Category: अमेरिका

काठमाडौं । अमेरिकाको इलेक्ट्रोनिस डाइभर्सिटी भिसा(इडीभी) चिठ्ठाको नतिजा शनिवार राती सार्वजनिक हुँदैछ ।

काठमाडौंस्थित अमेरिकी दूतावासका अनुसार आज वैशाख २५ गते नेपाली समयअनुसार रातिको ९:४५ बजेबाट डिभी २०२२ को नतिजा सार्वजनिक हुने जानकारी दिएको हो ।

सो नतिजा हेर्नका लागि अनिवार्य रुपमा इडिभी भर्दा पाएको कन्फर्मेशन नम्बर अनिवार्य रुपमा रहेका छ ।

डिभी परेको जानकारीबारे कुनै इमेल नपठाउने तथा भिसा अन्तर्वाताका लागि अग्रिम शुल्क बुझाउन पनि इमेल, चिट्ठी या अन्य अनुरोध नपठाउने दूतावासले जनाएको छ।

यसरी चेक गर्नुहोस्

नतिजा हेर्नका लागि डीभी भर्दा पाएको कन्फर्मेशन नम्बर आवश्यकता पर्दछ । डिभी परेर/नपरेको हेर्न डिभी फारम भर्दाको कन्फर्मेसन पेजमा भएको नम्बर, आफ्नो थर र जन्म मिति आवश्यक पर्छ ।

डिभीका सम्बन्धमा फोन या ईमेलबाट गरिने सबै किसिमका सोधपूछहरु ग्राहक सेवा केन्द्रमा गर्नुपर्नेछ। डिभीको नतिजालाई काठमाडौंका डिभी भर्ने एजेन्सीहरुले निकै ठूलो विषयको रुपमा उठाएर पैसा समेत असुल्ने गरेका छन्।

ब्युरो अफ काउन्सुलर अफेयर्सको वेब साइटमा गई आफ्नो नाम र कन्फरमेसन नम्बर राखेर नतिजा हेर्न सकिन्छ।

नतिजा चेक गरेको पैसा लाग्दैन। डिभीको नतिजा कम्प्युटर प्रणालीबाट छानिने हुनाले यसमा अन्य कुनै प्रत्यक्ष अप्रत्यक्ष प्रभाव रहँदैन। डिभी भर्नेहरुले सोझै https://www.dvlottery.state.gov मा गएर आफ्नो नतिजा हेर्न सक्छन्।

यदि नम्बर बिर्सेको खण्डमा पनि Forgot Confirmation Number मा क्लिक गरी मागेको विवरण दिएर नतिजा हेर्न मिल्ने दूतावासले जनाएको छ ।

काठमाडौं । कोरोना महामारीसँग लड्न अमेरिकाले नेपाललाई करीव १ अर्ब रुपैयाँ (८५ लाख डलर) बराबरको सहयोग गर्ने भएको छ । कोभिड रोकथाम तथा नियन्त्रणका लागि नेपाललाई उक्त सहयोग गर्न लागेको नेपालस्थित अमेरिकी दूतावासले जनाएको छ । शनिबार नेपालस्थित अमेरिकी दूतावासले विज्ञप्ति जारी गर्दै युएसएआइडीमार्फत ८५ लाख डलर बराबरको थप आपतकालीन प्रतिकार्य सहयोग उपलब्ध गराउने घोषणा गरेको हो।

यो रकम रकम नेपाली जनताको रोगसँग लड्ने क्षमता विकासका साथै नेपाल सरकारको कोभिड १९ को जाँच, व्यवस्थापन, उपचार, संक्रमण नियन्त्रणमा खर्च हुने जनाइएको छ । तीन तहको सरकारका कोभिडसम्बन्धी विभिन्न कार्यक्रमलाई तीव्रता दिन समेत रकम उपयोग गर्ने बताइएको छ ।

न्यूयोर्क । डोनल्ड ट्रम्पका निजी वकिल एवम् न्यूयोर्कका पूर्वमेयर रुडी जुलियानीको घर र कार्यालयमा अमेरिकी सङ्घीय जाँच ब्यूरो (एफबीआई) छापा हानेको छ । उनको म्यानहटनस्थित घर तथा कार्यालयमा छापा मारेको बीबीसीले जनाएको छ । युक्रेनसँग लिएर उनको कारबाहीका सम्बन्धमा खानतलासी गरिएको बताइएको छ ।

सङ्घीय अभियोजनकर्ताहरूले युक्रेनी अधिकारीहरूलाई जो बाइडनविरुद्ध राजनीतिक रूपमा दुरुपयोग गर्न सकिने सूचना दिन बाध्य पार्न खोजिएका आरोपित गतिविधिमा जुलियानीको संलग्नताबारे छानबिन गरिरहेका थिए। ती गतिविधिकै कारण सन् २०१९ मा तत्कालीन राष्ट्रपतिलाई पहिलो पटक महाभियोग लगाइएको हो ।

बुधवार जुलियानीको अपर इस्ट साइड मेडिसन एभेन्यु अपार्टमेन्ट तथा पार्क एभेन्युस्थित अफिसमा छापा मारिएको छ । त्यहाँबाट विद्युतीय उपकरणहरू सहितका सामग्री जफत गरेको समाचारमा जनाइएको छ । युक्रेन सरकारको तर्फबाट जुलियानीले ट्रम्प प्रशासनसँग गैरकानुनी तरिकाले पैरवी गरेका थिए कि भन्ने बारे अधिकारीहरूले अनुसन्धान गरिरहेका छन्।

गत वर्षको राष्ट्रपतिय चुनावको अगाडि उनले वर्तमान राष्ट्रपति जो बाइडनका छोरा हन्टरका सम्बन्धमा अपराध ठहर्‍याउन सकिने सूचना सङ्कलन गरेका आरोपबारे पनि अनुसन्धान भइरहेको बीबीसीले जनाएको छ ।

अमेरिका । अमेरिकाले आस्ट्राजेनेकाको कोरोनाभाइरस खोप अरू देशलाई सहयोगस्वरुप उपलब्ध गराउने बताएको छ । अमेरिकाको खाद्य तथा औषधि नियामक निकायले यस खोप सम्बन्धी सुरक्षा मूल्यांकन गरेपछि सो खोप विश्वका केही देशलाई दिने भएको ह्वाइटहाउसद्वारा प्रकाशित विज्ञप्तिमा जनाइएको छ ।

सो विज्ञप्तिका अनुसार अमेरिकाले करिब ६ करोड मात्राको खोप केही महिनाभित्र निर्यात गर्न सक्ने बताइएको छ । विश्वभरि आस्ट्राजेनेकाको खोप प्रयोग भइरहेको भए पनि अमेरिकाको फुड एन्ड ड्रग एडमिनिस्ट्रेसन (एफडीए) ले सो खोपलाई भने अझै पनि स्वीकृति दिएको छैन ।

विश्वका कतिपय देश र संघसंस्थाहरुले अमेरिकाले ठूलो संख्यामा खोप राखेको बताइएको छ । यसकारण पनि अमेरिकाको आलोचना भइरेहको बताइएको छ ।उता अमेरिकी राष्ट्रपति जो बाइडेनका प्रमुख मेडिकल सल्लाहकारले अमेरिकाले आस्ट्राजेनेका खोप प्रयोग गर्ने निश्चित नभएको बताएका छन् ।

अघिल्लो महिनामा मात्र राष्ट्रपति बाइडेनले मेक्सिको तथा क्यानडालाई ४० लाख मात्रा आस्ट्राजेनेका खोप दिने वाचा गरेका थिए । यी दुई देशले भने आस्ट्राजेनेकाको प्रयोगलाई अनुमति दिएका छन् । अमेरिकाका छिमेकी देशहरु क्यानडा र मेक्सिको तथा अन्य दर्जनौँ देशले पनि अमेरिकी खोपको आपूर्तिमा पहुँच पाइयोस भनेर अनुरोध पनि गरिरहेका छन् ।

मिनसोटा\अमेरिका । अमेरिकामा एक अस्वेतः युवाको प्रहरीको गोलीबाट भएको मृत्युको विषयलाई लिएर प्रदर्शन भइरहेका छन् । यसै सन्दर्भमा मिनसोटामा भएको यो घटनामा संलग्न महिला प्रहरी अधिकारीलाई पक्राउ गरिएको छ । ती प्रहरी अधिकृतमाथि गैरन्यायिक हत्याको मुद्दा चल्ने भएको छ ।

बीबीसीका अनुसार ती प्रहरी अधिकारी किम पोटर हुन् । उनलाई गिरफ्तार गरि हिरासतमा राखिएको छ । पोटरले भने २० वर्षीय डन्टे राइटमाथि दुर्घटनावस गोली चलेको दावि गरेकी छिन् । उनले अचेत बनाउन प्रहार गर्नुपर्नेमा गल्तीले बन्दुक पड्कन पुगेको दाबी गरेको बीबीसीले लेखेको छ ।

त्यसबारे प्रतिक्रिया दिँदै राइटका पारिवारिक वकिल बेल क्रुम्पले हत्या सुनियोजित र शक्तिको गैरन्यायीक प्रयोग भएको बताएका छन्। पोटर र प्रहरी प्रमुख टिम गानन्‌ले ब्रुकलिन सेन्टर फौज नै छाडेका छन्। यो काण्डले त्यस क्षेत्रमाप्रहरी र प्रदर्शनकारीबीच तीन रात लामो झडप निम्त्याएको थियो ।

मिनसोटाको ब्यूरो अफ क्रिमिनल एप्रिहेन्सन (बीसीए) ले पोटरलाई बुधवार गिरफ्तार गरिएको जनाएको छ। उक्त मुद्दा अनुसार उनी दोषी ठहर भए बढीमा १० वर्षसम्म कैद र २० हजार डलरसम्म जरिवाना हुनसक्छ।

काठमाडौं\एजेन्सी । अमेरिकामा प्रहरीको गोलीले पुनः एक अश्वेत युवाको निधन भएको छ । यो घटनापछि बढेको तनावका कारण अमेरिकाका दुईवटा सहरका मेयरले आपतकालिन अवस्थाको घोषणा गरेका छन् । बीबीसीका अनुसार मिनियापलिस र सेन्ट पलका मेयरले सहरमा रातभर लागु हुने गरी कर्फ्यु आदेश जारी गरेका हुन् ।

बीबीसीका अनुसार २० वर्षीय डन्टे राइटलाई आइतवार ट्राफिक नियम उल्लङ्घन गरेको आरोपमा मिनसोटाको ब्रुकलिन सेन्टरमा कारबाट बाहिर निकालिएको थियो। त्यसक्रममा उनी आफ्नो कारभित्र प्रवेश गर्न खोज्दा खिचातानी भई प्रहरीको गोली लागेर उनको मृत्यु भएको प्रहरीले दावि गरेको छ । प्रहरीले उक्त घटनालाई दुर्घटनाका रूपमा अर्थ्याएको छ । तर, राइटको निधनपछि त्यस क्षेत्रमा प्रदर्शन बढेका छन् ।

प्रदर्शनले उग्र रूप लिन थालेपछि मेयरले आपतकाल घोषणा गरेका हुन्। मिनसोटाका प्रहरी प्रमुख टीम गानन्‍ले भने उक्त घटना एउटा दुर्घटना मात्र भएको बताएका छन् । उनका अनुसार प्रहरी अधिकारीले गल्तीवस गोली चलाएका थिए । गत वर्ष मारिएका जोर्ज फ्लोइडको हत्याको आरोपमा एकजना पूर्व अधिकारीमाथि चलिरहेको सुनुवाइका क्रममा समेत अमेरिकाको मिनियापलिसमा प्रदर्शन जारी छन् ।

अमेरिकी । अमेरिकी राष्ट्रपति जो बाइडेनले ‘घोस्ट गन’ भनेर चिनिने घरेलु उत्पादनको बन्दुक प्रयोगमा रोक लगाउने उद्देश्यले एक कार्यकारी आदेशमा हस्ताक्षर गरेका छन् ।

बन्दुकबाट हुने हिंसा अमेरिकाको महामारी हो र यो अन्तर्राष्ट्रियस्तरमै लज्जाको विषय हो भन्दै बाइडेनले कार्यकारी आदेश जारी गरेको उल्लेख छ । यो कार्यकारी आदेशलाई संसदबाट स्वीकृत गर्नुपर्ने छैन ।

स्थानीयस्तरमा उत्पादन हुने ‘घोस्ट गन’ दर्ता नहुने भएकाले पत्ता लगाउन कठिन हुने जानकारहरु बताउँछन् । अमेरिकी नागरिकले हतियार राख्न पाउने अधिकार अमेरिकी संविधानले सुनिश्चित गरेको छ ।

बाइडेनले जारी गरेको यस सम्बन्धी कार्यकारी आदेशलाई कतिपयले आफ्नो संवैधानिक अधिकार हनन भएको रूपमा हेरेका छन् ।

अमेरिकामा बन्दुकबाट हुने हिंसा टाउको दुखाइको विषय बनेको छ । एक कार्यक्रममा राष्ट्रपति बाइडेनले अमेरिकामा बन्दुकबाट हरेक दिन १०६ जनाको मृत्यु हुने गरेको तथ्यांक सुनाएका थिए ।

गत बुधबारमात्रै साइथ क्यारोलाइनमा भएको गोली प्रहारमा पाँच जनाको मृत्यु भएको थियो । त्यसैगरी मार्च महिनामा भएको बन्दुक आक्रमणबाट १८ जनाको ज्यान गएको थियो ।

वासिंटन डिसी । अमेरिकामा व्यक्तिगत सुरक्षाका लागि लिइने घरेलु बन्दुकको दुरुपयोग गरी हिंसा बढेसँगै अब घरेलु बन्दुकको प्रयोगमा रोक लाग्ने भएको छ । दर्ता नहुने र को सँग बन्दुक छ भन्ने पत्ता लगाउन नसकिने भन्दै राष्ट्रपति जो बाइडनले अमेरिकामा गोस्ट गन भनेर चिनिने घरेलु रूपमै उत्पादन हुने बन्दुक प्रयोग रोक्न लक्षित निर्देशन जारी गरेको बीबीसीले लेखेको छ ।

उनले विहीबार महामारीका बीच बन्दुकका कारणबाट भएको हिंसा अन्तर्राष्ट्रिय स्तरमै लज्जाको विषय भएको बताए । बाइडनले नयाँ निर्देशन कार्यकारी आदेश मार्फत् लागु गराँउदैछन् । यसो भएमा संसदको स्वीकृति चाहिने छैन ।

नयाँ आदेशमा निश्चित बन्दुकहरूबारे नियम तय गर्ने, पृष्ठभूमिबारे जाँच बढाउने र स्थानीय रूपमा हिंसा हुनबाट रोक्ने जस्ता विषयवस्तु समावेश गरिएको बीबीसीले जनाएको छ । हतियार राख्न पाउने अधिकार अमेरिकी संविधानको दोस्रो संशोधनले सुनिश्चित गरेको छ ।

यहाँ मानिसहरू बन्दुक नियन्त्रण सम्बन्धी कानुन आफ्नो संवैधानिक अधिकार माथिको उल्लङ्घनका रूपमा मान्ने गर्छन् । सोहीकारण राष्ट्रपतिलाई यो कानून कार्यान्वयनमा ल्याउन भने मुस्किल रहने समेत बताइएको छ । बुधवार साउथ क्यारोलाइनामा भएको गोली प्रहारमा पाँच जनाको मृत्यु भएको थियो।

मार्च महिनामा समेत अमेरिकामा दुईवटा बन्दुक आक्रमणमा १८ जनाको मृत्यु भएको थियो। बाइडनका अनुसार अमेरिकामा बन्दुकबाट हरेक दिन १०६ जनाको मृत्यु हुने तथ्यांक छ ।