Category: अमेरिका

काठमाडौं । अमेरिकाले जुन महिनाभरिमा कोभिडविरुद्धको आठ करोड मात्रा खोप विश्वभर बाँड्ने योजना सार्वजनिक गरेको थियो । यसमध्ये पहिलो चरणमा २ करोड ५० लाख मात्रा खोप वितरण हुने भएको छ ।

बीबीसीका अनुसार संसारभरि उचित तरिकाले अनि उच्च जोखिममा परेका देशहरूलाई ती खोप बाँडिनेछ । अमेरिकी राष्ट्रपति जो बाइडनले कोभिड १९ विरुद्ध १ करोड ९० लाख मात्रा खोप विश्वभरि खोप बाँड्ने कोभ्याक्स कार्यक्रमलाई दिने घोषणा गरेका हुन् ।

यसरी आउने खोप अनुदानमा आउने छ । त्यसका अतिरिक्त ६० लाख मात्रा भारत तथा क्यानडा लगायतका देशलाई प्रत्यक्ष दिने घोषणा समेत बाइडेनले गरेका छन् ।
विश्वलाई आठ करोड मात्रा खोप वितरण गर्ने अमेरिकी योजनाको यो पहिलो एक तिहाइ हिस्सा हो। खोप बाँडिने देशहरूको सूचीमा नेपाल पनि रहेको छ।

काठमाडौंस्थित अमेरिकी दूतावासले नेपाललाई प्रत्यक्ष सहयोगसहित कोभ्याक्समार्फत् कुल ७० लाख खोप एसियाली देशहरूलाई दिइने जनाएको छ। यसमध्ये कति नेपालमा आउने छ भन्ने चाँही दुतावासले पनि खुलाएको छैन । अमेरिकी राजदूत र्‍यान्डी बेरीले अमेरिकाले प्रत्यक्ष खोप सहयोग गर्ने देशहरूमा नेपाल पनि रहेको भन्दै त्यसबारे थप विवरण चाँडै आउने उल्लेख गरेका छन् ।

न्यूयोर्क । अमेरिकी अन्तरिक्ष निकाय नासा अब शुक्रग्रहको मिसनमा केन्द्रित हुने भएको छ । यो दशकको अन्त्यसम्ममा शुक्रग्रहबारे जान्न दुईवटा अन्तरिक्ष मिसन सञ्चालन गर्ने योजना नासाले सार्वजनिक गरेको हो । बीबीसीका अनुसार पृथ्वी जीवन्त भए पनि उसको सबैभन्दा नजिकको छिमेकी ग्रह किन आगोको गोला बन्यो भनेर जान्ने नासाले लक्ष्य लिएको छ।

शुक्रग्रहको वातावरण तथा भौगोलिक विशेषताहरू परीक्षण गर्ने उद्देश्यका साथ दुईवटा मिसन त्यहाँ पठाउने घोषणा नासाले गरेको हो । ती मिसन प्रत्येकका लागि ५० करोड डलर बजेट प्राप्त हुने समाचारमा उल्लेख छ । ती मिसनहरूले वैज्ञानिक समुदायलाई ३० वर्षदेखि यता पहिलो पटक उक्त ग्रह अनुसन्धान गर्ने मौका दिने बताइएको छ । यसअघि नासाले शुक्र ग्रहनजिक म्याजेलन मिसन सन् १९९० ताका पठाएको थियो।

त्यसपछि उक्त ग्रहको नजिक भएर अन्य यानहरूले यात्रा नगरेको बीबीसीले लेखेको छ । नासाले दुई मिसनका प्रस्तावहरू वैज्ञानिकहरूबाटै समीक्षा गराएर तथा तिनको वैज्ञानिक महत्त्व तथा विकास योजनाको सम्भाव्यताको आधारमा छानेको बताएको छ।
ूयी दुई मिसनहरूले शुक्रग्रह कसरी आगोको गोलाजस्तो संसार बन्न पुग्यो जहाँको सतहमै पनि सिसासमेत पग्लन्छ भनेर जान्न खोज्ने बताइएको छ । सूर्यभन्दा दोस्रो स्थानमा रहेको शुक्रग्रह सौर्यमण्डलकै सबभन्दा तातो ग्रह हो।

काठमाडौं\एजेन्सी । चिनियाँ प्रयोगशालाबाट कोभिड१९ को उत्पत्ति भएको हो कि होइन भन्नेबारे थप अनुसन्धान गर्न अमेरिकाले गरिरहेको प्रयासमा चीनले आपत्ति जनाएको छ । बीबीसीका अनुसार अमेरिकी राष्ट्रपति जो बाइडनले भाइरसको उत्पत्तिबारे गुप्तचर निकायले तयार पार्ने प्रतिवेदन सार्वजनिक हुने अपेक्षा व्यक्त गरेसँगै चीनको प्रतिक्रिया सार्वजनिक भएको हो ।

चिनियाँ विदेश मन्त्रालयले अमेरिकालाई ‘राजनीतिक आवरण दिएको र अरूलाई दोषी देखाएको’ आरोप लगाएको छ। चीनले कोभिड १९ र चीनको वुहान शहरस्थित अनुसन्धान प्रयोगशालाबीच कुनै सम्बन्ध नरहेको समेत स्पष्ट पारेको छ । कोभिड १९ सबैभन्दा पहिले सन् २०१९ को अन्त्यतिर वुहान शहरमा देखा परेको थियो। त्यसयता विश्वभरि १६ करोड ८० लाखभन्दा बढी सङ्क्रमण पुष्टि भएका छन् । ३५ लाखभन्दा बढीको मृत्यु भइसकेको छ ।

चिनियाँ अधिकारीहरूले प्रारम्भिक सङ्क्रमण वुहानको समुद्री खानेकुरा पाइने बजारसँग जोडिएको बताएका थिए । यसलाई आधार मान्दै वैज्ञानिकहरूले उक्त भाइरस जनावरबाट मानिसमा सरेको सैद्धान्तिक धारणा राखेका थिए।

उता, विश्व स्वास्थ्य सङ्गठन (डब्ल्यूएचओ) ले समेत यसै वर्षको स्थलगत अध्ययनपछि उक्त भाइरस कुनै प्रयोगशालाबाट बाहिर आउने सम्भावना एकदमै न्यून रहेको बताएको थियो । यता, अमेरिकी सञ्चारमाध्यमले भने भाइरस चिनियाँ प्रयोगशालाबाट उत्पत्ति भएको सम्भवतः दुर्घटनावश चुहिएको हुन सक्ने भन्दै समाचार प्रकाशित गरिरहेका छन् ।

काठमाडौं । सरकारले कोभिड –१९ विरुद्ध खोप सहयोग गर्न अमेरिकासँग आग्रह गरेको छ । परराष्ट्रमन्त्री प्रदीपकुमार ज्ञवाली र अमेरिकी उपविदेशमन्त्री वेन्डी शेर्मनबीच टेलिफोन वार्ता भएको थियो । उक्त अवसरमा मन्त्री ज्ञवालीले खोप सहयोग गर्न अनुरोध गरेका हुन् ।

ज्ञवालीले विकासोन्मुख देशहरुलाई अमेरिकाले बचत भएका खोप वितरण गर्दा नेपाललाई प्राथमिकतामा राख्न आग्रह गरेको परराष्ट्र मन्त्रालयले जानकारी दिएको छ । उपविदेशमन्त्री शेर्मनले महामारीसहित नेपालको सामाजिक –आर्थिक क्षेत्रमा नयाँ अमेरिकी सरकारले निरन्तर सहयोग गर्ने आश्वासन दिँदै दशकौँ पुरानो अमेरिका–नेपाल मैत्रीको सराहना गरेको बताइएको छ ।

प्रक्रियामा रहेका अमेरिकी सहायताअन्तर्गतका महत्वपूर्ण परियोजनाबाट नेपालको समृद्धिका थप द्वारहरु खोल्ने विश्वास पनि उनले व्यक्त गरे । उनीहरुबीच नेपाल–अमेरिका सम्बन्धका विविध पक्षका साथै कोभिड –१९ को महामारीको सन्दर्भमा सहयोग र अन्तर्राष्टिय चासोका साझा विषयमा विचारमिवर्श भएको थियो ।

आगामी असोजमा नेपालले आयोजना गर्ने योजना बनाएको सगरमाथा संवादका सन्दर्भमा दुवै पक्षले जलवायु परिवर्तनका प्रभाव कम गर्ने प्रतिबद्धता व्यक्त गरेका छन् ।

वासिंटन डिसी । स्वदेशमा खोप अभियान तिब्र बनाएको अमेरिकाले जुन महिनाको अन्तिमसम्म अन्य मुलुकलाई खोप दिन शुरु गर्ने भएको छ । अमेरिकाले करीव ८ करोड डोज खोप विभिन्न मुलुकलाई दिने तयारी गरेको हो । राष्ट्रपति जो बाइडेनले यस्तो जानकारी गराएका छन् । उनका अनुसार जुन महिनाको अन्तिमसम्म संसारका विभिन्न मुलुकले अमेरिकी खोप पाउने छन् ।

उनले कुन देशले कति खोप पाउने भन्ने चाँही खुलाएनन् । यसरी हुने वितरण अनुदान हो वा बिक्रि भन्ने समेत खुलेको छैन । ह्वाइट हाउसमा सोमबार आयोजित एक कार्यक्रममा बोल्दै उनले अमेरिका बाँकी संसारका लागि खोपको माग आपूृर्ति गर्न तयार रहेको बताएका हुन् । अन्धाधुन्ध फैलिरहेको रोग र मृत्युले जुन मुलुकलाई अस्थिर बनाए पनि त्यसको असर र खतरा अमेरिकामा समेत हुने भन्दै उनले खोप वितरण गरिने जनाएका हुन् ।

अहिले अमेरिकाले फाइजर, मोडेर्ना र जोन्सन एन्ड जोन्सनको खोप आपतकालिन प्रयोगमा अनुमति दिइसकेको छ । अक्सफोर्ड, अष्ट्राजेनेकाको खोपले भने अनुमति पाएको छैन । सोहीकारण अमेरिकाले ती कम्पनीबाट निर्मित ४० लाख डोज खोप मेक्सिको र क्यानडालाई प्रदान गरेको छ ।
अमेरिकाले रूस र चीनले भन्दा बढी खोप बाँकि विश्वलाई बाड्ने योजना बनाएको छ । यसवापत कुनै शर्त वा सहयोग भने नमाग्ने रणनीति अमेरिकाको छ ।

काठमाडौं । अमेरिकी सरकारले नेपाललाई आगामी साताबाट स्वास्थ्य सामग्री सहयोग गर्ने बचन दिएको छ । नेपालका लागि अमेरिकी राजदूत र्‍यान्डी बेरीले आज उपप्रधानमन्त्री ईश्वर पोखरेलसँग टेलिफोन वार्ता गर्दै यस्तो आश्वासन दिएका हुन् । उनका अनुसार आगामी साताबाटै स्वास्थ्य सामग्री नेपाल आउन थाल्ने जानकारी आएको उप्रधानमन्त्री पोखरेलको सचिवालयले उल्लेख गरेको छ ।

सामग्री के हुनेछ भन्ने चाँही खुलेको छैन । राजदूत बेरीले खोप सहायता दिने बारे समेत पहल गरिरहेको जानकारी गराएका छन् । सो अवसरमा उपप्रधानमन्त्री पोखरेलले नेपाललाई सक्दो छिटो खोप उपलब्ध गराउन आग्रह गरेका थिए । कोरोना भाइरसको संक्रमणबाट जुधिरहेको नेपाललाई खोपको आवश्यकता रहेको भन्दै अमेरिकी सरकारको सहयोग चाहेको उल्लेख गरेका थिए ।

उनले खोपसँगै भेन्लिटेलर, पिपिई, अक्सिजन सिलिन्डर, अक्सिजन कन्सेन्ट्रेटर, मोबाइल अक्सिजन प्लान्ट, औषधि, अस्थायी अस्पताल स्थापना गर्न आवश्यक पूर्वाधार र आवश्यक विज्ञ जनशक्तिको सहयोगको अपेक्षा अन्तर्राष्ट्रिय समुदायबाट गरिएको उनले बताएका छन् । बेरीले नेपालमा रहेका अमेरिकी नागरिकलाई घर फर्काउन हवाई उडानको अनुमति समेत माग गरेका छन् ।

वासिंटन डिसी । अमेरिकाले अब १२ देखि १५ वर्षसम्मका किशोर किशोरीम समेत कोरोना विरुद्धको खोप दिने भएको छ । न्यूज एजेन्सी रोयटर्सका अनुसार यो अभियान यसै साता अर्थातः १३ मे बाटै शुरु गर्ने तयारी छ । अमेरिकी नियामक निकायले सोमबार फाइजर-बायोएनटेकको कोभिड १९ विरुद्धको खोप किशोरावस्थाका मानिसमा समेत दिन आपतकालीन मन्जुरी दिएको छ ।

यो उमेरका किशोर किशोरीमा खोप दिइने संसारकै पहिलो अभियान हुने छ । कोरोना विरुद्धको अभियानमा यसलाई निकै ठूलो सफलता समेत मानिएको छ । खासगरी विद्यालय जाने उमेर समुहका बालबालिकालाई यो खोप दिँदा आगामी दिन अझ सहज हुने अपेक्षा गरिएको छ ।

अमेरिकी राष्ट्रपति जो बाइडेनले राज्यहरुसँग आफ्नो राज्यमा रहेका युवामा छिटो खोप उपलब्ध गराउन आह्वान गरेका छन् । उनले अभिभावकसँग समेत आफ्ना बच्चालाई खोप अभियानमा सामेल बनाउन आह्वान गरेका छन् । अमेरिकामा १६ वर्षभन्दा माथिका मानिसका लागि भने खोप अहिले पनि उपलब्ध छ ।

न्यूयोर्क । अमेरिकाको सबैभन्दा ठूलो इन्धन पाइपलाइन कोलोनियलमा र्‍यान्समवेअर साइबर हमला भएको छ । बीबीसीका अनुसार साइबर हमलासँगै स्थानीय सरकारले आपतकाल घोषणा गरेको छ। साइबर हमलाकारीको समूहले शुक्रवार त्यस्तो हमला गरेको हो । अहिले सेवा सुरु गराउने प्रयास जारी रहेको समेत समाचारमा उल्लेख छ ।

कोलोनियल पाइपलाइनले प्रतिदिन २५ लाख ब्यारेल इन्धन आपूर्ति गर्छ । इस्ट कोस्टको निम्ति डिजेल, ग्यासोलिन तथा जेट इन्धनको सम्पूर्ण आपूर्तिको यो ४५ प्रतिशत हो। शुक्रवार साइबर हमलाकारीले यस पाइपलाइनको सेवा रोकिदिएका थिए । विज्ञहरूका अनुसार सोमवार इन्धनको मूल्य २.३ प्रतिशतले बढ्न सक्नेछ । तर यदि प्रभाव लामो समय रह्यो भने मूल्यमा असर पनि धेरै पर्ने बीबीसीले लेखेको छ ।

विभिन्न सूत्रहरूले उक्त र्‍यान्समवेअर हमला डार्कसाइड नामक साइबर आपराधिक समूहले गराएको पुष्टि गरेका छन्। सो समूहले बिहीवार कोलोनियलको नेटवर्कमा छिरेर करिब १०० जीबी डाटामा पकड जमाएको हो ।
त्यसपछि समूहले फिरौती मागेको हो । फिरौती नदिए सबै डाटा सार्वजनिक गरिदिने चेतावनी साइबर हमलाकारीको छ ।