Category: अमेरिका

काठमाडौं । रूसका राष्ट्रपति भ्लादिमिर पुटीनले बेलायत र अमेरिकाले युद्ध गर्न उक्साइरहेको आरोप लगाएका छन् । उनको यस्तो आरोप बेलायतको युद्धपोत ‘एचएमएस डिफेंडर’ रुसको नियन्त्रणमा रहेको क्रीमियाको सागर किनारको नजिकैबाट गएसँगै आएको हो । उनले यो कदमलाई पश्चिमा मुलुकले यूक्रेन नजिक मिलिट्री बेस स्थापित गर्ने प्रयास भएको समेत बताएका हुन् ।

अन्तर्राष्ट्रिय संचारमाध्यमहरुका अनुसार राष्ट्रपति पुटीनले टेलिभिजनबाट आफ्ना नागरिकलाई प्रत्यक्ष कुराकानी गर्ने क्रममा यस्तो बताएका हुन् । यो घटनाबारे एक जना सहभागीले के यो तेस्रो विश्वयुद्धको संकेत हो भनेर सोधेका थिए । यसको जवाफमा पुटीनले रुस आफ्नो जमिन रक्षा गर्न लड्न सक्षम भएको बताए । तर, ती मुलुकहरु युद्ध गर्न चाहे पनि जित्न नसक्ने उनको भनाई छ ।

उनका अनुसार एक अमेरिकी जासूस विमान समेत यो अभियानमा खटिएको पाइएको छ । रुसको आरोपका सम्बन्धमा भने बेलायतले अन्तर्राष्ट्रिय कानून अनुसार नै गएको बताएको छ । बीबीसीका अनुसार रूसी लड़ाकू विमान तथा तटरक्षक बलले एचएमएस डिफेन्डरलाई निशाना बनाउने चेतावनी दिएको थियो । रूसको तर्फबाट समेत गोलाबारी भएको बताइएको छ । यो घटना गत साताको हो ।

मिनेपोलिस । अमेरिकामा एक वर्ष अगाडी अश्वेत नागरिक जर्ज फ्लोयडको हत्या प्रमाणित भएसँगै एक प्रहरी अधिकारीलाई अदालतले साढे २२ वर्ष जेल सजाय सुनाएको छ । अफ्रीकी मूलका अमेरिकी नागरिक जर्ज फ्लोयडको हत्या गरेको प्रमाणित भएसँगै पूर्व पुलिस अधिकारी डेरेक शोविनलाई यस्तो सजाय सुनाइएको हो । हत्यामा दोषि सावित भएका उनलाई न्यायाधीशले पूर्वपुलिस अधिकारी डेरेक शोविनले आफ्नो पद र अधिकारको गलत प्रयोग गरेको बताए ।

साथै उनले जर्जमाथि क्रुर व्यवहार देखाएको समेत न्यायधिशले बताएको बीबीसीले जनाएको छ । गतसाल मेमा मिनेपोलिसमा निहत्था अश्वेत नागरिक फ्लोयडको घाँटीमा ९ मिनेटसम्म आफ्नो घुँडा राखेका थिए । यसले उनलाई चरम यातना दिई मारिएको थियो । उनले ९ मिनेट घुँडा घाँटीमा राखेको केही मिनेट पछि नै उनको ज्यान गएको हो । यो घटनालाई प्रत्यक्षदर्शीले भिडियोमा कैद गरेका कारण उनको वास्तविकता खुलेको हो ।

यो घटनापछि अमेरिकामा अश्वेत नागरिकहरुमाथि हुने विभेदबारे कडा आलोचना भएको थियो । अमेरिकी जूरीले अप्रिलमा प्रहरी अधिकारी शोविनमाथि दोस्रो डिग्रीको हत्या र अन्य कैयौं मुद्दामा दोषि ठहर गरेको थियो । शोविनका वकिलले भने उनको मनसाय हत्याको नभएको बताएका थिए । यसलाई उनीहरुले एक दुर्घटनाका रुपमा बचाउ गरेका थिए ।

उनीसँगै अन्य तीन पूर्व पुलिस अधिकारीविरुद्ध समेत नागरिक अधिकारको उल्लंघनको आरोपमा दोषि ठहर गरिएको छ ।अमेरिकी राष्ट्रपति जो बाइडेनले फैसलाको स्वागत गरेका छन् । जर्जका परिवारले समेत फैसलाको स्वागत गरेका छन् । मुद्दा दर्ता गर्ने समयमा भने फ्लोयडका भाई टेरेस फ्लोयडले अधिकतम ४० वर्ष सजायको माग गरेका थिए ।

मायामी । संयुक्त राज्य अमेरिकामा एउटा १२ तले भवन बिहीवार मध्यरातमा भत्किँदा कम्तिमा ९९ जना मानिस बेपत्ता भएका छन्। बीबीसीका अनुसार एक जनाको मृत्यु भएको पुष्टि भएको छ । धेरै जना भग्नावशेषभित्र पुरिएको आंशका छ । हराएकामा कैयौँ ल्याटिन अमेरिकी आप्रवासी रहेको बताइएको छ । यो घटना मायामीमा भएको हो । त्यहाँका मेयरले सङ्घीय सरकारसँग सहयोग गर्न आह्वान गरेका छन् ।

भवन भत्किनुको कारण प्रस्ट भएको छैन तर सुरक्षा प्रमाणीकरणका लागि त्यहाँ पुनर्निर्माणको काम भइरहेको बताइएको छ । मायामी डेडकी मेयर डेनीयला लेभिन काभाका अनुसार हालसम्म १ सय २ जनाको अवस्था पत्ता लागेको र ९९ जना अझै बेपत्ता रहेको जानकारी दिइन्। सर्फसाइडमा रहेको उक्त भवन सन् १९८० मा बनेको थियो। खोजीकार्य जारी रहँदा सानो आगलागी समेत भएको थियो । त्यसलाई २० मिनेट भित्रै नियन्त्रणमा लिइएको स्थानीय अग्नि नियन्त्रण प्रमुखले बताएका छन्।

फ्लोरिडाका गर्भनरले घटनास्थलमा पुगेर उद्धारको काम अझै जारी रहेको र त्यति ठूलो संरचना ढलेको देख्नु पीडादायी रहेको बताएको बीबीसीले लेखेको छ । उद्धारकर्ताहरूले क्रेनहरूको प्रयोग गरी नजिकै रहेका अपार्टमेन्टमा बसिरहेका मानिसहरूको उद्धार गर्ने प्रयास गरिरहेका छन् । भवन भत्किए पछिको अवस्था देखेका एक व्यक्तिले सीएनएन समाचार संस्थासँग सन् २००१ मा न्यूयोर्कमा दुई वटा टावरमा गरिएको आक्रमणसँग तुलना गर्दै त्यहाँ ९\११ कै घटना जस्तो देखिएको बताएका छन् ।

वासिंटन डिसी । अमेरिकामा हुलाकबाट हुने मतदानलाई सहज गराउने गरि आएको चुनावसम्बन्धी नयाँ नियम ल्याउने राष्ट्रपति जो बाइडेनको प्रयास असफल भएको छ । बीबीसीका अनुसार रिपब्लिकनहरूले राष्ट्रपति जो बाइडनको प्राथमिकतामा परेको चुनावसम्बन्धी नयाँ नियम लागु गर्ने प्रयास विफल पारेका हुन् ।

हुलाकबाट गरिने मतदानलाई सहज बनाउने नीति सो विधेयकमा थियो । दलीय आधारमा मत विभाजन हुँदा पक्ष र विपक्षमा समान ५०, ५० मत खसेसँगै यो प्रयास असफल भएको हो । बाइडेनले यो विधेयकलाई आफ्नो राष्ट्रपतीय कार्यकालको लडाइ मान्छन् । विधेयकको पक्षमा वकालत गरिरहेकाहरूले त्यसले सन् १९६५ को मतदान अधिकारसम्बन्धी ऐन यताकै सबैभन्दा दीर्घकालीन प्रभाव पार्ने रहेको बताएका छन् ।

मत विभाजनतर्फ १०० सदस्य सिनेटमा अधिकांश कानुनका प्रस्ताव अघि बढ्न ६० मत आवश्यक पर्छ र माथिल्लो सदनमा दुई दलबीचको विभाजन ५०, ५० रहेको छ। चुनाव सुधारका लागि ह्वाइट हाउसबाट जिम्मेवारी पाएकी उपराष्ट्रपति कमला ह्यारिसले विधेयक विफल हुँदा बैठकको अध्यक्षता गरिरहेकी थिइन्। उनले लडाइ अझै नसकिएको प्रतिक्रिया दिएकी छिन् ।

चुनावको दिन अगावै गरिने मतदानलाई विस्तार गर्ने बाहेक उक्त कानुनले चुनावी अभियानमा दिइएका चन्दा सहितका योगदानलाई थप पारदर्शी बनाउन र निर्वाचन क्षेत्र निर्धारण गर्दा दलीय प्रभाव कम हुने कुरा सुनिश्चित गर्ने डेमोक्र्याटहरुको विश्वास छ ।

अलबामा । अमेरिकाको अलबामा राज्यमा आँधीका कारण भएको सडक दुर्घटनामा परि कम्तिमा १३ जनाको मृत्यु भएको छ । समाचार एजेन्सीहरुका अनुसार बालबालिका उक्त संख्यामा मानिसहरुको ज्यान गएको हो । आँधीका कारण १८ वटा गाडी एकै स्थानमा दुर्घटनामा परेका थिए ।

आँधीले यो भेगमा ठूलो नोक्सानी गरेको खबर छ । आँधीपछि वर्षा भएको थियो । बाढीले मानिसहरु बगाएको आशंकामा खोजी कार्यसमेत तिब्र रुपमा भइरहेको छ ।

तेहरान । कट्टरपन्थी नेता इब्राहिम रईसी इरानका नयाँ राष्ट्रपति बनेका छन् । उनलाई अमेरिकाले प्रतिवन्ध लगाएको छ । रइसीको पक्षमा ६२ प्रतिशत मत आएको छ । बीबीसीका अुनसार रईसी इरानका वरिष्ठ न्यायधीश समेत हुन् । रुढीवादी बिचारधाराका उनी अमेरिकाका कट्टर विरोधी मानिन्छन् । राजनीतिक बन्दीलाई फाँसीको सजाय दिने निर्णय गरेको भन्दै उनीमाथि अमेरिकाले प्रतिवन्ध लगाएको हो ।

उनी यसअघि सन् २०१७ मा समेत राष्ट्रपतिमा चुनाव लडेका थिए । हसन रुहानीसँग राष्ट्रपति पदमा हारका ६० वर्षीय रईसीले सन् २०१९ मा न्यायालय प्रमुखको रुपमा नियुक्त भएका हुन् । इरानमा सर्वोच्च नेतापछि राष्ट्रपति पद दोस्रो वरीयताको हो । अहिले इरानमा सर्वोच्च नेता अयोतोल्लाह अलि खमेनी छन् । रईसीले आगामी अगष्टमा कार्यभार सम्हाल्ने छन् ।

जेनेभा । रुस र अमेरिकी राष्ट्रपतिबीच पहिलो पटक आमनेसामने भेटवार्ता भएको छ । जी सेभेन बैठकका दौरान यूरोप भ्रमणमा पुगेका दुबै नेताबीच जेनेभामा भेटवार्ता भएको हो । रुसी राष्ट्रपति व्लादिमीर पुटीन र अमेरिकी राष्ट्रपति जो बाइडेनबीच भेटवार्ता भएको हो ।

बाइडेनले पुटीनमाथि आफुलाई हराउन भूमिका खेलेको आरोप लगाइरहेका छन् । यी दुई नेताबीचको भेटमा रूसी राष्ट्रपतिले पहिले हात दिएका थिए । त्यसपछि बाइडेन एक कदम अगाडी बढेर हात मिलाए ।

त्यसपछि दुबैले क्यामरामा आफ्नो पोज दिएका थिए । रूसी राष्ट्रपति व्लादिमीर पुटीन र अमेरिकी राष्ट्रपति जो बाइडेनबीचको भेटलाई संचारमाध्यमले निकै चासोका साथ हेरेका छन् । उनीहरुबीचको कुराकानीको विवरण भने सार्वजनिक भइसकेको छैन ।

पुटीनका विरोधी एलेक्सी नवेलनीलाई जेलमा राखेको विषयमा अमेरिकाले कडा टिप्पणी गर्दै आएको छ । अमेरिका र रुसबीचको सम्बन्ध चिसिएको समयमा भएको भेटले महत्वपूर्ण सम्बन्ध सुधार हुने अपेक्षा विश्लेषकहरुले गरेका छन् ।

लण्डन । अमेरिकाले विश्वका करीव १ सय मुलुकलाई कोरोना खोप अनुदानमा दिने भएको छ । त्यसका लागि ५० करोड डोज खरीद गर्ने घोषणा खबर सार्वजनिक भएको छ । अमेरिकाले दुई वर्षको अवधिमा ५० करोड फाइजर खोपको मात्रा करिब १०० वटा देशलाई उपलब्ध गराउने छ ।

बीबीसीका अनुसार यो वर्षभित्र २० करोड खोपको मात्रा वितरण गरिनेछ । बाँकी सन् २०२२ मा वितरण गरिनेछ। अमेरिकालाई गरिब देशहरूमा कोरोनाभाइरस विरुद्धको खोपको दर बढाउन दबाब छ । अमेरिकी राष्ट्रपतिका रूपमा पहिलो विदेश भ्रमणको सुरुवात गर्दै बाइडन यूकेमा ओर्लिएपछि यस्तो खबर बाहिरिएका हुन् ।

ह्वाइट हाउसले ५० करोड खोपको वितरणबारे आधिकारिक रुपमा भने बताइसकेको छैन । विश्वका लागि अमेरिकाको खोप रणनीतिबारे सोधिएको प्रश्नमा बाइडनले आफुसँग भएको योजनाको छिट्टै घोषणा गर्ने बताए । अमेरिकी राष्ट्रपति र ब्रिटिश प्रधानमन्त्री बोरिस जोनसनले ब्रिटेनको दक्षिण पश्चिम भेगमा जी सेभेनको शिखर बैठक अघि बिहीबार पहिलो पटक भेटवार्ता गर्दैछन्।

आठ दिने भ्रमणमा राष्ट्रपति बाइडनले महारानीसँग विन्डजर क्यासलमा भेट्नेछन् र राष्ट्रपतिको रूपमा पहिलो नेटो शिखर बैठकमा पनि भाग लिनेछन्। युरोपको आफ्नो भ्रमणको अन्त्यमा उनले आफ्ना रुसी समकक्षी भ्लादीमिर पुटिनसँग भेट्ने कार्यक्रम रहको बीबीसीले लेखेको छ ।