागेर आक्रमणकारीको समेत ज्यान गएको अमेरिकी संचारमाध्यमले जनाएका छन् । आक्रमणकारी २५ वर्षीय युवक रहेको र उनीविरुद्ध कुनै पनि प्रहरी रेकर्ड नरहेको बताइएको छ । वाशिङ्गटन डिसीका कार्यकारी प्रहरी प्रमुखले पत्रकार सम्मेलन गर्दै आक्रमण आतंवादसँग सम्बन्धित भने नदेखिएको बताए ।

वासिंटन डिसी \एजेन्सी । अमेरिकी राष्ट्रपति जो बाइडेनले स्वास्थ्य सतर्कताका लागि लापरवाही नगर्न सरोकारवालासँग आह्वान गरेका छन् । अमेरिकाका सबै राज्य र सहरमा मास्क लगाउन प्रोत्साहित गर्न गभर्नर एवम् मेयरलाई समेत उनले अपिल गरेका छन् ।

कोेरोना महामारीका सन्दर्भमा आयोजित एक पत्रकार सम्मेलनमा बोल्दै उनले महामारी पूर्णरुपमा उन्मूलन भइनसकेको बारे स्मरण गराए । सोहीकारण अनिवार्य मास्क लगाउन आवश्यक रहेको उनको भनाई छ । यसमा नागरिकलाई बढी भन्दा बढी प्रोत्साहित गर्नुपर्ने उनको भनाई छ ।

लापरबाही नै कारोना संक्रमणको एक कारण रहेको भन्दै उनले सोहीकारण संक्रमण नियन्त्रणमा चूनौति थपिएको समेत बताए । यसअघिका राष्ट्रपति डोनाल्ड ट्रम्प भने मास्क विरोधी थिए । उनी यसलाई चिनियाँ फेसन मान्थे । सोहीकारण अहिले पनि कतिपय अमेरिकी मास्क लगाउन आनाकानी गर्छन् ।

आफूले कार्यभार सम्हालेपछि सङ्क्रमणदर दुईतिहाइ घटेको दावि समेत उनले गरे । सरकारले कोरोनाविरुद्धको खोप सबैभन्दा धेरै व्यक्तिलाई लगाउने प्रयास गरिरहेको समेत उनले जानकारी दिए ।

अमेरिका विश्वकै सबैभन्दा बढी संक्रमण र मानवीय क्षति भएको मुलुक हो । यहाँ अहिलेसम्म ३ करोड १० लाख २८ हजारलाई कोरोना सङ्क्रमण भइसकेको छ । ५ लाख ६३ हजार १ सय ६८ जनाले ज्यान गुमाएका छन् ।

कोलोराडो । अमेरिकाको कोलोराडोमा एक बन्दुरधारीेले चलाएको गोली लागेर कम्तिमा ६ जनाको मृत्यु भएको छ । कोलोराडो राज्यका बोल्डर काउन्टीस्थित एक ग्रोसरी स्टोरमा बन्दुकधारीले अन्धाधुन्ध गोली चलाएको अमेरिकी संचारमाध्यमले जनाएका छन् ।

यसक्रममा एक प्रहरी अधिकारीसहित कम्तिमा ६ जनाको मृत्यु भएको खबर छ । स्थानीय समयअनुसार घटना सोमबार दिउँसो साढे तीन बजे भएको हो । बन्दुकधारी ग्रोसरी स्टोरमा छिरेर गोली चलाएका थिए । द न्युयोर्क टाइम्सले लेखे अनुसार शंकास्पद बन्दुकधारीलाई प्रहरीले पक्राउ समेत गरेको छ । उनलाई घाइते अवस्थामा पक्राउ गरिएको हो ।

आक्रमणको कारण खुलेको छैन । यो घटनाबारे राष्ट्रपति जो बाइडेनले समेत ब्रिफिङ लिएका छन् । अमेरिकामा एक साता अगाडी समेत यस्तै घटनामा ७ जना मारिएका थिए । अमेरिकामा सर्वसाधारणले बन्दुक राख्न पाउने व्यवस्था रहेको छ । तर, सनकको भरमा अन्धाधुन्ध आक्रमणका घटना बढेसँगै यहाँ सुरक्षा चूनौति पनि उत्तिकै रहेको छ ।

वासिंटन । अमेरिकी राष्ट्रपति जो बाइडेन एयरफोर्सको जहाजको भर्‌याङमा चिप्लिएका छन् । उनी भर्‌याङ चढ्दाचढ्दै लडेका हुन् । वासिंटनबाट एटलान्टाका लागि जान जहाज चढ्ने क्रममा बाइडेन भर्‌याङमा चिप्लिएर लडेका थिए । यो क्षणलाई भने संचारमाध्यमले खिचेका थिए ।

चिप्लिएर लडेका उनी उठ्ने कोसिस गर्दा गर्दा फेरि चिप्लिएका थिए । यद्दपी उनी अहिले शतप्रतिशत फिट रहेको ह्वाइटहाउसले जनाएको छ । उनको साथमा उपराष्ट्रपति कमला ह्यारिस पनि थिइन् ।

बीबीसी । अमेरिकाले विगत पाँच वर्षमा अस्त्र व्यापारमा आफ्नो विश्वव्यापी अंश बढाएर ३७ प्रतिशत पुर्‍याएको स्वीडनस्थित एउटा अनुसन्धान संस्थाले जनाएको छ।

रुस र चीनबाट निर्यात घटेका बेला अमेरिका, फ्रान्स र जर्मनीले आफ्नो अस्त्र निर्यात बढाएका हुन्। हतियारको आयात र निर्यात शीतयुद्ध अन्त्य भएपछि अहिले उच्चबिन्दुमा पुगेको देखिन्छ।

तर कोभिड महामारीले त्यसमा केही परिवर्तन ल्याउन सक्छ।मध्यपूर्वमा शस्त्रअस्त्र किन्ने होड अन्यत्रभन्दा बढी देखिएको छ।

कस्तो छ बजार ?

यस्तो विवरण सङ्कलन गरेको स्टकहोम इन्टरन्याश्नल पीस रिसर्च इन्स्टिट्यूट (सिप्री) का वरिष्ठ अध्ययनकर्ता पिटर वेजेमन भन्छन्, ‘सन् २०२० मा महामारी उत्कर्षमा पुगेको बेलामा समेत केही देशहरूले अस्त्रशस्त्र किन्ने ठूला सम्झौता गरेका छन्।’

उक्त संस्थाका अनुसार अन्तर्राष्ट्रिय रूपमा अस्त्रशस्त्रको विक्री सन् २०१६ देखि सन् २०२० सम्म अघिल्लो पाँच वर्षको तुलनामा स्थिर रहेको थियो।आधाजसो अर्थात् ४७ प्रतिशत अमेरिकी अस्त्र मध्यपूर्वमा निर्यात भएको थियो। त्यसमध्ये अमेरिकाले बेचेको कुल अस्त्रको २४ प्रतिशत साउदी अरब गएको छ।

आफ्नो बजार हिस्सा बढाएको अमेरिकाले यतिखेर ९६ देशमा आफूले उत्पादन गरेका अस्त्रशस्त्र पठाइरहेको छ।फ्रान्सले आफ्ना मुख्य अस्त्रको निर्यातलाई ४४ प्रतिशतले बढाएको छ भने जर्मनीको निर्यात पनि २१ प्रतिशतले बढेको छ।इजरेल र दक्षिण कोरिया दुवैले उल्लेख्य रूपमा निर्यात बढाएका छन्। तर अरू निर्यातकर्तासँग तुलना गर्दा तिनलाई सानै मानिन्छ।

मध्यपूर्वमा कसरी भएको छ वृद्धि ?

विगत पाँच वर्षको तथ्याङ्कसँग तुलना गर्दा सन् २०१६ देखि २०२० सँगको अवधिमा २५ प्रतिशत बढी अस्त्र किनेर मध्यपूर्व तीव्र गतिमा बढेको बजार बनेको छ।

सो अवधिमा साउदी अरबको आयात वृद्धिदर ६१ प्रतिशत, इजिप्टको १३६ प्रतिशत र कतारको ३६१ प्रतिशत देखिन्छ। एशिया र ओशिआनिया मुख्य अस्त्र आयात गर्ने विश्वका ठूला क्षेत्र हुन्। त्यहाँ विश्वको ४२ प्रतिशत हतियार निर्यात भएका छन्। भारत, अस्ट्रेलिया, चीन, दक्षिण कोरिया र पाकिस्तान उक्त क्षेत्रका ठूला आयातकर्ता हुन्।

रूस र चीनको व्यापार किन घट्यो ?

रुस र चीन दुवैको अस्त्र निर्यात घटेको भए पनि सब(सहारा अफ्रिकामा यी देशहरू मुख्य निर्यातकर्ताका रूपमा छन्। यद्यपि सिप्रीका अध्ययनकर्ताहरू रुसले हालै कैयौँ देशसँग नयाँ सम्झौता गरेकाले आगामी दिनमा उसको हिस्सा बढ्ने धारणा राख्छन्।

केही समययता रुसको अस्त्र निर्यात २२ प्रतिशतले कम भएको थियो। त्यसको एउटा मुख्य कारण भारतमा हुने निर्यात ५३ प्रतिशतले घट्नु हो।

काठमाडौं । नेपालस्थित अमेरिकी दूतावासले विभिन्न ७ प्रकारका भिसा जारी सुरु भएको जनाएको छ । विद्यार्थीसहित ७ प्रकारका भिसा जारी थालिएको दूतावासले जनाएको छ । दूतावासले भिजिटर भिसा बी वान\बी टु भिसा, सीमित संख्यामा क्रु मेम्बर सी वान\डी भिसा, सिमित संख्यामा विद्यार्थी भिसा एफ, एम र एक्सचेन्ज भिजिटर जे भिसा, मेडिकल वा अन्य आपतकालीन अवस्थाका अन्य गैरआप्रवासी भिसा समेत जारी गर्न थालिएको दूतावासले जनाएको छ ।

अमेरिकाले सीमित संख्यामा कामदार भिसा एच र एलका लागि समेत भिसा ‘अप्वाइन्टमेन्ट’ लिन थालेको दूतावासको भनाई छ । विद्यार्थी भिसा आवेदकका लागि विगतमा कोरोना महामारीका कारण शीघ्र अप्वाइन्टमेन्टको व्यवस्था खारेज गरिएको थियो । अब भने सो व्यवस्था समेत पुनः शुरु गरिएको छ । कोरोना महामारीपछि कडाई गरिएका यात्रा प्रतिवन्ध क्रमशः फुकुवा हुने क्रममा छन् ।

काठमाडौं । अमेरिकामा नेपाली उवर चालक सुभाकर खड्कामाथि तीन जना युवतीले गरेको दुर्व्यवहार अहिले विश्वभर चर्चाको विषय बनेको छ । खासगरी एसियाली मुलकै भएका कारण उनीमाथि दुर्व्यवहार भएको भन्दै आलोचना भइरहेका बेला खड्कामाथि दुर्व्यवहार गर्ने एक महिला पक्राउ परेकी छिन् । अमेरिकाको सन्फ्रान्सिस्कोमा अनलाइन ट्याक्सी सेवा उबरका नेपाली चालक सुभाकर खड्कामाथि दुर्व्यवहार भएको थियो ।

प्रहरीका अनुसार बिहीबार २४ वर्षीया मलेसिया किङ नाम गरेकी युवति पक्राउ परेकी छिन् । घटना गत आइतबारको हो । चालक खड्काले ट्याक्सीमा युवतिलाई फेस मास्क लगाउन भनेका थिए । उवरमा रहेको भिडियो अनुसार चालकको आग्रहलाई ती यात्रुले नमानी उल्टो दुर्व्यवहार गरेका छन् । सार्वजनिक भएको भिडियो अनुसार ती युवतीले मास्क लगाउन आग्रह गरेको रिसको झोँकमा खड्काको मुखमा पटकपटक खोकेकी थिइन् ।

चालक खड्काको मोबाइल खोस्ने प्रयास गर्दै उनले चालकको मास्क समेत छिनाइदिएकी छिन् । उबरको नियमअनुसार ट्याक्सी चढ्ने सबैले मास्क अनिवार्य लगाउनुपर्छ । ती तीन जना युवति ट्याक्सी चढ्दा एक जनाले मास्क लगाएकी थिइनन् । खड्काले नियमअनुसार मास्क लगाउन आग्रह गरेका थिए ।

युवतीले मास्क आफूसँग नभएको भनेपछि चालकले मास्क किन्न ट्याक्सी ग्यास स्टेसन तर्फ मोडेका थिए । ग्यास स्टेसन नपुग्दै युवतिहरुले चालकमाथि दुर्व्यवहार गरेका थिए । चालक खड्काले मास्क नलगाई ट्याक्सीमा राख्न नसक्ने बताएसँगै उनीहरुले हिँड्ने बेलामा खड्काको आँखामा पोल्ने खालको रसायन समेत छर्किएको पुष्टी भएपछि ती युवति पक्राउ परेकी हुन् ।

घटनापछि खड्काले सन्फ्रान्सिस्को प्रहरीमा उजुरी दिएका थिए । खड्काले आफुले विनम्रतापूर्वक आग्रह गर्दा समेत दुव्र्यवहार भएको र आफु एसियन मुलको भएकै कारण यस्तो व्यवहार भएको गुनासो समेत गरेका थिए । खड्का आठ वर्षदेखि अमेरिकामा छन् । उता, उबरले समेत ती तीन जना युवतीमाथि आजिवन प्रतिबन्ध लगाउने निर्णय गरेको छ । साथै कम्पनी कुनै पनि किसिमको रंगभेदी र कुनै पनि समुदायमाथि घृणा फैलाउने प्रकारका कार्यको विरोधमा रहने समेत स्पष्ट पारेको छ ।
एजेन्सी

वासिङ्टन। अमेरिकी राष्ट्रपति जो बाइडेनले अघि सारेको १९ खर्ब डलरको कोभिड-१९ राहत प्याकेजलाई अमेरिकी तल्लो सदन हाउस अफ रिप्रिजेन्टेटिभ्स (कङ्ग्रेस) ले अनुमोदन गरेको छ।

राष्ट्रपति बाइडेन र डेमोक्रेटिक पार्टीले राहत प्याकेज अनुमोदन भएको विषयलाई आफ्नो महत्त्वपूर्ण विजय मानेका छन्।

बाइडेन ह्वाइट हाउसमा प्रवेश गरेको करिब सात हप्तापछि कङ्ग्रेसबाट उक्त विधेयक पारित भएको छ तर कङ्ग्रेसमा भएको मतदानमा २२०-२११ मत खसेको थियो। अर्थात् कङ्ग्रेसमा बहुमतमा रहेका डेमोक्रेट सदस्यहरुले विधेयकको पक्षमा मतदान गरेका भए पनि रिपब्लिकन पार्टीले विपक्षमा मतदान गरेको थियो।

यो विधेयकलाई अमेरिकी माथिल्लो सदनले चार दिन अघि बहुमतका आधारमा पारित गरिसकेको छ। अमेरिकी श्रमिकको प्रतिघण्टा पारिश्रमिक १५ डलर पुर्‍याउने प्रस्तावलाई विधेयकबाट हटाइए पनि सिनेटमा रिपब्लिकन पार्टीका सदस्यहरुले विधेयकको विपक्षमा मतदान गरेका थिए।

कङ्ग्रेसले विधेयक पारित गरेसँगै राष्ट्रपति बाइडेनले ट्विट गर्दै कङ्ग्रेसलाई धन्यवाद दिएका थिए। उनले विधेयकमा यही शुक्रबार हस्ताक्षर गरेसँगै राहत प्याकेज कार्यान्वयनमा आउने छ।

प्रस्तावित विधेयकमा निकै महत्त्वपूर्ण मानिएको विषय हो अधिकांश अमेरिकी नागरिकलाई एक हजार चार सय डलर उपलब्ध गराउने। यसबाहेक हरेक साता तीन सय डलर आपतकालीन बेरोजगार भत्ता आगामी सेप्टेम्बरसम्म उपलब्ध हुनेछ। तर यो विधेयकले त्यतिमात्र कुरा समेटेको छैन।

यो विधेयकले डेमोक्रेटले चुनावमा व्यक्त गरेका प्रतिज्ञा र बाइडेनको सर्वाधिक प्राथमिकतामा मुलुकको अर्थतन्त्रको पुनरुद्धार दुवै समेटेको छ। अमेरिकामा कोरोनाभाइरस महामारीले सिर्जना गरेको मानवीय क्षति र आर्थिक क्षति निकै कहालीलाग्दो अवस्थामा पुगिसकेको बाइडेनको ठहर छ। यसलाई सम्बोधन गर्न प्रभावकारी कदम जरुरी भइसकेको बाइडेनले बताउँदै आएका छन्।

संयुक्तराज्य अमेरिकामा कोभिड-१९ को संक्रमणबाट पाँच लाख २५ हजारभन्दा बढी व्यक्तिको मृत्यु भइसकेको छ।

अमेरिकी कङ्ग्रेसकी सभामुख नान्सी पेलोसीले पनि कोरोनाभाइरस महामारीका कारण देशका सामुन्‍ने उत्पन्‍न समस्या सम्बोधन गर्न सरकार र संसद् एकै ठाउँमा आएकामा आभार व्यक्त गरे।

बाइडेन प्रशासनले अघि सारेको १९ खर्ब डलरको राहत योजनाले कोभिड-१९ सँग सम्बन्धित कार्यक्रममा खर्च गर्ने, संकटमा परेका परिवारलाई राहत दिने, रोजगारी जोगाउने र नयाँ रोजगार सिर्जना गर्ने विश्वास लिएको छ।

देशको ऋणभार २२ ट्रिलियन डलर पुगे पनि डेमोक्रेट र रिपब्लिकन पार्टीले यसप्रति खासै वास्ता गरेका छैनन्।

करिब ६२८ पृष्ठ लामो यो विधेयकले खासगरी न्यून र मध्यम आय भएका परिवारलाई राहत उपलब्ध गराउन सङ्‍घीय सरकारको प्रयत्‍न समेटेको छ। बालबच्चा, बालस्याहार र पारिवारिक विदा बस्दा करछुट दिने समयावधि अहिले बढाइएको छ, र कतिपय डेमोक्रेट सदस्यहरु यो व्यवस्थालाई स्थायी रुपमै उपलब्ध गराउन प्रयासरत छन्।

प्रत्यक्ष भुक्तानी र बेरोजगार भत्ताका अलावा यस विधेयकले कोभिड-१९ को खोप र उपचार, स्कुल, राज्य र स्थानीय सरकार तथा विमानसेवादेखि कन्सर्ट हलसम्मका संकटग्रस्त उद्योग, व्यवसायका लागि अर्बौं डलरको व्यवस्था गरिएको छ। साथै किसानहरुलाई राहत, निवृत्तिभरण प्रणाली र विद्यार्थी ऋण तथा स्वास्थ्य बिमा खरिद गर्नेहरुका लागि अनुदान तथा थोरै आर्जन गर्नेहरुका लागि मेडिकेड खरिद गर्न राज्यहरुलाई रकम उपलब्ध गराउने प्रावधान नयाँ विधेयकमा छ।

तर, यी निकै राम्रा प्रावधानहरु प्रस्तावित राहत प्याकेजमा समेटिए पनि रिपब्लिकनहरु त्यति खुसी छैनन्। उनीहरुको भनाइमा अतिरिक्त खर्चले राष्ट्रमाथि अतिरिक्त बोझ सिर्जना गर्नेछ।

यद्यपि, राष्ट्रव्यापी जनमत सर्वेक्षणहरुले बाइडेनको राहत प्याकेजलाई डेमोक्रेट र स्वतन्त्र व्यक्तिसहित कैयौं रिपब्लिकनले समर्थन गरेको देखाएको छ। रासस/एपी

एजेन्सी । अमेरिकी विदेश विभागले पूर्वराष्ट्रपति डोनाल्ड ट्रम्पले १३ देशका नागरिक माथि लगाएको प्रतिबन्ध फुकुवा गरेको छ । प्रतिबन्ध फुकुवासँगै १३ देशका नागरिकहरुले भिसाका लागि पुनः आवेदन दिन पाउने भएका छन् ।

अधिकांश मुस्लिम बाहुल्‍य तथा अफ्रिकी देशका नागरिक थिए। राष्ट्रपति जो बाइडनले आफूले पदभार ग्रहण गरेको पहिलो दिनमा ट्रम्पले लगाएको प्रतिबन्धलाई खारेज गरेका थिए । विभागले भनेको छ, ‘ट्रम्पका कारण ज-जसलाई अमेरिका आउनका लागि भिसा प्रतिबन्ध लगाइएको थियो। उनीहरुलाई अमेरिका आउने दोस्रो मौका दिनेछौँ। खासगरी मुस्लिमहरु पुन: आवेदन दिन सक्‍नेछन्।’

अमेरिकी विदेश विभागका प्रवक्ता नेड प्राइसले भनेका छन्, ‘जुन आवेदनको २० जनवरी २०२० भन्दा पहिला भिसा दिनबाट रोकिएको थियो, उनीहरुले नयाँ आवेदन दिनुपर्छ र नयाँ आवेदन शुल्क बुझाउनु पर्नेहुन्छ।’

यसका साथै रद्द गरिएका आवेदनमाथि पनि पुनर्विचार गर्न सकिने तर त्यसका लागि अतिरिक्त शुल्क लाग्‍ने प्रवक्ताले बताएका छन्।

अमेरिकी विदेश विभागको तथ्यांक अनुसार यात्रा प्रतिबन्धका कारण करीब ४० हजार मानिसहरु अमेरिका प्रवेश गर्नबाट बञ्‍चित भएका थिए।

ट्रम्प प्रशासनले इरान, लिबिया, सोमालिया, सुडान, सिरिया तथा यमनसहित १३ देशबाट आउने यात्रीहरुलाई प्रवेशमा प्रतिबन्ध लगाएको थियो।

तर सन् २०१७ डिसेम्बमा अमेरिकाको सर्वोच्च अदालतले उक्त फैसलालाई रोकिदिएको थियो।

काठमाडौं । अमेरिकाले म्यानमारका सेनाको बैंक खाता रोक्का गरेपछि खातामा रहेको करीव १ अर्ब अमेरिकी डलर बराबरको रकम सेनाले चलाउन नपाउने भएको छ । एक साता अगाडी अमेरिकी राष्ट्रपति जो बाइडेनले गरेको कार्यकारी आदेश अनुसार म्यानमारको कूमा संलग्न सैनिक जनरलमाथि प्रतिबन्ध लागेको छ ।

सोही आदेश अनुसार नै म्यानमारका सेनाको अमेरिकाको बैंकमा रहेको रकम अमेरिकाले अनिश्चितकालसम्म रोकिदिएको रोयटर्सले लेखेको छ । म्यानमारमा सेनाले प्रजातान्त्रिक पार्टीको सरकारलाई हत्याएर कु गरेको र सैन्य शासन लादेको छ । यसको विरोधमा म्यानमारमा हरेक दिन प्रदर्शन भइरहेका छन् । जहाँ मानिसहरुको ज्यान गएको छ ।

अहिलेसम्म ५५ भन्दा बढी मानिसको ज्यान गइसकेको छ । त्यसो त सैन्य कू गरेको तेस्रो दिनमै म्यानमारको सेनाले फेडेरल रिजर्भ बैंक अफ न्यूयोर्कमा राखेका १ अर्ब डलर निकाल्ने प्रयास गरेको थियो । तर, अमेरिकाले तत्कालका लागि रकम निकाल्न दिएको थिएन । अमेरिकासँगै म्यानमारमाथि क्यानडा, युरोपियन युनियन र बेलायतबाट समेत प्रतिबन्धको घोषणा भइसकेको छ ।

फ्लोरिडा । अमेरिकी राष्ट्रपति पदबाट नियमित कार्यकाल पुरा गरी घर फर्किएका डोनाल्ड ट्रम्प आइतबार पहिलो पटक एक सार्वजनिक कार्यक्रममा उपस्थित भए । दोस्रो कार्यकालका लागि समेत निर्वाचन लडेका उनी पराजित भएका थिए । आफ्नो कार्यकालमा निकै आलोचित उनले पुनः नोभेम्बरको चुनावमा धाँधली भएको दोहोर्याए । आफ्नो हार नभएको समेत उनको भनाई छ ।

फ्लोरिडास्थित ओर्लान्डोमा आयोजित कन्जरभेटिभ पोलिटिकल एक्सन कन्फरेन्समा ट्रम्पले यस्तो दावि गरेका हुन् । आफू रिपब्लिकन पार्टीको भविष्य भएको भन्दै उनले नयाँ पार्टी खोल्ने योजना नभएको स्पष्ट पारेका छन् । ६ जनवरीको दिन ट्रम्पका समर्थकले संसद भवनमा हंगामा गरे । त्यसपछि उनको पार्टी भित्रै व्यापक आलोचना भइरहेको छ ।

यसबीचमा उनले नयाँ पार्टी खोल्नेबारे तयारी गरेको समाचार आएका थियो । त्यो समाचारको ट्रम्प स्वयमले खण्डन गरेका हुन् । ट्रम्पले आफूले नयाँ पार्टी नखोल्ने तर, सन् २०२४ को राष्ट्रपति चुनावमा उठ्न सक्ने बताएका छन् । विपक्षीलाई आफुले तेस्रो पटक हराउन सक्ने भन्दै उनले आगामी निर्वाचनमा उठ्ने संकेत गरेका हुन ।

तेस्रो पटक भन्नुको मतलव सन् २०२० को निर्वाचन पनि आफुले नै जितेको उनको दावि छ । उनीविरूद्धको दोस्रो महाअभियोग प्रस्ताव माथिल्लो सदन सिनेटबाट असफल भएको छ । त्यसकारण उनी २०२४ को चुनाव समेत लड्न सक्छन् ।